لمن إتلفت وراي لقيتو دا عماد!
قلت ليهو عماد! كيفك يا زول! قال لي تمام الحمدلله ، سلم علي و على نور و قال مختفيه وين انتِ برسل ليك بس ماف رد! قلت ليهو والله تلفوني اتسرق ، قال لي لا ياخ متين الكلام دا! قلت ليهو قبل أسبوعين ، قال لي ما كنت عارف والله .....سكتنا الإتنين و انا عرفتو عايز يقول حاجه ، استأذنت من نور و مشيت قعدت معاهو في طاوله تانيه ، قال لي اها سماهر دي ما حصل جابت ليك سيرتي و ما حصل لمحت ليك و انتِ ما لمحتي ليها تاني؟
قلت ليهو لا والله بس اسمع مني يا عماد ما تقول احسن انتظرها تحس بي ، الإنتظار دا هو البضيع الفرص ، أمشي ليها عديل و اتكلم معاها و صارحها أحسن من سكاتك دا! قال لي و لو رفضت؟
قلت ليهو حاول مره و اتنين و تلاته لحد ما توافق ، قال لي طيب اذا ما وافقت!
قلت ليهو صدقني احسن ليك تعرف القرار النهائي ليها شنو احسن من الجهجهه الإنت فيها دي كلها حتى لو قرارها دا كان الرفض ، سكت مسافه بعدها قال لي كلامك صح بس قبل ما أصارحها حـ احاول اتقرب منها عشان تعرفني شويه و تكون واثقه إني ما حـ أخذلها ، قلت ليهو طيب تمام ، يلا حـ امشي لأصحابي ، شلنا ارقام بعض و هو مشى و انا رجعت لـ نور ، بقت تغمز لي في عيونها ، قلت ليها هيييي هييي ما تمشي شمال ، دا واحد بحب صحبتي و هسي جا يشاورني يعمل شنو ، قالت لي ايوااا ، قلت ليها بتمنى انها توافق عليهو لأنو بحبها و منتظرها من زمان ، قالت لي صحبتك مشكلتها شنو هي؟
قلت ليها كانت بتحب ليها واحد و خذلها عشان كدا ما فكرت في زول تاني و بقت ما بتخلي أي زول يقرب منها و دا الشي المخلي عماد يتردد و ما يمشي يصارحها ، قالت لي الحياة دي مليانه خذلان الواحد بس ما يظلم نفسو و الأفضل يديها حقها ، قلت ليها بالظبط كدا ، كم مره اتقدمو ليها كم نفر بس كانت بترفضهم ، قالت لي يمكن بزولها!
قلت ليها لا لا ما عندها أي زول و إلا كنت حـ أعرف ، قالت لي زولها الخذلها دا عرس ولا عمل شنو بعدها؟
قلت ليها بري ما عارفاهو و ما حصل شفتو ، قالت قريبهم و إسمو مراد ، قالت لي اهااااا ، المهم اتونست معاهاا و مشيت البيت و انا مبسوطه من نور دي شديد ، صراحة القعده معاها بتعجبني شديد ، حتى ونستها حلوه زيها 💜
المهم بعد صليت الضهر مشيت المطبخ لقيت ماما بتعمل في الجبنه ، ختيت لي أكل و قعدت معاها غيتو ما كنت عايزا اجيب ليها سيرة نور لكن من اقعد معاها في المطبخ بفت ليها الماضي و الحاضر ، في نهاية كلامي قلت ليها البت سمحه يا ماما خلقه و أخلاق ولدك براهو مفتري و شايف نفسو ، قالت لي عليك الله البت سمحه؟
قلت ليها اقسم بالله سمحه سماحه لمن غلط دقيقه اجيب تلفوني و أوريك صورتها ، طلعت بإستعجال مشيت غرفتي جبت التلفون و جيتها في المطبخ لقيتها بتقول لـ مزن الكلام القلتو ليها قبل شويه ، مزن قالت لي كدي ورينا صورتها ، فعلاً وريتهم صورها و الإتنين قالوا عليها سمحه ، ماما قالت لي البت دي ما بنفوتها ، مزن قالت ليها غيتو اقتنعت انو مازن دا عوير و غبي ، البت ما شاء الله سمحه شديد أكتر من كدا عايز شنو؟
قلت ليها دا جاحد للنعمه ساي لكن خلاص الموضوع بقى عندنا و نحنا حنتصرف ، ماما قالت لينا هسي مازن وينو ما جا راجع ، قلت ليها هسي ما تتكلمي معاهو لأنو حيرفض ، هو فاهم البت دي غلط فأنا عايز اوضح ليهو سوء التفاهم و قصداً صاحبت البت دي عشان اعرف هي شنو لكن يا ماما واضح انها بتحب ولدك الغبي دا قالت لي والله ما شاء الله بقيتي تقولي كلمة حب دي قدامي كدا عادي! قلت ليها خلاص معليش قصدي البت دي بتريد ولدك يا ماما اها كدا أحسن! ضحكت و قالت لي غيتو إنتِ! مزن قالت لي انتِ ذاتك غبيه ، قلت ليها كيف مالي انا هسي؟
قالت لو مفتحه و عايزا تعرفي البت على حقيقتها ما بتمشي تقولي ليها انا أخت مازن 🙄ما هي خلاص عرفت انك بت مديرها و أخت مازن عايزاها تعاملك معامله كعبه و تظهر ليك على حقيقتها ؟!! قلت ليها عموماً البت دي كويسه و على ضمانتي ، و انا متأكده من كل كلمه قلتها ، ماما قالت لي لو قسمتهم مع بعض براهو بجي و بقول عايزها ، قلت ليها ما حيقول إلا يفهم انو البت دي ما بتاعة اولاد زي ما هو مفكر فيها ، يعني هي شغاله فـ طبيعي تكون بتعرف ناس الشغل و بتاخد و بتدي معاهم في الكلام! في نهاية كلهم زملاء في شركه واحده ، ماما قالت لي ربنا يكتب الفيهو الخير ، المهم بعد اكلت شلت لي كباية شاي و مشيت قعدت في مكتبتنا الصغيره و بديت اقرا في رواية #أوبال لـ دكتوره حنان لاشين ، أثناء ما أنا مروقه كدا فجأه مازن جا داخل ، قعد في الكرسي القصادي و قال لي انتِ متواصله مع نور؟
قلت ليهو منو دي أنا؟ أبداً انا مـ......قاطعني و قال لي بحده إياك تكذبي علي ، انتِ عايزا تصلي لشنو يعني؟ حتغصبيني على بت الناس ؟
الكلام دا ليك انتِ و هي ، البت دي لو بقت آخر بت في العالم انا ما بعرسها و ما عندي ليها حاجه ، قلت ليهو لا لا الموضوع ما كدا البت دي صاحبتها لمن مشيت لبابا في الشركه ، يعني نحنا صحبات بس بعيداً عنك ، قال لي ما تصاحبيها خليك بعيده عنها ، قال كدا و طلع!
بقيت مستغربه هو عرف كيف انو انا متواصله مع نور؟ ؟
المهم بعد يومين عزمت نور لبيتنا و لبت دعوتي و جات ، ما قصرنا منها استقبلناها أحسن استقبال ، جاتنا قبل ضهر و قعدت معانا لغاية العصر ، اصرينا عليها تقعد تتغدا لكن هي رفضت و أصرت إنها تمشي ، طبعاً اول ما مشت ماما عيونها بقت قلوب قلوب ، قالت لي هسي دي بت بتترفض! ما شاء الله عليها خلقه و أخلاق و كلامها حلو و موزون ، ما شفتيها لمن العصر أذن طوالي سألت عن الوضايه مشت اتوضت و صلت! لا لا دي بت ما بتتفوت والله ، مزن قالت لينا انا شايفاها نص نص و المخليني ما اعجب فيها زيكم كدا انو مازن رافضها ، يعني اكيد هو ما رفضها ساي! اكيد عندو اسبابو المقنعه ، ماما قالت ليها انتِ و اخوك واحد و بنفس درجة العواره ، قالت ليها خلاص قووولي البت عجبتنا كلنا حتى بابا حتقدري تقنعي مازن بيها و تغصبيهو عليها؟
ضحكت لمن ماما ردت و قالت ليها "ابوك طلعيهو برا "و ولدي بقدر عليهو و البت دي ما فيها ولا كلمه إلا كان هو غاشاهو وحده و بتلعب بيهو ، قالت لينا خلاص اعملوا البريحكم حـ اعاين ليكم بعيوني بس ...
المهم في اليوم البعدو لمن مشيت الجامعه جرررري للبنات و فتيت ليهم الحصل ، ميامن قالت لي كدا حتدخلي اخوك في حته ضيقه ، قلت ليها لا لا انا البت دي خلاص اتأكدت منها و ماما برضو مدحتها و قالت انها كويسه و حتتكلم مع مازن بالخصوص دا ، روان قالت لي غيتو إنتِ البتختيهو في بالك طوالي بتعمليها! لكن النصيحه البت سمحه ، قلت ليها قولي لي مرة أخوكم سمحه 💅😌
قالت لي متين بقت مرة أخوكم! قلت ليها قريباً بإذن الله ، المهم بقيت اتكلم ليهم عن نور و اقول نور فعلت نور تركت نور نور نور ، ميامن قالت لي الحلانا من سيرة عدنان يحلنا من سيرة نور ، لمن قالت كدا سكته و اتذكرت انو لي يومين ما رسلت ليهو ، مع انو ما برد علي بس كنت برسل ليهو و المحيرني شديد انو ما حظر رقمي!
المهم بعد فتره بدينا إمتحانات السمستر الآخير ، المره دي خليت أي حاجه على جنب و بقيت مركزه مع قرايتي حتى تلفوني دخلتو جوه الدولاب ، معظم وقتي بقى في مكتبة الجامعه أو مع أول الدفعه ، في اول يوم امتحان إتلاقيت مع عماد جنب باب الجامعه ، قلت ليهو لسه انت ما صارحتها! قال لي قلت ليك بدايةً حـ اخليها تتعرف علي و دا الحاصل حالياً ، قبل شويه وصلتها و هسي دخلت قدامك بس نست تلفونها ، قلت ليهو ربنا يجمعكم بالحلال و يملى حياتكم سعاده ، قال لي جمعاً يارب ، قلت ليهو بس ما تطول صارحها في اقرب فرصه ، خليها تعرف انك بتحبها و شاريها و..
_يا عماد
الإتنين إتلفتنا على مصدر الصوت ، كانت سماهر ، جاتنا و بإستعجال قالت لي كيفك و إتلفتت على عماد و قالت ليهو نسيت تلفوني في عربيتك ، قال ليها فعلاً عشان كدا كنت لاحقك عشان انبهك هاك ليهو ، شالت منو التلفون و قالت ليهو يلا مع السلامه و طوالي دخلت من دون ما تنتظرني! ياخ حتى طريقة سلامها لي كانت متغيره! ودعت عماد و دخلت جوه كان باقي للإمتحان 3 دقايق وصلت بيهم القاعه ، كنا متعودين نحنا الـ 4 في كل امتحان نقعد جنب بعض و ما بنبعد عن بعض في امتحان إلا اذا المراقبين من البدايه وزعونا توزيع عشوائي ، لمن دخلت القاعه لقيتم الـ 3 قاعدين جنب بعض و مقعدين معاهم وحده من الدفعه! قلت عادي يمكن جات قعدت جنبهم و ما قدروا يقولوا ليها قومي ، المهم قعدت بالركن و طلعت في نهاية الإمتحان ، طبعاً هم طلعوا قبليني ، لمن طلعت ما لقيتهم عشان كدا اتصلت عليهم بس ولا وحده منهم ردت علي ، تاني كررت الإتصال على ميامن ، لمن ردت علي قلت ليها إنتوا وين؟
قالت لي رجعنا بيوتنا عايزين نقرا للإمتحان الجاي ، قلت ليها حلو طيب الإمتحان اليوم كان كيف معاك؟ قالت لي ماشي حالو ، المهم بعد ما قفلت منها قلت احسن انا ذاتي امشي البيت ، والله كنت ماشه على البوابه لكن فجأه كدا غيرت رأيي و مشيت الكافتيريا عشان أفطر و امشي ، أول ما جيت داخله كدا عيني وقعت على ميامن و سماهر و روان! كانوا قاعدين سوا! طيب ليه ميامن كذبت علي؟
انا انسانه ما بتحب الخساسه و ما بحب فكرة انو الزول يزعل و يمشي من غير ما ياخد كفايتو من الأجوبه كان بمقدوري آخد موقف و ازعل و اقول هم ليه كذبوا علي و ليه ليه ليه بس انا ما كدا ، من مكاني داك مشيت عليهم وقفت قدامهم ، عاينت لـ ميامن و قلت ليها ليه كذبتي علي؟
طبعاً هم لمن شافوني إتوتروا ، ميامن سكتت و ما قالت حاجه بس كانت بتعاين لـ سماهر ، قلت ليهم في شنو مالكم إنتوا؟
ميامن قالت لي لا بس الإمتحان كان مسخن معانا و سماهر قالت ما اشتغلت كويس ، قلت ليها و بالنسبه للكذب القلتيهو لي!
قالت لي ما كذبت عليك يا مها ، روان و سماهر طلعوا قبليني و انا افتكرت إنهم مشوا بيوتهم ، لمن انتِ اتصلتي علي انا كنت برا الجامعه و بالجد كنت ماشه على المواصلات بس اتذكرت اني خليت الشيتات الإشتريتهم قبيل الصباح مع روان فلمن اتصلت عليها عرفت إنهم هنا ، جيتهم هسي و اول ما جيت لقيت سماهر بتبكي لأنها ما اشتغلت كويس ، بكاها لخمني و نساني اني اتصل عليك و اقول ليك إننا في الكافتيريا ، قلت ليها كان كدا ما مشكله ، مشيت لـ سماهر حضنتها و قلت ليها ما مشكله يا حلوه انتِ عملتي العليك ، بقولوا شنو "اعقلها و اتوكل " هسي انا ما قريت كويس لأنو الماده دي صعبه بس امبارح ساهرت عشان احاول افهمها برضو ما فهمتها كويس بس انا رضيانه عن نفسي لأني اجتهدت و قاومت النوم عشان افهم الماده و الحاجه المتيقنه منها انو ربنا ما بضيع أجر السهر و التعب التعبتو عشان افهم الماده دي ، و انتِ كذلك خليك راضيه عن نفسك ، البكى ما حل والله يا سماهر ، النيه و الإخلاص أهم حاجه ، إنت اعمل العليك و إتوكل على الله 💜
سماهر زحت مني شويه و شالت شنطتها و طلعت من الكافتيريا ، روان طوالي مشت وراها ، ميامن قالت لي الإمتحان بالجد صعب عشان كدا ، قالت لي نمشي؟
قلت ليها اي ، لمن طلعنا من الجامعه لقينا روان و سماهر في الموقف ، مشينا ليهم و ركبنا سوا و طول الطريق على غير العاده هم كانوا ساكتين و انا لمن اتكلم يا إما ردوا علي بعد مسافه أو ما ردوا خالص ، حيروني بالجد و دخلوني في دوامه من التفكير و كل ما اقول ليهم انتوا اليوم ما طبيعين بقولوا لي بسبب الإمتحان .....المهم عدت الأيام و كل يوم بلاحظ ليهم متغيرين علي أكتر من اليوم القبليهو! و لمن اسألهم عن الحاصل بقولوا لي بسبب الإمتحانات!
في آخر يوم إمتحان لمن رجعت البيت لقيتهم جايطين! و دي اول مره تحصل في بيتنا! لمن دخلت لـ جوه لقيت مازن بتناقش مع ماما و أصواتهم واصله السقف ، قلت ليهم خير يا جماعه في شنو؟ مازن لسه كان متواصل في كلامو معاها قال ليها شفتي البت دي كان بقت آخر وحده في العالم ما بعرسها و دا آخر كلام عندي ، قالت ليهو لو ما عرستها ما عافيه ليك دنيا و آخره لا ولدي لا بعرفك و كلمة أمي دي ذاتا ما تقولها لي تاني ، إتضايق شديد جا ماري بجنبي و هو بعاين لي بضيق و غضب شديد ، بعد ما طلع قلت لـ ماما كنتوا بتتكلموا عن نور؟ انا يا ماما مش قلت ليك ما تفتحي معاهو الموضوع دا هسي؟ مزن قالت لي غيتو يا مها سُطت الدنيا سواطه! ماما قالت ليها لا ساطتها لا حاجه كل القصه انها حبت السمح لأخوها و بعيداً عن مها و رايها البت دي أنا حبيتها و دخلت قلبي ، مزن قالت ليها يا ماما انتِ شفتيها مره وحده بس فشنو الخلاك تتمسكي بيها للدرجه دي! قالت ليها اتلاقيت معاها مرتين غير المره الجات فيها البيت و عرفت أصلها و فصلها و أهلها طلعوا ناس محترمين شديد و بمكانتهم ، قلت ليها متين حصل الكلام دا يا ماما؟ قالت لي الأسبوع الفات ، قلت ليها اتكلمتي مع البت قلتي ليها شنو! قالت لي قلت ليها انتِ عاجباني و لو ولدي وافق طوالي بعرسك ليهو ، لمن سألتها عن رايها قالت لي الراي راي أبوي ، بت رجال و محترمه ما عارفه مازن نافر منها لشنو!
مزن قالت ليها ما كان تستعجلي يا ماما ......
المهم خليت مزن و ماما بتناقشوا و مشيت دخلت غرفتي و انا حاسه الدنيا دي لافه بي بسبب الأحداث الكتيره دي! فجأه صحباتي اتغيروا علي و فجأه مازن بقى زعلان مني!
من مكاني داك طلعت و مشيت لمازن في غرفتو لقيتو ماف ، رجعت غرفتي استحميت و بدلت ملابسي ، مسكت تلفوني و إتصلت على مازن بس ما رد علي ، طوالي اتصلت على نور ، اول ما فتحت الخط قلت ليها بصراحه كدا يا نور في شي بينك و بين مازن أخوي؟
قالت لي مناسبة السؤال شنو؟ في شنو يا مها؟ قلت ليها معليش يا نور بس جاوبيني في شي بيناتكم؟
قالت لي والله ما عارفه اقول ليك شنو بس مازن ظالمني و فاهمني غلط! قدر ما حاولت اشرح ليهو و اثبت ليهو إني ما زي ما هو بقول علي بتاعة أولاد ما قدرت ، قلت ليها يعني كان بتعامل معاك كويس لكن اتغير عليك؟
قالت لي آي ما كان بتعامل معاي كدا ، قلت ليها حصل قال ليك أو لمح ليك بإنو هو عندو حاجه ليك ؟
قالت لي هو زعلان مني يا مها فأكيد ما حيقعد يلمح لي حتى لو كان عايز يصارحني بعد ما فهمني غلط حـ يتراجع!
نور ما قالتها لي بعباره واضحه بس كانت بتلمح لإنو في شي بينها و بين مازن أخوي!.....حسيت راسي بقى يضرب اخماس في أسداس ، طوالي دخلت قروبنا أنا و صحباتي و كتبت ليهم محتاجاكم يا بنات ، انتظرت دقيقه ماف وحده ردت علي رغم إنهم استلموا الرساله ، بعد دقيقه تانيه اتأكدت انو سماهر قرت رسالتي و ما ردت علي ، طوالي رسلت ليها في الخاص و سألتها الحاصل عليك شنو؟ ليه اتغيرتي علي يا سماهر؟
برضو ما ردت علي و هنا اتأكدت انهم زعلانين مني في حاجه ، مروا يومين و انا بحاول اعرف هم مالهم حتى اني عديل قلت ليهم لو شفتو شي ما كويس مني كلموني يمكن اكون غلطت في حقكم و انا ما منتبهه ، كل وحده كانت بتقول لي عذر أبيخ ، زي نفسياتي تعبانه الفتره دي أو متشاكله مع ناس البيت و و و يعني اعذار ما مقنعه و بعدين دي نفسية شنو البتخليهم الـ 3 يتغيروا علي أنا تحديداً؟
طبعاً سامي لاحظ الحاجه دي و سألهم اكتر من مره انتوا مها دي زعلانين منها في شنو و ياهو نفس الأعذار ، انا والله ما بتخلى عن زول بالساهل حتى لو هو بادر بالحاجه دي ، و هسي انا ما اتخليت عنهم بس ما قادره اعمل حاجه و هم ما راضين يحكوا لي! و هناك في البيت مازن زعلان مني و قال لي دا كلو بسببك انتِ الجبتي البت دي لحد البيت و أمي مسكت فيها و حالفه أعرسها ليها برضاي أو عدمو! .....بالجد كلامو حسسني بالذنب ، عشان كدا مشيت لـ ماما و اتكلمت معاها و قلت ليها خلي مازن على راحتو مش هو ما عايزها خلاص هو حر ، قالت لي لا والله البت دي محترمه و أهلها محترمين و مستحيل نلقى أحسن منها لـ مازن و و و ، كلام كتير فهمت من خلالو انها خلاص اتمسكت بالبت دي شديد و ماما من النوع اللو اقتنع بحاجه صعب تاني يخليها و يتنازل عن قناعتو دي فما كان في خيار قدامي غير بابا ، طبعاً هو كان شايف الحاصل ، قالها لينا مره وحده بس : ما تدخلوني في مواضيعكم دي و خلوا الولد على راحتو ، من يومها لا حصل اتناقش مع ماما في الموضوع لا معاي لا مع مازن ، مشيت ليهو و كلمتو انو يتكلم مع ماما و يقنعها تخلي مازن على راحتو ، قال لي ذاتك يا بتي ما كان تستعجلي ، أمك دي إنتِ مش عارفاها كويس؟ قلت ليهو غلطت يا بابا و هسي جايه أصلح غلطي ، قال لي تمام قايم اتكلم معاها ، هو مشى لـ ماما و انا مشيت لـ مازن في غرفتو ، لمن شافني لف وشو مني ، مشيت مسكتو من يدو و قلت ليهو مازن أنا آسفه شديد والله ما قصدي اعمل الجوطه دي كلها ، بس ما تشيل هم هسي بابا حـ يتكلم مع ماما و ينهي الموضوع دا ، قال لي البزعل انك بتحشري نفسك في مواضيع مفروغ منها أنا ما شافع عشان إنتِ تمشي و تفتشي لي بت مناسبه لا و كمان اقنعتي أمي بيها يعني كأنك بتقولي لي تعرس البت دي كسر رقبه! قلت ليهو معليش يا مازن والله كنت عايزا مصلحتك ، قال لي بتعرفي مصلحتي أكتر مني؟ اقول ليك البت دي انا بعرفها كويس و عارف هي شنو تجي تقول لي ظلمتها و شنو ما بعرفها و تمشي تفتشيها و تجيبيها لحد البيت و تعرفي أمي عليها؟
قلت ليهو والله كنت قايله في شي بينك و بينها لأنو قبل كدا هي اتصلت عليك و مره لمن جبت ليك الشاي سمعتك بتتكلم معاها و كنت بتقول ليها خليني اشرح ليك ، قال لي بزهج عشان كدا بقول ليك ما تتسمعي على كلامي! متين تبطلي حركاتك البياخه دي! ديك ما كانت نور و تاني أوعك تحشري نفسك في حاجه ما بتخصك!
لمن قال لي كدا دموعي نزلت والله ما عشان رفع صوتو علي ، عشان انا الوصلتو للحاله دي أنا الخليتو يتكلم معاي بالطريقه دي لأني بالجد اتماديت و ضايقتو ، قلت ليهو بصوت باكي والله ما قصدي يا مازن ، فكيت يدو و بقيت مره أبكي و مره أمسح دموعي ، لمن بكاي طالع فجأه كدا ضماني عليهو و قال لي للأسف زعل اختي بضايقني و دموعها غاليه علي ، قلت ليهو بالجد أنا آسفه يا مازن ، قال لي هششش خلاص حصل خير ، زحيت منو شويه و قلت ليهو زعلان مني؟
مسح لي دموعي و قال لي في زول بزعل من أختو الصغيره خاصة لو كانت أموره زيك؟
فجأه جانا صوت ماما و هي بتتكلم مع بابا و بتقول ليهو خلاص اعملوا البريحكم انا اصلو ما عندي كلمه في البيت دا و ماف زول مدي أهميه لكلامي اعملوا العايزنوا و انا دا طرفي منكم كلكم تاني ماف زول يسألني عن حاجه خلوني كدا بس زي المزهريه ، مازن اتنهد و مسح وشو بيدو ، قلت ليهو ما تشيل هم بعد شويه حـ تهدى و تروق ، الكويس انها خلاص خلت موضوع البت دي ، كنت قايله انو زعل ماما ما حـ يتم ربع ساعه ذاتو بس للأسف باقي اليوم كلو ما إتكلمت مع زول و خاصمتنا كلنا و انا إحساس الذنب ما ناوي يفارقني ، المهم بعد كم يوم كدا النتيجه ظهرت و الحمدلله نتيجتي نضيفه كنت متمنيه نتشارك الفرحه دي أنا و صحباتي و نطلع نتفسح و نحتفل بنتيجتنا زي ما بنعمل كل مره بس للأسف هم الما أدوني مجال ، بعد ما شفت النتيجه مشيت ليهم و انا مبسوطه شديد لي و ليهم ، سلمت عليهم و باركت ليهم النتيجه ، ردوا علي رد جاف كدا و كانوا حـ يمشوا بس انا خلاص فاض بي! قلت ليهم للمره الدشليون فهموني في شنو؟ عملت ليكم شنو انا وروني غلطي؟....... لأول مره في حياتي ارفع صوتي على زول ، يمكن عشان كدا هم اتفاجؤا و في نفس الوقت اتضايقوا مني ، سماهر قالت لي ببساطه ما عايزنك معانا ، قلت ليها شنو؟ ....قالت لي زي ما سمعتي ، مش كنتِ عايزا رد؟! دا ردنا ما عايزين وحده منافقه زيك تكون بيناتنا ، قلت ليها نعم؟ منافقه؟ أنا! قولي لي بس عملت شنو! قالت لي ما تستهبلي ، نفسك دي انتِ بتعرفيها أكتر مني ، قالت كدا و مشت و روان و ميامن مشوا وراها و خلوني خاته يدي على راسي و بحاول اتذكر أنا عملت ليهم شنو! فجأه سامي جا و قال لي في شنو؟ سماهر مالا معاك؟
قلت ليهو ما عارفه يا سامي والله ما عارفاهم مالم معاي ، عملت ليهم شنو أنا؟ ما قادره اتذكر ، والله ما متذكره اني غلطت معاهم في حاجه أو......قاطعني و قال لي مها ، مها اهدي شويه ، انا عارفك كويس و متأكد إنك ما غلطتي في حقهم! قلت ليهو طيب هم مالهم ! لو غلطت عليهم مفروض ينبهوني و يقولوا لي انتِ عملتي كدا و علشان كدا نحنا اخدنا موقف و زعلنا بس ما يفصلوها مني بالطريقه المؤذيه دي!
قال لي أهدي طيب و تعالي معاي ، قعدني في البينشات و مشى جاب لي مويه و جا راجع ، بعد ما شربت قال لي شوفي انا متأكد انك ما غلطتي في حقهم اصلاً انتِ ما بتغلطي على زول! .....قلت ليهو بما انهم زعلانين مني معناها انا غلطت معاهم بس ما قادره اتذكر حاجه بتزعل انا عملتها ليهم!
سكت مسافه بعدها قال لي انا من زمان عايز انبهك لحاجه بس خفت إنك ما تصدقيني خاصة انك ما بتقتنعي بكلام الناس و بتعملي بـ البتشوفيهو! ....مسحت دموعي و قلت ليهو بقلق شنو؟ في شنو يا سامي قول لي !
يتبع......