ليس دائما حياتنا تمثل داخلنا
التردد في كل تقدم
يدل على ضعفي
الهروب من واقعي
يدل على قوة صبري
انا بين تناقض يقتلني بين حين وحين
اجد نفسي في هدوء
في حين اعود اليها مبعثره
اتخبط بين دهاليز يكاد ان يحرقتني
ماضي عصيب
وحاضر مؤلم
°°°°°°°°°°°°°°°°°°°°°
شعور مؤلم ماكدر اوصفه ابد
احس تعب بكل جسمي كل وقتي اقرا شاردة من كلشي يصير
بنفس الوقت اريد شوية وقت ارتاح بي بنفسي
ماريد افكر بشي واريد افكر
نفضت كل هاي الافكار من راسي
كملت دراسة سديت الكتاب وجريت نفس رفعت عيوني للساعه ب ٣ الفجر
من العصر ادرس وماحاسه على نفسي
طلعت برا احسني مخنوكه وين اروح
كعدت ب الطرمه والجو بارد حيل
كرفصت على نفسي وحضنت رجليه لصدري
غمضت عيوني وانا اخذ نفس اريده يملي ريتي
_ياربي هونها تعبت
كلتها بصوت مبحوح
رجعت نمت وانا اكول شيصير خلي يصير بعد مايهمني شي غير نفسي
كعدت ومثل كل يوم عبالي اخلص يومي بتعب
بس ماجنت اعرف القدر شضاملي
ماجنت اعرف التعب الجنت بي اهون من الف تعب راح يواجهني
ماكدرت اتخطى هذا اليوم ولحد هسه غصته بكلبي
رجعت من المدرسه بعد مادكيت الباب حيل ومافتحو
استغربت ليش محد
بشائر ب الكليه ونرجس ب المدرسه بس مو مثل مدرستي
ضليت ادك هواي وبصوت عالي حتى جيرانه طلعت على الصوت
_بنيتي صاير شي
خجلت من الموقف هاي اكيد زعجتها وطلعت
_لا خالة بس محد يفتحه
_مادري الله يهديهم الصبح سمعت اصوات عاليه من بيتكم
باوعلتها بخوف وهيه دخلت
الباب مقفول مو من السركي مبين احد قافله بمفتاح لان من اهزه مايتحرك مثل من ينقفل ب السركي
دكيت لحد ما ايست كل اليمر يباوعلي باستغراب
الخوف سكن كل جزء بيه شنو وشصاير
ليش محد ب البيت
رحت لجيرانه كتلها اريد اخابر اختي من تلفونج
خابرتها اسئلها اذا عندها نسخه من المفتاح كالت راح اوصل
حطيت جنطتي يم الباب افرك ايد بايد من البرد
ومالابسه غير القميص والصدرية ماعندي حتى قمصلة
اجت بشائر ونرجس وجانت صدمتهن مثلي ليش محد موجود امي بهل وقت ب الذات موجوده وابوي مايطلع من البيت
دخلنه من باب المطبخ واحنه نصيح يمه
شفت قطرات دم ب المطبخ
دك كلبي بسرعه وعلت انفاسي وانا اباوع الخواتي مستغرابات مثلي
ركضنه كلنه للاستقبال
شفت الشي العمري ماحاسبتله حساب
امي مدده والدم ماعرف منين ينزل بصف الدرج مدده
بشائر الي بتعدت ودموعها تنزل وعيونها مفتوحه بصدمه
نرجس الحطت ايدها على حلكها وهيه تكتم شهكتها
باوعتلي وهيه تردد بهل كلمات
_امي ماميته مو
هزيت راسي بلا
تقدمت عليها وانا حالتي ازيد من حالتها
الرجفه الملت جسمي
لزمت ايديها ومسحت الدم من وجها
حطيت راسها على رجليه
بجيت بهستيرية وانا اهز بيها بعد ما ايست انو ارجع اشوفها مره لخ
_كومي اشتغل وماعلي صوتج وماخلي احد يحجي عليج كومي لاتكسرين ظهرنه عفتينه عند واحد سكير مايتسمة اب كومي يمة عفيه جوعانه سويلنه شي ناكله كومي وانا ادفع ايجار البيت يمة لاتكسرينه بيج اروحلج فدوة ماعشنه مدللين ماناقصين كسران
اهز بيها مثل المخبلة وصوت صريخ البنات مله البيت
رفعت ايدها واشوف بيها زراك مثل البقع زرك
لزمت وجهه بثنين اديه واحاجيها دموعي تنزل على وجها وانا اشوفها ماتتنفس لحظات مثل الحلم واحتمال باحلامي ماشايفه هيج شي
اختنكت وانا كوة اجر نفسي مددت بصفها وانا افرك بركبتي اريد هوا باوعت البشائر واردفت بصوت مكسور
_بشائر ليش ماخذتنه ليش هيه راح ترتاح واحنه هنا نشبع مذله واهاين وجوع وبرد وحر وقهر ليش بشائر
صرخت بكل قوتي وانا اشوف خالاتي طبن يصرخن وياهن جيرانه منين عرفن منو كلهن
لفن امي بطانيه وطلعوها
اجر بيهن اريدها واردد لاتاخذوها ماميته
هل مره وحدنه مثل كل مره
سندت راسي على الحايط وانا اباوع الخالي كاعد ومدنك راسه اعرف شكد جانو يضوجون منها ومن تصرفاتها اعرف شكد مايحبوها تعبتنه وتعبتهم حيل
دموعي جفن بعيني وبس صافنه جيرانه وهنه يهدن بنرجس وبشائر الي موتن روحهن من البجي
كلمات نرجس خلت كلبي يحترك وينطفي
_بعدج و وياج ماكو راحه رحتي وحتى اخونه ماشفنا كولي جذب كولو كلشي جاي يصير جذب
بجيت حيل وبحركه نمل كل جسمي مثل الخدرانه احاول اقاوم الخدر اليسري بجسمي بي ماكدر
ماكدر اكوم ولا اكدر اسند نفسي ولا اكدر امسح دمعتي
احد اخذني بحضنه شميت ريحتها هاي زهراء
ماحركت اي شي بجسمي بس دموعي تصب
لزمت ايدي وهيه تحاول تحركني
_شبيج سديم
كلت بصوت مبحوح من الصريخ
_متشنجه ماكدر اتحرك
كومتني وهيه تمشيني للمغسلة غسلت ايدي الكلهن دم وهيه تضغط على ايدي ودموعها ماتوكف
اخذتني بحضنها وانا بس ابجي ماكدر اسوي شي
كل الي موجودين يسئلون وين ابوجن شنو الصار شلون ماتت خطيه بناتها صغار بعدهي صغيره
كل هذا اسمعه وانا ماكدر اسوي اي درة فعل
دخلن خالتي بعد ماخذنها وهنه منهارات
كلشي مافكرت بس اكو كلمة نحفرت بكلبي قبل عقلي
_سودة عليه اسراء التراب تغطي هاي الترفه شلون ياربي
صوت مره وهيه تجاوبها هذا يومها لا اعتراض على حكمه ربج
اتجهه خالي عليه وكومني من يم زهراء اخذني للغرفه وجهه احمر يحجي بغضب منصي صوته
_وين العار ابوج
رفعت اكتافي بمعنى مادري
ضل يدك على راسه وهوا يصيح
_شلون شلون راح اتخبل اختي ميته قتل تفهمين شنو قتل اختي ماطايحه من الدرج مثل ميكولون بسبب ابوج لو الزمه اله اطلع مراره السنين بي
كعدت وانا صافنه ب الفراغ اغمض عيوني وافتحهن واكول راح يرجع كلشي طبيعي
طلع وهوا يخابر يكلهم جاي وراكم للنجف
اهز راسي بلا هسه يطلع حلم هسه اكعد ضليت اضرب بنفسي وانا ارجف وكانو توا استوعبت ابوي قتل امي ماكو براسي غير كلمات شنو من لوعه عشتيها شلون موتج شلون راح تصيرين جوا التراب فقدت وانا اصرخ واضرب بنفسي ماعرف منو لزمني وهيه تكلي اهدي هاي حكمت ربج ترحميلها تتاذه من سوين هيج
حجيت بقهر وجنت ماعرف شحجي اريد هاي النار الداخلي تطفه
_لاتكولين حكمه ربج لاتكولين الله يرحمها امي ماماتت حتى تترحمين عليها
سديت الدفتر الي سحبني لبيعد بذكرياته
لكيت دموعي وحدها تنزل
اباوع الايدي ترجف
هاي الغصه البداخلي شوكت تروح
ناري شوكت تنطفي
حطيت راسي على القنفه وغمضت عيوني
بلعت ريكي وغصتي وانا شكل امي يرسم بالي كل هاي السنين كل ماغمض
اردد بداخلي سديم انتي اليوم احسن
سديم راح تعيشين وانتي ناسية
الهدوء الي يعم المكان اخذني لبقية حياتي
سديم..
دنكت اخذ جنطة الملابس وجنطه الكتب
بس جسد بلا روح هيج امشي
طلعت والمفتاح بيدي
حطيته بيد خالي
رايحه لمستقبل ماعرف شنو مصيري
باوعت بعيونه وكانو عيون امي
اردفت وانا بعدني مصرة على قراري
_خالو نعيش هنا احسن
_مايصير وحدكم
_كبرنه احنه نكدر ندبر نفسنه والله ماريد نثقل عليك والايجار نكدر نشتغل ونسده
هز راسه بلا وسحب الجنطه من ايدي وصعدها ب السياره اشرلي اصعد
حطيت راسي على الجامه وانا انتفس بهدوء
بس غمضت عيوني اجه بالي صورتها
ابوي الي اختفه فجأة
فاتحة امي الي سووها بيت جدي وماحضرنه
ابو الايجار الي طردنه من البيت وخالو دفع ايجار الاشهر الفاتت
نفسيتنه التعبت ماكول ضلينه بلا سند
رغم كلشي امي جانت بظهرنه محد يكدر يطردنه
كلهن التمن فد مره
شلون راح نعيش من جديد
التفت على بشائر صافنه مثلي الهدوء يغطي المكان بس صوت السيارة
وصلنه لبيت خالي الي اول مره اجي هنا
نزلت وبداخلي تردد شلون راح اواجهه كلشي
هدوء خالي الي يخليني بقلق وتفكير وهوا ماحجه اي شي
لزمت ايد بشائر وامشي وياها
دخلنه بيت مرتب اول مره اجي الهم
محد ب البيت دخلنه خالي لغرفه مابيها شي بس كنتور ومفروشة
كال هنا رتبو غراضكم وارتاحو
نزعت حجابي وكعدت صافنه
شوية واسمع صياح عالي وهيه تكول
_سويتها يا علي سويتها مووو والله مالي كعده هنا طول ما هنه هنا نسيتت اسراء شلون هجمت بيتي
بلعت ريكي بخوف وانا اباوع للبنات
منو هاي وليش تصرخ امي شنو سوت
كل هاي الاسئلة تتردد بالي
صوت خالي وهوا يهدد بيها
_رووحي ماتهميني لا عبالج بصوتج العالي راح تربحين والله يا سناء ادوس راسج واشوف كلب الي يطلع وراج
الاصوات صارت بعيده واحنه بس صافنين سناء سامعه بيها من قبل مرت خالي امي جانت تحجي عليها
ضلينه هواي كاعدين ومانطقنه باي كلمه
كلنه بداخلنه قصة شكل
كسر حاجز الصمت بشائر وهيه تكول والضحكه مرسومه على وجها
_صفينه هسه لا ام ولا اب صفينه بس بنات وسط ناس ماشايفيهم شرايج سديم
بلعت ريكي بخوف حسيت بشائر مو بعقلها شنو مناسبه هذا الكلام قابل احنه ناسين الصار بينه
_شتفكرين بشائر هسه فرحانه انتي ب الصار
_لا مافرحانه هسه مرة خالج تطردنه ونصفه ب الشارع بس جاي اضحك على الحالة الي وصلنه الها الشارع فد مره
كمت من يمها وافكار متشوشة
غسلت وجهي التفت اشوف مرة خالي وايدها على خصرها والايد الثانيه تهز بيها
كالت بحديه وهيه تباوعلي
_شوو باعيلي لا عبالج تجين بكل اريحيه تكعدين بيتي سنين وامج مشوفتني المر لا عبالج اخليجن مرتاحات هنا اكيد انتن مثل ..... امج الاحسن الج منين ماجيتي رجعي هنا كعده مالجن فهمتي لو لا عندج عمام روحيلهم ابوج ماطالع من فطر الكاع مو شمروجن على كلبي
فتحت عيوني متفاجاة من طريقه كلامها
معقولة لهل درجه الانسان ماعنده حياء ومستحه
شكد حسيت ب الذل بهاي اللحظه حسيت كعدتي ب الشارع مثل ماكالت بشائر اهون من هيج كعده
سديت المغسلة ونشفت وجهي وانا احجي داخلي يحترك نار بس مابين الها
_شكد ما اني تعبانه بكد مراح اغلس عليج
جريت عيني منها وهيه تدردم بصوت ناصي
دخلت وسديت الغرفه كعدت وانا ارجف من العصبيه
_اله اكتله ابوج اله اكتله عافنه ب الشارع عافنه عند ناس مانعرفها تدرن شنو الحقد البداخلي
احجي وارجف مثل العميه ماريد اشوف حقيقة شي خلت بالي فكره عمام خلت بالي ابوجن ماطالع من فطر الكاع
_سكتي سديم الله يخليج احنه ماناقصين لاتضلين تهوبزين بكيفج اكو واحد يكتل مرته كل غايب عذره وياه واكيد ابوي عنده عذر
صرخت بوجها وانا اكلها
_انتي من كل عقلج لا وبعدج تكولين ابوي ليش هيج واحد يسمه اب روحي يم ابوج خل ياخذج لحضنه يطبطب عليج بنيتي انا يمج بنيتي ماتركج بنيتي الصار قضاء وقدر اني مالي علاقه بشي روحي خل يضحك عليج بهذن الكلمات ولجن هاي سناء ذبت سمها عليه وولت ولت روحي انشالله وخلصت من هل عيشه
نرجس_انتي ابقي تذمري على عيشتج كلنه ندري الصار مو بسبب ابونه ومثل ماكالت بشائر كل غايب عذره وياه
اباوعلهن واني خازرتهن ودمي محترك من ورا السمعته حسيتني اريد اطلع حركت كلبي بشي
_اي ابقن هيج ابقن قنعن روحجن ب الصار قضاء وقدر امشن ولن من يمي
صاحت سناء علينه وهيه تدك ب الباب فتحت الباب الها لان جنت قافلته
_خير بعدجن ماحطيتن رجلجن ب البيت صرتن تتختلن
_خالة روحي والعباس روحنه طالعه تردين شي ولاتخافين مامطولين يمج نولي
_اي ماطول هيج خلنه نتفق لا انتن حاباتني ولا انا حابه وجودكم
نرجس_شبيج وهو احنه وين شفناج حتى ماحابيج من دخلنه لسه تصرخين
_لسانج بنت اسراء مو بكد الذبانه ولسانج مامكدروله ولو امج منو
هنا مثل التحملت تحملت انوب انفجرت مره الثانيه تجيب طاري امي واحنه ساكتيلها
_هيوو لهنا وكافي لا عبالج انتي ست البيت وكل الكل ترا لا انتي ولا عشرة مثلك تجيبين طاري امي واسكتلجن لا تكعدين تستشرفين براسي وانتي انكس خلق الله
هيه واكفه يم الباب دفعتها ورجعت قفلت الباب
بشائر فاتحه عيونها من الصدمه وسناء تلعلع برا
_ولج شلون شلون بيج اني الجبيره ماحجي مثلج سديم لسانج راح ينيمنه ب الشارع خلينه ساترين على نفسنه
حاولت تلزم ايدي الترجف دفعتها واخذت حجابي وشلت الجنط والملابس اريد اطلع باوعتلهن وكل التعب بيه
صرت انسانه ثانيه متهجمه ابسط كلمه تاثر عليه وتخليني افقد اعصابي
بشائر ضلت تدك على خدودها وهيه تهديني
_ولج سديم ولج وين نروح وين كليلي ماعدنه احد غير هل خال تعرفين احد هنا تعرفين احد ب المنطقه الجنه عايشين بيها
هزيت راسي بلا
_انام ب الشارع ولا عيشة الذل احد يكومنه بهيج امج ويكعدنه بهيج ابوج تردين تتحملين هل ضيم ضلي ماجبرج ترحين وياي
لازمه ايدي ونرجس جرت الجنط وهيه تبجي
نرجس_عفيه لاتسويها سديم حتى ابوي ماعرف وينه منو يتحملنه خلينه نتحمل سناء ونسكت الها خليها تذب سمها وتروح واحنه نغلس على شنو نحرك بروحنه خلي نعيش دور اخرس واطرش والله نرتاح منها
باوعلتها وداخلي رافضه كلشي يصير بين ادوس على كلبي وكرامتي ونكعد هنا بين اطلع لشارع مابي ناس ترحم
تصويت♡