قلت ليهو بصوت باكي ياخ ما بهاظر معاك أنا رد علي ....فجأه الخط فصل و انا هنا قلبي وقف💔
بقيت اقول ليهو عدنان انا ما بهاظر معاك ياخي رد علي ،، لمن ما جاني رد إنفقعت بالبكى و قلت خلاص معناها حصلت ليهو حاجه حادث أو كدا ، اثناء ما انا ببكي كدا جاني صوتو و هو بضحك! قال لي يا بكايه انا كويس!
قلت ليهو بزهج و صوت باكي طيب كنت ساكت ليه يعني؟
قال لي عايز أشوفك بتخافي علي قدر شنو .....هنا سكته ساي و قلبي اشتغل زي الدلوكه ، قلت يا ربي عدنان دا مالو؟ ؟الحصل عليهو شنو في الفتره ديك و خلاهو يتغير للدرجه دي! !
_آلوووو
قلت ليهو بتردد كدا : سامعاك ، قال لي و هو بضحك قولي لي إحساسك كان شنو لمن ما لقيتي رد مني؟😂
قلت ليهو على فكره ماف حاجه بتضحك ولا إنت متعود تستهتر بـ ردود افعال الناس و متعود تعاملهم على حسب مزاجك؟
قال لي في شنو؟ مالك هسي؟
قلت ليهو ما مالي و ماف حاجه و حـ اقفل ، قال لي لا ما تقفلي خلينا نتفاهم! قلت ليهو نتفاهم؟ في شنو عشان نبرروا و نتفاهم فيهو؟
قال لي انا قلت ليك شنو قبل شويه؟
قلت ليهو ما بهمني😊
قال لي والله؟
_ اي
قال لي تمام و طوالي قفل الخط ، قلبي وجعني و قربت أبكي ، قلت دا كلو بسببي أنا براي مشيت فتشتو و إتصلت عليهو ، أساساً ما كان ارسل ليهو و ذاتو ما كنت ارجع حساباتي وجع القلب دا انا براي بجيبو لنفسي ، فجأه كدا إتصل علي ، ما رديت عليهو بس لمن كتر اتصالاتو رديت عليهو ، اول ما فتحت الخط قال لي اسمعيني إياك تحذفي حساباتك أو تخصصي رقمك ما تعملي أي حاجه تخليني ما قادر أصل ليك ، قلت ليهو عدنان إنت ما طبيعي صح؟
قال لي ياداب بقيت طبيعي! ....اتنهدت و قلت ليهو شوف انا ما بحب المعامله البتكون بالمزاج ، انا تعبت شديد من الخذلان و حصل معاي في الفتره الفاتت خلاني أقابل طبيب نفسي انا تاني ما عندي أي طاقه عشان اقدر اقوم بيها خذلان تاني و.......قاطعني و قال لي بإستغراب: قابلتي طبيب نفسي؟ الحصل عليك شنو كلميني؟ ..
=............
ما تسكتي ياخ أحكي لي شنو الحصل معاك! .....طوالي دموعي نزلت ، أخدت نفس عميق و قلت ليهو أحكي ليك بأي حق! انت منو أساساً عشان أحكي ليك أي حاجه بتحصل معاي! للعلم انت واحد من الناس الأزمتني نفسياً .....قال لي شنوووو؟ انا؟ كيف؟
اتوترت و قلت ليهو المهم عايزا أقفل ، قال لي لا لا لازم تقولي لي كيف أنا كنت واحد من الناس الأزمتك نفسياً ، قلت ليهو بما إنك من نفسك ما عارف الحاجه دي معناها ما ضروري تعرف مني ، قال لي مها أنا عارف.....
هنا الإتنين سكتنا ...
_ عارف والله بس كان عندي أسبابي الخلتني أختصرك و اعمل مسافه بيناتنا ...
قلت ليهو بالله؟....و هسي اسبابك دي إتلاشت عشان كدا لسه بتتكلم معاي !!😕
_ مها أنا جادي معاك
قلت ليهو برضو ما فارقه معاي ، قال لي لكن انا بتفرق معاي ، قلت ليهو عدنان لا إنت أكيد ما طبيعي! متأكد انك ما مريض أو ما أخدت ضربه على راسك؟
ضحك و قال لي لا .....قلت ليهو دقيقه دقيقه! ! بتضحك كمان! لا لا انا ياداب اتأكدت إنك ما طبيعي أكيد فيك شي! ....قال لي فعلاً فيني شي و الشي دا أنا قلتو ليك ...
سكته ساي و ما عرفت اقول شنو! ! قلبي كان شغال دق دق و أطرافي كلها بترجف!
أخد نفس و قال لي ما عايزا تعرفي أسبابي كانت شنو؟ ....سكته ما رديت ....بعد مسافه قال لي إنتِ عارفه انو سامي بحبك صح؟
انخلعت والله و نططت عيوني و غلبني أتكلم! ! قال لي سكوتك دا بيعني إنك كنتِ عارفه ، كلام سامي المستمر عنك و حبو ليك واحد من الأسباب الخلتني أختصرك و احاول اخت حواجز بيناتنا ، ما قدرت اغض نظر عن حب سامي ليك و اعمل نفسي ما عارف حاجه ، يمكن لو ما هو بدا يتغير علي و يتضايق لمن يشوفني ما كنت حـ أفهم إنو بحبك ، لمن اتلاقيت معاهو و فاتحتو في الموضوع أكد لي إنو بحبك و وعدتو اني ما اتعامل معاك خالص ، المهم كدا اتأكدت انتِ شنو بالنسبه ليهو بس ما كنت متأكد هو بيعني ليك شنو ، فلمن اختفيتي و حذفتي حساباتك افتكرت إنو سامي اتكلم معاك بخصوص و طلب منك تقطعي علاقتك بي و انتِ عملتي كدا فـ هنا اتأكد انكم بتحبوا بعض ، فـ إنسحبت و بديت اختصرك ......بعد مسافه قلت ليهو و هسي الإتغير شنو؟ ليه ما وفيت بوعدك!
_ ما قدرت ، بذلت اقصى جهدي عشان أشيلك من بالي و أكمل حياتي من دونك بس ما قدرت! بقيتي ما بتفارقي مخيلتي طول اليوم بفكر فيك و الأسوأ اني ما كنت قادر اصل ليك و دا الكان مضايقني ....وصلت لدرجة اني خلقت لي موضوع من ماف مع ابوك و كلو عشان أمشي بيتكم و أشوفك بس للأسف مشيت و ما لمحتك ولا بالغلط!
بقيت ساكته و منططه عيوني! والله انا لحد اللحظه ديك ما كنت قادره استوعب انو عدنان بذات نفسو قال بحبني و هسي قاعد يحكي لي عن مشاعرو و قدر شنو هو كان فاقدني! حاسه نفسي بحلم! يعني معقوله عدنان المغرور و الدايماً ساكت داك يحبني و يقول الكلام دا كلو! !
_ عارف انو البعمل فيهو دا ما صح و لو سامي عرف حـ يكرهني عديل لأنو حباك قبليني و لأنو أنا ولد عمو ، حقيقة انا ذاتي متضايق من الحاجه دي! متضايق شديد من نفسي و شاميها بس ما قادر أكتم أكتر من كدا و لو ما كنت متأكد أنك بتحبيني ما كان إعترفت ليك ....لا على كل الأحوال كنت حـ اعترف
قلت ليهو بالله! ! جايب الثقه دي من وين إنت؟ مش كنت متأكد انو انا و سامي بنحب بعض؟ هسي شنو الخلاك تقول إني بحـ......سكته ما كملت الكلمه ....قال لي كمليها عادي اصلاً انا عارف و من البدايه كان واضح عليك بس انا غبي و من موقف واحد قررت انك بتحبي سامي و انسحبت ، قلت ليهو انا ما بحبو والله و هو عارف الحاجه دي لأني قبل كدا صارحتو بالموضوع و قلت ليهو انا بعتبرك زي أخوي ، قال لي حـ اشوف نهاية الموضوع دا شنو ، المهم قفلنا على كدا و انا من جهه كنت مبسوطه و حاسه بطمأنينه و من جهه تانيه زعلانه على سامي و شايفه انو انا و عدنان كسرناهو💔
االمهم عدت فترة أسبوعين كدا بقينا فيها انا و عدنان على تواصل ، انا غيتو المره دي ما كنت برسل ليهو خالص و رغم إني بحبو بس المره دي ما بادرت ، كلام سماهر لسه عالق في ذاكرتي ، ما عايزا يجي يوم و عدنان يقول عني متطفله و لصقه ، يوم بعد ما هو رسل لي و بقى يتكلم معاي قال لي ليه حاسي بيك بقيتي باهته كدا! بقيتي ما زي زمان حتى طريقة كتابتك فيها نوع من الإكتئاب! ايوه انا عارف اني انصدمت في صحباتك و فيني بس انتِ اتجاوزتي الحاجه دي من زمان! ! يعني لمن عرفتي حقيقتهم زعلت شديد بس كنتِ بتتعاملي عادي و مواصله حياتك! فما عارف ليه تاني رجعتي و اتأثرتي بالموضوع! ولا في حاجه تانيه!
قلت ليهو ماف حاجه ، كل القصه إني ما لاقيه نفسي ، انا تايهه و ما عارفه مفروض اتعامل كيف بس في وسط دا كلو انا عامله حساب إني ما اتعامل بتلقائيه تاني و ما عايزا أكون اندفاعيه و اتصرف من دون ما أفكر ، ما عايزا يجي يوم و ينقال عني لصقه و حشريه و شخصيه لا تطاق
قال لي شنو؟ ؟ منو القال عنك كدا؟ قلت ليهو انا بتكلم بصوره عامه ، قال لي لا من خلال كلامك متأكد انو في كلام انقال ليك! دا منو الغبي القال عنك لصقه و حشريه! !؟
طبعاً قربت أبكي ، حاسه نفسي بقيت حساسه شديد ، قلت ليهو ماف شي ....نعست و حـ انوم ....قفلنا على كدا في اليوم داك بس هو لسه كان مصر يعرف الحصل شنو و منو القال لي كدا ، انا رغم اني بقيت ما متمسكه فيهو عشان خايفه اتخذل بس مع ذلك هو برسل لي و بسأل عني و انا مزاج ساي برد عليهو بس ردي بكون متأخر عشان لو عايز لف و دوران و كدا يقنع مني و يفهم إني ما متفاعله معاهو ، مع ذلك يوم بالغلط ما قدرت امسك نفسي لمن تاني فتح لي الموضوع و قال لي عايزا اعرف الحصل معاك بالتفصيل و خلاك تكوني باهته بالطريقه دي! ما عارفه بالي كان وين طوالي حكيت ليهو بداية من لمن مازن قال لي خلينا نطلع و لمن طلعنا و هو اصر يعرف انا مالي حكيت ليهو و و و. و وريتو بالكلام القالتو لي سماهر و الحصل لي بعدها ....قلت ليهو ئهه اتخيل في النهايه العيب طلع فيني انا! ساي كنت عامله دراما و بتهم في الناس و عامله نفسي حاجه واو و في الحقيقه انا هبله و عويره و كمان لصقه و حشريه و......قاطعني و قال لي انا حبيتك بسبب الحاجات الإنتِ هسي بتقولي عنها هباله و عواره! ...انتِ مفروض تحمدي ربنا على نعمة النقاء و البراءه الفيك! وسط الخساسه و القذاره الحاصله في النفوس إنتِ الإنسانه الوحيده الكانت نقيه زي المويه و بريئه زي الأطفال و دي و أي زول شايف انو دي هباله أو عواره في دا إنسان نفسو وسخانه ، عشان بس كنتِ مميزه و بسيطه و على نياتك هم حاسدنك ، الناس كدا يعني يا تكون بتشبهم يا تكون عدوهم ما برضو بالتميز و ما بقدروا يتقبلوا فكرة انو الشخص دا احسن منهم و محبوب أكتر منهم ، هم لاقين يكونوا زيك عشان يقولوا عنك متطفله و حشريه؟
أنتِ جميلة لأنك ما حاولتي تتشبهي بزول ، في العالم المزيف و المليان نسخ و نفوس وسخانه انتِ الوحيده الكنتِ حقيقه و بتتصرفي على طبعك ، في الدنيا الكذب و الإصطناع كنت الصادقه الوحيده ، صادقه مع نفسك قبل ما تكوني صادقه مع الحوليك ، ما بتكلفي نفسك عشان تطلعي حلوه قدام الناس و ما بتقلدي شخص عشان تظهر رهيبه في نظر الناس أنتِ مميزه لأنك ما كنتِ إلا إنتِ ، فـ بس وريني كيف عايزا البشريه دي تتحمل كمية الرهابه و النقاء الفيك من دون ما تحاول تعكر صفوك و تهز كيانك! !؟
كلامو بالجد لامس قلبي و بكاني فـ لقيتني بقول ليهو ما عارفه يا عدنان ، بقيت ما بشوف في نفسي غير العيوب ، حتى بقيت اعمل ألف حساب لتصرفاتي و كلامي مع الناس عشان ما ينقال عني في وراي وحده لصقه و متطفله ، كلام سماهر ما راضي يطلع عن بالي يا عدنان ، قال لي نظرة الناس ليك و كلامهم عنك ظنون و معرفتك بنفسك و ثقتك فيها يقين عشان كدا ما تخلي يقينك يختلط بظنونهم ، نفسك انتِ أدرى بيها! عاملي الناس بالطريقه البتعجبك و البتريح ضميرك ، سلامة القلب دي ما عيب و زي ما قلت ليك مفروض تفتخري بنفسك و تحمدي ربنا انو روحك نقيه ، المهم في اليوم البعدو كنت فاتحه اللابتوب بشوف فيهو فيديوهات ، شويه كدا مزن جاتني داخله ، قفلت اللابتوب و قالت لي اليوم حـ تحكي لي! طبعاً ما استغربت لأنها ليها فتره بتقول لي انا متأكده انو في حاجه حاصله عليك ، ما انا بس ناس بيتنا كلها متأكدين من الحاجه دي ، مها إنتِ لو ما قادره تحكي لـ ماما و بابا و مازن أحكي لي أنا مش أختك !!
قلت ليها مااااف حاجه ، قالت لي سكوتك دا هو المضيعك ، براك بتظلمي نفسك و بتخلي الناس تهضم حقوقك و تستغلك! قلت ليها مزن قولي بسم الله مالك إنتِ هسي؟
قالت لي عرفت من مازن انك متناقشه مع صحباتك و هم هسي مقاطعنك ، أصلاً انا من زمان صحباتك ديل ما عاجبني و قبل كدا انا حذرتك منهم و قلت ليك البنات ديل لاقنك مسكينه عشان كدا بستغلوك بس انتِ ما سمعتي مني! هسسسي ديل بنات الواحد بنفسن و بكتئب عشانهم؟ للدرجه دي متأثره بيهم؟ ياخ ما يغوروا كان غاروا من حياتك بلااا و إنجلى ، شفتك صحباتك ديل كنت متمنيه ربنا يوقعهم فيني عشان اوريهم النجوم عز الضهر و أأدبهم و......قاطعتها و قلت ليها ما تتكلمي ساي ، الغلط ما غلطهم ، انا الغلطانه ، هم كانوا مستحملني و مستحملين هبالتي و عوارتك و حشريتي الكنت بعملها في خصوصياتهم ، قالت لي شنو شنو! !! منو القال كدا! قلت ليهو أنا القلت كدا ، قالت لي الكلاب بعد ما استغلوك كويس جاين هسي يقولوا ليك الكلام دا؟ ؟
قلت ليها يا مزن هسي انا قلت ليك هم قالوا لي كدا؟ قالت لي لو كنتِ بتقولي ما كان وصلتي للحاله دي ، زولة مازن دي ذاتها معاهم صح؟ مازن لمن حكى لي ما جاب لي سيرتها بس بما إنها صحبتك معناها يا معاهم يا معاك ......طبعاً لمن قالت انو مازن ما جاب ليها سيرة سماهر لمن قال ليها اني متناقشه مع صحباتي فهمت إنو ما عايز يخرب صورة مرتو قدام زول فيني! !
احترمت الحاجه دي و كذبت على مزن و قلت ليها لا لا بيني و بينها ماف حاجه اتطمن ، قالت لي طيب ليه ما قاعدين تتكلموا مع بعض! بحسكم كأنكم ما صحبات و ما كان في سابق معرفه بيناتكم! قلت ليها انا الما عايزا اتكلم مع الزول الفتره دي ، قالت لي اقسم بالله انتِ منفسنه! يااااا بت معقوله خاربه حياتك و موقفاها عشان شوية بنات مـ.......قلت ليها مززززن ما تنبذي بنات الناس! قالت لي حييييا انا منك شوفتي دا البخلي الناس تستغلك كدا لمن زيتك ينقط و في الآخر يجوا يقولوا عنك متطفله و حشريه! ! كلامهم دا ما كان يقولوا ليك من البدايه ليييه قالوهو بعد ما إتخرجتوا! !! ياخ انا ما فاهمه ذاتو ليه انتِ مديه موضوعهم اهميه كبيره و موقفه حياتك بسببهم! ياااا بت انا شلتي كلها ما فيها وحده خسيسه! كان في وحده بس عامله فيها ظريفه كانت ماشه معاي كويس و لمن خطبها واحد من الدفع القدامنا اتغيرت طوالي علي و بقت تنظر و تتفلسف و تلوي في خشمها و لو عتر ليها حجر تقول ادوها عين عشان مخطوبه شويه شويه بقت تقصدني بالكلام ، ياخ كانت وهميه لدرجه😂ولا اتفاهمت معاها ولا قلت ليها انتِ قاصده منو بكلامك طوالي قطعتها معاها و فكيتها عكس الهوا بت وسخه خلاص ، قلت ليها بس ديل كانوا صحباتي شديد ، قالت لي دي برضو كانت صحبتي شديد لكن طلعت عواليق في النهايه و زي ما نحنا بنتعامل مع الناس كويس بنستحق ناس تقدرنا و تعاملنا معامله كويس ، عواليق زي دي ما بقدر اخليها في حياتي و ذاتو عيب نقول عليها صاحبه ، قلت ليها ما بقدر أكون زيك ، قالت لي ما دي المشكله! !
المهم اتكلمت معاهو مسافه بخصوص الموضوع دا ، بعدها قالت لي بالمناسبه عدنان دا منو؟ ....هنا اتخلعت و قمت من السرير و قلت ليها بخلعه عدنان منو؟
قالت لي مالك منخلعه كدا😂انا البسألك فيك عدنان دا منو؟ لأني كذا مره سمعتك بتقولي اسمو في التلفون ، ماااا عايزا تحكي لي؟ يعني خلاص بقيتي كبيره و ما حـ تحكي لي زي زمان؟
قعدت في السرير و اتنهدت و قلت ليها دا كمان موضوع طويل ، صلحت قعدتها و قالت لي و انا فاضيه و ما وراي حاجه.....اخدت نفس عميق و قلت ليها بتعرفي سامي دفعتي صاح قالت لي انا سألتك عن عدنان ما سامي! ! قلت ليها جاياك بالكلام بس عايزا أحكي ليك القصه من البدايه و أوريك الحصل شنو بيني و بين صحباتي و السبب كان شنو و الحصل بيني و بين سامي و بين عدنان ، قالت لي اييييك ديل كلهم خربوا علاقتهم بيك؟😂
قلت ليها اسمعي.....................................................................الخ
بعد ما خلصت قالت لي ووووبعلييي دا كلو
و انتِ الغبيه لسه جاريه وراهم و عايزا تتأكدي عشان ما تظلميهم و و وننننن هبله إنتِ مها؟
حركاتهم كانت واضحه لكن انت يا سفيرة النوايا الحسنه ما بتستوعبي بسهوله ! و بعدين تعالي هنا ليه ما حكيتي لي عن قصتك إنتِ و عدنان؟
قلت ليها احكي اقول ليك شنو؟ ما ياها حركاتي حقت الشغب و الهباله البعملها للناس دي قلت اعملها ليهو عشان اغيرو و شنو ما بعرف....غيتو تفكيري كان وهمي شديد و......قاطعتني و قالت لي يعني هسي عدنان بحبك زي ما إنتِ بتحبيهو؟ قلت ليها ما عارفه انا ما.....قاطعتني و قالت لي اوووعك تقطعي علاقتك بيهو عشان ولد عمو سامي ، حتكوني غبيه لو فكرتي تظلمي نفسك عشانو! يعني شنو اذا ما حبيتيهو هو و في نفس الوقت حبيتي ولد عمو! ياااا زوله انتِ ما غلطانه و بطلي تفكير في الناس و مصالحهم لـ مره وحده بس فكري في نفسك ، اثناء ما هي بتتكلم معاي كدا تلفوني رن ، المتصل كان عدنان ، هي أول ما شافت الإسم طوالي خطفت التلفون و قامت من جنبي و ردت عليهو و قالت ليهو كيييفك يا (صِهرنا ) بلغة الهنود😂.....اتخلعت و طوالي قمت من مكاني و جريت عليها و حاولت اشيل منها التلفون قلت ليها بصوت واطي يصهر مخك يا مزن جيبي التلفون دا ، زحت يدي منها و قالت ليهو لا لا أنا أختها مزن.....كويسه الحمدلله انت كيفك و أخبارك شنو .....لا لا تمام والله......موجوده .....هدي جنبي بتقابض في التلفون عشان عايزا تتكلم معاك🙈
لمن قالت كدا لبعتها في ضهرها و قلت ليها غلطت لمن حكيت ليك ، قالت ليهو هسي لبعتني عشان طولت في الكلام معاك واضح إنها بتغير عليك ، لمن قرصتها قالت ليهو برضو قرصتني ......اي شريره شديد ساي بتكتل ليك حيلها 😂سمعني هاااك ليها هااااك و إلا حـ تقطعي لي لحمي دا كلو ، مدت لي التلفون و قالت لي صوتو رهييب و فيهو بحه كدا استغفر الله بس ، نططت عيوني و أشرت ليها على التلفون نظام بكون سامعك ، أدتني التلفون و طلعت برا ، كنت خجلانه شديد و ما قدرت اقول ليهو حاجه ، قال لي آلوووو .....قلت ليهو احم سامعاك ، قال لي دي أختك صح؟
قلت ليهو اي مزن دي مجنونه شويه فـ آسفه على.....قاطعني و قال لي ظريفه و دمها خفيف ، سكته ساي لأنو مزن دخلتنا في ضفوري لمن قالت ليهو (صهرنا ) هسي حيقول عني شنو؟ حيقول اني عشمانه فيهو لدرجة اني مكلمه أهلي عنو! !؟
قال لي خير ساكته ليه؟ قلت ليهو اقول شنو يعني؟ قال لي قولي أي حاجه ، قلت ليهو ما عندي حاجه اقولها ، قال لي مها إنتِ ليه محسساني إني فارض نفسي عليك! في شنو قولي لي؟ زي ما انا كنت صريح معاك متمني ألقى الصراحه دي منك عشان ما نكون دايرين في حلقه فارغه! اذا عندك مشكله قولي لي أو عندي أي اعتراض على البينا ما تترددي قولي لي عادي عشان ما ازعجك بالمكالمات دي😊
سكته و ما عرفت اقول ليهو شنو ، انا ضايعه و خايفاهو يخذلني والله ، ما بقدر اتحمل اي صدمه أو خذلان من أي زول دا غير قلبي الواجعني على سامي الما حصل شفت منو شينه و الدايماً كان واقف معاي و متى ما احتجتو بلقاهو قدامي💔
قلت ليهو ما عارفه يا عدنان انا ما......قاطعني و قال لي بعد دا كلو ما عارفه نفسك عايزا شنو؟ ....تمام يا زوله وقت تعرفي نفسك عايزا شنو كلميني و طوالي قفل الخط في وشي ، زعلت زعل ما عادي والله ، ختيت التلفون و بقيت ببكي بس ، فجأه مزن جات داخله و قالت لي كنت عارفاك غبيه و حـ تخربي على نفسك ، سمعت كلامك القلتيهو لـ عدنان لت ليها خايفاهو يخذلني و خايفه من ردة فعل سامي و الخيبه و الكسره الحـ تصيبو لـ عرف بالتطور الحصل بيني و بين عدنان ، سامي زول كويس و ما يستاهل مني الطعنه دي والله ، انا على الأقل لو ما حبيتو هو ما كان مفروض أحب ولد عمو 💔
قالت لي الحب دا الحاجه الوحيده الما بنقدر نسيطر عليها أو نتحكم فيها ، ايوه صح سامي حـ يزعل و يتضايق و يتكسر بس دا ما معناهو انك تتنازلي عشانو! بعدين مفروض روحو تكون رياضيه! انتِ عديل مشيتي صارحتيهو عشان ما يتعشم فيك مفروض يقدر ليك الحاجه دي و كفايه جداً انك بتعتبريهو زي أخوك و ساعيه عشان ما تجرحيهو و لو هو إعترض على البينك و بينا عدنان تبقى دي أنانيه منو معناها يا تحبيني أنا أو ما تحبي غيري ، اسمعيها مني يا مها و ما تخربي لنفسك ...
المهم مزن دي اتكلمت معاي كدا لمن فترت في النهايه قالت لي لو ما حـ تسمعي مني ما حـ اتعب نفسي و اصرف عربي كتير ، بعد ما طلعت مني بمسافه نزلت تحت لقيت مازن بحضر ساي ، لمن شافني قال لي اوووو المختفيه! مشيت عليهو و قلت ليهو ما مختفيه ولا حاجه موجوده أنا! قال لي تعالي اقعدي جنبي ، لمن مشيت قعدت جنبو وطى صوت التلفزيون و قال لي هااا قولي لي أخبارك شنو؟ قلت ليهو كويسه؟ قال لي متوقعك تقولي كدا ، المهم ما عندك نيه تنزلي تشتغلي في الشركه؟ قلت ليهو بفكر في الموضوع (طبعاً سماهر ليها حكاية أسبوعين نزلت تشتغل في الشركه ) قال لي حيرتيني يا أختي ، شويه كدا سماهر جات طالعه من المطبخ و هي شايله كبايتين شاي ، ختتهم بزهج و قعدت ، اصلاً ليها حكاية اسبوع كدا ما على بعضها بس ما قاعده اسألها و أصلاً بيني و بينها ماف كلام ، مازن قال ليها هااا خير مالك؟
قالت ليهو بزهج ولا شي! مشى قعد جنبها و قال ليها اممم واضح انك زعلانه عشان ما جبت ليك التلفون القلتي لي عليهو صح! ما ردت عليهو ، إبتسم و قال ليها لو كنتِ فتحتي الدولاب اليوم ما كان حـتكوني زعلانه كدا!
إتلفتت عليهو و قالت ليهو شنو؟
إبتسم و قال ليها التلفون فوق ، قالت ليهو بفرحه كدا ما بصدق يا مازن جبتو لي؟
قال ليها معقوله تطلبي مني حاجه و ما أجيبها ليك!؟ قالت ليهو واااي ما بصدق ربنا يخليك لي و طوالي قامت و جرت على غرفتهم ، ما عارفه ليه حسيت بالغيره و انا بعاين ليهم! قلبي كان واجعني شديد! مازن كان بهتم بي انا و بدلعني حتى أكتر من مزن و هسي شايفاهو بقى مهتم بـ سماهر أكتر مني💔
مع اني ما الزوله الشرانيه ديك ولا الزوله البتحسد الناس و ما بتتمنى ليهم الخير ، بس مازن دا تحديداً ما بحبو يعامل زول غيري بالطريقه البعاملني بيها ، بحس انو معاملتو اللطيفه دي مفروض تكون لي أنا و بس ، يعني ماما لمن بتعامل سماهر معامله كويسه و تبوسها ما كنت بتضايق زي لمن مازن هو الـ يدلعها ، بقيت بزعل شديد لمن اشوفو جايب ليها كميه من الحاجات و زمنو كلو بقى يقضيهو معاها💔
يتبع