نقطة نهاية
عادت بي للوراء وليس تقدما
اعتدت ان ينكسر خاطري
في كل شيء
لكن لم اعتد على ايقاف دموعي
اعتدت على السقوط ثم الوقوف من جديد
......
بين حركتي وخوفي من الجاي والكلام الي سمعته
التفت واني كاتمه غضبي بداخلي
ساترة قهرت كلبي بداخلي
_نعم وياي؟
تميم_جا منو غيرج هنا طبعا وياج
_ليش ماطلع بيها شي الطرمه
_عمال ب هذاك الصوب لاتطلعين انتي وخواتج وسمعي كلام بيبي وحطي حجاب على راسج
يحجي وساكته عيوتي مليانات دموع رفعت عيوني ليفوك علمود لاتطيح دموعي
بالي مو يم حجيه بالي يم الشفته والسمعته
رحت من يمه وكل طاقه ماعندي ذبيت نفسي ع السرير وابجي بحركه
اجتي بشائر ومبينه الحيره على وجها
مسحت دموعي وانا اسئلها
_بشائر شبيج
هزت راسها نافيه
كعدت وبيدها مبايلها ضاغطه عليه حيل بيدها والايد الثانية سانده راسها عليها
_بشائر بيح شي مو طبيعيه وين جنتي من كعدت الصبح
بجت وهيه تهز راسها بلا
_اريد اموت سديم ماريد اعيش هيج عيشة
_ترا حالتنه مو احسن منج عايشين شنو بيدنه مايصير تكولين هيج ذكري الله بدل هذا كلامج
_راح يجي يوم اموت وترتاحون مني
فز كلبي من حجيها مابيه حيل فقدان بعد
باوعتلها وكل ذرة بجسمي تعبانه
طاحت دموعي الي كل ماكول ما ابجي الكاها على اتفهه شي
_غيث حاجاج مو
هزت راسها ب اي
من شفت هيج لازمه المبايل تاكدت محاجيها
_شوكت حاجاج
_البارحه واليوم
_يريدج؟
_اي
_ترجعيله
باوعتلي بعيون مدمعه وعيوني ماتسكت من الدموع
_سديم ضايعه حيل احسني وسط شي جبير ومحتاره وين اروح مثل المتاهه اني بيها
كلت بصوت مبحوح
_راح انام لحد يكعدني
غطيت حتى وجهي ودموعي تحركني من تنزل على خدودي حسيتني اختنكت ورفعت الغطه دموعي بللت شعري ومخدتي
بين شعور يذبحني بين ندم وخوف
ندمانه على كلشي ندمانه لان صرنه اني والوكت والناس على امي
وخايفه اعيش حياة مثل امي
لان حظ البنيه مثل حظ امها
ضليت على هل وضع مر وقت طويل باب الغرفه مسدود وخواتي مدري وين واني بس صافنه
بشائر ..
واكفه اساعد شمس وبنيه اسمها ريم بنت عمو رافت
اسوي زلايط وياهن ندستني شمس بخاصرتي وهيه تكلي
_نرجس تكول انتي ب الجامعه ماترجعين تكملين
باوعتلها وصفنت بوجها
_مادري يجوز اجلها ع السنه الجايه واجيب نقل
_شنو تدرسين
_هندسة حاسبات
صوفرت بصوت ناصي وهيه تضحك
_واو واو بنت عمي المهندسة بشائر حيووو لكككم
ضحكت على طريقه كلامها وعفويتها
كل عمامي ونسوانهم وبيبي كاعدين ب الهول طلعت والجفجير بيدها لان جانت تصب تمن
تخصرت وكالت
_جدو حفيدتك المهندسة بشائر تريد ترجع لجامعتها
ضحك جدو وهوا يكلها
_تدلل بشورة
اختفت ابتسامتي من صاحني بهذا الاسم
يذكرني بغيث
اخذت نفس وزفرته همه ب الهول واسمعهم شنو يكولون سمعت صوت ابوي وهو يكلهم
_بشائر تكعد وتسكت ماكو جامعه
رافت_ليش مو الولد كلهم كملو جامعه والبنات كلهن جاي يدرسن ليش بشائر تكعد
غسلت ايدي وطلعت يمهم الضحكه مرسومه على وجه مرت ابوي وعيوني مليانات دموع
شكد ضعيفه اني لدرجه ماكدرت افتح حلكي واناقشهم
كالت سديم الي عيونها حمر وجها مكلوب لونه كاعده يم بيبي ولازمه ايدها
_بشائر السنه مانفوتها نداوم اني هم اريد اخلص من السادس تعبت نفسيتي وانتي تردين تتخرجين علمود تشتغلين جدو تجيبلنه نقل من بغداد نداوم هنا ؟
صلاح_سديم الظاهر ماسمعتي شكلت
_ليش انت منو وتحكم علينه تدري احنه وين واصلين ب الدراسة تدري امي جانت حامل زين هم تدري بامي توفت تدري شنو جنه ناكل تدري بيش الساعه نطلع من البيت وبيش الساعه نرجع منو انت يكولون ابوي الي عمري ماشفته كاعد على سفره وحده ويانه يا ابووي
شفت ابوي طفر من مكانه جر سديم من شعرها حيل
شكد عشنه وياه وشكد ضربنه من احنه صغار بس من كبرنه صرنه نفهم كلشي ومانحجي وياه هسه سديم راح تاخذ مثل الكتله الي جانت تاخذها وهيه صغيره
سديم تصرخ جوا ايده واني لازمه ايده اتوسل بي يعوفها
عمامي لازمينه بس ماكدور يخلصون سديم منه لازمها من شعرها مثل الحيوان وشبعها راشديات ودفر عضيت ايده بكل قوتي واريده يفك منها
بعد عنها والبيت مله من صريخ بيبي وسديم
جلب بشعري من ورا حجابي
شفت بعيونه الحقد والغل
شفت نظراته مو نظرات اب البنته
شفت نظرات الي جنت اشوف من اني صغيره كل ماسويت غلط
جابني براشدي حسيت بحرارة خدي واذني صوت صفير جابني براشدي ثاني من خدي وعمو رافد لازمه يدفع بي يريد يوخره بس كل مايسحب عمو رافد بايده سحب شعري وياه تشوغ روحي حجيت واني اتوسل
_عوفني يابه الله يخليك
_كلللبه مو صووجكم صوووج الي انطاكمم وجه انتن مو وجه نعمةةةة روحن عيشنن ع الفكررر يم خااالج
سحبني عمو رافد من ايده واني خاتله بظهره ومجلبه بقميصه ودموعي تحركني شكد حسيت ب الذل واهانه وضياع كل الواكفين يباعلنه بيبي الي ماسكتت ابد وهيه تغلط على ابوي التفت عمو رافد وهو يكلي
_بنيتي روحو لغرفتكم وقفلوها عليكم
سحب ابوي من ياخه قميصه وطلع بي
مشيت واني منزله راسي للغرفه لكيت سديم تبجي وايدها ترجف والثاني مضمده خدودها حمر واثر الاصابع بي
فزت من شافتني يمها كالت وهيه تتوسل
_لاتخلينه يضربني بشائر اتاذه والله مو من جنت صغيره اكلكم لاتخلونه يضربتي بشائر خدودي يحركني وخاصرتي توجعني اخاف بعد ماطلع يمهم هم راح يرجع يضربنه وهاي مرته تضحك علينه تضحك لان ماعدنه سند الله يشلهم انشالله
انشالله تموت ابشع موته انشالله مايشوفون الراحه
اسمع دعاويها عليهم وبكلبي اكول وين وصلنه لبنت تدعي على ابوها ومرته اكو ابشع من هيج شي
لزمت التلفون واني اناشغ مثل الطفلة تريد امها
جنت ضايعه واريد احد يحضني يكلي اني يمج محد يضربج ماعوفج
خابرت على غيث بس فتح خط كال
_الو بشورة يروحي
ماكدرت احجي غير صوت مناشغي واضح
_شبيج بشائر منو وياج عليمن البجي بس كليلي انتي وين والقران كلبي راح يطك
سديت الخط بوجها ليش خابرته اني ليش هوا ب الضبط
ضل يتصل هواي غلقت الجهاز وسديم تكول
_بعد لاتخابريه اعرف شكد محتاجته بس لاتخابريه بشائر لاتخلينه يشوفج وانتي ضعيفه دائما صيري كدامه القوية هيج هوا يستقوي عليج
كلت بحروف متقطعه وحنجرتي متجرحه من الصريخ
_سديم سكتي ماريد اسمع شي دايخه اريد انام
بس حطيت راسي على المخده غفيت من التعب والبجي والمناشغ والتفكير الي اخذ نص حيلي
سديم..
الانسان شكد ضعيف من تكون عائلته ضده
بلا ام وبلا احترام وبلا اب وان كانو موجودين فهمه ضده
يكون بقمه ضياعه وضعفه لان محد يقوي
عرفت الاهل عزوة الاهل سند الاهل قوة
شلون اواجه الدنيا بلا اهل
رفعت ماي وغسلت بي وجهي الورم موتني عبالك حطيت تيزاب على وجهي
عظامي الي توجعني من الضرب الاخذته
فتحت القراصه من شعري وماكدرت ارتبه بيد وحده اخذتها البيبي لكيتها تصلي صلاة المغرب
طلعت من يمها وكوثر زوجت عمو رافد وميساء زوجت عمو رافت ب المطبخ يطبخن ميساء تباوعلي بنظرات عطف
بدون ماكلها شي صاحتلي
_تعالي بنيتي الم شعرج
انطيتها القراصه وكعدت يمها لان جانت تلف دولمه كامت غسلت ايدها
ولفت شعري وحطت القراصه وهيه تكلي
_بعد لاتكصين شعرج حرامات هيج مخربته
اريد احاجيها ودخل تميم وهوا يكل الامه
_يمةة خوما عندج نقص استعجلي اصدقائي راح يجون
_اي يمه كلشي كامل
_جا يمه هاي الدولمه توا تسويها وين كلشي كامل
_لا وليدي هاي مو الكم سويتكلم محشي وكبه ودجاج هاي اريدها الباجر
هز راسه التفت عليه ضل صافن بوجهي درت وجهي منه حقه يصفن اذا وجهي صاير خريطه من يم عيني زراك
كال وهوا متفاجا
_هاي شبي وجهج
الغصه وكفت بلعومي ماكدرت اجاوبه عفتهم وطلعت سمعت امه تكله
_ماغير ابوها كتلها لسانها شطول هل بت ماتسكت عن حقها كوية لان كلهن هيه وخواتها ماكو دراسه شسوت مو هذيج اختها الاكبر منها ماعارضت شبيها هاي مدت اللسان مترين
تميم _احسن يمه هوا ابوهن هم بشر اليوم اجاني للمعمل والله تفشلت اكول هذا عمي اخذته وطلعت بحجه نتسوك للبيت بس اريد اخلص وكل شوية وحجه على ابوي ويهدد بي على ياساعه اقتل صلاح انا ماتحمل هيج تمسلت
ميساء_صلي على محمد وليدي شتكتله مو عمك
رحت للغرفه وكلبي نعصر من السمعته
كل كلمة تكسر شي داخلي وتقويني
حقهم مايردون ابوي حقهم يخجلون منه ناس الهم سمعتهم واحترامهم يجي ابوي وسطهم شكد كلام تميم صحيح بس حز بخاطري حيل حسيتني شكد ثكيله على بيت جدو والقهرني اكثر كلام امه الي مدري بيا نظره تباوعلي
رحت لبيبي اريد اخذ منها طاقه ارتاح من اسمع صوتها
كعدت يمها وهيه تقرا قران بصوت هادئ
لميت رجليه على صدري وسندت راسي على الحايط غمضت عيوني اتأمل الكلمات الي تكولها
فتحت عيوني وهيه بعدهي تقرا قران تمددت وايدي جوا راسي حسيت ب النعاس من سمعت صوتها الهادى وكلمات القران الي بثت الراحه بيه بعد حرب جبيرة بداخلي
ماعرف شكد مره وقت صدقت وهيه تكول
_ها تميم شعندك مكابلني وكاعد
_ههههه خديو خاف ماترديني
سمعت حسرتها وهيه تكله
_جيب غطا من فوك البوفيه لهل مكروده غطيها
_شوية وحسيت غطا نحط عليه وهوا يكلها
_بيبي خليها بالج ماكو يوم راح نرتاح ماطول صلاح يمنه
_ادري يمه ادري راح يرجع يشبعنه ضيم مثل ماسوا قبل وهلمره هل بنات وياه مايرتاحن ويشلع كلبهن
تميم عندي حجي وياك بس مو هسه من تفرغ تعالي
_والله ياخديو حجيج يخوف كولي هسه ترا فارغ
_لا غير مره يمته تداوم
_باجر خلصت اجازتي بعد
_يمة ديربالك بعد كلبي والله اخافن عليك من اولاد الحرام من ومن التهديدات التوصلك
_خيولون بيبي مايخوفون جلبي شيردون يسون مثلا
_ميخالف هم ديربالك
طلع من يمها ورا ماباس ايدها وراسها اباوعلهم من جوا الغطا
كلت بصوت مبحوح
_اقريلي قران
_عبالي نايمة
_صوتج حلو يبث الراحه
_كومي توضي وتعالي صلي
_وايدي
_ميخالف بنيتي تعالي اقري قران
_تعبانه كل جسمي نحلان
_وهذا دواج يلا كومي
_بس بيبي مايصير ايدي شلون اتوضه وهيه مضمده
_ميخالف نيتج اهم شي
كمت وسويت مثل ماكالت لزمت القران وندمجت اقرا صبو عشه واجت ميساء تريدنه نتعشه بيبي مرات ماتتعشه واني كتلها ماريد نفسيتي مسدوده ماريد اشوف احد ولا اريد اشوف ابوي
رفعت راسي حسيت عيوني غوشن صدقت ورجعت القران المكانه ضليت صافنه على بيبي النايمه
يومين من عرفتها دخلت كلبي حيل
حسيت ارتاحيت واني اقرا قران كمت من يمها
شفت شمس تكنس ب الهول خجلت اطلب منها ملابس دشداشتي متمتزقه من الكتف
_شمس
_ها عيني شلون صرتي لو جايه متعشية ويانه
_ ما اشتهي اريد دشداشة سودة اذا عندج علما اشتري
_دللي امشي نصعد فوك شوفي منو تصيرلج
ذبت المكانسه ورحت وراها صعدنه للطابق الثاني بس غرف دخلت بوحده من الغرف اباوعلها مندهشه بجمالها كلشي بيها ابيض ورفوف بيهن كتب وطاولة صغيره وسريرين وكنتور
اخذت كرسي وصعدت عليه نزلت جنطه مال سفر من فوك الكنتور
_سديم انا هنا ضامه ملابسي السود لان مالبسهن بس بمحرم تعالي اخذيلج منهن
_طلعيلي اي شي عفيه مو اله شي حلو المهم لبس
طلعتلي دشداشة كلتلي راح اطلع من الغرفه بدلي
نزعت ملابسي وانتبهت على الاثر الي صاير بزري اثر ازرك
تحسرت وبداخلي اكول انشالله كسر ب الايد الي نمدت علي لبست الدشداشة واجت قياسي لان شمس مثلي ضعيفه بس جمالها يفوق جمالي شعرها الطويل وطولها هيه ناطيها جاذبيه
فتحت الباب وهيه واكفه بس شافتني ابتسمت
_تخبل عليج
_شكرا الج هواي
_ماكو شكر اعتبريني مثل بشائر
_صدك وين بشائر ماشفتها
_نامت من وكت وهم ماتعشت ولا نرجس اكلت نامن
_ها اساعدج بشي
_لا حبيبتي خلصت ماكو شي اذا تحبين تعالي يمي باي وقت وشنو بالج كليلي لاتستحين
_شكرا ماتقصرين
بستها من خدها وشكرتها
جاي انزل وسمعت صوت رمي كلش قوي بحيث شبابيك الفوك كلهن تكسرن ويخترقهن الرصاص
حطت ايدي على اذني واصرخ بعلو صوتي حسيت هاي نهايتي خلص هاي اللحظات الي اموت بيها
مغمضه عيوني حيل واصرخ والبيت نمله صوت صريخ ماحسيت على نفسي من اغمى عليه
حسيت على صوت قران يمي
مثل الصوت بيبي
فتحت عيوني بتعت
ايدي بيها كانونه ومغذي معلكيه نايمة على فراش بيبي وايد بيبي تمسد على راسي
كلت بكلمه كوه طلعت
_بيبي شصار
فزت وهيه تشوفني كعدت
_يمة سودة عليه من نعمت عيني عليجن
_اسم الله عليج ليش تحجين هيج
_جا اليوم كل شوية تاخذين هبطه شسوين فوك بيتي الجوا محد كدر يرمي عليه بس على الفوك وبس انتي وشمس فوك همزين لا صارلجن شي
_شمس صارلها شي ؟
_حالها مو احسن من حالج بس تبجي من الصدمه
_حسيتني حيل قريبه من الموت مامتعودة على هيج اجواء
_كله من ورا تميم الف مره اكله ولك عوف ولد الحرام هواي وياذوك ولك عوفهم
_بيبي احد تاذه ب الصار
هزت راسها بلا
_منو سوالي الكانونه
_عباس
_يعرف؟
_اي جا غير مخلص تمريض مدري شيسمونه مدري تحليل اكلي انتي ضاله عصه مال مطيرجي ولج يمه اكلي صاير عندج هبوط وفقر دم
_بيبي شبي تميم ويه هذول الي رمو على البيت
_يمه من ورا ابيج المصون جا غير مرافج ولد الحرام ويطلبون فلوس من عدنه على اساس يطلبون ابوج فلوس واحنه بعد اهله ويوميه وصايره مشكله تميم مايسكت مو نفس عمامج الغمان
_بيبي ابوي من يوم طلع من السجن يمته لحك يسوي كل هاي المشاكل هسه ماعرفتج تذمين لو تمدحين بتميم وعمامي
_يمة سالفه ابيج طويله ورادلها واحد اله خلك
_بيبي عفية شبعي فضولي
_من جان بغداد الديانه تجي علينه احنه ومشاكله براسنه شربه وعربدته طايحه علينه عمامج جابو هنا علمود يكضونه بلكي يستجن
هزيت راسي ب اي بيبي حطت مخده ونامت لحظات حسيت الصار مثل الحلم
دقايق وحسيت على شخير بيبي
حاولت افتح الكانونه رغم ممخلص المغذي بس ماكدرت افتحها بايد وحده والثانيه محتركه ماسيطر بيها
نفتح الباب ودخل تميم عيونه حمر حيل شعره مهوس ماجه بالي غير معقولة تميم يشرب مثل ابوي بس هسه شكله صاحي باوع البيبي ردت احجي حط اصبعه على حلكه بمعنى اش حجيت بصوت ناصي
_افتحلي الكانونه
تقرب فتحها الي بطريقه سريعه خلت ايدي تصب دم ووجعها يدك بكلبي باوعلي وهوا يخزر ويحجي بتهديد