-{ بِــسـمِ اللّٰهِ ألـرحـمٰـنِ ألـرَحـيـم }-
• #غموض_الشُجاع
• بِــ قلم :- فطم الطائي.
• ورداتي التصويت ☆ والتعليق بين الفقرات لتنسونه✔︎ + متابعه لـ حسابي الجميل ♡︎
يقول الشُجاع لـ روحِهِ :-
( تعرفين أنتِ أول أُمنيه أحققها؟ )
..
رگضت عليهُم ثنينهُم ضربت واحد دفره مادري وين طيرتو رجعت ع الثاني تمشي وتضحك وهوَ يرجع حسبالك ديشوف وحش مو بنت مسكتو ضربتو بـعكس أيدها على رگُبتو وگع ، نفضت أيدها وصاحت :- " جَلااااال تطلع گدامي هسه لو أسحل عشيرتك سَحل ، وأزين شاربك بالقُندرا ".
محد رَد ولا أحد طلع خلت أيدها على أذنها على سماعة البلوتوث :- مازن شوفلي هالخيخه وينه .
نزلت أيدها وسحبت ألسلاح من خُصرها تريد تدخُل للبيت ركضت وگفتها :- لحضه نَّارا.
دحگتلي وجهها محتقن وعيونها دَم :- وخر من طريقي .
:- أعرف گلبچ ديحترگ بَـس لاتسوين شي تندمين عليه تعرُفين كُلش زين جَـلال مُستحيل يقتل أخوچ .
رفعت أيدها وعاطت :- بَس قتله ...
:- نَّارا بَـس أهدي وفكري زين ، وأُخذيها بالعقل جَـلال شگد مهددكُم وكم مره مسوي هالسوايات ، مـن المُستحيل يروح وَرقه رابحه منو ، ديوهمچ ويشتت تفكيرچ .
عبس وجهها :- وبلكت صحيح قتله ..؟؟
- مُستحيل يفكر بهالشي أصلاً ، إذا يُعرفچ زين هلگد عصبيه وتبيدينو هوَ وعشيرتو وين يگدر يفُص گدامچ هالخيخه ؟؟
بلعت ريگها بـ توتُر ، ماحسيت غير دفعتني ومشت للبيت ، دفرت ألباب ودخلت بحَذَر ، ركضت وراها دخلت ماكو شي بـ ألبيت ، أدور عليها ما أعرف وين راحت لأي غُرفه ، شفتها واگفه بباب من ألغُرف مشيت يمها وگفت صافن بشنو عتدحگ ، چانت أرضيه كُلها دَم وملابس واگعه بـصفحه انداريت عليها تدحگ وترمش بـثُگُل وگع ألسلاح من أيدها ومشت بـخطوات مُترَدِده ...
گعدت بالگاع سحبت ألملابس شَمتهُم ونَـفسها عالي وتهمس بـ " أميــر ياخويه " بقيت صافن مـا أعرف شسوي دنگت يمها رفعتها من كتفها :- نَّارا كافي تسوين هجي بروحچ شو گومي خلي نلگه حَـل .
التفتت عليه خزرتني :- أمشي من هنا ، روح لا تدخل بيه .
- نَّارا ألي دتسوي غَلط گومي ندورلنه حَـل .
ما رَدت شويه وگامت مسحت دموعها أتصلت ما أدري بـمنو شويه ورَد أردفت :- مازن شنو الأخبار ..؟؟
سكتت شويه وبقت صافنه سَدت ألموبايل وصاحت :- خرب بيك جَلال ألمخنث .
گالتها ومشت للملابس ضربتهُم برجلها قوي مشت للغُرفه ألثانيه فتحتها وتصنمت ، رحت يمها أدحگ ألغُرفه كُلها دم من حياطين وأرضيه كُلها دَم وأكو سچاچين كُلها ملطخه بالدَم وأدوات تعذيب ، أدحگ لأيد نَّارا ألي على يدة ألباب ترجف ، لحضات ونزلت أيدها من ألباب ورجع جسمها لـ ورى ، مسكتها :- نَّارا بيچ شي..؟؟
ما رَدت وأشوف عينها بقت بـ ألغُرفه تدحگ وتتنفس ببطُئ ، صارت أيدها على قميصي وتسحب بي كأن ألغُرفه بيها جاذبيه ودتسحبها وهيَا تحاول تنقُذ نفسها منها ... ضربت خدها بـخفه :- نَّارا..دحگيلي .
فَزت دحگتلي ورجعت دحگت لأيدها أبتعدت حواجبها تتحرك بـعشوائيه :- مـ ما أقصد .
- عادي تعالي نطلع .
دحگت للغُرفه ورجعت دحگت بيه فركت عيونها ومشت گدامي ، طلعنا من ألبيت وهيا راحت لـ ألسياره طلعت بُطل مي فتحته وفرغته على وجهها وشعرها...
ومن هنا عرفت نَّارا مَــريضه ، قسوتها وشجاعتها هاي مُستحيل أكو بنيه بـ عُمرها تمتلكها .. بغض ألنَظر عن كُل شي بَس ماكو هجي قوه أبداً..
دائِماً چنت أسمع ألبنيه تكون أنوثيه ، من الملامح والتصرفات وإلى أخرهِ ، حَتى نعومة ألبَشره ألي عند ألبنات الطبيعيات ماعدها ، بَشرتها خَشنه مثل ألرِجال ، عيونها ألحاده ومكحله من ألله ، ستايلها وقَصة شعرها ، كُل شي بيها يختلف عن ألبنات... وين شايفين بنيه بـعُمر ألعشرين تقتل رجال ، وتتعامل مع مُجرم خطير..؟؟
ألله ألعالم شنو شايفه ووين چانت عايشه ألي وصلها لهاي ألدرجه من أللامُبالات لـ كُل شي ، كُل شي عدها عادي ، وبنفس ألوقت ألصَعب تسوي عادي وتوصل لـ كُل شي بـسهوله تامَّه ، ما عدها شيء مُستحيل .
گعدت يمها وسندت ظهري ع ألسياره اردفت وعيني بـ ألگدامي :- ليش خفتي من ألغُرفه..؟
ضحكت بأستِهزاء :- شفت أشكال وألوان بهاي ألغُرف وهاي ألمُعِدات .
التفتت عليها مستغرب :- عذبچ بيهُم..؟
دحگت بـعيني أبتسمت بـقهر :- ياريت عذبني .
- شسوه أحچي ..؟
:- طلع أعضاء جسم أطفال بهاي ألغُرف وگدامنه ، وصوت صراخهُم يجي ومانگدر نسوي شي وو..
سكتت دحگتلها :- كملي وشنو بعد..؟؟
:- مو مُهم غلس هسه گوم نرجع ، مادام أخويه لهسه عايش عند جَـلال فـ هاي نعمه .
- شلون هجي تگولين مو هذا أخوچ..!!
:- أنه أعرف جَـلال ،ولِهذا ما أخاف منه ولا أخاف من ألي يريد يسوي ، لإن مادام ماقتله بَعد مايگدر يسوي شي .
گالتها وگامت فتحت باب ألسياره وصعدت ، گمت صعدت بـ صفها شغلت ألسياره ومشت ...صعدت بيها خابرت مازن :- لا تنسى ألي گتلك علي فاهم.
سكتت شويه رجعت گالت :- دير بالك تغلط بشي فاهم ، وأمن ألطريق باچر مـا أريد أسمع بأسم جَلال طول حفلة شُجاع ماشي .... أنه حذرتك يا مازن إذا سمعت بأسم جلال باچر مـا تلوم ألا نفسك.
سدتو مــن مازن ألتفتت عليه :- شو أنتَ مـا صدگت بَــس تجي وياي وصعدت گُل أخاف مخلفتڪ وناسيتك ..!
:- شبيك عيني ناروتو لـيش مزعوج ؟
- لا تگول ناروتو أيي ويلا طگطگ نعالاتك.
:- كفو بناروتو.
سحبت المُسدس وهيا تسوق وكفت السياره :- شو أنزل يلا أنزل وبعد لا تجي وراي فاهم ، أنه أحل مشاكلي بنفسي
:- أيباخ مــن هذا أجيتي تطيحين بحُضني بالغُرفه.
خزرتني أدرفت كازه على سنونها :- راح أصطُرك راشدي أقفل معاني وجهك .
:- شتنتظرين ؟؟
سكتت مـا ردت وتنتفس سريع أردفت وأني أغطي عيني وكاتم ضحكتي :- كافي تتنفسين چنچ ثور .
التفتت عليه الشر ينگط من عينها :- والله ماكو غيرك ثور شوف راسك شكُبره.
:- لـيش مـا تكسرينو ؟؟
- مـا أكسر روس الثيران أنه أكسر روس ألمُجرمين.
:- أني مُجرم.
- لـيش شنو جريمة حضرة جنابك ...؟
:- خليت جَلال يبچي هالعيون.
ضحكت بأستِهزاء :- جَلال مـا بچاني أبداً أنه أبچي على حالي مــن أصير ضعيفه.
:- نَّارا.
- أمم.
:- لـيش أنتِ بهاي ألقوه والقسوه؟ شنو شايفه بحياتچ؟؟
- " ألعقل مـا يتوقعه ، وألعين ماتتحمل تتصوره."
..
ريڤال.. رجعنا سوه للبيت ، هوَ نزلني دخلني جوه وراح أستلموني أڤين وروجين وين رحتو ووين ووين ، خزرتهُم ودخلت نزعت فستاني وفكيت ألتسريحه وأفكر بـكلامو بشنو يقصد ، هذا ما لازم واحد ياخُذ كلامو هجي أكيد غموض ووره كلامو مُصيبه ، أستغفرت دخلت سبحت وذني يفترون يمي يردوني أحچي ما قبلت ولا حچيت ...
طلعت تمددت وأفكر بـكلامو ، توترت من أتذكر باچر عرسي صارت بيه رجفه وأريد ما أفكر ما يفيد ، بقيت شويه وغفيت ...
لـ ثاني يوم بالگوه گعدتني أڤين ميته ع النومه وأغلط عليهُم أكول عوفوني أنام ومايفيد لمن ما گعدت شويه ودخلت وَرده بيدها صينية ألريوگ ، تريگت لـ نُص ألريوگ وغصيت من تذكرت أليوم عرسي وأڤين تطبطب على ظهري وأريد أبلع اللُگمه ما تنبلع ..
وَرده :- على كيفچ شبيچ ولچ..؟
دفعت ألصينيه :- ما أغيد أتزوج .
وَرده :- مو هيا لعبة جهال حتى ماتريدين يلا لچ گومي حتى نلحگ للصالون .
سكتت وهيا وأڤين مدري بشنو يحچون ويدحگون بيه ، ماتريگت گمت لبست ملابس طلعه وحضرت أڤين الفستان وكُل شي يخُصني لإن ياخذوني من الصالون مو من ألبيت عُـمر ماكن قبل ألا من ألصالون والعرس بـ ألقاعه .
طلعنا ماشفتو وصوت الديجي بالبيت وبنات عمو يرگصون ويشتغلون ، بالباب وطبگت سيارة سردار أبن خالي أبتسمت نزلو منها نجمه وماريا بنات عمي وجيهان زوجة سردار هم بنت خالتي ، مشيت حضنتهُم ودموعي تنزل ، بوست نجمه وحضنتها قوي :- ول فاهيه مشتاقتلكِ حيل ، شلونكِ أُمي؟؟
نَجمه :- بخير إذا أنتِ بخير ، وأنا هم مشتاقتلكِ كوميات .
أبتعدت منها مبتسمه ، باركلي سَردار مبتسم ردديت بـخجل :- ربي يبارك بيك .
دحگت لروجين ألتفتت لـسَردار مبتسمه :- أشلونك دكتورنا؟
ابتسم نزع النظارة الشمسيه ألي لابسها :- الحَمدُلله بخير تلميذتي شلونكِ أنتِ..؟
روجين :- كُلش بــخير وانتو..؟ مشتاقه الكُم هواي.
سَردار :- ههههه تشتاقلكِ العافيه روجينتنا ألقويه.
گالها أجه صوت عَواد ورانا دحگ لـ روجينا خزرها سلم عَواد على سَردار من ورى خشمو ، وألي ميعرف هوَ سَردار دكتور نفسي ، وهوَ ألي عالج روجينا وعَواد يغار منو ماعرف ليش مع أنُ سَردار كبير مو صغير كُلش ودارس ومُثقف ما من المعقول يسوي شي مو حلو بحق روجينا أو عَواد بَس غيرة عَواد ما معقوله .
سَردار :- أنا أخذ البنات للصالون.
عَواد :- هههه لا يابه مانريد نتعبك هسه انا أخذهُم .
سَردار :- لا تعب شنو هسه أخذهُم ماعندي شي وأجيت علمودهُم.
خزرو عَواد وسَردار أكثر من ألطَبيعي يحچي التفت علينا سَردار :- يلا يَـ بنيات للسياره.
عَواد :- روجينا وخواتي وبنات عمي أنتو على سيارتي .
طلعنا أني وأفونه مع سَردار والباقيين راحو معَ عَواد أردف سَردار وعينو بالمرايه :- صايره كبيره وراح نزوجكِ .
نزلت راسي مبتسمه ، ضحك قوي :- لا يابه ليش هالخجل ، أنا سَردار لو نسيتي ههههه .
رفعت راسي مستغربه :- ليش نُهاد ما جا ؟؟
جيهان :- عندو شُغُل وماسك العياده مالت سَردار هاليوم ، وقالي سلمولي على ريڤال وأفونه وخلي يعذروني .
سَردار :- حَتى لو جا مايصير يبقى بَس يشوفكُم ويرجع .
هزيت راسي ساكته ، شويه ووصلنا الصالون نزلنا نحنَ ألبنات وسَردار ما أدري بشنو يحجي معَ جيهان دخلنا للصالون وبدت بالبنات أول شي وأنا تكوي شعري وتسرحو ، بعد وقت خلصو دحگت لأفونه والبنات طالعين يجننون ومكياجهُم هادئ ويخبل ، أشرتلي أگعُد وبدأت بيه ، وكلو أختيار جيهان ...
بعد وقت كلش طويل خلصت گالت فتحي عيونچ فتحتهُم وتفاجئت بنفسي ، مكياجي حيل خفيف وطالع توب مع وجهي وملامحي ، أبتسمت گالت نبدي بالتسريحه وأختاريتها من قبل بسيطه ومو عاليه لأن راح موديل ألتسريحه العاليه ، بدأت بيها وگلبي يدُگ سريع ...
من جِهه فرحانه ومن جِهه خايفه من هاليوم ، من راح يشوفني شيسوي لو بشنو يحس ، هوَ يحبني لولا..؟ كان يگُلي لو بيدي ما أدخلچ لحياتي ، يعني مايحبني..!! .
خلصت ألتسريحه وعيوني مبتسمه وگلبي يدُگ قوي ، شكد ما نگول هاليوم عادي بَس هوَ مو عادي ، كُل شي بحياتنا راح يتغير ومانعرُف هل راح ننجح بهاي العِلاقه أو لا ..؟
أبتعدت أخذتني أڤين لـغُرفة ألتبديل ألي ببطن ألصالون لبستني فستاني وشفايفي ترجف دحگتلي مبتسمه :- على كيفكِ ماغاح يصيغ شي ، أهدي ورخي نفسكِ أُمي.
سمعت كلامها وأحاول أهدي نفسي بَس ماگدر ، حيل متوتره ، خلصتني طلعت وألكُل تدحگ بيه مبتسمين ، أخذتني للمرايه وگفت تفاجئت بنفسي طالعه حيل حلوه ولأول مره أگول على نفسي حلوه قبل كُل واحد يگُلي حلوه أكلو أيع شحلاني وجهي وجه القرد .
گعدتني نجمه مبتسمه وعيونها تلمع فرحانه ألي سحبت أيدي تعدل ألمحابس ألناعمه على أصابعي ، رفعت الگلاده ألكِرستال ألي شُجاع جايبها كانت حيل حلوه على شكل قلب ناعم حيل گوه يبين ، خلتها بـرُگبتي وتضحك :- ول على كيفكِ هسه يشوفكِ هاكذ ترجفين أشيسوي ..
ضربتها ببطنها ضحكت بوجع أردفت بـ توتُر :- لا تبقين تمسلتين أي أشش لاتحكين معايه كثيغ متوتره .
نجمه :- عادي عادي تصيغ ههههه .
خلصت كُل شي گعدت گبالي ترگبلي أظافر وتسولف وياي بَس ما أستوعب شي وجسمي بارد أبتسامه على شفايفي بَس بگلبي خوف ، عيوني تلمع وماعرف دموع فَرح لو خوف وحزن .
شويه وطلعت روجينا لابسه فستان أبيض أبتسمت بفرح وتذكرت أمس من طلعت من ألغُرفه وسمعت كلام عَواد مع وَرده ...
عَواد :- هذا فستان بسيط ماعرفت شنو أختار بَس هذا حبيته .
ورده :- بربك ما لگيت غير هالفستان ؟؟
دحگلها بقلق وعيونو تتفحص ملامح وَرده :- ليش شبي ماحلو؟؟
ضحكت قوي رجعت ربتت على كتفو :- أصلاً يخبل وحيل راح تفرح بي .
عَواد :- صدُگ تحچين ..؟؟ يعني راح تفرح بي ...
وَرده :- مادام أنتَ جايبه أكيد تفرح بي ، وهيَا تعرفها شگد تحب ألبساطه وكُل شي منك يكون غالي بالنسبه ألها ويكفيها وتفرح بي.
..
أبتسمت من تذكرت كلامو وشگد يحبها ويعزها وبَس يريد يفرحها بـعد كُل ألي شافتو من داعش ، ألله عوضها بـعواد ، أدعي من رَبي يحفظهُم ويديمهُم ،
عدلت نجمه فساني والطرحه ، رجعت خلت ألكبوس خلت المسكه بيدي وأرجف وهيا تهديني ، شويه الموبايلات صارت ترگع اتصالات گالو راح يدخلون ياخذوني ..
صار جسمي يرجف رجيف وعيوني مدمعه ما أدري شبيه بردت ، وعيوني تغمض وتفتح ، وگفوني بـ نُص ألصالون وظهري ع ألباب ، قلبي نبضاتو تسارعت ..
شُجاع.. دخلت لـ ألصالون وعيوني تدورلها شفتها اگفه وظهرها ع ألباب باوعتلهُم مو فاهم شي أخذت و!رده أيدي وگفتني وراها شاورتني شنو أسوي أبتسمت عدلت نَفسي سحبت نَفس ...گلبي يدُگ سَريع وعيوني متغورگه بالدموع ، درتها عليه مغمض عيني ، فتحتها صرنا عين بـ عين..
عيونها ألخُضُر ألي شَلَّت حالي ، شَعرُها ألبُرتُقالي ألمائِل للأحمر ، بياضُها ألناصِع ألي دوخني ، وبفستان أبيض..؟ " صَهبائِي "
بلعت ريگ هلهلو ألنسوان وأنه صافن بعيونها ، نزلت ألكبوس على وجهها شبگت أيدي بأيديها وطلعنا والهلاهل تتراگع .. اول ماطلعنا لُبَيد صار گبالنه على چتفه ألكاميـرا ويصورنه لمن ماصعدنا بــالسياره والكل توزعت ع السيارات صعدت أتصلت بـ نَّارا ما رَدت ، وأنه گلت ألها تجي معَ أدهم وألولد ، صَح صعب عليها تتجاوز شي بَس لازم تجي هاليوم ونفض كُل شي عاد...
..
ريڤال.. مشينا بـ ألسياره ومشغل أغاني عاليه وألأجواء تجنن ، مشينه مسافه عنهُم ولاف ألسياره من غير طريق ، أستغربت بَس من سالفة أمس من أخذني للأستوديو أمنت وگلت يمكن هم يسوي هجي ..
توتر شويه وخلا سماعه بلوتوث بأذنو وصار يحچي مع شخص ما أدري شنو وكلامو أنكليزي وأكو كلمات أفهمها وكلمات ما أفهمها ... سَدو رفعت ألكبوس من وجهي :- وين غايحين ليش هم أخذتني من غير طريق ؟؟
- ماكو شي بَس ضيعتهُم ، هسه شويه ونوصل ، لا تخافين .
سكتت ما مقتنعه بكلامو ونوب ضوجه لأن ماكو سيارات ويانه يعني زفه كامله طلعت موبايلي وأصور أيديه وأشوفو ساكت رفعت ألموبايل دصور أيدو أبتسم خلا أيدو على أيدي وعينو بالطريق :- صوري هيچ.
أبتسمت بدون لا أحچي شي وصورت أيدينه سوه ، وصورت فستاني ووجهي ، ماخليت شي ماصورتو ، وصلنا ألقاعه ما حاسه بالوقت ، التفت نزل ألكبوس على وجهي ونزل أجه يم باب ألسياره نَزلني ماسك أيدي وأيد ألُخ على خُصري ، دخلنا ويمكن ديصورون لأن صوت لُبَيد يجي ويگول هجي أكفو وسوو هجي ..
دخوليتنه كانت على أُغنية حُسام ألرسام " ألعريس "
دخلنا أيدينه متشابكه ومبتسمين وأكو بنيه مصوره گبالنه تصور دخوليتنه ...وصلنا ألكوشه رفع ألكبوس من وجهي ويدحگ بـوجهي وصدرو يصعد وينزل كأنُ ما مصدگ گعدني وهمس يم أذني :- فرد شويه وأجيچ يُبا .
أبتسمت وهوَ هم طلع أجت نجمن عدلت فستاني شاورتني :- مبين الأخ واقع على غاسو هههه .
ضربتها بـ كفتها ومبتسمه وبنفس الوقت خجلانه ضحكت من بدلو الأُغنيه لطرب ، نزلت وتنزع بـ ألشال ، وترگص وتأشر عليه وأنا أضحك.. بقو يرگصون وأنا أصور ومبتسمه بالأجواء هاي راح كُل ألتوتُر ..
مَـر وقت وگالو العريس حيدخل لبسو ألبنات ألصايات والشالات...
دخل بـ قاط أسود وعيونو ألسود ألي عتلمع بسبب ألدموع ألي بعينو ، يتقدم ومبتسم يدحگ بيه كـ أنُ أنا مُعجِزه وصارتلو وگف يمي سحب نَفس باس راسي وهمس يم أذني :- " تدرين أنتِ أول أُمنيه أحققها ."
بلعت ريگي متوتره وكلامو دوخني هجي مـا أدري شلون شعور أجاني بلحضتها تمنيت مـا تخلص هاللحضه لأن أعرفو راح يتغير ويرجع نفسو شـُجاع ألبارد مال قبل فززني صوت عَواد :- شغلو خالتكُم سَجوده مرگصه العراق شغلوها.
ضحكو كُلهُم وشغلو نايمه الحنفوشه سحب روجينا مِن أيدها حضنها ويرگُص وياها ويضحكون ثنينهم ... شويه وأجو سحبونه نزلنا بـ نُص القاعه مبتسمين خلا أيدينو ثنينهُم على خُصري شغل عَـواد أليسا " بتمون " صرنا نتمايل سوه وعيونه ببعض أدحگلو مــن أول مـا طلعنا مــن الصالون ولهسه عيونو تلمع والأبتسامه مـا فارگت شفايفو ..
بقيت مبتسمه كملت الأُغنيه گعدني وطلع موبايلو أتصل بمدري منو ومحد رَد ... بقينا سوه كاعدين وخالاتو يخزرون بيه وهاي ألي گالولي عنها روان كانت كاعده وهم خازرتني مـا أعرف شبيها مـا أهتميت بـ أحد بقيت فرحانه ومستمتعه بالحفله ، كانت حيل حلوه ..
أخذنا صور ولقطات سوه ومبتسمين بوجه بعض .. شويه وصاحو حيدخلون ولد خوالو أجه خلا ألكبوس وسدو وگفنا سوه ..
فتحو الباب كانو گبالو ثلاث زلم وبنيه بنصهُم ، كان شكلها غريب حتى ملابسها غريبه كان لبسها بنطلون اسود وبدي أسود وفوگاتو يَلگ لحد ألرُگبه مفتوح هم أسود وبي زناجيل ، حتى بنطلونها مــن الصفحتين بي زناجيل متشابكه ببعض والحِذاء تكرمون لحد ألرگبه هم أسود ، وشعرها ذيل حصان ومابي لو شعرايه وحده طالعه من فوگ هجي عدل تگول ضاربتو عداله مدري شيسموها .
دخلو أربعتهُم مبتسمين مشو صاح عَـواد :- يا هلا بـ نَّارة ألشُجاع.
أستغربت مــن كلامو التفتت على شـُجاع متشكله عينو بـ البنيه رجعت نظري عليها مبتسمه وتتقدم صعدت وگفت گدامو ، أبتسم وحضنها قوي أدحگلهُم عيوني متغورگه بالدموع أريد أنطُق مـا أگدر ، شتصير منو يعني ؟ هــوَ مـا عندو أحد معقوله بنت خالتو؟
نزلت راسي وگلبي يوجعني ودموعي تنزل بـهدوء مسحتهُم من شفتها أبتعدت منو ، أجت گبالي رفعت راسي أبتسمت :- " واضح حُبچ أله من هاي دموعچ ، يگولون أعلى مراحل ألحُب هيَ ألبچي من ألغيره ، وبدموعچ هاي أثبتي شگدچ تحبين أخوي "
عقدت حاجبي مستغربه ألتفتت علي مبتسم شبگ ايدي بيدو ويطمني بعيونو ، حضنتني ألبنيه وتباركلي ما أنطيت أي رَدة فعل بَـس ساكته من هالموقف ، ليش ما گال عندي أُخُت ، كان يگول ما عندي أحد أهلي كُلهُم متوفين .
أبتعدت مني مبتسمه التفتت عليهُم :- فرد معزوفه تشَّل ألواحد .
نزلت هيا وأجو ولد خالو باركولنا وهذا أخر واحد صغير مبين ويلدغ بالراء يغمز لشُجاع وشُجاع يضربو ويضحك ، مبين علاقتهُم حلوه .
نزلت ألبنيه وألولد وياهُم بَس أخوهم الأكبر شُجاع گال أسمو أيمن ألشيخ بعد أبو هذا بقى واگف بـ صفحه مبتسم .. شويه ودخلت جدتهُم مرأه كبيره حيل بَس واضح معتنيه بنفسها وحيل حلوه تشبه أيمن ، تقربت وتهلهل أبتسمنا ثنينا صعدها هذا ألي يلدغ بالراء يمنا حضنت شُجاع وتبوس بي وتباركلو وهوَ حاضنها قوي ويبوسها ..
شويه وأبتعدت أجت يمي تدحگلي مادري شلون نضره أردفت :- يا يُمه عيني ألرحمٰن تحرُسچ ، يُمه شحلاتچ ، چا شگد محضوظ بيچ ألشُجاع ..؟
أبتسمت أشرلي شُجاع أدنگ أبوس أيدها ، دنگت بست أيدها ماخلتني رفعتني نزعت أسوار ذَهب من أيدها كان حلو وبسيط لبستني أياه أبتسمت وهيَ حضنتني قوي وتقرأ المُعوِذات عليه ، بعدتني شويه حضنت وجهي بأديها ونزلت راسي باستو :- رَبي يهنيكُم بيبي ويسعدكُم ومايشوفكُم يوم بِدون بعض .
أجت ألبنيه سحبتها :- بيبي تراني أغار حيل لاتحبيها أكثر مني .
ضحكت :- وچ ماما أنتِ محد يجي بمچانچ ، أنتِ بالگلب .
ضحكت ونزلتها وگفتها بـ صفحها صفگ عَواد أيد بأيد ويدحگ بـ نَّارا غمزتلو ضحك وراح للديجي ونحنَ گعدنا شَغل أغنيه " قُربك قَمر "
أشرت لولد خال شُجاع نزلو بَس ثنين والشيخ أبد ماگام بَس گاعد مبتسم ، بدأت الأُغنيه وهمَّا واگفين وعَواد أجه من يم الديجي بيدو مسبحه ويهز بيها ، طيرها ع الولد وهوَ طلع وشگد يخزرون بي ماقبل وطلع أشرلهُم بموبايلو ع اساس عندو أتصال ..
بقو بَس ولد خالو ونَّارا .. بدأت الأُغنيه وهمَّا يهزون وياها مثل شُجاع كان چوبي مو رقص عادي ... ونَّارا تغني ويه ألأُغنيه :-
" يلا يَسمر يَسمر يَسمر يَسمر "
" يَسمر يَسمر يَسمر يَسمر "
" رفت رفت رفت رفت عيني تريد تشوفو "
" وكفوفي تشبك بكفوفو "
" حالف بربي ماعوفو "
" اتمناه يظل بسدي "
گام شُجاع مبتسم نزع ألستره وطلع المسبحه من ألستره ونزل يفُر بيها .. ونَّارا بنصهُم بيدها ألمسبحه وتچوب أحلى منهُم كُلهم مغمضه عيونها وتچوب على نمط الأُغنيه وع ألنغمه .
ألتفتت شافت شُجاع رفعت ألمسبحه ألثانيه وصارت گبالو :-
" يلا يَسمر يَسمر يَسمر يَسمر "
" يَسمر يَسمر يَسمر يَسمر "
" يسمر يمعذب دلالي "
" شوف بعينك وارحم حالي "
" ياريتك تظل قبالي "
" وكلشي من الدنيا مابدي "
أبتسمت على منظرهُم كان منظر يجنن وألبنيه واضح شگد يحبوها حَتى ما تقيدت بينهُم رغُم همَّا ولد خالها ، ومبينه شگد عزيزه عليهُم ، أجو سحبو أيمن ماقبل بالبدايه بَس سحبو شُجاع طلع مسبحتو هوَ هم طلع ألچوبي مالتو بَعد أحلى منهُم ، صدُگ أهل البصره ألچوبي مالهُم يجنن .
خلصت الأُغنيه وكُل هذا أكو بنيه مصوره ويه عمو لُبَيد أجت ووصاها تصور زين ، أجه شُجاع يمي گعد وعرگان ويدحگ بيهُم مبتسم وعيونو تلمع ، التفتت نَّارا على خالات شُجاع خزرتهُم رفعت أيدها وأشرت لأدهم راح أجت أفونه يمي :- ريڤال قومي بدلي فستان غير هذا .
- ليش أشبينو هذا ؟؟
:- مابي شي بَس شُجاع موصي وَرده لفستان ألكِ بسيط وترتاحين بي .
التفتت على شُجاع غمض عيونو وفتحهم بمعنى أگوم ، وفعلاّ گومتني هيَونجمه دخلت لـ غُرفة ألتبديل ، شفت الفستان كان حيل بسيط وقماشو سَتن ، نزعت فستاني لأن فعلاً ضوجني ، لبست ألثاني عدلت نجمه مكياجي أدرفت أفونه :- منو هاي ألي باست شُجاع وحضنتو ؟؟
- هاي نَّارا قال أُختي .
ما كالت شي ، كملت طلعنا ألمعازيم دتتعشى ومشغلين الديجي على ريمكس لـأُغنية " غاب ألگُمر وثريته " گعدت ع الكوشه دحگت لـ شُجاع يمهُم هم نازع ألستره مالتو ووبيدو ألمسبح ، وهالمرا كانت دبكه وكُل واحد ماسك أيد ألخ وألشيخ براس الدبكه ونَّارا بين شُجاع ومُطر وبيبتهُم ترقص گدامهُم رافعه أديها وهمّا يدحگون بيها مبتسمين ، ودبكهُم يجنن مع الأُغنيه :-
مُطر :-
" غاب القمر وثريته..كلمن نام ويا مريته.."
" وانا المقابل عمي..بلكن ينطيني بنيته.."
شُجاع :-
" والله لاكسر سجنها..وبثنين ايديا احضنها.."
" روحي لو تقرب منها..تحيا لو كانت ميتة.."
أدهم :-
" غاب القمر وثريته..كلمن نام ويا مريته.."
" وانا المقابل عمي..بلكن ينطيني بنيته.."
أيمن :-
" بيدي امشط شعرها..وبيدي احزم خصرها.."
" واختارها عطرلها..وعمي ما اريدن جيته.."
أبتسمت على دبكتهُم حيل كانت حلوه خلصت الأُغنيه ، أبتسمو وكُل واحد راح بجِهه أجه يمي گعد همس يم أذني :- متونسه ؟؟
هزيت راسي بـ " أي " ومبتسمه مسك أيدي قوي ، شويه وصاحو يطلع وفعلاً أخذ سترتو وطلع بالبدايه دمعت هاي ثاني مره بَس أكيد أصدِقائو جايين يباركولو فـ ماهتميت بقينا بَس نحنَ ألبنات ، شغلو أغاني ساجده عبيد أجت نَّارا نزلتني والفستان حيل بسيط وماكبير ويقيد الواحد صارو يفروني ويرگصون معايه وأني ومايعجبني طلعت مواهبي الرقصوصيه كلها بعرسي .
شويه وصاحو نطلع كانت دنيا ليل لبسو وعدلو فستاني وأنا أرجف ونجمه وأڤين يهدون بيه مايفيد أرجف ، شويه ودخل مبتسم ، مسك أيدي قوي والهلاهل شالت الدنيا ، طلعنا صعدني بـ ألسياره بالكشن الوره وماعرف ليش ، راح شويه ورجع صعد وأجت نَّارا صعدت بـ مكان ألسايق وأيمن الشيخ گعد بالصدر ..
شغلت أغاني هادئه وتسوق بالسياره تفاجئت أنُ هيا تسوق أعرف شُجاع مايحب هالسوالف وحيل ينزعج شو أختو عادي تسوق وتلبس هجي لبس ... مافهمت كُل شي وعقلي تشوش ..
طلعت موبايلي وأصور ونسيت الرجفه والخوف ، صورت أيدينه سوه ومبتسمه وهوَ ما گال شي لا يسوي حركات بيدو وأنا أضحك وهوَ يضحك على ضحكتي ...
هم أخذونا من طريق غير ونَّارا تخابر ما أعرف منو وتگلو :- گول لـ نَهشَل لا يتدخل أنه أحلها .
والله شُجاع داهيه هاي مبينها داهيه أكثر منو ، بحياتي ماشايفه هجي بنت ، يعني كـ لبس وسياقه وهجي بين أولاد خالها أحس كُلش أوڤر وماهلگد حبيتها ما أعرف ليش ،يمكن لأن بحياتي ما شايفه هجي بنات أو ما أعتقد أكو بنات مثلها واضحه ألقوه والقسوه بعينها .
بعد وقت كثير وموبايل راح ينفجر بالصور وصلنا ألبيت أنا شفتو لو خرطت صرت أبلع بريگي ودموعي تجمدت بـ عيني أردف شُجاع :- نَّارا أنزلي .
التفتت علي مبتسمه وأيدها ع ألسماعه ألي بأذنها :- لا يُبا أنه طالعه عندي شُغُل مُهم ، أنزلو أنتو ألله يهنيكُم خويه .
هيا تحچي وأنا فاتحه حلگي دنيا نُص ألليل شُغُل شنو هذا ، بقيت أنتضر رَد شُجاع ألي هوَ ألرفض ، شو هذا گال :- تَمام يُبا بَس عينچ على نفسچ مابيه حيل .
فتحت حلگي اكثر التفت عليه وأنا ادحگلو خزرني وأشرلي أنزل ، نزل هوَ وأنا صافنه بالكلام يمكن عدحلم أنا لو شنو الموضوع هذا صدُگ يحچي لو يتشاقه ؟؟
أجه نزلني ويغطي بـ وجهي دخلنا جوه ألهلاهل زرفت أذني ، أول مادخلت أخذوني أفونه ووَرده ع ألغُرفه ، دخلوني گعدت وأرجف .
وَرده :- شبيچ عيني أم الرور شنو خفتي .
- بربكِ وغده قوليلو لا يجي أغيد أنام .
:- ههههههه هذا حچي يفيدچ .
خزرتها وبقيت أرجف أجت أڤين حچت كلمتين سَديت أذني وعطت :- كافييييي نچبي .
وَرده تضحك وأفونه گوه كاتمه ضحكتها ، گمت مسكت فستاني طردتهُم ثنينهُم وسَديت ألباب ، بقيت أجي وأروح بـ ألغُرفه وما أعرف شسوي وأصبُعي بحلگي أعضو قوي حتى يروح ألتوتُر ومايفيد ، أجت عيني على قفل ألباب بلعت ريگ رحت بسُرعه قفلتو ووگفت وراه وأرجف وأسمع صوتهُم جوه ..
غمضت عيني گلبي يدُگ سريع وأريد أبچي ، شويه وصار صوتهُم بـ ألدَرج أبتعدت أمشي بالغُرفه وفستاني مچلب برجلي ، بقيت أجي وأروح وأصواتهُم تقرب لمن ما صارت گبال ألغُرفه بقو يهوسون وما أسمع بَس صوت عَواد وأدهم يگولون :- أليوم أخونا يلعب لعب ع ألجُربايه .
سمعت هجي أحس وصلت ألجلطه أعلى مكان براسي شويه شويه وصوتهُم خَف بَس هَمس ، أجت عيني على يدة ألباب من نزلت ومانفتح ألباب غمضت عيني بخوف ، ثواني وأندگ ألباب على كيف وماكو أي صوت برا ، تقربت خليت أذني ع ألباب وكُل جسمي يرجف ، سمعت صوتو بهدوء :- فصعون أفتح ألباب عيب .
- ما أغيد أمشي نام بالصاله أشعندك تنام هنا .
:- فصعون عيب هالسالفه أفتحي ألباب ماسويلچ شي مايصير أبقى برا.
- ما أغيد ولا أفتحو للباب غوح قوللهُم ماتغيد تتزوج بعد بطلت .
:- مايصر يُبا أفتحي ألباب ووعد ما أسويلچ شي .
- ماتكذب عليه ؟؟
:- يمته چذبت عليچ انه ؟؟
- ايباااااه اليغشعك يقول نبي ماتكذب مو ؟
:- لا تكفريني وأفتحي ألباب وعلي إذا فتحت ألباب أنه ماتتوقعين شسوي بيچ من صدُگ ألعب بيچ لعب .
- بَس ماتعملي شي.
:- مـا أصخملچ بشي بَــس أفتحي الباب لا تخزينا.
- والله ماعليه أخاف منك.
:- ريڤال راح أطيح حضچ ، اعد للثلاثه إذا مـا فتحتي هذا ألباب أكسرو على راسچ.
- أغشع مــن هسه عتهدد بيه ، هسه إذا أفتحو للباب تقت
أبتعدت شويه بلعت ريك وأجي وأروح وهوَ لهسه يحچي بصوت ناصي ، مشيت للباب من تذكرت گال العب بيچ الله يعلم شيسوي بيه ، فتحت ألباب دحگلي من فوگ لجوه خزرني :- تقفل ألباب مو فصعون ؟؟
برطمت بوجهو ومشيت گعدت ع ألسرير أگرُط أظافري سَد ألباب قفلو فتحت عيوني على وسعها :- لا تقفل الباب عوفو .
ما أهتم نزع ألستره مالتو وأخذ موبايلو ما أعرف شنو يكتب بي سدو وشمرو ع ألسرير تقرب يمي گعد لزگ بيه ابتعدت دحگلي رجع هم تقدم لزگ بيه ، اخر شي گمت وگفت منزله راسي گام يمي وگف سحبني علي فك ألطوق مال شعري وخلاه ع ألمرايه أردف بـ هدوء :- أدخُلي بدلي حَتى تاكلين.
أبتعدت منو أخذت ألملابس ألي ع ألسرير ومشيت للحمام سَديت ألباب وصرت وراه أتنفس ، هدئت شويه مشيت للحمام أبدل دحگت فاتحه حلگي لا والله مو وكتك ، غميت نفسي من شفت ألملابس لعبان نفس أستغفرت بدلت ولبست ألروب زين شويه مستور ما أگول غير حسبي الله ع المشعوذات ، فتحت ألتسريحه ومسحت المكياج ، دحكت لوجهي :- هذا هم وجه.
عيوني صايرين طماطه ما أعرف يمكن ألأيلاينر أو شي من المكياج مال عيون سبب حساسيه ، بقيت بـ ألحمام ما أگدر أطلع، أخاف يسوي شي ولو هذا حايط مايسوي أي شي متربي مرتين شيسوي قابل ، اجيت أطلع رجع ببالي ألزلم كُلهُم حُقراء ترددت أطلع وبقيت جوه، لمن ماسمعت صوتو يدُگ الباب :- ألسُم برد تعاي أطلعي .
عرفت جايب عشه ومنا ميته جوع طلعت منزله راسي وهوَ مستند بالحايط ألي يم باب الحمام دحگلي من فوگ لجوه أردف ببرود :- تفضلي ست تعشي .
مشى ومشيت وراه گعدنا ثنينه ناكُل نوب نسيت ألأنوثه مليت بطني وشيصير خلي يصير ، قدملي عصير برتقال طبيعي شربتو وهوَ هم شرب ، خلصنا شال ألصينيه طلعها للباب ورجع أستغفرت خوما أحد ينتظرنا نخلص حتى ياخذ الصينيه وگفت دخت حيل غمضت عيني وفتحتها دخل وسد ألباب وهم قفلو ..
تقدم يمي مبتسم سحبني من خُصري بـ هدوء ضربت بصدرو ، مشى أيدو بـشعري وأيد ألُخ على خُصري ، صار گلبي يدُگ بطيء ونفسي ضيگ أردفت بـ تعب :- شـ شُجاع .
حضن وجهي بيدو :- روح ألشُجاع .
دحگتلو عيوني مغوشه هزيت راسي مغمضه عيني أريد أهدء وأشوف زين ماگدر ، صارت أيدو تمشي على ملامح وجهي وأنا دايخه وأهمس بأسمو وهوَ يگُلي " روح شُجاعچ "
حَسيت مددني ع ألسرير ويبوس بـ خَدي ، أريد أرفع أيدي أبعدو ماگدرت أحس حيلي رايح وغواش گدامي ، رفع راسو يدحگ بعيوني مبتسم قرب وجهو عليه هواي :- " صَهبائي ألنقيه "
سمعت هالجُمله وغمضت عيني ماحَسيت على شي ...
..يَتبَع
..
#مُـــــهم 🚫
أولاً ألتنزيل حيصير بـ الأسبوع بارتين ...
مـا أكو يوم مُحدد ..
البارتات راح تكون طويله وبيها احداث هواي ..
المُشكله أني عندي انشغالات هواي وماعدلحگ أكتب كُــل بارت 6k تتخيلون كُــل 1k نطول بي ساعه؟ هذا اذا نكتب بسرعه أما اذا ندقق بالوصف ونكتب كُــل شي بتدقيق فَـ هذا يطول أكثر ..
مـا أگول أنتو غلطانين لا بالعكس انتو لأن حابين القصه وتتحمسون تطلبون بارت بأسرع وقت بس هم قدرو الوضع ماما اني عندي كومه اشغال وعدا هذا مُحاظرات .. وانتو الأمتحانات ؏ الأبواب ودتدرسون ..
وكذالك ألتصويت والتعليقات يعني بارت يكتل روحو تعليقاتو توصل 300 لـيش؟ مو متفقين أنتو تتوقعون ونضحك شويه لأن بالبارت الي بعدو يطلع غلط توقعكم 😂واكو لا يطلع توقعهم صحيح فَـ احيي عقلكم الي ديصير ذكي بسبب غموضو لشُجاعنا😂🌚
فَـ أعتذر ؏ التقصير واتحملو ترا مـا باقي شي للقصه ونختمها 🥺♥️.
- أحبكــــم ❤️
• لاتنسون النجمه ؏ البارت 🔥
• دُمتم بــ أمان الله وحفظه
• حِسابي الأنستا fatimalrashd