لابأس يانور الحياة ودفئها
لابأس ياوجه الرضا الفتان
لابأس، سوف تمر مثل سحابة عجلا
وتصبح في ذرى النسيان
وابسم لحا الله الخطوب ودكها
ليهون هذا الحزن في وجداني
حق الجمال عليك ان تزهو به
ماجئت حلوا هكذا لتعاني
......
بقلمي...
زينب
تصويت+تعليق
♡♡♡♡♡♡♡♡♡
غسق...
نظراته الي مركزهن ع الطريق
شتت تفكيره واني اكله
_زينه معالي؟
ضرب الستيرن بقوة وهو يكول
_سودنتني هل معالي
_شبيها سمعتك تعيط عليها
_اااخ يا الله اخ هل خبلة من كل عقلها جاي رجلها لبيت ابوها ويتودد الها وتريد ترجع اله ومصدكته
_خليها ماغير زوجها
_سكتي غسق روحي طالعه
شكله يصير يخوف من يعصب كانو مو عزيز كبالي
_عزيز راح ترجعني للبيت لو نروح الامك
_اول شي مو اسمها امك لو تكولين عمتي مو احسن
_اسفه عمتي ام عزيز ارتاحيت
_مو شغلة ارتياحي يا غسق بس عيب تكوليها هسه يمي عادي فهمتج بس يم الغريب مو حلوة بحقي وحقج
_اي عرفت قصدك
_اي صايره شطورة
_انت شبيك عصبت على معالي ترا خطية البنيه وانت صرت تخوف من تعصب
_بعد حطت معالي براسها يابه عيفيها مبين تخافين من اعصب
_على شنو اخاف بلا
_عيونج لاتكلبيهن
كلبت عيوني واني اباوعله لوه ايدي وهو يسوق
صدك نرفزني بحركته بس سكتت وهو سكت اذا احجي يزيد بتصرفاته
وصلنه للبيت قبل لا انزل كال
_منا ورايح طلعه من الكلية ماكو
_هسه اني وين طالعه مو هل راجعه للبيت
_طلعه من البيت بدون علمي ماكو صوتج دوم اسمعه مبايلج ماتغلقينه نظراتج تعدليها
جريت نفس واني اريد اصرخ واكتل نفسي من حركه الكلب
_ماشي استاذ عزيز صار اكو شي بعد
_حبيت هاي الصار دوم اريد اسمعها
_صار دلل راح تروح العمه
_اي من الاول هيج لا ماروح اريد اشوف صخام معالي
_ترا اني مو طفلة وتعلمني عزيز اعرف الصح من الخطا
_لا طفلتيش لو طفلة فلا اباوع لعيونج وها سلميلي على البابا
كالها وهو يرفع حاجبه كانو ينتظر رد على شي خطأ اني مسويته نزلت من السياره ودخلت للبيت حتى مالتفتت علي ولا ودعته
دخلت للبيت الي مسوينه هوسه جهال حنان اخت تميم ومصطفى ومرتضى ماعرف ليش حسيت صوت عزيز بكل وقت وياي نظراته وجهه اقنع نفسي واني بعيده عليه انو ماريده ولازم اتقبله بس من اشوفه وجه لوجه اشوفه شخص ثاني
عمه ميساء الي وجودها ب المطبخ يعني النفس الطيب ب الاكل
دخلت على بيبي الي كاعد يمها جدو يكلب ب القنوات ب التلفزيون سلمت عليهم وكعدت يمهم كالت بيبي وهيه تلزم ايدي
_خيبة ايدج ثلج
_اي بيبي كلش بارده
_يمه هم تخابرين بشاير تطمنين عليها
_لا بيبي
_ليش ولج هاي خيتج لاتصيرين كطعيه غسق
ماعرف ليش كلمتها رنت براسي "كطعيه"
معقولة اني نفس ماتكول بيبي
كال جدو وهو يايد كلامها
_جدو ترا هنه خياتج هم ومالهن ذنب بشي لاعبالج طفولتهن ورديه مثل تفكيرج ضاكن هم ولوعات يلا وصلن هنا
بدت بيبي تسولف على ابوهن وعلى عذابهن هواي شغلات جنت مفتقره اسمعهن صار اشهر هنا بس ماعرف شي عنهم
كلام بيبي الي غير هواي من تفكيري
كلت الجدو ورا ماخلص كلامه
_بس جدو اني مو قصدي ابتعد عنهم او عندي شي ضدهم بس مريت بفتره صعبه كلش احتاجيت اطلع من هاي الفتره وحدي
_افهمج و جدو سولفلي ابوج كلشي الحمدالله على كل حال
_عزيز رجعني من الكلية هنا هو
_ب البصره رجع لو بعده
_لا راح الاخو كال غير وقت اجي
ردت انطيهم خبر عن جيه عزيز لان ماريد يتفاجؤن بي
رحت لغرفتي اغير ملابسي وفاجاني اتصال حسين الي مختفي بعد ماتجاهلت اتصالته وهسه رجع يخابر ترددت احاجي وضليت على ترددي
اخاف من المواجهه بهاي حيل جبانه
ماريد يكلي عفت مرتي ماريد الكلام الكاله الي عزيز بحق حسين يطلع صح
رجع اتصال مره ثانيه وثالثه
حسيت ب الكره لنفسي
شكد ساعدني وماتركني بعازه هسه جايه متناسيه كلشي
جاوبته وعيوني مغرغره ب الدموع
_الو حسين
جر نفس وهو يكول
_الف مبروك غاليتي صديقتي انشالله اشوفج احلى عروس
_يبارك بيك شلونك
_هيج متجاهلتني شكد هين عليج
_ماعرف شنو اكول حسين حياتي كلش تغيرت ورا ماجيت هنا ورا مانخطبت ب الذات ماصرت ذيج غسق الي جانت رغم التعب ماخذه حريتها ب هواي شغلات تعرف مجتمعاتنه واهلنه
_افهمج هواي غسق ماتوقعت يجي يوم وتقبلين بمثل عزيز
_ليش شبي عزيز
ماعرف ليش تنرفزت من كلامه حسيت جاي يوجه شي بكلامه الغامض
_مابي شي اكثر شخض يعرف عزيز اني المهم الله يوفقج
بعد كلام وعتاب دار بيناتنه خلصت مكالمتنه الي مغزاها سؤال يدور بالي شنو يقصد عن عزيز وليش ماجاوبني معقولة حسين براسه غايه او مجرد يريد يشتت تفكيري
بشائر..
مرت ايام واشهر واني كل فتره اروح للبصره بكل مره يروح غيث لدوامه اروح بس ابد مارتاح لان بالي يمه
تعودت حيل علي صرت اشوفه اكثر من اهلي خصوصا من نطلع يشوف العوائل الي متكفل بيهم حيل افتخر بي اضل دوم اردد الشكر هيج قلب طيب من نصيبي
خلصت كليه وتخرجت جنت حيل فرحانه انو خلصت
دوم موضوع الحمل بالي بس غيث بكل مره يسد الموضوع ويكول رزق ربج لاحكمه عليه بس تبقى بنفسي يصير عندي طفل راجعت دكتورة ومجان اكو سبب يمنع الحمل
صبح والنعاس بعيوني كوة كعدت اسوي ريوك
رحت الغيث النايم جهه يمنى ومكتف ايديه من ينام
ندسته اكثر من مره واني اكعده
_غيث يلا اكعد يمنه نروح
فتح عيونه وهو يثاوب ويرجع يغمض
_اول شي صباح الخير
_صباح العافيه حبيبي يلا صحصح
_هيج مستعجله على روحتي
شكد جنت مختنكه والدمعه بطرف عيني بس مابين اله اسوي نفسي طبيعيه لان اكثر من مره يروح يكلي ضليت افكر بيج من عفتج تبجين
_مو مستعجله بس يعني على ما تتريك وتروح تسلم على امك وخواتك وتخلص طلعاتك صاير العصر ااااخ لو الموصل تتحرر اصير ب الف خير
كام للحمام ساكت واني افكر لو رجع شلون يرجع مقهور وياخذله ايام بس يصفن ويفكر بالي ماتو وياه اكثر من مره الاحظه عيونه تدمع بس يسكت ياخذ فتره وره مايرجع يلا يتاقلم هنا بس تبقى روحه هناك
كمت كملت الريوك وهو كعد يسشور بشعره
اخذت منه السشوار واني اسشورله
نشفته ومشطت شعره
_وليدي المرتب المدلل صرت تجنن
كاعد واني واكفه كدامه حضني من بطني وهو ساكت عيوني غرغرت ب الدموع واني امسحهن صوتي ماكدر احجي الغصه بلعومي
خربطت شعره بيدي واني اصبر على نفسي
_يلا امشي نتريك
_ماريد شي
نزلت دموعي واني اكله
_يلا كوم تريك
_يجوز اخر ريوك الي وياج اتريك ليش لا
_شو انت ضليت تخويط روح غيث انت وريوكك سديت نفسي
جنت احجي من بين دموعي الي تطيح على راسه وهو على وضعه
_من تبطلين بجي اضل ماخويط على كولتج
_ترجع غيث مثل كل مره تدري احلى لحظات من اشوفك راجع احس الكاع ماتشيلني من الفرحه تصير فراشات بطني
_خل اخابر على سديم وتكلي بشائر تبجي ياويلج
_غيث يعني ماتكدر تروح غير محافظه عفيه سويلك نقل
_ماكدر شنو فرقي عن الي هناك
_فكر بيه يالهي شبيك غيث اني شنو موقعي بحياتك اذا مخلي شغلك اولوياتك كلش زين نعرف ماتحتاج الراتب وعندك خير يغطي الراتب لو راح
مو كافي صارلك سنه بالجهاد خليني ارتاح غيث شنو ذنبي هيج كلبي متعلعل
جر نفس وهو يكول
_ذنبج عراقيه
غمضت عوني واني ابعد راسه من بطني وابعد ايدينه من خصري
_علمود هيج ماتريد اطفال وماتهتم للموضوع علمود لايعيشون الي اعيشه انا تدري اتيتم من صدك بعدك
_عدنا اطفال احنه ويحبونه بعد شنو نسوي ب الاطفال وداعتج ماتتيتمين دومني وياج عدل ميت
_هسه يلا كوم
_حضرتيلي الجنطه والبدلة كويتيها
_اي
كام حضني وهو يشم بركبني ويحجي
_عذريني على اي تقصير لو بيدي اضمج بروحي وهوى ماياذيج
سكتت واني اسمع كلامه الي يفطر كلبي على كيف
_من ارجع اخذج للدكتور علمود كتفج لاتعبين نفسج من ترحين هناك ارتاحي لاتتحركين هواي ويزيد الوجع
جان عندي وجع بكتفي وماكدر احركه زين كتله قبل شهر وماناسه رغم مارجعت كتله لان ادري بي مايفرغ
_يلا ع الريوك حتى برد الجاي روح اشربه بارد
_هو انتي يوميه تجيبلي جاي بارد
_غيث الخبيث الي يسمعك يصدكك اني رايحه اتريك مايعجبك الجاي لاتتريك
_اي اروح اغسل بي وجهي
_غيييييييث
_اشاقه والله ههههههه صايره بسرعه تعصبين وين بشيرة الهادئة
_انت تخلي هدوء
خلص يومي بين ضحكته وسالفته مامتمنيه تخلص هل ساعات بدل علمود نطلع للبصرة بس جان كلبي يوجعني علي ماريد اعوفه لزمت ايديه الدافيه بين ايدي
_ماطول غير اسبوعين
_شلون اعوفج
_وتجاوب على مكالماتي
_صار تدللين
رحنه بسيارته واني مختنكه وساكته قبل لا نوصل للبيت انطاني فلوس وهو يكول
_هاي مصرف الج وبيهن ٢٥٠ الف خلي تميم ياخذهن للعائلة هل شهر ماكدرت امر عليهم
_غير مره تروحلهم حبيبي لاتشيل همهم
_بشائر فد مشتهي محشي
_ماكتلي اسوي الك
_مو سويتيلي قبل كم يوم بس ماعرف عبالك وحده تتوحم كاعد اشهه ب الطريق
_خننزل بمطعم
كشت روحه من كتله هيج ضحكت علي واني اكله
_ههههه لا خلص اني بس اوصل لبيت جدو اسويلك انت تضلل للعشه ماتروح مو
_لا بشورة زحمه خليها من ارجع
_ اني عاجبني اطبخ
وصلنه للبيت ماجذب نظري غير سديم مو سديم الاعرفها سديم الشاحب وجهه رغم مكياجه نظراتها التعبانه
سديم...
لازمه راسي الي موتني من الوجع اريد بس اخلص من هل وجع عيوني الي تاذيني اكثر
من حركت كلبي شمرت الكتاب بعيد عني ونمطلت ب الكاع البارده
فتره مراجعه للوزاري ولازم مافوت وقت ولا التهي بشي
نرجس الي ماخذه غرفه البنات تدرس بيها
باخر فتره بعد صراع طويل ويه عمه ميساء وعباس قبلو يخطب جوري بس جانت فرحته مو طبيعيه
خابرت البشائر من وجع راسي اريد شي يهدأ الوجع بس جان جوابها مثل كل مره لاتدنكين لا تعبين هواي
هو من التعب هيج يصير بي
كل ماتقرب الامتحانات كل ماتعب اكثر ونفسيتي تتعب
وجود تميم خفف كلشي
عمه كوثر الي صرت ماشوفها لان ملتهيه ادرس وهيه دائما عند خوانها وخواتها نادرا تجي للبيت ماخلص من كلامها بكل مره تشوفني بيها
ضليت على موقعي واني نايمه وعيني ع السكف والكتاب مركون يمي
جنت مختنكه بشكل مو طبيعي احس دراستي مو صحيحه اريد اختفي ولا ادرس
نفتح الباب عبالي نرجس بس طلع تميم عدلت كعدتي واجه كعد يمي وهو ياشرلي انام على رجله
_مكافي دراسة ارتاحي شويه
نمت على رجله وغمضت
_ماريد ادري خنعرس احسلي
_هههههه ها هااا سديم
_اشاقه وياك شبيك صدكت
_راح يجون بشائر وغيث
_بشائر لو ماتجي احسن يروح غيث للواجب وتخلصها مناحه ادري عليمن
_نشوفج بلا من اروح للجبهه ماتخلصيها مناحه
لزمت ايده الفوك راسي واني اضمها على كلبي
_سويها وشوف
_شسوين مثلا
_مو بكيفك تميم ترا صعبه حيل اني متعوده يوميه اشوفك
_وبيبتج عينها علينه كل شويه وكالت البنيه لاتكربها ادري ماكل البنيه انا
_اي طبعا بيبي فلذة كبدي حشاشه يوفي تخاف علي
_خديجه احجي عدل مو جريتي خيط
_اااا تميم شمسويتلك تعيب على حجيي انت مدري شلونك وياي ماتريدني مبين من حجيك
جر اذني وهو يرفعني من رجلة ويكعدني كدامه لازم اذني
_منو المايريدج ولج
_ماتريدني ماتكول مرتي امر اشوفها لو بجذب كلي سديم ليش ماتعشيتي
_ترا شمس من جايتلج عشه البارحه انا صبيته الج شنو عبالج شمس تروح ترتبلج صينيه وتجيبها الج
_ليش ماجيت انت تدرب مقهورة من امس لان ماجيتني
_اذا اجي يمج ماخليج تدرسين لان مايهون علي اشوفج تعبانه
_عود اذا رسبت ابطل لو لا
_غيرت السالفه اللوتيه ترا ماترسبين تتوقعين انتي هيج جاي تعبين بعدين كله يكضي بس انتي الدراسة كلش ماثره عليج هرموناتج مخربطه وصايره كلش حساسه
_اهووو تميم كوم منا
_تطرديني اشو ماكو احترام كلش زايعه المستحه
_مابيه حيل حتى احترم
_نطلع حبيبي غيري جو
_وين نروح مثلا ماريد هوسه وصوت
_نروح للمنتجع لو اخذج ع الكورنيش
_بكيفك اني حتى ماطالعه ماندل شي
_يلا كومي بدلي
غيرت ملابسي ورتبت وجهي التعبان بمكياج خفيف طلعت ويه تميم بعد ماطلعت روحي بيبي يلا قبلت اروح
بس صعدت يمه خلص مكالمته وهو يكلي
_من رخصتج ست سديم مسحي الحمره
_حلو لونها ترا
_اي حلو دم القرد مدري الغزال
_لو ماجايه احسن هسه صارت الحمره الحمره دم قرد نعمله عليك
_سديم مسحي الحمره شمسويه بروحتج
انطاني الكلينس مسحتها بكل حركة كلب
_هسه تمام
_اي
_على فكره صاير نكدي
_اي اعرف
_وماتحس بس تنطي اوامر
_اي
_كرهتني بعيشتي
_خوش
مجرد ماشفته متجاهلني دمعت عيوني بس التفت علي بجيت ماعرف ليش جنت حيل تعبانه وماريد هاي تصرفاته وياي رغم اعرف اني النكديه واني المتعبه بس دوم ماتحكم بتصرفاتي اريد اطلع حركتي بي اريد يحس بنفس التعب الاحس بي
ركن السياره ع الرصيف جان صوت اذان المغرب يملي الشوارع
مسح وجهي وهو يكول
_سديم اعرف ضايجه واعرف تحجين بدون ماتعرفين شتكولين هدأي نفسج عليمن هيج تضوجين بنفسج
_اني صايره نكديه مو صايره غثيثه هواي
_بس شوفتج يمي كافيني سديم اعرف شكد تعبانه واعرف عندج طموح تنجحين باحسن معدل اني وياج مو ضدج بس مو غلط تنطين نفسج استراحه قصيره بعيدا عن التفكير
_تميم ماشايف مصطفى ومرتضى شلون ضالين مبهذلين
ومحد يلحك يدرسهم لا اني ولا نرجس ولا عمه ميساء تلحك حتى شكلهم مبهذل ابوي الي كل يوميه وجاي عليهم صار اشهر مافك منهم عبالك اني بس ب الدراسة ملتهيه من احط الكتاب اريد اقرا افكر بيهم اكثر من نفسي مصطفى بالدور الاول راسب من غير شيماء الي كل شويه كالو خابري ماما بدو يحنون الها وبس تجي يرحون وياها اعرفهم كلش زين
_ماتجي لاتخافين والله ماتجي وحتى ابوج راح يسافر بس يطلع جوازه يريد يروح الايران مو اني جاي اقريهم ماعايفهم سديم كم مره كايلج لاتفكرين بيهم ترا حتى غسق كل ماتفرغ تقريهم بس مصطفى ضعيف ب الدراسة فيرسب وهذا شي طبيعي لاتبجين لا اموتج
_موتني وخلصني
_انجبي سديم
_ويكلي سديم ليش ماتحرمين
_الكحله طاحت هههههه
_من وراك والله بسببك
وصلنه للمنتجع تغيرت نفسيتي واني اشم هوى وحجينه هواي اني وتميم اول مره احس منطلقه ويه تميم وابادله كل المواضيع بدون احراج وبدون ماتقيد بكلامي رجعت للبيت وتفجاة بوجود بشائر وغيث
دخلنه عليهم اني وتميم الي صافحه وهو يكله
_هلا ب النسيب كهوة جاي
_شوفتك بس شلونج خيتي
_هلا غيث الحمدالله
جان راسي يوجعني ومن طلعت زاد اريد بس الزم مخده وانام حضنت بشائر الي جانن عيونها مورمات وحمر مبين شكد باجيه مثل كل مره
_سديم شصاير بيج ولج
كلها تميم وهو يكعد يم غيث واني كعدت يمهم
_اختج مخلصتها بجي عليج الله يحفظها
_بشورة اريد ابطل تعبت
_ههههه ها ها هرمونات السادس سديم كلنه مثلج مرينه كم يوم وتخلص
قطع كلامنه عمو رافد وجدو يدخلون يسلمون على غيث تميم ياشرلي ب عيونه ع الباب هزيت راسي مو فاهمه شي رجع عاد حركته بكل غباء كمت سديت باب الديوانيه جدو الي ضل يضحك علي تميم دك ايده على فخذه وهو يكوم طلعني
دخلنه للمطبخ وهو يحجي بحركه
_سديم انتي وين عقلج انا وين احجي وياج وانتي شسويتي جاي اكلج طلعي مو سدي الباب
_والله مادري احسني دايخه وراسي مسطور
_خليج هنا هسه اجي
صعد فوك ونزل بيده حباية صبلي كلاص ماي وهو يكول
_شربي هذا البندول حبيبي دير بالج على نفسج
كعدت ع الكرسي وحاطه راسي ع الطاولة مغمضه عيوني مدلي لفه بداخلها من الدجاج الي مسويته عمه ميساء
_ما اشتهي
_اكليها هسه
_اكعد يمي واكلها
كعد ع الكرسي وهو ساند ايده ع الطاولة وحاطها جوا خده مبتسم
_راح اتزوج عليج انتي صايره سكراب
غصيت ب الاكل لان ردت احجي واللكمه بحلكي كحيت وعيوني تدمع يطبطب ع ظهري بقوة ويشربي ماي وهو يكول
_وداعت عباس اشاقه والله شقه سديم صدك جذب
دخل عباس مكشر بس يضحك
_هاي مرتك راح نوديها للشماعيه توا جدو كال ماتفيد المره انوب حتى ب الاكل تغص تزوج عليها احسلك حتى طبخ ماتعرف تطبخ شتوكلك كيميا وفيزيا
كمت مهدود حيلي من اللكمه الوكفت بلعومي غسلت وجهي واني احاجي عباس
_دروح انت صاير ابو الاني
_والله ماتحترمين اله اكل الجدو
تميم_عبيس دايخين امشي ولي
_تخربطون انتم
هز ايده وطلع التفت تميم وايده بجيوبه
_انتي روحي نامي
_شو عفسنه
_لسانج ويه عباس انتقي الفاظج
ضجت حيل من كلامه من يمته صاير تميم هيج يحاسب انوب على عباس
_تميم ترا هذا عباس مو غريب وهيج تكول
_سديم ملاحظج اكثر من مره تطوخيها لا تشوفينه يشاقيج بس كلامج ثكيل علي
عفته ورحت للغرفه افكر بكلامه واكول معقولة حتى على تميم كلامي ثكيل
نمت مجرد ماحطيت راسي ع المخده تلاشت كل افكاري ورحت بسبات
فززني بجي بشائر
اخذت نفس بعمق
بشائر الي دمعتها ماتنشف وماترتاح
رفعت التلفون اشوف الساعه ب ١١
التفتت عليها بس صوت شهكاتها دايره وجهه للجهه الثانيه
_بشورة
مسحت دموعها بس شهكاتها تخترق صدرها
_بشائر عليمن تبجين ترا مو زين على غيث يرجع مثل كل مره هيج تعبين انتي اكثر وهو يتعب
_سديم كلبي مقبوض مجاي ارتاح هل مره حتى رقم صديقه انطانياه خاف يصير عليه شي
_هاي امور روتينيه واحتياطيه ليش تفكرين اكثر هسه نامي ارتاحي من التفكير
قطع كلامي صوت اشعار رسالة وهيه تراسل بغيث الي ع الطريق ع الموصل مقهورة على وضعها بس مابيدي شي غير اصبرها من اتخيل نفسي مكانها اكول بشائر شلون متحمله لو اني انجن
اخذت مخدتي وبطانيتي رحت لغرفه بيبي لكيت نرجس ومرتضى ومصطفى نايمين يمها
مديت فراشي ونمت يمهم نفتح الباب سويت نفسي نايمه قبل لا اسمع كلام من تميم بس جان صوت حركه واحد نام يمي فتحت عيوني على كيفي اشوف منو طلعت غسق تفاجاة بوجودها ب العاده كله تنام بغرفه وحدها فوك
شافتني وهيه تكول بهمس
_سديم انتي ماتجوزين هسه يكعد تميم ويرعد بصوته علينه نامي بغرفتج احسن
_لا خليني هنا والفجر من تكعد بيبي للصلاة افز اروح هناك
هنا بسرعه اغفه
كالت بضحكه
_والله انتي فلا توبين نامي والصباح رباح
_اكلج خليلي منبه علمود اكعد اروح للغرفه خوفتيني
_هههه الخوف يعدل الشوف
حطت منبه ونمنه
مرت الايام مثل القبلها
راحو لكربلا والنجف لان جانت الذكرى السنويه لاستشهاد حسين
ضليت اني وبيبي وغسق مارحنه كم يوم ورجعو
بس رجعت جمان انسانه ثانيه مبين التعب عليها رجعت النقطه الصفر بس تبجي ومعتزله وابسط شي تحسس منه
غسق...
واكفه يم عمه ميساء الي تخبز العصر والجو حار
وجهه الصار احمر رفعت غطه التنور وهيه تلزك الخبزه
_عمه والله حاره خلي اني بسرعه اخبزه
_تعرفين انتي
_اي عمه اسوي احلى من خبزج
_والله سباعيه جا خواتج كلشي ماكو تزوجن وبعدهن مايعرفن يسون عيشه
_ليش تسميها عيشه عمه هيه خبزه
_يمه هاي امي قبل ايرانيه وتسمي الخبزه عيشه
_صدك الله يعني امج ايرانيه يعني انتي طالعن حلوة مثلها
_ترا العجم الايرانين مو حلوين العراقيين احلى بهواي انا طالعه على امي الله يرحمها لان جانت حلوة بس مو يعني كل العجميين حلوين
_فهمتج عمه بس مالت الله انتي صاكه
بعدتها عن الخبز وضليت اني اخبز وهيه ترفع غطه التنور من اتقرب للتنور والحراره تجي على وجهي ودي اشرد بس من اشوف عمه ميساء اكول خطية كلشي عليها
اجت عمه كوثر الي جانت عد اختها وكفت يمنه بلا احترام هزت ايدها وهيه تكول
_جا الغمات خياتج ماتعلمن منج لو هو يذب بس العوبات علي مايذب النادرات
بدون ماتسمع جوابي راحت وكفت متفاجاة من طريقه كلامها عمه ميساء الي ولا كانو تسمعها وهيه تكمل خبز
_عمه منو الي يذب بس العوبات عليها
_يمه عوفج من سوالفها كوثر لسانها متبري منها الي يذب العوبات يعني ربج
هزيت ايدي بنفس طريقه هز ايد عمه كوثر
_هاي صدك كبرت وخرفت
اجاني مصطفى يركض وبيده تلفوني يرن
جاوبت على مكالمه عزيز
_الو عزيز
_من يمته اخابرج
_مادري جان التلفون بيد مصطفى مو عندي
_شيسوي بيد صخام كم مره خابرتج توا يلا عجبج تجاوبين
فتحت التلفون سبع مكالمات فائته جريت نفس بصبر
بفتره قصيرة صرت اعرف هواي اطباع عن عزيز
يدور مشاكل وباقل كلمه يرضى وينسى كلشي
علمود اريح راسي من الكلام الي راح اسمعه ابتعدت عن عمه ميساء واني اكله
_حبيبي ماتنعاد لو شايفه التلفون من اول مكالمه اجاوبك بس ماشفته
سمعت صوت حسرته واضحه وهو يكول بهدوء
_اني ب البصرة اجيت اشوف امي امر عليج اخذج يمها
_بس اشوف ابوي وادرلك خبر
_خابرته كال بكيفها
جنت مامشتهيه اروح لان قرب موعد عرسنه كل مايقرب كل ما اخاف اكثر من عزيز اخاف من صعوبه تفكيره وصعوبه التعامل وياه ب النهاية اني الي اختاريته واني الي اتحمل كلشي يصير بيه بس هسه اذا اكله ماروح يكلب الدنيا
_ماشي انتظرك
سديت المكالمه واني احضر بنفسي علمود اروح
خابرلي طلعته ورا ماوصتني بيبي الف مره ارجع من وكت وماطول
صعدت ب السيارة وهو ضل صافن علي وكال
_صار شكد مشايفج مو ذاك الاسبوع الاجيت
من اخر مره وصلني بيها لبيتنه من الكليه ضل كل اسبوع او اسبوعين يجي لمرت ابو ويمر علي كل مره يكلي نفس جملته المتعاده"صار هواي ماشايفج "
ابتسمت بوجهه واني اكله
_طبعا ماغير تشتاقلي
نرسمت ابتسامه على طرف شفته وهو يسوق
ب الايام الاخيره صرت اشوف عزيز وابوي همه الي
يستحقون اكسبهم لان كل الناس جانت بحاتي عابره خصوصا من اشوف سديم الي ماعندها سند غير تميم ومن مرات تكعد تسولف ع الصار بيها ماريد اخذ حظهم شفت لا مهرب من حياتي المكتوبه الي ايقنت انو هذا اختيار ربي ومرات اكول عوض عن الايام السودة الشفتهم بحياتي
رغم اسلوبه الصعب بس بكلمه يلين عزيز
وصلنه لبيت مرت ابو
جانت وحدها وياها مره ب البيت كالت اني اساعدها ب البيت ب التنظيف جيرانهم
مرت ابو اخذته ب الحضن والسلام لدرجه نست وجودي كلها عزيز وهو يبتعد عنها ويقربني الها لازم ايدي
_يمه هاي ريمتي
تفاجاة من المصطلح الاردفه الي شنو يقصد ريم معقولة خربط باسمي
جان المفروض نجي سوا من قبل كم شهر بس ماكدر وهسه بدون مقدمات كال نروح سوا كالت امه وهو تحضني
_هلا بريم الفله
_هلا بيج خالة اني غسق مو ريم
ضحكت بعوفيه وضحك عزيز لضحكتها
_يمه من يوم شفتج ب الخطوبه واني اكل العزيز ريمتك عيونج حلوات مثل عيون الريم
باوعت العزيز الي ولا مره سامعه منه هل كلام
غمز وهو يكول
_لايروح بالج بعيد مرتي
يتبع