بيان :
خليت الابتوب بحضني وكعدت ابحوش ومن فيس لفيس ومن متابع لمتابع
دخلت على محمد
رفم خطيبتة اصلا ماعندي وهذا المرض البيه اكره اتواصل واخالط واتعرف حته لو مرة اخوي
دخلت ع الاصدقاء لكيت كومة عندها
ضليت ابحوش ابحوش لحد مالكيت تلاثة ومكتوب فاتن
باوعت كلهن مزوجات مكتوب !
وماعرفت مني منهن
رحت ابحوش بالمواقع
مكتوب المانيا دخلت عليها الاسم كاتبة فوفة
كلبي حسني هية وحساسي ميخيب ابد مجربة اكثر من مرة
حته بعد ما كمت ادور هيج تأكدت مليون بالمية هية
رحتلها من حسابي الاصلي
لغيت اخواني كلهم وحذفت وسام
اني مسمية الحساب بأسم ياقوت
وبروڤايلي بالفيس مابيه صور بس صورة واني وأمل ممبينة كولي بس أيدي وشعري وحته امل ممبينة شكلها لان جانت مدنكة وياها اقتباس نشرتة بعيد الأم
كاتبة تخصصي وكاتبة جامعة بغداد
بس مكاتبة متزوجة
هيه كاتبة !
دزيتلها اشارة ترحيب يمكن ب ١٢ بليل
ضليت انتضرها انتضرها ماكو متفتح
رجعت اتأكد خاف يطلع احد مشترك بينا حتة ليث حضرتة ومحمد مابقيت احد ابوية هم حذفتة
ضليت مكابلة المحادثة وصافنة
سمعت امل طلعت من الحمام ضميت الابتوب جوة الجرباية بسرعة كلت هسه تكول شصعدج وتكوم تحجي
صار عندي وجع خفيف من جوة
نطتني مسكنات وغطتني
واجت نامت يمي من الصفحة الثانيه بسرعة غفت
سحبت التلفون على كيف
وضليت اباوع بصورته حفضتها بالاستديو كلساع تجي بالي حجايته بيان لا تستغلين ضعفي ..
هو منوالبينا الضعيف والمكسور اني لو انت
قفلت التلفون وخليته جوة المخدة ماريد افكر بيك ماااااااااريد
صار اربع اشهر ماريد اشوف صورتك ولا اسمع صوتك
المن حجيت وياي المن هااا
مو صوجك انت صوجهم همة وصوجي اني شكو نطيت الاسم الاكرم جان رحت للسوك وحدي وجبت هلعشبة من العطار وجان هسه اني مطلكة ولا وجع ولا قهر
فزيت بالخمسة الصبح كبل سحبت الابتوب شفتها رادة
هم اشارة ترحيب
كتبتلها سلام
عادي استفسار بسيط
جاوبت بسرعة كالت تفضلي
- أنت ب المانيا
- اي ب المانيا تفضلي ؟
- بس دسألج شلونها الحياة هناك نريد نقدم لجوء اني وعائلتي ومترددين
- انتو طلعتو ؟
- لا بعدنا بالعراق
- مادري شنو اكولج بس الحياة هنا متعبة لازم شغل دراسة لغتهم صعبة قريت انتي طالبة صيدلة يعني لغتج الانكليزي مضبوطة روحو الامريكا احسن الحياة اسهل هناك
- والمانيا لعد
- المانيا بس اللغة اقل شي سنتين تتعلميها
- شكد وتعلمتي انتي
- اهنا من اني وصغيرة ومدارس وية الاطفال وتعلمت
- اها
كعدت امل كالت ولج ويامن تحجين من الصبح كتلها صديقة
مصدكتني ضلت تباوع عليه بشك عافتني وراحت تكعد بابا
بابا هلايام تحسن شويه كام يروح للعلوة بس مو وحدة ويا اكرم ..
طلعت امل وسدت الباب
- كالت عادي دزلي صوت حته اتأكد انتي بنية علمود اوافق ع الطلب
مدزيتلها صوت دست اتصال كبل
جاوبتني
حجينة شوية تتنعوص بكلامها وكل حجاية لازم وياها كلمة المانية لو انكليزية
ضلينا نحجي ومدري ايش بخصوص الموضوع الاجيتها بيه
ابد ما سألتها على حياتها ولا عمرها
شوية ودخلت امل كالت ويامن تحجين من الصبح
كتلها يمة صديقتي
مصدكت كالت منيلج صديقات
نطيتها التلفون حجت وياها وامل كلامها حلو كلة يعيني ويروحي وسلمت عليها ورجعتلي التلفون وتضحك فرحانه عبالها صدوك صارن عندي صديقات
كاالت لا تكومين خوش اني اجي اكومج
- كتلها خاف عندج شغل روحي غير مرة نحجي
-كالت لا والله معندي رايحة للدوام مشي خليج ويايه لحد منوصل
احس امعائي كامت تتكطع من القهر هذا كلة وبعدني محاجيه وياها ومكالتلي شي يثبت هيه لو مو هيه وحته اسمها مكتوب فوفة بس متأكدة من احساسي مليون انو هية
- ليش امج تكولج لا تكومين
- حجيت بقهر كتلها مو البارحة سويت عملية
- عزة عمليتش
- حامل والطفل راد ينزل وسولي عمليه ربط عنق الرحم
احجي وياها وبجيت بقهر
منووو هاي وشداسوي بروحي اني وشجابني لهسالفة ليش زوجت اصلا جان اكبر مشاكلي هيج وكت شلون اطلعلي حجة حته ما اداوم لو صابرة وممستعجلة جان ازوجتلي واحد يحبني يخاف علية يحميني مو اضل خايفة منه وادور وراه شداسوي بروحي المن ادور وراه اصلا هو راح اطلك
- نقهرت علية حيل كالت لاا لا تبجين انشاء الله ماكو شي بس ابقي نايمة ولا تتحركين
- هوا هم هيج بس ملل من الضوجة حجيت وياج كلت بلكي اعرف شي لان بابا ميريد موضوع السفر اني اريد اسافر
- وزوجج يسافر وياج
- لا اريد اطلك
- لا شلون كلام وانتي حامل ميصير تتطلكين
- ماحبة اهلي جبروني عليه
- وطفلج
- اخذه وياي
- لا حرام عليج تحرمي من ابوه وووف قهرتيني واني عبالي همي اكبر هم بالدنيا
- ليش شبيج انتي شبي زوجج
- زوجي يحبني واحبة بس الما يخافون الله دخلو بينا وفرقونا وعافني من وراهم
- خيولي لعد لو يحبج ميعوفج
- بلي يحبني بس حجي العالم والناس يهدم اكبر علاقة
- ههههف اي والله صدوك
- يلا عمري روحي ارتاحي انتي مريضة ضيفيني انستا اذا تحبين نبقة نتواصل
- اي اكييد
وهيه بعدهي وياي ع المكالمة ع السريع رحت حذفت الكل ابويه واخواني وليث حضرته حضر هو و وسام خليت بس بنات عمي وشكم وحدة اعرفها حسابي خاص اني
نطيتة الها ضافتني
كلتلي باي عمري
كتلها باي قلبي
سديت التلفون واني لعبااانة نفسي اكره المجاملات والحجي الفارغ
غطيت راسي ورجعت نمت
كام يتحرك احس رفسات خفيفة
كمت احجي ويا وابجي جوة البطانية بهدوء
شتريد متكولي شتريد ليش هلكد مصر والله الحياة تلعب النفس
ماكو احد يحبك على اساس بس امك و حتة حب الام جذبة الكل يستغلك المنرحاي متكولي ..
وخرت امل البطانية من وجهي لكيتها تبجي وتمسح دموعها ب فوطتها
ولج يمة انتي ليش هيج
انتي تعرفين مكانها فووك شبكرة الي الله ختارها صير أم
- أي نفس مكان نضال ؟!!
- لا وج عيني ابنادم يتحاسب على الزغيرة والجبيرة مايضيع شي عند الله
- اي لهل السبب اني ماريد يمة لا اريد اجيب ولا اخلف ولا اربي رلا اتحاسب عليه
- لا يمة الوليد ابوه خوش وليد وانتي حبابة وفاهمة والله نهار كلة اسولف بيج يم النسوان واكلهم لافديوم كسرتلي كلمة ولا فديوم حقدت ولا تجذب وتحب اخوانها وابوها ودوم رافعة راسهم والله احسن ام بالدنيا تصيرين وتربيتج احسن تربية
- وكل عقلج يمة اني ارجعلة !!!
- وليش مترجعيلة حبيبتي الولد حباب والله
بس البشر مو معصوم وغلط وكال اعتذر منها وهاي النسوان كلهن يزعلن ويطلكن ويرجعن ومشاكل وعرايك
- يمة
- هاا يعيني
- يمة منو كلج اني زعلانه وضايجة لان ضربوني ولان عافني ؟! اني مو كدامكم كلت مسامحتة هو واهلة
- لعد ليش تردين تطلكين
- يمة الولد الخوش الولد السولفين بيه ما يحبني بكلبة غير وحدة وتخيلي بليلة عرسنا يصحيني ب اسمها
وعادي اني ماعندي مشكلة بهلشي ولا عندي مشكلة من اخوتي ضمو علية عادي
بس شلون ترديني اجيب طفل واني نفسي مادري الله وين شامرني شلون اربي
نضال ليش شردت مو هم براسها غير واحد وهم صبرت وصبرت وتاليتها شردت
ليث حته ما صبر شرد من اول ليلة
شوفيني بية حيل اكعد اركض وراه واقنعة بروحي والبسلة واصخملة حته يحبني يعوفها ويفكر بية ؟
لهل الدرجة شايفتني بلا كرامة ولخاطر منو لخاطر الطفل ؟
رح يعيش مرتاح عبالج اذا اجيبة ؟! ليش نعرفها ونحرفها
مو ١١ سنة اني ابجي على لعابتي الكصصها ابوية مو كرهت الزواج لان جنت اشوفة شلون يسوي وياها ويضربها من جوة الباب
مو سنين واني بالمدرسة ابتدائية ومتوسطة واعداديه وجامعة ولهسه ماعندي صديقة امشي وياها
لان ابوي ضربني كدام بنات جيرانه
وصرت وكبرت واني انسان مايعرف راسة من رجلية من جنت طفلة اشوف اشياء مال كبار واتصرف تصرفات الكبار
ومن كبرت كمت اللعب لعابات وحدي بالغرفة واللعب لعبة الكلاصات
فهميني يلا شلون اثبتلهم اني شخص ضايع ما مستعد يتحمل مسؤلية اي بشر هدومة العليه ما طيقهن شلون اتحمل اجيب طفل واربيه
ولا تكوليلي كلشي مابيج هيانج ازوجتي ودرستي ودطلعين درجات عالية
كلشي بحياتي اسوي مجبورة علية كلللللشي
الدراسة ادرسها بس حته ابوية ميحجي علية وتدرين اني عقدتي الدوام اكره شي اسمة دوام وقراية وشوفي شكد داطلع درجات ابن الدكتور ميكدر يطلعهن ليشششش لان خوووف خوووف كلشي داسوي بخوف
زوجت وعبالي اخلص من صاحب نضال والصور والمراقبة ويوميه الكاه باب الجامعة يومية اسمع صوت رجلين ع السطح يومية اشوف سيارته اشكال واللوان الحجي الوصخ وكلت ماكو غيرها ازوج وهو يحميني ويخلصني من الجحيم العايشة بيه وهم استعجال وخوف وبشهر واحد نخطبت وزوجت ردت بس اخلص وهم وكعت وهم طلعت حفرة
شلون ترديني اخلف وشلون اجيب شلون اثبت الج والابويه والاخواني اني تعبانه اني متحطمة الدشفوو غلاف وبس فهموني شلوون شلون اثبتلكم اني مو كد الحمل البطني و لا تكليلي اخوتج وسند ومدري ايش ماكو سند بالحياة الي من لحمي ودمي خانوني وفضلو الغريب على اختهم
طول عمري رافعة راسهم وماسويت شي مو زين حته عبد الرحمان من راد يتقدملي نطيته رقم وسام ما نطيتة رقمي وتالي شحصلت
غير الكفخات واكرم يكلي مثل امج احجي منين جبتي
اوك دكوليلي تشمروو على اهلة ! تدرين اهلة شلون عايشين
تدرين جنتهم عمرها ١٣ سنة ومزوجينها وابوهم السيد الجبير يضربها بالعوجية ورجلها يجي يكمل عليها وعندها ست جهال تلفون متعرف تستخدم يلا فهميني الاجيبة هم اشمرة بنصهم يوم واحد ما تحملت عيشتهم يووووم واحد
شلون تردين اجيب طفل واشمرة بنصهم هااااا شلون
اوك تكوليلي دزي الابوه ابوه شوفة عينج اتعس من نضال هم صاير زمال مال تعلق عاف مرته بليلة عرسها تردينه يربي طفل وميعوفةً
فهميني المن اجيبة وين اااودي
كامت بس تبجي وتباوع علية ...
كووومي مني كووومي خلي انطمر بلكي مرة وحدة يوكف وياي الحظ وبعد ما اكعد وارتاح ..
دخل اكرم علينا بسرعة لازم بيدة التلفون عيونة مدمعة
كال هاج وسام يحجي وياج
غطيت راسي كتلة ماريدة
وخر البطانية من راسي وخلة التلفون ع اذني
حجة وياية وسام
- ولج بطة يروحي شنو هذا الكلام السمعتة يايوم ضميت عليج اني يايوم خنتج اجي وافهمج كولشي والله
- اي تعال هسه وساعدني لو هم جذب علية مثل ذيج المره اليوم باجر اليوم باجر لحد ما خليتني اتورط يلا رجعت
- ولج بطوط حرام عليج اجي اساعدج علمود تموتي ولج اني من يوم العرفت الدنيا ماشالتني من الفرحة اول مرة بحياتي رح اصير خال ليش تكولين محد يربي اني وين رحت متتت ؟ اني اخذة يمي هذا ابوه وين ولة تعالي شوفي بالقران رح يموت لا يشرب علاج لا ياكل وطلع من المستشفى ولا يقبل يرجع وعمليتة سبوع اليجي ميقبل يسويها وهو عايش بربع كبد
كافي يروحي بطلي خبال ادري بيج تعبانه وحقج والله الصار مو شويه منو البينة ما خسر وتفلشت حياتة من ورة نضال الكحبة مو هذا كدامج اكرم مفرفح على ابنة والچلبة مالتة حته ما تخلي يشوفة شوفي حالتة
كافي عمري هسه بعد بس شكم شهر ويجي ونلعب ويا وناغي يونسج ويونسنا
بس يموت هذا الخرا ادفنه واجي أجر بيت ونكعد بس اني وياج وامل وابنج وماخليج تنقهرين بعد ولا اخليج داومين
هااا شكلتي ؟
واذا ما مات اجي واخذج يمي وروح امي انتي وابنج وهلمرة اطلع مو رجال اذا رجعت بكلمتي ونأجر بيت جبير وهم نكعد اني وياج وابنج وهم ما اخليج داومين ولا توصلين باب الجامعة ورقة وقلم ما اخلي بالبيت هاااا شكلتي
- كمت اضحك وابجي ومغطية راسي واكرم مكابلني ومقرفص
- وسام بلا لواگة داحجي جد اني
- واني هم احجي جد والله لا تخافين والله وبيت الله هذا الطفل ميعيش ربع العشتي لو اعرف اموت روحي ما اخلي يتبهذل والله ائمنلة احسن حياة وروح امي وروح ليث بعد مصدكين بية هاج شوفي فتح كامرة
ليث نايم ع التخم وحاط ايدة على عيونة وايدة الخ وسام مشكلة كانولة
ومغذي
نعصر كلبي حيل ضليت بس ساكتة وابجي
وهو تافه يربي حته المواضيع الجدية لازم يحجي بيها بتفاها
كلي هاج شوفي الاسبوع اليجي اذا ماسوة العملية يموت وابنج يضل عندج ابوي لا يدزة لكربلاء ولاشي
ضليت ساكته رجعت غطيت راسي ونطيت التلفون الاكرم اكرم باسني بكصتي وكام راح يحجي ويا بالصالة اجت امل جابت الصوبة بالغرفة صار عدنا شتة باردة
ضليت بين سالفة تاخذني وسالفة تجيبني لحد ما غفيت
ماكعدت الا المغرب امل كعدتني وجايبتلي نجانه بيها مي وصابون وتكلي غسلي هنا لا تكومين
تناكرت وياها كتلها هوا هذا وينه الحمام قابل رح اصعد فوك
كمت وهية تمشي وراي خاف اوكع
رحت غسلت وفرشت رجعت كعدت بالصاله وحته مادري بيش الساعة مالي خلك
شوية ودخل ابوية خطية جايب عشة من برة
كااال ايي همزين كعدتي يلا تعاي نتعشة سوة ستحيت ضليت بس اضحك راح جاب صينة ويفتح بالمواعين ويخلي ويشاقة وية امل وهو يكوم يجيب غراض دنة الطاولة يمي كال لا تتحركين
كعدنا ناكل واني ابلع اللكمة كوة مالي نفس ما اشتهي بس علمودهم خطية ثنينهم تعبانين ويكمون ويكعدون من وراي
كملنا عشة وهم عاطت بية امل متكومين ضلي كاعدة
هيه نقلت الاماعين
شوية وكمت للغرفة تمددت
دخلت ع الانستا لكيتها هاي ناشرة صورة مسويه معجنات خلية النحل وكاتبة عاشت ايدي
علقتلها كتبت بالعافية مبينة طيبة ..
ضليت اتصفح بالبرامج ب ملل اجاني اشعار جاوبت كالت اي والله طيبة بس تجين اسويلج منها وهذا الايموجي (😋)
نوب رسالة ثانية مكتوب شلون صرتي
ضليت صافنة ع التلفون مبينة لطيفة وتحب تحجي وتسولف هواي
اني شداسوي بروحي شعلي بيها اخت ميس مو اختها ويعدين حته لو اختها هية خطيبتة وفصخ منها حته لو بعدة يحبها
اني شعلية الولد هسه حالتة حالة
شعلية اني شعلية هيج هيج رح اطلك منه مات الطفل عاش اني رح اطلك
جاوبتها الحمدالله كتلها صرت احسن
وعفتها
رجعت كتبتلي
وجاوبتها حجي عادي مترردة بين الاريد ابقة احجي وياها وبين الاكول شعلية ..
—————————————————
وسام :
هذا المطي دخل موود كائبة لا ياكل لا يشرب هيج من وحده فجأة جنا بيومها بليل نضحك ونشاقة
كعد الصبح لايقبل يشرب العلاج لا يبقل ياكل وهوا بعدة عندة مضاعفات من العملية والكبد مالته تعبان البياض مال عيونة صار اصفر وهاي اشارات خطرة يمعود ابو الغيرة امشي اخذك للمستشفى ماكو على نومته من جينا لهسه حته العملية مايقبل يسويها
كامو يكطعون نص راتبي لان يوم اداوم ويوم لا
من وراه
اليوم الي اداوم بيه اروح ست ساعات واجي الكاه على نومتة احجي احجي اريد ماكو اتعب منه اشكلة مغذي واعوفة
ولا يوم ولا يومين مر سبوع وهوا ع هل الحالة
حجة ويا اكرم وامير رادو ماكو
خابرت ابوه وكتله هيج وهيج السالفة وديموت روحة ع البطيئ
رزلة اول مرة نوب كام يتوسل بيه ويحلفة
ورجع يحجي وياي ويكلي عمي جيبة هنا ومن هلحجي
كتله منكدر نرجع
ماكو اخر شي خطر بالي اجيب هاي الناقصة تحجي ويا بلكي يقتنع رحتلها للدوام
كتلها ليث مريض ومايقبل يسوي العملية كامت تبجي اجت وياي بسرعة ومدري صدك تحبة مدري تمثل
صعدت يمي بالسيارة اول ما وصلنا ضلت واكفة خايفة الخرا عبالها جذب ماكو ليث ميت عليها السليتة
زمخت بيها كتلها هذا جوة تعالي
راحتلة تركض
جان نايم على وجه ع التخم ضليت واكف برة واباوع من بعيد اشوفهم شيحجون وصدك بطل يحبها لو جذاب
حجت ويا وتبجي ومدري ايش فتح عيونة بثكل ورجع نام
هيه بقت تكعد بيه اخر شي كام يصيح ووووسام قندراا ووووسام
رحت بسرعة هااا شكوو شبيك سويت روحي متفاجئ بيها كتلها شجابج هنا انتي متستحين
اشرلي بحواجبة كلي طلعها
كتلها امشي طلعي برا ممنوع تخطين هذا البيت بعد امشي طلعي
طلعت هيه وتباوع علية مستغربة
وصلتها للباب كتلها انتضريني هسه ارجع اوصلج
تحجي وتبجي كالت لا اني اروح وحدي ميحتاج بس دير بالك عليه
كتلها ميخالف
..
رجعت اتمشى على كيف هو يباوع علية بتعب
- هاا نذل
- هاا ومرض شعلية هية اجت
- هاا هية اجت !
- اي لعد اجذب عليك شنو
- لا مجذب ديلا سد الباب و ولي خلي انام
- انعل والديك والله تعبتني لا انت الميت ومخلصني ولا انت عايش وطيب بسرعة شو كوم كوووووم جريته حيل من ايدة
كام يصيح وسام ضهري ضهري
انعل ابوك لبو لضهرك فهمني انت ليش هيج سوي عبالك تموت ع البطيئ
والله ما اخليك كل ما تقل السوائل بجسمك وهيج توصل المرحلة الاخيرة واتعابج وتلفظ انفاسك الاخيرة اشكلك مغذي واخليك ترجع من جديد
- هههههههه خايب والله حته مابية حيل اضحك عوفني
- وابنك
- ربي انت انت ابوه وخالة ذاك اليوم سمعتك تتوسل بيها
- هههههههههههههه خرب بالخلفك شكد زعطوط دتغار مو
- والله داحجي صدوك
- والقران كاسر خاطري هلطفل اكول بلا امة زعطوطة طلع ابوه ازعط منها
حجة بخنكة وقهر عيونة مغوركة وسام هيه ليش تريد تموته وهلكد كارهتة
- لك حيوان البنية من هية صغيرة صايرة بيها عقدة من امها وابوها ومشاكلهم
كعدت اسولفلة كلشي سمعتة بالمكالمة ذاك اليوم جنت احجي وية اكرم وهو كلي هاك هاك اسمع
سمعت كل حجيها
سولفت ليث كولشي كتله لهل السبب هية تكره الزواج سولفتلة ع هاي الساقطة النزلت راسا تفاجئ ضل يباوع علية بصدمة
سولفت كلشي صار بغيابة من جان نايم
وكتلة هم ابوها كصص لعابتها من هية صغيرة ولهسه مقهورة تبجي عليها حته ماذبتها اذكر سوتلها امل قماش ورهمتها عليها
بجة حيل حط اديه على وجه
صاح علية نطيني جنطتي الاجيت بيها
ستغربت كتله ومرض شبيك
عاط حيل وسام نطينياها
كمت جبتها وشمرتها عليه
طلع اللعابة كال هاي موو !
ضليت صافن واضحك وهو عيونه مغوركة وكلساع يمسحهن هاي موو
- ماذكر شو بلا جيبها
- اي هيه بيوم فاتحة المرحومة جانت شايلتها وتفتر وكتلها هاي لعابتج تحوير نصبت عليها كامت تبجي
لحد ذاك اليوم كعدت من البنج وتكول اريدها راح اكرم جابها الها
- وجه النعال وتدري شكد مستعزة بيها ليش خذتها
- لك جنت اضحك مادري السالفة هيج واصلا مو بالي اجيها وياي لهنا هاي الجنطة جانت بالسيارة واني ضميتها بيها ردت انصب عليها ونسيتها من صدوك حته اني كمت ادور وياها
- ومن حطيت غراضك واجيت يالاثول ما شفتها
- مادري صاحبي حطلياهن
- ههههههههههه لك تخيل ذاك اليوم خابرتني وكالت لعابتي عند ليث اني حلمت بيه عندة وما صدكتها كمت اضحك عليها
- عليك النبي حلمانة بية !
- اي لا صدك روحك البنية ماتريدك اليوم سمعتها تكل الامل يحب غير وحدة وعافني وراح علمودها نفس ما نضال سوت
- ضل صافن علية وحجة بقهر وسام ما فهمتها السالفة لعد
- خب نجب شفهمها هسه تكلي انت جذبت علية وشمدريك و و و ومالي خلك
طيب انت لخاطر ربك وروح اعتذر من ابوي ورجع مرتك وابنك
هيه فطيرة وتتقشمر بسرعة اكعد احلفلها كلها ماريدها بس ماعندي فلوس اطلكها
- مادري وسام
- لعد منو اليدري ابوي بكبرة
- امشي خلي نروح حته لو ما يحددون موعد العملية بس نسوي فحوصات باع الصفرة صاعدة على عيونك
- ماريد
- لعد شتريد هييي ساقط شجيبلك بعد منو يحجي وياك سمية الخشاب
- امدة ذوقك بعدك تحب سمية الخشاب
- شفنا الذوق اكو واحد يحب وحدة طولها ١٧٠
- هههههههه اكلخرا ساقط
- هااا مو على اساس كارها
- اي حيوان بس عراض شكو تحجي بيهم
- يلا هسه هو اني شحاجي على حورها هيه هاي المفروض مداوم جامعة صير خلفة مال سقوف ثانوية
- ستغفرالله لك حرام حيوان ههههههههههه
- غمزتلة ع طاري الحرام شرايك اجيبلك وحدة شكرة ناعمة تسويلك مساج تعدلك فقراتك
- جيبلي اختك
- مو اكوم افرك حلكك
- وسم السمك ترة مرتي مرتي حيوان
- ههههههه ضحكتني مرتة ابو حلك يلا روح الابوي وجيب مرتك
- ههههههههه مو هسه خليها ع الرهن فد مرة هوا شوكت يبين
- هو هسه نكول خلصت الرابع بين اذا تاخذ سونار ذاك اليوم ردت اسئلها بس كالت خاف تركعني ١٠٠ نعال هيه ما طايقته وماطايقة ابوه
- اي حطمني حطمني بعد
-والله ضلعي هاي الحقيقة المرة
- شمرلي تلفونك و ولي
- جوعان اطلب اكل
- لك والله تلعب نفسي من الاكل البرة اطبخ شي شبيك
- شطبخ ماعرف
- اي شي
- رايح للسوبر ماركت واجي
- اوك تلفونك مغير الرمز
- لا نفسة يلا رايح لا ترجع تنام
ليث :
طلع وسام
فتحت تلفونة ورحت ادور بالاستديو بلكي صورة شي الكة مشتاقلها حيل ماكو بس صور مصخماته
وحته هو حاضرته من حساباتها عبالي بس اني
عايفة بس الواتس
دزيتلها هلو
فتحت بسرعة ومجاوبت
رجعت كتبتلها هلوو مجاوبت
بقيت ادز ادز
دزتلي بصمة صوتها مبحوحح وسام لا تلح فتحت الاشعار بالغلط داسوي بالتلفون بعدين اخابرك
كتبتلها لا هسة
مجاوبت
رجعت اتصل وترفضة
فوك العشر مرات
اخر شي فتح خط بملل
- هاااااه هااااه شتريد مو ذاك تلفون امي متروح تخابرها
بقيت ساكت مادري شحجي كلبي يدك حيل
- وسام !
وووسام صاير شي ؟
ليث بيه شي ؟
يمعود احجي ضل بالي
وووسام
الوووو
وينك
احجي
- شحجي الفصمة شحجي
سمعت صوتي سدته بسرعة وبقت بالمحادثة
رجعت اتصلت ماكو متجاوب
كتبتلها بيان طك كلبي
مشتاقلج وعلي ...
تفتح ومتجاوب
رجعت اتصلت عليها متجاوب
صورتلها لعابتها ورجعت اتصلت عليها
فتحت خط بسرعة
وتبجي
- ليش خذتها ليث
- بقيت ساكت
- رجعليها يلا
- رجعيلي روحي وكلبي وعقلي
اسمع صوت بجيتها بخنكة بس تناشغ تعبان حيل كمت ابجي على بجيتها
- ليث
- هاا بنيتي هاا يروحي
- جيبلي لعابتي يلا
- جيبيلي أبني وانطيج ياها
- اي بابا كال يجي وتنطي اله
- وانتي شتكولين
- اني ما اجيبة اصلا
بقيت ساكت والخنكة جلبت بصدري
- د تبجي عليه موو تحبة ؟
- مااحبة بكد ما احبج
بجت حيل وحجت بستهزاء تحبني ؟!
- شلون اثبتلج
- تعال واخذني وخليني انزلة وطلكني
- يومين واني يمج ..
————
بيان :
من كلي هيج سديتة بوجه
ضليت كاعدة وصافنة عقلي مو براسي ماكو غير صوت بجيتة شگت كلبي صدك ديحجي هذا صدوك يحبني لو ديبجي علمود الطفل
اذا هلكد يحبة ليش كلي يومين واني يمج
واذا يحبني ليش عافني وراحلها اصلا
لللللك خبلتني انت شنو شنوو شنووووو
كمت ابجي بصوت عالي وارفس برجليه واشمر بالغراض اليمي واضرب على وجهي اجاني امير يركض ويلزم بية شبيج ولج شبيج ولج
كام سد الباب بسرعة ورجع علية
ضل شابكني ويمسح على راسي اهدي اهدي كلشي ينحل حرام عليج الدسوي اهدي
تعبت وفحطت من البجي تمددت نمت على رجلة وغطاني شوية وجتي امل تقرة على راسي لحد ما غفيت
نمت نومة تعب
حلمت هلمرة لعابتي بحضني بس تحجي واني خايفة واباوع عليها مستغربة
تحجي وتكلي رجعيني ل ليث ماريد ابقة يمج
رجعت حضنتها كتلها ليش تدرين صارلي شكد ادور عليج تعاي ياقوت حبيبتي
ماتقبل تشرد مني وتكلي رجعيني ل ليث هو يحبني اكثر منج
كتلها ترة انتي مالتي وليث الي اخذج مني
كالت لا مالته اني رجعيني اله وتبجي
فزيت من النوم مرعوبة
وابجي بقهر ادية ترجف ادور عليها ماكو كمت وكفت وكفة وانفض بالبطانيه وادور جوة الجرباية
جتي امل خطية تركض هاا يمة شبيج كعدتي حلم حلم ماكو شي اهدي اهدي
رجعت تمددت
ضلت ساعة هيج تقرة على راسي وغسلت ادية
سولفتلها كتلها لعابتي عند ليث صورلي صورة مساعة ودزها
باوعتلي بفرحة
كالت يالله صالحتو
كتلها لا بس اني كتله هيج وهيج وكلي يومين واني يمج لطمت ع وجها ولج يمة شبيج شجاج متكوليلي
سولفتلها حلمي وابجي كتلها ياقوتة تشرد مني واني اركض وراها تريد تروح ل ليث
ضلت تضحك وتمسح على راسي كالت ولج بطة بيج بنية والله
وتلزم بطني وتقرة عليها ايات وتضحك
وخرت ايدها ورجعت تمددت شبيج يمة وخري اريد انام
نمت رجعت غطتني وجابت الصوبة يمي
طفت الضوة وطلعت واني افكاري ملخبطة مادري بشنو افكر ساعة يجي ع بالي صوته وبجيته
ساعة اذكر من كلي احبج اكثر منة
خليت ايدي على بطني
واحجي ويا
انتي صدك بنية ؟!!
صدك ما ترديني تشردين مني تردين ترحين الة
اي بس هو يحبج اكثر مني
اني ما احبج
اني امي نضال الي جانت تحرك كلب ابوية بية وتضربني حتة ابجي ويشوفني
اني صرت نفسها هم داحرك كلب ابوج بيج !
ضليت لزمة بطني وابجي بقهر
اني شلون صرت هيج مثلها بدون ما احس على روحي
ولج شلون هيج كرهتك مدري كرهتج
اااااااخ ياربي سامحني غلطت
ولج اني ردت اموت نفس ما نضال جانت سوي وياي
يارب دخيلك شديصير بيه
ابجي وحاطة ايدي على بطني علبالك تضيع مني
ياربي احفضلي ياها
سامحني يارب ماقدرت نعمتك ورزقك
سامحني واحفضها بجاه حبيبك محمد
ضليت احجي وياها اسفة يروحي والله اني مو مثل نضال وبحياتي مراح اصير مثلها والله رح احبج وادللج وما انطيج الاي واحد
نمت واني استغفر وادعي ميصير عليها شي
هالحلم هذا صحاني على روحي عبالك ضوة واشارة واشتغلت بكلبي
حته ليث مالي شغل بيه بعد اجيب وتبقة الي اني اربيها عود اذا يريد يجي يشوفها هلا بية ميريد الله وياه
اطلك وتبقة عندي اني اشتغل واعيشها ..
نمت واني تعبانة ومقهورة بس شوية ارتاحيت واخيراً الافكار رستت بالي واخير عقلي هدء وعرفت شريد وشقرر
نمت نومة وحدة للصبح ماكعدت الا ثاني يوم
كمت للحمام بسرعة شفت خاف اكو شي
بس الحمدالله ماكو
رحت بسرعة سلكت اربع بيضات واكلتهن هيج غصباً علية وشربت مقويات ودوة
بقيت كاعدة بالمطبخ وحدي امل رايحة للسوك يمكن
اتصلت على وسام ميجاوب
اتصلت على احمد هم ماكو
شوية ودخل بابا وامل جانو بالسوك
اجو كعدو يمي بالمطبخ ويضكون على شكلي ويشاقون لان سمنانه خيل
سكت ضليت بس اضحك
شوية وطب فهد !!!!!
نمغصت بطني هو اني ليش ممكتوبلي تكمل فرحتي وضحكتي لو دقيقة وحدة
اجة سلم على بابا وباس راسة وعلى امل
درت وجهي منه لا هو سلم علية ولا اني
لحد ابوي كلة سلم على اختك
كلي هلو
كتله هلو ودرت وجهي
باوعلي بشماته كلي هاا شلونه صاحب اخوج الكفو
درت وجهي عنه مجاوبتة
ابوي كلة اسمع فهد انت متدخل
كلة لا شعلية طبها مرض هية ررجلها واخوها
عفتة مالي خلك خليت ورحت للغرفة امل
فتح الحاسبة ملل ماكو شي
يتيبوب فيس انستا كوله ملل
لكيت هاي البنيه رادة مجاوبتني
كلت شعليه بيها طلعت هيه والطلعت مو هية شعلية بس اكيد مو هية
لان تكول مزوجة
وذيج بس خاطبها وفاصخ
وهيج هيج رح اطلك خلي اتفرغ لطفلي وبس
مر يومين هيج وليث ماكو
عرفتة جذاب مو صاحب كلمة مثل ما وعدني قبل وخلف
ضليت على كعدتي بالغرفة لا اطلع منا ولا منا ولا اتحرك خاف الطفل يصير بيه شي لحد لان ماعرف اني احبة لو بس تأنيب ضمير ديحرك مشاعري لان ردت اموتة
و بكل الاحوال اني خايفة علية ماريدة يموت بعد ولا اريد يعوفني
راسلت وسام مرتين لو تلاثة بس هيج اسئل عليه حته مكتلة ليث شلونة
وهو هم مشغول كل ساعتين هيج يلا يرد
ثاني يوم العصر صادف عندي موعد دكتورة امل وكعت فلاونزة مكدرت تجي وياي رحنا بس اني وابوية وصلنا اكرم وضل واكف بررة
دخل ابوية ويايه بقة منتضرني جوة بالعيادة
صار دوري دخلت كال اجي وياج ستحيت كمت اضحك كتله لا انتضرني هنا كال لا خلي ادخل وياج
كتله وين بابا ههههههه
دخلت للدكتور سوتلي سونار وفحص ضليت بس اباوع ع الشاشة اول مرة بحياتي وصدك واضحات اديه ورجليناتة يحرك بيهن
كمت اضحك وابجي الاحساس الحسيتة مينوصف مشاعر فرحة
هذا كلة وبعدني مسألتها شنو جنسة استحي
اخر شي جرئت وحجيتها
كامت تضحك كال بنية ..
حطيت ادية على وجهي وكمت ابجي
ستغربت الدكتورة كالت ليش تبجين حبيبتي كولي الحمدالله على اتمام الخلقة شبيها البنية تخبل
كتلها لا اني اصلا حلمت بيها بنية فرحانه اول مرة بحياتي احلامي تحقق
ضحكت كال اذا هيج تمام انشاء الله تجي بالسلامة بس دير بالج ع نفسج ولا سوين كذ كذا
نطتني توصيات هواي
تشكرت منها وطلعت اضحك
لكيت بابا منتضرني بالباب كالي هاا بشري
كتله كولشي زين الحمدالله
ضحك كال الحمدالله بوية اهم شي انتي فرحانة
كتلة اي كلتلي بيج بنية كام يضحك حيل باسني براسي كال بوية بطة وتجيب بطة
ضليت مدنكة واضحك واكرم الطريق كلة ناصب عليه ويضحك
وصلنا سولفت الامل بسرعة كالت شوووفي مو كتلج
اكرم يضحك كلها بعد شيخلصنا رح ضل بطة مكصها وابرتها وتفتر وتخيط
همة يحجون واني سرحت تخيلت صدك تجي واخيطلها وامشطلها شعرها اوكلها العب وياها
بجيت
صاح اكرم هاا هاا رجعنا ع الخبال
مسحت وجهي بسرعة هههههه
كال شنسميها
كتله على اسم بنت امل الي ما اجت للدنيا
كامت امل تضحك حيل كالت عزة ولج بعدج تذكري
اكرم كال بس لا ياقوت
هزيتلة راسي ههههههه
كال لا نوب تروح تضيع نفس لعابتج ومابينه حيل نوح ولطم بعد سموها غير اسم
ضحكت امل كلتله لا يمة اللعابة ما ضاعت طلعتة مبيوكة
ستحيت ضليت اخزر بيها يمة سكتي
هو كام يضحك حيل كلها بربج منو باكها
كلتلة ليث
كال والله عرفتة من ضحكتة كوللة عمي ما ننطيك بنتك الا ترجع بتنا
ضليت بس مدنكة وساكتة ادري بيهم ليش هيج يحجون عود حته نرجع اكرم هم صاير اتعس من وسام هم يحب ليث حيل
كلتله اوووف يايمة هسه خلي يكوم بالسلامة وكلها سهلة
جاوبها اي والله كاسر كلبي هلولد بساع بساع مدري منين جتة
ضليت صافنة على حجيهم واريد بس اكرم يكوم حته اسألها
وصدك شوية وكام
كتلها يمة شبي السيد ؟!!!!!!!
كالت لا مابيه شي
حلفتلها احجي
حجت بقهر كالت عادو عمليتة بس لهسة وضعة تعبان بعدة ع الاجهزة بجيت بقهر صدك تحجين يمة
كالت اي والله
شكد صارلة
سبوع اول اكثر
يايابة وجعني كلبي كمت للغرفة امشي كوة رحت التلفون اباوع بيه اذا سبوع يعني من يوم الحجينا وكلي يومين وجايج
ووووووف يربي شديصير
ليش متكملي فرحة
معقولة هيج تعب من وراي
دخيلك ياربي والله خلص كلبي مابية حيل بعد
رحت للغرفة بسرعة دكيت على وسام تأخر يلا جاوب
جاوبني صوتة تعبان
كبل كتله وسام شلونة ليث
ضحك كلي زين بس بعدة شوية تعبان
- صورليا
- شكوو اصورة مو ما تردي
- اهوو وسام
- لا اهوو ولا بطيخ بطة اصفيلج على رااي والله يريدج وندمان حيل ع السواه ولو تكعدين وياه وسمعينه رح تعذري لا تحكمين قبل مسمعين
وبعدين هاي رح يجيكم طفل ترضيها يضل متبهذل بين امة وابوه
- وسام هسه عوف هذا الحجي صورليا خلي اشوفة
عصب علية ودار الكامرك وقربها ع الجامة كال هاااااااج هااااااج يلا ارتاحي
جان نايم وحاطين صوندات بحلكة وبخشمة ولازكين عيونة
اديه مفتوحة منا ومنا
بجيت كتلة ليش هيج
كال غير عملية وهسه نعمة العملية زينة بس الكبد مالتة تعبان اذا طورت الامور لازم ندور على متبرع
ضليت بس اباوع عليه ودموعي صب
ماحجيت شي
دار الكامرة وسام ضل يحجي وياي ويريد يضحكني ومدري شنو بعدني اناشغ وابجي
كال حبيب خالة شلونة
كتله حبيبة خالها ضحك حيييييل بصوت عالي كال حلفي بنية
كتله والله بنية بعد التلفون منه وجه
وكام يدك ع الجامة ب اصابعة
ولك اكعدددد
اكعدددد قشمر هاي انت ربحت الرهان
اكعددد ولك رح تجيك بنية هاي مثل مردت
اني اسمع وكلبي يتكطع بجية وسام خوفتني بالزايد
مسح عيونه بسرعة بالتشيرت
ورجع يضحك ويشاقة ويصنف يكول رح تطلع صلعة مثل ابوي
كمت اضحك ويا
ضلينا نحجي شوية وراح
....
ومر سبوع والوضع نفسة بالي وتفكيري كلة يمة كال وسام صحصح كعد بس بعدة تعبان ميكدر يحجي
حياتي بالبيت نفسها ماكو تغير
هاي البنية رجعنا احجي وياها من الملل
مرة نشرت دعاء لمريض ع الستوري وهيه ردت
مرة نشرت صور السونار مال بيبي علقتلي كلتلي فدوة
ضلينا نسولف اني وياها حجي عادي
تأكدت مو هيه
لان سولفتلي على حبيبها كالت من الطفولة اني ويا حب من عمرنا ثمن سنوات وازوجنا ورة العرس بيوم تعاركنا وزعل صارت مشاكل بين الاهل وبعد مارجعنا
عرفت اسمها فاتي يعني فاطمة ب الايراني
بعد ما سألتها لا على اختها ولا على تفاصيل
تأكدت مو هيه
استلطفتها هواي بقينا يوميه نسهر للصبح نحجي رسايل هيج مواضيع عادية سألتني على اهلي واخواني ما انطيتها تفاصيل صحيحة وحته صورتي دزيتلها صورة بنت عمي كتلها هاي اني
دزتلي هيه صورتها يعني هم مو هلكد حلوة شكلها ومعانيها عاديه بس من نوع المغرورة واحسها تجذب حته من سولفنا ع العرس كالت شكد مهرج كتلها قران وانتي نطتني رقم خيالي عرفتها شوية جذب
عادي ما اهتميت
تدرس قانون اكبر مني هيه عمرها ٢٦ وبعدهي ممتخرجة بسبب الاوضاع مال سوريا والسفر
عفتها كمت مادور بعد وراها واستفسر
بس هم رجعت شتت افكاري هم رجعت ادور على فاتن الاصلية وهم نهار كلة ابحوش بالحاسبة
مشاعري تجاه ليث ماعرف شنو اشتاقلة هواي واتمنى يرجع يطيب ونرجع نحجي ونرجع لبعض واطلك
اي هيج اتمنى يرجعلي واتمنى نطلك
ومال حب مستحيل ما احبة بس هو يجوز لان اول شخص دخل حياتي بس ماحبه اي ماحبة
واصلا مادري شريد
...
مشت الايام
بطني بينت وكبرت صارت واضحة سمنت حته وجهي صارتلي خدود مو طبيعية
بعدني ما اطلع وما اتحرك هواي بطني بدون كولشي نازلة
اغلب وقتي متمددة وع النت
ليث شوية تحسن شوية يعني
مرة من المرات نحجي اني وسام سألتة عليه كتله شلونة كال زين توة صحصح
تردي
بقيت ساكتة
عادها علية مرت الخ تردي
كتلة اي
كلة هاك هاي مرتك تحجي وياك
من كلة مرتك كزبر جسمي
بقيت بس ساكته والنفس صار شصعبة كوة اجرة
اول ماحجة كلي
هاا باباتي حبيبي بصوت تعبااااااان كوة يطلع الكلمة
بجيت بخنكة كتله اني مو بنتك خوش
كال بنتي وروحي وحبيبتي وكولشي
- عندك بس بنية وحدة
- لا اثنين
- كوم وطيب بسرعة لعد
- شطيب اذا همة دينطوني العلاج الغلط
سديته بوجه بسرعة
ومدري اضحك مدري ابجي دكات كلبي الف حته هاي السمجة البطني كامت تتحرك متت من الضحك
اهلي التهو عني وعن مشاكلي هلمرة حارو ب اكرم الي مرته تريد يأجر ب اربيل يم اهلها وهو يريد يطلك وياخذ ابنة بس ميكدر
صارلة سبع اشهر ماشايفة
اخر شي ابوي صاح علية ورزلة كلة مطلك
تروح وتكعد هناك ب اربيل احسن الك يم ابنك شعندك هنا
خطية هو هم مكال لا علمود ابنه متعلق بيه هواي يبجي عليه دم
هم سبوع هيج شال غراضة وكلشي وراح الاربيل وهم كلنا دخلنا بفترة كئابة هو الجبير ومتعلمين عليه هو ايدنا ورجلنا كلشي عليه ضل بس امير واحمد الي بالداوم
رجع فهد يطب ويطلع ويتحكم
سبوع سبوعين وسنا وبناتها رجعن وهلمرة متغيرات سنا راجعة اتعس اتعس من قبل بقاطات ولا جنها الي قبل فترة وكفت وياي
خاصة ندى تباوع علية بحقد وشماتة وعلى بطني
رجع فهد يتحكم يكعد بنص الصالة ويصيح بطة جيبي مي جاي
لحد ما ابوي صاح علية كلة البنية حامل ومسويه عمليه ما نخليها تتحرك مو زين
كلة وطبة مرض هو وابوه انت مو رح تنطي
كلة ابوي لا بارك الله بيك تريد اموت البنية لعد
خابرت وسام ابجي كتلة هيج وهيج يكول هذا العار
كلي معليج قبل ولادتج اني راجع
كتلة وحدك
ضحك كلي شنو منتضرة احد وياي
كتلة لا
كلي ارتاحي ارتاحي رح يرجع وياي علمود تعقدون ويسجل الطفل
- شنو يعني وسام ياخذة ؟!!!!!!!!!!!
- لا يولي شياخذة بنتج تبقة عندج حته لو طلكتي بس خوما نسجلها بالهوى غير بسأم ابوها
- سكتت واحس وجعني كلبي من جاب طاري الطلاك بس هوا هذا الشي الصح الي والة
وعادي مرت الايام توني دخلت بالثامن
عالم كامت يوميه تجينا من من كربلاء
يردون الصلح وابوية يرفض
يومية السادة اشكال واللوان يمنا يومية
اخر شي حجو وية بابا كلولة الراي راي البنية اذا رادت تطلك احنا نطلك
اجة بابا حجة وياي
كلي بوية بعدج تردين ليث لو تردين تطلكين
كتلة اطلك بس بنتي ضل عندي
ضحك كال شلون ضل عندج مو ما ردتيها
بجيت كتله غلطت بابا اريدها بنتي اني اربيها
ودراستج بيان حجة بعصبيه
كتلة والله اقرة وانجح هيه بقت سنة وحدة اذا رسبت اخذها الطفلة ولا ترجعليها
كال لا ما ارضى ما نكعد نربيلة احنا فوك سوايتة ويانه
عافني وكام ضليت على كعدتي مددة رجلية وابجي
جابتلي التلفون امل وسام ع التلفون متصل كامرة
شافني هيج ابجي كام يسب ويكفر كلي انتي ليش مثقين بية مو كتلج محد ياخذها منج
كافي تبجين مثل الزعطوطة الطفل لا يصير بيه شي
وصدك خفت عليه سكتت وكمت غسلت وجهي
عفتها ورة وسام هاي المرة اذا صدك خذلني واخذو بنتي مني والله والله اصعد واشمر روحي من الطابق الثالث
شربت علاجي وبقيت بالغرفة بطني صارت جبيرة حيل رجلية ورمن صار عندي زلال فضيع
مالي خلك كلشي بعد عفت المسلسلات والتلفزيون وكلشي صار اكثر تواصلي ويه هاي البنيه يعني حبابة ولطيفة شوية صح ما بينا اشياء مشابهة ودايما انزعج من جذبها وغرورها تفيك هواي
بس عادي مخلصة وياها الوكت ماعندي صديقات ابد اتواصل وياهن
نبقة نحجي بالساعات سولفلي هواي على حبيبها رح يصير الهم سنتين من تاركين بس بعدهي متعلقة بيه وتحبة هواي لحد لان ممستوعبة انو هو تركها تكول زين وياها هواااي ولا مرة عايفها تنام زعلانه حته لو هو يزعل هو يرجع يحجي وياها شتطلب ينفذلها تكول يبقة سهران وياي للاربعة الصبح ونوب يروح للشغل تكول يغنيلي صوته حلو حيل ابد ميكولها ب اسمها كلة حبيبي عاند اهلة واجة خطبني وعاف دراسته وعاف كولشي وراه
هيج يكولي هيج يتغزل بية
كتلها مستحيل شخص هلكد يحبج وكل هلسنين يعوفج علمود سبب تافه تكول اي الناس حجو براسة وصدك ومشاكل الاهل
لسا يحبها وميكدر يطلكها وهيه تحبة بس ميريد يرجعون
مرة انتحرت علمودة واجاها يركض ومن شايفها كاعدة مابيها شي عبالها تجذب عليه
كرهته حيل وكرهت الرياجيل كلهم خطية عايفها مثل الخبلة بس سولف بيه
سألتني اني هم على حياتي وعلاقتي بزوجي كتلها والله ماعرفة زواج تقليدي
صح جان حباب ويايه بس ماعرف عنه شي شهر واحد نخطبت وزوجت وتركت
واريد اطلك
متقبل اطلك تكلي لخاطر بنتج ومدري ايش
اصورلها بطني من تكبر تضل تكزكز وتحلفني ادعيلها ترجع هية وزوجها تكول دعاء الحامل مستجاب حلفتلها حته بيوم الولادة ادعيلها
ضفتها سناب وصرنا وحدة صور للخ حياتها ويومها اصورلها شطبخ وشباوع وشسوي و وين نروح اني وامل
وهية هم تصورلي شوراعهم ودوامها
تندمت حيل لان دزيتلها صورة بنت عمي اكثر من مرة ردت اصارحها نوب كلت مو هسه خلي افش من الورم واجيب واكلها جنت خايفة ودزيتلج مو صورتي لان اول مرة اصادق بنية ع النت
جانت هيه صورلي اول ب اول خاصة السنابات هيج رحت هيج اجيت شوفي شعري يالون اصبغ صورلي الملابس ششتريلي
واني انسقلها وهيج جان يخلص اليوم وياها اغلب وقتي
مرات تدك اتصال وتحجي وياها امل وتشاقة وتضحك نضل بالساعات
وصلت نص الثامن بقة سبوع وادخل بشهر ي
علاقتي صارت مو زينة حيل ب بابا
اكثر من مرة صاحني ومارحتلة ومن يجي اطب للغرفة وما اسلم عليه
وهلشي خلة جو البيت متوتر دايماً
كاعدة مرة بالصالة والقران مشتغل بالتلفزيون صورة مريم
بجيت حيل عبالك تحجي قصتي وخاصة من كلها ( لا تحزني فَكُلِي وَاشْرَبِي وَقَرِّي عَيْنًا )
اجة بابا كعد يمي وباسني براسي
كلي بوية ليش تبجين والله اني احجي لمصلحتح اني اعرف منج
شلج بيها تربين وتكبرين وتسهرين وتالي تكلج اريد ابوي واريد اهلي ويروح تعبج
بوية درسي وتخرجي افتحلج صيدلية وتكعدين بيها ويجيج واحد ابن حلال يقدرج ويحبج وعود بذيج الساعة ازوجي و خلفي
ضليت بس ساكتة ومدنكة وابجي يعني الوحدة خاصة بالاشهر الاخيرة التعب يصير مضاعف ونفسيتها تدمر وتريد بس تجيب حته تحضن ابنها وتشيلة وتخلص من تعب الحمل
ويجي واحد يكلها ختولي هاي نطيها لابوها ونوب عود ازوجي وخلفي مرت الخ
شريد احجي وشجاوبة
ضليت مدنكة ودموعي تشكي الحال كل املي ب وسام كلي اجي قبل ولادتج ومحد ياخذها منج ...
مسحت وجهي وابتسمت
من شافني هيج عبالة وافقت ينطوها
شوية ودخل عمي شايل بيدة جنطة صغير وبيها اوراق
جانت مضاهرات مدري ايش و فهمد متورط برشوة وصايرة عليه تهمة وعمي ساحب الاوراق وجابهن الابوية يركض كلهن ضمهن يمك وهاي الجنطة بيها الفلوس ما رواتبة مقدما رح يكطعو ومدري ايش هواي حجي ماركزت بيه اكره فهد والمواضيع التخص فهد
قبل ما اكوم كلي بابا هاج ضميهن بالخزنة مالته اعرف الرمز والمفتاح ماله من زمان
هاي خزنه ابويه بيها الوارد الذهب وفلوس السلف وكل الاوراق المهمة بيها ومحد يعرف غير اني واكرم و وسام
كمت اخذت مارحت للغرفة بابا تعاجزت شمرتهن بالكنتور الجوة بغرفة امل
رحت تمددت واباوع بملل اتصلت على وسام كتله شوكت تجي كال حجزنا سبوع سبوعين واحنا يمج ويحجي بصوت عالي عود يسمع ليث يكلة شوف دتسأل
غلست اني الكرامة سزز كمت بس اضحك صدك مشتاقتلة واتمنى يجي واشوفة ..
رحت تمددت راسلت فاتي
وحجينا شوية وشقة ومدري شنو كالت صوريلي بطنج داشوفة صورتلها
كالت ولج كبرانه حيل
كتلها والله جاي ع بالي البس بدلة العرس اشوفها طب بية لو لا
كامت تتضحك حيل كالت عليج الله صوريلي ياها
سولفتلها سالفة البدلة كتلها طلعوني فاقدة الوعي واخوي جايب بدلتي ويمشي وراي
ماتت من الضحك
بقينا نسولف ع البدلات كالت صوريلياها
كتلها هسه تجي امل وطلعها ماكدر اكوم
سألتها على بدلتها كالت وصيتها من تركيا شهرين يلا وصلت اجلنا العرس بسببها
كتلها بعدهي عندج
كالت لا بعتها سكتي يمعودة لا ذكريني ندمت حيل كلة من ررة اختي قشمرتني
كتله حرامات والله كالت اي متندمة
بس عندي صورها
اصلا صور عرسي كلهن عندي هسة ادزلج ياهن ابقي وياي
كتلها اوك
يتبع ...