صوتوا على الحلقات فضلا وليس أمرا طلعو الكرونيك شوي باش نعود نحطلكم راني نزيد نقلكم اذا مالقيتش تفاعل نحبسها والله
ادم بهدوء : وش هو الموضوع ؟؟؟
سيرا بخوف : ضك ندخل في الموضوع مباشرة
هزت كمية كبيرة من الاكسجين قبل ماتكمل : نتا كنت ومزلت هاذاك الراجل القوي المرعب اللي يخوف الناس كامل وكلامك هو اللي يمشي وبصراحة عجبني هاذا بزاف حوست عليك ومالقيت غار انك تحكم سوق المانيا و بريطانيا كامل ونتا بوليسي ورئيس شرطة ذكي حاولت نعرف عليك كثر ومالقيتش كثرمن هاذا
كان يسمعلها بهدوء وتركيز وبفطنتو وذكائو عرف وش تنوي تقول ماشي غار ضيعتلو وقتو برك استفزاتو بحركاتها اللي تحاول تغويه بيها كملت هي كلامها وشافت في عينيه بجرأة تحاول تجذبو رغم الخوف اللي متملكها
سيرا : آدم بصراحة انا ..............
قاطعتها النادلة مرة اخرى وهي تحط في الاطباق على الطاولة بهدوء تنهدت سيرا بغضب
سيرا : من عادتك يا الخدامة تقاطعي الناس وسط كلامهم ؟؟؟
جاوبتها وهي خايفة ماشي منها خايفة من اللي قاعد متوالها : ديزولي مدام الطلب تاعكم وجد وماارحش نعاودها مرة اخرى
دارت كانت رايحة ناضت سيرا تعيط ومقلقة وبالاخص من كلمة مدام
سيرا : انا مانيش مدام ياوحد المتخلفة لاه نبانلك هكذاك ؟
شافت فيها النادلة والخوف ينهش في قلبها مبعد تنهدت كي سمعاتو هو يهدر
آدم : روحي
راحت وهو بدا يوكل من الطبق تاعو متجاهل هاذيك اللي راح تكلاطي هدات روحها وبدات توكل هي ثاني وتحاول تفتح معاه الهدرة مرة اخرى
سيرا : سمعت بلي زدت حكمت مجرمين اخراين هاذ الايام
هزلها راسو بايه وماكلفش روحو يجاوبها لمح بدقة واحد صورهم بالتخبية تمعن فيه مليح بعينيه اللي يشبهو الصقر قاطعو صوت تيليفونو كي صونا شافت سيرا للتيليفون بغيض وتمتمت بين شفايفها
سيرا : هففف مرة اخرى تقاطعنا حاجة
هز ادم تيليفونو وخرج للبالكون اللي ثم يهدر اما سيرا دزتلها صحبتها ميساج اللي كانت تراقب فيها من بعيد
"اعترفتيلو ؟؟؟"
سيرا : نو خوفني بزاف وكلما نتشجع نخرجها من فمي تجي حاجة تقاطعنا
"ماتخافيش اتشجعي برك راح يكون كلش بخير "
سيرا : ايا باي او جاي
جاوبت بزربة وهزت راسها لكتلت الوسامة والرجولة اللي متوالها وقف متوالها هز الفاست تاعو اللي كانت على كرسيه
ادم ببرود : لازم نروح اني عيطت لواحد من رجالي يجي وصلك
تذمرت هزت ساكها ومشات للشيفور اللي بعثولها وهو ركب طومبيلو وهز تيليفونو يكلم واحد من رجالو
ادم : جيبولي هاذاك الحيوان اللي صور
الراجل : حاضر مسيو
-------------------------------------------
خرجت لميس من الكوزينة وهي فخورة بواش دارت من ماكلة اندومي ومتأملة يكون بنين مالقري علابالها بلي وش حضرت هي اسوء ماكلة على وجه الارض
لميس : هففف مت من الجوع انا نستغرب من الناس لاه يكرهوك ونتا افضل حاجة في الدنيا
حطاتو على الطابلة وهزت يديها للسما مستعدة للهجوم حطت لقمة في فمها تبدلت ملامح وجهها وبزقت الماكلة وراحت تجري شربت الماء ماجات تكمل الكاس سمعت صوت طبطيب في الباب بقوة تمتمت بين شواربها ومشات تحل الباب وهي تسب في اللي يطبطب
لميس : اووو كسرووو الباب خير اديوه معاكم للدار .... شكوون الحيوان اللي راه يطبطب ضك؟ راني نتغدا والله ماتحشمو
وصلت للباب حلاتو تفاجئت كي شافت لابوليس متوالها
لميس : اسمالله الرحمان الرحيم.. وش قتلت وزير وانا معلاابليش؟ لاه جيتو في عرش غار خير؟؟؟
بدات تحسب فيهم كانو في 6 شهقت بصوت مسموع : 6 رجال شرطة ؟ عوفا اووه اقصد عفوا واقيلا غلطتو في الباب حضرت الضابط
الضابط ببرود وعينيه في الدوسي : لميس كانغراس ؟؟؟؟
لميس : ايه انا هي كاين مشكل؟؟؟
حكمها من يدها ويهدر بهدوء: امشي معانا لمغفر الشرطة مادموزال
ملصت لميس يدها منو بقوة تهدر بجرأة لميس: اسمع وش بيك ؟؟ هبلت ؟ لاه وش درت ووشمن تهمة ثاني ؟؟
الضابط : امشي معانا وراح تعرفي هيا
ربعت لميس يديها تحت صدرها : نو مانروح معاكم لحتى بلاصة اصلا شكون يضمنلي بلي نتوم شرطة وريلي لاكارت تاعك
الضابط : نلعب معاك انا واقيل هاتي يديك خليني
جاوبها بملل وخرج ليمينوت راح يديرهملها
لميس : اممم اذا كنت حاطو لعب معليش حتى انا عندي مدة مالعبتش وضاق خاطري والله
شافت فيه بتحدي مطلعة حاجبها وتشوف فيه بغرور وثقة اما هو قلقاتو بهدرتها قدم جيهتها يحاول يكبلها مرة اخرى بصح هي رجعت خطوة لاور هزت رجلها وعطاتو لوجهو طاح للارض وهو مصدوم تهيأت وهزت يديها وضعية الدفاع عن النفس
لميس : هاذا يتسمى اختطاف يا ليزوم وانا وش دخلني اذا كنتو نتوم نسيتو لي كارت تاعكم
لميس في نفسها : افففف علابالي درت بروبلاااااام كبيير كبيير اندبي ضك ا لميس باين راني قتلت كاش واحد حتان يجيو 6 رجال كاملين
تقدم ناحيتها بوليسي واحد اوخر ضرباتو بين رجليه حتان طاح وهو يتوجع : اووبس واقيلا ميش راح تسمع كلمة بابا حبيبي طول حياتك
لميس : هيا ضك ماكمش رايحين تهدرو ؟؟
حطت يديها على خصرها وتهدر بملل قدمو ليها الربعة لخراين بغيض وهدر واحد منهم : راكي تصعبي على روحك الامور وراح يتضاعف العقاب يا وحد الرخيسة
فتحت لميس عينيها على وسعهم بصدمة : رخيسة !!!!! انا الرخيسة ياوحد الحلوف يا وحد الحيوان ؟؟ ارواح نوريلك تشوف الرخيسة وش تدير
مشات جيهتو وضرباتو بكوتبي لبطنو بقوة بصق الدم وزاداتو ضربة لراسو طاح ديراكت كان راح يضربها واحد اوخر دزاتو وسوطات الدروج تهبط ب 4 درجات وطلقت الريح لرجليها تجري وشعرها يطاير في الهوا مزال على حالتو
لميس : واااو فيلم اكشن رووعة شحال نحب هكذا مساكن ميش راح يحكموني
تجري وهي تتخطى في الناس وتسوطي على بعض الحواجز وفي نفس الوقت تحوس تضللهم هوما وراها في 6 يجيريو كي الهوايش وهي ميتة بالضحك طول عمرها متمردة تحب المغامرات
لميس : حيوانات ماخلاونيش شبعت كرشي الحبيبة مسكينة اعععع ماكلتي قعدت وحدها فوق الطابلة
حبست بعد مدة من الجري وهي ضامة يديها لصدرها ترد في النفس تشوف في هاذاك البوليسي يلهث ويتقدم ليها كان راح يضربها حبساتو بيديها
لميس : ااي اااي اصبر اصبر دقيقة نحلوها بيناتنا نديرو هدنة نتفاهمو كالم
حبس هو وقعد يشوف فيها باستغراب.. لميس : اسمع ضك نروح معاكم وبكل سرور بكرامتي نشوف التهمة تاعي ماشي طاعة ليكم وانما خاطر كلاني الفضول
تقدم ليها راح يحطلها ليمينوت وهو راسو راح يكلاطي من هدرتها ماحبتش تسكت دقيقة
لميس : ااااااااي وشبيه جدك وجعتني بالعقل برك ماتعرفش تتصرف بلطف مع الانسات ياوحد الحيوان عديم الضمير؟؟
دزها من كتفها نترت منو
لميس : نتا ماتحشمش على اصلك ؟؟ قتلك نمشي وحدي بكرامتي متعاملنيش كمجرمة حمار
قلبت عينيها ومشات للطومبيل تاع لابوليس وتهدر بغرور وتتمهزا بيهم : علابالكم ؟؟ تحتاجو اعادة تدريب وتأهيل لهاذ الدرجة ماتقدروش تلحقو طفلة ؟؟ راح يهرب منكم المجرم بسهولة واذا تحبو انا ندربكم ماعنديش مشكل
تنهدو وهزو ريسانهم بيأس طول الطريق وهي تبلبل على روسهم ماسكتتش
........يتبع♥♥♥
وش تتوقعو يصرا ؟؟؟