قهر الأرواح

البارت الرابع

الكتابه...
محزنه شعور انك تمسك
قلما وتنسج حزنك وهزائمك صعبآ.

لا تنسون التعليق بين الفقرات + تصويت.

~~~~~~~~~~~~~~~~~~~~~~~~~~~~~~~~~~
قهر الأرواح  (1).
ب قلمي 🖋️.
< بنين >.

~~~~~~~~

صباح :- لج زيييينب ليش هييج ولك بويه الحكني..

فزيت من مكاني عله صوت ابوي وهوه يصرخ.
كمت من مكاني ورحمه فزت وياي هم وهيه ترعش خايفه.
طلعنه  لِبره ونشوف ابوي  گاعد ب الگاع ويلطم بيده عله راسه ويصرخ ويبجي.
ما اعرف شسوي ب ذيج اللحظه الخوف الحزن منظر ابوي الي يبجي الصخر وهوه يصيح ب اسم زيينب كان صعب النه كلنه .
 

كل ضني جان امي خلص ميته لان مستحيل ابوي يبجي ب هيج طريقه حته من توفه والده ما  بجه هيج شلون لو زينب. والدتي شلون لو الي عاشت وياه سنين ما توقعته ينهار عليه لهل الدرجه بس انهدمت توقعاتي .

احاول اقترب منه بس اخاف.
صباح :- ولج زينب بويه ليش هيج ليش عفتيني  ولكم وين اروح وين اروح راحت من ايدي وين الكه روحه بعد ولكم شلون.
يلطم عله وجه ب حرگه وأعصاب وجهه الأبيض النوراني صار احمر دم وعيونه شلالات مي.

ريمار :- بابا.
نطقت الكلمه وشفتي ترجف على وشك البكاء.
التفت الي وكال.

صباح :- بابا تعالي وعاينيني تعالي
تعالي وكليلي شسوي ولج امج راحت راحت بعد ما ترجع.
يحجي ويضرب عله فخاذه حسيت ب الألم وهوه يضرب ويردد ما ترجع راحت بعد. ما ترجع.

عله صراخه اجو الجيران وكلمن يصفن ب وجه الخ  ما يعرفون شبي ما يعرفون يواسوه.

ابو قاسم.:- خويه استهدي ب الرحمان وكلي شبيك طمنه شصاير فهمنه.

صباح :- ولكم راحت مررتتي راحت  ولج يمههههه.

كاله اخر كلمه بصراخ قوي وشگ دشداشته عله طوله من منطقت الصدر وضل يضرب عله صدره ويصيح ويصرخ مثل النسوان.

تخبلو الوادم وكلمن يحاول يكضه ومحد يگدرله.
عرفت انو خلص تيتمت صرت يتيمه الام   صرت وحيده ما عندي التواسيني  صرت.
ريمار اليتيمه.
مرت ايام الفاتحه ب أصعب ما يكون.
ابوي بعد ما توفت امي قطع الاكل ل فتره وهوه جان عنده  ضغط وكل شويه يتخربط.
انتكست حالته من سيئ إلى اسوء.

جنت اجيله اتوسل بي حته ياكل  وجان يكتفى ب شكم كلمه تكسر الگلب.

صباح :- اذا تگدرين تخلينه تاكل اكل وراه اني
ما دام زينب تحت التراب ما يلوح بلعومي لكمه وحده  مثلي مثله.
ورايح وراه..
يحجي ويشهك مثل الأطفال.
الأشخاص الي تعيش وياهم وتأكل وتشرب وتشاركهم كل يوم ب حياتك صعبه تصحه عله نفسك وتشوف كومه التراب مذبوبه عليهم.

بعد تقريباً اسبوع وره موتت امي توفه عمي اخو بابا وكان أقرب شخص ل ابوي واحنهم عليه. ما تحمل ابوي الصدمه ومات.
تخربط ابوي ولاخر مره.
وكان سبب الوفاه ارتفاع ب الضغط او ب الأخص كان انتحار ع البطيئ لان منع عن نفسه الاكل وهذه يُعتبر قتل نفس.

الحب الجان شايله ابوي ل امي حب طاهر عفيف حب ما ينوصف.
كل ما يموت احد جنت اسمع كلمه.

" محد يموت وره اليموتون"

بس عرفت هذي المقوله غلط.لان فعلان اكو يموتون وره الماتو وأولهم ابوي.
الله يرحمه..

رجعت من ذاكرتي الأليمه عله صوت الرعد.
جانت الدنيا تمطر.
رزق  وفير وخيرات االله هواي بس تُعتبر ب النسبه للفقير نقمه مو نعمه .
اغلب الفقره بيوتهم  ما تتحمل المطر والزلازل والهزات.
اتذكر واحد جان من منطقتنه بيته حيييل تعبان
جان رجال كبير ب العمر عايش هوه وحفيده الصغير عمره ١٠ سنوات.
الحجي زوجته متوفيه وابنه وزوجه ابنه  متوفين هم كلهم ب حادث وبقه بس الطفل ورباه الحجي.
وتوفه الحجي والطفل العام الي خلص لان وگع عليهم السكف ب مطره قويه وهمه جانو تحته والسقف جان كله حديد وبواري  مكسر عظامهم تكسر.

الله يرحمهم ب رحمته الواسعه.
( ترحمولهم يا جماعه)

انتبهت للساعه جانت ب ١.
اتأخر الوقت حييل وباجر ورايه طلعه ل بيت ام سجاد هم ورايه هلك وكرف من صباح الله خير.
بس وعدتني ب مبلغ زين بلكت حته يفيدني ب هاي الفتره كلش محتاجه الفلوس منا اقصاد رحمه ومنا مُتطلباته.

بس المفروض أأدبه حته تتعلم.
راح امنعه من المصروف وما انطيه انشوف شلون تتحمل.

نمت وتغطيت زين لان الجو بارد  وما بيه حييل المرض ناقصني بس المرض حته تكمل .

~~~~~~~~~~~~

في مكان آخر
~~~~~~~~~~~

ليله خميس والناس تسهر عله فلم لو تسهر ويه عائلته بس اني باقي اتعارك عله شغلات منتهيه وخلصانه.

:-  يعني عاجبك هذه الحال هااا؟
هاي خامس مره اخطبلك وانته تفشلني گدام العالم اي  دكافي لا تخليني احلف ما اطبلي ل بيت واخطبلك مره لو تخضر نخله ب راسك.

:- هسه اني مودي عليج خطبي انتي تروحين تخطبين  بدون ما ادري واعرفج تردين تخليني گدام الأمر الواقع
بس يمه دخيلج بس فكري بيه زين اكو احد يجوله ويكلوله حضر نفسك خطبنالك وهوه ما يعرف منو الي ياخذه. ؟

:- اي شسويلك مو تعبت اكلك فلانه تكلي لا اكلك فلتانه تكلي لا يمه اخطبلك بت خالتك لا ما تعجبني اخطبلك بت عمك لا ما تعجبني اشوف وحده ب الشارع هم ما ترضه كلي منين أجيب بعد بنات بغداد خلصن وانته ما مقرر وما ترضه عله اي وحده اجيبه.؟

إسحاق :- يمه رحمه لذاك الرجال الطيب عوفيني ب حالي شاكيلج الحال كايلج اريد اتزوج؟ يابه خلي افضه وانطيه الج من الاخير زواج ما اتزوج ابد وشتردون  تسوون سوو.

كلت كلامي وطلعت من غرفته ادري جاي ااذيه ب كلامي بس إلى متى؟.
الي متى ابقه ساكت.

امي صار اله ٣ أشهر كامله تلح عليه اتزوج وكل شويه رايحه تخطبلي وحده مدري منين ما منين وتكلي خطبتلك بعد فشله واني اعصي عليه وما اقبل وتروح تتفشل گدام الناس ما يهونلي افشله هيج بس ما ارتاح للبنات الي تجيبهم ب اسلوبهم ب طريقه كلامهم مع العلم كلهن شفتهن ب الشوف الشرعيه  واستغفر الله كلهن زايحاته للمستحه
وما يفديني .

احله شعور وأصعب شعور  من تعرف الإنسان من نظرته تعرفه من نيته انو هوه زين او لا.

طلعت اباب الصاله الدنيا تمطر وبارده بس ما اطفي النار الي ب گلبي.
الحِمل الي خلاه ابوي عله كتافي وراح
حييل ثگيل  ويكسر الضهر.
مسؤليه جبيره.
ست خوات وبنيه .
سبعه مسؤول عنهن.
زهراء
وفاطمه
وبنين
وتبارك
وزينب
ونور 
ست خوات ب رقبتي مسؤليتهن وتربيتهم واكلهم وشربهم ومصروفهن عليه.
و اسينات بنت اخوي محمد الله يرحمه .
توفه سنه ٢٠١٤  ب زمن داعش راح وترك وراه طفله عمره سنه وحده. امهه بعد وفاه زوجهه تركت الطفله وتزوجت وتركت مسؤوليته عليه من شافتني متعلق بيه.

خواتي  خمسه  متزوجات ووحده ما متزوجه الي هيه نور مع العلم أجوه خطابه بس امي رفضت اتكول صغيره ومنو يبقه يمي.

امي معوقه وباقيه عله الكرسي المتحرك وحالته تكسر گلبي واني اشوفه محرومه من المشي والحركه.
اشوف نضره الحزن ب عيونه كلما نعوفه ل وحده تبقه صافنه ب رجليه وتاخذه الحسرات.
ب لحضه خلوي ويه نفسي.
سمعت صوت وراي صوت صغير رقيق عذب احبه كلش يأثر ب گلبي كلما اسمعه.

اسينات :- بابا ليت تالع بله باده. ( بابا ليش طالع بره بارده)
درت وجهي اله اشوف الملاك الي گدامي.

فتحت اله اديه واجتني تركض هيه وعرانيصه كوه تتحرك من السمن.
ضحكت عليه
علكيف يله وصلتني.

شلته عله اديه وبقيت اشمره لِفوك وهيه تضحك.
ضحكته ترن ب البيت وتنطي روح حلوه.
بنت اخويه  بنيتي.
ربيته عله انو بنتي من عمره سنه وهسه عمره ٣ سنوات شكله حلو.
بيضه وشعره اسود طويل وعيونه عسليه عله اخوي الله يرحمه خدوده الحمر أسنانه الي نصهن واگعات من الحلويات الي تاكلهن منظر اذا تضوج هوه اول خيار راح يفرحك .
من اشوفه اشوفه گدامي وترجع ذكرياتي وياه.
اخ يا محمد فركاك صعبه وصوتك بعده ب اذني وصاياك عله امي وخواتي محفوره حفر ب گلبي
الشي الوحيد الي مصبرني هاي الايه.

يقول الله في كِتابه الكريم.

بسم الله الرحمن الرحيم.
{ ولا تحسبن الذين قتلوا في سبيل الله امواتاً  بل احياءً عند ربهم يرزقون}
صدق الله العضيم.
تنفست بعمق ومسحت عله جهه گلبي واني اردد ب الايه درت وجهي للي جنت اباوعله وباوعت عله قطرات المطر القويه من الباب.

اسينات :- بابا خلي اندب ( انطب).

بسته بوسه قويه ب خده ودخلت بيه لِجوه.
إسحاق :- انطب لويش ما انطب يروح ابوج.
دخلته للبيت وتوجهت لغرفتي  دخلت وسديت وراي الباب.
خليته عله السرير  وفتحت اله  التلفون اتابع بي علما اسبح لان التلفون يشغله والشي الوحيد الي يخليه تگعد ب مكانه اخاف عليه علما اسبح منو يكول ما تطلع اتاذي نفسه؟.

دخلت الحمام وسبحت ع َ السريع وتوضيت.
طلعت لكيته عله گعدته عله وضعه.

فرشت السجاده  وصليت ركعتين وهديتهن ل روح محمد وابويه.
عاده اسويه قبل لا انام كل وقت فراغ عندي ما اكول مستمر بيه لان مرات اتأخر ب الجيه وتعبان اذب روحي وانام ما ادري ب شي.

صدقت ودرت وجهي عله السرير شفت ملاكي وحبيبتي ودنيتي وروحي .
نايمه والتلفون يشتغل يمه  وهيه غافيه.

لميت سجادتي وخليته ب مكانه المخصص اله.
توجهت للسرير اخذت التلفون وطفيته.
عدلت مكان بنيتي وخليته ب وضعيه مريحه.
اخذت من الكنتور لحاف ثاني وخليته فوك الأول.
شغلت الدفايه شويه قبل لا انام بعده اطفيه بس علما تدفه الغرفه لان ما اگدر ابقيه للصبح لا تحركنه.
اخذت تلفوني وبقيت اگلب بي  شويه وافتح الرسائل والاشعارات.
لفت انتباهي صوت رساله جديده ومن منو؟
من حسن.

ضحكت عله الرساله الي دازه بسرعه خابرته اعرفه گاعد ما ينام هيج وقت.

يرن التلفون وما يجاوب .
خلصت الرنه وهوه ما جاوب.
ثواني واتصل عليه.
فتحت عليه الخط.

إسحاق :- ادگ عليك متجاوب وينك؟

حسن :- يخوي  جنت افرش اسناني وعود اريد انام.

إسحاق :- احلف.

حسن :- وحق العباس.

إسحاق :- من لمته  تنام من وقت؟

حسن :-  يا وقت راح تصير ب ٢.

إسحاق :- اللهم صل على محمد وآل محمد. الله هداك وبديت اتوب قبل تنام ب ٦ الصبح شجاك هسه.

حسن :- يا اخي لا شغله ولا عمله خلينه نطلع ندور شغل من الصبح بدل النوم خفاره عندي ب الليل اليوم اشوف شي الصبح.

إسحاق :- ليش؟  وشغلك ب المستشفى؟ .؟ليش ادور.

حسن :- خلينه نكون صريحين إسحاق اني لو ابقه عله راتب التمريض عمري وحياتي ما اگدر اجمع  فلوس المهر لان راتبي يا دوب يكفي مصاريف البيت وعلاجي.

إسحاق :- وخلينه نكون صريحين اكثر  حسن انته لو تعوف الحلويات وتهتم ب صحتك اكثر  هسه انته لام فوك نص الفلوس.

لك هوه بس  فلوس الحلويات الي تشتريه ب الشهر فوك ١٠٠ الف وكلما تاكل تتخربط وتضرب انسولين والعلاجات ب صفحه انته جاي تهمل نفسك ب نفسك وجاي اتاذي نفسك وتخلص فلوسك اصحه يا اخي.

حسن :- إسحاق والله ما اگدر اشتهي اكل حلاه بس مو مثل قبل قبل اشتهي اكلي نستله لو ثنين هسه بس اريد اكل اكلي ٥ وأكثر مو مشكله الاكل المشكله كلما اتذكر السكر اكل ب الزايد مو ب ايدي ما تفهمني إسحاق...​

إسحاق :- افهمك والله العضيم افهمك بس صحتك جاي تدمر عله ساعه توگع وتموت وانته تاكل حلويات؟ حته موتك يفشل وخطيبتك تترمل قبل لا تزوجك.

حسن :- لازم تختمه ب النهايه.

إسحاق:- لعد شعبالك.

حسن :- هسه عوفنه من هاي السوالف وانته ما ناوي؟.

إسحاق :- عله شنو؟

حسن :- لا تسوي نفسك غشيم تعرف عله شنو احجي.

إسحق :- رحمه ل والديك مو انته هم وراي منا امي ومنا انته عوفوني هيج مرتاح.

حسن :- الزواج وراك وراك انته مو عله اساس متدين؟ وتعرف حرام عله الرجال ميتزوج  لذلك السالفه  متخلص منه.

إسحق :- استغفر الله يابه  تركونه من السالفه هاي لان اني مليت واحاول اقنعكم يا حسن تره الشغله مو لعب شنو مثلآ اني اي وحده اشوفه تعجبني اروح أجره من ايده واعقد عليه محكمه وشرعي ؟ تره قليل تلكالك بنيه حاليآ بيه كُل المميزات الي أريده.

حسن:-  اي بله استاذ إسحاق شنو مواصفاتك الي تريده؟

إسحاق :- بسيطات.

حسن :- اي بله اتحفنه  خويه .

إسحاق :- بيضه طويله  شگره عيونه كون..

حسن :- خضر لو زرگ.

إسحاق :- لا كون عسليات  رشيقه وذكيه ونادره وصوته حلو وو.

حسن :- عذرا عزيزي الزبون لاكن هذا المنتج غير متوفر  في بلدك .

إسحاق :- ما تشوفني متأني منتضر شريكه حياتي.

حسن :- فارسه أحلامك.

إسحق :- ههه اي تگدر تكول هيج
صدگ اجيت انسه لمته موعدك للدكتور.

حسن :- باجر.
تجي وياي؟

إسحاق :- اكيد لان ادري بيك اذا كلك الدكتور شي  مَراح اطبقه وتضحك علينه.

حسن :-لا تعبت اني خلص راح التزم جاي اتاذه حييل وجسمي صاير يخوف.

إسحاق :-  سجل ب نادي رياضي ونضم اكلك شويه شويه تتعود امشي عله النظام الغذائي الي انطاه الك الدكتور وتصير زين.

حسن :- انشاء الله الله كريم.

إسحاق :- يله تصبح عله خير اريد انام ورايه طلعه باجر.

حسن :- وانته من اهله.

سديت من عنده التلفون.
وطفيت الدفايه.
خليت راسي عله المخده ونمت نومه عميقه ما حسيت اله عله  امي تصحى بيه.

زمن ( ام إسحاق) :- يمه اگعد صارت ب ٩ خاف تتأخر.

فتحت عيوني ب ثقل وشفت گدامي امي ب كرسيه المتحرك.

إسحاق :-  من تمشين ب الكرسي وتدفعينه تتعبين ومو زين عليج الحركه هواي ليش تتحركين من مكانج؟ تگدرين تتصلين عليه ليش تعاندين.

زمن :- انحرمت من المشي تريد تحرمني من الحركه ابيتي خليني عله راحتي مرتاحه هيج.

عدلت گعدتي  وفركت عيوني ب نعاس
وجهت نضري اله وحجيت وياه بكل جديه.

إسحاق :- تعرفين لو اكو علاج ما خليتج لحضه وحده هنا يمه خلص رحمي تفسج ما اريد  اتعبين تره والله جاي اتعبيني هيج صرت اخاف اطلع واتركج خاف نور تلتهي عنج وتتاذين.

زمن :- شنو يمه شايفني طفله صغيره.؟ تره شكبرني وبحيلي.

إسحاق :- ادري يمه والله ادري بس خايف عليج وغلاتج عندي .
زمن :- ادري يمه ادري يله يله كوم ما عدك وقت.

يقتلني عناده ويقتلني اهماله ل نفسه اتعب نفسه وتعبني.
عفت اسينات نايمه وغطيته.
غسلت وجهي وفرشت اسناني عله السريع.
طلعت للمطبخ ولكيت نور جاي تسوي ريوك.

إسحاق :- صباح الخير.

نور :- صباح النور وين اسنات.؟ بعده نايمه مو؟

إسحاق :- اي عفته نايمه خليه لان راح تشلع گلبج ب الشغل ما دامه نايمه خلصي قبل لا تگعد.

نور :- اي والله صح كلامك اصبلك چاي؟
. إسحاق :- اي والله ولو تصير زحمه عليج...

نضرت الي ب نضره عود تحجي صدگ ضحكت عليه اني  ونور مرات نشاقه شقه ثقيل.
ومرات نتكلم ب جديه واحترام لدرجه واحد يتعجب من الثاني.
عاقلين مو بأيدنه.

صبتلي چاي وتريكت.
خلصت وردت اطلع بس شفت اسينات توه طالعه من الغرفه وتفرك ب عيون.. شعره مكفش وجه معبس وعيونه حمر.
ملابسه مبهذله شي صاعد وشي ناز
لابسه برموده وبدي ب هذه البرد مدري شتحس الثانيه ها من تعاندني .
منضره تحفه يخليك تريد تلزمه وتعضه.
الي مسكتني عنه كون البيت دافي ما راح تمرض.

اسينات :- بابا وين لايح ( رايح).
شلته اوديته للحمام اغسل وجه.

إسحاق :- عندي شغل بابا.

اسينات :- خلي الوح وياك.
. إسحاق :- بارده  بابا مو زين عليج.

اسينات :-  لا خلي الوح فدوه.

إسحاق :- خلي اغسلج وابدلج واخذج وياي.

دخلته للحمام وغسلت وجه واديه ورجليه.
مصاحبه زعله ما تريد تغسل دنيه بارده.
إسحاق :- لج بابا شلون خلي اغسلج.

اسينات :- باده ( بارده).

إسحاق :- ميخالف ميخالف خلصنه ما بقه شي.
خلصته ونشفت وجه كوه.
خليت نور تجيب  اله ملابس علما ريكته.
بدلت اله وخذيتهه وياي ب السياره  مع انو الجو ثلج بس چلبت اله تمشي وياي.

لبسته كومه ملابس وهيه منا سمينه صارت ما تتنفس خنگته.
بس ميخالف اخنگه ولا تتمرض.
صعدته ب السياره وربطت اله حزام الأمان.
وتوجهت ب طريقي ماخذه وياي.

~~~~~~~~~

:- بس ٨٠ شلون اني كلت للبنات اخذ درجه كامله. ؟

:- هذه الموجود  لا تنسين انتي راسبه اصلا ولو مو اني اصلا ما تنجحين حته ب اليومي اساعدج وانطيج درجات لو تموتين متوصليه.

تقربت من طاولته وارتكزت ب اديه الاثنين عليه.
رجعت شعري وره اذني  ب بطئ وكلت ب كلام مُركز.

:- لا تنسه انو بينه اتفاق من بدايه السنه
تسوي الاريده واسوي التريده.

:-  ب كُل المواد البقيه عدهم زفت بس اني درجاتج ناار شلون ترديهم ما  يشكون.؟

:- همه  بس لو يسمعون الكلام مثلك نكون بخير.

:- مو اي احد مثلي اني غير.

:-  ههههه صدگ غير.

~~~~~~~~~~~~~~~~~~~

قهر الأرواح ب قلمي 🖋️
<بنين >

من الصبح گاعده اكتب بارت وراح اروح للمدرسه
اريد كون من ارجع الكه التعليقات الف.
فجرو البارت  حته اطول البارت الجاي اكثر.