...............
صدنا الطيارة ..
اول مرة اصعد طيارة نطونة كارتات بيها ارقام الكراسي وسام كرسية يمي وليث قبلنا
كال وسام تعال ليث نبدل ب للارقام
كلة ليث نجب واكعد بمكانك
كلة يمعود انت ساعدها بالطفلة اني حته ماعرف اشيلها
بقة ليث يباوع بوجهي منتضر اقبل لو لا
محجيت شي دنكت ورحت كعدت دخلت جوة يم الجامة وهو اجة كعد بصفي
نزع قمصلتة وربط الحزام
اخذ ياقوتة مني اني هم ربطت الحزام كتلة انطينياها
حجة بصوت ناصي كال لا عوفيها
بقة صافن بوجها ومبتسم يركز بمعانيها هيه نايمة
ضلمت الطيارة سوو الضوء هافت عكس رجلة ع الكرسي الكدامنة وقرب البنية على صدرة وارتاج رجع راسة ع الكرسي وغمض
بقيت دايرة وجهي حيل ع الجامة وابجي بخنكة ..
ماريد اسافر هيج
ماريد اطلع مثل المهزومة
هو اني شنو السويتة حته يصير بية هيج
أريد امل
حته ما ودعتها ولا سلمت عليها
حجة بصوت ناصي وهو بعدة مغمض
بيااان ..
غلست بقيت دايرة وجهي
اخذ نفس طويل وحجة بحسرة نامي طريقنا طويل ..
مادري حسيتة يقصد غير شي
ماريد احجي ويا ضليت دايرة وجهي وصافنة ايدي على خدي لحد ما غفيت
مادري شكد نمت بس ضهري كام يوجعني حيل وصخنت
نزعت الحذاء والجواريب واني بعدني مغمضة لزمت چفوف رجلية ناااار
ويأذن حييل
حاولت اصحصح ماكدر رجعت نمت
حط أيدة وراي وسحبني شوية شوية عليه يحاول ميكعدني
رافضة هلشي حيل اريد ادفعة واوخرة منه ماكدر النعس اقوة مني
سحبني حيل على صدرة
بقة شايل البنية بأيد وحاضني حيل بالايد الخ
الصراحة النومة صارت مريحة اكثر رجعت نمت
دار علينا وسام ويضحك كلة هااا ناقص مرتاح مو
حجة بصوت ناصي نجب ودير وجهك يلاا
فشلت فشلة ضليت مغمضة و ساكته بمكاني لحد ما دار راسة وسام وهو هم بقة مغمض دينام سحبت روحي منه
شوية وكعدت الطفلة تبجي فز هوا بسرعة
كتلة جاعت
نطانياها
كلي رضعيها
خذتها منه
بعدة مغمض حطها بحضني وفرش قمصلته علية وعليها وغطة صدري طلع بس راس البنية
وكلشي يسوي ع السريع وميباوع علية بعدة مطفي
ضبط كولشي ورجع نام و وسام هم نايم
اااخ
بقيت صافنة بوجهة
شكد مشتاقتلة ..
من اول ماعرفته لليوم اني ماركز بوجهة وبملامحة بسرعة انساهن عيونة الناعسة لحيتة حواجبة كلشي بيه يجذب بس لحد لان مافهم شخصيتة شنو ساعة اشوفة طفل ساعة عصبي نار يخوف خاصة اذا يعقچ حواجبة يخوف حيل اكثر من ابوية
ساعة اشوف الندم ب عيونة ساعة ميباوعلي اصلاً احس لابسني
اي لابسني حته كلمة اسف ما سمعتها منه
رجعت كرهتة وكرهت روحي ...
ضليت بين هاي وذيج لحد ما رجعت غفيت
كعدت لكيتهم يسولفون
مقرب روحة حيل على الكرسي مال وسام ومجلب بالتچوة وماد راسة ع وسام ويشاورة
وسام داير راسة عليه ويسولفون والموضوع بيه بنية لان يتمضحكون بصوت ناصي
طبگن عندي بالزايد طنكرت
انتبه علية وسام كلي هاااا صح النوم
ضليت ساكتة
داحجي وياج وجه النعال
- لا حول ولا قوة الا بالله وسام شتريد
- شريد داحجي وياج النومة مريحة موو
- اي مريحة يلا كافي اسكت
- اي طبعاً مريحة شو بلا ليث تعال اكعد يمي خلي اجرب
ليث يباوع بالتلفون ومدنك عاض شفتة ميريد يضحك
ضليت اخزر بيه وساكتة
عاااااااب هلعيون لا تباوعيلي هيج جنهن عيون هذا ابو بريص اليركض بالصحرا شسمة ليث راح عن بالي ؟
جاوبة بصوت ناصي كلة اوسكار
باوعت عليه وخزرتة ودرت وجهي
ضحك حيل كلي اسف والله اسف كلة من ورة هذا ضربة على راسة من ورة
رجعلة وسام الضربة
خرب خرب منا عالم كااافي كاافي شبيكم
ضليت حاطة ايدي ع البنية
اجت المضيفة جابت جابت الاكل
فتح الكرسي وحط الاكل كدامي وكدامة
جان الاكل عبارة عن صمونة دائرية وقطعة دجاج وزلاطة شوية وصلصات
راحت البنية نطت لوسام هم
كاعد هو يباوع بالتلفون مال وسام الفضول موتني اريد اشوف شيسوي ويامن يحجي بس كلت خيولي شعلية
جتي وراها البنية الخ كالت عصير كهوة جاي؟
طلبلي الي عصير والة جاي
وراحت لوسام هم طلب جاي
ضل الاكل كدامي جوعانة بس استحي اكل
وسام راح للحمام ليث شال الاكل من كدامة وحطة ع طاولة وسام وشرب جاية بسرعة واخذ جاي وسام يشرب بيه
وهذا كوله وبعده عينة بالتلفون يباوع
اجة وسام كلة قندرا ليش خذذت الچااي مالتي
كلة
ياا هذا چاايكك مادري عبالي نزلت
يحجي ويباوع بالتلفون
بقيت دايرة وجهي حيل يارب صبرني ماريد اضحك والله مالي خلكهم
ضلو يحجون ع الاكل وسام يكلة الاكل مال ذيج المرة اطيب كلة حشة نعمة كلة يلعب النفس لو اموت ما اكلة
كلة ضل طبك مرض
كتلة سومة بعد شكد ونوصل
كال بعد بعد وراج حصبة وجدري
- اهوو دحجي عاد
- ليش تعبتي
- اي تعبت دحجي
- اربع ساعات بعد هذا الرفش يمج ونامي عليه اخذ البنبة لك
قفل التلفون بسرعة كلي نطينياها
كتلة لا عوفها احجي ويا ومدنكة
كلي لا جيبها يحجي بصوت ناصي
وسام داير راسة علينة وحاط ايدة على خدة ومكشر
كال لا لا كملو كملو .. طبعاً متتصورون شكد احب الرومانسية اني
تفشلت حيل ونقهرت ضليت دايرة وجهي وابجي بخنكة وبسكوت
حسيت ليث هم انغث منه كفخة حيل وذاك هم رجع ضربة واحد يغلط ع الثاني يكلة اذا زلمة مد ايدك بعد وليث يحلف يكلة اكوم ادوس بطنك
ضليت لازمة البنيه بأيد وايد الخ الزم بيها ليث جريت ايدة حيل وحجيت وياهم بعصبية صدك جذب انفضحنا عالم دتباوع علينا شجاكم
دار وسام وجه
وليث دار وجه ويتنفس بغضب
انتبهت اني لازمة ايدة !!
عفتها بسرعة بنفس الثانية
مد ايدة هو لزم ايدي بسرعة وبقة داير وجه من ذيج الصفحة ميباوع علية
كلما اريد اسحبها يعصر اعصابي يكسرهن تكسر
ماكدر احجي ويا خاف وسام يلتفت علينا
بقينا ساكتين ثنيا هم ارتاچ و عكس رجلة ع الكرسي وسحب ايدي لحضنة وداير وجه
بقة يفرك بأيدي على كيف
مادري خربطلي احساسي ارتبكت حيل حته أيدي كامت ترجف
رجع راسة ع الكرسي وغمض داسحبها جلب بيها
سكتت
غفة تغير صوت نفسة سحبت ايدي منه شوية شوية
وكت رضاعة الطفلة بس نايمة ماكعدت
كعدتها على كيف ورضعتها كلت مدام نايمين مينتبهون احس الرضاعة صعبة كدامهم حته البنية متشبع
رجعت نمت
مافزيت الا من وصلنا كعدنا وسام ثنينا اخذ الطفلة مني
ضل يلعبها ويضحك وياها وهيه بس ساكته وتباوع عليه بعدهي حته مصايرعمرها شهر
ليث ماكعد بقة نايم
لحد ما نزلت الطيارة يلا صحصح فتح الحزام وكام وكف وبعدة يروح منا ويجي منا
شال الجنطة الصغيرة
وسام شال الطفلة
نزلنا
ورانا عالم تمشي ازدحام هو يحجي وية وسام وكلساع يرجع علية امشي على كيف يمد أيدة ورة ضهري
يسولفون ممنتبهين علية ويشاقون ويضحون عبالك چنة بحفلة مو عفنا الدنيا محتركة ورانا
لاهوا ولا وسام منتبهيلي ولا عبالك مسوين شي
بلد جديد مكان جديد كلشي بيه حلو وغريب علية ..
بس ما مرتاحة ما اتخيل فكرة انو عادي اعيش بدون اهلي وازعل ابوية عادي واعوفة وما هتملة
كاافي كسرة نضال الة نوووب اني هلفكرة تموتني ودمرني
لو يعرف مسافرة شيسوي
وهو لكربلاء وماقبل اروح كال تكعد اهنا وجهزلي بيت كامل
وعفتة علمود منو علمود هذا الكسرني !!!!!!!
هذا هيانة ديمشي كبالي ممهتم يضحك ويسولف
وارجع واكول خيولي علمودة شنو لا اني علمود بنتي ما اريد ياخذوها مني
مسحت دموعي وراح كبل همة ضيعتهم كمت امشي ورة عالم ماعرفهم
ماريد امشي وياهم واهمه اصلا نسوني وعبالك جاية وياهم
وين يلا لكيتهم
وبعدهم يسولفون بقيت امشي وراهم بس بعيدة
اخر شي ليث التفت وكام يدور علية
سكتت مرحتلة ندرايت من الصفحة الثانية ورحت لوسام مناك عفتة يدور
ضليت كاعدة ع الكرسي وسام صاحة كلة هااي هاااي تعال
اجة يمشي على كيف ويباوع علية درت وجهي منه حيل
سكت محجة شي
وسام كال اطلب تكسي لو تمشون للكراج للسيارة
كلة لا اطلب الطفلة تتمرض اذا مشينا هواي باردة
كلة لا معليك خلي تتعود هوا جوهم كولة هيج بعد
كتلة وسام خاف تتمرض كال لا امشي ماعليها شي
مشينا مسافة تقريبا نص ساعة للكراج ما ويانة جنط هواي همة ثنينهم بجنطة صغيرة واني الجنطة الطلعت بيها من البيت
اخذ البصمة ليث
كال انتضروني هنا
ضل وسام وكاف يمي
طبك ليث يمنا بسيارة فورد
فتحلي الباب وسام عود يتصرف بذوق كال صعدي صعدي اعرفج بنفسي اني دكتور هاي سيارتي وهذا السايق مالتي وعندي بيت هنا وبالعراق
جاوبته بتعب وسام اني بيان مو لميعية الخوثة
لميعة صير بنت خالي وسام جان مصاحبها اول مسافر ويكعد يجذب عليها اسمها لمياء هو يكولها لميعة وهية مكيفة عبالها يدلعها ..
كام يضحك حيل صعد وطبك الباب كلي خرب يومج ذكرتيني بيها وين صفة بيها الدهر
- صار عندها طفل
اندار عسريع علية وكفخني ع راسي ومرض بعد بعد فضحينا فضحينا
- وجع شبيك
- مو ويانة ولد غريب وانتي تطشرين اسرار العائلة مو بعد يومين يعير بينا شنو صار عدها طفل
- ستغفرالله وسام البنية زوجت زوجت شبيك منين جابت الطفل يعني
- شمدريني كلت شوف منين جابتة ماشاء الله خوالج ينكطون شرف
- مثلك بالضبط
رجع ضرب ليث على راسة كلة لا تسنط على حجينا لك
جاوبة بصوت ناصي والله لبوك لبو خوالك
ندار علية وسام كلي ترة ديسب ابوج !!
سكتت
ساعتين هيج و وصلنا المغرب
شقة وسام طابق اول نفس البيت
فتح الباب وسام ويضحك كال يااااهلااااااا هسه نورت واشرقت تعاي فوتي فوتي برجلة اليمنة
- وسام فك عني لخاطر الانبياء
- ومرض غير ارحب بيج
- اليسمعك يكول دخلة قصر زايد
دخلت للبيت جان عبارة عن غرفتين وسط وصالة ومطبخ ع اساس غرفة لوسام وغرفة ل ليث من زمان بيه همة هاي الشقة من قبل ميرجع ليث وننخطب
بس ثنينهم ينامون بالصالة واحد فارش فراش بالكاع والخ ع التخم
كلي ذيج غرفة رجلج
وهاي غرفتي بكيفج وين تردين روحي
سكتتت وخزرتة وهم ولا هتملي
دخل ليث للغرفة وطلع ملابس ويمشي ع كيف لازم ضهرة فات للحمام
وسام راح بدل وشمر ملابسة ع التخم والحذاء بالممر وراح تمدد ع الفراش خليت البنية يمة وخذت جنتطتي ورحت للغرفة وسام
والله لا يشوفكم شنو شفت ..
المشاطة والشسوار مشمور بالكاع الميز العطورات مشمرة والمجرات مفتوحة
فتحت الكنتور وكع عليه تل هدوم كمزني
قمصانة مشمرة بكل مكان واحذيتة
الجرباية مختفية من الوجود اصلا
رحتلة امشي على كيف
- سومة شعجب غرفتك مرتبة هلكد شو من جنت بالعراق نهار كلة اعزل وراك
- يحجي بزود عبالة بعدني مشتيفتها كال اي ام الوصخ ابقة عليج شنو روحي شوفيها شون مرتبها هييي يالله
كتلة شفتها بس مابيها جرباية
كال لا بيها بيها بس دوريها شوفيها وين صايرة
كام اجة يمي وحاط ايدة على جتفي نوب ساعة السودة كل واحد جنة عمود اوصل لصدرة اني
شطووولة جنة تيل
بس اضحك ولازمة عمليتي
كال تعاي عيني اشوفج اشرلي باعي هنا جانت الجرباية اذكر بس شيلي ذني الهدوم تلكينها
خذني للكنتور كال هاي الخانة فارغة اخذيها الج
فتحها وكعن الهدوم علينا فصلت بعد اريد اسكت ماكو منا تعبانه ومنا سوالفة تضحكني ههههههههههههه
اجة ليث لابس تراك اسود وينشف بشعرة بالمنشفة محجة شي اجة علينا كبل وشال ايد وسام مني وشمرها حيل وجرني عليه
دفعة ذاك كلة حيوان اختي هاي اعرفها قبل ماعرفك
كلة اي اختك ابو حلك صاير دليل سياحي متخلي ايدك عليها اكسرها والله
ضليت صافنة عبالي يشاقون طلعو يتناكرون من صدك وكفت بنص ودفعت وسام خرب كافي شبيكم شجاكم
وسام كلة والله لو ما تعبان جان طشرت فقراتك
جاوبة يطشر فقراتي ابو الوصخ دنضف غرفتك اول مرة
رحت دفعت وسام وطلعتة
- شبيك ليث شنو جهال انتو بس تتعاركون
- مالج شغل انتي
- دطلع يلا خلي ابدل
- امشي هناك بذيج الغرفة اخذيها
- ماريدها مو بكيفك
- بكيفن لعد ادبسزز
- لا تكول ادبسزز احسنلك فاهم
سد الباب برجلة وتقرب علية
رجعت ليورة ع الحايط
حط اديه منا ومنا ومدنك يباوع علية
- لا مو فاهم شسوين بلاااا الفصمة
- وووخر مني
- احجي شسوين
ضليت مدنكة ماباوع عليه وادفع بيه أيدي على صدرة بس طولة وعطرة دوخني توة طالع من الحمام
- وخر ليث
دنك باسني بركبتي على كيف
- اااخ يالفصمة اشتعل ليث وعشيرتة ..
فزيت من بوستة دفعتة حيل وطلعت بسرعة للحمام
قفلت باب الحمام واباوع على روحي بالمراية وكلي ارجف
خرا بيك ياحيوان
ليش دارجف اني مخايفة منه بكد ما مقهورة
هو شلون يجراء هيج يسوي
معقولة ميذكر شسوة بية !
لو عادي عندة
فتحت المي وسبحت
ااااخ جسمي كلة يوجعني تعب قهر تفكير سفر قلة نوم مرض وووف ياربي مو زين ورجلية شايلاتتني ماريد كولشي بس خلي اطيب بسرعة ارتاح نوب عود ااقرر
والله رح اموت من التفكير يارب ساعدني واصلح الحال ..
سبحت وطلعت بسرعة
ليث :
طلعت تمشي على كيف وصافنة لافة شعرها بالمنشفة خدودها حمر عيونها مطفية راحت للغرفة وسدت الباب
ضليت اباوع ع التلفزيون
وسام متمدد بالكاع ويحجي بالتلفون
جتي اخذت الطفلة ومطنكرة حته متباوع علينا
ضحكت بداخلي وغلست بقيت اباوع ع التلفزيون
أخذت البنية غسلتلها ورجعت لغرفة وسام
حطت ملابس بالغسالة وكلتله كوم شغلها وسام ماعرف
كلي فدوة ليث كوم انت مابية حيل
كمت شغلت الغسالة ورجعت
تمددت ع التخم واباوع وبالي وكل تفكيري يمها شلون احجي وياها وشلون افتح الموضوع واصارحها يوم واحد ما اكدر أجل بعد
اريدهاا حيلللل اريدها
حته لو نصير مثل الاخوان بس المهم تحجي وياي
من شفتها لليوم ابد ما حجت وياي ولا كلمة حته التريدة تطلبة من وسام واني اموت وانغث ولا هاي السالفة
بعد ماطلعت من الغرفة بقينا احنا بالصالة
تعبانين سفر وطريق
نامت هية والطفلة يمكن ماكو صوت احنا هم للتسعة هيج وسام كام سبح ورجع نام
واني هم غفيت تعبان
كل ساعتين هيج افز بليل على صوت الفصمة الصغيرة بس تنومها بسرعة تسكت ارجع اكمل نومتي
بالخمسة كعدت للصلاة توضيت وصليت
ضليت افتر غصباً عني رجلية خذتني للغرفة
طببت الغرفة كلها ريحة شانبو وبودرة مال اطفال ههههههه مطفية الضوء بس ضوة نوم خيف
شايلة غراض وسام كلهن شامرتهن على صفحة حته الجراجف مال جرباية والمخاد شايلتهن
وفارشة هيج بطانية خفيفة نايمة عليها
احسها تشبهني احب البنية الهيج حيل تجذبني بهل السوالف
نايمة صفح ماخذة وضعية الجنين
لابسة دشادشة ربع ردن لون ازرك بسيطة شعرها مفتوح ومفروش منا ومنا ودايرة ضهرها تقربت امشي على كيف
ثوبها مفتوح وصدرها نصة طالع الطفلة غافية يمها
ضليت اباوع عليها واضحك بهدوء اول مرة اشوف جسمها وتفاصيلها لابسة كلادة قلب ذهب نازكة وية ركبتها
كلشي بيها حلو خذتني الصفنة عليها وين يلا انتبهت ع روحي طلعت بسرعة اذا تكعد وتشوفني غير تتخبل
صدرها كلة مبين حته الحمالة البيضة
رجعت تمددت ع التخم وحاط البطانية على وجهي ستغفرالله ربي اريد انام ماكدر
ضليت اتعوذ من الشيطان كوة كوة غفيت
كعدت بالعشرة هيج كلهم نايمين
حته هذا الحيوان فاتح اديه ويشخر
خذت تلفونة بسكوت فتحت حساباتي كوم رسايل بس مالي خلك اجاوب
عندي لعبة مال كلمات متقاطعة واحرف والغاز اسمها كلمات كراش هاي مدمنها منزلها بتلفوني قبل ومن يطفة تلفوني اخذ تلفون وسام فاتحها بالتلفونين صار سنين متعود عليها عفتها فترة ومن تمرضت رجعتلها ماكو شي يسليني بس نايم اروح ضوجتي بيها وتعودت من اول ماكعد الصبح لحد ما انام اني العب بيها حته اني وامشي
هم ضليت اللعب لحد ما طفة التلفون كمت بهدوء غسلت وبدلت ردت اسوي ريوك كولشي ماكو ممسوكين رحت للسوبر ماركت بسرعة شتريت شكم شغلة ورجعت لكيتهم بعدهم نايمين
رحت سويت جاي وحطيت طاوة ع الطباخ كصكصت بتيتة حتة اسوي بتيتة وبيض نحبها ثنينا مادري هية تاكلها لو لا
رجعت دفرت هذا الحيوان
كوم اتريك كووم
كام يصيح وخررر ماريد ولي
كتلة طبك مرض
رحت عليها ومتردد
دكيت الباب على كيف جان مفتوح شوية
حجيت بصوت ناصي
- بيان
- هلا
- ادخل ؟
- لا اصبر
- اوك
- يلا
دخلت كعدت وتعدل بثوبها متباوع عليه
هاا ليث
بقيت ساكت واباوع عليها
هية مدنكة
- صباح الخير
- صباح النور
رحت كعدت يمها ع الجرباية خذت الطفلة افتح بكماطها
- لا لا ليث عوفها نايمة
- نجبي كافي كعدو يلا كومي تريكي سويت ريوك
- مااشتهي تريكو انتو بالعافية
- كومي ادبسزز شنو ما اشتهي غير ترضعين الطفلة
- اي ماريد
كمت من الجرباية و وخرت الغطة منها وجريتها من اديها وكعدتها
كوووومي يلا
- ليث وخر
ابتسمت و دنكت حجيت بهدوء يم اذنها
- اااخ يايابة مات ليث وتغسل وندفهن بهل النبرة
- اسم الله شبيك ليش هيج تكول
تحجي بقهر متريد تباوع علية
- خاب فدوة اروح لهل الحلك اليكول ليث ليث ليث هو اسمي هيج حلو لو بس من اسمعة منج
- ليث وخر
- والله هيج احس حروفة ينزلن مطر على كلبي وتخضر روحي صير بلون عيونج
دنكت وابتسمت دفعتني و وخرت أيدي
- يلا ادبسزز تعاي بسرعة تريكي الجاي لا يبرد وجيبي هاي النتفة وياج
عفتها وطلعت بسرعة اذا ابقة ثانية وحدة بعد أحضنها وأبوسها
رحت للمطبخ لكيت هذا العتوي كاعد يترك
- صباح الخير
- لا صبحت لا هلا ولا مرحبا
- خير ياستار شبيك من الصبح فوك مارحت جبتلك زقنبوت وسويتة
- باوع لك حيوان انت متزوج اختي تحترمني وغصباً ما على راسك
- هههههههههههههههه شمسوي وجه البومة
- اي شكو شعندك بغرفتها من الصبح وطالع مكشر وتضحك
- مو اكوم افرك حلكك اخذ اذنك نوب يلا اروح ادخل غرفتها
باوعت منا لكيتها تمشي على كيف وتباوع علينا
غيرت الموضوع بسرعة كتلة شوكت تحجي وياهم يجون يضبطون التدفئة لا تنكطع مثل ذيج المرة
كال بعد شوية اروح وانت اخذ بطة للسوك شوفها شمحتاجة الها وللعابتها
العفو اااااااقصد لبتها
هيه بس ساكتة متحجي ومتباوع علية ولا عليه
صبيتلها حليب خليتة كدامها
كلي ليث حطلها عليه مي عليه خاف حار لا تحترك
ماريد اضحك ادري هسه طنكر وهو يريد ينرفزها هههههههه كوة ساد حلكي
كتلها انطيني البنية واكلي كالت لا عوفها
سويتلها لفة ونطيتها
تاكل على كيف وصافنة ع الطفلة
--
كملنا ريوك رحنا بالصالة اخذت ياقوتة وهية عزلت المطبخ ورجعت كولشي لمكانة
تعبت البنية كتلها هاج اخذيها
جتي خذتها غسلتلها وخذتها للغرفة نومتها
ضلينا كاعدين اني ووسام
نشاقة ونحجي ساعتين هيج
نسيت هيه ويانة ممتعود البس تشيرت كمت سويت نركيلة طلعت من للغرفة شافتني كمزت
هيه ارتبكت واني انسطرت ماعرفت منين اطلع
رجعت للغرفة بسرعة وسدت الباب
رحت لبست تشيرت بسرعة وكعدنا بالصالة ندخن نركيلة
شوية وصاحها وسام كلها يلا ترحون
وخلو الطفلة عندي
كلتلة لا ممحتاجة شي عود بعدين
كلها لا بدلي يلا روحو البنية طول هسه بنومتها عود اذا كعدت اخابركم
- على منو تخابرني خطي ميشتغل هنا وليث ماعندة تلفون
- كلي ليث حط شريحتك بتلفونها اخابرك عليك
كتلة اوك
كمت طلعت السيم كارت ونطيتة الها
كلي يلا روحو قبل متكعد ياقوتة
وادري بيه ليش هيج يسوي يردني احجي وياها وفعلاً قررت نطلع ونكعد بمكان شي واسولفلها كولشي واعتذر منها
بيان :
لبست ملابس عادية بسيطة بنطرون اسود وبلوز اسود وچاكيت زيتوني حذاء رياضي سويت شعري ضفيرة ولبست طوك اسود
طلع هو من الغرفة لابس تشرت رصاصي وبنطرون اسود ووقمصلة جلد كاشخ فد نوب وعطرة من اول ماطلع من الغرفة شميتة
يمشي ويلبس بساعتة
كال يلا امشي
وسام عود يحجي بصوت ناصي يريد يسمعني
كلة ليث مو تروح ترقم بنات وتنسة مرتك وياك
جاوبة اي مو اني مثلك ملطلط مال بنات
سكتت محجيت شي
طلعنا
صعدت يمة بالصدر
وكلشي دينعاد كبالي
سوالفة كلامة وعودة قبل سنة هيج وكت اجاني للدوام وتوسل بس حته اوافق
وعدة ألي ..
كلي ما اتقرب ومنج وتالي اخذني بكل قرف حته بس يرضي اهلة ويثبت رجولتة
جذب علية ..
وچمالة يكلي احبج !!
وهو عندة حب سنين تخلى عنه بلمح البصر ومن يكول ما زواجة مني حته بس يحرك كلبها ويغثها
منو يكول ما لسا يحبها بس انجبر بية علمود الطفلة وخاف يتفشل وية وسام
لا وكل عقلي داشتاقلة واتأثر بلمسة منة وكلمة ونظرة
شنو الصار وشنو التغير شجاني هيج نغسلت فد مرة
اني الجنت اقرف من علاقة ابوية ب امي واكرهه لان حاط تلاثة تحت عصمتة واكول ماعدهن كرامة
تالي اني اصير مثلهن !!!
صرت ضحية نضال و وسام وليث و و و كلهم
والله فلا اسامحكم
على شنو اني داتجاهل هاي الغصة البكلبي وادوس على روحي ..
لخاطر منو
لخاطر بنتي !!
بنتي عندي صارت واريد زلمة ياخذها مني بعد والله الاكلة بسنوني اكل
والله لدوس عليكم كلكم واحرك كلبكم مثل ما حركتو كلبي واستهانيتو بية ..
بس الله كريم
صافنة واحجي بداخلي
اجة صعد بصفي وسد الباب حيل
كمزت على سدة الباب
ضليت ساكتة ودايرة وجهي
وهو هم ساكت
شغل وطلعنا ثنيا ساكتين والهدوء سيد الموقف بس صوت قطرات المطر تنزل ع الجامة مال سيارة
وصلنا ..
نزل وندار بسرعة فتحلي الباب
كل حركة يسويها تذكرني بالي صار وينعقج كلبي اكثر واكثر
مشينا سريع لان مطر
دخلنا المول ضلينا واكفين ع صفحة صار كبالي عدل شعري بأيدة ونشفة ورجع لبسني الطوك
مدنكة ما اباوع عليه
كال بردانة
هزيتلة راسي لا
احجاية وحدة بعد وابجي كوة لازمة اعصابي
حجة بنبرة ناصية تعاي منا
مشيت ويا صارو ورانا عالم حط ايدة ع خصري وسحبني عليه
ضليت ساكتة محجيت شي
دخلنا محل ملابس
كلي اختاري
كتلة ممحتاجة شي والله و اباوع ع الملابس بتعب
كلي بصوت ناصي
دتعالي حبيبي يجوز يعجبج شي
كتلة لا بس قمصلة يلا بسرعة قبل متكعد
كال تعالي منا
يحجي وياي ويباوع ع الملابس ويدور
كال ليش متاخذين مالتو احسن
كتلة بكيفك راح هو يختار ضليت واكفة بمكاني واتفرج كلي سمول مو كتلة اي راح اختار مالتو بيجي بنطرون جيتز وحذاء
تراك راياضي
وشكم تشيرت مال بيت وبجامات مال نوم
وعبالك ديشتري الة ابد ميحجي شي ويسألني يختار وحدة ويرجع يخلي ايدة ع ضهري ونمشي
ترس السلة ترس
حته ما نتبهت عليه ضليت ساكتة
حاسب وطلعنا بسرعة رحنا لقسم الاطفال شترة كوم ملابس وشغلات ع السريع
بس امشي ويا وساكتة
بعدين كلي تعالي منا
راح ع قسم المنضفات
مخلصين وممسوك منطول
كتلة اوك
اشترة تايت ومنضفات حمام
ورجع بسرعة
حاسب وطلعنا
خلى الغراض بالسيارة وطلع كلاو ابيض من العلاكة شلع العلامة منه ولبسنيا
بردانة
هزيتلة راسي لا
تعالي
- وين
تعالي
طلب كهوة ومشينا مسافة دخلنا بحديقة
كبالها بحيرة مجمدة
ضليت اباوع بتعجب ومبتسمة اول مرة اشوف هيج منظر
جان الثلج مغطي الشجر والكراسي وكولشي
- هاي عود صدك اكو جوة مي
- اي والله هاي بحيرة بس مجمدة
- عزة مشايفتها بس بالافلام
- ههههههههههه تعاي اشوفج لعد
اخذ عودة صغير وفلش الثلج
طلع صدك مي جوة
الثلج ماتكسر هواي بقة يدك بيه برجلة
جريته من ايدة واضحك خلص عوفة لا تروح تغرك
رجع يدفر برجلة كال والله الا افلشة صبري
كمت اتوسل تعال فدوة عوفة لاتزلك
عافة ونفظ حذائة من الثلج ويباوع علية مبتسم
عفت أيدة ودنكت
- بنو
- هلا
كال بصوت ناصي ويباوع بوجهي
- خلي نحجي
ضليت مدنكة كتلة شتحجي
جر نفس طويل وحجة بحسرة
- مادري هواي حجي متعبني
- ماريد اسمع شي تعبانة
- حبيبي ..
- مو حبيبتك أني
- والله حبيبتي
- ليث والله ياقوتة كعدت خلي نرجع
- مكعدت
- والله كعدت كلبي حسني
- بيان
- حباب خلي نرجع
- زين ع الاقل بس باعي بوجهي خلي اشوفج كافي تنهزمين مني هو مو المفروض اني الي انهزم واشرد من عيونج
ضليت مدنكة ومخنوكة ماريد ابجي مااااااااريد
مد أيدة على كيف ورفع راسي ويباوع بوجهي بقهر
- هاا هيج بيان ...
- هااه ؟
- شكد شايلة بكلبج علية
وخرت ايدة ودنكت
- ليث
- هااه يروحي
سكتت ...
- احجي اقبل والله
- بشنو تقبل
- مستعد اتحمل اي عقاب والله بس نطقي بس احجي
- اني الي لازم احجي ؟
- لا اني .. بس شحجي على وحدة ثنين هنه هواي
- رجعني الله عليك والله كعدت .. بجيت
- امشي
كالها بقهر وبخنكة
اخذ أيدي ورحنا بسرعة
صعدنا
مسحت وجهي
- يلا حباب بسرعة بسرعة
- لج ابوي شمدريج بيها هسه تطلع نايمة خابري وسام وشوفي
- خابرتة ميجاوب
داس بسرعة وكام يطب منا ويطلع منا خمس دقايق وصلنا نزلنا وعفنا الغراض كلهن بالسيارة
دخلت وهو يفتح بالباب سمعت صوت بجيتها
دخلت اركض اريد اوصل ماكدر لكيت وسام شايلها ويهز بيها وصايرة زركة زركة من البجي جوعانه ومضيع الممية السويتها الها
نمرد كلبي
خذتها ورحت للغرفة اركض
رضعتها سكتت وبعدهي الشهكة بيها
مقهورة حيل ومنا شفتها هيج ضليت ارضع بيها وابجي ودموعي توكع عليها ..
ساعة هيج ضهري نكسر مدنكة عليه
شبعت وخرت راسها نامت كمت خليتها ع الجرباية وكمت عزلت الغرفة ولميت غراضها
طلعت بالممر لكيت ليث ينزل بالعلاكات وفاتح الباب يريد يطلع
خذتهن بالغرفة اباوع بيهن
لزمت الحذاء وصافنة عليه واضحك شمدري البس 37 هو حته ما سألني عليه
كنتور وسام ابو ستة بس كل خانه متروسة كارتونات مال اجهزة وملابس مطشرة
مالي خلك اعزلة مابيه حيل هسه بس فرغتلي صفحة وسفطت بيها ملابسي وغراضي وخانه لخ فرغتها سفطت ملابس الطفلة وشمرت اشيائة عود كلت بعدين اعزلة
خذت الابتوب ورحت كعدت ع التخم واباوع مسلسل
لكيتهم ثنينهم طالعين
مددت رجلية وبقيت اباوع
—————-
ليث :
طلعت برة مخنوك اليحاجيني انفجر عليه
كاره روحي والله
اسوء احساس يحس بيه البني أدم هو الندم والشعور بالذنب يحطم اكبر واحد
احس كلبي يتكطع
الخنكة البصدري حته من اصلي متروح احس الله ماراضي علية السويتة مينغفر وبعدني انتضر عقابي
من الحركة خذت وعد على روحي اصارحها والتريدة انفذة بدون تردد حتة لو تريد طلاك اطلك بس هم مثل كل مرة
ماكدرت احجي ولا افتح حلكي بكلمة
بالعادة ما ادخن تلعب نفسي من الجكاير بس اذا مخنوك حيل حيل اخلي باكيت بجيبي وضل اسلت منه
اجاني وسام لكاني كاعد ورة السيارة بالبرد وادخن
سكت محجة شي ولا تسخف يدري طابكات عندي
بس كعد يمي كلي
- هاااه
جاوبته بتعب
- هاا وسام هااا
- شصار ؟
- كالعادة
- ياربك ...
ضليت ساكت
سحبلة جكارة وضلينا كاعدين ثنيا بالكاع
- وسام احجي وياها انت هية تحبك وتصدكك اذا سولفتلها
- لك بابا غير لازم انت التحجي وياها لحد وين اني اضل وراك وراك
- بس هلمرة والله
- زين مو كتلك عوفها هسه ترة لا يغرك الهدوء والبرائة شيطان هاي خاصة بسوالف النت كلشي تعرف نوب تروح تدور فاتن وتلكاها وتعرفها جنة بوحدة نصير بأثنين ذيج مناك تجيك تكلك طلك وهاي منا تعاركنا وتكول اني هم اريد اطلك وتكب المشاكل للستار والله ننحصر حصرة الچلب اني وياك
- هو انت شكو اخوها متنطي بيك تحبك
- ومنو جذب عليها أبوي بكبرة ومنو قنعها مو من البداية كتلك رفضت ومراضية وكتلي خابرها وقنعها
- مادري وسام دبرليها بروح امك
- هم دبرليها لك انت متوب مني
- ميخالف بس هلمرة
وسام :
ادري اذا عرفت هسه رح تزعل مني اني اكثر من ليث مقبوض كلبي ماريد افتح الموضوع كتلة خلينا هيج منا لحد مندبر مبلغ ونطلكها بس شسوي للحقنة الميقتنع يريد هسة احجي وياها
ادري بيها بعدهي تعبانه ومقهورة
كل سوالفي السويهن وياها اريد اضحكها وترجع مثل قبل ابد مدا استهين بحزنها بس اريد اطلعها من مود الكأبة خطية
شمرت المفتاح كتلة رايح احجي وياها ابقة انت هنا
بس شيصبرة الحيوان
اجة وراي وضل كاعد بالمطبخ اشرلي بحواجبة بتعب روح
رحت لكيتها كاعدة بمكانة وتباوع مندمجة
........
- هاا الله يجويهم
- هههههه يگوي حيل شعجب شو وحدك
- ليش منتضرة احد
- لا
- لا اذا منتضرة والله هسه بس اصوفرة يجي مثل الچلب
ليث :
اباوع عليهم بقهر من بعيد كاعد ع الكرسي وحاط ايدي على خدي سدت لابتوب وتضحك
ضحكتها تموت
حطت مخدة على رجلها وتحجي ويا وتسولف منطلقة عكس من اني موجود مترفع عينها تروح مدنكة وتجي مدنكة وهلسالفة تشعل شيب الخلفني
كلتله وسام مدام مموجود تعال نحجي
————
- وسام اول شي تبطل هاي سخافتك وشقاك الزفر لان مطايقتة ابد
- اي وثاني شي ؟
- بطل تتعارك انت ويا مثل الجهال ومن يكون موجود تبطل هاي سوالفك التافهة ترة شي مقرف ومضحك ابد ولاشي صير جنك مهرج خوش
- لج ام راس المصلبخ منو المقرف
- أنت
- لعابتج وين
- ستغفرالله توني داحجي وأوصي عود
- هاا العفو اقصد بتج وين
- نامت
- متنطمرين انتي شعندج كاعدة
- مادري ماكو نوم أررررق
- تدرين شنو علاج الأرق
- بطل عرق
- طيح الله حظج ذكرتيني صار شكد مشارب
- شكد يعني
- تلث اشهر اكثر
- عيع والله لعبان نفس شلون دتشربة مادري المهم الله يهديك وتوب
- شنو كحبة اني واتوب
- ايباه شتفرق عنها هسه انت
- لج بابا هذا ليث يشرب
- شو اكلخرا بلا الولد يصلي ويخاف الله مو يم هلسوالف
- شكد غبية يااااااااربك
- ادري يلا كوم عني خلي اباوع
- كومي نامي
- منعسانة
- اسولفلج قصة
- باوع اذا هم على صاحباتك وقرف ماريد خلصان كلبي من جذبك
- لا والله ع صاحبة صاحبي هلمرة
- وهم حبتة واعترفتلة وتتوسل بيه لان دكتور وهو ممعبرها
- لا حيوانه سمعي ذول من زمان سوة خنسولف
- اوك سولف
- باعي هذا صديقي متعرفي انتي اني ممسولفلج عليه
- اوكيه سولفلي
- باعي هو يحب وحدة من الطفولة
- الللللللللله كمل
- اي وجانو يتواصلون قليل لان ماكو نت مثل هسه
- اي
- يعني يروح يدفع فلوس حته يتخابرون لان هيه مو بالعراق
- اهاا يعني من زمان مو بالعراق
- اي من زمان بس هو بالعراق
- لعد شون تعرفو
- مو هيه من الكرايب
- اهاا
- اي والله وضلو يتواصلو هلسنين كلها
- اللللللللللله .... وابد ما تركو
- لا اكيد يتركون ويرجعون لان هو الولد متعلق بيها حيل
- خطية
- وراحت سنين واجت سنين وهمه سوة كبرو وصارو وكليات ثنينهم
- ممممممم
- بس هيه شوية شافت نفسها عليه على ابو بالخارج وعندها جنسية
- هو شيشتغل ؟!
- هو طالب بوكتها جان وكلساع يشتغل شغلة ساعة عامل بفرن ساعة سايق دليفري ساعة بالسوك
- لعد واهلة ماعندهم
- لا يولي عندهم خير من الله بس همة يحقرون ويا مينطوه خاصة ابوه مكفرة بعيشتة
- خرا عليك قهرتني ااااااييه كمل
- اي كلهم خطبوليها
- ماقبلو والله شنو مو منا وبينا منريدها شسوة العنتين لم شكم فلس وداين من اخوه وطفر من العراق
- اي اجة هنا
- اي هنا غبية انتي غير اكلج صاحبي هنا يمي
- هاا اي كمل
- اي هم هنا دك شغل عاف دراستة لا تخرج ولاشي ولا درس هنا دك شغل من الصبح لليل اشتغل بشركة مال جام الصبح والعصر عامل بمطعم حتة يلم مهر ست الحسن يلا يتقدملها
- اي
- سنتين ضبط يلا كدر يلملة مبلغ محترم اخذ ناس وراح الابوها وكلهم احبها وجايهم ع سنة الله ورسولة
- بس لا رفضو
- لو رافضين احسن ابوها حطلة مهر يكسر الضهر تلاثين الف يورو وغير يبطل ويتوب ويعوفها
- دفع ؟!!
- اي داين ودفع وهو المنمون
- زين وهية موقفها شنو
- هيه بربوك تمشي بشور اهلها حته حضرتة و كلتلة بعد ماريدك بس هو بلا كرامة
- خرب اي كمل
- اي ضل يشتغل مثل المطي وداين هم يلا لم فلوس قاعة وعرس وبدلة حته البدلة وصتها من تركيا وتتشرط لمن الله كلها بس وشتكلة ينفذ فتحلها بيت وأثثة
- يول غير يحبها
- أي يحبها الاثول
- اي
- لحد يوم عرسهم زفوهم لبيتهم
- اي
- اي يعني صار شي خاص بينهم وتعاركو حجاية منا حجاية منا طلكها بصباحية عرسها
- عزززة
- والله
- لعد حب السنين والتعب والضيم وين راح
- ليش ما سامعة بالقشة الشكت .. البعير
- لك بطل لسانك هذا الزفر حته المثل خربت أم أمة اسمة القشة القصمت ضهر البعير
- اي المهم خلي اكملج
- اي كمل
- اي عافها دخلة مود كأبة شكم شهر نوب تجاوزها
- والبنية ؟!
- لج وحدة سافلة من عافها يلا حست بقيمتة ضلت كلساع تجي وتتوسل تريد ماكو قفل كال لعبت نفسي منها بعد
- واهلها
- اهلها لهذا يومج يكلولة طلكها وطلكها
- ليش هو لسا ممطلكها
- لج أيييييه ماعندة منين يجيبلهم غايب وحاطين شروط عليه وموقع اذا يطلكها لازم يدفع هلكد مبلغ
- عززززة معقولة اكو هيج ناس
- اي طبعاً اكو
- مادري ضجت حيل عليه ميستاهل خطية
- اي والله
- شسمها هية
- فاتن
- لا فاتي
- اي فاتي بالجنسية همة يصيحولها فاتن
- اهاا
- والله
ليث :
كاعد واسمع حجيهم كلة شوية برد كلبي من حسيتها متعاطفة وية الموضوع من كالت اسم فاتي دين ما ضل براسي !!!!!
وهذا الغبي بعدة مستمر يسولف وياها نوب يكلها لا فاتن بالجنسية
بيان :
بعدنة دنحجي فجأة طب علينا ليث يمشي على كيف وصافن بوجهي
اجة كعد كبالي
درت وجهي منه حيل كوة لازمة روحي ماريد ابجي
- بيان منين تعرفين فاتن ؟!!!
- ماعرفها
- اااحجي
درت وجهي منه
وسام كال هيي شبيكم شكو
رجع عادها وحواجبة معقوجة وكوة ينطق الكلمة
- بيان جاوبيني منين تعرفين فاتن
- اعرفها ماعرفها مو شغلك
- احجي
كال وسام يا قندرا هسه يلا نتبهت صار ساعة اسولف وأنتي ماخذتني على كد عقلي
صرت عصبية حيل
- والله وهمزين ذكرت سولفلي نعم الله عليك
- بيان اهدي وكلشي بالتفاهم
- ماعندي حجي وياكم ثنينكم
ليث : بس كوليلي منين عرفتيها
وسام : منين عرفتها يعني لعد شكتلك اني مساعة مو كتلك شيطان مينضم عليها شي
- اي وهسه شتردرن ؟!
- نحجي بس
- ماعندي حجي وياكم
وسام : لا نحجي وغصباً عليج
- نجب ماكو شي غصباً علية وخاصة انت بالذات متفتح حلكك ولا كلمة
- طايحة الحظ اني كل السويتة علمودج
- شنو السويتة علمودي !!!!!!!!
خلي احجي بعد ماكو احد غريب يلا مدام ليث اخوك وصاحبك وتقدملة اختك على طبق من ذهب
يلا احجي شنو السويتة علمودي
احجي
لك سنين اني اتعذب وحدي من عمري ١٤ سنة صاحبها السافل حاط عينة علية
وهية تنفذلة اليريدة لك وصلت مرحلة تتوسل بية خلي اصور جسمج تكولي وما طلع وجهج
يلا احجي انت وين جنت وشسويت علمودي !!
تدري باب غرفتي شكم قفل بيه !!
تدري نومة ما انام عدل مثل الاوادم ولا اكدر اكعد جوة بس انسى روحي لو يطلع مني شي الكاها مصورة ودازة
تدري يلحكني لباب الجامعة ويحجي وياي بحجة خلي امج تفك عني والطلاب الي بالقسم وياية شالتهم الغيرة وسحلو
واخواني الزود كاعدين هنا ومتونسين واحد حاير بشربة وكحابة والخ حاير يركض ورة اخت فاتن حته بس يرضيها ع حساب اختة
جايني هسه وتكلي سمعيني وغصباً عليج ليش منو انت
لك بابا اني اكرهك اكرهك ولوما بنتي وروح خالة هبة خطوة وحدة ما اخطي وياك
شعبالك انت بعدك وسام القديم الي من يضربني فهد اروح اشكيلة
شعبالك انت نفسك الي جنت انتضر العيد يوم يوم حته تجي من كربلاء واشوفك
لك بابا انت لا اخوي ولا ابن خالتي ولا اعرفك ولا اريدك بعد
انت الجذبت علية ليث لو يذبحني ما اعاتبة ولا احجي ويا
حجة بقهر ليث بيان ..
- لا بيان ولا بطيخ هاي كولشي وضح كدامك انت اكبر جذبة عرفتها بحياتي من اول محجيت وياية كتلك اني ليش اكره الزواج و عدتني كلشي يصير نفس ما اني اريد كتلك اكره الجذب والخيانة وجذبت علية وضميت موضوع زواجك وعفتني نفس ماعفتها هم بليلة عرسي ونهزمت
كتلك اني من البداية كتلك وافقت لان عبالي تحبني مثل متحب وسام عبالي تخلصني من الغابة والوحوش الجنت عايشة وياهم
انت الجنت تكلي بيان سيارة دتلحكنا
عرفت سيارة منو هاي عرفت !
مانطق ولا كلمة غوركن عيونة صارن حمر بجة وبقة مدنك
اني هم درت وجهي بجيت وحجيت بتعب
كتلة وسام كل للصاحبك اني من البداية ماعندي مشاعر اتجاهه يبقة ابو بنتي وبس
وسام : بيان نجبي وسمعيني الولد مالة شغل وروح أمي بعد اني الي قنعتة وكل الصار مو بأيدة
- وانت منو اصلا حالك من حالة انت ومحمد كلكم ضحكتو علية
بس بابا يحبني من صدوك وكسرتة وقهرتة من وراكم
حطيت ادية على وجهي كمت ابجي اناشغ حيل اجة وسام يحضني دفعتة
- باوع والله تخابر بابا وتصالحني ويا وتخلي يقبل يرجعني اني وبنتي غصباً عليكم فاهم
- اصالحكم والله بس تعاي
دفعتة وكمت للغرفة
اجة وراي ليث بسرعة داسد الباب لزمة قوي
دخل للغرفة وقفل الباب
.....
يتبع ...
—————————
اوسكار