للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
_______
عساك بناس تحبها وماتحبك
وعساك بعين ماتعشگ رمش جفنك
وعساك بروح ماتتلهف بطاريك
وعساك بگلب بارد مايفهمك
بقلمي زهراء احمد ( شنو رأيكم استمر بالشعر لو ابطل؟)
نزل من السيارة بكامل هيبته سار بأتجاة الباب طرق عليه طرقات متكررة توقف ما أن سمع صوتها،
إيفاء: منو؟؟
هَيْصَم: اني خاله،
فتحت الباب تقابلت وياه عقدت حاجبها وهي تذكر وين شايفته قبل هاي المره قاطع تفكيرها وهو يگول.
هَيْصَم: السلام عليكم.
إيفاء: وعليكم السلام.
هَيْصَم: اگدر احجي وياج بموضوع مهم؟
إيفاء: احجي اهنا اسمع.
هَيْصَم: على الباب؟!
إيفاء: وشنو بيه الباب النسوان توگف تحجي يمه ساعتين وين المشكله اذا حجيت انتَ؟!
هَيْصَم: لتخافين اني نفس الشخص اللي وصل لَّباءَة ذلك اليوم وماعندي نيه اضركم بجيتي و الموضوع اللي اريد احجي بيه مو مال باب.
إيفاء: اعرف انت نفسك الشخص اللي وصلها ومشكور ورحمه الله والديك وكثر من امثالك بس اني عندي بنيه شابه او وحدي بالبيت شتريد الناس تگول عليه؟
هَيْصَم: بنت اختج راح يتم القاء القبض عليها هذا سبب مهم يخليني ادخل واناقش وياج الموضوع بشكل تفصيلي بالنهايه هاي سمعت عائلتج واذا متردين يتحطم مستقلبها اذا اجت الشرطه واخذوها من باب البيت امام اعيون الجوارين وتصيرون علچ بحلوگ الناس.
إيفاء: تفضل ابني.
هَيْصَم: طلعت مو بس هي هيج حتى خالتها ماعرف ليش الناس يصدگون بسرعة؟!
إيفاء: اهلاً وسهلاً بيك نورت بيتنه.
هَيْصَم: النور نورج، لَّباءَة وين؟
إيفاء: فيروز قصدك.
هَيْصَم: اي لَّباءَة.
إيفاء: اسمها فيروز وهي نايمه هسه احجي ويايه اني.
هَيْصَم: منختلف على الأسم وبكل الاحوال اجيت حتى احجي وياج.
إيفاء: اي اسمع شنو الموضوع؟
هَيْصَم: قبل ما احجي عندي كم سؤال بخصوص صحتج يعني عندج مرض مزمن ضغط سكري مثلاً؟
إيفاء: تريد تفحصني؟!
هَيْصَم: صديقي دكتور يگدر يساعدج.
إيفاء: دمك خفيف.
هَيْصَم: اشرب مي هوايه يمكن لهذا السبب.
إيفاء: لهذا السبب ردت تدخل؟؟
هَيْصَم: اريد أهيأ الأجواء حتى تگدرين تستوعبين اللي راح اگوله.
إيفاء: خلصني احجي.
هَيْصَم: خلي نتفق على شغله مهمه الحياة بيها هوايه اشياء الزين والموزين، النظيف والقذر، البلاء والأختبار، ولازم احنه نتقبل أمتحان رب العالمين بوساعة صدر ومنقنط من الرحمه اللهيه.
إيفاء: صايره مصيبه وصلت الفكره احجيها وخلصني.
هَيْصَم: ليش دائماً تركضون لهاي الأجابة؟!
إيفاء: كلامك هو اللي يوحي لهيج.
هَيْصَم: المهم تأخرت ولازم ادخل بالعميق والد لَّباءَة توفى قبل ست شهر بعد وفاته عاشت وحيدة ببيت والدها حتى لگيتج اني وجبتها تعيش يمج لهنا واضح؟
إيفاء: كمل.
هَيْصَم: لكن اكو جزء مفقود من هاي القصه واللي هو والدها انقتل واللي قتلوه عصابه لتجارة المخدرات بالأضافة تجار اعضاء بشريه وعدهم جرائم هوايه غيرهن.
لطمت على صدرها وصرخت بصوت،
إيفاء: يمه عزه العزاني.
هَيْصَم: أتفقنه تكونين هادئه خاله حتى نگدر نكمل الحديث بدون ميصير بيج شي،
استوعبتي اللي گلته اكمل؟
إيفاء: احجي شلعت گلبي.
هَيْصَم: والدها يشتغل ضمن الشرطه.
إيفاء: اعرف.
ابتسم بطرف شفته وكمل كلامه.
هَيْصَم: خبرني انو انت تعرفين لكن محبيت ابين هذا الشي الها حتى متصير مشكله الج انتِ ايضاً.
إيفاء: وليش حتى تصيرلي مشكله؟!
هَيْصَم: لَّباءَة متهمه بترويج المخدرات وبيعها على الشباب.
إيفاء: يمه اسم الله هاي وين جانت مضمومتلج يفيروزة؟؟
هَيْصَم: بجيب القدر.
إيفاء: وهسه شلون يعني تنسجن؟!
هَيْصَم: للأسف اي لگو مخدرات بالبيت اللي ساكنه بيه واحد المدمنين اعترف انو هو مشتري من عدها.
إيفاء: يمه بنيتي راحت بيها شنو شافت من حياتها ويصير بيها هيج اويلي على شبابج يروح خالتج اويلي يمه.
هَيْصَم: لازم تروح لبغداد ويايه حالاً.
إيفاء: وليش حتى تروح وياك؟!
هَيْصَم: لأن بأي لحظه توصل الدورية وتعتقلها اذا متردين تصير فضيحه بالمنطقه خليها تجي ويايه.
سمعته وهو هيج يحجي قويت نفسي ونهضت من مكاني فتحت الباب وفتت بسرعة خليت عيني بعينه وحجيت،
فيروز: مجرمه اني حتى تجي دوريه وتعتقلني؟!
هَيْصَم: لَّباءَة اهدأي مگلت انتِ مجرمه لكن هذا اللي صار ومو بأيدي اسوي شي غير اخذج للتحقيق قبل متجي الشرطه تعتقلج خليكم متفهمين وتعاونوا ويايه الله يوفقكم.
فيروز: مستحيل اني مسويت شي وانت تعرف عدل منو اني.
هَيْصَم: صح انتِ مسويتي شي بس الأدله كلها ضدج لَّباءَة اعترف عليج تبيعين مخدرات انطه اسمج الكامل بالأضافة للصورة جايب معلومات موثوقه وحتى بالبيت لگو مخدرات برأيج هاي شلون تنحل؟؟
فيروز: نزلت دموعي، هَيْصَم والله معليه.
هَيْصَم: محلوله لتبجين بس المهم تجين ويايه هسه.
إيفاء: شو انت بكيفك تحجي ولا كأن اني موجوده؟؟
هَيْصَم: احتراماً لتضحيات والدها وعمله وفداءة للوطن ولوصيته قبل ميموت اجيت بنفسي ومخليت الدوريه تعتقلها اتصال واحد بمركز النجف يعتقلوها وياخذوها لبغداد بدون ما اتعب نفسي،
انت تعرفين شنو المخاطره بتصرفي هذا؟؟
أُتهم بالتعاون وي المجرم بالأضافة ممكن تنزل رتبتي وحتى القضيه اللي مستلمها ياخذوها من عندي هاي مخدرات مو حامض حلو والمتهمه بالتعاون وياهم عصابه صارلها سنين بهذا المجال.
إيفاء: انطيني دليل يخليني اصدگ كلامك.
هَيْصَم: ليش محسستني جاي اخطب؟!
بابا افهمي شغله مهمه القضيه قضية مخدرات يعني اعدام حبس مؤبد ملاحظين خطورة الموقف لو لا؟!
وهسه ست تجين ويايه بدون محد يعرف من اهل المنطقه لو اتصل بالدوريه تتكفل بالموضوع؟!
إيفاء: انتظر لحظه اجي وياكم ما اخليها تروح وحدها.
هَيْصَم: رايحين للمنتزه فدوه لربج خاله.
إيفاء: وليش متقبل شنو تريد تسوي بيها مثلاً ومتريد اروح وياكم؟
هَيْصَم: لو ردت اسوي شي بيها موصلتها لباب بيتج وانتِ اصلاً مجنتي تدرين والدها توفى وبقت عايشه وحدها لولا مساعدتي لذلك الله يخليج خليني اشوف شغلي.
إيفاء: اقتنعت ما قتنعت مشكلتك ابنيه وحدها شلون تقبلها على شاربك تاخذها هيج بدون أذن فالته هي؟
هَيْصَم: والله هي مال فالته فالته ومن زمان هم بس الواضح راح تفلت أكثر،
متفهم خوفج وقلقج واني وياج بس انتِ شايفه الأخبار الدنيا مضاهرات وعالگه وكل وقتي بالمركز وماعندي أهل أبغداد حتى اطمأن عليج يمهم و لَّباءَة متگدر تطلع من السجن قبل ميتم حل القضيه وممكن تنحال محكمه بهذا الوقت اشلون اگدر أأمن عليج؟!
إيفاء: وأن رجلي على رجلها.
هَيْصَم: مُصره؟
إيفاء: اي نعم.
فيروز: سمع كلام خالتي وطلع شكيت بيه حيسوي شي هو مو من الأشخاص اللي يمشون برأي أحد تركت كل الأفكار وركزت بحياتي الجايه ياترى شنو مخبيلي المستقبل ليش هيج الحظ دائماً ضدي بعد كل معاناتي وخساراتي تاليها انحبس وبجريمه ما ألي أيد بيها،
تقريباً نص ساعة اكثر او اقل ماعرف بالتحديد سمعت صوت سيارات الشرطه صارت قريبه على الباب واصوات اللاسلكي عاليه اشويه ونطرق الباب بعنف طلعت خالتي ودخل خمسة مسلحين ملثمين وبأيدهم اسلحه منظرهم رجف گلبي خفت ليكون سواها ويخليهم يعتقلوني هسه،
گلبي دگاته ألف والخوف سره بكل جسمي مغص قوي بطني و رجليه متحملني بعد اقتربت نهايتي واني قاريه على السجون العراقيه كل شي بيها خفت يضيع شبابي ومستقبلي بدون ذنب اسوء يوم مر عليه بكل حياتي بعد وفاة بابا وهسه دا احس نفسي أُساق الى الهاويه غصب وبدون رحمه،
ردت اشوفه أو بس المحه احس بوجوده الأمان دورت عليه بوجوه الموجودين ثواني او دقائق صارن سنه عليه شفته من بعيد مكتف أديه ولابس نظاراته صرت اتوسله بعيوني على الأقل ميخليني اعتقل بهاي الطريقة السيئة اقترب من عندي وأشرلي جنت بوقتها لابسه ملابس بيت مستوره ومخليه شال شامرته هيج على راسي بعدني ممتعودة عليه ومضابطته بشكل كامل فهمت قصده ادخل اغير اللي لابسته سويت مثل ميگول دخلت للغرفه ودموعي تنزل وحده تتبعها الثانيه نار بگلبي متنخمد جبل ونايم على صدري والهوه گوه اسحبه ردت اموت بهاي اللحظة ولا اعيش هيج عذاب المخدرات تهمه مو هينه،
لبست بنطلون اسود وقميص اسود للركبه لفيت الحجاب بطريقه مرتبه وطلعت اول مشافتني خالتي اقتربت من عندي وتمنعي اطلع وياهم بس ليس باليد حيله.
إيفاء: ولج يمه وين رايحه شرطه ذولي مو هينه تضيعين وانت بعمر الورد والله تضيعين.
فيروز: اكو غير حل عندج؟
إيفاء: اي ابو الحسن علي يحلها رايحتله اليوم بياته بشاربه وشارب ولده ترجعيلي ومابيج شي.
فيروز: مخدرات خاله.
إيفاء: اي وانت شكو قابل بايعه عليهم؟!
تهمه باطله وابو الحسن يحلها مالج علاقه روحي ودرب السلامه ان شاء الله ممطوله وتنورين بيتج مره ثانيه.
فيروز: صدگ من گالوا الخاله أم حضنتها ودموعنه هي اللي تشرح عذابنه بهذا اليوم على رغم هي متعرفني بس وثقت بيه لو جانت امي عايشه همات سوت نفس الشي رب العالمين اخذ وحده وعوضني بالثانيه، ودعتها وهي كلها امل نرجع نجتمع من جديد بس اني داخلي ممطمأن حاسه هذا الطريق مراح اسلكه مره ثانيه وحتى لو رجعت مراح اكون نفس فيروز اللي طلعت من عنده،
خطت رجلي عتبة البيت التفتت شفتها مخليه شيلتها على حلگها وتبجي اعيونها حمر اجيت ارجع واحضنها وقفني صوته وهو يگول.
هَيْصَم: لَّباءَة تأخر الوقت راح يصير حضر تجوال خلي نمشي او وعد من عندي ترجعين تلتقين بيها وتعيشون مع بعض خليج واثقه بكلامي.
باوعت بعيونه ونزلت دمعتي وحجيت بغصه،
فيروز: مسويت شي والله بريئه اني هَيْصَم.
ابتسم مطمأن ويحجي ويايه مثل ميحجي وي طفل حتى يقنعه بهذا الموقف كبر بعيني حيل.
هَيْصَم: واكسر راسه اللي يگول غير هيج لَّباءَة الهَيْصَم ماممكن تكون مجرمه انثى الأسد انتِ واني واثق أبرائتج مثل براءة الذئب من دم يوسف.
فيروز: لعد ليش تسجني؟!
هَيْصَم: حتى محد يشوفج غير هَيْصَم،
يلا تعالي خلي نرجع لبيتنه.
جذبتني هاي الكلمه بيتنه عقدت حاجبي بتساؤل،
فيروز: أي بيت؟!
هَيْصَم: يابيت؟؟
فيروز: انت هسه گلت بيتنه.
هَيْصَم: سمعتي خطأ مگلت هيج.
فيروز: يمشي بصفي لحد موصلنه بالسياره فتحلي باب الوره وصعدت وهو صعد مكان السايق درت وجهي للبيت شفتها واگفه بالباب والشرطه كلهم صعدوا بسياراتهم بقت عيني عليها حتى ختفت عن نظري بالكامل عبرنه المنطقه وطلعنه على الشارع العام وقف السيارة فجأة انتبهت على السيارات مالت الشرطه مموجوده بهاي الأثناء طلع موبايله وتصل ماعرف على منو،
هَيْصَم: شكراً الك.
تدلل انتَ شنو عدنه غيرك؟!
هَيْصَم: تسلم متقصر.
باوعلي من المرايه وضرب على الكشن اليمه بأيدة فهمت من هاي حركته معناها تعالي يمي غلست واني مجان عندي مزاج اصلاً انزل بقيت بمكاني الصمت هو سيد الموقف الى ان قاطعه وهو يگول.
هَيْصَم: موبايلج وين؟
تذكرت مجايبته ندبت حظي شلون انسى هيج شي مهم بس مع هذا جاوبته.
فيروز: بالبيت.
هَيْصَم: شنو يسوي؟
فيروز: نسيته.
هَيْصَم: ليش؟!
فيروز: هَيْصَم مالي خلگ حتى اخذ وانطي وياك.
هَيْصَم: تعالي يمي الطريق طويل واخاف اسوي حادث لأن كلش نعسان وتعبان هم على اي دقيقه اغفى.
فيروز: افضل خلي اموت و ارتاح من هاي الحياة اللي مبقى بيها شي حلو.
هَيْصَم: واني وين رحت؟!
فيروز: وانت منو؟!
هَيْصَم: معقوله اسمح يطخج شي واني عايش واشم الهوه؟؟
فيروز: سمحت سيد هَيْصَم وهياتك د تاخذني للسجن بأيدك ونسيت وعدك انك راح تحميني قضيتك دمرت حياتي سيادتك من شفتك لحد الأن ميصير ويايه بس المشاكل.
هَيْصَم: تعرفين شنو المشكله؟؟
عقلي يگلي هي مثلهم وگلبي حقير داگ رجله يگلي لا ومن اول موقف تبريتي من عندي ونسيتي منو هَيْصَم جنت استاهل من عندج هذا الجواب عاشت ايدج صحيتيني على الواقع،
سهمج دخل بنص الگلب هزتني كلمتج لَّباءَة.
فيروز: لتسوي نفسك العاشق المخيون هذا واقع حال دنعيشه برأيك ليش حتى اتهم بهيج قضيه اذا مجان بسببك؟!
هَيْصَم: اني نقذتج ليش محملتني المسؤوليه هسه مدا افهم؟!
فيروز: رحمه الله والديك لو مناقذني احسن بألف مره.
هَيْصَم: من حزنج متعرفين شنو تحجين اسكتي لَّباءَة.
فيروز: حتى لو سكتت يبقى هذا الواقع سيادتك بسببك اني اهنا اليوم تقبل الفكره.
هَيْصَم: تطلعين من عدها وعد او وعدي بصمه وشاهد.
فيروز: واذا مطلعت؟!
هَيْصَم: تطلعين.
فيروز: نفرض ثبتت التهمه شنو عقوبتي هَيْصَم؟؟
هَيْصَم: اما مؤبد او سجن 15 سنه.
فيروز: وتحجيها برود حضرتك؟!
هَيْصَم: اذا لطمت منو يسوق؟!
فيروز: أسلوبك وبرودة دمك تستفزني.
هَيْصَم: تردين اكذب عليج حتى توصلين وهناك تنصدمين بالموضوع؟؟
فيروز: لتكذب ولتحجي اصلاً افضل متصير مشكله.
هَيْصَم: متفهم عصبيتج وغضبج بس اللي ممتفهمه انو انتِ صدگتي كلامي بدون دليل شوكت تبطلين هاي العادة؟؟
فيروز: لأن اعرف انت مو شخص يكذب بهيج أمر خطر ومهم.
هَيْصَم: اذاً لساتج واثقه بيه.
فيروز: ومنو مطيح حظي غير هاي الثقه.
هَيْصَم: تعالي اهنا يمي لازم احفظج كم كلمه تگوليها بالتحقيق.
نزلت من السيارة وصعدت بالصدر صح معصبه بسبب اللي وصلتله و القادم المجهول المنتظرته لكن مع هذا ما اگدر انكر زودتها عليه وهو ما أله ذنب غيره ميسوي اللي سوا اول كلمه گلتها من صرت قريبه من عنده.
فيروز: اسفه،
التفتلي ورفع حاجبه وگال بتساؤل.
هَيْصَم: على شنو؟
فيروز: لأن عصبت بوجهك وانت ما ألك علاقه بالموضوع.
هَيْصَم: واني متفهم ماكو داعي تعتذرين.
فيروز: والسهم اللي دخل بنص الگلب؟
هَيْصَم: طلعتي هسه.
فيروز: والأثر والنزيف؟
هَيْصَم: النزيف توقف من صرتي قريبه من عندي والأثر تگدرين تمحيه بأبتسامتج.
فيروز: سكتت ومجاوبته واصلاً معرفت بشنو اجاوب صفنت على الشارع وعقلي كله بالتحقيق واللي راح اعيشه حتى تطلع برائتي،
نص ساعة او يمكن ساعة قطع هذا الصمت وهو يگول.
هَيْصَم: لتگولين انو انتِ تعرفيني لَّباءَة ولتجيبين سيرة النجف و خالتج محد يعرف بالموضوع تره وبهاي الحاله تزيدين القضيه تعقيد.
فيروز: ليش ما اذكرك؟!
هَيْصَم: راح تخلين نفسج بموضع شك بالأضافة راح اتورط اني هم بالقضيه وما أگدر اطلعج من عدها تعرفين السجون العراقيه والضباط مو كلهم شرفاء.
فيروز: شنو قصدك الضباط مو كلهم شرفاء؟!
هَيْصَم: ممكن يساوموج على شرفج او يعتدون عليج حتى.
نزلت ادموعي وحجيت بعصبيه،
فيروز: شنو هاي هَيْصَم تاليتي امشي بطريق طايح حظه واتجرد من شرفي؟!
هو هذا وعدك اليه وقسمك ميضرني شي هاي وصية والدي الك؟!
تريد تضحي بيه بهاي السهوله وانت تطلع من عدها سالم؟؟
هَيْصَم: ثاني مره تتجاوزين واني ساكت ما اضمن لشوكت ابقى محافظ على اعصابي لذلك اسكتي وخليني اكمل لتخترعين اجوبه من عندج وتستعجلين بالحكم.
فيروز: شلون يعني اخترع اجوبه من عندي انتَ شنو گلت هسه؟؟
هَيْصَم: شنو گلت؟
سمعيني شنو حجيت؟
گلت راح يغتصبوج مثلاً؟؟
جبت سيرة انو انتِ راح تصيرين مرأة مو شريفه؟؟
لو گلت راح تبقين بين افلان وعلان بالسجن جاوبي لتصفنين بوجهي!!
احجي انطقي لَّباءَة لتخليني اتخبل عليج هسه.
صار عصبي ويضرب على الستيرن بقوة واعيونه حمر من العصبيه للحظة حسيت راح نسوي حادث اذا بقى الوضع متوتر هيج فززني من صفنتي صوته وهو يصرخ من جديد.
هَيْصَم: جاوبي لتصفنين تالي عمري هيج اسوي بيج اني اخذج بأيدي واسلمج للسرسريه مو هيج تفكرين بيه انتِ ابالج اني شخص طايح حظه مابيه خير وابيع بيج مووو بعقلج مرسومه هيج صورة عن هَيْصَم گولي احجييي.
فيروز: اهدأ لتعصب مو زين هسه يرتفع ضغطك ويصير بيك شي.
هَيْصَم: يضربني الم الموت أرحم من كلامج اللي يسم البدن لتحسين اني انسان بدون اخلاق واني الطايح حظها ادافع عنها وما اخلي احد يساومها على شرفها ما بالج انتِ برأيج اسمح بهذا الشي يصير وياج؟؟
فيروز: تره انت گلت الضباط مو كلهم شرفاء شنو تريد احجي مثلاً؟!
هَيْصَم: گلت الضباط مو كلهم شرفاء وارجع اعيدها وماكو مكان مبيه الزين والشين لكن اني گلت راح يعتدون عليج ويمسوج بسوء؟؟!!
گلت راح يتاجرون بيج وتصيرين سلعه متنقله حجيت هيج؟!!
فيروز: محجيت بس اهدأ اني اسفه واعتذر من عندك فهمت خطأ خلص لتعصب مو زين عليك هَيْصَم،
نزل من السيارة وضرب الباب بقوة ماعرف وين راح اشويه ورجع بأيدة بطلين مي واحد شمره بحضني والثاني فتحه وشرب من عنده على رغم التوتر اللي اللي احنه بيه هسه بس ابتسمت على تصرفه غريب أمره هذا الرجال حتى بقمة عصبيته مينساني وابقى على باله،
حتگولون مجامله وممكن متصدگون لكن تصرفاته تخليني احبه وحبي يزيد اله وي كل لحظة سواء هو بعيد عني او قريب يتحكم بمشاعري مثل ميريد ويخليه مسيطر على كل جزء بيه،
وصلنه لبغداد وبعد اللي صار منطقنه ولا كلمه قبل مندخل المحافظه نزل يم مطعم اشتره غده ورجع قدملي العلاگه وگال.
هَيْصَم: اكلي هسه حتى يصير عندج طاقه للي راح يصير.
فيروز: وضحلي شنو راح يصير؟
هَيْصَم: راح اخذج للتحقيق بعدها تنسجنين حتى نلگي ادله على برائتج وفي حال ملگينه تنحالين محكمه.
فيروز: تحجي برودة اعصاب راح تموتني عندك علم؟؟
هَيْصَم: اني انسان واقعي ما احب المجاملات خبرتج بلي راح يصير واطمأنج هم راح تطلعين بأقرب وقت ممكن كوني واثقه.
فيروز: والله ممتفائله ابداً هاي المره حاسه ضوه الشمس مراح اشوفه مره ثانيه ونتهت حياتي عند هاي النقطه.
هَيْصَم: تشبثي بكل وسيله للنجاة ابجي صرخي قاومي لتنطين بنفسج ابد ممكن مو اني اللي احقق وحتى مو اعضاء فريقي لذلك اخذي حذرج كلمه وحده تحجيها بدون متحسبين حساب توگعين بيها،
شنو متنسألين حاولي متذكرين اي سيره عن اللي صار بيناتنا لأن هذا اللي يردوه بس تگولين عندج معرفه بيه وقتها ما اگدر ادافع عنج ويصير اثبات برائتج مستحيل،
خليج شجاعه مثل متعودتج دائماً ياويلج تنهزين امام إي سؤال استخدمي المكر والحيل والمراوغه حسي نفسج بطلة الفلم وهذا دور انتِ ملزمة بحفظ النص،
اذا مگدرتي تنقذين نفسج دير بالج تتخلين عن كونج انثى الأسد اللبوه اللي ميگدر احد يقترب من عدها،
انتِ على وشك دخول وكر الذئاب الجميع يريد افتراسج لذلك خليج لبوه واهجمي حتى لو تتأذين لكن متخلين احد يطخج.
خوفني كلامه وحجيت بتوتر.
فيروز: مراح تعيفني هَيْصَم؟
هَيْصَم: حتى لو جنتي الموت راح ابقى متمسك بيج لأخر لحظه مأجيتج حتى اتركج بنص الطريق لَّباءَتي.
فيروز: ليش توقفت؟!
هَيْصَم: لحظة خلي اشوفه وين وصل صار نص ساعة من اتصلت بيه.
لائِث: ربع ساعة واحنه يمك سيدي.
هَيْصَم: شنو گلت؟
لائِث: راح اشوف صاحبتي.
هَيْصَم: لائِث.
لائِث: اشاقه وياك هاي شبيك.
هَيْصَم: وقت شقه هوه؟!
لائِث: اني والفريق وكم واحد ويانه يعني ثلاث سيارات.
هَيْصَم: عاشت ايدك بس استعجل قبل ميصير المغرب.
لائِث: توكل محامي الها؟
هَيْصَم: اتصلت بيه راح يكون موجود اول منوصل.
لائِث: هو نفسه؟
هَيْصَم: متعلم على هيج قضايه.
فيروز: منو هذا الوكلته؟
هَيْصَم: واحد غثيث ما ينبلع بس يفيدنه بالقضيه.
فيروز: محامي شاطر؟
هَيْصَم: بالتزوير.
فيروز: وليش متعتقله؟!
هَيْصَم: وشاطر بأخفاء جرايمه ايضاً ذكي مو بالسهوله القي عليه القبض.
فيروز: لهاي الدرجه!!
هَيْصَم: سالفته طويله ومشوقه هم احجيها الج بعدين خلينه نحير بقضيتج هسه.
وصلوا بعد فتره مو طويله نزل الهَيْصَم ونزل واحد من أحد السيارات ماعرف شنو اخذ من عنده واتقرب ناحية الجهه اللي گاعده بيها فتح الباب وانطاني كيس صغيرون فتحته لگيتها كمامه صفن بوجهي شويه وبعدين گال.
هَيْصَم: لتخلين احد يشوفج غيري واذا سألوج بالتحقيق گولي مريضه ما اگدر انزعها.
فيروز: شنو السبب؟
هَيْصَم: ماعدهم اخلاق واني رجال ما اتحمل نظرتهم الج.
فيروز: وليش مخلي ناس ماعدهم اخلاق يحققون ويايه؟!
هَيْصَم: لو جان الأمر بأيدي حلتهم هم للتحقيق بس الفساد مستشري بكل مكان والأيد الوحده متصفگ.
صار مقابيلي وأشرلي انزل مخله احد يشوفني واني اصعد بالسياره من وره نزل راسه وهمس بأذني بكلمات.
هَيْصَم: اكو كامرات مراقبه بغرفة التحقيق ومسجل صوت اذا صار شي او طلب واحد من اللي يحققون من عندج اي شي او جبروج تعترفين لتبقين ساكته اصرخي الطمي سوي اي شي واضح حتى اذا شفتي حركه معجبتج همات اصرخي او اطلبي مي او ترحين للحمام راح افهم انتِ بحاجه للمساعده.
فيروز: انت مو گلت اكو مسجل صوت يعني تگدر تسمع.
هَيْصَم: ممكن يغلقوه سرسريه ماعندي امان بيهم.
فيروز: كل الناس متثق بيها؟!
هَيْصَم: فريقي المقرب وانتِ مو من ضمن كل الناس لَّباءَة.
لائِث: سيدي نتحرك؟
هَيْصَم: تعال سوق السيارة.
لائِث: والبقيه؟
هَيْصَم: كل واحد بسيارته ،استعجل ابني راح نتأخر.
صعد هذا الرجال اسمر طويل لابس الزي شواربه اطول من حياتي وملفوفات مثل هَيْصَم تقريباً هم نفس البنيه بس مو نفس خفة الدم و الأسلوب بسرعه ذب ميانه.
لائِث: السلام عليكم.
جاوبت بصوت ناصي.
فيروز: وعليكم السلام.
لائِث: شلونج مرت اخوي؟
جحظت اعيوني هذا شبيه مرت اخو شنو؟!
خجلت وماعرفت شنو اجاوبه نقذ الموقف هَيْصَم وهو يگول.
هَيْصَم: لائِث اترك سوالفك الماصخه وسوق.
لائِث: اسمي لائِث واني اصغر من هذا الحلو بسنتين وتره هو يحبني يعني ممعتبرني بربري مثل البقيه تگدرين تتطمأنين مرت اخوي.
هَيْصَم: تبطل هاي السالفه لو شلون؟؟
لائِث: رتبتي وعلت شنو تگدر تسوي بعد؟!
هَيْصَم: انزل بيك عقوبه وخليها تنزل.
لائِث: مصدگ نفسك حبيب.
هَيْصَم: تريد تتأكد؟!
لائِث: نرجع لمرت اخوي شوفي اختي اني اعرف هذا الرجال من الطفوله ميجامل وميكذب لو تخلين على رگبته السيف لذلك هو اكيد خوفج بكلامه بس كوني واثقه محد يگدر يطخج انتِ عرف مدير المركز وفريقه وحتى الآمر مالتنه صديق والدج سابقاً ومدربين سوه بس الله يرحمه جان عمله سري اما هذا لا،
اللي اريد اوصله من هذا الكلام هو لتخافين مو بالسهوله احد يطخج او يسويلج شي واحنه موجودين.
هَيْصَم: خلصت؟؟
سوق يلا.
اسمعه يهمس قريب من عنده مفكر ما اسمع بس اذني يمهم عاد احنه النساء متفوتنه هيج سالفه.
لائِث: ولك بس لاخرسه؟
هَيْصَم: متحب تلغي وياك.
لائِث: شبيه يمه ابزز.
هَيْصَم: لا تچكك.
لائِث: افردها لتعبس ماحب.
هَيْصَم: انجب من رخصتك.
لائِث: تفيض احترام حتى بالغلط.
لابسه كمامه اضحك براحتي من صدگ طلعني من مود الزعل لكن سرعان ماتغيرت ملامحي ونگلبت حزن هو وصولي لمركز الشرطه توقفت السيارات ونزلوا جماعته اعرفهم من آخر مره شفتهم بيها اقتربوا من سيارتنه نزل هَيْصَم ولائِث فتحلي باب السياره نزل راسه لمستواي وگال.
هَيْصَم: يلا لَّبوتي.
نزلت ادموعي واني اشوف نفسي وصلت للنهايه بسرعة حجيت بصوت ناصي قريب أذنه.
فيروز: خايفه هَيْصَم.
هَيْصَم: اني موجود اكسر رجله اللي يأذيج خليج قويه اريد اشوف بيج هَيْصَم لَّباءَة.
نزلت وسمعت صوت واحد يگله.
كلبچه سيدي.
لائِث: تسمحلي سيادتك؟
هَيْصَم: ميحتاج مراح تهرب وهي بعرين الأسد،
هَمَّاس ، هَمْهَام ، ضَرْضَم ،
صرت بنصهم ماعرف كل واحد وأسمه بس هَيْصَم ولائِث، مخلوا احد يشوفني الا ان وصلنه الى باب غرفه بابها اسود فتحها لائِث وأشرلي هَيْصَم ادخل بيها كرسيين يتوسطهن ميز وشباك جبير على الجهة اليسرى مو غرفه جبيرة،
تخنگ بشكل مو طبيعي وكأن عزرائيل عليه السلام موجود بيها وعلى اي دقيقه يطلع بروحي، عقلي رسم اشياء بحد ذاتها خلتني انجن مره اگول راح انحكم اعدام ومره اگول لا راح انسجن مؤبد، نزلت ادموعي على شبابي وعمري اللي ديضيع بدون ذنب وهاي المصيبه كم شخص اليوم انسجن بدون ذنب وكم بريئ انتهت حياته بداخل غرفه ظلمه وزنزانه لو جانت حكومتنه عادله موصلنه لهذا الحال،
حاسين بوضعي فاهمين اللي امر بيه هسه او ابقى اعبر لأسبوع كامل ما اگدر اوصف شعوري بهذا اليوم بعمري كله ملزمت جگاره فجأة وبدون سابق انذار الگي نفسي متهمه بترويج مخدرات،
گعدت على احد الكراسي اشويه ودخل شخص ماعرفه وگف على راسي ونطاني سماعة أذن لبستها تحت الحجاب هو من اتأكد من عندي تركني وطلع دقايق او ثواني دخل واحد لابس زي عسكري على جتفه نجمتين گعد على الكرسي المقابيلي وبدأ يحجي.
عاصم: اي نبدي شنو اسمج؟
فيروز
عاصم: اسمج الكامل.
فيروز ياسر حسين.
عاصم: وين ساكنه؟
بغداد الجديده.
عاصم: وي اهلج؟
فيروز: ماعندي اهل.
عاصم: يعني من ذني البنات وضحت الفكره.
لائِث: اهدأ سيدي هو يحاول يستفزها مو اكثر.
هَيْصَم: والله راح ابتلي بيه شلون يحجي وياها بهاي الطريقة؟!
لائِث: هذا اسلوبنه بالتحقيق ميگدر يغير طريقته بس لأن هي عرفك.
هَيْصَم: احترم نفسك هي بريئه مو مجرمه بعدين عرفي هاي شنو؟!
لائِث: اعرف هي بريئه بس القانون قانون سيادتك لتعصب الله يخليك.
هَيْصَم: سوالفك مشيها على غيري كلمه زايده من عنده ادخل واكسر راسه واللي يصير خلي يصير،
وهذا الحمار وين صار؟!
محمد: سمعتك تتجاوز سيادتك مو حلوه واني جاي لخاطرك.
هَيْصَم: عملك هذا سيادة المحامي.
محمد: تعرف اكثر شغله احبها شنو هي؟
هَيْصَم: الدفاع عن المجرمين.
محمد: بس لتنكر اليوم انتَ بحاجتي والا متصلت مو صح سيادتك؟
هَيْصَم: سوي معروف مره وحده بحياتك ودافع عن انسان بريئ ممكن هذا العمل يخفف عنك العذاب يوم القيامه.
محمد: بهاي اني معتمد عليك متأكد راح تسحبني وياك يگولون المؤمن يسحب أربعين واحد وياه.
هَيْصَم: اترك هذا الموضوع وتفضل فوت.
محمد: نفوت ليش لا.
نطرق الباب ودخل شخص حنطي جسمه مرتب لابس قاط بيج ابتسم بوجهي دخلوا كرسي حتى يگعد عليه صار يتوسطنه كلما يسأل هذا الضابط سؤال يجاوبه هو.
عاصم: شلون تعرفتي عليهم؟
محمد: على كيفك سيادتك شو بسرعه دخلت بالعميق يجوز عدها اسرار وانت تحرجها بهاي اسئلتك.
عاصم: انت شغلتك ادافع عنها مو تحجي بمكانها.
محمد: هي موكلتي وهذا الشي ممكن يصير بين الموكل ومحاميه.
عاصم: انزعي الكمامه خلينه نتعرف عليج بصورة اوضح.
محمد: عيب ميصير تنزع الكمامه يمكن صايبتها حراره وتخجل تبين وجهه.
عاصم: تجاوزت راح اطردك بره اذا تبقى تعيق التحقيق.
محمد: شنو الدليل على انو هي تروج مخدرات؟؟
عاصم: عدنه شاهد هو اللي اعترف بالأضافة لگينه كيس بكنتورها موجود.
محمد: وانت بهاي صدگت وعتقلتها؟!
عاصم: هذا يعتبر دليل وبرهان قوي شنو تريد اكثر من هيج؟!
التفتلي وگال.
محمد: وانت تركتي كل الأماكن مخليتيه الا بالكنتور ياحمار يتعامل وياج؟!
عاصم: شنو رأيك تسكت خليني افتهم من عدها.
محمد: هو من دخلت مانطقت ولا حرف شتفتهم؟!
عاصم: شلون بديتي تروجين؟!
محمد: عن طريق الأنستا اكو بيج جديد فاتحيه لهاي الأمور.
عاصم: وتالي وياك؟!
محمد: انت تمارس عملك واني امارس عملي وين المشكله؟!
عاصم: منو واگف وراج؟
محمد: محد بس الحايط.
عاصم: اطلع بره.
محمد: مو من حقك اني محاميها لازم اكون وياها وقت التحقيق اذا طلعت لازم تأجل التحقيق وياها بعدين لازم احجي وياها على انفراد ونتفق على كم شغله.
عاصم: خمس دقايق.
محمد: هاي اسلم بيها على حبيبتي.
طلع وهو نگلبت نبرته الى جديه.
محمد: اسمعي وركزي ويايه ما مسموح ابداً تحت اي ظرف كان تنطقين بأي حرف اني مگتلج عليه بالأضافة لازم تحجين كل شي تعرفيه اليه حتى نگدر نوصل للأدلة اللي تثبت برائتج.
سمعت صوته وهو يحجي ويايه من السماعه اعتقد نفسها اللي يستخدموها بالغش لأن تدخل بوسط الأذن يعني متبين.
هَيْصَم: لتحجين علاقتج بيه لَّباءَة ولتذكرين خالتج خليها بعيدة عن الموضوع.
فيروز: كل اللي اعرفه اني بريئة.
محمد: هاي الجمله اسمعها من الجميع اريد شي جديد.
فيروز: اني بنيه عايشه وحدي بعد وفاة بابا.
هَيْصَم: عفيه كملي.
فيروز: رحت يم صديقتي.
هَيْصَم: لأن عزمتني يمهم علموده زواجها وماعدها احد.
فيروز: بقيت اهناك اسبوع و البارحه العصر رجعت.
هَيْصَم: بعد مخلص العرس وسافرت بره البلد شهر عسل.
فيروز: وتفاجأت بسيارات الشرطه محاوطه بيتي العصر طلعت متهمه بين ليله وضحاها بجريمه مخدرات ما اللي ذنب بيها.
هَيْصَم: احسنتِ.
محمد: سهله نگدر نتحقق من هذا الشي.
فيروز: شلون؟
محمد: اشوفج بعدين اليوم انت راح تباتين بهذا المكان وميحقق وياج باجر ان شاء الله نلتقي انتبهي على نفسج.
هَيْصَم: بعدني مُصر انتَ ماتنبلع.
محمد: الواضح راح نحضر عرس بعد متطلع من السجن.
هَيْصَم: وانت مو من المعزومين.
هَمَّاس.
هَمَّاس: سيدي.
هَيْصَم: اخذ بصماتها وقارنهن على الكيس اللي لگينا أبيتها.
هَمَّاس: حاضر سيدي.
فيروز: طلعت من الغرفه بعد مأخذوا بصماتي اخذتني احد الشرطيات للسجن الأنفرادي،
غرفه ظلمه وبيها فراش على الأرض المكان مو قذر بنفس الوقت مو مريح بالنهايه هذا مو بيتي ولافراشي گعدت عليه ولميت رجليه لصدري بعد فتره قصيرة دخلت وبأيدها صينية أكل جنت جوعانه حيل لذلك اكلت وشربت مي جان كلش طيب مثل اللي بالمطاعم يعني ممبين من السجن وانما واحد دزه اليه وماكو غيره يسويها ابتسمت على رغم الوضع الطايح حظه اللي اني بيه هسه،
تعبانه ونعسانه و التفكير موتني خليت راسي على المخده وحاولت انام ماعرف الوقت شگد حسيت الباب انفتح ودخل شخص لمحت شي بأيدة اقترب من عندي حيل وصار بمستواي وحجه قريب من عندي بصوت ملاني خوف.
يتبع.
شاركونه القصه شمعاتي وتفاعلوا حتى نكمل بحماس،
ملتقانا الأحد بأذن العليم ،
حسابي الأنستا.