في نور عينيه

البارت الثاني والأربعــــــــــون

يَ يحلمي شكد اكودن بيك لليقظه وتفز منيّ ..

في نور عينيه
الكاتبة هُـــــيام

:: :: :::: :: :: :::: :: :: ::::

بس خل نتفاهم
عليها الحسين التشتمني 😂😂😂
يمممممة متتتتت ونبي إذا چانت اكو جائزة للاختفاءات فيركضون
وراي يردون يخلوني بالمركز واني بوقتها هم اختفى حت ما اخذها

تخيلن شكلي اركض ويركضون وراي يصحيون
عليج الكعبة تعاي اخذي الجائزة واني لازمة لازمة الدشداشه
واركض واصيح وحق الحسين اريد اختفى عوفوني

كافي هُيام يلة بلة لغوة زايدة احجي شي بي خير رهمي السالفة

شلونهن الافاعي المسمومات الحلوات النادرت نيات كلبي 🐍🌚♥️
شون دمجتهن مادري بس المهم يعني انو اني احبجن 😂

أكلجن بنات خل انطيجن سر
شون تعرفن شخص تريد يلزك بالسالفة حت بعض الناس يغلسون ع شي
من تشوفة يجفص ويلوص بالحجي

فهسة اني شون اخليجن تغلسن ع الاختفاء أضل امخرط 😂😂

__________
عود صيرن خبيثات مسمومات
سونها وحدة بوحدة ولا تعلقن 🐍😒😂♥️

-________

نَســـــرة : بس جيبي الجنطة مسرة شبيج..

مسرة : ولج بقت يم شيماء هسة تنزلها..

نَســـــرة : شتنزل خطية ما تشوفيها بطنها لراسها..

مسرة : فطومة امشي صعدي جيبي جنطة عمة بسرعة..

نركض منا ومنا أخذنا الأشياء البدلات صعدهن أحسان
وودونا للمركز ضرغام طالع بالطريق يعني كم ساعة ويجي

خايفة لا المكياج يتخرب بمسافة الطريق
لأن الطريق طويل حجيت الها وتفهمت أمري

من دخلت للصالون واتفقت وياها كلتلي

__ لا تخافين والله راح اخليلج من أحسن الماركات وبعدين مكياج العروسه لا عبالج بساعه وساعتين يخرب..

نَســـــرة : مادري عفية بس اهمشي ميخطط بعدين او يطكع..

__ اطمني

دخلتني لغرفة صغيرة خاصه للعرائس ومسرة وشيماء واميرة
لزمنهن كوافيرات ثانيات بغير مكان

اخذت كل وقتها وهيه تمكيج بعدها سوتلي التسريحة
ما ردتها عاليه او شي لأن الطرحة والبدلة فخمات كلش

شوية واتصلت نسرين علية

نسرين : ها ولج چنتنه..

نَســـــرة : ولج بعينج شنو تكوليلي هيج مو عيب مرت ضرغام تكلولها ولج ..

نسرين : أكلج لا تنعثلين ترة مصيركم بيدي هسه اروح افضحكم
اكلهم ذاك اليوم شفتج بغرفتو طالعة منها بنصاص الليالي ..

نَســـــرة : ههههههههه انجبي ونبي طلعت سليمة شريفة كلشي ما سوينه.. .

نسرين : ولو ما قانعة لأن هو بتالي اخو حمزاوي بس شنسوي ..

نَســـــرة : ههههههه ولج اختصري احجي شتردين راح اتأخر ..

نسرين : دحكي راح ادزلج رقم البنية الي بالمركز
الكنالج علي امس..

نَســـــرة : ماشي عيني دزي خل احفظة قبل شوية ذكرته كلت إذا اروح شلون ..

نسرين : هو هسة تاتمكيج لياسمين وذكرتج يلة باي..

نَســـــرة : باي حبي..

كملت مكياجي سئلتني عن الوان بدلتي وخلت ألوان
يكعد وي كلشي البسة حت ما اطلع نشاز

خطية هوسة الجهال ع امي وكاعده ومنتظرة
حسام جابلنا اكل للمركز حت ناكل

كملت صبغت اظافري كمت اخر شي حت اشوف نفسي
وكفت كبال المراية ضحكت واني اتخيل شكل ضرغام
من يشوفني شيسوي وشيكول

ساعدتني البنيه حت اطلع من الباب رتبتلي اخر ترتيبات
وطلعت الهم بكامل طلتي

امي عافت ادم وخلت شيلتها وتبجي وصلت ع محمد بصوت عالي
البنات واكفات ع جهه عيونهن مدمعة ميكدرن يبجن

تقدمت لامي حضنتها واني ابوس ب إيدها وهيه تبجي
حت ماكدرت تحجي حضنتها حضنة من كل كلبي

بعدها دخل إحسان للمركز البنات البقيه لبسن عبي
أول ما دخل دمعت عيونة عصر عيونة ب ايدة ودار وجهه
كتفة اهتز ما كدرت اصبر بعد كسر الدمعة البعيني

تقدملي وهو يبوس راسي محتضن وجهي بكفوفة الحنينات

إحسان : أميرة اخوهاا..

امي تبجي
والكوافيرات بصالون يهلهون موقف جان يجنن.
رفعت ايدية والمسكة بيدي وحضنتة

إحسان : والله لو يصير اضمج بحضني يبعد أبوج وما انطيج لكائن
من يكون بس يا حظك يا ضرغام وأنتَ حضيت بعزيزة أهلها..

باوعتلة عيوني يردن ينزلن دموعهن بكل حيلهن
إحسان مو مجرد اخ ولا وجوده بحياتي سهل

إحسان اب الي قبل لا يكون اخ احتضني من مات أبويه
وهو يهمس ب اذني اني أبوج وصارلي دنيا كاملة مو بس ابو

نساني اكو فرق بين الاب والابن نساني اليتُم
ما حسبت حساب هو اخوي حنيته طغت علي

طلعني وهو لازم بدلتي من جوة حت اطلع من باب المركز
صعدت ويا اني وامي واميرة

وحسام جاب مسرة وشيماء طلعنه للبيت
اجو المعازيم من كرايبنا والكل اجتمع بالبيت

صار الركص والاغاني واني كاعدة متوترة
ع فرحانة ع كلشي احساسيس ملخبطة

وصل ضرغام من بعد ساعتين بقت الحفلة مستمرة بيتنا
صار الصوت وهن يصيحن

وصل العريسسس وصل العريس صارت خبصة وهوسة
لبسن البنات العبي و بالباب واكفين اخوتي والجد عمران

دخل ضرغام والهيئة مالتة وهيبتة كفيلة بأن تخلي لساني يتردد بالمعوذتين لابس دشدادشة بلون بدلتي كريمي او اوف وايت
وفوكاهه عباية خفيفة مال شيوخ او ماعرف شنو اسمها بالضبط
بس جان زي عربي بحت أصيل

دخل بخطوات ثابتة بعيون تشع حب
تقدم علية باسني برأسي
دنكت رأسي بخجل

ضمني حيل لصدرة وهو يلف عباتة علية ويكول
ضرغام : جبتها بتعب وصارت الي يمة فرحيلي وهلهي بكبرج..

الكل كال الله يرحمها ومبارك عليك ما أخذت
رفعت عيوني علي وهو عيونة يلمعن علية
خفت من روحي احسد نفسي علي
دنكت راسي خجلانه اعدل بالطرحة

الزلم يصيحون برة يردونه نطلع حت نتوكل

صاح لأمي
ضرغام :حجية بروح أهلج جيبي الغشوة..

مدتها امي إله أخذها منها يغطيني
ويعدل بيها خاف طالع شي مني
بالاخير ذب عباتي عليه فوك البدلة

لزمني من أيدي واني كلشي ما شوف
عبالي عمية ولازميها حت اختنكت
استعجلنه نريد نطلع لأن ورانا طريق
وكفو اخوتي تلاثتهم بالباب وهم يباوعلنة

حسام بجة ماكدر يضم دموعة
وحسن يباوعلي بضحكة وعيونة مدمعة
أما إحسان فجانت الدمعة تلالي بعيونة والعبرة خانكتة

إحسان : ضرغام اخذت شمعة بيتنا ماوصيك عليها
أمانة الله وامانتك صونها ولا تاذيها..

ضرغام : ضــنـَـــه گلبي هاي اخليها بين عيوني ابخل ع روحي الفرح وما اخليها بعازتو وعد شرف ي إحسان ما انزل دمعتها ب أذى ولا يلوحها حزن مني..

رد علي إحسان وهو مطمئن منة
إحسان : والله ونعم من زلم ال عمران..

تقدمو الاخوة الثلاث وهم ينطون الأمان
بحجياتهم الحنينة اختهم الوحيدة واميرتهم

__ أحنة سند وعون الج مو بس اخوة لا تكولين اني بغير محافظة وبعيده عن اهلي بس اتصال واحد منج تلكينة يمج واليأذيج نوكفلة سجينة خاصر..

__ أنتِ امانة وضوة عيون ابوي لا تنزلين دموعج
ولا تنقهرين بس تحتاجينة تلكينه يمج..

__ لا تبجين فرحة بيتنا ربي يوفقج ويبارك حياتكم
مأمنين عليج بين آل عمران ندري بيهم راح يبارون الإمانة..

بين وصايا اخوتي وبين دموع امي وبين الهلاهل
وبين نضرات الفرح بعيون ضرغام نزلت دموعي

دنكت راسي امسح بعيوني
قبل لا أمد ايدي ع وجهي
دار وجهه ضرغام علية وباسني بدموعي

ضرغام : له له تبجين وانه واكف مو واعدتهم ما تنزل دمعة منج تردين اخوتج يكاوموني وياخذوج مني مو بالف نذر عند العباس ناذرو ياله حصلتج..

ضحكو وصاحو يابة. دموع الفرح دموع الفرح
طلعت من عتبة باب بيتنة وبجي امي زرف كلبي
احس روحي تريد تبقه يمها متت بدمي عليها
ما جان ودي اعوف إحسان ولا امي
صعدت بالسيارة
اني وياه وجدة وهشام

وسيارات اهلي ورانه والناس الجايين
طلعنا متوجهين.........

نمت ع كتف ضرغام الطريق كلة اني نايمة الئ أن وصلنا
ودوني لصالون الي سوت عنده ياسمين عدلولي وجهي ورحنا للقاعة
حمزة وضرغام برة راحو لحنتهم القاعه البصفنا واني دخلت للقاعة مالتنة

_______

الليل كله سهرانين يحجي اتصال ويايه ويحجي ع جدتي
كل شوية وكلي لوما جدتي جان هسه انه محصل بوسه حضنه شو شني

كعدت حضرت جنطة مال الصالون الاخذها وياي
والبدلات صعدنهن هشام بالسيارة وكلشي احتاجة

نسرين وميار وغدير وسجى ويايه و ضحى كبل تتجي للقاعة
الفرحة جبيرة بيتنا عرس ضرغام وحمزة جدي خابص آلدنيآ

الشيخ عمران اعزاز كلبة اليوم فرحهم ما جان يكدر
يخفى الابتسامة والضحكة من وجهه

الكرايب عدنا والكل ملتمة بيت الشيخ عمران
رحنا بال ٢ الضهر للصالون ربلشتلي تنضيف وتسريحة
اختاريت تسريحة مفتوحة وشعري ع طولو
واني ما صابغه يعني بتالي التسريحة متبرز بالشعر الما مصبوغ

لبستني عدسات وعيوني موتني كمت ابجي وين ياله هدأن
كملتلي المكياج والبدلة ورتبت الطرحة اليه ثبتتها عدل

خابرني حمزة
حمزة :ها ياسمينتي..

ياسمين :ها حبيبي..

حمزة : اليوم حبيبج يلعب فلك المهم جدتي وياكم لا..

ياسمين : وين ويانه..

حمزة : مدريني انه تاسئلج بصالون وياكم.؟ ..

ياسمين : شعدها جايه للصالون بقت بالبيت..

حمزة : ها عبالي هم تريد تعرس ويانه تتمكيج
بعد نعيمة وين تكعد راحة معرسه وي حمزة..

ضحكت

كلي
حمزة : ادزلكم اكل يابة لو جابلكم هشام..

ياسمين :وين هشام جابنة وفلت..

حمزة : ايا....... يا هشام. شو سدي شوية واخابرج..

ياسمين : وين حمزاوي شتخابر اريد اروح اكمل مشغولة والله..

حمزة :نتعذر يابة نتعذر ست ياسمين اخذي راحتج..
سديتو وانه اضحك

__ عن حب زواجكم..

ياسمين :اي تكدرين تكولين هيجي..

__ يا عيني ربي يحفظكم غريب قريب..

ياسمين : حبيبتي ويحفظج لا ابن عمي..

__ ربي يبارك بزواجكم.. يلة عروستنا الحلوة شوفي روحج..

درت وجهي ضحكت من كل كلبي
ع شكلي جنت مو ياسمين غير وحدة
لبست عدسات نفس لون عيون حمزة
وجان شكلي يختلف جذريا

بقيت مبتسمة واتخيل ردة فعل حمزاوي
فزيت من صفنتي

ع صوت هلهولة نسرين
نسرين : كللللللللللللللللللوش..

ضحكت
تقدمت. حضنتني
دمعت عيونها ضربتها ع چف إيدها

ياسمين :انجبي عليمن البجي شو نفس البيت..

نسرين : هسه غير تخليني اعيش الدور يالكعبه..

ياسمين : ههههههه عيشي
يوم الالج وصدك ابجي عليج لأن اطلعين من بيتنه..

نسرين : لا ماعرس ابقه يمج والله..

ياسمين : اي هلو هلو. ومن تشوفين الرجل تموعين..

ضحكنا وطلعت البرة وانه شايلة بدلتي
شافوني البنات هلهلو خابرني حمزة
كال يلة راح اجي عليج أخذج لأن
ضرغام ساعة ويوصل وهو ومرتو

طب حمزة للصالون نسرين
واكفة تصور اول ما طب

هلهل بصوت عالي
وامي وطشت جكليت

ضحكت وخليت ايدي ع حلكي
. تقدم إلى بخطوات وعيونه كبل حلكة يضحكن

لزمني باسني من رأسي بقوة
ودنك ع خدي باسني
ضحك وكلي

حمزة : وين عويانتج السود الاحبهن ؟!..

هزيت راسي عود يعني ماكو وضحكت

انضارة ع وجهي ويحجي وي امي
حمزة : عمة اخذي البنات للقاعة وروحو احنه رايحين لبيتنه..

ضحكت امي وضربتو ع زندو ما جان منتبه لاحد
عايف الكل ومركز بيه وبتفاصيلي

والبقيه يصفكون وامي تكفل كفلات مال اعراس

حت اكو زبائن يضحكن ويتلفظن بكلمات حلوة علينه
لزمني من ايدي جابولي كبوس البدلة لبسنيا وأخذ عباتي خلاها ع البدله
وعاف امي والبنات بالقاعه علساس يرحون ويانة

هو عافهم وصعدني بالصدر يمه وطرنا
ياسمين : حمزززة امي والبنوات..

شغل اغاني حسام الرسام ويركص ويسوق
وكلسا يدير وجهه يحجي كلام يخليني اموت من الخجل

افترينا الدنيا واحنه نركص ونغني خابرت نسرين نصيته شوية

نسرين : تحجون صدك طلعنا وراكم وصلنا للقاعة انتو وين..

ياسمين : هههههه يلة يلة جايين..

قبل لا أسدة وجهت انضاري ع حمزة وكتلو
ياسمين : حمزة بدلاتي بقن بصالون لو جبتهن..

رفع ايدو لفوك ونكثها
حمزة : بس أنتِ جبتج واجيت لا بدلات ولا هاي..

كلتلي
نسرين : قبل لا تحجين جبناهن
ويلة تعالو راح يجون ضرغام ونسرة..

رحنا القاعه نزلني تلكتني نسرين وغدير
طببوني كعدوني ع الكوشة

مرت نص الساعه والمعازيم يركصون وأغاني
دخلت نسرة للقاعة
_____

نسرين

دخلت نَســـــرة ضرغام
مثل الملاك بطلتها جميلة لدرجة تخلي الواحد بذاك الوقت
ما يريد يشيل عينو عنها بجمال شعرها ولونو وجها وبدلتها
جانت تعدل بطرحتها الطويلة وجها مرسومة ع علامة الضوجة
بعدها التفت وابتسمت بكل لطافة وجمال عيونها تشع براءة

نزلتلها ياسمين من الكوشة ونسرة تقدمت
جانن يمشن بحركات بطيء بسبب البدلات
الممر والمسافة من بداية القاعة للكوشة
طويلة وهن يمشن بحركة كلش بطيئة
وصوت الاغاني والإضاءة كلشي جان يجنن

التقن ثنينهم شون الفراشات بجمالهم
ونزاكتهم والموقف الي خله الكل يبتسم

تسالمن ع بعض وحده تضحك للثانية وايديهم ب ادين بعض
وحده لازمه ايد الثانية وراحن كعدن ع الكوشة ثنيهم
اخذتلهم المصوره صور جايبين مصورتين احنه حجزنا
وحده وي القاعه عرض والثانية حجزناها حجز خاص

دخلو بعدها أهلها واكتملت المعازيم
اولشي الدخولية لضرغام ونسرة وبعدين حمزة وياسمين

راحت ياسمين لغرفة التبديل تكعد بين ما يكملون

طفو الانوار والاضاءة وشغلو اغنية الدخولية
نزلت من الكوشة نَســـــرة وراحت يم الباب
ودنكت رأسها وخلت بركع خفيف تول ع وجها
واطفال اخوانها ولد وبنيه لازمين سلتين بيها ورد

دخل ضرغام بالزي الي لبسو جدي ب ادينو
بوكتها شفت دموع جدي الي ضمهن بجبروت وابتسامة حلوة ع محياه
من خلة العباية ع جتافو والهيبة انرسمت ع جسمَو

تقدم عليها رفع الطرحة عنها بكل خفة
وباسها بكصتها وجهه الفرحة بي تقرة مليون
ولزم إيدها والأطفال يشمرون ورد عليهم
بعدها وخرو جهال أخوتها ومشو بحركات بطئية
وع اغنية هادئة وصلو يم الكوشة

__
شغلو اغنية اليسا مال ع بالي حبيبي

بدايتها موسيقى ف احنه مدربين ع الركصة بيوم البروفة
مدلي ايدة خليت إيدي عليها ولزمني بدت الاغنيه
وهو قريب عليه ويهمس ب اذني كلام يخليني املك الدنيا

من وصلت لمقطع ليلة الالبسك الابيض رفعت طرحتي عدلتها
وخليت ادية ع ركبته حاوطتهن وهو رفعني وفرني

الدخانيات صارت تطلع انملت القاعه دخان بالأرض
صرنه نركص بهدوء ونحجي وايدي ع ركبتة وادية ع خصري

ضرغام : من أجمل أيام عمري تاعيشو اليوم
واحلة ما شافتو عيني أنتِ..

نَســـــرة : وأنت أجمل نعمة رب العالمين وهبنياها..

ضرغام : ضــنـَـــه گلبي..

ابتسملتة منصية راسي خجلانه
وهو ويمشي ايدة ع خدي نزلت أنظارة ع شفايفي

ضرغام : عايش حرب انه وياهن صارلي شكثر
واليوم راح انتصر عليهن..

رفعتلة حاجبي وضحكت

نَســـــرة : وإذا اكلك ما اخليك تنتصر..

ضرغام : المركب الج والريح للخالقها..

نَســـــرة : ليش تتحداني..

ضرغام : ننتظر الليلة منو ينتصر ع منو..

نَســـــرة : ضرغام..

ضرغام : كلبوو ابوية..

نَســـــرة : اكمل العرس وارجع وي اهلي..

ضحك حيل ورفع راسه لفوك وهو لازمني

ضرغام : فني والله اذا خليتج بعد تشردين مني..

نَســـــرة : شلون طالعة ما كتلي..

ضرغام : قال الجواهري

ألهَبَني حُسنُك المُترَفُ
وضايَقَني أنَّ ذاك المِشَّدَ
يضيقُ به خَصرُك المُرهَف
وقد جُنَّ وركُكِ من غَيظِه
سَمينٌ يُناهِضُه أعجَف
فداءً لعَينَيك كلُّ العيون
أخالَط جفنيهِما قَرْقفَ

ضب ايده ع خصري ومشة ايده ع تور البدلة

ضرغام : خايف عليج نَســـــرة من عيون الكاعدين..

نَســـــرة : خايف علية لو تريد بس أنت تشوفني..

ضرغام : والله هي لون علية چان أحطج بنص كليبي واقفل عليج..

نَســـــرة : اوي يمة بله أختنكت..

ضحك
ضرغام : يول ليش تتدلعين كبالي ترة حيلي گضة..

نَســـــرة : ههههههه اي غير سوالفك تريد تخليني بنص كلبك وين صايرة..

اتبسم وخلة طرف. خشمة ع طرف خشمي
ضحكت مكزكزة

ضرغام : هاي أنتِ نفسج نَســـــرة لو مبدلينج..

نَســـــرة : ليش..

ضرغام : شو اهجس عندج طاقة اليوم ومطلعة لسانج علي..

ضحكت وابتعدت عن وجهه

نَســـــرة :ايدك وخرها..

ضرغام : غير تانركص وي اوديها..

لزمت ايدة رفعتها ع خصري
نَســـــرة : اكعد راحة ضرغام..

ضحك بصوت عالي نسينا الدنيا وحدنه
وي ضحكتما هم اضحكو استغربت درنة انضارنه عليهم

الاغنيه خالصه والكل يضحك
واحنه ندور ونفتر وحدنه وهو يتغزل
انتبهناا بعدين الموقف يخجل

ضحكت وعدلت الطرحة
وهو حك لحيته بتوتر واختفت ضحكتة الحلوة

أخذنا صور بالقاعة ع الكوشة ماقبل ياخذ هواي
لأن استحى من المعازيم واخذ صورة وي جدته وجماعية

قبل لا يطلع باسني وكلي
ضرغام : لا تضوجين ابوية
من نطلع ناخذ صور عد المصورة متقيد هينة بالحركات..

نَســـــرة : عادي ..

شغلولة أغنية مال الله الله وياك كام يضحك وطلع
اني هم رحت دخلت لغرفة التبديل وطلعت ياسمين
ادردم وتعدل بالبدلة مالتها

ياسمين : وحق الله الا اصلبج نفس ما ورطتوني وحابسيني هينة..

طكيتها ضحك

طلعت هي واني كعدت
أكدر اشوفها من الباب لأن الاضوية يطفوها من يدخل العريس

______

ياسمين

دخلنا اني وحمزة ع اغنية مال الدخولية
جان وجهه يضحك كل ذره بوجهه مبتسمة

ردت اعثر بالبدلة دنك عليها يعدلها

وشغلو اغنية مال ركص بطيء
ونركص اني وياه

حمزة : ولج فلك طرج شطالعة يبعد بيتي شطالعة..

ضحكت واني مخليه ايد ع متنو وايدي الثانيه بيدو

ياسمين : طالعة عليك حبيبي..

حمزة : يبعد حبيبج ولج ياسمينة
كلبي مدي ايدج علي..

رفعت ايدي خليتها ع كلبة

ياسمين : هالكد فرحان! ؟..

حمزة : ما انطي فرحتي لاحد الليلة..

خليت راسي ع جهة كلبه واحنه نركص بهدوء ونفتر
باسني براسي

حجيت واني ضحكت

ياسمين :مو تتحمس بعد بوسة الراس لأن ادري بيك شتسوي أنت..

حمزة :ههههههههه هو لو ما عيب جان بقيت ابوس بيج من غير مكان
بوسة الراس ما تنفع عندي انه..

ياسمين :عجل شكو تبوس براسي..

حمزة :حت امهدلج الطريق..

رفعت راسي وفرني من أيدي

حمزة : شوكت اشيلج يلة غير يبدي المقطع..

ياسمين : شو بطلت ماريد تشيليني
احس روحي راح اوكع وانفضح..

حمزة : هههههه عجل غير انه شايليج شون توكعين..

ياسمين :هو لأن أنت شايلني احس راح اوكع..

دنك ع كتفي باسني
دنكت خجلانه وايدية ع متنو

حمزة :وعلي فلا اتحمل لازم ابوس..

ياسمين : حمزة انفضحت بروح الحسين لا تبوس..

حمزة : ولج يحضي اتمتعي اخر بوسات رقيقات تشوفيهن بحياتج..

فتحت عيوني مصدومة

ياسمين :شتقصد..

حمزة : اويلي لو تعرفين شكصد..

ياسمين : احجي ..

حمزة : شحجي بليل افهمج مو هساع ينرادلهل فعل مو كول..

كملت الاغنية صعدني المدرج مال الكوشة
خليت ايدي ب ايدو وصعد كدام ولازمني البدلة مضايقتني
ولابسه كعب بدل عالي حت اصير بطولو

فمن خليت رجلي صارت نص الحذاء ع حافة الباية
وكعت احس وجهي صخن من الفشلة واالاحراج

صاح حمزة

حمزة :االله الله..

للحضة ردت ابجي
كومني وصعدني
درت وجهي ردت ابجي
وواهفي ع وجهي ماريد ينزلن دموعي
المكياج يخرب

حجة بخوف
حمزة : تأذيتي ياسمينتي شو دحكيلي شبيج..

دفعت ايدو
ياسمين : وخر مابيه كلو بسببك..

حمزة :عجل انه شعليج شمالج يول..

ياسمين : اي بسببك لابسه كعب
حت اصير بطولك هو هذا العرس لو بعد منو..

حمزة :هو انتي شايفة حت تكولين بعد منو..

ياسمين :وخر حمزة راح ابجي وحق الحسين..

ضحك وباسني بخدي واني ضايجة

حمزة : شجاج يچبدي ليش عبستي الوجه
خلي يضحك نشوف الضحكة الحليوة هساع هو شصار..

ومشيت لكوشة كعدت

شاف جدتي
صاحلها وجرني كدامها جر وجهي حيل
باسني حسيت المكياج كلو شفطو بوستو

حمزة :جدددددة هاج دحكي دحكي بروح أهلج..

صعدتلو جدتي وهيه لابسه هاشمي وبيدها العوچية..

رفعت إيدها بتحسر
الجدة نعيمة : مو أكلك كرخنجي سربوت ماتصدك ..

حمزة :فنج تحجين وعلي تردين تعرسين ذاك رجلج
وروحيلو جايه هينة تمنعيني من مريتي..

ضحكت وضربتو

الجدة نعيمة :يح ولك فضحتني جدة اسكت شماالك..

حمزة : اي عجل لا تحجين لا اصيح وافضحج كدام أهلنا..

ضربتو حيل
الجدة : ك.... تهددني..

ضحك حمزة وكام باسها برأسها

بعدها رادو يطلعون حمزة حت الملة تجلينا انه ونسرة
وهو ما يقبل يطلع ويضحك

وكف وصاح
حمزة :زين اطلع بس بشرط..

صاحو
__ اي وهو..

حمزة :أخذها وياي هيه غير مرتي صارت..

سوت روحها جدتي ترفع العوچيه نزل بطفرة من الستيج

حمزة : مريتي لا تخافين وعلي اجي أخذج صرتي الي..

ضحكو وانه خجلانة
شغلو اغنيه يلة مع السلامة مال نور الزين

وهو يكطفلي بالهوى بوسات ويمشي بالعكس
صارت فقرة التبديل وبدلنا. والملة
جلتنا انه ونسرة وطلبت الملة بنات ما متزوجات
صعدت نسرين وغدير

وشيماء مرت اخو نسرة موتتنا ضحك
تريد تصعد وياهن وهيه بطنها كدامها شكبرها

بعدها خلص الوقت المحدد مال العرس
ورجعنا ع بدلاتنه البيضة ولبسنه كبوس
حت يتغطى الشعر والجسم وفوكهن العبي
دخلو عمامي وجدي واخوان نسرة وضرغام وحمزة

وصارت الزفة وطلعونه من القاعة ضرغام لزم نسرة وطلعها وحمزة طلعني الزفة صارت تجنن والسيارات والاغاني والكل يركص وطالعين من السيارة رحنا للفندق وصلت الزفة للفندق ونزلو يضحكون ويهوسون والركص

بعدها راحو واحنة دخلنا
دخلت كبلو نزعت الكبوس
وكعدت وهو بقة برة ورا شوية اجه
دخل وقفل الباب

كمت وكفت
تقدم علية بدون سابق انذار باسني بشفايفي

بعدها وخر وكال
حمزة : يابوية غير ردت اموت صارلي ٥ ايام ما بايسهن..

دنكت راسي خجلانه ودرت وجهي
وخر عني الطرحة واني ميته من الخجل

نزعت الكعب وخرت المستلزمات مال البدلة
كتلو هسة اجيك دخلت للحمام وهو راح يبدل
اني هم طبيت نزعتها لان احس متوني وكعن
كدما البدلة ثكيلة واتعب كلش تعبتني

دحكت روحي ما جايبه ملابس
غميت كصتي وفتحت باب الحمام علكيف
حت اصيحلو يجيبلي السيت الي مخلي إلي

ياسمين : احمم حمززة..

حمزة : شني جاي تحلبين الهاشة..

ياسمين : شسمة اريد ملابسي بالجنطة الصغيرة..

سكت بعدها كال

حمزة : أكلج لبا*ج الأحمر الاشتريتو جايبتو وياج؟؟ ..

ياسمين : راح الطم حمزة انطيني ملابس خل اطلع..

ضحك وحجة بجدية بعدها
حمزة : ياسمينة بس جيس وبي ملابس بيض.

ياسمين : اي هو هذا جيبو..

ياسمين : مديتلو ايدي لزمها حيل ويريد يدخل

صحت بصوت عالي

ياسمين : حمزززززة لا عليك الحسين والله ما لابسه..

حمزة : اشششش اشش يمعودة فضحتينا هاج هاج..

اخذتهم جايبلي سيت النوم الأبيض
لبستو وطلعت

ألم بشعري واحجي ويا
ياسمين : ليش ردت اطب ما تستحي حمزة..

حمزة : وعلي مو صوجج عود ردت اسوي
نفس المسلسلات اجر ايدج واطب وياج شو انتِ فضحتينا بصوتج..

يحجي و يحضر بالتمتوعة حت ناكل

ياسمين : بله بروح النبي انه عاتبة عليك..؟

حمزة : دحكي كلت خافنها البت تستحي
وتريد تعيش نفس هذول المنحرفين عاد انه اسهلها الها..

ياسمين : يا شوف الحظ..

تقرب يمي عاف الصينيه مال الاكل
جرني من خصري وهو يسوي حركات بوجهه

ويغمز
حمزة : شبي الحظ..

ضحكت ودفعتة

ياسمين :وخر لتدحكلي هيج..

حمزة : عجل شون..

ابتعدت من يمة مرتبكة
رحت يم الصينيه سويت نفسي ارتب بالأكل

اجه يمي من وره حضني
لزم العكدة مال الروب فتحها

لزمت ايدو حت ميفتحها باسني بركبتي
احس اديه نزلن وحدهن وهو كدر يفتح الروب
دارني علي ورفع وجهي بين ادية كدر يسيطر علية
وو..............

__________

الخوف التوتر القلق الفرح اللهفة كلشي انجمع بية
نزلنا من سيارة الزفة صعدنا للغرف الحاجزيها

دخلنا اني وضرغام وعافهم وهو يحجي وياهم ويضحك
كلهم روحو زفو حمزة عوفوني
جان صدك سد الباب وقفلها وخلاهم يرحون لحمزة

رفع الكبوس عن وجهي احس روحي ترجف
أبتسملي بعيون تشع حب نضرات حنينة
احس روحه ملهوفة علية حت ادينة يرجفن

قرب شفايفة طبع بوسة بوسط كصتي
مدنكة راسي خجلانه ومغمضه عيوني

رفع وجهي بيدة حت يشوفني يباوع بملامحي
كبل حركت ادية سويت نفسي اعدل بالطرحة
عرفني خجلت ضحك ضحكة خفيفة

نزل الجنطة مالتي بالكاع امي دزتها
لان بيها كلشي احتاجة

باوعلي كلي
ضرغام : كبل كلشي خلينه نصلي ابوية انتِ ..

نَســـــرة : اي بس ما متوضاية..

نزع ساعتة ويحجي وياي
ضرغام : ميهم بنتي روحي توضي انتظرج..

أبتسملتة وكفت كبال المراية اشيل بالطرحة
تضايقت معرفت اشيلها مثبته بهواي ماشات
وكف وراية وخرها عني وفتح التسريحة

اثناء ما جان يسوي بالماشات
نزلت ادينة من ركبتي وتلمس ضهري ع قيطان البدلة
اجت رجفة بجسمي كزبرت عوجت ضهري ثبتني بيدة
يفتحها ويحجي بكلمات بصوته الرجولي الهادى

ضرغام : وتَذيبُ روحي بين اشلاء جَسدكِ
و النار بين ضلوعي تشتعل
فما كنت أحلم ب أنُثى غَيركِ
ولا وَدّدت العيشِ بــــِ مستهل
يا حلوة الوصفِ والروح اليكِ
يا ضحوكة الثغرِ والجمال حليفكِ
يا نَســـــرتي وسمائي وضنا قلبي ومائي

'' الكلمات حصرا من لسانة ما منسوبة لأي أحد ''

فتح القيطان ونزل راسة ع كتفي باسني بخفة
غمضت عيوني رادت توكع البدلة لزمتها ودرت وجهي
مرتبكة إلى أبعد حد احس راح اوكع من طولي

ضرغام : افيش يريحة الجنة البيچ..

تحمحت بخجل
ضرغام : كونج تدرين شكثر تمنيت هالموقف يمر علي كبل لا يخلص عمري..

دمعت عيوني
نَســـــرة : اسم الله ليش هيج تحجي..

ضرغام : شحاجي انه بنيتي.؟ كلنة ع هذا الطريق..

شوية وردت ابجي ضحك عليه كلي
ضرغام : لا يبعدي لا سكتنه ابوية العفو..

نَســـــرة : احم بس ابدل واجي..

تلمس خدي بكفوفة
ضرغام : لا تستحين مني حبيبة..

نَســـــرة : احم لا مو قصة مستحة بس اريد ابدل..

ضرغام : ع راحتج ابوية اطلع؟! حتى تبدلين إذا متضايقة..

نَســـــرة :لا اني اروح للحمام..
لزم شعري أبتسملي

ضرغام : تكدرين تغسلين شعرج؟!..

نَســـــرة :ليش؟ بي شي؟ عطرة ما طيب؟

ضرغام : لا ابوية مابي شي
وعطرو يجنن بس شني شوية نعومتو رايحة من المثبت..

هزيت راسي بقبول بقيت لازمة البدلة
اشرتلة براسي ع اتجاه الجنطة
هز راسه بمعنى شكو كتلة

نَســـــرة :الجنطة..

ضرغام : تردينها ؟..

نَســـــرة : اي بس ماكدر اشيلها..

ضرغام : صار ومن عيوني انه اوديها...

هزيت راسي مبتسمة خلاها باب الحمام
تقدمت للحمام كوة امشي لأن البدلة حملها ثكل
جانت الخيوط مثببتتها من فتحهن

دخلت للحمام وأخذت الجنطة خليتها ع الكليدور
سبحت وطلعت الكلينسس مسحت المكياج
وخرت الرموش يمة حسيت جبل جان ع عيوني

سبحت وتوضيت خليت لوشن لجسمي
رجعت تمكيجت خفيف مكياجي المعتاد
خليت حمرة طلعت شعري مبلل

جان متمدد ع الچرباية والموبايل بيدة
من شافني قفل الموبايل وكام وهو يحجي

ضرغام :شلون هيچي تطلعين ابوية السبلت موجوج..

شال الخاولي العلة متني لفني بي

ضرغام : تتمرضين بنيتي مو زين عليج..

نَســـــرة :مو هسة اريد انشفة..

ضرغام : خل نصلي وانه انشفو بالشسوار..

لبست احرام الصلاة مدينا السجادات
هو وكف كبالي واني وراه

من كمل سجد وطول بسجدتة
بقيت صافنه علي ما رفعت عيوني عنه
من كمل دار وجهه عليه ابتسملي

ضرغام : قبل آلله..

نَســـــرة : منا ومنك..

لم المصلاية وهو يحجي
ضرغام : جوعانة تاكلين؟!..

هزيت راسي بخجل
لان ميته من الجوع ع غده مال الصالون

ضرغام : افه ضَنـــــه گلبي جوعانة شون نسيت..

طلعنة التمتوعة اني ويا وكعدنة ناكل
يوكلني بكل لكمة يبوس خدي خد وخد
ويمسح الاكل عن حلكي عاملني أجمل معاملة

جانت ع جهه حلويات حلينة وكمت غسلت
لميت الأكل الروب انفتح وطلع كلشي
جنت اللابستة جوة الروب يفضح أكثر مما يستر

ضحك بعلو صوته وصاح

ضرغام :ااالله يابة الله...

لميت روحي بسرعة مدري وين أنطي وجهي من الخجل
طفرت بسرعة وشلت السفريات حت راد يوكعن من ايدي

شلتة خليتهن ع جهه واعزل بيها اريد شي التهي بي
عرفني جاي اتشرداجه وراية صار جسمة ع جسمي
من ورة توقفت حركتي ورجفت

ضرغام : عوفيهن..

نَســـــرة : بس خل اعز....
خلة أصبعه ع شفايفي قاطعني عن الكلام

ضرغام : احب رجفتج بيدي..

ماحجيت شي حاولت اثبت جسمي
رفعت عيوني إله واتنقل بملامح وجهه
عكسة الي چان مركز ع شي واحد بوجهي
مد ايدة ع وجهي يتلمس برقة
خلة ايده ورة راسي

أحوالة. تخربطت وهو يباوع لشفتي
كصتة عركت رغم الغرفه باردة

لفظ اسمي وهو يقاوم نفسة قرب وجهه النفس مالته صار يضرب بوجهي غمضت عيوني من حرارة انفاسة وقربه استحيت افتح عيوني

ضرغام : نَســـــرة..

نَســـــرة : اممممم..

ضرغام : فتحي عيونج ليش غمضتي..

فتحت عيوني خلة كصته ع كصتي
حجة بخفوت

ضرغام : ليش تغمضين الاحبهن ؟

نَســـــرة :حرورة انفاسك چوت وجهي..

باسني بحاجبي وهو يتغاضى عن كلامي
نزل ع عيوني وع خدي وصل لشفايفي
باسني قريب منها ردت اوكع من طولي اخذ شفايفي التهمن
صار ينتقل من شفتي العليا لجوة بعد حار شسوة اتفنن

اختنكت احس بعد الهوى ضاع علية
بعد وجهه وهو يلهث النفس تغيرت كصته
برزت عليها نقاط ماي لأن عرك وجهه تغير لونه

صارر يردد اسمي ويرجع يلتهم شفايفي
تعب واني تعبت من بوساته

ضرغام : لم أعد اهتم بعد الآن حتى وان سَلبو منيِ روحي..

خليت ايدي ع شفايفة حجة بترجي
ضرغام : بس بوسة وحدة منج ضــنـَـــه گلبي!..

استحيت حت ارفع عيوني بعيونه مو انوب ابوسة
بقيت ساكته نزل الروب من جسمي وهو يبوس كل جزء بية

من لزم جسمي ب ادينة مدري شصار بيه أفكار احتلتني
تمنيت عقلي يتوقف صرت اغمض حيل اعصر بعيوني
حت اخفي المواقفجان يحجي غزل ورايح بغير عالم
اني اقاوم الأفكار حت ما اخرب واهسة ماردت حت بهاي
اكسر كلبة هواي صبر علية ردت أنطي من صبره شوية

شالني بهدوء وهو ينيمني ع الچرباية درت وجهي
ع التيبل لامب من يمي طفيتهن افتهمني وطفه الاضوية

بقه ضوة خفيف بالغرفة احس روحي الخنكة وصلت حدها
بس اقاوم دموعي كام ينزلن بهدؤء الموقف اعتله روحي هضمة
مرلي المواقف الجنت خايفه اتذكرهن مرلي كلشي تعيس بهاي الليلة

رفع راسة باسني بشفتي وكعت دمعه من عيوني علي
حسيته شون الفز لزم وجهي بسرعة

ضرغام : ليش الدموع بوية بعدنا كلشي ما سوينة..

من كال هيج انفجرت ضميت وجهي بالمخدة ابجي
فتح الضوة بسرعة لفيت روحي باللحاف الموجود

ضرغام : دحكيلي ضَنـــــه گلبي ليش ضامة وجهج شني الجرالج..

هزيت راسي ب اسف ودموعي ينزلن
نَســـــرة : كرهت نفسي ماكدر ابد ..

_________

وللحكاية البقية ❤️

شنو رأيكم بالبارت.. ؟

شنو توقعاتكم للبارت القادم..؟

✨ أختكم هُـــــيام ✨

التعليقات التصويت لا تنسهن يمهات الغيرة 😂♥️🦋✨