စိတ်တွေရှုပ်ထွေးနေတဲ့ အချိန်၊ ဘာကိုမှ မဖမ်းဆုပ်ထားချင်တော့တဲ့ အချိန်မှာပဲ တိုက်တိုက်ဆိုင်ဆိုင် အစ်ကို့ကို တွေ့ရှိခဲ့ရတယ်။ ဆုံတွေ့ရတာမျိုး မဟုတ်ဘဲ တွေ့ရှိရတယ်လို့ သုံးနှုန်းရခြင်းက ကျွန်တော်က တဖက်သတ်အနေနဲ့ အစ်ကို့ကို မြင်တွေ့လိုက်ရလို့ပါပဲ။
အချစ်ဆိုတာ ဝတ္ထုတွေ၊သီချင်းတွေ၊ ရုပ်ရှင်တွေထဲမှာပဲ လှပတယ်လို့ ခံယူထားခဲ့ဖူးတယ်။ အစ်ကိုဆိုတဲ့ ချောက်နက်နက်ထဲ သက်ဝင်မိသွားတဲ့အခါ အကျဉ်းတန်တဲ့ လောကကြီးက နေပျော်စရာ ကောင်းနေတာမျိုး။ အထီးကျန်ပြီး နာကျင်ရတဲ့ နေ့ရက်တွေက ပန်းတွေပွင့်ဝေလာ သလိုမျိုး။ ဘာကိုမှ မဖမ်းဆုပ်ထားတော့ပါဘူးလို့ ဆုံးဖြတ်ထားပြီးမှ တွယ်ငင်ရစ်နှောင်မိတာမျိုး။
ပျင်းရိဖွယ်ရာ တစ်နေ့တာအတွက် အစ်ကို့အပြုံးတွေက အားဆေးတစ်ခွက် ဖြစ်ခဲ့ရတယ်။ အစ်ကိုခြေရာချန်ရစ်ခဲ့တဲ့ နေရာတွေဆီ အရောက်သွားနိုင်ဖို့ ကျိုးကြေနေတဲ့ မျှော်လင့်ချက်တွေကို အသစ်တဖန် ပြန်တည်ဆောက်ခဲ့တယ်။
အစ်ကို့ကို လွမ်းဆွတ်တမ်းတမိတဲ့ နေ့ရက်တွေမှာ နေဝင်ချိန်ကို တိတ်တဆိတ်ကြည့်မယ်။
အစ်ကို့ကို သတိရတဲ့နေ့တွေမှာတော့ နားမထောင်ဖြစ်တော့တာ ကြာပြီဖြစ်တဲ့ အချစ်သီချင်းတွေနားထောင်မယ်။
၁၄/၁/၂၀၂၃ (၁၁:၃၉)