على الحافة

٤

 في نفس اللحظه الأنا وقعت فيها دي عربية عدنان كانت قريبه مني ، في كسر من الثانيه حسيت خلاص إنو دي آخر لحظات لي في الدنيا ، بقيت ما سامعه شي و حاسه مخي قفل و العربيه جايه علي ، غمضت عيوني و لمن خلاص العربيه وصلتني صرخت بصوت عالي ما سكته إلا لمن جاني صوت عماد و هو بقول لي مها ، يا مها أفتحي عيونك يا بت ، فتحت عيوني و انا قلبي شغال دق دق ، أول حاجه شفتها لستك العربيه القصاد راسي ، قمت مخلوعه و بقيت أتنفس بصعوبه ، عماد قومني من الأرض و الإسمو عدنان داك بس كان براقب و ما حاول يساعدني ، بقيت اتحسس في جسمي عشان اتأكد اني بالجد قمت سالمه ، خلعه ساي خلتني اقول لـ عماد أنا حيه؟ ما مت يعني؟ فجأه عدنان قال دا شنو الهبل الكنتوا بتعملوا فيهو دا؟ لو عايزا تموتي بنصحك تمشي الزلط عديل تاني مره ، اتخيلوا لبس نظارتو و ركب عربيتو و إتحرك! عماد قال لي شفتي بسبب خططك دي كنتِ حـ تروحي فيها ، قلت ليهو ما قايلاهو كدا ، قال لي دا منو هو و ليه كنتِ عايزا تعملي المسرحيه دي كلها قدامو؟

قلت ليهو بخيبة أمل أنسى و شكراً ليك و أنا عند وعدي ، قال لي ما متعود عليك تتكلمي بنبرة اليأس دي! .....اسمعيني إنتِ بتحبي الولد دا؟

قلت ليهو بإستعجال لا لا يا عماد حب شنو ياخ ! قال لي اوكي فهميني ليه كنتِ عايزاهو يفتكر اني حرامي بتقالع معاك عشان اسرق منك شنطتك!.....عايزا تلفتي نظرو يعني؟

قلت ليهو لا ما كدا يا عماد ، ياخ أنسى ، قال لي قولي لي حـ أساعدك ، قلت ليهو كل القصه إنو الزول دا حصلت معاهو مشاكل كتيره من خذلان حبيبتو ليهو لـطلاق امو و ابوهو لحد وفاة أختو الكان ليهو تأثير كبير على نفسيتو ، بعدها بقى إنسان تاني خالص ، وفاة اختو و غيرها من الأحداث السبقت الوفاة فقدتو نفسو و شغفو في الحياة دي ، صح أنا ما بعرفو بس قلبي وجعني شديد عليهو لمن سامي حكى لي قصتو ، قال لي يعني دا صاحب سامي ولا علاقتو بيهو شنو؟

قلت ليهو دا ولد عمو ، قال لي يعني إنتِ بخططك العملتيها دي كنتِ عايزا تصلي لشنو ما فهمت؟ 

قلت ليهو كنت عايزا أخلق موقف بيني و بينو اقدر من خلالو اتكلم معاهو و شويه شويه اقرب منو و احاول اطلعو من الهو فيهو دا ، ضحك علي جنس ضحك ، قال لي مها و خليك مها ، طبعاً ما حـ اقول ليك دي فارغه منك لأني عارف الحاجات النحنا ما بنديها أهميه و ذاتو ما بنحاول نبذل فيها أدنى جهد ، انتِ بتشوفيها من زاوية تانيه ، غيتو اعملي البريحك لأني عارفك ما بتقعدي ساي لو ما عملتي الفي بالك 😂

قلت ليهو فعلاً و حالياً بفكر في خطه جديده ، ضحك و قال لي غيتو إنتِ ما بتنقدري ، المهم انا و عماد مشينا لـ سامي ، سلم على عماد بحراره كدا لأنو برضو بعرفو ، قال ليهو دي صدفه؟ عماد قال ليهو اصلاً انا بتواجد في المكان دا بس الزوله دي هي الجابتني هنا ، سامي قال ليهو أكيد جابتك تعمل ليها حاجه ، عماد قال ليهو أكيد و بدا يحكي ليهو الحصل و سامي دا مات من الضحك ، قال لي انتِ ما بتوبي مع إني حذرتك هسي لو العربيه ما وقفت في الوقت المناسب كنت هسي بحفر قبرك في الشمس السخنه دي ، قلت ليهو الله يجازيك يا فقر ، المهم بعد مسافه كل أفراد الشله جوا و طبعاً سامي الشمتان فيني حكى ليهم و عاد هم ما صدقوا لقوا ليهم حاجه يضحكوا عليها ، عماد قال ليهم خلاص كفايه يا جماعه احترموا وجهة نظرها المختلفه دي شويه ، قلت ليهو الله عليك يا عماد إنت الوحيد البتفهم و بتحترم وجهة نظر غيرك ، طبعاً لمن قلت كدا هو غمز لي ، في البدايه ما فهمتو بس لمن اتذكرت إني قلت ليهو حـ أطبل ليك قدام سماهر فهمت هو قاصد شنو ، واصلت كلامي و قلت ليهو ياريت كل الناس زيك يا عماد بالجد انت واحد كويس شديد و فاهم و واعي و شخصيه و عقليتك بتوزن بلد و ألف بت بتتمناك ، قال لي ياريت تكون هي من الألف بت ديل و انا بوعدها إني اخلي الـ 999 و اتمسك بيها هي ، هي و بس 💜

طبعاً كلنا بقينا نعاين ليهو لمن هو إتوتر ، سامي ضحك و قال ليهو دا منو دي الحـ تخلي تلات تسعات عشانها؟

عماد قال ليهو هي ذاتها ما عارفه إني قاصدها ، لو بس كانت بتدقق في نظراتي ليها و بتفهم الكلام البرميهو ليها كان عرفت قدر شنو أنا ولهان بيها و من زمان كمان!

ميامن قالت ليهو نفهم من كلامك دا إنك قاصد وحده مننا! يعني يا انا يا روان يا سماهر يا مها و إن شاء الله تكون قاصدني أنا 😂

طبعاً ضحكنا ضحك على كلامها و هي أصرت شديد على عماد عشان يقول قاصد منو ، قال ليها لا ما حـ اقول اسمها ، خلي إحساسي و حبي ليها هم اليحكوا ليها ، لو إنتبهت لوجودي معناها حـ تلاحظ حبي و انا منتظر اليوم الحتعرف فيهو إني قاصدها ، قلت ليهو طيب إنت حتعرف كيف إنها عرفت إنك بتحبها؟

قال لي من عيونها!

قلت ليهو دا كلام دا ، سامي قال ليهو اسمع مني يا نزار قباني البنات ديل غتيتات و ما حـ يعترفوا ليك بالساهل و جنهم يعملوا نفسهم غبيات و ما فاهمين حاجه بالذات الأربع أنفار ديل ، يعني حـ تنتظر عمرك كلو أو براك تجي و تعترف ليها ، قلت ليهو شنو شنو؟ نحنا غتيتات يا سامي! قال لي للأسف آي ، ميامن قالت لـ عماد لو ما عايز تقول إسمها قول لينا أول حرف من إسمها ، إبتسم و قال ليها حروف اسمها كلها مفضله عندي ما بقدر أذكر حرف من دون ما أذكر باقي حروف إسمها ، قالت ليهو طيييب قول إسمها ياخ ! قال ليها خليها للزمن ، حـ اقول ليكم في الوقت المناسب ، في الوقت الهي حتحس بي ، طبعاً شغلوها ليهو و انا مره مره أعاين لـ سماهر عشان اشوف اذا هي فهمت انو قاصدها ولا لا بس كانت عاديه حتى إنها شغلتها ليهو! قلت معناها بالجد هي ما عارفه إنو قاصدها ، طيب بعدين أكلمها ولا لا؟

انا ما حصل جبت ليها سيرة عماد لأني ما كنت متأكده اذا هو بحبها ولا لا ، ما حبيت ألفت نظرها لـ عماد من دون ما اتأكد من مشاعرو ناحيتها عشان ما تتعشم فيهو ساي زي ما إتعشمت في مراد و خذلها في الآخر ، عماد دا قبل ما يتخرج من الجامعه كان دايماً بجي يقعد معانا و من نظراتو لـ سماهر قلت يمكن بحبها بس لا سألتو لا سألتها ، بس بعد ما اتخرج اتواصل معانا فتره بعدها إختفى فـ نسيت موضوعو ، ياهو ظهر قبل شهر كدا و مره سألني عن سماهر و طلب مني أضيفو في قروباتنا فـ ضفتو و بقى يتونس معانا عادي في القروبات بس بالجد كنت محتاره فيهو و ما عارفه هو عايزها ولا لا مع إنو نظراتو ليها و ردودو على رسايلها في القروبات لمن نحنا نسفها بتخليني أحس انو عايزها بس ليه ما حصل فاتحها في الموضوع أو طلب مني أمهد ليهو!أو استفسر عن حياتها! ولا زي ما قال عايزها تحس بيهو و تحبو من دون ما تعرف إنو بحبها! ....غيتو حـ يضيع عمرو ساي لأنو سماهر دي يادوب قدرت تتجاوز مراد ، المهم لمن رجعت البيت لقيتهم جايطين ساي، ماما قالت لي الناس بتنضف و بتجهز للعيد إلا إنتِ مقضياها حوامه ، قلت ليها يا ماما هو عيد ضحيه يعني معظم الناس حتكون قاعده في بيوتها و ضابحه ضبيحتها!

قالت لي في نهايه عيد ولا ما عيد؟! قلت ليها عييد يا ماما عيد! قالت لي خشي ارتاحي شويه و تعالي ساعدينا في النضافه ، مزن جات نازله و قالت ليها آي يا ماما شغليها لأنها ما قاعده تعمل حاجه ، قلت ليها بالله! شوووفوا منو البتكلم! يا بت الشغل البشتغلوا أنا في يوم انتِ بتشتغليه في سنه! ماما قالت لينا بطلوا كلام و أبدوا اشتغلوا طوالي و أي حاجه وسخانه نضفوها ، مزن قلت ليها حليمه مشت وين؟

قالت ليها حليمه دي نحنا جايبنها عشان تساعدنا في شغل البيت ما جايبنها عشان نخلي ليها شغل البيت كلو في راسها و ذاتا شغلة البيت ما بتنقدر لزول واحد ، و بعدين انا ما عايزا بناتي يكونوا خايبات و كسلانات و ما بعرفوا يسوا حاجه ، لازم تشتغلوا ، قلت ليها طيب يا ماما ، ارتاح شويه و اجي اساعدك ، المهم فعلاً مشيت و جيتها و بدينا نضافه و بعد يومين كان عيد الضحيه ، جونا أعمامي و نسوانهم أول يوم كالعاده و نحنا مشينا ليهم تاني يوم ، في نفس اليوم دا كنت بتكلم مع البنات في القروب عن العيد و كدا ، فـ ميامن قالت لينا سامي دا إختفى وين ليهو تلات أيام ما ظاهر ، قلت ليها بري ما عارفاهو ، روان قالت لينا يعني ما كلمتكم!.....قلنا ليها لا ما كلمتينا، في شنو؟

قالت لينا سامي أبوهو تعب و ودهو المستشفى ، امبارح لمن كنت بتكلم معاهو قال لي بقى كويس و احتمال كبير يخرجوا اليوم ، قلت ليها لا ياخ إتلومنا معاهو ، هسي حـ يقول نحنا ما شغالين بيهو ، سماهر قالت لي ما مشكله نمشي ليهو اليوم لو فاضين! قلت ليها نحنا في بيت عمي ما عارفه اذا حـ ألقى طريقه امشي بيها ولا لا ، قالت لي طيب لمن تبقي ماشه معانا أدينا خبر ، قلت ليها حاضر ، المهم مشيت قعدت أتونس شويه مع العائله الكريمه ، أخدت و أديت معاهم و قعدت أرغي ليهم ، عاد انا لو فتحت خشمي صعب أسكت تاني غيتو كما أمي لكزتني و همستي لي بكلمة "كفايه " ما كان سكته ، اول ما قفلت خشمي اتذكرت إنو مفروض نمشي لـ سامي 🤦‍♀️

إتلفت على ماما و قلت ليها متذكره سامي؟ قالت لي سامي دفعتك؟ آي مالو؟ .....قلت ليها أبوهو كان مرقد في المستشفى و اليوم خرجوهو و نحنا ما كنا عارفين فـ هسي فكرنا نمشي ليهو في بيتو ، قالت لي لكن لمن تمشي لأهلو تقولوا ليهم إنتوا منو؟

قلت ليها نحنا دفعتوا! عادي ما فيها حاجه يا ماما! قالت لي داك أبوك و داك أخوك أمشي قولي ليهم كلامك دا ، طبعاً بابا كان بعاين لينا ساي بس ما سامعنا بنقول شنو ، قلت في نفسي معناها ما حـ اقدر أمشي لأنو بابا ما حـ يخليني و مازن كمان!

فجأه بابا قال لي تعالي يا مها ، مشيت ليهو و قعدت جنبو و قلت ليهو أيوه!

قال لي في شنو؟ أمك قالت ليك شنو ولا إنتِ قلتي ليها شنو؟

شربكت أصابعي و قلت ليهو بصراحه يا بابا في واحد دفعتنا إسمو سامي و هو زول كويس شديد و بالجد ولد ناس و......قاطعني و قال لي قال عايز يتقدم ليك؟

ضحكت و قلت ليهو لا يا بابا ، قال لي اها! قلت ليهو يلا هو زول كويس شديد و ولد ناس و كان دايماً بساعدنا لمن نقع في ورطه و بخاطر و بشففنا في الإمتحانات و .....تاني قاطعني و قال لي اهااا فهمت يعني فاتحتيني في الموضوع عشان نمشي نتقدم ليهو صح؟

المره دي ضحكت شديد و مسكت بطني من شدة الضحك و كل الموجودين إتلفتوا علينا أنا و بابا ، هو ذاتو ضحك و قال لي كلامي صح يعني؟ 😂

ما كنت قادره اتكلم من شدة الضحك ، هديت نفسي شويه و قلت ليهو أكيد لا يا بابا و بعدين انا مستحيل اعرس لي واحد ياداب بقرا في الجامعه خلي لمن يكون دفعتي 😂

عمي قال لينا ضحكونا معاكم يا جماعه ، قلت ليهو انا بتكلم مع بابا في موضوع مهم و هو كل دقيقه بقاطعني و بقول لي خارجيات عشان كدا ضحكت على كلامو ، قال لي اصلاً ابوك دا بحب الخارجيات هسي انا لمن اتكلم معاهو في حاجه بقول لي خارجيات ، المهم إتلفت على بابا و قلت ليهو المره دي ما تقاطعني ، قال لي بحاول ، قلت ليهو خلاص ما حـ اقول ليك ، قال لي طيب خلاص ما حـ أقاطعك ، قلت ليهو من الآخر كدا سامي دا أبوهو كان مرقد في المستشفى ، و اليوم طلع منها فـ صحباتي مخططين يمشوا ليهو لأنو زول ما هين والله فأنا برضو عايزا أمشي معاهم.....بعد اذنك طبعاً ،، ما رد علي ،، قلت ليهو بابا ما تسكت جاوبني ، قال لي خليهو لمن يجيكم في الجامعه حمدلوا ليهو سلامة أبوهو ، قلت ليهو انا بحب الوضوح و الشفافيه ، أديني سبب واحد مقنع لـ رفضك دا ، قال لي بالنسبه لي هو زول مجهول لا بعرفو لا بعرف أهلو سبب واحد يخليني اسمح ليك تمشي ليهم في بيتهم ماف ، قلت ليهو دا بدل على عدم ثقتك فيني ، قال لي انا واثق فيك بس ما واثق في غيرك ، قلت ليهو لو بالجد انت واثق فيني ما كنت حـ تمنعني امشي لأنك حتكون متأكد انو بتك ما بتمشي لأي زول و اصلاً ما بتصاحب ناس ما كويسه ، انا زوله كبيره و واعيه يا بابا و زي ما عارفه الصح من الغلط كمان عارفه الزول الكعب من الزول الكويس و مستحيل أنخدع في زول ، قال لي يا مها ، قلت ليهو خلاص عرفت جوابك ، قمت منو و طلعت برا و هم كلهم بسألوا :"دي مالا " شويه كدا مازن أخوي جا لاحقني برا و قال لي أبوي زعلك في شنو ؟

ما رديت عليهو ، تاني كرر لي السؤال و برضو ما رديت عليهو ، قال لي عنّك يا زوله كنت ناوي احل ليك موضوعك الشاورتي فيهو أبوي بس خلاص ، اول ما إتحرك من جنبي قلت ليهو متأكده انك حترفض زيو ، جاني راجع و قال لي ما حـ أرفض بأكد ليك ، قلت ليهو أوعدني ، قال لي وعد ، قلت ليهو بس ما تكون دي وحده من حبيباتك! ضحك و قال لي لا لا ، قلت ليهو كنت بتكلم مع بابا في..........الخ و هو رفض و هسي انت ذاتك حترفض ، لمن سكاتو طال ، قلت ليهو مش قلت ليك!

قال لي ماشه مع منو؟ قلت ليهو حتخليني؟

قال لي آي ، إبتسمت إبتسامه عريضه و قلت ليهو تسلم لي يا مزوني تعال أبوسك قال لي هيي هيي احترمي نفسك ياخ ، قلت ليهو ذاتي ما عايزا أخرب الروج بسببك ، قال لي ما قلتي لي صحباتك ديل منو؟

قلت ليهو ياخ ما بتعرف ناس هبه و سماهر و روان؟

قال لي ماشين معاك التلاته؟

قلت ليهو آي بتسأل ليه؟ قال لي عشان لو كنتوا اكتر من كدا عربيتي ما حـ تشيلكم ، قلت ليهو يعني حتوصلنا؟

قال لي عندك مانع؟

قلت ليهو أكيد لا ، قال لي خلاص داخل جوه اكلم الحاج ، انتظريني هنا ، بعد ما هو مشى اتصلت على سماهر و قلت ليها حـ أمشي معاكم ، قالت لي خلاص تمام نتلاقى في افريقيا ، قلت ليها كلكم اتلموا هناك ، مازن أخوي حـ يوصلنا ، اتصلي على هبه و روان كلميهم ، قالت لي ظابط ، المهم بعد قفلت منها مازن جاني و هو شايل مفاتيحو قال لي يلا ، قلت ليهو بابا ما إعترض؟

قال لي انا ولدو البكر و الوحيد فكيف حـ يرفض لي طلب؟

قلت ليهو ئهه ، ناسي انك كنت بتحنسني تحانيس عشان امشي اتكلم ليك مع بابا نيابة عنك و اقنعو ليك ؟!

قال لي خلاص يا زوله ، المهم ركبنا و وريتو انو حـ نلاقي البنات في إفريقيا ، طبعاً ناس سامي ساكنين في المنطقه البعد شارع الستين و نحنا ساكنين الطائف ، نحنا عارفين بيتو بس ما حصل مشينا ليهو ، المهم بعد ربع ساعه كدا وصلناهم ، ركبناهم معانا و إتحركنا ، طبعاً من اتحركنا كدا و انا بديت أرغي ليهم و اضحك فيهم ، ما سكت إلا لمن لاحظت انو مازن بعاين لـ وحده من التلاته ديل بـ بالمرآيه!

عاينت ورا و تاني رجعت عاينت لـ مازن ، سماهر قالت لي مالك يا بت؟!

قلت ليها لا لا ماف حاجه ، ميامن قالت لـ مازن عندك اخت مجنونه الله يعينكم عليها ، قال ليها بالجد والله ، المهم واصلت رغي كدا لحد ما وصلنا بيت ناس سامي ، اول ما نزلنا مازن قال لي لمن تكونوا راجعين اتصلوا علي ، قلت ليهو انت اليوم ما طبيعي! انا كنت بحنسك تحانيس عشان بس توصلني الجامعه و هسي وصلتني و عايز ترجعني من تلقاء نفسك! لا لا أكيد محموم ، روان قالت لي ما تستاهلي والله ، مازن قال ليها فعلاً ما تستاهل ، المهم يا زوله بعدين أديني خبر عشان اوصلكم كلكم ، قلت ليهو ربنا يشفيك يا أخوي خلاص جنيت ، ضحك و مشى ، ميامن قالت لي اخوك دا عسل والله ، لمن رفعت ليها حاجبي قالت لي عارفاني بقول كلمة "عسل " دي لأي زول ، سماهر قالت لينا خلونا ندخل ، وقفنا جنب الباب و ميامن ضغطت على الجرس ، بس ماف زول جا و فتح لينا ، قلت ليها كدي زحي لي ، لمن زحت لي ختيت يدي على الجرس و بقيت ضاغطه عليهو و روان شغاله لي كفايه يا بت انعل شكلك ياخ! سماهر قالت لي مها كفايه بالجد! قلت ليهم عشان يسمعوا كويس لأنو ما معقوله نرجع بعد ما وصلنا بيتهم ، ميامن قالت لي نزلي يدك عن الجرس و خلينا نتصل على سامي عشان......قبل ما تتم كلامها فجأه كدا الباب فتح و انا لسه معلقه يدي في الجرس! طبعاً قلبي عمل شححح لمن شفت عدنان قدامي ، عاين لي بحده و رجع عاين لـ يدي اللغاية لحظة فتحتو للباب ضاغطه على الجرس ، سماهر زحت يدي من الجرس و قالت ليهو معليش ، فتح الباب على الواسع كدا و دخل جوه ، روان قالت واحد حيوان و عديم ذوق ، سماهر قالت ليها سمح لكن مفتري ، قلت ليهم لو خلصتوا شتيمه في ولد الناس خلونا ندخل، ميامن قالت لي ذاتو ما مفروض ندخل بعد ما عاين لينا بالحده دي و مشى خلانا بالطريقه دي! قلت ليها يا زوله دا ما بيتو و نحنا ذاتنا ما جايين عشانو، فجأه كدا جات مره و معاها بت حلاتها ، سلموا علينا ببشاشه كدا و المره قالت لينا اتفضلوا يا بناتي ، دخلت قدامنا و نحنا وراها ، قلت ليها يا خالتو آسفين شديد على الإزعاج بس عشان ما سمعتوا ضغطت الجرس لفتره طويله ، قالت لي لا لا عادي يا بتي ، والله نحنا سمعنا صوت الجرس بس قلنا ديل الشفع عشان كل يوم بعملوا حركتهم دي بضغطوا الجرس و بجروا ، قلت ليها ايوااا عشان كدا ، فضلتنا جوه و قعدت معانا و بتها مشت جابت لينا مويه و عصير ، قلت ليها يا خالتو نحنا زميلات سامي و عرفنا انو أبوهو كان مرقد في المستشفى فـ جينا نشوفوا ، قالت لي ما قصرتو والله يا بناتي ، ربنا يديكم العافيه ، شويه كدا بقت تقول سامي ، يا سامي ، جا داخل و قال ليها آي يا أمي ....لمن شافنا اتفاجأ و قال لينا نورتوا والله ، جا سلم علينا و هو مبسوط شديد ، عرفنا بأمو و أختو و عرفهم بينا ، اختو قالت ليهو يعني دي مها البتتكلم لينا عنها صح؟

قلت ليهو شنو شنو؟ بتجيب سيرتي بالعاطل قدام أهلك يا سامي؟

اختو قالت لي دايماً بحكي لينا عن جنك و بقول عليك مستر بين ، قلت ليهو غيتو ماف زول مشوه سمعتي غيرك يا سامي! ....المهم ودانا لأبوهو سلمنا عليهو و قعدنا اتونسنا معاهو شويه بعدها استأذنا منهم عشان نمشي بس هم حلفوا إلا نقعد نتغدى معاهم و امو كانت مصره شديد فإضطرينا نقعد ، سألت سيما اخت سامي عن الحمام فـ وصفتو لي كان برا في الحوش ، بعد ما طلعت منو قعدت أتوضى في الوضايه عشان أصلي العصر ، اثناء ما أنا بتوضى كدا فجأه عدنان طلع في وشي لمن خلعني ، بقيت مبحلقه فيهو و قلبي عمل شححح بعدها اشتغل دق دق زي الدلوكه و جاتني رجفه غريبه كدا!!

يتبع......