#ظفر_الجوى
للكاتبة _ زهراء امجد
#البارت_الثامن_عشر
يوزري الانستكرام
Zz__127_
لتنسون تصويت للبارت + متابعه حسابي واتباد
أنتِ تزدادين جمالاً كُلما مشيتي خطوة للأمام أو خطوة للخلف
"وأنتِ كثيرة التَجول"
يزاد جمالكِ مع كُل حرف تتفوهين به
"وأنتِ ثرثارة"
ما اشوف اله آزر فوك راسي صاير كتله
من الاعصاب ،
حجة بصوت ناصي بس مبينه العصبية بصوته خمس دقايق والكاج يمي فوك ،
_ اوك بسرعه راح نداريت على سهى ،
اني رايحه ،،،،
سهى _ اي غير يصرف عليج رادج ،
سنرررر _ شنوو !!!!!!
سهى _ لا هيج ،
عفتها ورحت ماريد ادوخ نفسي بيها وصلت
لغرفة آزر جان يمة استاذ دكيت الباب ،
آزر _ تفضلي كعدي
_ بس كلامه بهدوء عكس قبل شويه يمكن لان
الاستاذ موجود كملو كلامهم وطلع هو راح سد
الباب ورجع كعد على الميز ورجعت عيون
تجدح من العصبيه ،
_ شوكت يصير عندج تفكير !!؟
_ ليش شكو شسويت !؟
_ الموبايل اهلج ليش انطوجياه تعوفينه صامت ليش !؟
_ نسيت ما فتحته طلعته من الجنطه وفتحته ورجعته ،
آزر _ من تستلمينه فتحيه ،
_ بس اني اسلم الجنطه وبطنها الموبايل مغلق اعوفه ونسيت ما فتحته من طلعت ، آزر حجيتها بدلع هسه انت عصبي علمود موبايل مو هاي
العصبية تكبرك وحتى شيب يطلع براسك ،
آزر _ لا مو علمود هاي وصلني كلام خبلني
واتصلت عليج مغلق ،
_ بأستفهام شنو هذا الكلام !؟
آزر _ هيج يولي مو يمج ادري بيه جذب بس ردت اخابرج واحذرج ،
_ هاا يعني هسه راحت عصبيتك !؟
آزر _ كلشي يروح من اباوع بعيونج الحلوه ،
_ هلو تغير المزاج وصرت تتغزل ،
آزر _ داخل الجامعة مزاجي متقلب وشخصية
كذلك يم طلاب تلكين شخصيتي تختلف من
اسلوب واستخدام مفردات عن شخصيتي الي
ويا زملائي الدكاتره كل مكان يتطلب شخصيه
شكل ،
_ زين ويايه !؟
آزر _ لا وياج على الطبيعه ،
_ يعني ساعه عصبي وساعه هادئ ،
آزر _ لا اغلب الاوقات هادئ بس لان هنا بالجامعه عصبي شويه من تصرفاتج الغير مدروسه عندي بالجامعه لازم كل تصرف تسوينه تحسبين اله الف حساب لان هنا غلطة شاطر بالف وانتي متعرفين
منو الي يباوع عليج من طلاب ومنو يتمنالج الخير ومنو لا حتى من غير اقسام يسئلون ويعرفون كلشي عن اي شخص يخلونه بالهم مو شرط اذيته لا يجوز يعجبهم فعلا ويردون يدرسون اخلاقه اني ماريد
احد يجيب طاريج بالموزين فهاي آخر مره اكلج سهى اتركيها ،
_ بس اني لا مشيت وياها ولا شي جنت كاعده واجتي كعدت يمي ،
آزر _ اي عوفيها اي مكان تتواجد بيه طلعي انتي
منه اني اعرف شي انتي متعرفينه ،
_ ماشي ،
آزر _ نسيت اسئلج شلونج اليوم ،
_ من بعد هذا الحجي هسه سئلت حتى نسيت
شلون اجاوبة ضحك ،
آزر _ غير بنتي الصغيره واعلمج ،
_ شنو هاي بنتك ،
آزر _ يله حبيبتي وزوجتي وام بنتي ولا يهمج ،
_ صدك بنتك صار عمرها اكثر من سنه شو ما
كتلي سويتلها عيد ميلاد لا ،
_ اول شي كلمة بنتك ماريد اسمعها لو دكولين بنتنا لو دكولين جمانه باسمها ،
_ لا بنتنا احلى ،
_ ثاني شي محد سوالها بس رحت اخذتلها صوره ،
_ ليش ،
_ كل واحد ملتهي بحياته ،
_ وانت بشنو ملتهي !؟
_ جان عندي دوام وارجع تعبان وبس بالليل عندي وقت واكعد يم اخوج وراها باسبوع جانت دورة سنه مال امها ورحنه للزياره ،
_ جان عفت محمد يوم واحد وسويتلها حفله
بسيطه على العموم آخر يوم امتحاناتي نطلع
نسويلها حفله ،
_ هاي هيه ….
خلصت الامتحانات على خير جنت اروح ويا البنات ومروان واحمد وارجع ويا آزر آخر يوم اتفقنه نطلع نسويلها حفله كلت امي كالت مالي علاقه شوفي ابوج واخوانج بابا قبل ومحمد اصلا فرح كال عفيه اريدج ترفعين راسنه وتخلين بنيه تحبج طلعت اني وزينه شتريتلها بدله منفوشه ولعابات منا لليل اجه آزر وحده ،
_ هاي شنو وين جمانه ،
آزر _ راحت قبلنه ويا رتيل ورشا
_ صعدت ويا مندمجين بالاغاني ثنينه كل شويه يفتح اغنيه كاظم الساهر احبيني لو اغاني ماجد المهندس اخر شي اغنيته المفضله مال تامر حسني
ترى خبصتني بهاي اغنية ،
_ من صار موقف طرده وخليت ايدي على شفايفج ولهذا اليوم اسمع بيها ،
_ ترى خجلتني ،
_ جذابه ما تخجلين بس تبيعين ثكل عليه
_ اها هيج اني بسيطه ضحك ضحكة قويه
شكد حلوه ضحكتك ،
_ تفداج الضحكه وصاحبها ،
_ اسم الله عليك ،
_ مادري شوكت اسمع كلمة احبك منج ،
_ هاي الكلمة تنحس مو تنحجي معقوله ماتدري
بيه احبك لو لا !؟
_ ادري بس اريد اسمعها منج ،
_ من يجي وقتها ، وصلنه محل الالعاب ،
_ ما اشتريت شي لجمانه وماعرف شنو اجيبلها تعالي اختاري ويايه ،
_ نزلنه اني جبتلها لعابات وملاعيب مطبخ شوف انت شنو تجيبلها ،
آزر _ بت الاوادم المن منزلج ويايه غير تختارين
انتي ،
_ اخذتلها كومة شغلات دببه ومكعبات وسياره
بناتيه بيها لعابه تشتغل دفع فلوسهن وصلنه الهم احتفلنه وياها وهي جانت هسه تمشي مو قويه وتركض منا ومنا بقيت صور بيها وهي بس تضحك
مروان _ سنر تحبين جهال !؟
_ اموت عليهم ابن محمد 24 ساعه عندي ،
مروان _ ان شاء الله تغلبون جدي وتخلفون
اكثر من درزن ،
_ ضحكنه عليه كتلهم يله نرجع تأخرت ،
آزر _شعندج !؟
_ والله تعبانه والظهر ما نمت ،
_ ماشي يله اوصلج رحنه اني وياه بالطريق خلصتي امتحانات ان شاء الله ،
_ اي الحمد الله
آزر _اي وشوكت تحنين ونعقد !؟
_ باوعتلة صفح بسم الله بعدني اليوم خلصت ،
آزر _ الج بس لنص سابع وراها نخطب ،
_ ان شاء الله من وصلت شفت محمد بالباب سلم على آزر واني دخلت جووه على السريع سبحت ونمت مادري بالدنيا منا لثاني يوم الساعه 12 الظهر كعدت علة صوت رواسي
رواسي _ من الصبح اني هناا وانتي نايمه ،
_ عود صباح النور ،
رواسي _ يله صباح الخير ،
_ شوكت اجيتي ،
رواسي _ قبل شويه اخويه جابني ،
_ هلا بيج كمت غسلت واخذت فواكهه وصعدت
يمها بقينه نسولف ونحش بالعشيره كلها ونلعب بالمكياج اني وياها نخلي ونمسح وناخذ صور ،
رواسي _ خلي اصمم اغنية للصور ،
_ اي وكعدت تصمم بعدين ذكرت صورة آزر
عجبتني رواسي صمميلي على هاي صورة ،
رواسي _ اكو اغنية بالج لو اني اشوف اغنية
_ اي اغنية هذا اللون عليك يجنن يشبه لون
عيونك ،
رواسي _ هلو عني من شوكت صرتي تسمعين اغاني شو قبل ولا تسمعين ،
_ بالصدفة سمعتها وبعدين يوميه من اروح للدوام يفتحون اغاني وكمت اسمع ،
رواسي _ اي خربو اخلاقج ،
_ صممي وانتي ساكته سوته ودزته اليه عجبني كلش رسلته لآزر ما شافها عفت موبايل ونزلنه
جووه منا لليل راحت رواسي اجه حسن هو
ومرته وجهاله كعدت اللعب وياهم وهذا مرتضى
يغار شلون اخليهم يلعبون ويايه
تقي _ هي هي بعد ما تريدك ويخليه يبجي
محمد _ تبقى طفل ما تكبر ليش تبجيه ،
بعدين صاح جهال حسن وهو عادي عنده اهم شي ابقي وحده يمي
محمد _ تعال ولك يمي
_ما ما ويشبكني يمه فدوه لوليدي
حسن _ ترى جدي مريض كلش ليش مترحون تشوفونه ،
تقي _ البارحه خلصنه امتحانات ،
_ اني كل ماروح يبقى بس ينعى ويبجي حتى
عيونه يبقن يوجعنه ،
حسن _ ميخالف بس سلمي عليه ،
_ ان شاء الله باجر ،
ثاني يوم رحت اني وزينه ومحمد ويانه حتى يرجعنه بسرعه وهم من يشوفنه يكول يوميه
احلم بمرتضى اكله اخذني يمك يكلي مو هسه
واني متعذب لان مو يمه وهو وحده هناك نقهرنه عليه كلش ،
من رجعت بقيت اليوم كله ضايجه عليه حتى آزر
من يوم حفلة عيد ميلاد بنته ما حاجيه وياه دزلي رساله بالليل ،
آزر _ شنو حبيبي شو ناسيتني
_ سولفت وياه شويه وعرف اني ضايجه ،
آزر _ هاي آخر مره تحجين ويايه رسائل لان كلشي مافتهم منج خربتي اللغه العربيه كلها ،
_ تحجي عليه موو روح بعد مااحجي وياك ،
آزر _ سويها وشوفي ،
_ والله اسويها ،
آزر _ اتحداج بالعباس حتى ثاني يوم اخليج
ابيتنه حتى عرس ما سويلج ،
_ اهاا هيج ،
آزر _ شو خفتي ،
_ لا ما خاف يله روح ،
آزر _ هو راح اروح بس مو لان انتي ردتي بس
احمد خبصني بالاتصالات اشوفه شيريد ،
_ اوك ،
آزر _ كم مره اكلج بعد لا دكولين اوك ،
_ يله تمام ...
رتيل _ كاعدين عند بيت جدي نسولف ونضحك انا ورشا وعبير ورفل ومرت حسام جمعتنه كلش حلووه وكل شويه مرت حسام دكول يارب ضحك خير يارب ضحك خير منا لحد ما نزل آزر يركض من فوك وقميصه يدكم بيه هو ويمشي رفل اول وحده شافته طفرت عليه ..
_ ها عمو صاير شي عافها وطلع يركض
احنه جنه كاعدين بالصاله المعزوله عن الاستقبال وصاله ثانيه جبيره
بقينه وحده تبارع بوجهه ثانيه ...
عبير _ يارب سترك ولطفك ان شاء الله ماكو شي
رشا بسرعه لزمت موبايلها واتصلت على احمد ماكو ميجاوب ..
احمد _ يمه بس لا هو بيه شي ..
كنالها اسم الله ليش تفاولين هيج
شويه واتصلت ام احمد على رشا
ام احمد _ عمة رشا احمد بالبيت !؟
رشا _ لا عمه بعده ما راجع ...
ام احمد _ شو اتصل على احمد ماكو ومروان
هم ماكو ..
رشا _ مروان هنا يجوز نام ..
ام احمد _ كعديه اليه
راحت رشا غرفة الاستقبال ورجعت _ ماكو مروان مو هناا ...
شويه ودخلو خوالي كلهم ..
خوالي _ شنو آزر كلكم يا مستشفى ...
بسرعه رشا لطمت على صدرها _ يمه احمد صار بيه شي !؟
ابو حسام _ لا ماكو شي جا آزر من طلع ما حجه شي ...
_ لا خوفتونه احجو ..
ايو حسام _ امي وين ..
رتيل _ نايمه ..
ايو حسام _ خوش عوفوها نايمه
رشا راحت لابوها _ عليك الله احجي شكو ترى تفكير كتلني ماحجه شي بس من شافت خالي
ابو احمد مدنك عرفنا احمد بيه شي
نزلت دموعنه لا ارديه ..
ابو حسام _ عليمن تتباجن بـ مكان ما تدعنله يكوم بسلامه تنوحن عليه
رفل راحت ابوها يعني عايش هو
_ اي عايش مابيه شي سبع هسه يرجع لبيته ونزوجه ونفرح بيه ...
شويه واجوي مجموعه ضباط للبيت بقو يحجون وياهم خوالي وبعدين طلعوا كلهم بس وصونه ممنوع اي طفل يطلع بره حتى انتن ..
بقينه احنه منا للصبح يله عرفنه اخباره وبعده بالعمليات وحال امه يكسر القلب كل شويه وكالت جبيري هذا سبعي وبيبي تحجي عليها دكلها اي موتيه بنعاويج كافي كومي ادعيله دعوه الام مستجابه
طلعو احمد من العمليات بس لحد ما طلعوا گلوبنا خلصت والبجي ونوح بالبيت كلها تبجي عليه اول ما دخل للبيت ذبحو جو رجليه على سلامته بيبي جانت ناذره سلامته من يطلع تطبخ وتعزم العشيره كلها ..
هو بلا شي احنه عشيره وحدنه مو نوب تعزم اكثر من هل عدد طبخن خالاتي ونسوان خوالي كلها شاركت وفرحانه على سلامته
خالي ابو احمد كله شوف شفت بعينك شلون يحبوك وفرحانين الك من طلعت ..
هو كوه يحجي وحسينا بيه ضايج مانعرف شكو وره ما كملنه غده وغدينا الخطار وراحو والي بقى بقى ...
احنه علينه المواعين الي صارت تلة شكبرها كعدنه نغسل بيهن كل مجموعه وحد تغسل
اجتي ريم ...
ريم _ سمعتن راح يسفرون احمد للهند
_ شنو ليش !؟
_ ماادري هسه سمعتهم يحجون ..
باوعت انا على رشا ولكيتها هي تباوع عليه اجتي تروح كتلها وين ابقي كاعده اكيد هم راح يحجون النه ...
رشا _ ولج راح يروح يسافر ...
_ غبيه لو شي خطر بيه ما يطلعونه من المستشفى اكيد يروح علمود فحص مو شي ثاني ..
رشا _ وللهند علمود فحص !؟
_ اي ماتدري بيهم اله يرجعون احسن من قبل يله وبعدين دوامه ميردون واحد مو صاحي لازم متكامل الاوصاف ...
هزت ايدها رشا كالت شكد بطرانه انتي وفايخه
_ هاي ريم تريد تحرك قلبج من حجت هيج ..
رشا _ ليش ..
_ لا هيج اكلج هي مو تغدت وحامل وما تتحرك
ما تولي لعيالها ...
رشا _ شمدريني انا وسألين بيه ..
_ هم صوجي اسولف وياج ..
رشا _ اي سكتي ..
كملنه غسل للعصر اجويه جماعة احمد بالدوام
اول ما دخلو هوسو باب البيت هوساتهم على البطولة والشجاعه عرفنا لزموا العصابه الي كانت تاجر بالمخدرات بين طلاب الجامعات كله بسبب الحادث الي تعرضله احمد جان تهديد منهم يعوف قضيتهم ويطلعهم برائه لذلك تعرضولة والله نجاه منهم ...
سنر _ ثاني يوم كلها مختفيه رتيل ورشا وآزر منو الي اراسله ما حصله منا لليل ساعه ب١٠ تقريبا دخل محمد وتقي سئلت محمد صاير شي ويا عائلة آزر
محمد _ اي خطية احمد البارحه سيارة متعرضتله وضاربيه بالسياره ومكلوبه بيه ،
_ يمه وهسه شلونه ،
محمد _ قبل شوية كعد من بعد العملية ،
_ خطيه منو ذولي الي تعرضوله ،
محمد _ هسه لا تدخلين وسئلين على الموضوع ،
_ بأستغراب ليش ماادخل واسئل !؟
تقي _ ليش ما دكول الها محمد ،
محمد _ مو خاف يفلت لسان اختك وتورط الرجال
_ شكو ترى اني كبرت والله
تقي _ مبين وضحك
_محمد حباب سولفلي ،
تقي _ سولفلها بعد راح تصير منهم وبيهم ،
محمد _ على باجر هسه تعبان رايح انام ،
_ عافنه محمد وراح كعدت اني وتقي تقاوي
اختي الجبيره سولفيلي ،
تقي _ شوفي اني جاي اسولفلج بس من بعد ما
كلتي هيج تحلمين اكلج شي وعافني وراح ،
_ اتصلت على آزر ما جاوب بعدين راسلتني رتيل
ولج ضل بالي شلونه احمد ،
رتيل _ هسه زين الحمد الله ،
_ ورشا شلونها
رتيل _ هاي يمي مخلصتها بجي على حبيب القلب ،
_ خطية الله يكومه بسلامه الها وين انتم ،
رتيل _ ثنيناتنه بيت جدي كاعدين ناقصتج الكعده
_عابت ترديني بهيج موقف ويا رشا غير اكعد
وابجي وياها ، يله روحي نامي اكيد تعبانين
رتيل _ اي والله من غبشه كاعدين ،
سديت التلفون وآزر ابد ما حجه ويايه واني هم
ما لحيت باتصالاتي عليه بس اتصلت
على مروان اتحمدتلة على سلامة احمد وسئلته
على آزر كال يبقى ويا احمد من العصر للثاني
يوم الصبح يرجع ينام منا للعصر
عرفت انو احمد يشتغل بمكافحة المخدرات
وجايته معلومات يدخلون للكلية مخدرات
فدخل للكليه على انو هوا طالب وجايهم نقل
باتفاق مع عميد الكلية وبعض الاساتذه ومن
قبضو عليهم واحد هدده وهو مااهتم فنفذ
تهديده ،
رتيل _ اجوي اهل سنر بس هي ماكو وياهم احنه كلش اخذنه من خاطرنه عليها ليش ما اجتي هي هاي صداقتها
عبير _ شبيجن بنات لا تنسون من اجتي تعزيج ما طلعتوا الها خافت هسه ترجع ..
رشا _ بس هسه هي خطيبة آزر زعلت عليها اني
رفل _ وزعلتهم بجوز عمج ما خلاها تجي وبعدين مو اتصلت عليجن بعد شتردن تكعد وتگابلجن
رتيل _ صدك ولج رشا يجوز خالو ما خلاها تجي
عبير _ يا ليش عود شنو راح ناكلها ما يخليها تجينه
رفل _ بالعباس هسه اموتجن كومن كملن شغل وياي بس انا افتر ...
كمنا وياها خطيه من راحو كلهم بالليل بقى بالبيت بس بيت خالو ابو احمد وخالو ابو حسين وعائلته
رشا _ سألت احمد على سفر للهند حبيبي ليش تروح بيك شي انت مو طبت وطلعوك ليش ترجع تدخل مستشفى !؟
_ ضحك بس كوه يضحك .. خرب ببليسج مابيه اضحك حبيبي رايح علمود ظهري ..
_ شبيه جنك العافيه ..
_ انتي شبيج وجهج اصفر ...
_ مابيه ... منين سمعتي راح اروح للهند ..
_ من البنات
_ يا بنات محد يدري من النسوان ..
_ يا عيني من ريم ورفعت حاجبي اله ..
_ هاا وضحت
رتيل_ شغله ثانيه خليني اكولك بيها خاف رشا ضم عليك ..
_ كولن بله
رتيل _ تعرف ابن عمك يحب منو !؟
_ يا ابن عم !؟
_ أشرت على رشا ..
_ ها يحب منو !؟
رشا _ مو وكت هل سوالف ..
_ لا بله كملي رتيل
رتيل _ يحب اخت ريم ..
_ حلووو الله يوفقهم
باوعت عليه انا كتله بس .
_ اي بس شنو !؟
_ما تتوقع تخرب بينكم !؟
_ لا وسدي الموضوع ...
رشا _ لا انا افتح الموضوع شضام عليه استاذ احمد ...
_ سلامتج وغمز الها ..
_ اي بله منو الي تحبها ريم لو اختها لو غيرها
احمد بضحكة _ شحب شبيج انتي ماحبهن بس انتي حبيتج ..
_ لا لا مو عليه هذا حجي ...
_ خوش من ارجع من السفر اسولفلج ..
باوعت عليه رشا وتمسكنت _ خوش ..
رتيل _ امداج هيج تصبرين شهل برووود ياربي
_ المهم يسولف ..
كمنه ردنه نطلع صاح احمد عليه
_ رتيل اذا فتحتي حلكج يمها اموتج بالعباس ..
رتيل _ ادري بيك ومسويها قبل ..
_ اي عفيه يله طلعي ..
سنر _ وره هاي مده اتصل عليه آزر بالليل ،
_ شدعوه عليك هيج مقطوعه اخبارك ،
آزر _ مشتاقلج ،
_ ايي مبين رفعت خط عليه ،
آزر _ جنت دايخ بسالفة احمد ،
_ خطية شلون صار
آزر _ زين وباجر راح نسافر اني وياه للهند نسويله عملية الظهره ويخلص علاجه ونرجع ،
_ هاي شنو بس انت وياه !!!
آزر _ اي حبيبي ويانه حسام ،
_ ترجعون بالسلامه ان شاء الله سديته منه
ومقهوره لان ما شفته صار هواي ثاني يوم ساعه
١٠ ونص الصبح صاح تقي عليه ولج هيوو نزلي نزلت على الدرج بسرعة اهوو شبيك صيح ترى اسمع مو طرشه ،
تقي _ خطيبج هناا يريدج ،
_ جذاب !!!
تقي _ والله شبيج ،
_ خليت شال على راسي ودخلت شفت عمار كاعد يمه هلاو آزر شلونك الحمد الله على سلامة احمد
آزر _ الله يسلمج
_ كعدت شويه بعيد عنه وعمار يكلب بـ موبايله ،
آزر _ عمار ما تحس وتطلع ،
عمار _ ليش اطلع قابل انت عاقد عليه ،
آزر _ ولك عمار لا تعصبني امشي اطلع ،
عمار _ والله حلوه هاي ابيتي ويطردني ،
آزر _ بالعباس هسه ادفرك !!!
عمار _ بابا بعدك ما عاقد تفتهم لو لا ؟؟
آزر _ خراا بيك شجاي اسويلها بس اريد احجي
وياها لا تخليني اجيب السيد واسفرها
وياي هسه ،
عمار _ يله طالع بس فضنه
_ طلع عمار خرب بليسه عصبني شلونج حبيبي
_ الحمد الله وانت ،
آزر _ هسه صرت زين بشوفتج اني مستعجل
وراي سفر ،
كام باس راسي لاول مره ان شاء الله بوسة
الجايه منا وياشر على شفتي ، صاير شكد
سخيف ودفعته ،
آزر _ راح اعديها بمزاجي هاي الكلمة بس من
تعيديها ما تلومين غير نفسج ،
_ انت لا تتجاوز حدودك وهاي سوالف بطلها ،
آزر _ عود اذكرج بهذا اليوم وصدك كلمة اهووو بطليها لا اكصه للسانج من زمان سامعه منج
وكلت يالله كبرت وعقلت بعد ما اسمعها وهسه عدتيها ويا تقي ،
_ اني وتقي عادي ،
آزر _ يله سويلي طريق اطلع ،
_ بعد وكت ما كعدت وياك ،
آزر _ والله مستعجل ما الحك وما نطاني قلبي مااشوفج قبل لا اروح
_ سلم على عمار وتقي وطلع اني بس بالكليه جنت اشوفه بين فتره وفتره بس بالبيت هاي اول مره
راد يشوفني ومن طلع عبالك جنت يوميه اشوفه وهسه سافر كلش نقهرت ،
رتيل _ ثاني سافر احمد واحنه رجعنه كل وحده بيتها وبقينه يوميه نجمع اخبار من الي نعرفهم خطيه مروان كلش ضايج ومختنك حتى من يحجي ويايه ماله خلك للسوالف وكل شويه
يكول بالي يم احمد لو ادري رايح وياهم ما باقي هناا كتله ليش مو خطيه خالو وخاله تعوفهم وحدهم ...
مروان _ جا ماتحمل هيج اله يمه ..
ورشا من احجي وياها دكول عمو آزر يخليني شويه احجي وياه لان عنده علاجات طبيعيه
اغلب وقت لو فحوصات ..
سنر _ قلت مخابراتنه بس نتراسل يوميه هو يطمئن
عليه واني اسئله على اوضاعه وصحة احمد
طول اكثر من شهر ونص بهاي الفترة زينه
صارت حامل هي ومرت حسن وتقي يضحك
عليهن يكلهن وحده تغار من الثانيه ،
خابرني آزر ،،
آزر _ هلو حبيبي شلونج ،
_ هلا بيك ،
آزر _ اكلج حبيبي حضري روحج بس نرجع اسوي خطوبه ترى حيل طولت ومشلوع قلبي صار سنه من خاطبج ،
_ لا شدعوه بعدنه مو سنه ،
آزر _ حتى لو اسبوع بس اجي نعقد وراها بشهر نزوج ،
_ شنو هاي آزر غير من اخلص كليه ،
آزر _ ليش من تزوجين ماتعرفين تدرسين ،
_ اي ماعرف اله بغرفتي ،
آزر _ عندي غرفه فارغه وجيبي غرفتج كلها
وحطيها بيها ،
_ عود تعالو بسلامه والله كريم ،
آزر _ ان شاء الله بعد اسبوع لو اسبوعين ونرجع ،
_ واحمد شلون صار ،
آزر _ زين على العلاج الطبيعي رجع مثل قبل
واحسن هم ،
_ الحمد الله على سلامته
آزر _ ربي يسلمج دكات قلبي ،
_ صار شكد مكايلي دكات قلبي ،
آزر _ ولج والله تعبان بعيد عن بنتي وعليج
و مختنك كلش ،
_ يله مابقى شي كم يوم وترجع ،
آزر _ اي يحلو حضري نفسج من هسه للخطوبه
مو دكولين مالحك ،
_ اوك ان شاء الله
آزر _ ترى ماترهم اوك وان شاء الله سووه ،
_ متعوده !!!
آزر _ بطليها ،
_ ان شاء الله ،
آزر _ عفيه بالتسمع الكلمة بعدين يله خلي اروح
انام شويه ،
_ نووم الهنا ان شاء الله ،
آزر _ اتمنى دكولين كلمة ولو من تطلع بالقوة مو حلوه تصير يله اصبر عليج شسوي ،
_ سديته منه عرفت قصدة على كلمة احبك هههه
رتيل _ ضلينا ننتظر اخبار من آزر على جيتهم منا لحد مكالو باجر يجون كلنا نطلقنه للبيت الجبير وامه تضحك وتبجي بنفس لحظه ..
ام حسام _ بيبي مروتج لا تعزمين احد خلينه نشوف احمد وهم هو يرتاح نوب لاحكين على خطار وهوستهم ..
ام آزر _ لا ماعزم بس خلينه نشوف احمد ..
راح مروان وعلي ابن خالي واخويه وخوالي يتلكونهم من المطار وصلو النه مسويله زفه
بهورنات السيارات
اول ما دخل بسرعه شبكته امه وتبجي وتبوس
بيه ..
_ ترى عدل انا ما جابوني ميت سدت حلكة هي كلتله اسكت ولك
بس الحمد لله نشوفه صحته كلش زينه يمشي ويتحرك وحده دخل للبيت ...
احمد _ تعبان انا اريد انام ..
ام آزر _ ادخل نام بغرفتي ...
_ تمام يمة
سنر _ مرت الاسبوعين سريع واجه اليوم الي رجعو بيه ولدنه كلهم راحو يمهم ،
وثاني يوم على اساس ماما وزينه واني نروح اتصل عليه آزر ، الحمد الله على سلامتكم ،
آزر _ الله يسلمج والله ملتهي خطار وماجاوبتج
ولا اتصلت عليج وماكدرت اجيج ،
_ لا عادي يجوز اليوم نجيكم ،
آزر _ لا حبيبي لا تجين انتي ،
_ ليش علمود رشا ،
آزر _ لا تجين البيت هوسه وكومة نسوان بيه
وخاف تسمعين حجايه تضوجج لو يفلت اللسان
امي ودكلهم خطيبة آزر ،
_ ليش همة مايدرون اني خطيبتك !؟
آزر _ لا النسوان ماتدري بس الي اجني بالخطوبة
_ وليش مدكلهم !؟
آزر _ بعدين مو وكته هل حجي مشغول
كلش هسه ،
_ تمام روح ،
آزر _ بأقرب وقت اجي اشوفج ،
_ هلا بيك ،
آزر _ يله دكات قلبي روحي ،
_ نزلت كلت ماما ماروح وياكم ،
ام سنر _ ليش مو عيب من الناس وراح صيرين جنتهم ،
_ والله مابيه حيل اروح تعبانه ،
ام سنر _ براحتج يمه ،
_ رحت صعدت
سويت حمله على غرفتي غيرت ديكورها وعطرته شفت بعد وقت للغده دخلت
غرفة اخواني شفتها مگلوبه الملابس مطشره
وهوسه ولا جني البارحه مرتبتها كعدت ارتب
بيها منا لحد ما وصل عمار جان خفر بالمستشفى ،
عمار _ شنو من البارحة تنضفين بيها
_ والله اذا ما زوجتو وخلصتوني من هل هوسه ،
عمار _ يله انتي راح تزوجين وتخلصين من عدنه ،
_ يمه انتم غير روحي اذا اخلص منكم يعني
روحي خلصت باسني براسي ،
عمار _ جوعان صبيلي قبلكم لان تعبان ونعسان واريد انام ،
_ اي هسه بدل وانزل نزلت قبلة صبيتلة اكل ونزل وراي تغدة وغسلت المواعين وصعدت ...
رتيل _ دخل احمد لغرفة بيبي شويه ورشا ضلت تحوص
_ خليني ادخل اسلم عليه بس انتي راقبيلي الوضع
_ مو تدللين من عيوني ..
_ نجبي راقبي يله ..
دخلت رشا شافته فاتح عيونه _ الحمد لله على سلامتك حبيبي مشوف شر يارب
احمد _ بس !؟
_ شنو !؟
_ انا منتظر دخلتج وبس هاي لكلمتين تحجيهن
كعد على حيله _ تعالي هنا يمي .. اجيت يمه حبيبي الي يسمع الكلمة هسه يله تحمديلي بسلامه
_ شنو !؟
_ مثل ما سمعتي ويأشر على خده ..
_ لا احمد ..
_ رشاا شي بسيط هذا لا تخليني اطلب الاصعب
_بسته بخده يله طالعه انا ضحك ..
_ طلعي انا تعبان
طلعت بسرعة تلكتني رتيل ..
رتيل _ تعالي بسرعه آزر صاح الكل عنده خبر
طلعنه ردنه نعرف شنو الخبر ..
آزر _ ان شاء الله بالايام الجايه خطوبتي ..
النسوان كلهن كامن يسألن يا منو هاي منو وبيهن كالن بهل سرعه تخطب وبيهن الي باركن
احنه واكفين على صفحه ونبتسم وكلش فرحانين لهل خطوه ..
آزر _ اخت صديقي محمد الي ردتها قبل ..
ام سجاد _ يااا وتقبل بيك هسه هيه قبل جنت خالي مختلي ماقبلت تريد هسه تقبل بيك ..
ابو حسام _ تقبل تقبل ان شاء الله ماطوله آزر شاريها
رفل _ شوف ابوي دخل بالجذبه بسرعه ههههه والله لو يدرن خاطب هو ويريد يعقد هسه هههه ضربتها رشا _ كافي لا يسمعن
استاذنو وراحو ناموا ...
منا للعصر اجتي ام سنر ومرت محمد وهمين سنر ماجتي
رشا _ هاي ثاني مره ذيج مره اجتي بس امها واخوانها وهسه اجتي مرت اخوها وهي ماكو مصره تزعلنا منها ..
عبير _ اكولكم شي ترى صدك أزر ما يخليها انا سمعته من يحجي وياها وكلها لا تجين وياهم
ابقي بالبيت ...
رشا _ ليش عود
عبير _ يا عزيزتي مو هو اليوم كال النه يريد يخطبها شلون بعد تجي يمهن ؟؟
رتيل _ طلعنا يم زينه انا اعرفها سلمت عليها وكعدنه نسولف وسئلناها على سنوره ..
زينة _ تعبانه شويه ..
رشا _ اي خطيه عرفنا
زينه _ منين هي كلتلكم !؟
رشا _ اي حجينه وياها عود سلمينه عليها ...
زينة _ ان شاء الله عيوني ..
رتيل _ ضلو شوية اهل سنر وراحو ...
سنر _ بعد مراحو اهلي لبيت آزر بقيت وحدي نزلت
برنامج الانستا حاولت اسوي حساب ماعرفت
بقيته كلت من يجي تقي اكله يسويلي منا للمغرب اجتي امي وزينه ومحمد ،
زينه _ البنات يسلمن عليج رتيل والثانيه مااعرفها
ام سنر _ زحمة مارحتي حتى ام آزر كالت ليش ماجتي سنر وياكم ،
_ يمه جان كتيلها تعبانه ،
ام سنر _ اي كتلها مالها خلك بس هذا مو عذر يا يمه
_ يله غير مره ان شاء الله ،
ام سنر _ على راحتج يمه ،
_ صعدت لغرفتي اتصل عليه آزر بالليل جاوبته ،
آزر _ ها يروحي خوما ضايجه لان كتلج لا تجين
_ لا عادي بس ضجت لان اهلك مايدرون احنه مخطوبين ،
_ ليش مايدرون اخواني كلهم يدرون وامي وامي الثانيه واختي ولد اخوي نصهم بعد اله نشرها بالجريده يله ،
_ دقيقة شنو امك الثانيه كم ام عندك ؟!
آزر _ شوفي اني من مات ابوي جنت ما صاير
امي جانت حامل بيه من جابتني جان مالها
خلك تسهر وتربي ربتني مرت اخوي ام حسام
اجتي بالخطبه واخوي هذا السئلج عن رئيج
اني اسميهم امي وابوي لان ربوني ودللوني اكثر
من حسام وحسام اكبر مني بسنه ومن جنه صغار دائما نتعارك اني ومحمد ويا حسام ومرتضى هذا
الحجي انتي بعدج مصايره للدنيا
وخلي اكلج شي حسام جان صديق مرتضى روح بروح ،
_ صدك شو ما سامعه بيه ،
آزر _ اي ما جان يجيكم كله بره مخلصيها اني
جنت كاعد عدكم ،
_ اي جنت اكره جماعة محمد وتقي من يجون لان طلباتهم هواي ،
آزر _ بنت الاوادم شطالبين غير الچاي ،
_ هو اني اكره الچاي ،
آزر _ بعد هاي مشكلتج ، بس والله محمد عنده
اخت تسوووي عصير يجنن شو من خطبتها
ولا مره سوتلي ،
_ يجوز تتعاجز منه ،
آزر _ يله من ازوجها واخليها يوميه تسويلي
ضحكت شبيج ترى احجي على اخت محمد
مو يمج السالفه ،
_ اي زين ،
آزر _ نعسان ما تخليني انام على صوتج ،
_ مو صوتي صوت فيروز ،
آزر _ تروحلج فدوه ،
_ يله روح نام وسلملي على احمد هواي وتعذرلي
منه ،
آزر _ جني ماسمعت سلامج ،
_ هاي شنو تغار ترى ابن اخوك هو ،
آزر _ روحي لا نتعارك ،
_ تمام باي
مر اسبوع نفس الروتين صادف الجمعه بالليل
جنت يم رواسي كاعدين نسولف واتصل عمار ،
عمار _ حضري نفسج جاي اخذج ،
_ هاي شنو ترى كلت البابا ابات يمها ،
عمار _ عدنه خطار ،
_واني شعليه بيهم ،
عمار _ خوش ،
_سده وره شويه اتصل آزر ،
آزر _ وين انتي !؟
_ استغربت من سؤال لان كتله قبل لا اروح
شنو مو كتلك يم رواسي ،
آزر _ ها عبالي رجعتي
_ وسمعت صوت عمار يصيح تقي جيب مي ،
آزر _ خرب يومك عمار وكتك تحجي ،
_هاي شنو آزر انت عدنه ،
آزر _ اي اني يم بيت اهلج ،
_ انت الخطار المقصود ،
آزر _ لا اهلي الخطار جايين يحددون موعد الخطوبة ،
_ تحجي صدك آزر ،
آزر _ اي شبيج مو منطيج خبر من زمان كتلج
من ارجع حدد موعد للخطبه ،
_ يله روح حدد باي وسديته
رجع دز رساله ،
" صارن ثنين يا سنر اني اعلمج "
ثاني من الصبح اجاني عمار واني بعد شويه
وابجي شصار البارحه ،
عمار _ حددو الخطبه بداية شهر الجاي ،
_ واليوم شكد بالشهر ،
عمار _ 20 بالشهر ،
_ عززه بعد 10 ايام ،
عمار _ بالضبط 9/1 خطوبتج ،
_ وصلت للبيت ،
زينه _ شرفت العروس ،
_ شنو هاي بعد 10 ايام ،
محمد _ على كيفج صار شكد من قارين فاتحتكم طولتو ، والولد حقه وبعدين كال متفقين انتي وياه
على اساس من شهر 7 وصار حادث احمد وتأجلت وقبل لا يرجع مو كلج بس نرجع نعقد ،
_ اي صح ،
محمد _ خلاص يعني عندج علم اول وحده ،
_ بس نسيت عبالي هيج ،
محمد _ هو شنو نسيتي وهيج شبيج سنر !!!
_ اهووو هسه تأجلوها لو لا ،
محمد _ اول شي كبرتي انتي اهوو بطليها
وبعدين ليش تردين تأجلين !؟
_ الموعد قريب ،
محمد _ خايفه لو مستحيه ولج شو طلعين
وتحجين وياه ومخليج على راحتج بعد شكو
_ ماعرف أستأذنت منهم وصعدت اتصلت على
آزر مارد عليه دزيت رساله ما وصلت عرفته بعده نايم اتصلت على رتيل ،
رتيل _ هلا عروستنه شلونج ،
_ زينه وانتي ،
رتيل _ البارحه امي وبيبي ومرت خالي يمكم
وانتي ماكو ،
_ غير دكولين جنت يم رواسي ،
رتيل _ آزر ماقبل نكلج ومرت خالي من اجتي
كالت حتى ما طلعتلنه وشفناها ،
_ وين آزر ،
رتيل _ طالع يحضر للخطبه ليش !؟
_ لان اتصلت عليه ومارد ،
رتيل _ اي مشغول خطية وانتي هم حضري روحج
_ اي شلحك 10 ايام ،
رتيل _ شبيج سنر ترى خطوبة مو عرس تلحكين والله ،
_ روحي آزر جاي يتصل عليه جاوبته ،
آزر _ هلا بعمري ،
_ هلاو بيك شلونك ،
آزر _ زين من سمعت هل صوت ،
_ آزر ليش مكتلي البارحه تجون خليت زوجة
اخوك تحجي عليه ،
آزر _ ردتها مفاجئة الج ،
_مو تدري اني مو هنا !!!
آزر _ يله واذا حجت مصار شي من تتعرف عليج
راح تحبج ،
_ اوك ليش الخطوبة بعد 10 ايام شدعوه هلكد مستعجل ،
آزر _ اول شي كلمة اوك بطليها ، ثاني شي
مو 10 ايام لا تسعة راح يوم ومستعجل شنو
بنت الاوادم صار سنه خاطبج ،
_ اهوو آزر والله صدمتني المفروض نقرر اني
وياك ،
آزر _ سنر روحي هسه ومن اشوفج ذكريني افرك حلكج على كلمة اهوو يله بنيتي عندي شغل ،
_ سديته منه ونزلت لماما يمة اريد اروح للصالون ،
ام سنر _ روحي انتي وزينه اني مابيه حيل للانتظار
_ اوك خابرت على محمد شويه واجانه رحت
كعدت يمه حمودي حبيبي اريد فلوس
اعدل خلقتي ،
محمد _ شبيها خلقتج تخبل ،
_ شنو يعني ماتريد تنطيني !؟
محمد _ لا انطيج ،
_ عفيه باخوي الزود انطاني 200 الف ،
محمد _ يكفنج لخلقتج ،
_ اي يكفن وزايد ، رحنه اني وزينه للصالون جان صالون يمنه هسه جايبات جهاز تنضيف البشره
كتلها اريد اسوي ،
ام صالون _ اي حبيبتي بس اقل شي كون جلستين
_ تمام هسه سويلي وقبل خطوبة بيوم هم سويلي جلسة
ام الصالون _ سعر الجلسة ب50
سنر _ ماشي كلبي وشفت بنيه عدها سوي تسريح
هذا هم بيه فائده للشعر !؟
ام الصالون _ عندي معالج فقط
_ هم اريد ،
ام الصالون _ بس شعرج ميحتاج ،
_ لا اريد تغذيه ،
ام الصالون _ شعرج طويل اخذ عليه 500 الف
زينه _ شدعوه بعد نزليلها ،
سنر _ لا هاي هيه ،
زينه _ راح زينين روس اخوتج علمود راسج ،
سنر _ اخوتي شعليهم صبريلي اتصلت على آزر
كتله اني بالصالون ،
آزر _ اي كلي محمد راحت ،
سنر _ آزر اريد فلوس
آزر _ صار وين انتي يا مكان انطيني العنوان
_ انطيته العنوان وسديت الخط ،،،
آزر _ اتصلت علية وطلبت فلوس واني محمد كايلي منطيها 200 دخل اخابره شنو ممنطيها فلوس ،
اتصلت عليه فتح خط ،
ها لك سكط اختك خابرتني تريد فلوس واني اعتمدت عليك ناطيها ليش هيج ولك ،
محمد _ اي والله اني نطيتها قبل لا تطلع وكالت يكفي وزايد هاي اختي من هسه تريد تقطك ،
آزر _ خليها اذا هيه ما تصرف منو الي يصرف
رحت عليها للصالون واتصلت عليها حتى تطلعلي
الو سنر اني بالباب طلعي
_ طلعتله ،
آزر _ شكد تردين ،
سنر _ ام صالون رادت 500 على شعري ،
آزر _ ليش راح تغطيه بماي ذهب !؟
_ لان طويل هذا سعره اذا ماتريد تدفع عادي كول ،
آزر _ لا عمي ادفع واني الممنون خاف ابوج
ماطلب شي انتي ما قصرتي ،
_ ليش ابوي شعليه ،
آزر _ قابل نسولف على الباب بعدين اكلج
_ اوك يله ورق ،
آزر _ خادم ماطول مزاجج حلو على الخطوبة
ادفع ليش لا انطاني الفلوس يله دخلي ،
_ منا لليل يله خلصت اجه محمد اخذنه اول مصعدت بالسياره ،
محمد _ خوش قطيتي الرجال قطة ،
_ منو كله يخطب ،
محمد _ هو هم صوجه يسمع كلامج ،
_ ههههه مشكلته رجعت للبيت والتزمت بالكالتة ام الصالون لشعري ....
رتيل _ احمد رجع البيتهم واحنه بدينه نحضر للخطوبه بعد ماعرفنه بدايه شهر تاسع
نطلع نشتري قطعه كشخه هذا عرس الغالي نلعب لعب اتصل عليه آزر العصر ..
آزر _ هم تراسلين سنر ..
_ لا هي ملتهيه وانا ملتهيه وانت ملتهيه عوفها فتره حتى بالخطوبه تكونون مشتاقين البعض
احمد _ هجم بيتج كون ..
رتيل _ عزا العزاك انت موجود ..
احمد _ لا هو آزر عدنه ..
_ خوش شلون صرت تحضر الخطوبه لا
احمد _ احاول احضرها لان جنت منتضر هذا اليوم الي نفرح بـ آزر من صدك ...
_ان شاء الله يكمل على خير ..
_ ان شاء الله ..
_ يله باي عندي كومة شغل
_ باي عريسناا ...
سنر _ ومره الاسبوع سريع واحنه يوميه عركه إني وآزر منا قبل الخطوبة بيوم متفقين نروح نأجر بدله خابرني الصبح ،
آزر _ راح نجي اني وام حسام ،
_ تمام منتضرتك طبعا امي مابيه حيل تطلع
وتمشي مسافة خالتي كالت اني اروح وياج،
اجانه آزر نزلت ام حسام سلمنه عليها ،
ام حسام _صعدي يمه انتي بالصدر واني وخالتج نكعد وره ،
صعدت يمه وهو كل شويه ملتفت عليه ومرت
اخو تكله تلحك تباوع عليها من وصلنه نزل
هو انطه فلوس مرت اخو وتقرب يمي ،
آزر _ سنر مو تأجرين شي فاضح جيبيها مستوره
زين ،
_ ميخالف ،
آزر _ ماعيد كلامي البدله مااريدها دلعة ،
_ يعني شلون هي غير البدلة دلعة وين اكو بدلة مستوره ،
آزر _ اكو دوري زين ،
_ ماشي ، فتريت السوك كله ماكو بدله مستوره بعدين شفت بدلة تجنن بس فضيحة كتلهم هاي حلووه
خالتي _ هي حلووه بس خاف يحسدنج من تلبسيها
_ شنو القصة خالة
ام حسام _ يمه آزر مايقبل بهيج ،
_خاله شوفة عينج اكو حلوات
ام حسام _ لا كله موديل قديم ،
_ هاي عجبتني ،
ام حسام _ بعد شكلج آزر واعرفه مايخليج تلبسيها
_ حبابه لا دكولين اله ضحكت هي ،
ام حسام _ اني مراح اكله بس قابل ما يشوفج بيها
_ ميكدر يحاجيني غير عروس ،
ام حسام _ يمه منج ما ينكدرلج ، محتاجه شي
بعد لو اخابره يجي ،
_ لا هاي هي اني جان عاجبني قفطان ابيض بس كلت خطية هواي خسرته اول ما صعدت بالسيارة
آزر _ هاا شلونها البدلة ،
ام حسام _ حلوه يمه بعد ذوق سنر ،
آزر _ الله اليستر ماطول ذوقها
_ضحكت لازم محلو ذوقي وميعجبك ،
آزر _ لا حلوو ويجيب التايه ،
_ نزل ام حسام بيتهم وصلنه بيتنه نزلت خالتي
جاي انزل ،
آزر _ وين نازله خلي احجي وياج ،
_ يله اسمعك ،
آزر _ خاف باجر يجن النسوان ويذبن حجي
يمج على بنتي لو عليه لا تخربين فرحتج
بسوالفهن زين ،
_ تمام ،
آزر _ فديت الي بعد مايكول اوك و شغلة ثانيه
البدله شو ما مقتنع بيها ،
_ ترى لحيت ويا البدله شجاك باجر تشوفها ،
آزر _ اذا ما سامعه كلامي يا ويلج ،
_ ماشي نزلت شفت عمار هسه كاعد من نوم ،
عمار _ هاا ولج باجر تنخطبين ،
_ اي اريد هدية خطوبتي ،
عمار _ صار كم سنر عدنه ،
محمد _ ولج شو صايره تقطين بينه شجاج ،
_ اذا اخواني ما يدللوني منو يدللني ،
تقي _ آزر خلي يصرف عليج ،
_ اوكف انت دورك مجاي ،
عمار _ شتردين !؟
_ عجبني قفطان عند محل الفلاني (….)
اريده هسه نازل على العيد ،
عمار _ اي اشتريه ،
_ مو غالي وخطية ازر هواي اخذت منه ،
زينه _ يمه تخاف على فلوس رجلها ،
محمد _ تعلمي منها النهار كله صيحين جيب جيب
عمار _ ميخالف اجيبه الج شلون سعره هو ،
_ لا روح انت وشوف سعره ،
عمار _الله كريم هسه ترديه لو من تزوجين ،
_لا هسه تروح حتى مو العصر ولون ابيض اريد وقياس 38 حباب ،
عمار _ اي ميخالف ،
_ لا يعزل فدوة ،
عمار _ تقي روح جيبه انت وهاك فلوس
انطاه 100 ،
_ زيده بعد خاف اغله السعر
تقي _ بويه همزين بس سنر خلفت جان بناتك
خلنه على الحديده ولج تشترين قطعه ملابس
علمود ساعه وحده ،
_ ليش ساعه هم البسها بغير وقت ،
راح تقي اشتراه واجه وكلش فرحت بيه ،
بالليل خابرني آزر فتحت خط اجه صوته ،
كلة صياح صاير نار وشرار من العصبية ،
وبس يصيح ،
_ بنت الاوادم تضحكين عليه
اني تضحكين علية !!!!
_ شكووو آزر بس فهمني شبيك !!!
:
:
:
يتتتتبع
تحياتي الكاتبه زهراء امجد