كلشي ضدي
انا ضدي وانت ضدي
شوكي والناس التسولف صنطه بينه
وجهي نوح بلا سفينه
لمن المبيوك يداعي باقي ايدينه
لمن يضم سره واحد تحجي عينه
عندي ضل بذمته موعد لا اجه ولا كلي وينه
......
بقلمي
زينب
.......
غسق ...
غمضت عيوني وهو يسوق بدون صوت يتخلل افكاري وكف بعد ماساق مسافه قصيره وهو يكول
_اذا عندج شي تحجيه للوالده فهاي اخر مره تكدرين تحاجيها
فتحت عيوني واني اباوعله واباوع لبيتنه من كد التعب الاني بي ماكدر افكر بشي
نزلت من السياره وهو ضل بيها
دكيت الباب واني مأيسه انو اسمع صوتها
_يمه تعبت والله حسي بيه لو مره وحده ضاله متهجوله ب الشوارع اني مجاي اكلج هيج علمود اتوسل بيج ترجعيني يمج لان مستحيل اتقبل حياتي وياج بعد استغليتي حبي الج ودمرتيني استغليتي تعلقي بيج لو مره وحده كليلي ليش هيج سويتي يجوز هاي اخر مره تحاجيني بيها اخر مره تسميعن صوتي
رغم جنت اسمع صوت طكطه يم الباب بس مجانت تجاوب
باوعت لسياج البيت الي ضال بس طابوك بدون سمنت يعني اكدر اتسلق علي واصعد مثل ماسويتها من وكعت مريضه
كعدت بالكاع ونزعت حذائي نزل من السياره عزيز وهو مستغرب
رغم ماسألني بس جاوبنه
_راح اصعد هنا شويه وارجع
_متاكده
رفعت عيني بعينه واني احجي بثقه
_مجاي العب لعب اطفال لو اريد اهرب منك جان ماتلكاني يمك هسه
سحب نفس قوي وهو يجر عيونه مني
صعدت ع السياج وحسيت اصابع رجليه تكسرن باوعت ليجوا البيت شلون اكدر اطفر رجعت باوعت العزيز الرافع حاجبه
_هسه شلون تطفرين
ابتسمت اله وطفرت قوي كعدت لازمه ركبي حيل متوجعه ومليانه تراب
بدون ماطلع صوت دخلت على امي الي لكيتها واكفه يم بابا الهول فزت وهيه تشوفني ابتعدت مرعوبه وكفت صافنه مكاني معقولة هاي امي الجانت ملجأي صارت تهرب مني وتخطط علي
بلعت ريكي واني احاول اسيطر على صوتي اليرجف من ضعفي كدامها
_يمه شسويتلج اني
هزت راسها رافضه تسمع كلامي
_طلعي منا طلعي هسه يقتلج هسه يجي
دفعتني وهيه مرعوبه ضليت صافنه على وضعها لزمت ايديها بين ايدي
_بس فهميني مهددج بيه صفاء بس احجيلي خلنطلع منا مايكدر يلكانه والله مايكدر يوصل النه امشي نروح منا ونعوف كلشي بظهرنه
دفتني بكل قوتها وهيه تفلت ايديها من ايدي
صاحت بيه بصوت عالي
_كتلللج طللللعيي منااااا ماااااريد اشووووفج
صفنت على وضعها وايست من كل امل بيه
_ماريد منج شي شكرا على تربيتج الي شكرا على استضافتج الي كل هاي السنين شكرا على تضحيتج بسمعتج واهلج بس في سبيل تهربين بيه واسفه على كل غلط بدر مني بقصد او بدون قصد ماريد منج شي ولا اريد اعرف شي بس اريدج ترفعين القضيه عن ابوي بما انو انتي الي بلغتني
نزلت عيونها مني وراحت الغرفتها سدت الباب على نفسها
حبست دموعي ماريدها تطيح وتفضحني وتفضح ضعفي
رجعت للسياج مهدود حيلي شلون راح اطفر مره ثانيه
باوعت لغرفتها مره اخيره واتمنه تطلع وتكلي كلشي صار مادخلني بي كلشي صار مجبورة علي ومستعده اترك كلشي واخذج وياي
صعدت ع السياج لكيت عزيز واكف نفس مكانه
باوعت للكاع وجريت نفس شلون اطفر كدامه واتاذه
تقدم علي وهو يمدلي ايده
لزمت ايديه وطفرت للكاع حسيت شي نبت برجلي غمضت عيوني موجوعه حيل انتبه الي وهو يباوع الرجلي
_غير تنتبهين هاي منو مكسر الكاميرا دخل برجلج هذه الفتات مال الكسورة
دنكت على رجلي عصرتها بيدي حيل موجوعه طلعت قطعه البلاستك الصغيره مو بلاستك مثل الجامه صغيره
اخذت حذائي بيدي لبسته واني اسوي نفسي مامهتمه وما موجوعه
كال وهو يسألني
_مامتاذيه نرجع
_وين نروح
صعد بدون ميجاوبني
حرك كلبي بتصرفه بس حالتي ماستمح اجامل احد ولا افكر بشي العندي كافيني
صعدت ب السياره مشه مسافه وفتح الجامه يدخن حسيتني اختنت من الجكاير ولعبت نفسي كال وهو يلتفت علي ويزفر الدخان بوجهي
_نزعي حذائج اذا موجوعه
قررت اترك كبريائي وانزع حذائي لان الالم موتني
دنكت نزعت حذائي واني اعصر يم مكان الجرح موجوعه
شغل اغنيه ع الميمر وع الميمر ضل بغرورك ياحبيبي الاسمر
ضحكت بطرف شفتي على ذوقه ب الاغاني بس والله ذواق اغاني قديمه مطربه
_غسق
_نعم
جر حسره سكت شوية انوب كال
_راح اخذج لبيتي اي شخص يسألج كليلهم حفيدة السلطان
لاتحجيلهم اي شي حتى خواتي وامي لو مهما سألوج ماريد تختلطين باحد فاهمه
عقدت حواحبي باستفهام على معرفته بيه
_منين تعرفني حفيده السلطان
التفت علي وهو يوكف السياره يم بيت
_ديالى قررت تجمعنه مره ثانيه ورا سنين طويله للاسف جمعتنه بهذا الموقف
_مافهتك
_الي رفع التهمه عن اخوي هو ابوج صار الوقت مناسب علمود اردله معروفه ويانه
نرسمت ابتسامه على وجهي دمعت عيوني بفرح
_صدك يعني عزيز انت اخو الي ساعده ابوي يعني مراح تترك ابوي
هز راسه وهو يجر نفس
_جنت حيل احب اخوي بس فرقنه الوقت هواي خلاه هو بمحافظه واني بمحافظه بسبب العائله طبعا
رغم مجنت فاهمه شي من اليحجي ولا جنت اعرف شنو معنى كلامه جان الي يهمني مراح يترك ابوي بهذا وضعه
_زين اهلك يعني من اكلهم اني حفيده السلطان يعرفوني يعني يعرفون بيت جدي زين امك مو ب البصره هو حسين هيج كال عائلتك ب البصره
_نزلي هسه ارتاحي ولا تحتكين باحد
نزلت من السياره وانتظرته فوت السياره للكراج باوعلي وهو يكول
_ماتفوتين شنو تنتظرين
_مو حلوة كدام اهلك جيتي هنا رجعني عزيز احسن
_امشي وياي ااااخ يارب على العناد صبر يارب
اكو صحيات برا ويمهن مغسله
_تعالي غسلي وجهج ونكثي ملابسج كلهن تراب
غسلت وجهي وترتب ملابسي
التفت علي وهو يباوعلي من فوك ليجوا
_بعد شعرج فتحي ورتبي ماريد اهلي يحسون بيج شي
نزعت القراصه ومشطت شعري باصابيعي ورتبه
_هيج تمام
مد ايده واخذ القراصه حطها بجيبه ماعقلت على تصرفه لان جنت بوضع ماريد احرجه كدام اهله
_اي تمام
دخل من باب المطبخ وهو يدك الباب ورا ماشافهم كلهم متجمعين يتعشون هواي بنات ومره جبيره يمهن وهنه عياطهن واصل لاخر البيت وشقاهن
دمعت عيوني من منظرهن شكد حلو جمعتهن كلهم التفتو علي مبتسمين اختفت ضحكتهم وهم يشوفوني ورا
كالت المره الجبيره وهيه تسند ايديها ع الكاع وتكوم تقدم عليها وهو يضحك حضنها وباس راسها التمن علي الموجودات وهنه يسلمن علي جانو كلمتهم الي يصيحوله بيها "ابو العز"
واكفه على صفحه مستحيه من وجودي يمهم
التفت علي وهو مبتسم
_يمه حفيده السلطان بنت حازم اذا تعرفيها
رفعت حواجبها بعفوية وكانو عرفتني
_هلا يمه تفضلي ليش واكفه ب الباب
نزعت حذائي وفتت للمطبخ حسيت وجهي اشتعل نار بسبب خجلي منهم لان فتت عليهن هيج
كعدو البنات يكملون اكلهم وعزيز وسطهم
_يلا بنيتي مدي ايدج وياهم
_ب العافيه خاله ما اشتهي
طلع عزيز من المطبخ واني ضليت واكفه مكاني ماعرف شنو اسوي مامنحطه قبل بهيج موقف محرج
كالت بنيه وهيه تصب اكل بالصحن
_مدي ايدج حبيبتي صار العشه بوجهج
كعدت يمها واني اكل بشفتي من القلق قسمتلي خبزه وانطتني اجه عزيز وهو مبدل ملابسه
كعد يمنه ع الصينيه وهو يحاجي وحده من البنات
_ها يحلوتنه مبين اليوم زعلانه
_ابو العز هاي مو سالفه كل ماشفتني ضايجه كلت زعلانه شنو الواحد ميصير يزعل بهل بيت بابا هاي هرمونات افهم عزيزي ابو العز
دنكت وجهي وعيوني مدمعه موقف محرج اول مره اشوفهم واكعد اكل وياهم ولازم اتقبل كلامهم واني راسي صاير خريطه من التفكير
_هاي فوكها جنج بومه زعلي على راحتج احنه شكو بلا صبيلي اكل اني ماميت عليج بس جوعان
دارت وجهه منه وهيه تحط بصحنه دجاجه وتبسي من صحنها
قرب صحنه الي وهو يكول
_اكلي غسق
رفعت عيوني اله هزيت راسي بلا
_ما اشتهي
_بكيفج
ضل ياكل واني بس لازمه الخبزه ماكدر اكل شي الكلمه وكفت بلعومي خلص عشه واني كمت من الصينيه طلعت للمغسله غسلت ورجعت للبيت
لكيت بس البنات ب المطبخ كالت بنيه وهيه تاشر ع الباب
مثل البنيه الجانت ضايجه
_حبيبتي ابو العز يريدج يمهم هو وامي ب الهول
طلعت للهول لكيتهم يسولفون بصوت هادىء من شافوني قطعو حديثهم ابتسمت باحراج واني اكلهم
_اسفه قطعت سالفتكم
بقيت بمكاني متشنجه ماعرف وين اروح وشنو اسوي
_تعالي يمه تعالي يمي
كعدت يمها واني احس بفراغ جبير وضياع بحياتي
كالت وهي تباوعلي بنظرات عطف
_الله يشافي ابوج بنيتي ويفرجها علي انشاالله همزين انتي مامتاذيه
باوعت لعزيز باندهاش شنو تحجي مافهمتها معقولة ابوي مريض واني مادري عزيز كانو تدارك الموضوع وهو يكول
_اي يمه سوو حادث زين عسق طلعت منها سلامات
ضليت مثل الاطرش ب الزفه وهو يمنعني احجي ويخزر بدون سبب علمود اسكت رغم جان ناطيني تحذير قبل لا ادخل ماحجي شي ولا اختلط ويه خواته
_يمه غسق راح تضل هنا علما يطلع عمو حازم من المستشفى امنها يمنه
_ليش الرجال صحه يعني زين يكدر يحجي
_ها لا يمه اقصد ماعندها بديالى غيرنه خوما نعوفها خلي تبات يمج الليله
_لا وليدي يم خواتك احسن تدري اني اشخر هواي لان جيوب انفيه عندي يم البنات هم تتونس يمهن وتطلع من جوها
كالتها وهيه تحط ايدها فوك ايدي وتبتسم باوعت على عزيز الي ياشر براسه على امه وعيونه شوي وتطلع من محجرهن لان يخزر
باوعت الامه الي مبين الطيبه على وجهها
_لا خالتي يمج اني لان تعبانه بسرعه اغفه
_حبيبتي الي يناسبج
اجت وحده من خواته الخمسه وبيدها كوب جاي نطته اله ومدت ايدها بجيبه اخذت فلوس بدون ماتستأذن
_حبيبي ابو العزيز عزيز قلبي الجميل جميلي انت اروح فدوة لهل خدود دباع الجمال يمه ااخ باع الجمال شنو من يكيك مخلفه انتي
خزرتها امها وهيه تكلها
_نور مو وكت صبغج هسه ماتشوفين البنيه يمج
التفت علي نور وهيه تكول
_يمه صديقتنه نعتبرها غسق منا ورايح لا تعتبريها خطار
_خير نوره عندج شي طلعه مووو ماكو روحه
عفست وجهها وانطته الفلوس
_مو كتلج يمه مايقبل هسه وين رايحين احنه ياعزيز حتى من خالتي منعتنه
كانو ضاج من تصرفها العفوي حط كوب الجاي ع الطبله وكام التفت وهو يكول
_غسق روحي نامي هسه
الظاهر العائله متعوده ع الخزر هو يحجي بخزر وامر وامه تحجي ويه بنتها بخزره
ضليت صافنه بوجهه واني ماعرف شجاوبه لان حتى ماعرف وين غرف البيت
_يمه اخذي غسق يمج
كامت امه واني وراها شافنه فتنه للغرفه مالت امه يلا دخل غرفته
جريت نفس براحه وكانو جنت حابسه نفسي للحظه حسيت حتى التنفس عنده باستأذان
_خالة عندج شاحنه
_اي هاي
اشرتلي ع الشاحنه حطيت جهازي الطافي شحن وشغلته
اجتني مكالمات فائته من حسين اتصل علي
_الو حسين
_وينج بالي يمج
سولفت اله الصار بيه وطلب ابوي مني واحراجي كدامهم دخلت ام عزيز للغرفه ماكدرت احجي شي طلعت من الغرفه والبيت محد بي بس صوت ضحك بنات يجي من الغرفه الي يم غرفه ام عزيز
رحت المطبخ واني احاجي حسين
_باع حسين كلش مامرتاحه هنا لان ماعرف شي عنهم
_اي شي طبيعي غسق
_حسين عفيه شنو صار على قضيه ابوي عزيز كلشي مايحجي عبالك اجدي منه كلام
_اذا تنازلت امج وتنازل ابن صفاء تسهل القضيه انتي متاكده امج الي مشتكيه
_اي حسين متاكده باع حسين افهمني من اشوف تصرفاتها وطريقه كلامها وياي تشوفها انسانه ثانيه مو نفس الي اعرفها كل ماريد احاجيها تكلي طلعي يقتلج صفاء احسها عايشه وسط رعب مو طبيعي ومره ثانيه ارجع اكول بين نفسي لا تكدر تشرد من صفاء وياي وتعوفه حسين راح اتخبل ابن صفاء شلون عرف امي شلون عرفت مو باب مسدود عليها زين ابن صفاء وين يدري بهل سرعه مجاي اكدر افكر بشي
_كل هل احتمالات فكرت بيها السالفه تدوخ حيل هسه روحي نامي مبين شكد تعبانه وانتي صارلج يومين منايمه
_حسين بس كلي اذا تنازلو عن القضيه يطلع ابوي بنفس الوقت بكفاله
_ماتوقع هيج غسق والله ماعرف بهيج امور بس اتوقع يبقى الحكم العام للحكومه كم شهر هيج اتوقع وهم اكو تميز لب الحكم من قبل المحامي
_زين عزيز مايكدر يسوي شي
_السالفه تبقى يم القاضي لو حتى قرر عزيز يساعدكم
_اووووف حسين مادري دايخه ومحتاره واحط اللوم على نفسي وعلى امي وضعفها لو على صفاء
_هسه نامي والله كريم بعدين
_حسين محتاجه فلوس
_اعرف محتاجه اليوم انطونه اجور الشغل باجر تعالي
للمديره استلمي انوب خبريهم انو بعد ماتشتغلين
_اي لازم هيج اسوي
_بس هسه لو ماتطلعين افضل شي وانتي كاعده بيت عزيز اكيد ميخليج تحتاجين شي لو اكدر اني اجيبلج الفلوس بس المديره اله انتي تحضرين يلا
_والله زحمه حسين شخص ماعرفه بين يوم وليله اصير بنص بيته لازم باجر اروح اشوفك ب الشغل ماشي تعال للمديره لان مراح افوت داخل
_ماشي اشوفج يمها
جاي احجي وياه ونسحب التلفون بحركه سريعه من ورا اذني فزيت مرعوبه جريت نفس براحه واني اشوفه عزيز بس استغربت من تصرفه غلق الجهاز وبيده الثانيه جكارته
_ليش هيج عزيز مو جاي احجي
ضم التلفون بجيبه وهو يدخن ويحجي ببرود
_كتلج روحي نامي ماكتلج كعدي خابري ورسمي مواعيد بكيفج باخر الليل
حيل استفزني بكلامه وكانو المقابل لازم يسمع كلامه بدون اي نقاش مثل الطفل مديت ايدي واني اكله
_رجعلي التلفون
عصر اصابع ايدي المادتها حيل فلتت ايدي منه واني لازمتها بوجع حجيت بحركه كلب
_عزيز ارسم حدود بيناتنه ولا تدخل بيه رجاءا اني فتره واطلع من بيتك ماريد اترك انطباع مو زين علي هذا تصرفك شنو تسمي حضرتك تقبل يجي اي شخص ياذي وحده من خواتك بهل طريقه بس تخيل الموقف
رجع لزم ايدي وهو يعصر اصابعي حيل حاولت اسحبها منه ماكدرت حسيت اصابعي تكسرن واني ماحجي شي ولا هو بس يباوع بعيوني بتحدي
دمعت عيوني من الالم يلا عاف ايدي
قرب وجهه علي وهو يحجي بهدوء
_لاتطولين لسانج اكثر من هيج هل مره صابعيج تاذن المره الجايه لسانج ينكص
فتحت عيوني متفاجاه من كلامه
للحظه حسيت صفاء الدازه علي للحظه حسيتني وسط لعبه جبيره هل توقعات الجنت راسمتها بالي صح لو مجرد تخيلات بس طريقه كلامه واذيته الي خلتني اصدك افتراضاتي
يتبع