فعلاً سامي جاني ، كنت متردد كيف افاتحو في الموضوع بس ما برضو السكوت كان صعب بالنسبه لي ، قال لي بضيق في شنو؟
قلت ليهو اولاً ممكن أعرف ليه إنت متغير علي كدا؟ !!
سامي نحنا ما أولاد عم نحنا أصحاب حتى لو كنت انا متطرف شويه بس انت عارف إني ما بتعامل مع زول غيرك و عارف معزتك عندي و انا عارف معزتي عندك لو شفت مني أي شي ضايقك و زعجك ياخ تعال شاكلني لومني بس ما تسكت و تخليني محتار في البحصل قدامي! هسي انا ما عارف عملت شنو ضايقك بس متأكد انك متضايق مني و السبب قوي و إلا ما كنت حـ تجافيني بالطريقه دي ، قول لي في شنو! المزعلك شنو؟
سكت ما رد علي ...
قلت ليهو انت أوعى من كدا و حركات الزعل و السكوت دي مفروض ما تطلع منك انا في النهايه ما غريب عنك ، صارحني عديل و قول لي انت عملت كدا و للسبب دا انا ماخد موقف بس ما تعمل حركات النسوان دي و تختفي و تزعل .....كنت قاصد اقول انو دي حركات نسوان عشان استفزو و أخليهو يتكلم و فعلاً الكلمه استفزتو فـ طوالي قال لي بضيق في شنو بينك و بين مها؟ ؟
قلت ليهو إنت جاوبني على السؤال دا ، قال لي أجاوبك؟ نظام ما عارف يعني؟
_ ما عارف شنو؟
= عدنان عليك الله ما تقعد تستهبل لي
_ انا ما بستهبل جادي معاك!
= جايبني ليه؟
_ جاوبني
= عدنان انا ما ناقصك لو بالجد انت ما كنت عارف كنت حـ تستغرب من سؤال: "في شنو بينك و بين مها " بس ردة فعلك الطبيعيه حسستني انك عارف و فعلاً انت عارف
_ اعرف من وين؟
= كلام الكتير عنها ما وضح ليك قدر شنو هي بتهمني؟
لمن قال كدا ما عجبني الكلام و حسيت بالغيره بس واصلت و قلت ليهو ما فهمت لأنك ما حصل صارحتني بإنك بتهتم بيها ، يعني كونك تتكلم عنها على طول دا ما خلاني افكر انها بتهمك لأنك كـ عادتك دايماً بتتكلم عن الناس البتحس شخصيتهم بتشبه شخصيتك
= خلاص هسي خليك عارف انها بحبها و شديد كمان
هنا سكته و بقيت أعاين ليهو جوه عيونو و هو كان بعاين لي بنفس الطريقه! ....قلت ليهو و هي؟ ؟
= عايز أعرف إنت ليه بتسأل عنها هي بالذات؟
_ ساي بس
قال لي بضيق ساي؟ ...قايلاني غبي و ما فاهم الحاصل قدامي! ....ما قلت عامل فيها ما عندك حاجه للبنات و ما شغال بيهم ، فهمني بس هسي ليه شغال بالبت دي و مركز معاها؟
_ سامي انا..
= يعني خليت بنات السودان دا كلو و جيت تشاركني فيها! ؟ ما لقيت غيرها و...
قاطعتو و قلت ليهو روق يا سامي ، ما عارف اقول ليك شنو اذا انا نفسي ما فاهم نفسي بس خليك عارف إني مستحيل اخسر ولد عمي عشان بت ، علاقتي بيك أقوى من إنو تهزها بت ابشر والله و حلال عليك.....لمن قلت ليهو كدا هدى شويه بس كان بعاين لي بنظره ما قدرت أفسرها! حسيتو زي العايز يقول حاجه بس استأذن مني و مش! ....بقيت افكر و اقول اذا هي ما بتحبني و بتحب سامي فـ ليه كانت محسساني انها بتحبني؟ ؟
طوالي اتذكرت لمن قالت لي انها دخلت معاهم في تحدي عشان تحاول تغيرني! !! معناها تصرفاتها معاي دي كلها جزو من التحدي حقها! ! ايوه صح صحباتها الدخلت معاهم في تحدي حالياً طلعوا من حياتها بس شكلها لسه مصره على التحدي دا! ! اذاً مواقفها ديك كلها كانت عشان تخليني اتفاعل معاها و تغيرني!
بس فعلاً انا اتفاعلت معاها! لسه ما ناسي انها خلتني في تاني يوم لتخريجها ارسل ليها هديه و تهنئه بمناسبة التخرج! تأثيرها علي كان كبير لدرجة اني دخلت الفيس بحساب وهمي عشان اقدر اتابعها و اعلق ليها على راحتي!
اذاً الحصل دا كلو عباره عن تحدي؟ طيب ليه فجأه كدا إختفت و حذفت حساباتها؟ .....يمكن سامي طلب منها تبطل البتعمل فيهو دا؟ ....ايوه يمكن! زي ما زعل مني بسببها معناها زعل منها لأنها متواصله معاي! للسبب دا هي إنسحبت من حياتي ".....للمره التانيه حسيت بالخذلان ، بس الغلط غلطي أنا
________________________________________
طبعاً لمن عرفت انو عدنان جا بيتنا و أنا ما شفتو قربت أبكي ، بالصدفه سمعت بابا و مازن بتكلموا عنو و عن انو زول كويس ، طبعاً من كلامهم عرفت انو جانا قبل يومين و انا ما كنت جايبه خبر فـ ما شفتو 💔
هو براهو البدا يختصرني أو خليني اقول انا الفرضت نفسي عليهو و اتحشرت في حياتو ، مفروض بعد الشفتو من صحباتي ما يكون عندي ثقه في ناس ، عدنان لا بحبني لا حصل لمح لي بالحاجه دي ، براي إتعشمت فيهو و فسرت تصرفاتو على هواي💔
بقيت افكر فيهو اثناء ما أنا واقفه في المطبخ ، فجأه سماهر جات و قالت لي بصوت عالي الشاي يا بت فااااار ما شايفاهو! ياداب ركزت و طفيت النار ، قلت ليها ما كنت مركزه ، رصيت الكبابي و بديت أكب في الشاي ، جات وقفت جنبي و قالت لي آي ملاحظه إنو ليك فتره ما على بعضك ، مالك في شنو؟ ؟
كان نفسي بالجد أحكي ليها و افضفض ليها زي زمان بس للأسف النفوس اتغيرت ، مع إني لحد اللحظه ما قدرت أواجها و اصارحها بس بالجد في شي جواي اتغير اتجاها ، قلت ليها ماف شي و طوالي شلت الشاي و مشيت وديتو لـ ناس بابا ، مازن من الشاي رشفه و قال لي الله الله الشاي حقك دايماً ظابط ، ماما قالت لي ما شاء الله بقيتي بت ، هنا سماهر ضحكت ، بابا قال ليها من يومها بت و ست البنات ناسيه انها بتعرف تطبخ !؟
مُزن قالت ليهو ماما مستحيييل تشكر ليك زول ، سماهر قالت ليهم هييي هييي شنو فجأه كدا كلكم قلبتو على حماتي؟ ....ماما قالت ليها تسلمي لي يا حبيبه ، المهم هي و ماما بدوا يدافعوا عن بعض و بابا و مازن و مزن بدافعوا لبعض و انا الوحيده الساكته في نصهم ، بابا قال لي ما من عادتك ساكته ليه إنتِ؟
قلت ليهو لا لا ولا شي😅
طوالي لقيت مازن بعاين لي ، نظراتو لي بتوترني ، المشكله إني لو قمت منهم حـ يشك في الموضوع و حـ يجي لاحقني في غرفتي عشان يعرف أنا مالي ، بالغصب بقيت اشارك و أضحك معاهم بس من جواي كنت مهزومه و حاسه بفراغ و وحده ما عاديه ، يعني اتخيل تكون محاط بكميه من الناس البتحبهم و فجأه كدا كلهم يختفوا و يخلوك براك ، المحيرني انهم كلهم طلعوا بكرهوني! لو نفر أو اتنين ما مشكله بس كونو كلهم يتغيروا علي معناها العيب فيني انا! طيب عيبي شنو دا الما قادره أشوفو! عماد ، سماهر ، روان ، ميامن ، سامي ، عدنان ، كلهم اختفوا من حياتي فجأه كدا و طلعوهم كان ليهو تأثير كبير على نفسيتي ، بقيت بقفل نفسي في غرفتي و معظم وقتي بقضيهو نوم حتى الشغل في الشركه خليتو و قلت ليهم ما بقدر على الصغط دا حالياً ما جاهزه لأي شغل ، زمان كنت بشغل نفسي بالتلفون و حالياً انا حاذفه حساباتي كلها و منعزله عن الناس ، بقيت شبه إنطوائيه ، في فترة شهر انا خلاص اتغيرت ، في الشهر دا ماما و سماهر علاقتهم بقت زي السمنه على العسل و مازن طبعاً كان مبسوط من الحاجه دي كنت حـ انبسط زيهم و اقول سماهر اتغيرت بعد العرس بس عشان بدت تعمل لي حركات اتأكدت تماماً انها زوله ما كويسه و انها ما البت البتناسب أخوي بس ما كنت قادره اعمل حاجه لأنو حركاتها دي بتعملها لي لمن نكون برانا و قدام الناس بتتعامل معاي تعامل مختلف تماماً ، دا وضح لي إنها عندها مشكله شخصيه معاي! يوم مازن قالت لي جهزي نفسك حـ آخدك مشوار مع إني رفضت بشده بس هو كان مُصر ، لمن جهزت نفسي و جيت طالعه لقيت سماهر واقفه معاهو و سمعتها بتقول ليهو طيب ماشين وين؟ قال ليها طالعين ناكل آيسكريم ، قالت ليهو عايزا أمشي معاكم ، قال ليها حـ اسوقك بكرا بس هسي عايزا اسوق مها براها زي ما شايفه حالتها النفسيه الفتره دي ما تمام فـ حابب نكون برانا عشان أفهم منها الحاصل عليها! ....سكتت ما قالت حاجه ، لمن جيت نازله مازن قالت لي اول مره في حياتك تجهزي بدري ، قلت ليهو عشان لبست عبايه ، قال لي عبايه سوداء و طرحه سوداء و جزمه سوداء! ! مالك مسوداها كدا؟
قلت ليهو الأسود حلو ، قال لي خليني نمشي ، المهم طلعت معاهو و انا واثقه انو خاتي في راسو يفهم مني أنا مالي ، المهم وصلنا المطعم و جاب لي آيسكريم بالنكهه البحبها ، اثناء ما أنا باكل كدا قال لي أنسي إني اخوك ، قلت ليهو نعم؟ ؟
قال لي انسي اني اخوك و احكي لي الحاصل معاك ، متأكد اني حـ اقدر أحل مشكلتك و لو ما كانت مشكله حـ اقدر احفف عليك المهم اني متأكد انو حـ أقدر أساعدك ، ما تسكتي و تقلقيني عليك ، عارفه اني الفتره دي نفسياً كدا ما مرتاح عشان كل يوم بشوفك بتتغيري للأسوأ ، شيلتيني هم والله و حسستيني بالعجز لأني ما قادر اعمل ليك شي ، ريحيني و أحكي لي إنتِ مالك؟
قلت ليهو بالجد ماف شي يا.......قاطعني و قال لي لا انا متأكد إنو في شي و المره دي ما حـ اخليك زي كل مره ، لازم تحكي لي ، اليوم ما حـ نرجع البيت إلا اعرف إنتِ مالك ....طبعاً بقى يعاين لي جوه عيوني و هو منتظر مني رد و انا خلاص عيوني إتملت دموع ..فجأه انفقعت بالبكى و ما عرفت أسكت نفسي ، ما حاول يمنعني من البكى ، بالعكس قال لي ابكي قدرتك و بعدها أحكي لي ، يمكن ربع ساعه و انا ببكي و ما قادره أهدى شويه ، بقى يقول لي خلاص احكي لي الله يخليك و ما تقلقيني عليك ، طبعاً انا لمن اكون ببكي و منهاره بحكي طوالي عشان كدا كنت ماسكه دموعي الفتره ديك و ما حبيت ابكي قدام زول من ناس البيت لأني كنت حـ احكي ليهو اثناء بكاي ....
قال لي مهاوي انا أخوك ما غريب! انتِ خايفه مني ولا شنو؟
بعد مسافه قلت ليهو بصوت باكي لو قلت ليك حتزعل مني ، قال لي و يعني؟ ....ما عارف الموضوع شنو بس ما كارثه عظيمه لو زعلت! المهم عندي اعرف الحاصل عليك و حتى لو طلع الموضوع بالجد بزعل اثناء زعلك حـ اقيف معاك و لو في مشكله حاصله عليك حـ احلها ليك و انا زعلان ....انتِ بس جربي تحكي لي
فعلاً فتحت خشمي و بديت أحكي ليهو من اول مره اتغيروا فيها علي صحباتي و حكيت لي بالكلام القالو لي سامي عنهم و عن الحصل بعدها لغاية كلام نور و كيف اني عرفت انو نور و سماهر بنات أعمام و لمن جبت ميامن و روان عشان اتأكد من كلام نور و سامي و و و و يعني حكيت ليهو الحصل بالتفصيل بس خالص ما جبت ليهو سيرة عدنان أو عماد ، ما كنت عايزا مازن يعرف انو عماد بحب سماهر لأني متأكده انو حيزعل ، مازن بحب سماهر شديد بس ما عارفه اذا هي بتحبو أو لا و برضو ما حكيت ليهو بحب سامي لي .....في نهاية كلامي قلت ليهو حالياً علاقتي بيهم مقطوعه و ما قاعده اتواصل معاهم و هم كأنهم كانوا عايزين ليهم فرصه عشان يفصلوها مني ، قول لي يا مازن أنا سيئه للدرجه دي؟ المجنني انو لحد اللحظه دي ما قادره افهم ليه هم طلعوا كدا؟ عملت شنو انا يا ناس عشان كلهم يقاطعوني! معناها انا ما كويسه أكيد فيني عيب نفر الناس دي كلها مني و....
قاطعني و قال لي عارفه مشكلتك شنو؟ ...اني بتصدقي أي كلام بتقال ليك ، يعني لو ما سمعتي كلام زميلكم داك و نور ما كانت دخلتي في دوامة الشكوك دي كلها و ما كان نفّرتي صحباتك منك بسبب ظنوك فيهم ، هم أكيد زعلوا منك بسبب تصديقك للكلام الإنقال عنهم عشان كدا انا مية مره حذرتك و قلت ليك خليك بعيده عن نور يا مها بس انتِ كالعاده ما سمعتي مني ، قلت ليهو بس لمن راجعت مواقفهم معاي و اتذكرت ادق التفاصيل لقيت انو هم فعلاً كانوا بستغلوني ، و مواقفهم الآخيره دي كانت خير دليل ، قال لي سماهر ما كدا يا مها ، قلت ليهو برضو كنت بقول كدا بس اول ما اكتشفت انو نور بت عمها و هي رغم انها شافت صورة نور معاي ما قالت لي إنو دي بت عمها ، عملت نفسها ما بتعرفها! ...قال لي لأنو في خلاف بيناتهم و سماهر ورتني انها ما بتطيق نور و نور ما بتطيقها للسبب دا هي ما بتحب تقول عنها بت عمها ، قلت ليهو طيب عارف سبب الخلاف شنو؟
قال لي ايوه عارف ....هنا سكته ، ما عرفت اقول ليهو شنو تاني و اصلاً انا لسه كنت متردده و ما عايزا علاقتو بـ سماهر تخرب بسببي بس واضح انو واثق فيها شديد و كلامي ما حـ يأثر في علاقتهم بس المهم اني فضفضت ليهو و ختيتو في الصوره ، قال لي عايزك تشيلي الأوهام دي كلها من راسك و ترجعي تتعاملي بطريقه طبيعيه مع صحباتك خاصة سماهر ، لو تابعتي نور و كلامها حـ تضيعي نفسك انت بسبب الكلام الفاضي دا يوم عرسي ما كنتِ مبسوطه! ....انتِ عارفه اني ذاتي ما حسيت بطعم السعاده يوم عرسي عشان شايفك ما مبسوطه! اتخيلت انو في موضوع كبير حاصل عليك و ما مخليك تكوني مبسوطه حتى في اهم يوم بالنسبه لأخوك و الصدمه كانت انك سامعه ليك كلام بايخ و مكرر من وحده أنا حذرتك منها! !
قلت ليهو مازن أنا.....قاطعني و قال لي خليني نمشي البيت ، قلت ليهو كنت عارفاك حتزعل مني ، قال لي لأنو بالجد تصرفاتك بتزعل و الحاله اني حذرتك من نور!.....المشكله انك بعد دا كلو ما شايفه نفسك غلطانه و لسه مصدقه! عرفتي عيبك شنو؟ ...عيبك انك سميعه و بتصدقي بسهوله و سهل انو الواحد يخليك تخربي علاقتك بالحوليك! ....قلت ليهو مازن انا.....قاطعني و قال لي خليني نمشي البيت ....طول الطريق هو كان ساكت و لمن اتكلم معاهو ما برد علي ، سكت كدا لغاية ما وصلنا البيت ، مشيت غرفتي و كملت البكى هناك.....
___________________________
في غرفة مازن و سماهر
_ بس قولي لي علاقتك بيها كويسه ولا لا؟
= هي شكت ليك مني؟
_ سماهر جاوبيني علاقتك بـ مها كويسه ولا لا؟
= ما عارفه يا مازن من ناحيتي ما عندي مشكله معاها ، هي الإتغيرت علينا فجأه و بقت تتهمني بحاجات نحنا ذاتو ما حصل فكرنا فيها! نور قالت ليها اننا...........الخ و من يومها و هي شاكه فيني و بدت تتخيل في قصص و تفسر على كيفها!
_ طيب نور انا و إنتِ عارفنها بتعمل كدا ليه ، بس الإسمو سامي ولا منو داك ليه يقول نفس كلام نور و يكون مُصر عليهو؟ يعني هدفو شنو؟
= من كلامك دا معناها هي حكت ليك! بس معقوله ما عرفت ليه سامي عمل كدا ولا هي ما قدرت تقول ليك سامي دا منو!
_ ما فهمت!
= سامي دا كان بحب اختك و كلنا عارفين الحاجه دي و عارفين انو مها ولا يمكن تقبل بيهو عشان كدا انا و روان و ميامن بكل ذوق قلنا ليهو يا سامي مها ما حـ تقبل بيك عشان كدا شيل الفكره دي من راسك و بقينا كل مره نقول ليهو في الكلام دا لحد ما شمانا و بقى يقول اننا بنملى ليها راسها ، عرفت هسي ليه هو قال ليها كدا؟ ؟
_........(طبعاً مازن راسو لفه بسبب الكلام دا! !)
_ المهم عايزك هسي تمشي ليها و تحلوا المشكله البيناتكم
= جداً يا مازن و زي ما قلت ليك انا ما عندي مشكله معاها
______________________________
اثناء ما انا قاعده في غرفتي و ببكي ، سماهر جاتني داخله ، قفلت الباب و قالت لي كويس انك ظهرتي على حقيقتك! عايزا بأي طريقه تخربي بيتي صح؟ قلت شنو عني لـ مازن؟
قلت ليها انا ما عايزا أخرب بيت أي زول ، مازن هو الأصر علي عشان أحكي ليهو ، قالت لي و عشان انتِ مسكينه و بريئه و ما بتعرفي تكذبي طوالي حكيتي ليهو! ئهه و تجي تقولي لي انك ما عايزا تخربي بيتي؟
قلت ليها بس عايزا اعرف يا سماهر عمل ليك شنو انا ليه الكراهيه دي كلها! ناسيه اننا كنا صحبات؟
قالت لي شفتي كلامك البايخ دا واحد من الأسباب الخلتني ننفر منك ، قلت ليها عارفه أنا ندمانه على اليوم العرفتكم فيهو ، الكلام القالوا نور و سامي عنكم كان حقيقه ، انتوا فعلاً بنات ما كويسات و.......قاطعتني و قالت لي طيب نحنا ما كويسات و انتِ الوحيده الكويسه في العالم دا ، بس قولي لي سامي كمان ما كويس زينا؟ وينو هو هسي؟ ليه ما واقف معاك؟ ليه علاقتكم مقطوعه! بس اوعك تقولي لي حتى سامي ما كويس زيكم و تقعدي تعملي دراما! لو طلعتي من دور الضحيه حـ تفهمي الناس دي نافره منك ليه! قلت ليها اصلكم بتحبوا تستغلوا الزول الطيب ....قالت لي اوووف ياخ عليك الله فكينا من كلمة استغلال دي! اقول ليك حاجه؟ فعلاً في البدايه ما كنت بحبك و زي ما عارفه دايماً بعمل ليك مشاكل في أولى و بحاول اتناقش معاك ، بس حب الناس ليك خلوني افكر المميز فيك شنو عشان الناس دي كلها تحبك و تتكلم عنك ، لمن قربت منك شويه فهمت ليه بحبوك و فعلاً انا و روان بعد ما اتعرفنا عليك شخصيتك و طيبتك عجبتني بس مع الزمن ملينا منك و من حشريتك و طيبتك الزايده عن الحد ، اكتر حاجه غياظه فيك حشريتك بتتحشري في البخصك و الما بخصك و عامله نفسك سفيرة للنوايا الحسنه ، ميامن ذاتها لمن اتعرفت عليك بعدينا ملت منك مع انو ماف زول فينا حكى ليها كلام عنك براها بقت ما بتطيق كلامك و تطفلك و لصقتك ، ياخ انتِ لو لقيتي وحده مننا ساي ماسكه تلفونها و مركزه معاهو بتخطفيهو منها عشان تشوفيها بتتكلم مع منو عشان تعملي نفسك بطله و تمشي تجيبي ليها الزول دا و تحاولي تقربيهم من بعض! و دا غير تصرفاتك الطفوليه و الهباله البتعمليها قدام الناس! انتِ شايفاني ما كويسات بس في الحقيقه انتِ الما كويسه و إنتِ الما طبيعيه ، متأكده انو الناس الكانت معجبه بيك في الجامعه لو كانوا قربوا منك زي ما نحنا عملنا بطونهم كانت حـ تطم منك ، انا حـ اقول ليك الحقيقه رغم اني حاولت اتقبلك و اطول بالي عليك عشان حبيت اخوك مازن ما قدرت ، انتِ بت لصقه و ما بتنطاق و المشكله انك شايفه نفسك عظيمه و رهيبه و دايماً بتشوفي انك الصح و غيرك هم الغلط و بتحبي دور الضحيه زي عيونك .....ايوه صح انتِ انسانه كريمه و ما بتبخلي على زول بس دي ما حاجه بتشفع ليك ولا حاجه بتغطي ليك كمية العيوب الفيك اي زول عرفك و اتقرب منك بتندميهو على اليوم العرفك فيهو ....ما كنت عايزا اتكلم بس كلامك الغبي و لومك المستمر لينا و دور الضحيه الإنتِ فيهو دا هو الخلاني اتكلم ، براك وصلتي الناس لدرجة بقت ما قادره تطيق فيها ، انا شخصياً انتِ طلعتي من نفسي و حرفياً ارتحت من اتصالاتك المزعجه نص الليل عشان بس تقولي لي عايزا اقرب فلان من فلانه أو اصالح فلانه و علانه! ما عارفه منو االقال ليك انو اقدار الناس دي بين إديك و إنتِ البتتحكمي فيها! انا كنت مجبوره اتعامل معاك و اتحملك عشان حبيت اخوك بس ميامن و روان من السنه التالته بطونهم طمت منك بس عشاني كان مواصلين معاك و ماف زول قادر يقيف في وشك و يقول ليك حقيقتك ، فيك كميه تطفل و حشريه مبالغ فيها لا بتحترمي خصوصية زول لا بتبطلي تتخذي قرارات عن غيرك ياخ حتى عماد دا حاولتي تلصقيهو فيني! هو اساساً ما كان مركز معاي براك بقيتي تقولي ليهو تعال اشرح لينا الحاجه دي يا عماد و لمن يجي بتقولي ليهو جيت عشان سماهر مش و تعملي نفسك ظريفه و تقعدي تشغليها لينا! لا و كمان بتخلقي مواقف من ماف عشان تقربينا من بعض! و بتبذلي جهد عشان تخلي عماد يركز معاي و كلو عشان حب السيطره و التحكم الجواك قال ليك الإتنين ديل مناسبين لبعض! رغم انو حركاتك كانت مضايقاني بس عشان ما اتوقعت انو عماد يحبني جد جد ما اتكلمت معاك بخصوص الموضوع دا! بعد ااتخرج افتكرت انو خلاص الموضوع انتهى قمت تاني ضفتيهو في قروباتنا لا و كمان مشيتي جبتيهو من ماف عشان تلصقيهو فيني! ياخ انتِ بت ....لا تطاق حرفياً ...
طول فترة كلامها و انا عيوني ما جفت من الدموع! اتنهدت و قالت لي في نهاية كلامها و بعد دا كلو لسه مصدقه انك مظلومه و مكتئبه و عايشه الدور و منفسنه! لا و كمان جريتي حكيتي لـ مازن الأوهام الفي راسك! بس كويس انو واثق فيني.....شوفي انا بحاول قدر الإمكان اتجاهلك و اتجاهل الحركات البتعمليها قدام مازن عشان تحسسيهو انك زعلانه و في حاجه حاصله معاك عشان تخليهو يجري وراك و يخلي الوراهو و القدامو عشان يعرف الحاصل عليك......رجاءً ما تكرهيني فيك زياده ، خلي كل وحده تركز مع حياتها لا تجيبي سيرتي لا انا أساساً قاعده اجيب سيرتك ، شيلي الدراما بتاعتك دي و الأوهام الفي راسك دي و امشي بيهم بعيد عن مازن و خليهو يعيش حياتو.....
قالت لي كدا و طلعت و خلتني منهاره على الآخر و جسمي دا كلو صابي عرق و دموعي زي الشلال و راسي دا حسيتو حـ يطق! انا بالجلاله قدرت أمشي على سرير ، رقدت و اتغطيت بالبطانيه و اتكرفست و لسه جسمي صابي عرق و برجف كل ما اتذكر انها قالت اني ما بنطاق و اني حشريه و لصقه و انهم من زمان متحملني و و و ، كلامهم عشعش في مخك و النوم طار من عيوني ، ليلي داك كلو شلتو بقى و انا حاسه إني محمومه بصعوبه كنت بتنفس ، حقيقةً يعني في ليلي داك حسيت إنو دي روحي عايزا تطلع 💔
في صباح اليوم البعدو ما قدرت اقوم من السرير و في الحقيقه عيوني ما قدرت أفتحها ، كنت ببكي بس و بكاي دا زاد لمن سمعت صوت ماما و هي بتحاول تصحي فيني ، بقيت ببكي بصوت عالي و مسموع بعدها جاني صوت مازن و بابا و مزن ، للحظات فتحت عيوني و شفتهم بعدها الرؤيه بدت تقل لحد ما اختفوا و تاني لا شفت لا سمعت 💔
أحياناً لا تملك حق الانهيار أو حتى الاختيار ، تكون مجبراً على تجاوز كل شيء ، ومجبراً أن تبقى على قيد الأمل
فاللهم اختر لنا ولا تخيرنا فإننا لا نحسن الاختيار
يتبع