قاع الشياطين

البارت الثالث والخمسون

...............☆البارت الثالث والخمسون ☆............

#قاع_الشياطين(البصر والبصيره)

#بقلم_أسماء_ديمير

جريت نفس مدمعه دنجت راسي على حظني ، همست بس صاابره ومسلمه كلشي بيد الله اني وكعت نفسي بهل قاع  …

اكو ايه تكول ،، بسم الله الرحمن الرحيم .. (ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار)

ابنها طلع صوت مامه ..

رفعت راسي ابتسمت ..

حجت يالله حجيت يعمررري يروح مامه ..

دمعت عيوني اني ، حجت هي :- الله حافظج انتي ميرال لان كلبج نظيف ، 

هزيت راسي ، حجت احاول ادبر الج حبايه و تاكدي منه لبشار مايحجي وبعدها نفكر شلون نتصرف ..

هاهيه .. 

شالت ابنها و مشت ، ضليت اني كاعده على المصلايه لساعه اسبح ..

كلبي برد و ارتاح ويله كمت من مكاني ..

صبوو الغده اني كعدت انتظر بيبر .. دكيت عليه مارد ..

تالي اكلت ..

للمغرب هو مااجه ، دك عليه كال ابات بره تردين شي ..

مثل شنو اريد يعني ..

يعني خاف محتاجه شي اوفره الج بغيابي ..

وين رايح بس حتى كلبي يطمن عليك ..

للجنوب كم يوم ماطول هواي .. 

جن تعودت على السفر بيبر و غيابي ما عاد يهمك ..

ضحك بهدوء ، مثل عشرتج ماشفت والله عشره هادئه ودافيه وحنيه وصادقه ، كلها كم يوم وارجع لحظنج وين اولي يعني  …

ويامن رايح ..

ويه عدي ..

نفس الدرب بيبر موو ..

خليتي دواج المرهم ، لو خلص ..

جريت نفس متحسره ، بعده بي ..

خوش دهن هذا ، الاثر الي بوجهج و اديه خفاه والحمدلله زال بس ضل الي برجليج اذا دهن مانفع وياه نسوي اله ليزر سالت قبل فتره عليه كالو ليزر افضل حل بهيج درجه من الحروق …

ليش ماعالجت روحك باليزر بدل الوشم ..

هذا اثر انزرع بروحي ماريده يروح هذا كل مالزمه اذكر عيونج واذكر اني والميت سوه بلياج  ..

ابتسمت السانك معسول بيبر ..

بس يمج والله كلبي رجيج  .. سكت شوي وبعدين حجه بهدوء ، دخلت نبرات صوته الهادئه وتخلخت بدمي … ومدري شجم كمر ماشيت ولا واحد ترس عيني بكدج .. نجمه وكمر بسما صافيه انتي …

رفعت اصبعي لحلكي همست خجلانه .. وتسألني كيف أنت؟ فأجيبك: “مريض بك”.

انتي علتي ومرضي بيبر ..

لااا ليش هيج ولج وهاي انتي عافيتي كلبي الي ينبض ..

ارجع بسلامه و حتى نحجي ..

على شنو امري ..

ابتسمت بهواي امور يانظر عيوني تعال و ان شاءلله خير  .

ميرال ..  همست اله .. همممم …

والآن أشهد أن حضورك موت وأن غيابك موتان والآن أمشي على خنجر وأغني... قد عرف الموت أني أحبك أني أجدد يوماً مضى ... لأحبك يوماً وأمضي. 

لزمت كلبي ممرود من كلامه .. تحجي بالموت هواي بيبر  ..

لان عايش وياي وياكل وياي ميرال .. اتمنى تفهمين قصدي نفس ماانفس ماني فهمت وعرفت الي تردين تحجي قبل لاتنطقين بي .. 

همس بفحيح لاتحاولين تفتحين ذااك الموضوع ابد ، كافي حالج حال مرت عدي وديما وغزل وايلاف ..

محد بينهم سعيده اني متاكده .. 

وانتي .. 

اني  تعبانه من داخل بيبر .. داخلي ممرتاح دتالم والله …

من ارجع ارضيج واسعى لراحتج لو اعرف اخذج للمريخ ..

ضحكت ..

اشتريلج زحل هم ..

ههههههه ..

و نمر على الشمس نتشمس شوي ونشرب اورنج جوز ..  شكلتي ..

ههههه نفحم قصدك ..

لا لجعه شوي ، و نشتري لابنه كوكب زهره حتى يلعب براحته ومايضايقنه ..

مو بشر احنه طلعنه فضائيين ..

اهم شي راحتج عندي ..  سكتت اني .. حجه اروح كلبي مطمان لو شلون ..

ترجع بسلامه .. 

ميرال احبج ..

الله وياك ..

ماسمعت منج احبك ..

تعرفني احبك .. احبك هواي هم ..

سده و راح .. خليت الجهاز على كلبي .. ابو دروب يمه منك ، اول كلمه حلوه واول جمله حب جانت من صوته ، استغرب والله لدرجه دهشه من اسمع واحد يلومني على حبه ..

وحده من الاثنين اكول لو هالشخص غبي وماديشوف الي شفته اني والي عشته و يحكم عليه من زاويه هو زوايته المشوشه المو واضحه ..

او هو انسان سطحي بلا مشاعر واحاسيس ، او انسان منافق يحب المثاليات يريد كلشي مثالي خالي من حب والعاطفه وهذا شي مستحيل ..

احنه بشر الله خلقنه نصف عاطفه ونص عقل ..

كظيت نهار بغرفتي ، غزل بره هي وابنها و صوتها واصل ليمي .. وام زياد يمها ..

باليل دزلي اغنيه قديمه .. اغلى الحبايب .. لنوال الزغبي ..

دز تنطيج شبه نوال بصغرها ..

ابتسمت صدك .. تشبه امي نوال الزغبي …

عيونج مثلها وكصه الجسم و خاصه الغره نازله على العيون …

ابتسمت ، معناها اني مثل امي بشكل ..

مادري .. 

نمت على صوته مرتاحه بسببه ..  وكعدت هم مرتاحه 

إن أردت أن تستيقظ سعيداً في الصباح 
ف اعرف مع من تتحدث ليلاً .

لثاني يوم ، ديما جابت الي الحبايه خالتها بكلينكس وترجف ..

همست الي بخوف بكتها منها بلا ماتدري ترة ، والحبوب ضالات عدها يمكن سته .. خاف تنتبهه على اختفاء السابعه ..

حجيت لا عود يضل بالها وكعت بالارض منها وهيه تاخذ منهم اكيد ماتشك .وما تنتبه …

اخذتها و نزلت .. تلكتني غزل حجت على وين ان شاءلله اثنينكم من اجيت وانتن اختفيتن عبالك اكرص اني ..

مارديت عليها مشيت من يمها وابتعدت ديما حجت دووخر انطي مجال صايره بكد الثوور عووذه شتاكلين ..

ضحكت ذيج ضحكه خرعنني وحجت بمياعه :- هاااااي .. اكووول ليه مال طوولي ..

صفكت الها ديما:-  اي انتي تاكلين ليه منااا وتكبر ليتج انتي منااا كبر شهل جسم الي يخززي ..

ضحكت غزل وحجت حتى من اهز يهتز كوولشي خما مثلجن ماعدجن شي ينهز مثل نسوان ..

ردت ديما نسوان تنحت و تتبع رجيم حتى توصل لجسمنه اما انتي من الله هايشه و مكيفه بروحج وياريت على صحه جسمج نصه اكياس دهنيه غددي شهل قرف ..

عفتهن يتعاركن بينهم وطلعت ادور بشار ..

صحت العامله بشار وين ..

لي ياهانم .

شعليج  انتي .. وسن وين ..

عند ابنها الو لي انو عايزين يعملو له  عمليه .. 

درت وجهي وطلعت للحديقه ، ماكو بشار ، افتهمت بعدين طالع ويه عواد للمطعم ..

عواد الي رجعته ماراضي عليها بيبر بس رجع عود كم يوم ويروح .. ابتسمت اكص ايدي اذا ماستغل غياب بيبر حتى يكشول المطعم من كل فلس ..

ويله يروح ، رجعت خايبه لاكدرت اروح لوسن داسالهم على ابنهم وطمن ..

ولا حصلت بشار ، فتت من يم ديما وغزل بعدهن متعاركات وحده تعير ثانيه ..

هاي تكللها هايشه ام شحم ودهون الزايده وذيج ترد المعصعصه المسمومه ..

حمدت ربي على عقلي ماعرف بشنو يفكرن هذني ، ديما من تسمع صوت عواد تختفي و تشرد لغرفتها تخاف منه ، 

ضليت فتره ماشفته لبشار ، التهيت بالبيت ويه ديما وايلاف الي صحتها بلشت تدهور حتى شعرها بده يساقط  ..

يومين هيج ويله كدرت احصل لبشار  ، جانت دنيا ليل توه خلصنه عشه ، سمعت صوته يكول للعامله جيبي جاي بره للحديقه ..

 ، رحت اله لكيته ينركل لوحده بالحديقه ..

وكفت كباله شلونك ..

زين وانتي ..

بخير شو و حدك..

وين اولي يعني …

سكتت كلي وراج كرسي جري وكعدي .. مديت العصا طخيت بي لزمته و كعدت عليه .. حجيت شبيك ضايج ..

شدراج ضايج بالله ..

هههه شبيك تنتر ..

رجلج اخذ ستار وماخذني عود ليش هااا ..

شمدريني اساله وين ياخذك يعني شنو فرق ..

الفرق ياخانم كل طلعه من طلعاتهم يتقسم الربح على الطالعين وياه .. 
يعني قبل سنه جان من ياخذني الي تقريبا ٥% وجانن فايداتني ..

هسه بطل يدز عليه و ياخذ ستار …

سكتت بعدين حجيت شكد ربحكم من كل بضاعه ..

حسب التصريف نوبات نصرف نصها ونوبات كلها حسب الوضع …

رمشت بعوني محتاج فلوس ..

لااا مضايقني انو رجلج بطل يثق بيه تدرين ليش .. بسببج لان شافني اميل الج ..

ابتسمت خافو منك لا تحجي شي الي فد يوم لو يفلت السانك.. 

بالضبط عكس ستار الي يبعد عنج  ماينطيج سالفه ، هم من شروطهم من زمان تكون اخرس اطرش لاشفت ولاسمعت وين اني مكابلج واقص الج قصصهم ..

ابتسمت لان كلبك نظيف مثلي وشفتني اشبهك وهيج ارتاحيت الي الكلوب سواجي بشار ..

يباااو حجيك يهز الكلب كناري ..

ههههه .. تذكرت ابو حمد اول مادخلنه هناا حجه النه صيرو خرسان طرشان ومالكم شغل بشي وجتى حديقه منعنه منها ..

اي اذكر غير انتو من دخلتو هنا جنكم ورود ريانه دخلتكم جانت حلوه للمزرعه ناس طيبين مسالمين تحبون الحياه ، 

دنجت راسي جنه هسه تطشرنه كلمن بصفحه …

دنيا هيج يباا ، حجيت بشااار ؟؟

ضحك احجي مو اني ادري حوصتج هاي وراها شي خاصه من تجرين اسمي جرر بشااار ؟؟!

هههه غير اخوي انته المن اروح من بعدك .. 

اي دكي ناعم دكي هو اني من غيرهن سايحه روحي ..

هههه ردت اشوفك شغله بس بداعت الخوه ما تحجي ولا تكول ..

هااا جن سالفه جايده .. 

مديت ايدي الي بيها كلينكس ،  فتحتها اله ..

سكت ثواني حجيت اني هاا بشار شنو هاي كول ..

منين جبتيها هاي ميرال …

غمضت عيوني  معناه ضني صح مو ..

جر الكلينس مني ،  جر نفس كوه ، حجه بخوف ، لاتكولين بيبر دينطيج منها ، كولي ترى كلبي راح ينفجر ، ماوصلت بي مواصيل لهل درجه مو.. 

عقدت حواجبي ، مخدرا* هاي ..

سكت ..

كول بشار ، ام زياد دتنطي ليلاف منها وهي حامل ..

شكد نكسه هل عجوز هاي الله لايوفقها شكد نذله ..

حجيت كول اي لو لاا ..

نتر اي اي …

رفعت حواجبي وجهي مصدوم ، عليك الله تحجي صدك ..

اي والله باين ترى لونها وردي وعليها حرف …

رجعت ظهري على كرسي انهد حيلي ، عزااا ليش هاي بنتها يمااا شنو من كلب شايله ..

لزمت صدري ارجف ، حجه مالج شغل لاتدخلين هاي مثل العربيد ، ماتخاف من احد ، حتى حنيه على جهالها ماعدها هي الي تترك ابنها يعيش بالذل و الديون بس لان ماخذ كلامها ومامشه بطوعها شنو تتوقعين منها ..

بس مو مال تشرب بنتها ممنوعات يماا ونوب حامل تريد تموتها يعني ..

لا كولي تسيطر عليها ، ايلاف انجنت خلاص لو ماهاي حبوب ماكدرت عليها امها ، اذا انطت الحبوب بيام متقاطعه متاثر  ..

بس موزينه هاي راح تكتلها خلاص وتنهي حياتها ..

خطيتها بركبه امها الي شربتهن الها ..

اديه ترجف ، حجه ميرال لاشربين شي ماتعرفي شنوو ..

سكت بعدين حجه والله ماعرف شلون مامنه انتي بنصهم ، رجلج مأمن الج الحمايه و يخافون منه وكافين عنج والا  انتي تخلص منج مو صعب ماكو اسهل منه ،ولا ياخذ منهم وقت .. تجفي الشر واني اخوج ولا تامنين باحد ابد ..

سكتت انعقد وجهي و تخربت احوالي ماعرف شنو صابني من احساس خيبه على خوف على فقدان الامل بهل بيت انو ينصلح ..

بداخلي قناعه اي اجفى الشر ، جربت اندك بيهم شوف شسوو بيه ، مالي شغل شعلي ، نوب اكول لاا ظميري شلون مارتاح ماكدر انام زين ...

جر نفس من النركيله هو هم مقهور و مكتئب ، غمضت عيوني بهدوء ، فتحتهم حجيت شلون نعالجها ليلاف ..

نتر بزع :- عوفيها كتلج ليش ماجوزين انتي ، تردين فد يوم تنشمرين من البلكونه ويكولون بعدين عميه وعثرت وكعت وماتت صدفه بحادث هااا ..

-اتفرج عليها دتموت على البطيى واسكت .. 

-هي عدها عقل وتعرف مصلحتها وين هي تحير بنفسها ..

-ماتعرف هي هاي مخدرات ..

-مشكلتها اذن .

-ليش هيج كلوبكم قاسيه انتو ماعدكم رحمه ..

-الدنيا قاسيه مو احنه ..

-لا والله مو الدنياا احنه البشر مو خوش اوادم ، كلشي وشمرنا على الدنياا ، ابسط مثال هسه ايلاف شنو ذنبها تزوجت واحد متحبه نوب حبلت منه وهسه خلوها تدمن وهيه حامل ، هاي دنيا بالله لو افعال البشر كوول يله …

-شعلينه .. اذا ضليتي هيج نهايتج ترى اسوء منها ، تمسكي بالي حاميج منهم ولا زعلي لان اذا زعل اقري السلام على روحج ..

-الله الي حاميني مو بيبر ماشي .. عفته وكمت ضايجه نترت بي جيب الحبايه .. حجه بلعتها ولي منااا …

-صدك تحجي ..

-اي والله ..

-ليش متولي لمرتك انته هاا كاعد هنا شكوو ..

-مرتي زعلانه الطايحه الحظ هو انته نسوان شكو وراجن بس شلعان الكلب حتى الاحتلال بسببجن .. 

-سكتت جن بلشت تخربط من الي بلعتها توه  ..

-ولي منا ميرال ..

وجع كون عفته و مشيت .. رجعت لغرفتي ، توه دخلت وجفتت علي ديما حجت هاا بشري شكال الج شفتج وانتي كاعده تحجين وياه شكال ..

اي طلعت صخام ..

عززاا كولي والله ..

اي والله ..

يماا منج ام زياد شكد حقيره .. هسه شلون شنسوي ..

شدراني اني هم حايره خايفه ادخل و نروح برجلين وخاصه بيبر مو هنا غير ستفردون بيه ام زياد و عواد …

نكول لابو زياد اكيد مايدري ..

هو وينه قابل لافي طول اليوم دايح مادري وين ..

هم صدك هذا لايحل ولايربط جنه مزهريه ..

سكتت شوي اني بعدين حجيت نخابر رجلها وننطي خبر اكيد مايرضه مرته تشرب وهي حامل بابنه ..

مو كالت ايلاف هو جان ينطيها تشرب ..

جوز مهدء مو مخدر ، ماتشبه حبايه هاي .   

ماعرف والله نحاول نراسله من اي رقم ونشوف نكله ابنك حيموت بسبب المخدر،* لحك عليه .. 

راحت واني مددت انام ، رجعت انفتحت الباب حجيت ديما راسي صار هالكبر عوفيني ارتاح شوي .. اجاني صوت غزل اكولج ماعندج البا* ابو الخيط اسود ..

رفعت راسي من المخده غزل صدك تحجين بهل ليل تردينه ..

لعد شوكت تلبس هالشغلات غير باليل ..

فتحت عيوني ليش هو يلبس بس باليل ..

لا بكيفج بس اني يضوجني بالنهار فماالبس شي اعوفه يتهوى هههااااي ..

خنست وجهي خرط عود شلون مو عيب ..

لا موعيب هسه عدج لوو اروح لايلاف ..

شجاب قياسج على قياسي خيه اني ٣٨ وانتي والاربعين سوه ..

احشكه لاتخافين هو خيط …

عندي واحد مملبوس ، هسه اشوفه الج ..

كمت فتحت الجرار الجوه اخر خانكه بعده بالجيس .. كتلها يالون هذا .

حجت اصفر شو باله دشووفه هذا كامل مو  دنطيناه كله … ماريد اسود غيرت رأي جرته من ايدي ومشت ..

ردت اندارت عليه و حجت :- ها شكرا الله يترس بطنج جهال ولا ماضن بس يله ، 

فريت ايدي خيه لو تدعين منا لباجر انتي دعوتج بالذات توصل للسكف وترجع توكع على راسج ماتوصل ..

هااا فوكاها ..

شو اطلعي بره غزل يله بره بره …

دفعتها وسديت الباب وقفلتها .. يارب شهل بشر كلهم مخابيل تريدلك واحد صاحي ماكو …

غيرت ملابسي ومددت انام مرتاحه ، دك جهازي رفعته .. بيبرس ..

ها حبيبي ..

راح تنامين .

اي شدراك ..

بعد وكت للنوم ..

شسوي ماعندي شي ، شوكت تجي اشتاقيت الك ..

باجر اذا الله سهل عليه ..

خوش ..

شجانت تسوي عندج غزل ..

شنوو ..

كح شوي و سكت حجه تعشيتي موو دهني رجلج لو نسيتي ..

رفعت حواجبي العامله تنقلك الاخبار اول باول موو ليش هيج بيبر داحس نفسي مراقبه كاره الوضع تدري لو لااا حتى عامله كارهتا وداعلمها بطريقه سيئه بسببك ليش تشيلني خطيتها ..

مو هي والله اني عرفت ..

شدراك .. 

اعرف ميرال وخلص احب يكونن عيوني عليج اخاف لايصيبج شي واني بعيد ..

سامع شي ..

لو سامع جان لكيتيني فاني الدنيا فني ماسمع لو اشك بس ماراح اسكت حتصرف ، بس كل مافي الموضوع حببت اطمن عليج ..

اني بخير بس ايلاف لاا ..

مالنه شغل بيها ..

البنت مريضه ودتش… سكتت خفت احجي ..

شبيها .. 

كتلك مريضه صحتها مو شي ..

من ارجع اشوف شبيها وشنو قصتها ..

تمام .. سديته منه خليت راسي على المخده وغطيت نفسي صافنه ..

بالي يم تالاا بالي،يم حبيبي وبالي يم ايلاف المسكينه ..

شايله هم الدنيا اني ، ولاواحد شايل همي لو فكر بيه .. خرب بيها من عيشه اي والله …

توه غمضت عيوني وبلش راسي يهدء من الافكار و يشتغل ديجي و يطلع صوت ساريه سواس بس اسمع مني يالمجنني ..

اناا المتعذب وانته المتهني ..

ضربت كصتي بجف ايدي والله انتو المتهنين واني متعذبه الوحيده بهل بيت ..

شدعي عليج ياغزل سويتي البيت مرقص ..

بس اسمع صوت الردح بطابق الثاني و صوت تصفك و تصفير عواد يصبح ايووووو هززز بعد …

صميت اذني ياللهي لا توكع البيت علينه لان اني مؤمنه واصلي ..

لا تعاقبني ويه هذول الكفار ، لان .. سكتتني صوتي ضخكه هههاااييييي  ...

فتحت عيوني دخيلك ربي شهل ضحكه المستورده من مصر لو شنوو ..

شوي وكبت هلاهل ، واشتغلت ساجده عبيد ..

لاااا اليوم الحفله صباحي باين ، لو مطيتها الاسود مو جان ارحم هذا الاصفر شيهدي بعد .. 

خليت مخده بيبر على راسي وحاولت انام ..

والله من اكول للفجر الديجي مشتغل ماكذب ، للفجر وساجده عبيد تجرر حتى حفظت اغانيها ، وشلت اذنوب بكد الدنيا من وراهم ..

عيوني موتني من الالم بسببهم اريد اغمض ماكدر الله يعين ديما الي غرفتها صايره جواهم الربد والدبج كله فوك راسها وراس ابنها …

عفيه هالبت تهجع هالهايشه ابد ولا ذاك الثور ، تكول متيهين ثيران بالغرفه وياهم اغاني و ديرافسون سوه …

بالي ابنهم المسكين شلون عاش بينهم شلون نايم يربي هالطفل ..

ب٣ ونص دطفه ديجي ، يالله …

كبل نمت مستغله الهدوء راسي يردح ردح و يردد اغنيه ساجده كتلك اجيبك لادرب كتلك اجيبك ططح طططح …

اتراهن عليك اصبح حبيبك ..  ططح ..

كتلك اجيبك للدرب كتلك اجيبك .. 

لا تتعاند وياي ماتكدر ياهواي .. ططح طمطححح ..

نمت و حلمت اني رقاصه الله يشهد ، كل احلامي قبل بريئه وطفوليه .. الا ذيج اليله والعياذو بالله منها ، تطافر منها الرذيله والكفر والفجور ..

اركص بثوب مصري مدندش احمر وبي فتحات و بالفتحات ليرات ذهب و بيبر كاعد يكت عليه فلوس ..ا

اكتشفت اثناء الحلم اني شاطره بالرقص الشرقي ، افشل انسان بالركص  اني بس بالحلم انكلبت فيفي عبدوو و صافيناز سوه ..

نوب اركص و بيبر كام يحظني من وره ، و اني اضحك ، حسيت على حظنه من وره ، دفعته وخرت كعدت على حيلي دنيا تفتر بيه ..

ماعرف من صوت ديجي الي بعده يصدح براسي ماعرف قله نوم بس صوت المنبه يرن حيل ..

وخرت اكوم جلبت ايد بيه يحجي اسم الله شبيج ميرال شبيج حلمانه ..

واني اردد هذا الحلو كاتلني ياعمه ..

سمعت ضحكه قوويه فزيت فتحت عيوني افرك بيهم .. بين واعيه وبين بعدني بحفلتي اني وبيبر و ركص ..

حجه وهو يهز بيه ميراااال شبيك عيوني ..

منوو ..

هذا اني بيبر رجلج شبيج .. اول مره اسمعج تغنين لا نوب لساجده بيج حلمانه متكليلي ..

وكفت صافنه لزمت راسي دايخه وراسي يصل ، حلمت حلم بشع والله يابيبر حلمت اني رقاصه .. 

طكها ضحكه قويه خرب ضحك ، كرت عينج وبيا ملهى تشتغلين حتى اروح اشوفج تهزين ..

نترت بي .. بملهي اخوك ومرته .. دفعته من جتفه وعصبيه وراسي يدك يدك عبالك عمال ديشتغلون بي من الوجع ..

 للفجر ياارجال للفجر هم  دك وركص للفجر صاح الله واكبر و هم مشغلين ساجده .. كعدت اطكله اصبع و اشرح اله الوضع .. 

سااجده عبيد بيبر للصبح مشتغله ..

نوب انكسرت شيشه .. نوب اجيبك للدرب .. نوب مرينه بيكم حمد ..

حمد وصل مشي للكويت من الظيم  بيبر و اخوك مرته ماسكتو ركص و ضحك ترضاها .. 

مايكولون ناس تعبانه ناس مرضا اكو اطفال شنو قضيه خلللص وشلو مستحه ..

-اهدئي اهدائي كله هذا يطلع من عواد ومرته ..

لا ياااشيخ تسوي نفسك ماتعرف اخووك ..

-صدكي مادري شنو القصه فهميني اليوم انعل والديهم شلون يحرمونج من النوم ..

-غير ماجنت انته موجود و شفت وسمعت استغلو غياابك مرمطو اهل البيت  البارحه  والله ..

-لا لا مارضه ابد مايكون خاطرج الا طيب والله اني الخم بس اهدائي وتعاي نامي بحظني ..

-لا وخرر فاتنني الصلاه اكوم اصلي ..

-هي فاتتج فاتتج صلي قضاء عودتعاي نامي جرني و نمت بحظنه ..

ريحته طيبه يمكن سابح ، عمري ماشميت بي ريحه مو طيبه برغم اعرف بي يشرب و يشرب جكاير الكوبيه هم ..

بس ملمحت بي ريحه مقرفه حتى ريحه جكاير ملايحتها ، نوبات اشك انو هو ميشرب جكاير ولا يشرب ذيجن سوالف …

لان ابد ما انتبهت عليهن ، اعرف بس بره يسويهن من يجي كبل يدخل يغسل ، 

جريت نفس من لاحت تالا بذاكرتي ، مادكت عليه ولا اني هم .. مقهوره حيل منها ، خايفه عليها ، شلون وضعها هسه ، الي طمني بيبر كال اهله فقره مو راعين مشاكل ..

وغرفتها فوك هيه ، الي طمني اكثر اعرف اختي وكحه تكدر تعيش بس الي قالقني رجلها النذل …

نمت بحظنه ساعه ونص وكمت ماكدرت بعد راح تصير صلاه الظهر و الصبح ممصليتها ..

عفته نايم ودخلت توضيت و صليت ، ربع ساعه ادعي الها الله يهديها ويهدي رجلها و يصلح حالهم وتعرف غلطها ..

خلصت ونزلت اكول للعامله سوي ريوك ..

لكيت  ديما بالمطبخ وعصبيه تكللها يعني خلص بححح طار البندول راسي حينفجر حموووت من الالم ماكو يعني اي مسكن شلون هسه اموت يعني ..

ردت العامله مفيش ياهانم هو في حد الك انا حكيم ..

ابتسمت اني شبيج ديما سلامتج ..

صاحت تون راااسي ياايمه يااحبيبه رااسي حموووت والله ..

شبيج ضغطج لو شنو ..

ياضغط خيه عواد ورقاصه مالته يسون جلطه مو بس ضغط اليل كله ماغمض الي جفن لا اني ولا امير الدبج كله فوكانه حتى عرفت جم مره سوها وياها كله يمي سوالفهم ..

ضحكت والله شلت همج البارحه ، هم اخذو راحتهم كلش ماحسبو لاهل البيت ..

حجت الساحه فرغت اله ماكو احد يضبه وين كون الله يرجع رجلج ويلكاه بهل وضع حتى طرده تصير بنص اليل هو وذيج السافل*

ترة بيبر رجع  الصبح يعني هاي اول واخر مره يسويها عواد ..

هااا خير انشالله ، احسن انجلبو علينه البارحه ..

دخلت ايلاف حجت ضجتي لان الدبج فوكج لعد اني شكول وهم بصفي ، حتى صوت الخرخش مال ليرات الوصله الرقص صوتها يمي .. حتى عرفت جم مره نام وياها ..

ضحكت اني وديما . 

حجينه عود حسبتيهم ..

اي والله ثلاث مرات .. فطسنه ضحك .. ديما كالت وشلون عرفتي عود ..

اني همست عيب ولجن العامله هنا ..

حجت ديما اكول انتي ست روحي عود من نريدج نحتاجج .

حجت لي ياست هانم دنا ست زيوكو ..

ايلاف نترت اطلعي دنكول امشي رشي الحديقه احسن العراقي مايشبه المصري روحي …

طلعت و ديما حجت اي كولي شدراج ، اني اضحك مثل الفطيره ، رغم مزوجه بس هيج سوالف والله ماماره عليه واستحي من واحد يحجي بيها لان غريبه ، منو يسولف كبالي قابل نانه لو تالا ..

بس من اجيت يم ذني لا يحجن طك بطك عادي ، كعدت ايلاف تكللها هو كل شوي يصيح هذا هدف كوووول و ذيج تصفك اله وتكله هييييي ولد ان شاء الله ..

اني خليت راسي على الميز اضحك ، وديما تحجي عووووذه  .

ردت اي ايلاف اي ويكرم الله وانتن ممحلفاتني هدف ثلاث مرات وهو سكران شفتي شلون امكانيات .. 

الا اني طارق حتى بهاي السالفه من يشرب مايدبرها يوكف و ره دقيقه يموت ، 

اني ضليت افرك بوجهي من خجل و صخنت من ضحك وفشله وهنه عادي ..

اندارن علي وسالن اثنينهم ورجلج من هو سكران جم هدف يسوي ..

عمه بعيونجن شعلينجن برجلي ..

خاب ثول غير دنسولف شبيج ماتنطين حجايه ..

خي رجلي عمره ماجاني سكران دومه صاحي الحمدلله ، حتى ريحه شرب ماشامه بي يكرم الله ..

حجت ايلاف لا اني اشهد اله صراحه هو نظيف ومن نوع يعرف شلون يتصرف و يحكم عقله مو مثل عواد جنه زمال و يزاكط ويمشي ويجرع بهل سم ..

رفعت حواجبي اي عيوني صح ..

حجت هسه دكولي شكد صاحي يشرب المهم نعرف شكد العدظ ..

ترى حرام نحجي بهل سالفه مايجوز ماشي اضافه الى ... قاطعني اوووو راح تبلش تفتي و تتفلسف خاب انتي شكد ممله و معقده ..

نترت ترى هاي اسرار والله  و حرام تنحجي حتى لو بين الاخوات ، هذا ستر بينج وبين رجلج شلون اكعد اسولف بي خيه هاي عوره مره ورجال شهل عقليات عدجن ..

كمت لحيلي اروح اكول للعامله تجهز الجاي ..

طلعت للحديقه و دخلت غزل عرفتها من صوت ابنها رامي ..

حجن وياها البنات .. عمي بيج حيل تمشين بعد الركص مال البارحه ..

ماردت عليهن ..

حجت ديما هيه هاي مو نفسها الي تركض بملهى للفجر يوميه مايضرها ركص ليوم واحد متعوده ..

-حجت وعندي استعداد اركص سنه هم بس كون فوك كبرج ، طاح حظج يالغواره ..

صاحت لجججج وسن وينج تعاي سوي ريوك يله وصعدي النه 
.

ردت ايلاف وسن مسويه عمليه لابنها واخذت اجازه اخدمي نفسج بنفسج ..

ضلت متلاسنات وصيت عامله وصعدت ..

كظه اليوم هيج ، وره فتره مو طويله.. كاعده اني و ايلاف نسولف عن حملها ..

واصله لشهر الثامن توه دخلت بي خطيه  .. تكول احس بيه ولد بس مماخذه اي سونر اله ..

العامله جابت جهاز الي وحجت تلفونك بيرن ..

اخذته منها منو ..

تالاا ..

ترددت لثواني ارد .. بس كلبي قبضني خفت ..

فتحته و سكتت ماحجيت بس اسمع صوت نفسها المضطرب ..

حجت ميرال ؟؟!

كلبي زادت دكاته ، خفت حيل ، همست ، شلونج تالاا ..

شلوني يعني بلياج …

كمت من يم ايلاف مدمعه ، كلبي يرجف .. شبيج تالااا ..

مو زينه ميرال .. بجت ..

وكفت جامده شبيج تالااا من شنو تشكين تردين اجيج هااا ..

اني مريضه يمكن هاي نتيجه اخطائي و ذنوبي موو ..

سكتت لثواني ممستوعبه ..

حجت بس انتي تعرفين الله زين معقوله يعاقبني هيج ..

لزمت كلبي شبيج تالاا شبيج كوولي اجيج هسه انتظريني ..

لا تجين لاااا .. 

شبيج لعد احجي كلبي حيووكف ..

مسامحتني  انتي ..

بجيت شبيج يكلبي انتي اني مزعلانه حتى اسامحج راضيه عليه والله بس كولي شبيج...

#يتبع ...

الي تكول البارت قصير اصلخها بتوثيه على مخها ( التوثيه :- عصا كبيره 😁😅)

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق