قاع الشياطين

البارت التاسع والخمسون

.............☆البارت التاسع والخمسون  ☆............

#قاع_الشياطين(البصر والبصيره)

#بقلم_أسماء_ديمير

حجيت فشلانه .. ليش ساري ماكلج لو ميرال ..

دنجت عيونها هزت راسها مقهوره لايمه محد كلي ، بالخير عليج ..

بهت وجهي حجيت صارت بسرعه مالحكت اكولج والله .

باوعت بوجهي ابتسمت من بين ادموعها يله يمه ضلت على هاي بالخير عليج المهم مرتاحه ..

هزيت راسي بخير اني ..

منو اخذتي ..

دنجت راسي اتهرب من سؤالها ..درت وجهي ، حجيت شلونك اسامه ..

عوج حلكه ضايج رد ... هلااا ..

ابتسمت ماشتاقيت الي ..

رد لااا ..

رفعت حواجبي .. هااا عوووذه منك ..

حاحجتني ام دانيال يله نروح تاخرنه ..

التفتت عليها ، اشرت على نانه هاي ام ساري الي ربتني ..

هزت راسها ام دانيال هلا عيوني هلا ومرحبا …

ام ساري ابتسمت من جذب مكسوره الخاطر ، حجت لاتكطعن عني يمه ، اختج من تزوجت رجلها منعها عني و حتى احنه مايخلينه نوصلها عاد رجلج هم هيج ..

اشرت لاا شحده بعدكم بيت ابو عبد عود امرلج اذا بعدج هنااك

لايمه الحمدلله تعدل الحال واشترينه شقه ، وكاعدين وساكتين ..

عضيت شفتي،بعدين سالتها خجلانه ساري شلونه .

ردت دخل كليه الحمدلله كليه صيدله ..

بلعت ريك ، همست :- سمعت معدله مايدخله صيدله ، شلون دخل ..

-لا الحمدلله كدر يحصل ، مقعد مجاني بكليه اهليه ، لان ابو شهيد ..

-ابتسمت بالخير علي يستاهل ..

-اي  .. وانتي ماا كملتي دراستج ..

-تركتها ..

باوعتلي مقهوره ، ماتكدر تحجي لان  ام دانيال وراي احسها ماراضيه كلبي انلجم بس سكتت تباوعلي بحسره ومخذوله ..

بستها و اخذت العنوان منها ودرت ظهري امشي بهدوء مابيه حيل ثكيله ، 

كل شوي اندار الكاها على وكفتها تباوعلي ، محنيه الظهر خطيه باين شكياانه حيل ، والتعب باك الحلى من ملامحها ، اسامه واكف يم رجليها شايل علاليك عنها ..

عمتي حاجتني شتصير منج هاي ..

رديت بتعب مقهوره ، الي ربتنا بعد مااهلي توفو ..

ردت .. تحفظها امنا االعذره …

فتت من يم ابو الكبه و شميت ريحه الحم وتكلاه اشتهيتها وكفت ..

حجت عمتي هاا ..

رديت مشتهيه كبه ، ردت ناخذ منا تعاي  دانيال هم يحبها ..

لا لا اسويها اني ..

اندارت عليه متفاجئه هااا ..

ابتسمت اي خلي اجرب شووي شعندي الهي روحي ..

خاف تعب امي ..

لا خاله عادي نتسله بيها ، دخلنه للسوك اخذنه الاحتياجات ورجعنه .. بين افكاري ام ساري و بين دانيال   وحملي متعب واحاول اصير مره او زوجه زينه .. 

لاحت نانه بذاكرتي ، كلبي مردني عليها ، شكد خجلت من نفسي بس بعد مشت الدنيا شسوي هاهيه ، رجعت مغثوثه و كلبي ممرود ..

جهزت الكبه بنفسي جنت مشتهيتها ، و لبن و دزيت اخت دانيال تجيب خبز حار و طرشي من المحلات وتجي ..

امه اخذت جزء و تعشت ونامت ..احجي ظميري ام دانيال واخته حبابات ، يعني مو نحسات ويدورن الزله من هالسوالف لااا هيج شامراتها عليك يالله ...

اني جهزت الميز بالمطبخ ، و خليت الصحون وتانيته يجي ، موعد رجعته ب١٠ باليل .

لل١٠ ونص وماشرف ..

دكيت عليه مايرد ، كعدت على الكرسي انتظره اباوع للاكل ، نادرا مااطبخ واليوم فكرت اطبخ تالي تاخر ، 

مديت ايدي اخذت خياره من كاسه الطرشي اكلتها ..

ضليت امكط بيها حامضه نوب حامل ، دنت نفسي عليها ، بس صبرت روحي ، كلت يجي واكل وياه ..

عيوني على كاسه طرشي الخل مالها احمر و الطرشي عباره عن زيتون و خيار و جزر ..

بلعت ريك وزحت نظري عن الكاسه ، ضليت على كعدتي اتاني البيك ابن البيك لل١١ ..

الكبه بردت الخبز يبس ، و اني نعست و بلش راسي يميل كل شوي على ميز ، كل شوي اغفه ويريد ينربد راسي بالميز ..

رفعت راسي تعبانه مابيه بعد حيل وظهري من كعده صل عليه ..

باوعت للاكل تحسفت اني منا مقهوره بشوفه نانه ومنا النذل تاخر ومنا تعب الحمل طكت دمعه بعيوني كبل وبجيت ..

جان بدي اشيل نعمه اترس بيها الارض بس كلت حرام ..

عفتها على صبتها و صعدت لغرفتي اكمل بجي ، مابجي هواي بس هالمره بجيت بجي مال اسنين مضت ..

طلعت قهري كله ، لحد ماقفل خشمي ودخت ، لزمت راسي بلش ياذيني ، غسلت وجهي وغيرت بدشداشه عريضه .. توه انزلها على بطني لاحظت بطني كبرانه ..

وبيها خطوط زرك يااايمه جسمي شبي ليش،هيج … خليت اديه على وجهي وانفجرت باالبجي تشووه جسمي الله لايوفقك دانيال ..

هي هاي حياه الي وعدتني بيهاا كلها اهمال و جذب ..

لو رجليه بانت بيها الاورده لو وركي صاير شكبره من السمن ، رفعت نظري لوجهي ، يااربي شصاير بحالي اني ..

ليش هيج متغيره وين تالااا .. 

لبست دشداشه وطلعت لفيت راسي برباط من دانيال وشديته حيل اريد راسي يهود من الالم ..

كثر مابجيت وانغثيت بسببه لل١٢ وهو ماكو ادددك ومايرد ادددك ماكوو ..

حسيت ضغطي علك اكيد سهرران والله سهرران اعرفه للمنعول الوالدين سهرران ..

ضليت كاعده انتظره دشوف بالله ، شلون تصفه وياك ..
كمت لحيلي اخذ حبايه مسكن .. سمعت صوت باب الخارجيه انفتحت درت وجهي بهدوء باتجاه الشباك رفعت حواجبي متحلفه بي ..

شربت الحبايه على كيف انسدت الباب خارجيه بهدوء ..

ابتسمت عود يعني  حتى لا احس موو ، او عباله مادري لو نايمه ..

نزلت كلاص ماي من حلكي ، و اتجهت للباب فتحتها ونزلت من على درج بهدوء ..

شفته من شباك الصاله يطوطح وكوه يمشي و صل للطرمه وكع بنص الحديقه رجع كام و مشه خطوتين ورد وكع على وجه ماكام نوب ضل على هاي الحطه ..

طلعت للمطبخ اتفرج عليه مدد بنص الحديقه على وجهه حتى حسن ماله ..

درت وجهي على طباخ لكيت بصفه ماسحه مديت ايدي جريتها بهدوء فتحت الباب وطلعت اله ..

شكلي بالضبط الممثله  ( حياه الفهد ) باحد ادوارها ، كرشي هالكبر ولابسه دشداشه كصيره ولافه على راسي رباط من وجع الراس ..

لازمه بيدي ماسحه لو صاحي هو ويشوفني بهل شكل الا يامن بالرسول محمد و ينطق الشهاده الف مره  ..

عسيته بالماسحه اشوفه ماله حس ..

صحت هيووو دانيال ..

ماله حس بس تنفسه صاعد ونازل ..

رفعت ماسحه واهطره بوحده على ظهره ، مو اكلك اكعد لك ..

ماكعد .. رفعت ماسحه و انزل عليه بكم ضربه فوخت كلبي فوخت روووح  روحي والله طلعت ضيمي بي ..

سويته دوشك واهبد بي دانضفه من الغبره ، اخر وحده دون قصد اجت ترس على راسه .. شهكت اني هااااا ..

خليت ايدي على حلكي بس اسمع صوت طننننن مال ضربه على جمجمه ..

فتحت عيوني عزاااا راح يدخل غيبوبه هالرجال واتارمل ،،،انقبض كلبي يماااا ماات ،  بس تطمن كلبي من  هو اخر شي همس.. ااااااي .

غمضت الحمدلله ياربي عزااا جان فطس شجاني اني وتحمست زياده ادري وين بسجن بوكا و طحت بي كتل ..

واذا سكران .  خطيه .. 

اي خطيه .. يله دانيال عود اني اسفه سامحني  .. شلت ماسحه وعفته بره ورجعت دخلت لامطبخ اجت عيوني على الميز والاكل ..

لا يانذل لا مو خطيه والله لعد اني نفسي بالكاسه الطرشي وحرمت نفسي منها وماكلها اكول يجي ويله وتالي يتاخر ويرجع سكران ..

شلت الكاسه الطرشها شربتها كلها واكلت الي بيها .  شلت كاسه ثانيه وطلعت عليه ..

هو بعده مدد صليتها فوكاه ماتحرك عبالك ميت الارعن . رجعت للمطبخ ..

ذبيت الغراض بالمطبخ  وصعدت انام ..

غفيت مرتاحه ، عين المظلوم دومه ينام وكلبه بارد مادامه ماظالم احد حسبي الله عليك يادانيال ..

الحمدلله مظلومه مو ظالمه ،

قهرتني واني حامل و مخطره ، صبح كعدت على صوت شخطه رجله بهدوء بالغرفه حتى ماحس عليه ..

ماحاجيته ، بس طلع من الغرفه كمت لحيلي ..

غسلت و نويت انزل ليجوه اتعارك وياه سمعت يكول لامه جسمي مكسر و راسي معنجره ماعرف ليش .

ردت خاف متعارك ولك وانته سكران ..

رد لا جابني ستار للبيت و نمت بالحديقه بس جسمي منعنع ، عبالك مكتول وراسي عبالك ضاربه بشي ..

حجت شوو دشووف وين ..

مديت راسه ايشوفهم ، واكفه كبالها ويرفع بفالينته ، حجت هي ياااا ولك ظهرك دروب دروب شبي ..

حجه هااا مو اكلج ، 

ردت وراسك دنج دشووفه ..

دنج وكفت هي تتلمس بي وهو يصيح اااخ ..

ردت عزاا معنجر هاي يماا ضارب نفسك بحايط لو بطابوكه شنوو ..

شدراني ..

كم مره كتلك لاتثكل يايمه مو تزوجت بعد شلك بهل سوالف مرتك على وجه ولاده تريد واحد يمهاا ..

حجه ليش هو اني هم حاسب روحي متزوج كلشي ماشفت منها والله بس تنعوص و دلال و زعل والعصبيه ..

هي هاي مره قابل شتريدها ..

ماجنت متوقع هيج ، ماجانت هيج هيه بس تغيرت ..

تعبانه بت حامل والبارحه سوت الك كبه خطيه  ..

اي هاهيه ..

دمعت عيوني ، مامهتم مووو حتى ماهتم من سمع سويت اله اكل ، 

عرفت الرجال المره لو تبوس رجليه مايهتم ويعتبر عيشته مامرضيه مو عادله .. الا اذا جانت شاطره بالفراش مستعد يبيع اهله علمودهاا ..

المره مو مهم نظيفه ، لو مهم ماجان انخانت المعدله البيتها وطباخهاا يلمع ..

لو المره مهم تخلف .. جان مانخانت الي مخلفه سته وسبعه ..

المره لو مهمه شهادتها .  نماجان انخانت الاستاذه والدكتوره والمعلمه ..

المره لو مهم اصلها او اخلاقها او حسن تربيتها ماجان انخانت اغلب النسوان الي عرفناهم وسمعنه عنهن ..

بس عمركم سمعتو المكحله والمحمره وام دشداشه دلعه وضيكه انخاانت .. او انكسر خاطرهاا ..

لااا .. 

فكيف بدانيال راسه وعقله كله بين رجليه ..

عرفت حبي واحترامي و الشطاره داحاول اسويها واكون زوجه صالحه ام بيت ماتنفع وياه ..

تنفع وياه ام دلفري و تركصله باليل وبس ..

بس اني تعباانه الله يشهد تعباانه الحمل دومررني جسمي مديتحمل منا مريضه واصلا صوجي كله مني على كولت ميرال وينج وين الحمل ..

توج ١٥ وصحتج مو شي ..

رجعت مغثوثه ، شوي وعدلت وجهي ونزلت ..

مرت الايام وسهراته كثرت لان اني بطلت اشغل الشموع و الركص ، و حتى خلكي ضاك بزايد و طلباته كثرت  .

تعبت تعبت حيل ، خلص حملي مو مال هالسوالف وتعب جسدي من عدا سؤائل دتوكع عليه ..

ساكته واكول من القهر ديصير بيه هيج ، راجعت دكتوره كالت جسمج مايتحمل و جاره عليها ضغط ..

رحمج مو مال حمل بس هاهيه نحاول نوصلج لشهر التاسع وتجيبين عمليه بس تدخلين التاسع ..

مريت لميرال ردت اشكي لاحد لو ابجي ، بس من وصلت سكتت حالتها مو مال واحد يشكيلها ..

لكيتها لابسه ازار صلاه وكاعده تصلي وجها هم تعبان ، حتى لطمه حمه طالعه الها قريب شفتها ..

سكتت كتلها جيت اشوفج وارجع لان حملي ثكل مابيه امرلج بعد .. همست على راحتج ديربالج على نفسج ..

بوستها وطلعت سالت ديما عليها ردت سمعت صوتها تتعارك ويه رجلها البارحه ليش مادري ..

درت وجهي باتجاه غرفه ميرال همست متغيره حيل ميرال ..

ردت تفكر هواي اختج تفكير حيموتها ..

حقها لاطفل  تتلها بي لاحد تكدر تعتمد عليه شسوي ..

عفتها وطلعت ، لكيت دانيال كاعد بالسياره ينتظرني .  صعدت ريحه العطر تكتل كتل ، صعدت تافافت كم مره كتلك خفف عطر روحي دتلعب منه صدك تحجي ..

نزل المرايه يعدل بقميصه ورد هو انتي ضل شي مالعبت نفسج منه ، حتى ذاك جنتي كاتله روحج عليه هم جزت نفسج منه ..

درت وجهي عليه بسرعه ارحم نفسك شوي وتفكيرك ادري مابالك بس نوم انته ..

اني بشر والله صار اشهر مامحصل شي بشر طبيعي بس العتب عليج انتي عندج برود فجاءه شنو الصار ..

حامل  .

اهووو يلشنه بهل الاسطوانه مجروخه ، بس انتي حبلتي لازم ،اسكتي اسكتي ، لو كل حامل هيج جان زلم بطلت تحبل نسوانها ..

الي سامع عنه الحامل تصير فلفل شبيج انتي من تزوجتي عطلتي …

لزمت بطني ، صعدت عندي الحموضه و الطفل بلش يرفس وهذا كعد يشمر حجي سم ، سكتت درت وجهي مدمعه ، خليت ايدي على خدي ساكته اكتم دمعه كوه .. انتبهت عليه مستعجل ..

نوب وكف قريب ترفك لايت ضل يتلفت ويتافف ويباوع لساعه ..

همست بضوجه شكوو ..

عندي شغل ..

مايخلص هالشغل باجر وراي مراجعه للدكتوره هم كول خلي امي تاخذج انته توديني ..

عود اشوف …

باوعت عليه معصبه ، دار وجه هو على الجهه الثانيه وكفت سياره لكزز بيها بنات اثنين ،الدسوق منهم شعرها اصفر ااااصفر ولابسه تيشيرت ابيض و صدر طافر لخشمها من كبر ..

اندارت علينه الشفه حمره نوب هالكبرها عييع ، هو وجه عليها  شافته وابتسمت .. هو كبل دنج ..

اني عيوني عليهم حجيت وياه شوكت تاخذني  .

اندار عليه ..

حجه متحير ، هااا شنوو ..

شوكت تاخذني لدكتوره ..

بكيفج بكيفج  .. دار وجهه ..

درت وجهي لكدام وخليت اديه بحظني بطني صاعده فوك ، خانكتني زحت الحزام الامان لان اختنكت و الحروره صعدت عدي ..

جاي اكلك نزل الجامه اريد انتفس ،  شفته داير وجهه على بنت و اشر الها وهي ضحكت واشرت براسها اوك .. لا اراديا ، من حركه كلبي صار هالفعل رفعت ايدي و هفيته ترس على وجه بكفخه ،  عطت بي نعال دانياااال ..

هو انصدم دار عليه و لخمني على حلكي  دنجت وعطت من قوه الضربه نوب جابني بضربه ثانيه على راسي حيل من وره ..

دنجت ابجي و لازمه راسي احمي نفسي باديه .. 

صاح بيه ادب سزززز قندره شنو انتي متكوليلي شنوووو مجلووبه ..

دنجت راسي مااحجي ابجي .. تحرك السير و شخط سياره حيل .. عاط بت كلب شلون تضربيتي هيج كبال العالم ..

رفعت راسي ابجي حقيير ترة شفتتك شفتك تاشر الها كباالي كبال عيوني وهيج ..

انعل ابووج شنو من عين عندج واذا اشرت الها طار نصج شعلليج انتي ..

مررتك شنو شعليك ..

منووو كال ولج عقد محكمه ماعاقد عليج اني ..

شهكت ابجي فكيت عيووني عليه .  نزلي عطت بي حيل نزززلني انعل ابوكم لابووو انتو زبايل ..

وكف سياره حيل على صفحه توقعت يريدني انزل بس صفت دلزم الباب وافتحها انجريت من شعري حيل ليوره و تولاني راشديات اريد احمي وجهي نوب ماكدرت ..

ضليت بس اعيط واهامش باديه حتى يفكني صرخت حيل موجوعه وشي جواي انفجر و فاض ..

عطت حموووت ولك حموووت .. وخر عني يلهث ويغلط ..

دنجت اشوف ملابسي من جوه اوخر بشعري عن وجهي وابجي منهاره ورخرت شعري شفت دم سياره دم وماي ..

عطت خايفه دمم ولك ددم راح اولد .

دار وجه عليه ودنج شاف السياره ودم وجه بهت ..

شنوو ..

ولك حولد انعل اهلك حموووت ولك حووولد ..

لزم السويج اديه ترجف ايريد يشغل السياره نوب ميعرف ضل يمتمت ..

اني لزمت الكشن وابجي واعيط خبصته ، من الالم يكرم الله حسيت شي راح يقسمني نصين و يخرج ..

عضيت جف ايدي حيل ميته من البجي ، شغل سياره ويصبح مرتبك شبببيج هاااا شبيج لا تولدين لتولدين الزمي نفسج ..

دنجت راسي اباوع جوه من  حسيت شي دينزل عطت حيل ولك حوووولد والله حوولد ..

يسوق سريع ويدك هورن يدوس بانزيل و يصيح ..

لمن وصلت اني حتى صوتي بح من البجي والصياح .. اندار يركض يصيح احد من باب الطوارئ ..

اني فتحت الباب اريد انزل كعدت ابجي لا نانه لا احد من اهلي لا اخت لاصديقه كلها ماكوو ..

دنجت بالارض ياللهي مالي لازمه بهل دنيا دخذني داخلص شعدي اني بهل حياه بعد ..

لزمت من جتفي رفعت راسي هوو ، شالني شيل وكعدني على كرسي و جرني يركض للداخل ..

يحجي تااالا شبيج احجي ، سكتت خنست بعد .. وصلت لردهه اني حتى صوت عياط مابيه دخت ، راسي افتر ضليت امتمت و روحي مفرفحه ، بس وصلت وشفت دكتوره ونوب صدريتها كلها دم عبالك كصابه كو دكتوره ، كلت هيج وخربت …

دوووخه تكتل كتل ، ريحه دم والديتول معقمات تخنك ، حسيت على جو بارد ثلج ، احس بيهم يشيلون بيه وحيل وهدك ماكو رفق بالبشر ابد ..

صحيت على الالم ، واشخاص شايليني فتحت عيوني ، مامستوعبه شي ..

بس احس بالالم وصوت صراخ نسوان و بجي اطفال حديثي الولاده ..

فتحت عيوني شوي شوي اوون من الالم ، لزمت بطني وعطت ابجي اااخ .

رفعت راسي كاعده بحدي على سديه ونسوان قريب مني الي والده وجاهل بيدها والي مدده على سده ثانيه .. بس اني لوحدي مايمي احد وحتى طفل ماكوو ..

درت وجهي على وحده بصفي تبجي ، مسحت عيوني دموعي تنزل والالم فضيع ..

شافتني مره جببره حجت بالكت تدعين لبنتي واشرت على البنت تكلي ماجاي يثبت الطفل بطنها يكولون دعوه الوالده مجابه ..

برطمت وبجيت ، درت وجهي ياللهي اذا صدك مجابه اخذني يم امي وابويا لان اني تعبت خلص ..

كل ماكول هااا راح تتعدل الدنيا الكاها ماتنحمل ابد ، شسوويت بروحي اني ، شجره على حالي وشفت ويله توني ١٥ سنه ..

ياللهي دعوه طلوكه اريد راحه لان خلص نفذ صبري ، ششوف بعد من الدنيا شنو الضل ماشفته ..

المرض لو اهمال لو الخيانه لو كسران الخاطر ..

سمعت صوت وحده تحجي تاللاا ..

انداريت على مصدر الصوت ، عقدت حواجبي ما عرفتها ، تقربت عليه كوه تمشي جن توها والده ..

مسحت دموعي .. لان تطلع وفاء

برطمت وبجيت كبل ، حجت شبيج شبيج ..

تقربت عليه لزمتني ، دنجت تحظني ، حظنتها وانفجرت ابجي ، مهضومه حيل متالمه كاره روحي ، 

حجت لا لا شبيج على شنو البجي ..

رفعت راسي من حظنها كعدت بصفي لزمت ايدي حجت شنو تزوجتي ، شوكت ؟؟
مسحت دموعي اشهك ماحجي ..

ابتسمت حجت جبت ولد اني سميته عيسى ..

هزيت راسي الها ، المره الي بصفها حجت ماوياج مرافق لعد يماا شنو لوحدج هناا .

اندارت عليه وفاء حجت صدك ما وياج احد اختج وين زوجج زين عمتج وين ..

درت وجهي ماعندي جواب ضليت ابجي بهدوء ..

حجت المره عيوني اني هناا فدوه الج الناس لبعضها اعتبريني امج ، انطيني اسمج على الاقل داروح اشوف الطفل ..

همست تالاا ..

ردت ولد لو بنت جبتي ..

رفعت جتفي ماعرف بعد ..

اندارت المره على وفاء و هزت راسها متحسفه .. اندارت عليه ابتسمت خوش هسه اشوفه الج كولي يالله واكعدي ادعي دعاةج مجاب ان شاءلله ..

عافتني وطلعت باوعت لوفاء ، المغذي بيدي بلش يخلص ، وفاء مدت ايدها و غلقت المغذي ، حجت رجلج وين تزوجتي منو ..

همست واحد غريب …

ليش تزوجتي جان كبالج مستقبل حلو واختج حنينه ليش تزوجتي ..

ماحجيت دنجت لازمه بطني توجعني ..

حجت تزوجتي عن حب موو وعماج  عن الدنيا و عن مستقبلج مو ..

رفعت نظري عليها تزوجته لان محتاجته ، 

ابتسمت مدت ايدها ولزمت جف ايدي حجت و هسه انتي محتاجته وينه ؟؟

دموعي نزلت مقهوره ، حجت البشر ميحتاج بشر تالاا ..

البشر يحتاج بس ربه الكريم و عطفه ورحمته ، ابسط مثال هاي انتي لوحدج هنا بس شوفي رحمه ربج سخرالج وجودي وجود اختي ..

ترى حتى اني رجلي بالشغل يمكن ماعرف اني ولدت ، يعني البشر مايفيد وخاصه بهل وكت ..

دنجت امسح بدموعي ..

حجت شراح تسمي ..

منوو ..

ابنج لو بنتج …

درت وجهي مستغربه ، بنتي ؟؟ لو ابني ؟؟!  شبساع صار عندي طفل اني وحكون مسؤله عنه ..

حجت ماعندج اسم بالج ، يمكن ابو يسمي ..

انداريت عليها  ، بطني توجعني ..

ردت لان ولدتي عمليه ..

لزمت بطني هااا ..

ضحكت هم كولي ماتدرين جبتي عمليه بعد ..

سكتت ..

حجت كلنه هنا عمليات ، وين عقلج انتي جنج واحد متيهه ،

ابتسمت هو اني اصلا متيهه اهلي وناسي ، ودربي ومستقبلي ، 

حجت اختاري اسم للطفل ..

دخلت اختها مبتسمه تقربت علينه ، حجت هاا بالخير جايبه ولد بس شنوو محمد ماشفت احلى منه اندارت على وفاء تضحك وتاشر الها عين البارده ولج ملاك ملاك يخبل .

ابتسمت اني وبجيت ، حجيت شنوو ..

ردت جايبه ولد جنه قطعه من كمر ابيض ثلج والحلك احمر  ، الممرضات واكفات فوكاه يباوعن علي ، بس لازعلين طالع لابو حلوو ..

حجت وفاء ابو ؟؟!

ردت اي ابو مكابله خالي بالخدج لان جايبه قبل الموعد ، 

سكتت .. اندارت عليه وفاء حجت هااا يعني رجلج موجود ..

رديت هو جابني هناا بس الحيوان مكابل ابنه وعايفني ..

ردت غير ابنج حالته خاصه جاي قبل الموعده ، ردت اختها ولج فاء رجلها يجنن ..

ضحكت وفاء حجت اي اختيار تالا بعد ..

بلعت ريك ، حجيت خاف تصير زحمه عليج بس اريد اروح للحمام ..

لزمتني و رفعتني اخذتني للحمام خاص دخلت اله ، غسلت وغيرت ملابسي بالموت شايفين موت هذا هو ..

الالم فضيع الدم غزير ، موقف ماتمناه لعدوي خاضه اذا جنتي بحدج ما وياج اخت او وحده ماتخجلين منها ..

طلعت من الحمام وحجت لازم تمشين شوي حتى عضلات بطنج تتحرك ..

لزمتني من ايدي ومشتني ، حجيت وياها ، اخذيني اشوف الطفل فدوه ..

حجت تدللين ، سندتني ومشينه ، احس شي بمعدتي متمزق وديتحرك وكل خطوه موت والم ، وصلت لردهه الخدج وشفته من بعيد شايل اوراق ويركض ..

رفع راسه وشافني وكف وجه احمر تقرب عليه بسرعه ، حجه الحمدلله على سلامه حظني حيل ..

ماحظنته ضليت جامده ..

حجه بخوف ، شلونج ترى التهيت بطفل ، واوراقه مايقبلون يستقبلو  شلونج ..

درت وجهي حجت وينه ..

لزمني من جتفي حجه جووه حولته خاص العام مايقبلون بسبب الاوراق …

حجت المره اتصل على امك على احد.يجي يمها خطيه تحتاج احد انته لوحدك شسوي اصلا باليل ماراح يقبلون بيك .تبات هنا ..

هز راسه اتصلت اتصلت على جيه هم  …

سندني و اخذني للخدج اشوفه ، وكفت كبال شباك زجاجي مطل عليهم ، كوم جهال خاليهم بخانات زجاج ، ويتعايطون ..

همست وينه ياهو بيهم ..

ضحك وعيونه تجري دمع اشر ذااك ذااك بزاويه قبل الاخير ..

درت نظري عليه يمااا .. صغير صغيررر حيل ..

مايتحرك ساكت ، اشرلي يبجي ويضحك تالا حلووو حيل تخافين تلزمي حلوو و الاورده مالته مبينه من رقه مالته ..

رمشت بعيوني ، حجيت اريد ارجع ..

لزمني حظني من جتفي همست وخرر دتاذيني وخرر ..

رد اسف وبالحظه غضب متكرر تالا وعد ..

دفعته بهدوء ومشيت اكمل دربي ، هو ركض وراي حجه دكيت على امي بس تاخرت لان تجيب غراض الج ولطفل احنه هم صوجنه ماجهزنه بس شمدريني راح تولدين من وكت ..

هي على جيه وياها احتياجاتكم ، وصلت لرده نسائيه و كملت دربي الها سانده نفسي على الحايط مجاهله كلامه ..

ماحسيت بحنيه اتجاه الطفل ماعرف ماحسيت بالامومه مو يكولون شعور حلوو ، والله ماكو شي بداخلي تحرك من شفته   ..

عكس دانيال يبجي ويضحك من الفرح ، وخايف ويرجف مكابله ، توجهت لسديه وساعدتني اخت وفاء ..

حاجتي وفاء هاا شفتي ..

هزيت راسي اي ..

حجت شنو قررتي تسمي .

ماعرف ..

صدرج مادر لو بعد ..

شنو ..

مانزل حليب من صدرج اذا مانزل خلي اختي تغسله الج بماي دافي حتى بالكت بنزل ..

سكتت ، فتره واجت امه هي و اختها ، اختها ضلت يم الطفل وام دانيال اجت عليه ، جايبه ملابس وغراض ، ثاني يوم طلعت ، ودعت وفاء وبوست ابنها ومشيت …

طفل ماقبلو يطلعو الرئه بعدها مامكتمله ، ضلت خاله دانيال يمه واني رجعت للبيت ..

صعدوني كوه ، لكيت اخت دانيال فارشه الي ، ومحظرات كاروك للطفل خشب لونه ازرك وفوكاه تور ابيض  و كباله كنتور صغير ، ونفاخات زرك بالزاويه معلكتهم ..

مددت انام بالفراش ، امه ماقصرت الشهاده لله ..

اكلي شربي غسلي ، نومتي هي واخته صغيره جواي يركضن ، هو ضل يم طفل هو وخالته ..

امه تبجي من فرح اول حفيد الها وطايره ، اجو كرايبهم جايبين الهدايه ..

امه واخته هنه رتبن الهدايه ، اكلي كله معلاك ومشاوي تعويض للدم فقدته خاصه بعد ماعرفت جاره مفجوره عندي مو زين ما متت ، هي اصلا جانت نازله ومنا النذل ضربني واني عيطت زاد الموضوع سوء  ..

يومين واجت ميرال هي وديما والعامله وراهن تمشي شايله هدايه ..

#يتبع ...

اخذ باجر استراحه لو لا 😪

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق