وان كان سهوا حبي لقلبك
فيكون سهوا ابديا وهو الاصح
......
بقلمي
زينب
....
تصويت لان البارت طويل تعويض عن الفات
سديم...
دخلت للغرفه نرجس التدرس بس واضح من صفناتها المتقطعه بالها مو يم الدراسه كتلها واني احط يمها كلاص عصير
_نرجس درسي لاتفكرين بشي
مجرد هزت راسها موافقه ورجعت تدرس
اجتني بشائر وبيدها تلفونها
_تميم يخابرج يريدج
اخذت منها التلفون ملهوفه علمود اسمع خبر على مصطفى
_تميم
_يم البنات انتي
_اي
_مصطفى وياي
_صددك تميم لكككيته
_اششش صوتج لحد يسمعج اي لكيته بس ماريد احد غيرج انتي ونرجس يعرف ب الصار خطيه سديم بعده طفل يباوعوله بنظرات الشفقه من هسه
_محد يعرف عفيه تعال بسرعه
سد الخط واني ملهوفه على شوفت مصطفى رجعت يم البنات انطيت التلفون البشائر
_مارجع خبر غيث
_مادري كلشي مادري سديم شلون جدو راح يوافق وغيث يخطب بدون اهله وبدون موافقتهم غير يجي تميم علمود احجي وياه
_اي كال راح يجي
اكتفت ب السكوت وهيه تكتب رساله بجهازها
ضليت واكفه ب الطرمه انتظرهم وعيوني مدمعه
كل صوت سياره من الشارع يفز كلبي عبالي تميم
فززني صوت غسق يمي وهيه تكول
_تعرفين تميم وين
عقدت حواجبي باستفهام واني اباوع لوجهه التعبان
_هسه يجي تميم ليش
_ماكو شي
_وين عمو حازم ليش مو وياج
_ب المستشفى
فز كلبي من حجايتها
_اسم الله ليش شصاير
_تخربط وضل هناك كلت تميم يسجله خروج من المستشفى ويجيبه هنا ولد زميلي ب الشغل كال اني اجيبه بس ماكدر اخلي يجيبه هم عنده عائله ومسؤليات مافارغ
حسيت راسي تخربط من الافكار عباس يكول عمو حازم ب السجن وغسق تكول ب المستشفى
_مجاي افهمج غسق
_سالفه طويله
_ترا عمو حازم حيل عزيز علي اعز من ابوي
هزت راسها باسف وهيه تسولف مختصر بسيط عن سبب سجنه وعن زوج امها وعن الضابط الساعدهم ومرض عمو
_زين زوج امج ماطلع هسه من المستشفى
_الضابط عزيز يكول طلع رغم ماينطيني جواب يشفي الكلب
_عادي كلهم هيج
صفنت ب الفراغ وهيه تكول
_يمته يجي تميم
_دخلي انتي هسه يجي
باوعتلي بنظرات جامده
_تعرفين منو صلاح
مدري شبيه من كالت هيج خرطت العافيه حسيت كل جسمي نمل من الخوف معقولة تريد تعرف منو اخواتها
_ليش
_تعالي ندخل ونسولف
_لا اريد انتظر اخوي راح يجيبه تميم
_براحتج
راحت جريت نفس املي ريتي
لشوكت اضل اتهرب منج اليوم باجر انتي تعرفين كلشي
رحت وراها واني اريد اقطع سلسة افكارها
دخلت لغرفه عمو يمها واني اسألها
_شلون عفتي امج وهيه مريضه
_مثل ما امي الحقيقه عافتني واني طفلة بس الفرق اني عفت امي ودمي محروك عليهه مامكتوبلي اعيش ويه ام الاثنين تخلن عني على شنو باقيه وياهن
الغصه الماليه صوتها حسيت هموم الدنيا كلهن بصوتها
_لاتلومين شي هذا الكاتبه الله الج حسب كلامج زوج امج مو خوش انسان فالله خلصج منه انتبهي لهاي هم ذكري الشي الصار زين الج ب النهايه انتي كسبتي عمو حازم وهذا كافي الج راح يعوضج عن الراح صدكيني
_تمنيت ابوي مامطاوعني وماضالين هناك تدرين اجيت هنا وماعارضت شي لان احس اي مكان اروح بي تجي مشاكل مو احساس وانما متاكده فكلت خل يطلع ابوي من السجن ويخلص من المشاكل بعيد عني عود بعدين يجي هنا اجيت بس علمود اعرف منو صلاح منو اولاده صدك مرته ميته تدرين صلاح متزوج امي هههه والله جذب مدري صدك مجاي استوعب شي اني واصله المرحله كلشي يكولونه اصدكه وصلت المرحله مابيه حيل احلل تفكيري واميز الصدك من الجذب
_تعرفين منو صلاح
_ماعرفه بس اعرف هو عمي
_رغم مو اني الشخص المناسب الي اسولفلج علي رغم اني كدامج المفروض امدح بي بصفته شخص قريب علي
صلاح صح عمج واخو ابوج وعمامج بس ماعاش هنا عاش بغداد تزوج امج صح لاسباب مجهوله لحد هسه محد يعرف السبب بس ابوج يكول بسبب الحقد الي يحقده على ابوج قرر ياذي بهيج طريقه ولحد هسه بكلبه غل وحقد محد شايله دمر عائلة كامله اكلج شي
دمعت عيوني من اجه منظر امي ميته كعدت يمها واني شابكه ايد بايد طول كلامي هيه توزع نظراتها بين عيوني بتركيز
_صلاح دمر عائلة اخو الي هو ابوج حازم رجع صار عنده اطفال من امج ودمرهم امج واطفالها تشتغل وكل شهر يكعدون بيت ايجار مخلصها شرب واكل ونوم ونسوان لحد مابين يوم وليله رجعو بنات امج من المدرسه لكوها ميته واثار الدم ب البيت واضح مثل عين الشمس الي صاير قتل لان بوقتها ابوج شارد من البيت وقافله وجاي للبصره تخيلي وصل لهل مرحله
عقدت حواجبها واضح كزبره جسمها من السمعته مني
_يعني امي ماتت مقتوله
_اي
_هسه وين صلاح
_محد يعرف وين طردو منا
_ليش
_صارت مشاكل هواي
_وين تعرفين كل هذا
_لان اني بنت صلاح
كامت من مكانها وهيه تكول
_انتي شنو تضحكين علي شنو بنتهم شبيج
_عادي بمرور الوقت تتقبلين الفكره اني هم دمرت مثلج وتقبلت جنت رافضه اسمع شي بخصوص الموضوع بس تقبلتج بحياتي
جرت نفس وعقدت حواجبها مانفكت
_عفيه اني ماناقصه شهل حجي بس سؤال ماكلني امج ربتكم احسن تربيه ماتخلت عنكم حبتكم ورادتكم
جريت نفس بقوة وصبر واني اتذكر كل مشاكلنه وياها بس ابقه احن الها
_عشنه عادي اسره متفككه مابيها ذره من الراحه صياح وعياط وغلط ويوميه لازم نشتغل وياهة علمود نعيش وكلام يسم البدن بس اجاوبج واكلج لا ماتخلت عنه لو تريد تكدر تتخله عنه بكل سهولة لان امي مايلزمها سمعه او شي او يلزمها خوف صبرت علينه ع المر وتشتغل علمود نعيش جانت تكدر تعوفنه
_باعي عقلي رافض يصدك كلامج بس قهرتج ورجفتج وانتي تحجين تخليني اصدك
كلتلها هيج و
ضميت شفتي للداخل امنع دموعي تطيح واني اباوع للبينه التحجي ماعرف شي عنها بس تحجيلي عن امي
ختنكت واني اشوفها كدامي حسيت باستفزاز مو طبيعي
اني بنتها وهيه بنتها بس فرق السما والكاع عافتني على شنو
الرجفه مافاركت ايديها الي لازمتها بايدها الثانيه سمعت صوت هورن دك اكثر من مره وطلعت من الغرفه تمشي سريع
كعدت مهدود حيلي شنو اسوي ماعرف الي اعرفه اريد اختفي من الدنيا كلها شلون بكل بساطه تحجي هيج
دك تلفوني جاوبت بدون ما اباوع للمتصل
الخنكه لازمتني ماحجيت شي غير اسمع صوته
_الوو غسق
_غسق تسمعيني
_وياك
بعدت التلفون اجر نفس علمود اكدر احجي
_حسين يمته يطلع ابوي
_راح اسجل خروج من المستشفى واجيبه
_لا جدو كال تميم يروح يجيبه
_شسالفه غسق عاد اشوفج لاخر مره بعد وين اشوفج
ماكدر اجامل او احجي شي الغصه ماليه صوتي
_لاتعب نفسك اكثر من هيج تميم يجيبه
_ماشي الي تردينه
سديت التلفون حتى بدون ماتشكره
خنكتني الافكار وحيطان الغرفه
طلعت ع الصوت الاسمعه جوا
نزلت لكيت نفس البنيه وطفل بحضنها حاضنته حيل كانو جان ضايع
كعدت يمهم واني صافنه عليهم ماكدرت حتى اسلم ع الموجودين اريد بس اطرد الافكار من راسي اباوع للبنات الموجودات وحده وحده كل وحده اباوعلها اكول بداخلي معقولة انتي اختي
سديم...
بيبي الاخذت مصطفى من ايدي وهيه تخزر بيه وترجع تبتسم المصطفى
عجبني امرها شبيها بيبي
مصطفى الجان ملابسه كلش مبهذله وشعره طويل وصاير وصخ وجه المصبوغ من الشمس
بيبي دخلت لغرفتها ويه مصطفى
كالت غسق وهيه توجه كلامها التميم
_تكدر تجيب ابوي
_شوكت
_اليوم
_ماشي اروح
_اسفه اذا راح اتعبك وياي
هز راسه تميم ب الرفض اعرف تميم شكد تعبان ومامرتاح
كالت بشائر وهيه مافاهمه سبب وجود مصطفى هنا
_احد يفهمني ليش مصطفى هنا شوكت لحكت تجيبه من بغداد تميم
_سديم تسولفلج بعدين
باوعتله وهزلي راسه ب الموافقه
دخل عباس وضحكته سابقته وهو يحجي ب التلفون
فتح سبيكر وهو يكعد يمنه ويكسر جونه الاسود
_شوفي جوري هاي سديم ام راس اليابس وهاي بشائر الطينه واختهن الفاهيه مدري وين وهذا تميم العكره
_كوم منا لا اطيح حظك شو انت مالك رداد كاعد وتصنف من حلاتك هسه
كاله تميم وهو يطلع يهز بيده ورجع كال الغسق
_خلي حسين يدزلي عنوان المستشفى برساله
عباس عدل كعدته وسد تلفونه وهو يكول
_ياحسين بس لا ابن عمتك الاغم
_لا يابه ولد من ديالى امشي وياي عباس ب النبي تعبان
_شعندك تعبان مو جنت صبحيتك كله نايم
_لك حقير ماتحس شوي على دمك شو انا بس تكلي على شي اركض ركض الك
_شوف راح اخابر صاحبي يروح وياك عاد يسوق عنك بس والله ماكدر اخذ اجازه باجر
_اي جذب جذب
كالها تميم ورجع طلع كال عباس وهو يباوعلي
_هذا رجلج الحقنه شلون متحملته ماينبلع
_ترا انت الحقنه هسه شيصير عليك لو تروح وياه مو خطيه وحده
_يووو انتي احقن منه ماتفيدون
شمس_كافي شبيكم سطرتونه بعد تكافشو تعاركو يلا شهل مهزله
كام عباس عافس وجهه معاجبه
دخلت يم نرجس ب الغرفه اجت بشائر سولفت الها ع الصار جانت صدمتها لاتقل عن صدمتي
جاي نسولف ودخلت علينه بيبي فجاة تحجي وتاشر بعوجيتها علينه
_شوفن يبنيات اخيجن ماتحاجنه بشي ماتسألنه لو ابسط سؤال مفهوم سديممم كلشي سمعتنه تضمنه بكلبجن الولد جاي من ابوج وانتي ماسمعتي شي وانتي نرجس ماشفتي شي وحده منجن تكوم توكله وتسبحه
_ليش بيبي غير نعرف الصار وياه
_كتلجن الموضوع ينسد نهائيا
_ع الاقل سولفينه انتي وين ابوي وين شيماء
_شيماء مطلكها وذابه الولد على ابوج الاثول مطلعهم يكدون علمود يشترولهم اكل وابيج حتى البغداد مارايح مطلك المسعده ولافيلي للبصره صايره عنده عزة نفس وحارم الوليدات من عدنه جا اجيبهم هنا اوكلهم اشربهم وانت انكلع
نكسر كلبي عليهم من كالت بيبي هيج شلون هان عليها تعوفهم عند ابوي الي تدري بي مو كفو والدليل مطلعهم ب التقاطع يبيعون استغفرالله
كالت نرجس وهيه مكشره
_خلصنه من شيماء البومه
_جا انتي فرحانه عبن الوليدات تبهذلو
_بيبي المهم خلصنه من شيماء زين بيبي ماكلج ليش شرد من شافني
_ااااخ يايمه شحجي شخلي كلبي مورم ابوجن جان يضربهم ويكلهم بس تشوفون واحد من اهلي راح يجي يضربكم هيج لان اهلي مثلي والولد خايف من اجه لهسه حتى للحلاق مايقبل احد ياخذه
دنكت راسب متمنيه بيبي بعد ماتضيف شي على كلامها كلبي احترك عليهم ومن ابوي وشيماء وهاي سوايتهم السوده صدمتي ب افعال ابوي بدات تاكدلي ليش جان تميم يخاف علي من ابوي اذا هيج مسوي بولده
لحظه ادراك بهاي اللحظه انو امي جانت مثل الحايط النه ضد اذيته صح مرات يضربنه ويستقوي علينه بس جنه متقوين بامي
كلت واني رافضه البنات يسألن بيبي اكثر رافضه اسمع عن ظلم ابوي اكثر
_اي بيبي مانحاجي شي نهتم بي حاله حالنه
_عفيه هو اخيجن يمه لو حتى ابن شيماء بس شذنبه
_بيبي قابل احنه كارهينه
_هسه تعاي اخذي خطيه خايف
رحت وياها اخذته للحمام سبح وصبيتله اكل
لنص الليل وهو نايم يم بيبي ماقبل يجي يمنه غسق الي ختفت وبعد ماشفناها
تميم جاب عمو الي جان حيل تعبان ماقبل يصعده فوك فرشله جوا ونومه طلع عنه وشافني كاعده ب الهول
_سديم ماتنامين نص اليل ترا
_رحت وحدك
_لا صاحبي راح وياي
_بس اشوف عمو وانام
_ماشي لاتتاخرين ولاتكلين الغسق خليها الصبح تشوفه رغم هو لح اله يشوفها
راح تميم واني دخلت يم عمو الي جان نايم ع الجهه اليمنه وجهه صاير ع الحايط
_الحمدالله على السلامه عمو
التفت علي وهو يكول
_هلا بوية
_شلون صرت
هز راسه وهو يكول
_الحمدالله تعاي يمي
_كعدت يمه وان لازمه ايده الي بيها الكانونه
_شلون صارت رجلج عمو
_والله من جويتك شلون ماتصير زينه
_هههه علمود لاتنسينها بعد شكد جبانه تخاف من الجويه
_عمو الجويه شويه مو هينه ترا
_غسق نايمه شفتيها اليوم اكلت لو لا
_مادري عمو اذا نايمه او لا بس شكلها كلش تعبان ونفستيها تعبانه خصوصا بعد ماعرفت بابوي متزوج امها تخبلت جان شكلها مثل المامصدكه احنه خواتها
فتح عينه مصدوم من كلامي
_منين عرفت انا ماحجيت شي الها المن كلتو الها عمو ماناقصها هيه
_والله عمو مو اني حجيت هيه اجت سألتني على ابوي يعني تعرف ب الموضوع من اجت للبصره
زفر نفسه بملل
_عمو لاتفكر هواي ارتاح هسه بعدين تتعود هنا حتى احنه من اجينه جنه حيل تعبانين بعدين تعودنه
_اله غسق اعرفها لاتتعود ولا تكعد هنا متاكد
_ليش عمو
_من صغرها اعرفها العناد العندها والبراسها براسها مستحيل تعوف امها هناك وتكعد هنا
_والله مادري عمو الله كريم ارتاح انت
غطيته زين وطفيت الضوا وطلعت جان شكله حيل تعبان
لكيت تميم كاعد ب الهول وعينه بجهازه
_تصبح على خير تميم
سد تلفونه وهو يكول
_وين يابه جا بس عمج اله حصه تكعدين وياه
_نعسان انت والوقت متاخر ليش ماتنام
_لا مانعسان تعاي كعدي
_لا تميم اروح انام
تجاهل كلامي وهو يلزمني من ايدي ويمشيني وياه عيني على غرفه عمو لاتطلع كوثر
صعدت لغرفته بس دخل تمدد ع السرير وهو يكول
_فكينه مو
_منين
_من كلشي تعبت سديم اريد اتزوجج واطلع منا صاير ماتحمل كلش
كعدت يمه واني امشط شعره باصابعي
_انشالله
_خنتزوج هسه
_لاتميم شنو هسه
_اي والله
_لا تميم الله يرحمه اخوك توه متوفي ماترهم
جر حسره ساكت حط راسه على رجلي وهو يباوعلي
_اشو صايره دبدوبه
_اني منيلي ليش تجذب
_والله على هذا لسانج اكوم اكتلج
_سويها وشوف
_بلا ششوف
_صاير يكتل
_ااااا مو اسويها
_اني هم عندي ايدين واكتل
_هههههه الفصمه تكتل
_تنمر تنمر شوف ابنك شلون راح يطلع صاك علي
_قصدج على ابو
كالها وهو يضربني بوكسي بطني رغم خفيف بس فزيت منه متاذيه لان ايده ثكيله
_شبيككك تميمممم
_صووووتج
عفست وجهي ودرت عنه
_راح اروح انام
_ههههه تعاي شبيج اشاقه
_اي عود هيج
_بلا لاتصيرين نكديه
_انا نكديه تميم
_لا يابه اشاقه
_خوش
_صدك نسيت اكلج جدو يجوز يوافق لخطوبه غيث يكول المهم رايدها هو مو اهله
_صدددك كول والله يااااي راح نفتك من بشائر ههههه
_اشاقه وياج
_تميم
_لا والله صدك
_ليش جدو وافق بسرعه
_مو كتله جدو هذن بنات عمي محد يتحملهن مو زين اجه خطبها وهاي سديم شالعه كلبي وتريد كتله يلا تنعدل
_لاتمسلت
_راح اكص لسانج
_شبيك اشاقه
_يلا حبيبي روحي نامي ولاتكعد بشائر تستفسر وين جنتي وليش رحتي
_رايحه تصبح على العافيه
طلعت من عنده لغرفتي واني مليانه طاقه من الحجي السمعته ماتحملت انام كعدت بشائر وماقبلت تكعد لفت البطانيه على راسها ماتقبل تكعد ضليت اتكلب شلون اكلها
اخذت تلفونها كتبت على شاشه سوده
"جدو احتمال يوافق الخطوبتج ئومي ارئصي يهانم"
حطيتها خلفيه شاشه ونمت ورا مافتحت الرمز على بصمت اصبعها وهيه نايمه
غسق
ماعرف شلون نمت من التفكير والانتظار
فتحت الجهاز اريد اشوف الساعه بس اجت عيني على اشعار المكالمات ٣ مكالمات فائته من عزيز
فزيت مفزوعه واني اتصل علي حتى بدون ماشوف شكد الوقت
عبالي ابوي صايرله شي نسيت تميم الي راح يجيبه ونسيت اني جنت نايمه مجرد مافتح الاتصال كلت
_عزيز متصل علي جنت نايمه ابوي بي شي
جان يمه هوسه وصوت ناس كال بصوت عالي عباله ماسمعه
_شوي واخابرج
سد التلفون واني نهد حيلي من الخوف صوت الاذان كلش قريب ع البيت باوعت للساعه دنيا فجر
ضربت كصتي واني الوم نفسي اكو واحد يخابر بهيج وقت
رجع عزيز خابر
_غسق
_ها عزيز
_وصل ابوج لو بعده
_لا بعده
_شلون بعده ترا ابن عمج رجع من وكت كال حسين
_مادري لو وصل جا كعدوني
_روحي تاكدي
_ماشي
اجيت اسد التلفون كال
_خلي الاتصال مفتوح وتاكدي
نحرجت اخلي المكالمه مفتوحه وين اروح واسأل منو هسه
يجوز كلها نايمه
فتحت الباب والبيت اظلم كله
شغلت ضوا التلفون انزل جوا مجرد شغلت الضوا وصرخت بفزغ وخوف واني اشوف طفل نايم يم غرفه ابوي الجنت بيها
نهد كل حيلي عبالي ميت مو نايم
عزيز الي يصيح ب التلفون علمود اجاوبه حطيت التلفون على اذني واني اجر نفس فحاطنه من الخوف
_شبيج شنو هل صوت غسق شصار
_بااع هذا طفل نايم يم غرفتي مادري نايم مدري ميت عزيز يخوف
_استغفرالله يالله كعدي بوية شسالفه
شغلت ضوا البيت واني اهز بي اريده يكعد فتح عيونه واني بعدت عنه جريت نفس براحه من كعد
كال وهو يكوم
_اريد ماما اخذيني الها
نكسر كلبي من حجايته ودمعت عيني
الغصه بلعومي ماكدرت احجي شي نزلت لموازته واني اكلها
_ليش حبيبي وين ماما
_مادري عافتنه عد بابا وراحت صار كلش هواي صح تضربنه بس نحبها اجيت لهاي الغرفه مالكيتها شفتج نايمه عبالي هيه
رغم ماعرف شي عنه ولا اعرف وين امه نزلت راسي ونزلت دمعتي كانو كلامه جان سبيل يفجر كل شي كاتمته بكلبي
_اخذك الها تندل وين
هز راسه بلا وعيونه دمعن من شاف دموعي مسحت عيوني واني اسد اتصال عزيز لزمت الطفل من ايده وكعدت يمه ع الدرج
شكله كسر كلبي مدري ليش
_شنو اسمك
_مصطفى
مديت صبعي اله واني مبتسمه
_تصاحبني مصطفى
هز راسه بلا استغربت ليش هيج رافض
_ليش حبيبي مو اني قررت اصير صديقتك
_انتو اهل بابا كلكم مثل بابا بس تميم صاحبي
حسيت ورا شي جبير من كلامه ورا قصه مؤلمه
_بلا ليش تصاحب تميم وماتصاحبني
_لان تميم من قبل يحبني بس جانت سديم هم تحبني بس مو هواي يعني بس قليل
_وبابا يحبك جان منو سديم
_لا مايحبني سديم اختي
_وينه بابا امشي نروحله
_مادري
حجيت وياه بجديه واني اريد جواب منطقي
_حبيبي منو ابوك ليش هيج خايف
_ابوي صلاح تعرفينه
ابتسمت بالم وكلبي احترك حرك
_منو امك
_شيماء
بداخلي اكول صلاح بعد شنو ناوي تعذب معقولة متزوج ثانيه وهذا طفلها كومته من ايده واني اخذه الغرفة بيبي الي لكيتها واكفه ب الهول تدور علي
_وين جنت مصطفى شلون تطلع بدون ماتكلي
_راحلها جوا كتفها وهو يكلها
_رحت الغرفتنه القديمه بس لكيت هاي البنيه بيها
_بيبي تميم رجع
_اي ابوج نايم ب الديوانيه
_صدك ليش محد كعدني
_ماقبل تميم وهسه نايم ابوج لاتكعديه
_بيبي بس اشوفه ماكعده
عفت كلامها وراي وهيه تمنعني دخلت للغرفه مشغله ضوا تلفوني
من شفته ضليت ابجي من الفرح والحيره والاسف ع الصار بي بسببي نومه وكانو حاني ظهره كسرتني
حطيت راسي ع المخده يم راسه ودموعي تطيح واحسني بحلم
رن تلفوني وبسرعه سديته علمود لايفز ابوي طلعت من الديوانيه للطرمه ورجعت اتصلت على عزيز
_ها شفتي ابوج
_اي جان عبالي بعده تميم ماوصل
_شنو سالفه الطفل ليش نايم يم غرفتج
_ماعرف
_تعرفين
_لا ماعرفه
_تعرفين لان سديتي التلفون اني مو كلت خلي الاتصال مفتوح
جان يحجي بعصبيه وكانو جاي يحاسبني على شي
_شكرا على مساعدتك الابوي مانساها الك تصبح على خير
سديت التلفون
ماريد اطوخها ب الحجي لا هو يتحمل ولا انا اتحمل
فززني صوت الطفل نفسه وهو يبجي ويصيح
يتبع....