" بِسمِ الله ألرحمٰن ألرَحيم ''
• #غموض_الشُجاع
• بِــ قلم :- فطم الطائي.
• ورداتي التصويت ☆ والتعليق بين الفقرات لتنسونه✔︎ + متابعه لـ حسابي الجميل ♡︎.
أحلمُ الآن
في هـذا الوقت ..
أجلس بجوارك
أسند رأسي المثقل على كُتفيك .
وأفكر كيف غدت حياتي بسهولة
بسهولة تخطيت كل شيء
حتى جوارحي هدأت معك .
..
باوعتلها منزله راسها وتعدل بـ ألفستان مالتها بلعت ريگ أريد أتحرك ما أگدر أردفت مره ثانيه بدون لا تنتبه منو گدامها :- بألله لو صايغ شي لفستاني شوف شسوي بيكم ، هاي كلو من وره جيهان التسس عينها عليه دائِماً ايع منها حقيغه تفف بس ارجع ألطها بأبو الوغده ونبي .
بقيت صافن بيها رفعت رأسها وألتقت ألعيون بـ ألعيون رمشت بـ ثُكُل :- ءء أنتَ ؟؟؟؟؟!!
خزرتها ردت ألخزره وأردفت بـ عصبيه :- شو أبتعد خليني أعبر لهنوكَ .
أبتعدت شويه هزت أيدها ما عاجبها وعبرت من يمي سحبت نفس وزفرته خرب حضچ ما مره
" ضربه قاضيه "
مشيت للسياره نزلت ألولد شويه وأجه عَواد وروجين گعدها بـ ألكشن ألوره ويهدي بيها صعدت أسوق وعيني بـ ألمرايه ، خلصت رومنسية عَواد المُفاجِئه طلعنا بالسيارات للقاعه ، وصلنا صعدنا على قاعة ألزلم وألنسوان قاعه وحد ، حتى ما أعرف شلون مفتحين قاعه وألموصل ما صار ألها چثير من تحررت .. أبتدت ألحفله وعُمر ماكو وألولد ما قصرو هزو هَزوخاصه عَواد وأمجد أخو عُمر ، باوعت لـ خالد گاعد وصافن ضربته بـ فخذه وأشرتله :- وين صافن ألحلو ؟؟
:- ماكو شي هيچ تذگرت شغله وشردت ليش؟
- لا هيچ ، بَس تفاجئت بعد ما دبچت وي ألولد .
:- رايدني أگوم تدلل ، هههههه.
گالها وگام بدل الأُغنيه ونزل وياهم ساعه تقريباً ألأغاني ترگع وگامو يچوبون وسحلوني بَس ماقبلت لعبانه نفسي حيل ، طلعت برا گعدت على ألكُرسي برا ورثت جگاره وعيوني بـ ألگاع تفكيري بـ عيونها ، ألخضار مالته يجنن ، فززني من تفكيري موبايلي يرن رفعته نَهشَل رديت :- ها يُبا شبسرعه أشتاگيت ؟؟
:- خاب دنچب گول وين مخلي ألملفات مال جلال ألجحش؟؟
- شتسوي بيهم ؟؟
:- أريد أدرس قضيتو بلا داشوف ذكائي يسحل جلال لو أبطل من شُغلي .
- يمعود عوفه عليه .
:- أنطيني مكانهم وألقُرأن ميت تعب أريد يجي ألليل وأنطمر صار من ألصبح على نفس ألوگفه .
- موجودين بالمكتب مالتي تلگه مفتاح ألخزنه ألصغيره بـ ألصندوگ ألي بالحايط .
:- ماشي سلملي على الولد .
- يوصل إن شاء ألله .
سديته منه وبقيت گاعد برا وجگاره وره جگاره وعيونها جدامي ....
..
دخلت للبيت وبيدي ملفات ألمطي أبو الدياحه جَلال ، دايخ حيل وألنعسه بـ عيني أريد أگض ألمخده بَس ، وصلت ألصاله نزعت ألچاگيت خليت ألملف على ميز ألتلفزيون وتمددت لا شفت أُمي ولا سَفانه كُل ما أجي دنيا ليل أدخل لـ أمي أنطيها عِلاجها ، أليوم من ألتعب ماشفت گدامي گبل نمت ...
بين ناسم وگاعد حسيت شي تخلى عليه عرفت بطانيه أبتسمت سحبتو بارده حيل أردفت بـ هدوء :- شعجب حنيتي ؟؟
ما أجه ألرد فتحت عيوني على كيف تباوع مستغربه أردفت :- مو أنتَ نايم ..!
ضحكت رفعت أيديه أطگطگهم رجعت دحگت بـ عيونها وأردفت :- اي چنت نايم .
:- عجل شلون عرفت أني وگلت ليش حنيتي شنو عندك أربع عيون ؟؟؟
أبتسمت لـ كلامها عدلت نفسي گعدت مغطي جسمي بالبطانيه أشرتلها تسحب ألصوبه يمي سحبتها وبقت تدحگ أردفت :- نفس أُمي هم مرات تغطيني بليل لإن أني مُهمل بـ هچي أشياء فـ معتمد عليها .
:- وشلون فرقت ؟؟
- مبين أني حافظ ريحة أُمي ولِهذا أميز بيهم ومن غطيتيني صح گعدت بَس عرفت مو أُمي هاي ...
حگيت رگبتي وأردفت بـ أبتسامه :- وأُمي تدنج تبوسني بـ گُصتي .
أبتسمت على كلامي راحت شويه وأجت بيدها قوري ألچاي خلتو ع ألصوبه وتدفي أيديها عليها أردفت :- ألبسي شي حتى ما تبردين .
:- لابسه بَس من أنام أختنگ ولِهذا ألبس ملابس خفيف ، و لإن گمت من فراشي بردت .
طلعت أيديه خليتهم ع ألصوبه أدفيهم أردفت :- وأنتَ ليش ما تلبس ؟ لابس نص ردن وگاعد ترجف برد هين .
أردفت بـ ضحكه :- چنت لابس بَس ماشفت گدامي شي وگبل غفيت من ألتعب .
:- ها تمام .
- روحي نامي شعندچ گاعده بـ هذا ألليل .!!
:- تمام عينك ع ألچاي مو أگعد ألصبح ألگاه ناشف .
- لا عندي شُغل شويه هسه أصبلي وبعدها أنام.
:- عجل خوش ، تصبح على خير .
- تلاگي .
راحت شلت ألقوري خليتو بـ صفحه ورجعت تمددت ، لو بَس أعرف شي صغير عنچ أني أرتاح ، معقوله أكو هچي ..!!
شلون هچي ما تستغرب ..!!
أمرچ عجيب يا سَفانه حيل عجيب وأكيد ما تصعب على ألنَهشَل ...
رجعت غفيت والله لنعل أبو جلال لا أبو أبو أني بـ أي حال وأنوب أجي أراجع بـ ملفو ، هذا لو أگضو أزوعو حليب أمو ، أستغفرت ونمت ، ما حسيت ألا على صوتهم يحچون خليت ألبطانيه على راسي :- كافييييي ، أسكُتو .
:- يلا گوم كافي نوم ، يلا يُمه نَهشَل .
- الله عليچ يُمه بَس خليني نايم شويه ، ماتبطلين سوالفچ أنتِ .
:- ولك أنتَ ألي ما تبطل سوالفك كُل ما أگعدك تگُلي بَس خمس دقائق ، أدري شتفيد هاي ألخمس دقائِق فهمني ؟؟
- وألله أنتِ ماتعرفين هاي ألخمس دقائِق تحسسني نايم ألليل كُله .
:- ألله يطيح حضي شو دگوم يلا .
- أوف منچ أوف منچ فَرحتي .
:- عود ماتبطل هاي مال فَرحتي أني چم مره گتلك بطلها .
- ليش أني شعندي غيرچ والله بَس أنتِ فَرحتي .
:- ما يفيدك هسه دگوم .
گمت دحگت بيها تضحك :- والله مايصير هيچي والله .
:- يصير يلا گوم غسل وتعال أتريگ .
- ألله عليچ فَرحتي مسويه طماطه وبيض ؟؟
:- أي والله مسويتلك بَس گوم غسل وتعال .
گمت متنرفز غسلت وأجيت گعدت مخنزر عليها أردفت :- ولك شبيك هيجي تدحگ؟؟
- نعسان يُمه.
:- يُمه ألنوم ما يفيد .
- هسه على أساس حياتي شبيها شو مصخمه ملطمه ، زين مني أنام ثمان ساعات لو شخص غيري يدخُل بـ سُبات على هاي ألحياة ألطايح حضها .
أردفت وهيَ توزع ألخُبز ألحار عليه وعلى سَفانه ألـ صامته :- اتحمد ألله يُمه نعمه لـ هسه عايشين بـ خير ، أكو ناس تتحسر على عيشتنا .
أستغفرت وأخذت أتريگ وهيَ تصُب چاي خلته گدامي وأردفت موجهه كلامها لـ سَفانه :- يُمه أنتِ ليش ما تاگلين شني تستحين ؟؟
:- لا حجيه بَس ما أشتهي أكُل ألصُبح .
- والله ألي يضيع ألطماطه وبيض من ألصُبح عُمره خساره .
:- لا أني ما أشتهي أي شي ألصُبح عادي على ألغده عود أكُل .
- گومي أشربي گلاص مي بارد وتعالي هسه تصيرين حوت وتاكلين ألأول والتالي .
:- هاي شنو؟
ضحكت وأني أكُل :- طبيعة بعض الإناس أول ما يگعُدون ألصُبح لعبانه نفسهم ولِهذا الأفضل شرب گلاص مي بارد حتى يروح لعبان ألنفس .
:- هاي صدُك لو تتشاقه؟
- والله ما تصدگين گومي أشربي گلاص مي بارد وشويه وتعالي تلگين رايح منچ لعبان ألنفس .
هزت راسها وگامت للمطبخ شربت گلاص مي ورجعت أردفت أُمي :- هاي سوالفك لو تبطلها .
- أني ذَكي لا تنكُرين .
:- لا تنصاب بـ ألعين ياروح أُمك إذا گدامنا عادي بَس گدام ألناس لا هلگد تنطي معلومات وتصير ذَكي .
- يمعود منو بقه يحسد ، ألناس تثقفت يُمه أشبيچ؟
:- لا والله أكو ناس عينها نگسه ولا تستهين بـ ألحَسد ترا يوصل للموت لا سامح ألله .
- عود إذا ما متت بحرب داعش خلي أموت بـ ألحَسد يا يُمه .
:- أسمَ الله عليك يايُمه شهلكلام هذا .
- الأعمار بيدُ ألله .
:- ونِعمَ بـ ألله .
دحگت لـ سَفانه تسوي لُگم صغار وتاگُل أردفت مبتسم :- هاا راحت ؟؟
:- أي والله ، صُدك ذكي ، ألله يحفظلك ذكائك .
دحگتلها مستغرب وأفسر كلامها شمعنى " ألله يحفظلك ذكائك " ..؟ بَس لا تفكر تصير أحسن من ذكائي ..!! لا هين ما أسمحلها أبد ، أني محد يوصلني .
خلصت گمت غسلت ألتفتت واگفه بـ باب ألصاله ، نشفت وجهي وأشرتلها بـ معنى شكو تقدمت يمي أردفت :- شوكت تكمل ألمُعامله مالتي ، مالت ألمدرسه ؟؟
- أنتِ أي صف ؟؟
رفعت راسها تدحگ بـ عيوني متردده تحچي بقيت ساكت وأنتضرها ثواني وٱردفت :- خامس علمي .
بقيت صافن بيها ، يعني هيَ ما صغيره تقريباً سنه كامله مَرت على طلعتها هيَ هين يم أُمي وأني بالموصل ، وإضافه هيَ بقت عند هذاك ألمطي ، يعني ما طولت يمو چثير واضح شهر أو أسابيع مُستحيل يكون أكثر من هيچ وعلى حسب كلامها ما مگرب صوبها ، يعني هيَ عُمرها أبين الـ 18 وألـ19 سنه ..!!!
حكيت رگبتي أربط حدث بـ حدث حتى يطلعلي عُمرها ألصحيح ، بَس هو بين هالعُمرين لا أكثر ولا أقل غمضت عيني وفتحتها أردفت هيَ بـ هدوء :- خلي أرضي فضولك ألي صار ساعه تفكر بي عُمري 19 سنه .
فتحت عيوني عليها وأردفت بـ تعجُب :- شلون ؟؟
أبتسمت بـ قهر وأردفت :- وقت داعش بطلني أبويه أخر شي وأجينه للموصل بـ سبب چانت أُمي مريضه حيل وماكو بـ ألأنبار هلگد دكاتره ، أكثر شي بالموصل فـ جبناها عالجناها سنه كامله وفكر أبويه نهرب من داعش وراح عند أكثر من شخص وأكو واحد وافق ، طلعنا بـ يومها لـ نص ألطريق ...
نزلت دمعتها مسحتها بـ سُرعه گملت :- گضونه داعش قتلو أبويه وأُمي ألمريضه وأخذونا أني وأُختي بقينه يم هذا ألمجنون كم يوم وأُختي عرفت بيها أستشهدت لإن هوَ گال بوقتها چتلتها ، وبعدها أنتَ أجيت .
- يعني شكد عُمرچ هسه ؟؟
:- مو گتلك 19 !!!
- هاا أي ما نتبهت هسه شسوي ؟؟
تنفست بـ عُمق وأردفت :- أريد أصير مُحاميه .
علگت ألمنشفه وتكتفت :- شمعنى ؟؟
:- حتى أخذ حقي من عمامي وأخويه .
عگدت حاجبي وأردفت :- ليش شبيهم عمامچ وأخوچ ..!!
دحگت طلعت أُمي بـ ألباب وگفت يمها أردفت سَفانه :- بـ ألمُختصر ألبيت ألي بـ الأنبار راح يستولون علي وبِما أنُ أبويه مخلي أراضي بـ أسمو راح يجون وحسبالهم لإن أني بنيه ما أگدر أخُذ حقي .
- أني أخُذ حقچ من عيونهم وبعدين بكيفهم ياخذون ألبيت غير هذا ورثچ أنتِ وأخوچ ؟؟
ضحكت بـ إستهزاء وأردفت :- حسبالك كُل ألناس مثلك زينين ، ألي عدنا واحد يگتل ألثاني حتى ياخذون كم فلس ، عمامي ما يعترفون بيه ، وحيل عادي عدهُم يتفقون همَ وأخويه يخطفوني أو يذبحوني بـ حجة " غسل ألعار " وبعدها يتقاسمون ورث أبويه بينهُم .
صفنت أردفت :- تعالي أگعدي وفهميني هذوله عمامچ شنو .
گلتها ودخلت لـ ألصاله شالو صينية ألريوك وأجت گعدت أردفت :- يُمه گلاص چاي راسي راح ينفجر .
ألتفتت عليها :- هسه أحچي من ألبدايه شنو هذوله عمامچ..!
رفعت راسها وعيونها ألسود تلمع :- عمامي وخوالي مُنافقين ، حاولو أكثر من مره يگتلون أبويه بَس چان ينفذ منهم .
- ليش يگتلونو شيريدون منو ؟؟
:- أبويه صاحب أعمال ، عندو مصنع ملح بالرمادي وحيل ناجح ألمصنع ، وعندو بيوت عدا بيتنه وأراضي أكو منها مسجلها بأسمنا ، عندي أراضي ثنين بأسمي وحده بالرمادي وألثانيه بـ " تلكيف ألموصل " وأُختي هم عدها بأسمها ، أجه وقت وأخويه تغير وصار ما يجي عدنا وهوَ چان حيل يحبنا ...
- شنو سبب تغيير أخوچ ؟
خلت أمي ألچاي وگعدت أردفت سَفانه :- بـ سبب مرتو حيل حقيره وأكثر من مره طلعت سوالف علينا بَس أبويه وگفها عند حدها وطردها وگال لأخويه أذا ما تطلگها ماعندك گعده عندي ..
شربت ألچاي وصافن شنو هالعشيره شنو هالعمام وأني أگول أريد عمام هسه يطلعون عمامي أنگس منهم ولِهذا أُمي ماتقبل تحچيلي عنهم أردفت :- أي وبعدين شصار .
فرگت أيديها وأردفت رافعه راسها تدحگ بيه :- أكو أراضي بأسم أخويه محد يندل مكانها بَس أني ، وبعد هم أكو بأسم أبويه ومحد يندل مكانها .
- وليش أنتِ بـ ألذات تعرفيلهم ؟؟
:- أني مرللة أبويه وكُل شي يحچيلي لإن ذكيه ومُستحيل يجي يوم وأفضح سرو ، أني تكلمت بـ دوواوين ، سكتت أكبر شيوخ بـ ذكائي وتنقيتي لـ كلِماتي ألموزونه ، أني مو مثل كُل ألبنات ، وأبويه ميزني عن ألكُل .
ضيقت عيوني أردفت أُمي :- أنتو شسم عشيرتكم ؟
بقت صافنه شويه وأدرفت :- " ألدليم "
- يعني أبوچ شيخ ؟؟
:- لا أبويه مو شيخ .
- عجل شلون تگولين سكتت شيوخ ؟
:- وقتها صارت مشاكل لأبويه بـ سبب عمامي وأجه ألشيخ عدنا هداده وعلى أبو شلون هچي يصير وصارت هوسه وطلع أبويه ألمُذنب أبينهم ، وأني ماتحملت أبويه ينقهر وچنت صغيره يطلع عُمري بـ 11 سنه ..
- أي شصخمتي ؟
:- فضحت ألشيخ .
- شنوووو ؟؟؟
نزلت راسها وأردفت :- هو ألشيخ گرايبنا من بعيد يعني مو شيخ ألدليم عامه لا هوَ شيخ على ربعنا وهاي ، فـ قبل چان أبنو سكرچي وأبو نسوان گاضي أيامو بـ ألملاهي ، فـ أني من قهري دفرت ألباب وصحت بي لإن چان يحچي على أبويه :- شبي ألسكرچي أبو ألنسوان ؟
غصيت بـ ألچاي وأگح أختنگت خنگه ول أبن شيخ وهيچ تحچي وياه شلون عرامه يا ألله شنو هاي أردفت :- والله بيچ گتله لومن ألشيخ أگضچ دگ چتل حتى ترگدين .
:- والله بالگوه عافوني عود مسوين براسي فصل ومادري شنو ولزگ أبنو ألا أخذها فصل وأتزوجها وعلى أبو مايصير هيچ على شيخ ألمُستقبل ، نوب ما تحملت وصحت بيهم أكثر
- شگلتي يامصگوعه ؟؟؟؟
برطمت شفايفها خزرتها أردفت تفرك بيدها :- گتلو ألي ياخذني فصليه أشعل أبو أبو وإذا أنتَ تسمي نفسك شيخ أخذني وشوف شسوي بيك ، عبالو أسكُت وأتحمل والله أتمنى ماخذيني چان شوفتهم نجوم ألظُهر .
- على گولة شُجاع وألعباس أنتِ مُصيبه .
:- أني ما أسكُت على حقي وحق ألي قريبين عليه ، حقي أخذو من بين عيونهم لو چان رئيس وزراء مو شيخ هم ، جايبلي سگرچي مسوي شيخ ويگعد بدواوين وما أجه ألا عليه أني أسكت أكبر شارب .
- عفيه عليچ چان گضيتي ملختي مكاني .
:- داعش ملختو لإن مابطل نسوان وعرگ.
صفنت بيها تحچي ما خايفه والله أشهد أنها قويه وتلوگلها ألمُحاماة أردفت أُمي :- يُمه لا تدخلون ويَ هيچي ناس أخاف عليكُم .
:- من حقچ تخافين على أبنچ وأكيد أني ما راح أدخلو بـ أي متاعب بَس يسويلي إستمارة ألمدرسه وأداوم بيها وبعدها يعوفني وما أخلي يتدخل بـ عمامي .
خزرتهم ثنينهم :- مو طفل گدامكم أني تحچون هيچي مو شو حجيه لا تدخلين أنتِ أني أجيچ من ألموت .
:- يُمه ألله عليك لا تدخل .
- يابه أشبيچ ياعيني والله مايگدرون يلمسون شعره مني أني أطبخلهم على نار هادئه .
:- وحيدي أنتَ ومثل ما تگول همَ مستعدين يگتلون أخوهم فـ كيف بيك ..!
حضنتها قوي وبستها بـ راسها :- شو من داعش ما خفتي عليه هيچي شمعنى هذوله تخافين عليه منهُم ..!
:- أني أخاف عليك من ألهوى أبني ماعندي غيرك بـ هاي ألدنيا .
- لا تخافين أمي بعدين شنو لقبتيني بـ ذِئب ألسماء إذا تخافين عليه ؟ أني مرأه حتى تخافين عليه ؟
نطت سَفانه أردفت خازرتني :- وعيني شبيها ألمرأه ؟؟؟؟؟
عفت أُمي وصفنت بيها شغلت جگاره خزرتها :- شبيها ؟؟
:- ليش وصفتنا بـ ألضُعُف ؟؟
نفخت دُخان ألجگاير وأردفت :- ما وصفتكُم بـ ألضُعُف ، أني فقط گلت شايفتني مرأه .. وقصدي ألنِساء ينخاف عليهم دائِماً ، مثلاً إذا صار عندي بنت وولد راح أخاف على ألأثنين ، بَس أكيد خوفي الأكبر راح يكون على ألبنيه لإن هيَ أضعف من ألولد بـ درجات قليله .
:- شنو ألدليل ؟؟؟
ضحكت وأردفت بـ هدوء :- ألدليل أكو بنات تنجرف وراء عاطِفتها ، أما عدنا نحنَ ألزلم ما هلگد نهتم بـ هيچ سوالف فـ هين ألبنت أضعف من ألولد بـ درجه.
ألضُعُف مو بَس ضُعُف ألجَسد مرات يكون ضُعُف ألشخصيه ، ألعاطِفه ، ألعقل ..الخ.
كُل هاي وأكو بعد إذا ضـعفنا بيها بـ مِعنى نحنَ ضُعفاء وما يُشترط ألا ألبنات تضعف بـ هيچي شي لا ألجنسين عامه .
:- بَس مو كُلنه ننجرف وراء ألعاطِفه ، نوع منّنّا يميز بين كُل شي .
- مثل ما گلتي مو ألكُل فـ لِهذا ما نوصف ألمرأه ضعيفه كُلياً ، أني أگُلچ على ضُعف ألعاطِفه فقط .
سكتت وتدحگ صفح ماعاجبها ، هاي شبيها والله مو طبيعيه شد راسك يا نَهشَل راح تشعل أبو أبوك ، أستغفرت وگمت :- يلا عيني طالع خوما محتاجين شي ؟
فَرحه :- محتاجين سلامتك يُمه .
سَفانه :- بَس عفيه لا تنسى ألإستِماره .
- ألله كريم بَس أشوف وضعي أروح أسجلچ مادام دوامهم صار فتره وأسويلچ فد واسطه .
:- تمام .
طلعت على ألمركز بـ نُص ألطريق نسيت ألملف مال هذا ألمطي ، وألله من وره سوالف هاي أُم عيون صخمت ألشيخ من ألله يصخم حضي ، رجعت لـ ألبيت صفيت ألسياره ونزلت أدردم وي شيطاني والله صاير مخبل أني ، ويني وين هالسوالف ول أني نَهشَل أبو المُهِمات تجيني وحده تفر عقلي ، والله حتى عيب ...
فتحت ألباب أتكاون وي ذبان وجهي دخلت صوت بچي عالي يجي ، عگدت حاجبي ونزعت ألحِذاء ودخلت بـسُرعه وصلت باب ألصاله وتفاجئت بـ ألي شفتو ...
صحت بـ علو صوتي :- يُمـــه...!!!!
أنتبهت سَفانه عليه رگضت على أُمي ألي بـ ألگاع رفعتها أضرب بـ خدها :- يُمه شبيچ شو فتحي عينچ .
سَفانه :- بَس أنتَ طلعت گالت دايخه حيل بقيتها گاعدها هين ، شويه وأجيت شفتها واگعه بـ ألگاع ، بيها نفس بَس ماتفتح عيونها ، عدها ضغط ؟؟
هزيت رأسي مرعوب شلتها سحبت ألعبايه ألمعلگه وره ألباب سحبتو بسرعه خليتو عليها وطلعت أرجف ، كُل شي ولا ألله يختبرني بـ أُمي ، كُل شي ولا هيَ أني ما عندي غيرها بـ الدنيا كُلها ، هيَ أُمي وأبويه وأُختي وأخويه بـ وقت واحد ، كُل شي بحياتي هيَ ...
صعدتها لـ ألسياره ردت أصعد وأمشي ألا شفت سَفانه طالعه ورايه تعدل بـ ألقمصله مالتها ألواصله بطنها ولابسه بلوز صوف ماهلگد طويل فتحت باب ألسياره وصعدت خزرتها ردتها وأردفت :- أمشي يلاا كافي تخزر .
سكتت عنها مشيت لـ ألمستشفى ، بعد وقت وصلنا نزلت شايلها خليتها على ألسَديه ودخلوها لـ ألطوارئ دحگت لـ سفانه تمشي وقمصلتها مو طويله گعدت يمي خزرتها أردفت بـ عصبيه :- شو گومي .
:- شنو ؟؟
- گومي أوگفي .
گامت وگفت وتدحگ مستغربه گمت نزعت قمصلتي وخليتها على چتفها شو هاي نزلو چتوفها وأجت توگع أردفت :- هاي شگد ثگيله ؟؟
- هيَ ثگيله لو انتِ هلگدوتچ ..!
خزرتني گعدت تنفخ بـ عصبيه ، رجعت گعدت گاض راسي بتعب وأدعي لـ أُمي تگوم بـ خير ، شويه وطلع مُمرض گمت أبتسم وهدئني :- لا تخاف هسه حالتها بـ خير بَس ضغطها صاعد .
هزيت رأسي تحمدت ألله وأردفت :- أگدر أشوفها ؟
:- فد ربع ساعه ويدخلوك لاتخاف .
تشكرت منو وگعدت ، دحگتلها تلعب بـ أصابعها مبين تسبح لله ، بقيت ربع ساعه وطلعت مُمرضه أشرتلي أدخُل ، گمنا ثنينه دخلنا صاله چبيره وبيها مرضى هواي وبينهم حاجز برده ، گعدت على ألسَديه حضنت أيدها بستو :- يُمه گومي بـ خير لا تعوفيني أنتِ هم أني منو عندي غيرچ ؟. منو ألي بـ هاي ألدنيا غيرچ ..
:- لا تخاف يُمه بخير هسه .
- والله إذا ما أهملتي نفسچ هالمره شوف شسوي بيچ .
:- شتسوي ؟
- أستغفرالله هسه شلونچ ..؟ أكو شي يوجعچ ..؟
:- لا يُمه هسه زينه لا تخاف .
- ما ماخذه عِلاجج أمس مو ولهذا هيچي صار ؟؟
:- نسيتو والله .
- أني صوچي هاملچ وما أنطيچ علاجچ بوقتو ولِهذا هيچي تنسين .
:- هسه عوفنه ، ألتفتت على سَفانه ألي صايره لُگمه مايبين بيها بَس خشمها أردفت أُمي :- هههه ولچ شنو هاي بَس خمشچ مبين ؟؟
سَفانه :- والله بـسبب أبنچ هوَ أنطاني هاي ألقمصله شثگلها .
- هيَ ما ثگيله بَس أنتِ فاهيه .
:- ديلا بَس ألثور يشيل هيچ قمصله .
رفعت راسي عليها خازرها عرفت حجم ألچفصه نزلت راسها رجعت دحگت لـ أُمي تضحك خزرتها هيَ هم ضربتني على أيدي :- يول شبيك تخزر .
- أكو ناس ماتعرف شتحچي بَس مسويه نفسها ذكيه وعود تعرف تتكلم .
:- أي يُمه سُبحان ألي ما يغلط .
سكتت بقيت يمها شويه وسجلولنه خروج ، طلعنا خليتهم بـ ألسياره ومشيت لـ ألصيدليه أخذت ألعِلاجات ورجعت شغلت ألسياره أردفت أُمي :- ما تبطل تلبس قمصله وبدي نص ردن يا أُمي ألبس بلوز جواه شوف هسه تبرد وتصخن .
- لا يُمه ألجو مُعتدل بي شويه بروده ، لبست قمصله لإن ألصُبح بَس بارده من أوصل ألمركز أنزعو .
:- هسه على أساس أنتَ بنص ألشِتاء ما تلبس هيچي .
- ديلا هسه عوفيناا فروحه أليگول أني نسيت عِلاجي مو أنتِ ، تريدين تطمطمين على سالفتچ ولگيتي هاي حجه ..!
خزرتني ضحكت وأردفت :- يلا ما أحاسبچ بَس لو عدتيها ياويلچ مني .
سكتنا وصلتهم لـ ألبيت نزلتها على كيف سَفانه فتحت ألباب دخلتها مددتها بـ ألصاله وشغلت ألصوبه يمها أردفت :- روح يُمه سَفانه هين تساعدني أرجع لـ شُغلك أنتَ .
- لا ما عندي شُغُل مُهم ، راح أبقى هين أليوم يمچ .
:- يا اُمي ما محتاجه أني وهسه صرت زينه .
- أشش كافي .
سكتَت عدلت بطانيتها غطيتها زين بقيت يمها گاعد وأدحگلها خايف عليها أردفت سَفانه :- بَس أبدل وأجي .
راحت أردفت أُمي :- لا تروح لأهل سَفانه .
- ليش يُمه ؟؟
:- خايفه عليك أُمي ، أنتَ وحيدي وسندي بهاي ألدنيا ، لو سوولك شي هذوله ما سمعت ألبنيه تگول خطيرين ؟
- بَس هيَ ماعندها غيرنا يا يُمه معقوله أعوفها بِدون مُساعده ؟
:- بَس أبني إذا تسبب خطوره على حياتك أنتَ ما مجبور وأني أموت لو صارلك شي أبني فكر بيه .
- يُمه ما عرفتچ هيچي عجل وألبنيه هم ما عدها غيرچ وغيري معقوله أترُكها لـ عمامها يستغلوها ؟؟
تنهدت بـ تعب مسحت عيونها بـ شيلتها وأردفت :- ساعدها بَس لا تشوفهم نفسك أبني ألله عليك ، أنتَ دائِماً تسوي شُغلك بـ ألخفيه فـ هسه هم ساعدها ولا تشوفهم نفسك أحسن ما تصير بـ خطر .
مسحت على راسها وبستها :- ألله كريم لـ وقتها يُمه ، إن شاء ألله تنحل وبِدون ما أحد يتعرض لـ شي .
ألتفتت سَفانه مبين هسه طلعت من ألغُرفه حتى ما حچت شي ، گُبل دخلت ألمطبخ خليت أيد أُمي وگمت لـ ألمطبخ دخلت چانت تشتغل وترتب بـ الأغراض حمحمت ألتفتت عليه ابتسمت بـ تصنُع وگفت أشرب مي أردفت :- خوما محتاجه شي ..؟
أردفت بـ صوت مخنوگ :- لا سلامتك ، ما محتاجه شي.
سحبت نفس شربت مي وعيني عليها تشتغل وصوت شهگتها ينسمع طلعت لـ غُرفتي ، فتحت ألچكامچ ألمقفوله ، طلعت ألحاسِبه وألملفات گعدت على ألسرير وأشتغل ، گمت أخذت سجل جَلال وگعدت متربع أقرأ ملفو سجلو ...
شمصخم هذا ألحيوان شصاير هين ، أقرأ وأسجل بـدفتر ألمُلاحضات والله لأجيب راسك جَلال أني مو نَهشل إذا ما خليتك تعفن بـ ألسجُون .... بَس وقت ، بَس أنطيني وقت وأجيبك .
شلت ألتلِفون أتصلت بـ شُجاع شويه و رَدْ أردفت :- هلا يابه شلونك ؟
:- بخير وأنتَ .
- نحمد ألله ونشكرو شخبار ألعرس ، رجعتو من ألموصل ؟
:- أي هسه بـ ألطريق راجعين .
- هذا صُدُك ملف جَلال ألبغل ..؟
:- أي ليش شبي ؟
- والله بي سحله هذا جَلال ، بَس لو أگضه أشگه .
:- أكو شغله بَس يصيرلي مجال أجيك أگولك عليها ، تفيدك تلزم جَلال .
- أي والله گولي عليها أريد ألگطه أنطي حقو .
:- تدلل بَس أرجع هسه راح أسده جاي أسوق .
- تمام أبويه سلملنا على ألولد .
:- يوصل إن شاء ألله .
سديتو منو وأباوع لـ الأوراق ، أخخ يا جَلال مسوي بـ راسي ذكي ومحد يگدر يلگطك والله لأسحلك بـ شوارع بَغداد .
بقيت گاعد أقرأ وأبحث علي وعلى مكانو الا ما سمعت صوت ألأذان گمت شلت ألحاسِبه والأوراق وقفلت عليهم طلعت توضيت وصليت ، طلعت لـ ألمطبخ واگفه تسوي غده گربت يمها تخلط وتفكيرها بـ غير مكان .
ما لحيت وياها يمكن سمعت كلام أُمي ، ويمكن مقهوره على أهلها وحياتها ألصعبه ، شويه وفرغت ألغده گعدنا ثلاثتنا وهيَ ما ألها خُلك واضح على شكلها حتى غده ما تغدت ..
..
شُجاع :- بعد ألعرس ما شفتها غير من طلعو تباوع وتخزر بيه ، هاي شبيها ياربي مبين عقلها عقل كاكا نص طگه ، هذا حضك شُجاع لازم تتحمل شتسوي چا ، وعلي راح تجلطني مبين ..
..أبد ما شكلها عاقله ألبرائه ألي بوجهها توزعهم لفات إذا أحد غلط بـ حقها ، بَس لو أعرف شمسوي يم ألله حتى أگابل هيچ وحده ، حضي مصخم ملطم ، ألك ألله شُجاع لازم تتحمل شتسوي .
لـ ثاني يوم رجعنا لـ ألبيت راسي راح ينفجر من ألتعب ألي بيه ، صارلي يومين ما نايم زين من يتغير مكاني ما أگدر أنام عدل ، طلعت بـ وجهي لـ غُرفتي سبحت ونمت حتى ما أكلت ...
فتحت عيوني على موبايلي يرن سحبته مسطور رديت أجه صوت مرأه :- أنتَ شُجاع ؟؟
عدلت گعدتي متفاجئ شلون عرفت أسمي رديت :- أي نعَم أنه شُجاع خير أن شاء ألله بـ شنو أگدر أساعدچ ؟
:- بـ بيتكم ألي بـ ألبصره أكو شغله تخُص ماضيك تگدر تروح وتتطلع عليها وراح تكشف شي من ماضيك .
- أنتِ منو فهميني ؟؟؟ شعرفچ عندي بيت بـ البصره أحچي؟؟
:- لا تضغط على نفسك روح على ألبيت وشوف بـ عينك ، أنا أساعدك بَس .
- هههههه أنتِ تساعديني ؟؟ دگولي أنه أُخت جَلال ليش تتعبين نفسچ ؟؟
:- شنووووو ....!!!!!
- أنه أعرف ، لا تفكروني غَشيم ، جَلال غَبي وحيل غَبي بـ يوم فَكر يلعب وياي ، لچ أنه شُجاع ، شُجاع مو شخص عادي لچ أنه عاصِفه تهدمكم هَدم .
ضحكت بـ سُخريه وأردفت :- چا مادام هيچ ليش لـ هسه ساكت ؟؟ لـيش وصلتلنا أنا وأخويه لـيش تسمع كلامنا ؟؟؟
- محد يتوقع حقيقتي ، ولا أحد يكذب كذبي ، حقيقتي كذبي ، وكذبي حقيقتي .
:- كُلك على بعضك لُغُز وأحبك .
- هههههه نُقطه ضدچ .
:- إذا الك ميخالف .
- ما تخافين من أخوچ ؟؟
:- لا ، وإذا قبلت بـ ألي گلته ألك بـ ألماضي راح أحچيلك كُل شي وأرجع ألك كُل شي حقك .
- ألشي ألواثق منه ما راح تسوون شي يحول أللعبه ضـدكُم ، ولِهذا مأمن ومُستحيل يجي يوم وأستسلم ألكُم .
:- چا براحتك ولا تنسى شرطي ، بوساتي .
سدته گمت متنرفز من كلامها ، هيَ غبيه وأخوها أغبى منها بَس لـ نلزمكم أنه ونَهشَل وأشوف منو يخلصكم من أيدي ...
بقينا أنه ونَهشَل ندرس ملفه وهوَ ينطي خُطط نگدر نلزمه بَس شغله وحده موگفتني أخاف يأذي أحد ، أخاف من ينحصر بينّه يسوي شي يكسرني وأنه أعرفه واحد عار وماعنده ذرة أخلاق ولا يعترف بألله فوگه ، واحد كافر نذل .
ويهچ مَر هواي وقت وصارت خُطبة لُبَيد وأڤين وأنطو ألموافقه ، هوَ نحنَ من طلعنا لـ عرس عُمر چانو مخططين يخطبون أڤين لـ لُبَيد ويمكن خطبوها لإن عُمر رد ألموافقه ألهم ، وأخذنا مَشيه حيل چبيره خطبناها من عُمر ،
مَرت هالأيام بـ سَلام وأكيد ما خلصنا أنه ونَهشَل من ألتحقيق ، سجل سَفانه بـ أعداديه هناك بعد مُعانات لإن باديين وراح يمتحنون نصف ألسنه وصارت تدرس ويگول ما تلحگ بَس هيَ ذكيه وأگيد تطلع منها .
هَم يتيمه ما عدها أحد حقها هيچ تسوي وتخلي مُستقبلها بـ ألمُقدِمه وكذالِك محد يفيدها غيره ، لا نَهشَل دايملها ولا أُمه ومثل ما تگول عمامها وأخوها عارات ، فـ لازم تدرس وتكون نفسها .
جَهزو لـ خُطبة لُبَيد وهوَ ألفرحه ما سايعته ، عيونه طول ألفتره تلمع ويضحك حسبالك أڤين أنطت نكهه لـ حياته ، تعذب هواي تعذب يلا صارتله ... وروجين ألمسكينه يوميا نَدى وأُمها مسوياتلها مُشكله وهيَ ما بيدها أي شي تسوي غير ألبچي ألا عَواد وگف وياها هواي ومبين يحبها بـ حيث حتى ندى ما عاد يهتم ألها بـ كُثر ما يهتم لـ روجين ...
صار يوم ألخُطبه وعلى أساس ما أروح بَس ورده شگد لَحت ألا تجي وعلى أبو تغير جَو :- والله أنتو يوميا رايحين للموصل وجايين حسبالك هيَ هنا ، وفوگاها تتحملون ألطريق ألطويل يُبا شكو طالعين كومه كم وحده تروح على ألخطوبه وهاهيه شعدچن طن نسوان ماشايفات خطوبه لو شنو ؟؟؟
وَرده :- هسه أنتَ شعليك نحنَ نحب ألطريق ألطويل أنتَ شكو مگروص ؟؟
- يُبا لا مگروص ولا شي بَس وعلي تبزعون ألواحد يعني أنه لو ما عندي شُغل بـ ألموصل ولا أروحلها .
:- أيباخ ولا يگعد راحه هسه أمشي يلا ألبس ألقاط ألي جابه عَواد ألك ولا تضل تدردم چنك شايب .
- بلا ألبس هسه ومن أوصل أطلع چني خبل مهلس ألطريق شطوله وتريديني ألبس من هسه ؟
:- يبوووو انتَ هسه ألبس يلا لا تضل تدردم ألله يساعد ألي راح تاخذك.
- أحچي ألحق يُبا.
:- ديلا أبو ألحق أمشي گدامي يلا لا تضوجني أحسلك .
خزرتها صعدت لبست دشداشه سوده نعل يوم عَواد ويوم قاطاته ألطايح حضها أنه لو أخلص كن سوالفهم وعلي يوميا خطوبه لو عرس وتعال يا شُجاع أتحمل روحات وجيات ، لفيت ألسبحه على أصابعي ونزلت :- ها ست وَرده خلصتن ؟؟
:- أي عيني أي خلصنه ، أحم شنو هذا أللبس عبالك متواعد أحم يعني شسمه ليش ما لبست ألقاط ؟
- ما أحب ألقاط وعجبتني ألدشداشه ليش خوما أكو مانع ؟؟
:- ها لا ما أكو أي مانع أحم ، گالت بـ همس والله لتصخمها .
- أصخم منو ..!!!
:- لا ولاشيء لا تهتم مو وياك .
- چا خوش ألولد جاهزين لُبَيد جاهز ؟؟
:- أي ألكُل جاهزين ولُبَيد بَس نوصل ألموصل يبدل بـ بيت بنت خالتي .
- يلا چا على ألسياره .
توزعو ع ألسيارات وخالات لُبَيد وعماتنا وبناتهم عشيره رايحين على خطوبه شعدچن يمگموعات هلگد ألناس راح تهج وعلي .
بعد تعب وصلنا ألموصل نزلو كُلهم بـ بيت بنت خالة وَرده ألي ما مبدل بَدل وطلعنا لـ بيت عُمر بعدها ... وصلنا نزلو ونحنَ ألولد بقينا بَرا شويه وگالو يدخُل لُبَيد راح ونحنَ برا بـ الأخير عَواد أنحمس خوش حمسه وگام :- وعلي أنا ما أتحمل أكو حفله وما أرگص بيها شو تعالو ..
ضحكت هوَ بَس أنه وهوَ وَرده گالت تدخلون رحنا ثنينه طلعت وريده دخلتنا وگفت بـ ألباب وأشوفهم متونسين وعَواد ماخله قصره ذب لحم ،
أجت عيني عليها زين لابسه مُحتشم وعلي هاي لو يخلوها بكيفها تلبس أشكال وألوان همزين عدها عُمر يصگرها ، رفعت راسها باوعتلي ضيقت عينها رفعت ألشال ولفته قوي وعينها بـ عيني ، فد صلفه خرب يومچ ، نوب نزلت وياهم ترگص ...
گابلت بنيه تطلع بـ عُمرها وترگص زين مو رگص عادي بَس تفتر وتحرك بـ رجليها ، مبين مُحترِفه بـ هيچ سوالف من رگصتها هاي ، شغلت جگاره وأنتچيت ع ألحايط أباوعلها مضيق عيني ومركز بـ كُل حركاتها ... حسبالك ألوحيده هنا ما جاي أشوف غيرها بَس الأصوات متذبذبه بـ راسي .
رفعت راسي منها صارت عيني بـ عين أڤين تباوعلي رافعه حاجبها نزلت راسي طفيت ألجگاره وطلعت وگفت بـ ألباب أسحب نفس ، أخخ تالي هالفصعونه تدوخك ، شوف شكبرك شطولك ، أستغفرت نوب ما يخلون واحد يرتاح شغلو أغنيه أعلى سحبوني من ألباب دخلتني ورده أبتسمت ألها...
وَرده :- ألعباس عليك خل نچوب ذوله فاهيين ما يعرفون .
- ولچ وريده أستچني يُبا.
:- والله ما عليه هسه نچوب أسمع ألأُغنيه شحلاتها بربك يلا .
- أمري لله .
ضحكت سحبتني طلعت جگاره شغلتها بطارف حلگي وبيدي ألسبحه ، گابلتني وَرده بـ مسبحتين بعدو الكل وصارنا نحنَ بـ نُص الأستقبال ع الأغنيه نرفع السبحه وكله سريع وننزل لـ ألگاع شويه صاحت وَرده :- أخونااا خوش أخوو يستااااهل ألهوسه
رفعت أيديه وأفر بـ ألسبحه وأيد ألخ وره ظهري ووَرده گبالي ، نزل عَواد ويانه وألبنات ورحمه ونورس أخت لُبَيد ألمتزوجه وبنات عمنا ألكُل نزلت ،
صارت وَرده و بيني وبين عَواد فجأه تبدلت الأغنيه ألتفتنا كُلنا چانت هيَ وبدلتها على ساريه ألسواس ، لفت الشال على شعرها زين حتى لا ينزل ، سحبت نفس ألبنيه وصارو گدام لُبَيد وأڤين...
ولُبَيد يباوع بيها ويحچي مدري شنو ، وهيَ تردله بـ حَماس ، صرنا بـ صفحه وأباوع عليها ، أخخ من الأدبسزيه ، سوو دائِره وخلو أڤين بـ نصهم ويرگصون وياها أخر شي سحبها عَواد وصار يفرها ويحچي وياها نوب أندار لـ لُبَيد ويگُله مدري شنو ولُبَيد يضحك وعيونه تلمع ...
بقو هوَ وعَواد وأڤين يحچون سوه وهيَ راحت وسحبت أيدين لُبَيد رفعهم صارت گدامه وتحچي وياه ، نار صارت بـ گلبي صرت ألوب أريد بَس تبعد منه وهيَ لزگت ونوب تردد ويَ الأُغنيه وتحچي ويَ لُبَيد وعَواد ، بلعت ريگ مشتعل لو ألزمها أطيح حضها ، أنه ويني وين سوالف ألنسوان ياربي صبر صبر ...
أنوب باوعتلي ضيقت عينها وتغني وترد ويَ الأغنيه :- امانه شفت شويلي هاي العيون تبوسونو ..شلونو شلونو يـ يمه دخيل عيونو .
صار لُبَيد يفرها ولازم أيدها وهيَ تغني أله :- ابو العيون الـ وساع خلاني حايغ مِن ساع ..
أخر شي عافته وخلت أيده بيدين أڤين أبتعدت شويه وگابلت عَواد بَس تفتر ما ترگص ولو ترگص أشلع عيونها عاد مصختها هاي وعلي ، طلعت برا محتقن ، أنه أعلمچ أنه أصبريلي أعلمچ ألرگص أدبسز ....
بقيت برا دخلو ولد عمي ثنين چانو جايين وگفنا بـ ألگراج نسولف وهم سألو على نَهشَل ليش ما أجه وگلت ألسَبب ،
ألتفتت على ألمطبخ ردت أمشي بَس وگفني خيال وره ألشباك ضيقت عيوني وأباوع بـ تركيز ، ثواني وعرفت هيَ لإن حسبالها ما مبين واضح وهوَ مبين لإن أضوية ألگراج عاكسه علي ولِهذا يبين ، ألشبابيك ألمضلله بَس ألظُهر ألي برا ما يشوف واضح أما ألعصر وألصُبح يبين بَس ما واضح ، وست فصعون عبالها ما مبين شي منها نوب ما مخليه شي على راسها ونوب تسوي حرگات تقلدني ، أحلف عليچ طگه ونص وعلي ...
نزلت راسي حگيت خدي رجعت باوعت نفس وگفتها تنفست بـ عصبيه ومشيت، وگفت گبال ألشباك ختلت ورا ألحايط دگيته ع كيف ومخلي وجهي بي هسه ألي يشوفني شيگول عليه أستغفرالله ، ماردت حچيت كاز على سنوني :- أندفسي جوه شعندچ يم ألشباك ؟؟ ناس تشوفچ شتگول ؟؟ وخلي صخام لطام على راسچ ما تنعدلن وعلي گلچن نفس ألطينه أدبسزيات .
گلتها وأبتعدت أتنفس بـ عصبيه ، ألله يصبرنييي ، الله يصبرننيييي بَس ، هاي بلوه مو مره وعلي .
..
مَر وقت هواي وسَفانه تدرس هواي بـ ألأيام ألفاتت ومستواها زين يعني ما تگول صعب أو شي لا تفتهم بَي ألحفضيات ما هلگد بي ، مرات أني أدرسها إذا عندي فراغ وأمتحنت نصف ألسنه ودرجاتها يعني زينه وأهم خلصت ، باقيلها بَس نهاية ألسنه ونشوف تطلع منها أو لا ، شگد صعبات ألمواد بَس مبين شاطره حيل .
ومن كُثر ذكائها هيَ قدمت ألهويه ومستمسكاتها للمدرسه كُلو حتى أني ما أعرف أسمها عفتها بـ راحتها أريد أشوف وين توصل ، وأني أگدر أطلع للمدرسه وأعرف أسمها بَس أريد هيَ تجي وتگول ليش تضم عليه سمعنى ما تحچيلي ؟؟
درستها بَس ما ألها خُلك مبين ضايجه من شي حتى قبل چنت أدرسها تفتهم وتتجاوب ألي ماتعرفو تگول حتى أعيدو بَس هسه ساكته ما حچت أبد ..
ألتزمت ألصمو وياها لإن مُستحيل أحصل شي من عدها .... دخلت لـ غُرفة أُمي گاعده تسبح بـ المسبحه گعدت يمها :- أخذتي عِلاجچ ؟؟
:- أي يُمه بَس أريد أگُلك شي .
- گولي يُمه .
:- هوَ طلب مو كلام عادي وأتمنى ما ترفض .
- أي يُمه أحچيلي شنو ألطلب وشتريدين يجيچ لـ عيونچ ذني .
أبتسمت سحبت أيدي تمسح عليها أردفت بـ تعب :- أنتَ تُعرف أني ما أدوم ألك ويجي يوم وأترك هاي ألحياة وأعوفك وحدك .
- يُمه لا تحچين هيچ الله عليچ شنو هذا ألكلام من عُمري على عُمرچ .
:- هسه أنتبه أني صح ما أدوملك وبَس عائِلتك هيَ تدوم وتكون ونيسك ، أني أريد أشوفك متزوج وعندك عائِله وأطفال .
- هاي صارلچ قرن تگوليلي عليها بَس تعرفين ما أحب ألزواج ومسؤليه ، وأني مو شخص عادي وگاعد ألنهار گُله مگابل مرتي ، أني أطلع مُهمات سنين يلا أرجع ، تتوقعين أكو وحده تتحمل هيچي ؟؟
:- لا أُمي أدري ما أكو وحده تتحمل هيچي بَس لازم تتزوج وألي تحبك تتحمل أكيد كُل شي منك .
- بلا وين هاي ألي تحبني وتتحمل چني قرد وانطنط منا ومنا ، وبعدين حرام عليچ خليتيني أشبه روحي بـ ألقرد وأني أبو عيون حلوه .
:- ههههه ولك أنتَ ما تنعدل شوكت تبطل هالسوالف التافهه ؟؟
- يُمه أني تافه ما أبطل ، والله بَس وياچ أوصل لـ مرحله بـ تفاهه ما معقوله بَس ويَ غيرچ يبوو تعالي شوفي ألثُكُل وألرزانه ، والله مدحت نفسي چثير الله راح يضربني صواب يصوب گلبي .
ضحكت گحت وأردفت :- أي هسه شگلت ؟
- على شنو يُمه نسيت ؟؟
:- تتزوج .
- أتزوج خالد ، أستغفرالله ، أتزوج منو يمه على بختچ تريدين تورطيني وتورطين ألبنيه شعندچ وياها ، هاي يا تعيسة ألحَض تقبل بيه ؟؟
:- أكو هواي .
- أنتِ چنچ ملوزتها من قبل ، وبعدين هسه موسم ألزواج شو ربعي عيتزوجون واحد ورا ألخ ، ما ضل بالدار غير ألعار وألي هوَ خويلد أبو راس .
:- والله هذا خالد راح يدخُل ألجنه من وراكم ههههه
- والله والله لو شفتو بالجنه أطگ روحي بالنعال وأرجع لـ جهنم هي شني شوگت راح صلى هذا ألنذل ، حتى سجده لله ما ساجد ، والعزيز حتى جهنم ماترحب بي ، أبو راس ألأعوج .
:- هسه أنتَ ما تبطل سوالف خليني أحچي .
- أي والله حقچ ضوجتچ أدري راح تملين مني بـ يوم أنتِ خاينه شتوقع منچ حبيتي هاي سفسف وعفتيني مع الأسف حجيه هنت عليچ .
غصت بـ ألضحك وتضربني بـ صدري أردفت مبتسم :- دومها ياروح ألنَهشَل ، جعل أيامچ كُلها ضحك وفرح بـ زودي ، وهسه يلا فريحه غرديلي سالوفتچ الملوزتها ...
:- أي أُمي أنتَ شنو رأيك ؟؟
- هسه غير تگليلي منو سعيدة ألحَظ حتى أگلچ أي أو لا ..!
:- أريد تتزوج فانيسا ...
... يتبع
• لاتنسون النجمه ؏ البارت 🔥
• يتم تطويل البارت بــ إستمرارية النَشر
• دُمتم بــ أمان الله وحفظه
•• حِساب ريڤال :- 3rival5
• انستا حگي للتواصل :- fatimalrashd