_________________________💜🦋
لها عينان في طرفهما حور 🤍
شكو فدوه بالدنيا اتروح لعيونج ..♥️
_________________________💜🦋
•◌•◌•◌•◌•◌•◌•◌•★•◌•◌•◌•◌•◌•◌•◌•
الكاتبة فاطمه علي🦋🦋
•◌•◌•◌•◌•◌•◌•◌•★•◌•◌•◌•◌•◌•◌•◌•
بسمه : صرنه كل يوم بليل انسولف بالرسائل بشغلات عامه مو شي محدد ساعه وراها انام بده يسولفلي عن حياته واهله تعودت علي مرات اذا ما يراسلني يضل بالي وين اليوم لو بشنو ملتهي
فد يوم رحت للشركه خابرني كال اريد اوراق فلان ملف رحت اوديهم اله شفت ابنيه جاي ادخل جان كالت حبيبتي لازم انطي خبر للاستاذ يله ادخلج عرفتها السكرتيرة بس شنو جمال وشنو اناقه ابنيه حلوه وصغيره دخلت بالربع ساعه يله طلعت وراها دخلت اني
بسمه : السلام عليكم استاذ
امير : هلو بسمه هاي وين صرتي
بسمه : صار ربع ساعه اني واكفه بره منتظرتك تكمل سوالف انته السكرتيرة مالتك
امير : اول شي هدي بلا عصبيه وثاني شي جان عندي مكالمه من خلصت انطيتها ملفات تاخذهم ونوب كالت انتي بره .......زين ليش هل عصبيه
بسمه : ماكو شي اتفضل استاذ هاي الاوراق تأمرني بشي ثاني
امير : لا شكراً بسمه تعبتج وياي
بسمه : طلعت من الغرفه احس نار بصدري ليش ما اعرف كلت يمكن لن ضليت منتظره
صرت كلما اشوفها وياه اضوج وانقهر مره خابرتني هيه السكرتيرة كالت استاذ امير طالبج
رحت دا اشوف شيريد دكيت الباب ودخلت شفتهم ميتين ضحك واني نار وشبت بصدري ضليت انتظر يخلص ضحكهم
بسمه : تفضل استاذ طالبني
امير : اي بسمه عندي ملفات اريد تسويلهم يمج مكان خاص اوكي
بسمه : اوكي
امير : شبيج بسمه ليش ضايجه
بسمه : لا ماكو شي بس ضليت انتظر يخلص ضحكك ويه السكرتيرة ...........افضل مره ثانيه تطلبني من انته فارغ
امير : بسمه
بسمه : اهممممم
امير : انتي غيرانه منها
بسمه : لا وعلى شنو اغار مجرد كتلك من تفرغ يله تطلبني
امير : اوكي تمام
امير : بــ الفتره الاخيرة كلش تقربت من بسمه اكيد هيه متحجي بس اني كل يوم احجي وياها تعودت عليها حيل صارت جزء من يومي من اجتي السكرتيرة كمت الاحظ عليها تضوج ما اعرف شبيها
بسمه : بسمه انتي شجاي تسوين شنو هل تصرفات وانتي شعليج بي الي ضحك او ولا انتي شكو
لا شنو هل ضحك الزايد
وانتي شعليج بسمه خليج بشغلج وبس
اي لازم ابتعد ............... بسمه لا تنسين نفسج
فزيت من صفنتي على موبايلي يرن مصطفى ينتظرني بره
عزاا هاي شكد صارلي كاعده حته ما لميت الاوراق
اكملهم واطلع على السريع
بسمه : هلو مصطفى عادي تنتظرني بس دقائق اكمل كم شغله
مصطفى : تمام راح ادخلج
بسمه : اوكي
امير : رحت اشوف بسمه بحجة الاوراق قبل لا اطلع لن هيه جانت عصبيه و ضايجه
مصطفى : هااا بسمه شجاي تسوين هاي شصاير يمج
بسمه : هاي ملفات لازم ارتبهم حسب التاريخ ..... مصطفى عادي تاخذ من ايدي وديهم للغرفه الجوه واني باجر اسويلهم مكان اوكي
مصطفى : من عيوني تأمريني امر بت گلبي
بسمه : هاي بت گلبي لبنتك مو اليه
مصطفى : وانتي تغارين
بسمه : لا ابد والله ........ انته شفتها البارحه شسوت بيه الملعونه
مصطفى : ههههه اي هيه هيج وانتي ما توبين منها
بسمه : الزم ودي ذني ....... اي هيه تكلي(بتمه اني انام يمت) ههههه ونص اليل اريد بابا لو ماما
مصطفى : هههههههه الصبح اعلم بيها اكولها عيب كوليلها عمه
بسمه : ههههه لا عوفها على راحتها........ يله هاي اخر ملفين اخذهم
مصطفى تمام
بسمه :جاي اخذ موبايلي وجنطتي
امير : هااا بسمه طالعه
بسمه : اي كملت راح اروح
امير : اتمنى ما ضايجه مني من شغلة مساعه
بسمه : لا استاذ عادي ماصار شي
مصطفى : دخلت اخلي ملفات اشو اسمع ولد يحجي ويه بسمه وشنو الي ضاجت منه ويحجي وياها عادي كنما يعرفها من اسنين
مصطفى : يله بسمه نطلع
امير : جاي احجي ويه بسمه وطلع ولد من غرفة الارشيف عرفته واحد من كرايبها الي يوصلها بس شو مخنزر عليه
بسمه : يمه مصطفى بس لا سمع اني اعرف تفكيره
امير : يله بسمه مع السلامه نتشاوف الاسبوع الجاي
بسمه : تمام استاذ مع السلامه ....... صعدت بالسيارة ومصطفى ولا كلمه بس امبين عصبي نار
مصطفى : هذا الولد شنو شغله بالشركه
بسمه : محامي
مصطفى : بس مو جنه ماخذ ميانه وياج
بسمه : لا عادي
مصطفى : هووووه شنو عادييي
بسمه : عزااا مصطفى ليش دا تصيح
مصطفى : شنووو ليش اصيح يكلج بسمه وخاف ضجتي وما اعرف حجي ماصخ
بسمه : صارت شغله بالشركه واجه يشوفني
مصطفى : وهوه شنو واجه يشوفج وليش ما يكلج ست بسمه اخت بسمه ليش بس بسمه يعني عنده ميانه وياج
بسمه : مصطفى ماكو شي ليش جاي تخوفني منك
مصطفى : تمام ماكو شي
بسمه : اي ماكو
مصطفى : راح انطيج كل الحريه واني واثق بيج بس راح اكولج شغله
بسمه : شنو
مصطفى : بسمه هذا الولد يحبج
بسمه : ههههه مصطفى شجاي تحجي شنو يحبني
خليني اكولك شغله ولو وصلنا للبيت لعد عوفها
مصطفى : لا ما اعوفها وبليل اشوفج بالحديقه
بسمه : تمام ...........دخلنا للبيت بسمه اجتي حظنت ابوها مثل كل يوم تغدينه ولميت المطبخ ويه البنات وراها دخلت غرفتي
وصفنت بكلام مصطفى معقوله صدك يحبني لا مستحيل هوه وين واني وين لا لا مصطفى مشتبه
بس ضليت كل شويه ارجع لنفس الموضوع ما نسيته الموبايل مالتي طفيته ما اعرف ليش كلت اهلي عود اخابرهم من عمتي
بليل طلعت كعدت بالحديقه انتظر مصطفى طبعاً كلهم كاعدين
بسمه : هااا اجيت
مصطفى : ليش ما تريديني اجي
بسمه : لا بس عبالي نسيت
مصطفى : اي سولفي
بسمه : تتذكر من كتلك اني هنا من مشاكل صار ابغداد
مصطفى : اي اتذكر هيج شي
بسمه : وهذا المحامي طلعني منها
مصطفى : شنو هيه
بسمه : اسمع ...................................... وهسه حجيتلك كولشي صار وياي
مصطفى : وخوانج ليش ما خلوله حل
بسمه : مصطفى تره سلام عنده علاقات قويه اهلي ما يكدرون يسووله شي
بسمه : هسه عرفت كلشي
مصطفى : بس ابقه اكولج الولد يحبج
بسمه : مصطفى وانته كاعد بگلبه وعرفت
مصطفى : احنه ولد ونعرف نضرة الزلمه للمره شنو وهوه يباوعلج بكل حب وعيونه فرحانه
بسمه : مصطفى اتمنى تباوع هم على اختلافنه تره هوه ولد شاب واني ارمله وخريجة سجون وعلى ايده وهوه محامي واني عداديه ما كملت
مصطفى : بالحب كلشي يصير مو مهم المهم الروح تحب الروح ............. بسمه ليش ما ترجعين للدراسه نسجلج بالمعهد واني وحازم نساعدج
بسمه : والدوام مال الشركه شلون
مصطفى : عادي الصبح بالدوام وره الضهر تروحين للمعهد وبليل اذا حتاجيتي اني وحازم موجودين
بسمه : تمام....... خلصت عطلة نهاية الاسبوع وباجر لازم دوام تذكرت موبايلي ما فاتحته
خليته علي الشحن شويه وشغلته لكيت كومه مسجات و مكالمات بعدني اقره المسجات اتصل المحامي فتحت خط
امير : انتييييي وييييينج صاررررر يومين لخاطرررر ربج ما تكوليلي وين رحتي
بسمه : الناس تكول السلام عليكم
امير : ...... اووووف استغفر الله....... السلام عليكم
بسمه : وعليكم السلام
امير : هسه جاوبي وين جنتي صار يومين
بسمه : استاذ محتاج شي
امير : صار الف مره اكول شيلي كلمة استاذ
بسمه : ...........
امير : غيررر تجاوب وين رحتي
بسمه : بس هذا شي يخصني عطلة ما الك كل حق تسالني
امير : تمام باجر اعلمج الحق... تصبحين على خير
بسمه : هذا خبل قفل الخط بوجهي ..... شنو هوه يهدد شيسوي باجر
امير : كملت شغلي بالشركه و بالمكتب بليل طلعت ويه اصدقائي لليل راسلت بسمه ماكو كلت يمكن نايمه...... ثاني يوم نفس الشي وينج يمعوده ضل بالي يمها وين راحت يا ربي صرت اتصل حتى على الرصيد وهيه ماكو يا اللهي شسوي بيوم السبت بليل جاي انام واجتني رساله من الشركه انو الرقم الي تخابر علي مفتوح هسه
بسرعه خابرت عليها الي نرفزني منها بارده برودها كتلني اني عصبي ونار وهيه تحجي بكل هدوء من كالت ما الك حق كلش عصبتني نمت واني متحلفلها
بسمه :ثاني يوم رحت للشركه مثل كل يوم كاعده دخل المحامي بس بعصبيه
امير : اي شلونج ست بسمه
بسمه : اهلاً وسهلاً استاذ
امير : عندي كم ملف اريدهم تعالي دليني وينهم بيهم اوراق مهمه
بسمه : اي حاظر استاذ.......... جان كلش عصبي بحيث عيونه عبالك بيهن شر يخزر بيه
امير : دخلت لغرفة الارشيف وسديت الباب........ انتي البارحه شلون تحجين وياي هيج
بسمه : من سد الباب كلت هاي نهايتي هنا ....... استاذ ما جنت اقصد
امير : ولجججج كافييييي تكولين استاذ واستاذ
بسمه : اعتذر ما جنت اقصد اني اسفه
امير : اخابر يومين عليج وانتي ماكو غير تكولين اكو شخص يخابرني خاف عنده شي بلكي مات
بسمه : اسم الله عليك استاذ
امير : هم كالت استاذ( جريتها من اديها ) اني اسمي امير مو استاذ سمعتييي لو لاااااا
بسمه : من جر ايدي وجعني ونوب صاك اسنانه ويحجي باذاني خفت منه نزلت دمعتي
امير : استغفرالله يا ربي بس كليلي ليش تعصبيني
بسمه :🥺 كافي لخاطر الله شبيك بس كلي كلشي مجاي افهم منك شتريد مني
امير : اني احبج اي بسمه احبج ما اعرف شوكت وشلون وليش بس اني احبج
بسمه : 😳🥺ضليت بصدمه استاذ عليك الله تعوفني اني تعبت من هذا الموضوع وما مستعده ادخل بي مره ثانيه..... استاذ لا تنسى الفرق الي بيناتنا لا تنسى اني ارمله
امير : ومستعد احارب الدنيا علمودج
بسمه : واني تعبت من الحرب
امير : واني كلي طاقه احارب علمودج ولج شسويتي بيه دولبتيني صار يومين الدنيا سوده بعيني من وراج....... اني طالع و اتاكدي مراح اعوفج
بسمه : يا ربي شنو هل سالفه كلش مو وقتها
رجعت للبيت عبالك بغير عالم من دخلت للغرفه مالتي ما رحت لصورة علي مثل كل يوم ...... ما تغديت بس غيرت ملابسي وغسلت نمت ........ من كعدت صارت بوجهي صورت علي
بسمه : ادري بيك زعلان مني اعرف هسه ضايج ومقهور مني اني اسفه علي
لليل طلعت اسولف ويه السماء
علي اعرف بيك تغار وهسه صاير عصبي ..... شغله ثانيه صار هوايه ما شايفتك بالحلم ليش متجيني انته زعلان من شي
صار يومي ميكمل اذا ما اشوفه مرات نلتقي بالباب او بالكافتريا
نظراته الي لو من يفوت مني احس گلبي يكوم يرجف
مره اني طالعه وهوه راد يدخل للكافتريا جان ويكول
امير : عيونج لعبت لعب بيه
بسمه : ... . ....
دخلت لمكتبي احس حته عيوني يضحكن
جاي اعيش شغلات ما عشتها من قبل
جاي اتعلق بي بس من اشوفه ارتبك ما اعرف اتصرف
بس ما اعترف لنفسي اني احبه ابد اكول لا بعدني احب علي
بسمه : بده مصطفى يشتغل على موضوع الدراسه جابلي كتب واهلي سجلوني بالخارجي
بديت بالدراسة جانت بيها صعوبه عليه كمت ادرس ليل ونهار يعني اذا انام باليوم 6 ساعات زين.......ردت اثبت لنفسي اني اكدر اسوي كلشي.......كل يوم نسولف اني وامير بليل بس سوالف عاديه هوه يدزلي صوتيات اني اكتب لان استحي........من قربت المتحانات اخذت اجازه ورجعت لبغداد بهاي الفترة جنت كلش حريصه على دراستي خلصت امتحانات
اهلي اشوفهم بس ويه الاكل كل الوقت اقراء
كملت
ضل اخر يوم اجازه صادف الخميس يعني بعد يومين لدوم الشركه طلعت ويه اهلي للمول اشترينا و تعشينه ورجعنا للبيت ثاني يوم حضرت كل اغراض ورجعت وره الضهر للبصره
رجعت للبصره ثاني يوم كاعده بالشركه خابرني امير يريد اروحله للغرفه
رحت السكرتيرة كالت انتظري بس فتحت الباب
امير :خلي تتفضل
بسمه : دخلت....... السلام عليكم
امير : هلو بسمه شلونج
بسمه : الحمدلله وانت شلونك
امير : هسه صرت زين من شفتج
بسمه : خجلت من كلامه
امير : شلونج بالامتحانات
بسمه : زينه
امير : ان شاءالله بالتوفيق.......... اريد احجي وياج بموضوع
بسمه : تفضل استاذ
امير : انتي ليش تنرفزيني جم مره كتلج لا تكولين استاذ
بسمه : ............... ضليت ساكته يعني شنو اكلك استغفرالله
امير : بسمه اني احبج وانتي تعرفين هذا كلش زين
اريد اتقدملج اني طالب ايدج على سنة الله ورسوله
بسمه : بس
امير : شنو بس
بسمه : يعني ما اعرف شنو اكلك بس اني ما مستعده لهذا الموضوع
امير : بسمه انتي عندج شخص بحياتج
بسمه : لا وشنو هذا حجيك
امير : كلت خاف اني جاي احرجج
بسمه : استاذ اني ما اناسبك
امير : مو انتي تحددين تناسبيني او لا اني جاي اشوفج مناسبه الي
بسمه : ليش عندك استعداد تتزوج وحده گلبها مدفون بالنجف لو روحها مو عدها لو كل حياتها ما بيها امل
امير : گلبج اني اخلي يرجع للحياة وروحج ارجعها الج
وحياتج اني املها
بسمه : راح تتعب
امير : واني قابل بهذا التعب. ............ تعرفين شنو مسميج بالبيت
بسمه : عزاا اهلك يعرفون
امير : ولج شوكت تحجين مثل حجينه شنو عزاا...... اي اهلي يعرفون ومسميج نجمة ليلي
لان اجيتي بوقت جانت حياتي كلها سوده مثل اليل
اول يوم شفتج بي صرتي مثل النجمه الي تزين السماء بليل
بسمه : من هسه اكولك ما اعرف سنه سنتين عشره ما اعرف شوكت راح اتقبل هذا الموضوع
والاصعب من هذا اني بعدني احب علي
امير : عرفتج تحبينه من يوم المحكمه وشفته حبه بين عيونج....... بس هوه مات وانتي لازم تعيشين حياتج واعتقد هوه اذا جان يحبج راح يفرح انو انتي مرتاحه
بسمه : الله كريم من رخصتك رايحه لمكتبي
__________________________البارت 1900كلمة
فراشاتي الحلوات لا تنسوون التصويت والتعليق 🦋