تصويت + تعليق وارائكم
هزت مايا حاجبها وضربتها بالفردة تاع الكلاكات بعدت لميس اخر لحظة
لميس : بعقلك ا مخلوقة ربي اتنفسي شهييق زفيير اتبسمي التكشار والغضب يخلقلك تجاعيد ونتي مزلتي في العشرينات من عمرك اذا ماضحكتلكش الحياة دغدغيها
مايا : وعلاش نتي خليتيلي فرصة نعيش لباس ؟؟
هزتلها فردة اخرى رايحة تزيد تضربها شافت فيها لميس بتبهليل
لميس : علابالك ا مايا ؟؟ تعلمت بلي مانشوفش ورايا اطلاقا غار كي نهرب من كلاكاتك
قالت كلماتها وطلقت الريح لرجليها تجري وهي تشوف في مايا اللي لاحقتها دخل لغرفتها قبل ماتدخل ضربتها بالكلاكات جابتها في الارض قعدت شادة مسلانها اللي حساتو تقسم من الخبطة اللي داتها راحت ليها مايا تجري شدتها من شعرها
مايا : كلبة حيواانة حقييرة وزيد من الفوق حاسبة روحك نتي الصحيحة
لميس : اطلقيني ياوحد البغلة يا مكلوبة شعررري راكي نصلتيه هو اصلا قصير ماخصووش اططلقيي جدي ماايا
لزت مايا كثر على قبضتها : اااي احترمي روحك راني كثرمنك
لميس : امممم والله كثرمني بعام برك بصح والله غار تباني مولات 70 سنة من هدرتك يعطيك الصحة جداتي
تبسمت مايا وضربتها لراسها ضرببة خفيفة
مايا : مهبولة كاش خطرة تجلطيني بسكتة قلبية من تصرفاتك هاذي لازم تردي الصرف تقول بالعة كاسات سلفيلي ذاك اللسان شوي
لميس : هههههه تستعرفي مالا اصلا حاجة باينة ما انا لميس كاانغ
مايا بسخرية : هههههه تضحكي على اسااس كي تقسمي لقبك على زوج وتبدلي كنيتك راح تبدلي نسبك راح تبقاي كاانغراااس لميييس
لزت على كلماتها لللخرين خلات لميس تغلي في بلاصتها وهي تفرفط نحاول تتملص من قبضتها
لميس : قتلك ماتزيديش تعيطلي كانغراااس ياوحد الحيوااانة مااعدتش منهم ولا تربطني بيهم اي حاجة
شافت فيها مايا بيأس وطلقت شعرها بهدوء وتمددت في الارض جنبها عيانة اما لميس قاعدة تعدل في شعرها
لميس : شعري مسكين شبع اليوم تنتاف من يد ليد سيرتو هاذاك الدب القطبي
مايا : خير؟؟؟ وش كايين ؟؟ او عييت اليوم بزاااف في الجامعة
شافت فيها لميس كي تفكرت بلي مانوضتهاش الصباح شافت فيها بخزرة ترعب خلات مايا تتوسوس
مايا : وش بيك ؟؟ وش ضربك جان ان شاء الله لاه راكي تشوفي فيا هكذا
قرصتها لميس من فخذها خلاتتها تتلوا
لميس :خاااينة ماتحشميييش لاه مانوضتينيش الصباح للجامعة
مايا وهي تمسح على بلاصة القرسة
مايا : حماارة نزفتيني نهار تولي كيما العباد وتنوضي كيما العباد ثما اروحي اهدري معايا نتي ارقدي كيما الميت ومبعد قوليلي لاه مانوضتينيش .......... يخي نوضتك ونتي ضربتني وزعكتني
لميس وهي تشور على روحها بصدمة : انااااا!!!
ناضت مايا عدلت من هيأتها : اها الجنون
تبعتها لميس مشات تسطحت فوق البونك
لميس : ههه يخي علابالك بيا كي نكون راقدة نفقد جميع حواسي كون تطيح طيارة وتدخل حرب على البلاد وتتفجر قنبلة في الدار ماننوضش و.....................
قاطعتها مايا : خلاص خلاص اسكتتي اااابن عمي وش تهدرري ... علابالي راني حافظاتك كنت روطار وماحبيتش نزيد نضيع وقتي معاك ونزيد نستناك تمشي كي السكران تتمايلي توجدي روحك هاذاك هو خلاص الدرس ونحي تشو سباطك من السرير لاضك نخلطك
ضيقت لميس عينيها تشوف فيها تأففت ونحات سباطها ورماتو
مايا : لمييييييييس هزييييه ماترميهش عندو بلاصتو
لميس : هووووووووف مهووسة النظافة
ناضت وهي تتغزل دات سبادريها لبلاصتو ورجعت شافت فيها مضيقة عينيها
لميس : علابالك شحال نكرهههك ؟؟
مايا : ايه نعرف نعرف بلاما تعيي روحك وتقوليلي
راحت لميس تربعت فوق السرير تشوف فيها
لميس : قوليلي لاه وش صرا معاك اليوم راكي تباني ميش في طبسيك
تنهدت مايا وراحت قعدت متوالها بنفس الوضعية عدلت لميس من هيأتها تسمعلها باهتمام وتركيز صح متهورة ومتمردة بصح حنينة ديما تعاون وتحل المشاكل للصحاباتها واصدقائها بصح مايا ماهيش صحبتها هي اختها اللي ماولدتهاش امها كانت معاها في اصعب ايامها في زوج كانو بلسم لبعضاهم
مايا : تعرفي لميس اليوم تلاقيت بوحد الطفلة متكبرة في الريستورون بهدلتني وهانتني بمعنى الكلمة
لميس بانفعال : شكون هاذ الحيواانة الحقيرة !!! لاه دراتلك هكذا؟؟
مايا : منعرف بلاك كي عادت مع ادم لوينو
لميس : كان لازم عليك تضربيها تعلميها درس متوال هاذا ادم باش تتربى كون جيت ثما كون مسحت بيها الارض وفرجت فيها الناس نعتلها الزمباع وين يتباع رخييسة
مايا : هه مهبولة نتي ؟؟؟ اسكتي اسكتي اكي ماتعرفي واالو
لميس : ايه مانعرف والو بصح متأكدة بلي ماكيش حزينة من هاذ االسوجي خاطر ميش هاذي هي اول مرة
شافت فيها مايا بابتسامة عريضة ع العام تفهمها وتعرف وش في قلبها
مايا : كيما علابالك حنا في هوليوود .. الصحافة حاجة صعيبة هنا لازم علينا نلقاو سبق صحافي كبيير ياخذ اهتمام الناس بالصح البروبلام واعرة باش نجذبو اهتمامهم بيسك كل خبر يغطي خبر اوخر وانا ماقدرت نصور حتى حاجة لضك
هوليوود: هي منطقة في لوس انجلوس في الو.م.أ سبب شهرتها وجود استوديوهات السينما والنجوم العالميين فيها
لميس : مايا بصح مزال الحال على السبق الصحافي تاعك
مايا: لالا انا خلصت قرايتي والله لازم نلقا سبق صحافي يدير ضجة كبيرة باش ندخل في شركة من الشركات الصحافية بصح أنا ... (سكتت)
عقدت لميس حواجبها تستنى فيها تكمل هدرتها
لميس : بصح نتي واش ؟؟؟
مايا: بصح انا ماعنديش الجرأة خاطر المشاهير صعيبة نوصلو ليهم ونوصوروهم خاطر شايفين روحهم وشوية متكبرين وكيم تعرفي السياسين راح نتعاقب ومشاكل الشوارع واحد ماهو لاتي بيها ...... ماعرفتش وش ندير لميس الناس هنا مايقراوش الاخبار العادية ولا اخبار الناس العامة رانا في لوس انجلوس في هولييود كل خبر يغطي على خوه
لميس : وعلاش راكي خايفة هكذا ؟؟؟ ياك رانا نخدمو نادلات في ارقى المطااعم في لوس انجلووس كيما راهي
مايا : تتمسخري بيااا ؟؟؟ ولاه هاذي حاجة تتفتاخر بيها الناس ؟؟؟ او انا ماقريتش وندبت باش نبقى في نفس المستوى ا لالة
لميس : افففف تفكيرك شحال محدود ..... وشكون قالك رايحة تبقاي نادلة يا راس الحمار تقدري تدي السبق الصحفي تاعك ونتي تخدمي عادي وواحد مايفيق بيك ويخي علبالك بلي الصحافة ممنوعة في المطاعم انا وياك رانا في مطعم يجيو ليه غار الارقياء وولاد mama وpapa
مايا : ايه وانا وش دخلني فيهم انا ؟؟
خبطت لميس راسها بيأس من غباء صحبتها : يا راس الداب الخبر تقدري تديه من ثم من الاغنياء والسياسين اللي يجيو لثم فهمتي ولا مزاال ؟
قفزت مايا من الفرحة وعنقتها بصح مادامتش 5 ثواني وعبست
مايا: انا مانيش مليحة ولا محترفة في المكر والاختباء كيما نتي تسما راح يعرفو حقيقتي بسهولة ويزعكوني قبل مانتقبل حتى في الصحافة وبعدها نبقى مشردة بلا حتى مأوى ولا دار وقادرين حتى يرشيوني في الحباس كون يفيقولي
.......يتبع♥♥♥