....
سديم.....
رغم مامرتاحه لوضع ابوي بس اضطريت اروح قبل لا احصلي حجي منه
اجتلي عمه ميساء ورا ماكلها ابوي علمود نروح واني عاصره لفلوس بيدي حيل
لبست ملابسي وطلعت وياها
جان واكف ب الباب ينتظرنه
اشر على باب الكراج وهو يكول
_اجرتلكم تكسي تاخذكم ومن تخلصون اتصلو علمود يرجع عليكم
همست الميساء بصوت ناصي
_عمه ابوي مو طبيعي اليوم
_امشي بلكي الله هداه
_هاي بعيده عمه اصلا كلش ماتوقعها
صعدنه ب التكسي جان رجال شكله حيل غريب ايده اليسره وركبته كلهن تاتو باوع الابوي وهز راسه وهو يحرك السيارة شكله مو سايق تكسي ابد على هذا الترتيب
لزمت ايد ميساء حيل
شورطت روحي ليش رحت ليش سمعت كلامه اخذت الفلوس من ايدي وهيه تضمهن بجنطتها
وصلنه للعشار وطول الطريق بس اردد تسبيحات بلكي وسور حسيتني ختمت القران من الخوف
نزلت واني اتنفس هوى براحه
_عمه اشتريلهم اي شي وباعي من نرجع خنروح للكراج نصعد تكسي ونرجع هذا مدري شبي مارتاحيتله
_خيولي شحده يسوي شي
_عمه ماطول جابه ابوي كلشي توقعي منه
_فترينه للسوك واحنه نشتري اشترت الي وللبنات غسولات ومقشرات اخذت شيره وهيه تكول
_شبيجن يحضي ماجنجن بنات شو ملتهيات عن كلشي
اخذي هذن وهسه هم اخذ للبنات شنو تردين بعد
_لا عمه كافي شسوي بيهن كلهن
انطت الفلوس لابو الكوزمتك وطلعنه جانت محتاره شنو تشتري لمصطفى ومرتضى الفلوس النطاهن ابوي حتى مايكفن كم قطعه كملت من يمها فلوس واشترتلهم
حيل طولنه واحنه ندور على ملابس صار اذان المقرب والدنيا بدت تظلم ابوي تصل عليها
لزمت مبايلها وطفيته كتلها نروح بتكسي وفعلا رجعنه بتكسي
لكيت ابوي لازم الباب بس نزلنه كال
_مو صار ساعه اتصل وينكم مو كتلكم ابو التكسي يرجعكم
ميساء_طفه تلفوني شحن هذن غراض اولادك شوفهن الهم
اخذهن من ايدها بنتر وهو يخزر بينه بعد ماراح بست ايدي وحطيتها على كصتي واني اكول
_احمدك واشكرك ياربي على نعمه العقل
دخلت على بشائر سانده ظهرها على السرير وهيه تقرا كتاب عاقده حواجبها وتقرا كانو تقرا شي مضوجها او معقد وهيج مركزه بي
_بشائر
_همممم
_باعي هسه اني شمسويتلج كل ماجي يمج تطرديني
_اشتريتي غراض لخوانج
كالتها وهيه تسد الكتاب وتركز نظرها علي
_اي عمه ميساء اشترتلهم اني وين اعرف بهيج شغلات
_وابوج اشترالج شي انطاج فلوس تشترين
_ايباا ومن يمته سيد الوالد ينطي شبيج انتي مصخنه
_اي لهنا اريد اوصلج شعندج هليام ليش مره ثانيه ترحين للسوك
_المره الاولى اشتريت النه وهلمره لخوانج يعني تسألين وكانو ماتعرفين السبب
_وخوانج هم بس ديري بالج من ابوج
ابتسمتلها واني اكلها
_بشائر طلعي من الدائره العايشه بيها عيشي يومج بتفاصيله
_وهذا الجاي اسوي
_بس انتي معتكفه على نفسج حتى صايره عصبيه بس احاجيج تعيطين بوجهي
جرت نفس وهيه تكول
_مو بيدي مامتحمله شي اريد يبدي الدوام والتهي ب الدراسة او اشتغل جاي احس ب الوحده
_كومي نصعد يم شمس خطيه هم على طول الوقت وحدها
كامت وياي لكيت شمس صافنه على حاسبتها بس شافتني سدتها ويمها جمانه نايمه على سريرها وتشم بمعصم ايدها استغربت من حركتها كلت الشمس واني اشر على جامانه
_ليش هيج مسوية
لمت رجليها على صدرها وحطت راسها عليهن
_تشم بعطر حسين
_يروحي
دمعت عيوني مثل الطفلة نايمه رحت يمها وحاولت اكعدها
ملامحها حيل ذبلانه وضحكتها الجانت ماليه البيت هسه مخفيه بعد سوالف كلتلهن بحماس
_خنسوي عناية ب البشرة ضايجه
بشائر _اني مالي واهس
جمانه_ولا اني
باوعت الشمس بترجي
_لا كومو ليش لا باجر يسون حفلة تكريم ب المدرسه للاوائل من ضمنهم اني فاروح خوما اروح بوجهي التعبان وامس شلون ملابس حلوة جابتهم ميساء
_صدك يلا اجيب الغراض واجي
كعدنه كلنه ب الغرفه الي تشير والي تنظف وجهها
اعرف شكد الحزن مليان كلبهم بس نحاول لو شوية نتغير ونطلع من الجو العايشينه باوعتلي شمس وهيه تكول
_هسه امي تضل تحجي علي لان حسين توا متوفي ومصاير الاربعين
كالتها بغصه ودموعها مليانات عيونها
_لاتحفين وجهج علمود لا يبين وجسمك ضروري تنظفينه العزا والموت مادخله بهيج شي نزلي دشداشتج من تطلعين
مسحت عيونها وهيه تحط ماسك ورقي على وجهها
تمددت وهيه تكتم بضحكتها
_ولج سديممم هسه بشرتي تنعل بيه الف مره من دخلت سادس واني مامسويتلها شي فزت وكانو تذكرت شي التفت على بشائر وهيه تكول
_صدك بشيره شكد طلعتي معدل ودخلتي هندسه حاسبات اريد ادخل مثلج
_حبيبتي قدمي وهمه يختارولج طلعت ٨٨ وقبلوني شوفي بلكي يقبلوج
جاي نحجي وسمعنه صوت تميم يصيح بعلو صوته
تقرب صوته وصار ب الطابق الفوك واحنه وحده صافنه بوجه الثانيه بتعجب
ودفع الباب حيل وراه عمه ميساء تهدي بي وتسحب بي جان شكله مرعب وهو يصيح
_انتييييي منووووووو سمحلللللج تطلعينننننن انااااااا شنووووو محذرررررج من ابووووووج الس....
جان موجهه كلامه الي طلعو البنات ورا ما اشرت الهم ميساء يطلعون بلعت ريكي بخوف واني الاحظ عروق وجهه كلهن مبينات وجهه احمر من العصبيه
_بس تميم ماسويت شي غلط ابوي هو طلب مني
_طلللللبببب منججججحح انتييييي على العنااااااد تسوووووين هيججججججج ماتعرفيييين شي انتيييي ماتعرررررفين كميييييية الخطررررر الجااااااي تعيشيييييه
_لعد منو امس يكلي عليمن هل هموم وليش على العناد لهل درجه تشوفني خبيثه
_لاااااان اثوووول احااااول اخفففف علييييج ثقللللللج
_ولك يمه صلي على محمد شجاك وليدي مو هيج ب التفهام
_طللللعي عمه مو تردين بالتفاهم طلعي واناااا اتفاااهم وياااها
اشر براسي لا الهم طلعت ميساء وسدت الباب
_تميم باع ادري المفروض ماطلع بس شسوي نجبرت
_ياااابه طلللعي وين ماتردين شكم مرررره كاااايلج هل فتررره ابتعدي عن هل مررررريض اتبعدي عنه هسه صرتيييي ماتردين تطلعين طللللعي ويييين ماتردين كلمتي هيج اصلا
جان يحجيها بصياح بعد ماراح صوته من الصريخ
_مو هيج يعني هسه اذا رفضت الابوي متخيل شنو يسوي بيه عادي عنده حتى يذيحني
شمر السويج بالكاع وكعد يجر بشعره وينصي عينه
_ليش انا مادري
_طلعنه مستعجلين علمود نرجع من وكت جان عصر
_منو صاحب التكسي رجال ضخم ومسوي تاتو وشعره خفيف لو غيره
_ اي هو شلون عرفته
بخطوة سريعه تقدم علي وكف مقابيلي جحه بصوت مليان غصه وهو مركز بوجهي
_بله اخذووج مني وين اروووح بله هل كلب اخذج
_شتحجي مجاي افهم
حضني وجهي على جتفه ومنزله ايدي وهو يشد بحضنته دفعته من عندي واني اكله
_مجاي افهمك تميم والله مافهمك دايخه
مثبت ايديه على اكتافي ويحجي بلهفه
_باعي منا ورايح ماتشوفين ابوج ابد
حطيت ايدي فوك ايديه واني اطمنه
_ميخالف ماشوف ابوي بس اهدأ
_وماتسوين شي بدون علمي
_كلشي انت تعرف
_ماريد اخسرج
هزيت راسي باي واني اباوع لعيونه المدمعات وشفايفه اليرجفن
رجع حضني بقوة وماسويت اي ردت فعل
_تميم جاي تخوفني ابوي براسه شي مو وانت تعرف وماتكلي حيل خايفه مجاي احس ب الامان
بعد عني وهو يحجي
_انا يمج واذا اطلع ضلي يم بيبي
حط اصبعه الابهام على حاجبي واصعبه الثاني على حاجبي الثاني وهو يمسح بحواجبي
رفع اصابعه لشفايفه وباسهن
رجفت مبتعده منه
هلكد اكو حنيه بكلب هل انسان مامعقولة
محد خايف علي مثله جانت نظراته الشي الصح الوحيد الي يحسسني ب الامان
_ليش سويت هيج؟
ابتسم ابتسامه خفيفه وهو يعصر عيونه باصابعه
_حلوة انتي
_ترا هواي تباوع لوجهي
_علمود احفظ ملامج براسي علمود من اشتاقلج ب الشغل اتذكر عيونج وكلشي يهون علي
كلت بعدم مبالاة وشقه
_هههه علمود من يخطفني سيد الوالد ماتنساني باع من يخطفني لاتتركني صح اعارك ولساني طويل بس احسني جبانه اقوى شي عني اتفل على اليخطفني
خزرني وهو يرفع اصبعه بتهديد
_عيدي كلااامج وشوفي شسوي بيج
اختفت ضحكتي واني اكله
_شبيك اشاقه وياك
عدل ياخته ودنك رفع سويجه من الكاع وطلع بدون لا يحجي شي
بشائر...
السواد يغطي العالم العايشه بي
الذنب يكتلني
الكره على شيماء يزيد بكلبي
شعوري ب النفور منهم
يوم عن يوم افكر شوكت اموت وارتاح
جنت رايده شي بسيط يغير كل الصار
نظرة بيبي الي بيها عطف
نظره جدو وعمامي الي بيها لوم جبير
نظرة سديم الي بيها ندم
الفراغ الاحس بي بحياتي
تفكيري ب الصار
بين صفنتي كمت اريد البس الكلاده الاحبها الشي الوحيد الي احس غيث موجود وياي بيها
جنت حاطتها بين الملابس لان ماريد احد يلبسها
نفضت الملابس واني ادور عليها مالكيتها
بحركه سريعه نزلت كل الملابس ب الكاع ادورهم قطعه قطعه
ختنكت لان مالكيتها طلعت امشي سريع اريد سديم اسألها عليها
جان البيت مليان ناس يردون يطلعون للنجف اربعينه حسين
اختنكت حيل لان مالكيت سديم لازمه القفل بيدي حيل
كعدت ب المطبخ منزله راسي بقهر
كل الي يحاجيني ماجاوبه ولا ارفع راسي
الي يكول هاي مخبله والي يكول بت صلاح مريضه
جنت اسمع كل ارائهم بيه بس ماهمني شي
سمعت صوت سديم كمت اركض الها
ماهمني منو يمها كل همي اريد كلادتي روحي متعلكه بيها
كلت بصوت ملهوف
_سديم كلادتي الجنت ضامتها بين ملابسي وين
_الجابها غيث
_اي
_محد اخذها مثل مكانها
رفعت شعرها القصير بقراصه وهيه تكول بعدم اهتمام
_مادري بشائر دوريها والله مافارغه
_امشي ويااي
دخلنه للغرفه واني ارجف حسيت هذا اخر شي امتلكه وضاع
_يلاا دوريها
_اهووو دوريها انتي قابل وين تروح
_سددددددديممممم دوريهاااااا
_وعلى شنو تصيحين
بدون سبب اتنرفز واتعصب على ابسط شي اعصب وابجي
طاحت بدمعي بشوغه واني اكلها
_هسه تدورينها ارديها سديم تفهيمن شنو اريدها
ضليت كاعده مكاني ارجف وهيه تدور صعدت فوك الطبله تدور فوك الكنتور مالكتها دخلت نرجس مستغربه من هوسة الغرفه
_شبيكم على شنو تدورون
_على كلاده بشائر
نزعت حجابها وهيه تاشر على ركبتها
_ياا هاي اني لابستها حبيت البسها شوية
مشيت اليمها سريع واني اجرها من ركبتها بعصبيه
_يلا نزعيها اذا مو الج المن تلبسيها
رسمت ملامح الحزن على وجهه
ونرسمت ملامح الندم علي
احجي حجي مافهم معناه بس اريد افرغ غضبي بشي
نزعتها وحطتها بيدي طلعت بدون ماتحجي شي مبين شكد حز بخاطرها سديم الي تباوعلي بلوم
عفتها وطفيت الضوا نمت بفراشي واني حاضنه الكلاده على كلبي حيل
بجيت بحركه واني اردد بصورة الكرسي علمود اهدأ من العصبيه وترتاح نفسيتي
بجيت بهاي اللحظه عن الحجي السمعته برا
رغم شكد سامعه حجي بحياتي بس مامتأثره هيج يجوز لان مجان الي وقت اختل بي بنفسي
بجيت واني اتذكر هواي شغلات
الحلوة والمره
كمت شغلت التلفون الي جابه الي تميم ورا مارفضته منه وجابه بنفسه ماكدرت ارده
سويت برامج ودخلت على صفحه غيث
بدون اي رساله وتردد اتصلت بلحظتها شكد تندمت وسديت الاتصال وحظرته
مسحت وجهي التعبان حطيت مرطب وكريم اساس اخفي تعب وجهي غيرت ملابسي وطلعت ورا مالبس كلادتي شيماء نهائيا ماباوعلها ولا اشتهي اسمع صوتها
الرجفه بعدهي بيه لو شكد ماحاول اخفيها للعشه ونص ناس راحو ونص بقو يرحون للنجف
رحت البيبي الكاعده بغرفتها ورا ماصاحتلي
_ها بيبي
_شنو سديم تكول ماتروح لان انتي ماترحين
_بيبي مالي خلك نفسيتي تعبانه انوب اروح اسمع صوت بجي وقهر ماتحمل
_موش بكيفج ترحين جا تضلين وحيدج سديم تروح غصبا عليج وتميم مايقبل احد يضل وعلمود تزورن امجن هم
هزيت راسي يأسانه ماعندي راي انو ابقى
طلعت من يمهم ورا مابدت مرا يمها تسألها علي ومالي خلك اجاوبها
للفجر وطلعنه سديم الي شفتها من بعيد هيه ونرجس
صعدت بسيارة وكعدت يم بيبي
منظر الشمس حلو وبرودة ب الجو
كعدت يم الجامه واني اباوع للسمه
دكيت علي الجامه سديم تريد انتبه
_نزلي احنه راح نصعد ويه تميم يكول ختجي هيه وبيبي
خديجه_لا يمه انتي روحي وياه وحده منجن تبقى يمي
التفت سديم وصعدت للسيارة تحجي وهيه تلهث
_بيبي والله خبلتوني انتي تكولين هيج وتميم يكلي جيبيها
بيبي سحبت نرجس وسديم من ايدهن وكعدتهن كدامنه جانت كوستر هوسه الجهال وهوسه النسوان
اجه تميم وجهه احمر يحجي بعصبيه مكتومه من الجامه ويه بيبي وسديم
_هاي سوايه سديم بنت الاوادم من يمته اننظركم
خديجه_انا مارضيت يرحن جا هو بكيفك
_بسيطه خل ارجع للبيت واني اعلمجن ياخديجه ويا سديم
طك الجامه بيده بعصبيه بس على كيف وراح سديم عوجت حلكها ماعاجبها الوضع واني اراقبهم بهدوء
جانت كوثر وشمس وجمان بسيارة تميم صعد عباس وكعد ب الكرسي المقابيلي صعد ورا رجال رفعت عيني ونصيتها ع التلفون رجعت رفعتها مره ثانيه بتعجب واني اشوفه
رجف كل جسمي ولزمت بعباية بيبي
جان يباوع للنسوان وحده وحده وهو يكول نطلع كملتو خوما متضايقين ب الكعده
ركز عينيه علي جر نفس وهو يكل العباس
_تعال يمي خاف انعس وحدي اسوق
_جا وين اكعد فوك راس الحبله مو يمك الولد شبيك انت
هز راسه ساكت ونزل صعد وهو يسوق
نرجس وسديم بس يباوعولي مركزين على ردت فعلي
عفت عباية بيبي
طول الطريق مشغل لطميه وليدي القمر
مجرد ماسمعتها بيبي وضلت تبجي
حطيت راسي ع الجامه اسمع بيها واداري بدموعي
هم راح ازور امي لاول مره
خلصت اللطميه وماشغل غيرها بدت الشمس تطلع اكثر والضوا يطغي عالشوارع
كال عباس الكاعد كدامي
_شبيج بوية اشو صفيره صايره
_انجب عباس انت اصفر
ندستني بيبي وهيه تكول
_مو عيب كدام النسوان هيج تكولين الابن عمج
_قابل احد سمع بصوت ناصي خوما زعلت عبيس
كلب ملامح وجهه بشمأزاز وهو يأشر على نفسه
_انااا عبااااس بكبري اخاف من هل بريعصي
_والقران اكوملك هيووو
كرصتني بيبي حيل من زري تريد اسكت وعباس كاتم ضحكته
ضليت افرك بمكان الكرصه واني خارزه بي رفع تلفونه وهو يكول
_خديو اريد اخذلج صورة علمود من تموتين تبقى ذكره الج نحطها ونحط عليها لطيمات ونتصارخ عليج
جنه كاعدين قريب ع جهه السايق ليكدام مو ليورا
كال غيث بنتر
_شبيك مفاول ع الحجيه من عمرها على عمرك
خديجه_ولكككك غويث
_لالا والعباس مو هيج اقصد من عمره على عمرج
عباس_ههههههه ملك الجفصات حيوو
_اسكت غويث شايله بخاطري كلش منك رغم وليدي واحبنك بمحبه ولدي الله شاهد
عقد حاجبه مستغرب واني اشوفه من المراية
_دهينتج علي بس لاتضوجين
_لو ع الدهينه سهلة
كال عباس وكانو تنرفز من الموضوع ورا مجان يضحك
_كافي سدو الموضوع
رفع تلفونه وهو ياخذ صورة ويانه ضحكت ب الصورة واني اشاقي عباس اريد شكد ماكدر ابين مامهته
_عود دزليها
_انتي فعلي برامج
_سويتهن مساع
_جا وحساباتج القديمه مارجعتيهن
_لا مارجعتهن
اخذ تلفوني وهو ياخذ الحساب التلفونه
جانت خليفه الجهاز صورة امي
فتح الجهاز وضل صافن بيها
_هاي امج الله يرحمها شكد صاكه
_انت حتى الميت ماسالم منك
كل ماشخص يكول الله يرحمها احسه يعصر بكلبي
رجعلي تلفوني
حطيت راسي على جتف بيبي اريد انام
.......
يتبع