(كتابات ماروكو )
هلو 🥺❤️...
.............
يمعود بلكي نشوفلنا واسطة شي
- باوع انت سلم الفايل بس لا تعتمد عليهم
- وسام
- هااه
- وسام اريد بيان ..
- هااااه
سكتت ...
- ههههههه كمت تمسلت
- والله مدا اشاقة
- ليث لا تاكل نعل
- اريدها والعباس
- دنجب لك
- اروح احجي وية الحجي ؟
- ليث صدك تحجي تخبلت البنية صغيرة ذني الاثنين الكبار واختارلك وحدة
- ميخالف اريدها اخليها بروحي والله
- انعل ابوك لبو روحك سد السالفة
- وسام ..
- لك بابا الحجي ميقبل يزوجها اذا مو تتخرج
- اي انتضرها تتخرج
- ولك طايح الحظ كتلك ازوج هسة حتة تكسر خشم ذول الكواويد
- ولك واني اخرب حياتي علمود اكسر خشوم واسكت فلان وعلان ماريد ازوج هسة بس احجي وية الحجي كلة ليث رايدها لاتنطوها
- خرا بحياتك عاد ماهية حياة
- دحاجي شخسران بروح امك حلفتك
- لك ليث نكول ابوي وافق وانطاك اياها انت اهلك شلون هاي طفلة زعطوطة لا تتحمل حجي ولا مشاكل واهلك ما يرضون مو شوفة عينك فهد اذا يضربها تخابرني تبجي
- يمعود اهلي شعليهم هسه بس اتعين اجي لبغداد هنا أداوم
- ومنين تتعين توك كتلي مو اكيد
- معليك ادبرلي تعين واذا ماكو اقدم ع الجيش واداوم
- ستغفرالله يمعود والله ما مرتاح لهل السالفة هسه البنات الكبار شبيهن ما تكلي
بس اني صوجي بالقران هسه شلي شغل بيك الازوجت والطلكت ااااخ بس اني كواد
- اهووو بس لا سدها لخاطر دينك حاجي عمي ابو كرم القبل نعم الله عليه ما قبل يومين تلاثة اني يمك
- شو اكل خرا
- والله بعد
- شعندك جاي متكولي
- وسام هسه تحاجي لو لا
- مادري
- هاي هية مشكور
- اي اي ازعل جنك مرة
- لا عليمن ازعل
- خلص رح اخابرة باجر واشوف بس القبل قبل واذا ما قبل لا هوا ولا البنية ماتفتح حلكك وتكلي حاجيلو دورلي بعد خوش وشوفلك وحدة وتزوج من كرايبكم هلشهر هذا وتزوج
- اي ماشي
- هلشهر هذا خوش
- لك خرا عليك افتهمنا كتلك ماشي
-يلا خلي انطمر بالقران تعب كلبي من وراك كلساع طالعلي بسالفة
-دولي انطمر
- رح تنام بالسيارة
- والله هية جنها هيج
- دنزل حيوان وجع ضهرك لا يرجع عليك
بيان :
جيت من الدوام تعبانة نمت شوية وكمت ع البيت تنضيف وغسل واليوم ابوية يمنا كعدت اسوي عشة
امل كاعدة يمي بالمطبخ تلكط بالتمن
- اكول يوووم
- عيوني كولي
- مو جنهم تأخرو صارلهم اربع ايام شنو مختاروحدة منهن مارجعو جواب
- بلي يعيني رجعو كبل يومين
- اها خير انشاء الله
- منو اختار منهن
- اختار وحدة بس ابوج ما قبل احجي
ذبيت الچفچير ورحت كعدت يمها واكرص بصفاحها ههههه
- احجي الله عليج
- ماكوو ابد هههههه
- اذا تحبيني احجي والله ما اكول ههههههه
- ابد اني هيج علمتج متأمنين السر
- يمة اني وياج مابينا اسرار هسه اني اضم عليج شي ؟ مو كلشي اسولفجً
- دبسج يعيني وكومي كملي الاكل لا يحترك
- هسه اكوم والله دحجي منو اختار نور لو ندى
- بطة
- هلا يمة
- داكولج بطة
- هاااه احجي ماكول
- يولي داكلج اختار بطة
صفنت بوجها
- يابطة
- هههههههههه نسطرت البنية
- اهوو يمة بلا شقة احجي الصدوك بداعة الولد
- والله يعيوني وداعتج الولد مخابر وسام ومستقتل عليج كلة حاجي عمي ابو اكرم
- وبابا شكال
- يكول الولد خوش ولد حباب وصايم مصلي مابيه عيب واعرفة من هو صغير هنا كبر وية الولد بس اهله شوية معقدين ومو من عدنا وامانه الله هو كايل اجي هنا لبغداد اجر مالي شغل ب اهلي
- شنو السالفة يمة وانتو صدكتو يعوف اهلة علمودي هو وين شايفني غير مرة وحدة
- يعيني هذا شلون كلام غير يعزج على معزة اخوانج وشاريج ويريد خاطركم
- يمة
- ها حبيبة
- يمة اكس
عفتها وكمت اگلي بيتنجان دنسوي مقلوبة اليوم
كامت وراي
- يكلبي ما يصير هيج انتي كبرتي وصرتي واعية وفاهمة توكف قسمتج بعد اذا ياهو اليجي ما ترضين بيه
- يمة ماريد ازوج خلي اكمل دراستي هسه نوب عود الله كريم مدشوفيني كوة مدبرتها هذا رابع امتحان امتحنة واسلم الورقة فارغة
- يمة ما يأثر على دراستج بشي هوا
- لا يمة كولي لبابا ما تريد
- هاهية يعيني بكيفج
سكتت محجيت شي بعد
كملت تگلاه جيتي امل طبخت التمن وحضرتها
رحت غسلت اماعين ومسحت البيت وحضرت الميز
واشتغل اشتغل ومادري شداسوي بالي مو صافي حته اليحجي وياي ما انتبه عليه
صبيت العشة كعدنا كلنا
بابا كلي روحي صيحي امج
رحت صحتها نزلت تتمشى على كيف وشايلة ثوبها طويل وتمشي مثل الاميرة
كعدت كبالي
ضليت صافنة عليها تاكل بكل برود وتباوع بتلفونها وتتبسم كمت احجي وياها بداخلي
سسسسسم وزهر تاكلين ..
دمرتي حياتي وين ترحين من الله شتكوليله ع الخراب السويتي بداخلي ع الخوفة والقلق الي اني بيه
هسة خلصت الدراسة وتخرجت شنو العذر الي اقدمة الابوية واذا كلي ليش متزوجين
شلون هيج تكدرين عايشة حياتج طبيعي
وانتي دمرتي حياة كاملة لبني ادم خليتي ميعرف راسة من رجليه
مافكرتي بيه ولا مرة ؟
سويتي مني انسان متحطم شتكولين لله شتكولين
شكد تعيشين بعد ١٠٠ سنة هم وراج حساب وكتاب وراج و محكمة الاهية والله حته ربج اذا يسامحج اني ما اسامحج على الداعيشة وحق الله الشكبرة عهدد علية ماسامحج
كمزني من صفنتي ابوية
صاح بطة
كلهم كمزو وياي
جنت صافنة عليها
- شبيج بابا ليش دتبجين
- ابجي !!
خليت ايدي ع خدي بسرعة مسحت وجهي
- بطة شبيج احجي ذب الخاشوكة وضل صافن علية
خفت حيل ارتبكت
- شبيج ابوي صاير شي
- لا يابه ماكو شي والله عضيت لساني
- لا حول ولا قوة لا بالله غير ديرين بالج
- دنكت كتلة رايحة اغسل
كمت غسلت بسرعة وصعدت فوك
طفيت الضوة وتمددت حضنت لعابتي ياقوتة
كل ساع يجي على بالي
طولة ضخامتة شكلة هيج من بعيد ضحكتة
ضحكت ع روحي ستغفرالله ربي شبيج بنتي اصحي رفضتي بعد بح طار
الغرفة ضلمة هندس
بس صوت المكيف
بقيت مغمضة وسالفة تجيبني وسالفة توديني كلساع يخطر على بالي شي
كلساع اكول
شعجب يعني كال اريدها ليش خو مو بنات سناء هنه بكدة ونفس عمرة ليش اني !!!
لا تعرفني ولا شي
وحتة اني ماعرفك
اروح احاجي امل اكلها غيرت رائي اريدة ؟!
بس لا ..
ستغفرالله ربي
ووويع هم ازوج وهم انضرب مثل نضال وسنا ويجبرني تعالي نامي ويايه وسوي هيج وسوي هيج
وحتة ذول محد يدافعلي لان صاحبهم
يلا همزين رفضت
اي الحمدالله
والله بينان دتعجبيني عقلج ديشتغل ويكول علية سومة ثولة
امداك وسام
شوف هياني ما انغريت بشكلة ولا بطولة
هههههه وووف بس والله عاجبني حلو ههههههه غرامي الولد الطويل
لااا .. بلا عرف بسوالف نضال لو هذا الكلب يدزلة الفديوهات ويفضحني
خلص خيولي
انتضر منا لحد متفرج بلكي الله ونبي ويهديها وتوب وتعوفة بدون مشاكل وبساعتها ازوج ..احب ..انحب .. حته محد يعيرني
وهم مابطلت تفكير
ضليت هيج بين المتندمة لان رفضت وبين اكول زين سويت
الا هو مابيه شي ينرفض حلو حيل ومتعين وكال اجر بغداد وتكمل دراسة
ساعة اكول لا خيولي ماعرفة يجوز يطلع يضرب ويمد ايدة
وساعة اكول لو موافقة عليه يجوز يطلع حباب وياخذني يسفرني يم محمد و وسام واخلص
هاي النذلة متوب ...
ضليت بين هاي وذيج لحد ما نمت الافكار تستنزف طاقتي
كعدت الصبح متكسرة حتة مالي خلك البس واكشخ بس غسلت وجهي وكلشي ماخليت وبدلت شون مجان
طلعت انتضرت شوية اجة الخط وصلت كالعادة محاضرات ونهاية سنة امتحانات كومة وضغط
رجعت للبيت ب تلاثة يوصلني الخط اخر وحدة
ارجع تعبانه حيل
خاف اني عايزة تلاكة وياية السليمة
- ها وين جنتي لهسة دايحة
محجيت خاف هم احصلي ضربة
رجع عاط علية وين جنتي
- شبيك فهد بالدوام وين جنت يعني
- وشكو ملطخة وجهج
- ستغفرالله شملطخة شبيك هو هيج من الشمس
- وشهلبس هذا كوادة هاي مو جامعة
طلع اكرم من الصالة بسرعة صاح عليه هيييييي شبيك وياها
فوتي غسلي
غسلت شمرت كتبي وصعدت فوك الخنكة للستار واصلة
نمت العصر كعدت وهم نفس الروتين
نزلت شتغلت شوية ورجعت صعدت نمت بعدني
نعسانه
ثاني يوم دوام كعدت بالخمسة بين ما بدلت وتحضرت اتصل عليه وسام
نخمط كلبي ياستار شعندة من الصبح
فتحت خط
- ها ولك شكو
- ولك بعينج جنت خفر توني اجيت وكلت اخابركم اشوف شكو ماكو
- اطمئن ماكو شي ع حطتنا
- هاا خوش
ضلينا نسولف ويسألني هواي ع الرايح والجاي
بعدين اني كتلة اي صديقك منو اختار بينهن
ضحك حيل كال ام درب تغشمين روحج ههههههههه
هههههههه كمت اضحك ثولتها فد مرة
- ترة حباب والله ليش ماردتي
- شنو شايفني بلا كرامة ابوية مسطرنا تلاثتنا وهو يختار بينا
- عاي شكو منها
- وسام مو جنك فتحوك زيادة
- طايحة الحظ شوكت تبطلين التچفص شنو فتحوك
- يعني صرت مفتوح
- باعي هو انتي احسن شي سويتي بحياتج من رفضتي على هل الجفص مالتج تفضحيني وتخزيني
بعدين هذا اخوي شبيج منا وبينا
- ها خير انشاء الله
- هسه عوفي سالفة الكرامة واحجي الصدك ليش ماتردي
- شمدريني هو صاحبكم ورابي وياكم بلكي طلع طكة ونص ايدة والكفخة مثلكم هو اني اريد اخلص منكم
- هههههههههههههه لج لاااا بالقران فقير لا يضرب لاعندة بنات و سوالف مو زينه واصلاً طبعة هادئ
- ايباه سويته ملاك مابيه عيب بس يلا منو يمدح العروس امها وخلاتها
- ههههههههههه لا والله هو عيبة الوحيد ماعندة
- شلون ماعندة كال لابوية متعين
- اي شبيج هذا الاسبوع تعين ومارايد الزواج هوا اني لحيت عليه ردت امشي بنات سنا براسة وابوي كلة تعال وانطيك مرة بلاش
- بابا ليكول عندة صناديك طماطة مو بنات
- هسه صدك ما تردي
- اي والله اني اكره الزواج
- ليش لازم تردين صيرين راهبة
- سومة تأخرت والله يلا نام انت هسه عود تكعد خابرنا
- يلا الله وياج دير بالج
سديته منه بسرعة
البس بالحذاء واني اتخيل نضال وابوية قبل بالغرفة
الزواج قرف شون العالم هاي دتزوج مادري
طلعت بسرعة
وصلنا وبدة الدوام
بس كعدت شوية بالسنتر نوب رحنا دك محاضرات لل ١٢ يلا خلصت
صرت طلي
طلعت برة انتضرت الخط
تأخر شوية وسيارات هواي وصوت نسطرت وتلعب نفسي من ريحة البانزين
خليت وكمت اتمشة على كيف جنت لابسة تنورة كلوش جوة الركبة لون بيجي بيجي وتشيرت ربع ردن ابيض وسترة جينز
حارة نزعت السترة كلت عود من اوصل هناك البسها خاف يطلع السليمة فهد بوجهي الا بابا يقبل عادي
بقيت اروح وارجع حاطة الكتب ع راسي من الشمس ولابسة نضارة شمسية
شفتة من بعيد اجة بتجاهي ..
للوهلة الاولى عبالي وسام يشبه حيل حته نفس مشيته
ابتسمت بغباء وردت اروحلة اركض
بقيت اباوع عليه هو هم يضحك مبتسم وسرع مشيتة ولابس نضارة شمسية وتشيرت ماروني وبنطرون اسود حاط اديه بجيبوبة ويتمشى بتجاهي
وين يلا صحيت ع روحي
كبل درت وجهي ومشيت ليكدام
مشة سريع وصار وراي يحجي بصوت ناصي اوكفي داحجي وياج اوكفي
غلست بقيت امشي لحد ما صار بصفي حيل ارتبكبت
درت وجهي
واني امشي سريع وهو يمشي وراي عبالك واحد يطلبني فلوس ومنهزمة منه
كلي اوكفي الفصمة
ضحكت
- الله لا ينطيج فحطتيني اوكفي
خففت مشيتي
صار من ذيج الصفحة بس بعدة قريب علية
- شمسج
- بيان
- بتمن
- بنت نضال
- ياصف
سكتت
- شاطرة لو كسلانه
ختنكت حيل كوة جاوبتة
كتلة كسلانه
وكفنا على صفحة جر نفس طويل وحجة بحسرة كوة طلع الكلمة
- شلونج
- الحمدالله شدسوي هنا
- خالي صارتلة شغلة هنا و جيت ويا
وهم نخوثت ونسيت روحي ضليت اباوع عليه نوب انتبهت دنكت بسرعة
كتله هاا خير انشاء الله يلا باي اجة الخط
وكف كبالي بسرعة مو بس سد الطريق حته الشمس سدها
قريب علية
- بيان اني اوصلج
- لا تسلم هيانه الخط عفتة ومشيت
- اوكفي دنحجي جرني من ايدي ورجعني لمكاني
- شنحجي
- ليش دتباوعلي هيج
ضليت صافنه بوجه مو بيدي والله واول مرة اسويها نوب دنكت بسرعة
كتلة لان تشبه وسام
هو هم بقة يباوع بوجهي بتركيز عبالك يريد يحفظ ملامحي ..
عيونة ناعسة تجننن
من دنكت هو هم دار وجه نوب رجع يباوع عليه
حجة بهدوء كال ما اشبه وسام اني
كتله لا تشبه
كال لا هو طويل اني اكصير اني ١٣٠
ههههههه ضحكت حيل بفطارية هو هم ضحك ويحك بخدة على كيف يباوع منا ومنا
كتلة لا وسام اعرف طولة ١٨٠ بطولك يعني
- لا اكصر مني اني ١٩٠
- مادري بعد مشايفتكم سوة
- جنت هواية اجيكم
- اي وجيبيلي جبس
- شكو اختفيتي هيج فد مرة صدكين عبالي ازوجتي
- لا شسالفة بس هو يعني من يجون اصدقاء الولد ماطلع
- اي عفية ب ام سن المكسور
- ههههههههههه كافي عاد
تأخرت
- اوكفي دنحجي لا تخليني هسه اكلب عيوني
- لاعليك النبي
حط ايدة ع وجه ويضحك
- لا عليك النبي محمد حلفتك ..
كام يضحك حيل كال اوكفي لعد دنحجي
- شنحجي طلاب ديباوعون علينا
- معليج عوفيهم
- بيان
- هلا
فرك وجه وضحك
- بطة
- هلا سيد
- اموتج ترة
- اي انت هم لا تكول بطة
- اي كولي ليث
- اوك بس تأخرت الخط رح يعوفني
- كتلج اني اوصلج
- ماريد احجي شنو تريد تكول
- اني ماريد بس اگول اني اريدج كلج ..
نخوثت وكالعادة وجهي الغبي فضحني دنكت بسرعة محجيت شي
جر حسرة وحجة بهدوء
- اااااووف .. شنو سالفة الكرامة
بطة جيت على سنة الله ورسولة وردتج بالحلال تكوليلهم ماريد شنو ماعندي كرامة واوافق !!
- ماجيت علية جيت على خواتي
بس ردتج الج
واني ماريد ازوج هيج اريد واحد يجي علية اني لان يعرفني مو يكعد يختار..
ليث باوع تأخرت هواية هسه اهلي يضل بالهم مشيت
جرني من ايدي ورجعني
- اجيج مرت الخ واكولهم اريد بيان
جريت ايدة منه الضاهر هو جان ممنتبه عافني بسرعة
- ليث ماكدر اني اشوفك حالك حال الولد
- ولج الفصمة شايفتني لابس ربطة اكيد حالي حال الولد
- لا اقصد يعني حالك حال اخواني
- لان بعدج متعرفيني
بقيت ساكته
- بيان ..
- ليث والله ما اريد ازوج .. اطلب ندى هية اكبر وحدة بينا وحبابة ومتخرجة
- بيان
كالها بعصبية
ضليت ساكته ومنتضرتة يحجي
كام يستغفر وفرك وجه
رجع حجة بهدوء
- بيان ماريد الف وادور رح احجيلج الصدك ومن الاخير
- احجي
- باعي يابنت الناس اني شخص دخلت بعلاقة سامة وطلعت منها صفر ومن اكول صفر يعني حرفياً صفر متحطم نفسيا ومعنوياً ومداياً وكولشي سنة كامله واني ماعرف شلون اطلع من هل الدوامة الي اني بيها
جان وسام يحجي وياج كبالي
ويدري مراح اخلي عيني على اختة وفعلا جنت اتمنى عندي اخت واكعد اسولف وياها بالساعات جنت اشوف الحنية البصوتج و وسام على طول من يخابرج يضحك وياج ويتغير مود ة
كد ما تعبان
تمنيت لو بس مرة وحدة احجي وياج وينفتح بينا موضوع ترجع طاقتي شوية
وسام ماهان عليه ابقة هيج سوة كولشي حته بس يطلعني من هاي الحالة الي اني بيه
وجيت واني ممقتنع بالداسوي
خالي لا صارتلة شغلة ولاشي اني الماردت اجيي ورجع هو يلح علية
جيت واني متردد حيل لان اعرف مراح تنحل بهل الطريقة
لحد ما دخلتي وشفتج
عرفت وسام ليش متعلق بيج هواي
عيونج طولج ضحكتج صوتج كولشي بيج يشبه المرحومة هبة
كولشي بيج رجعني لطفولتي للامان الجنت احسة بذيج الايام
للبيت وسام والمشتمل الزغير للحنية هبة ودفو حجاياتها
جانت حنينة وياية حيل احن من امي .....
اعرف الداكولة مو منطقي وبداخلج تكولين جايني حته تتعلاج بية
ومااجذب عليج وهذا الصح
اريدج
اريدج بحياتي
حرفياً محتاج
تعبان حيل من ماضي اسود وحاضر متلخبط ومستقبل مجهول انتي الوحيدة الترتبين افكاري
انتي متعرفيني بس اني اعرفج واعرف كولشي يخصج وشتحبين شتكرهين وكولشي
- ليث عادي نصير اصدقاء لحد مصير زين وابقة اخابرك واسولف وياك اكثر ما سولف وية وسام عندي واهس اسمعك العمر كولة
- اريدج مرتي ..
- افهمني حباب اني اكره الزواج والله
-اعرف سولفتلي امل كولشي
و شنو التردي ولتكولي انفذة نأجل كولشي الى شعاراً اخر المهم نصير سوة
- ليث ..
- من اكول كولشي يعني كولشي حته البالج
بس هسة ماكدر احجي وياج واحنا بينا شي رسمي اخاف عليج
خلي نعقد ونصير اصدقاء وتتعرفين علية بالنسبة الي كتلج اني اعرف كولشي عنج
- ليث بس ..
باوعلي بكسرة
تعرفي علية يجوز تحبيني واذا مكدرتي تتقبليني بساعتها عود لكل حادثاً حديث
- واهلي ؟!
- اني احجي وياهم
- واهلك
- نأجر بغداد
- ودراستي
- تبقين درسين واني اوصلج وارجع بأيدي شلون هسه عافج الخط واني رح اوصلج
- عززززززة من وراك والله هسه اهلي يكمون يحجون عفتة وكمت امشي سريع
وصدك كل العالم راحت بس اني بقيت وشكم وحدة
ضل يركض وراي
- لج اوكفي
- بعدين نحجي
- لج وين رايحة اني اوصلج
- لا ماريد
- ستغفرالله انتو عائلة كلكم هيج شاخطة !
- يمعود اهلي يشوفوك
- ماوصلج عود انزلج مسافة
- وخالك
- خالي يتأخر ميرجع هسه
- بقيت مترددة
- امشي
- ليث
- بيان امشي شبيج
مشة كدامي للسيارة
مشيت وراه واني عقلي ممقتنع بالداسوي
مادري هيج صدفة درت
من هاي الصفحة چان شفت هذا الكلب كاعد بالسيارة مالتة ويباوع عليه ويخزر بية
نمغصت بطني
طلعت التلفون بسرعة وايدي ترجف دكيت على بابا
رجع الولد علية استغرب من ردة فعلي
جاوب بابا
- ها بابا وينك رجعت
- هايابه لا بعدني بالطريق خوماكو شي
- يابه الخط عافني تكدر تجيني
- حجة بعصبية لهسااااج ما راجعة ؟!!!!!!
ضليت امتمتت
اخذ التلفون ليث بسرعة من ايدي سوة كتم كلي كولي ضاع تلفوني جنت ادور عليه
- كتله بابا ضاع تلفوني وجنت ادور عليه
- كلي جايج
بس جان صوته يخوف مدري اني مهبوطة
ضلت ايدي ترجف اريد اسيطر ع نفسي ماكدر والولد واكف ويباوع علية ب استغراب و بقلق
وذاك الكلب
رفع تلفونه ويصور بية
درت ضهري عليه
- ليث روح
- يولي صلي على محمد ليش هيج خايفة
- ميخالف روح
- تردين اني احجي ويا
- لا لا عزوة روح الله يوفقك من ارجع للبيت نحجي
- ولج وين اروح اعوفج وحدج بهل الضهريه والشارع فارغ
- روح لا يشوفك بابا
- عادي واذا شافني
شو تعاي هنا بالفي
رجعنا وكفنا بالمكان الجنه بيه
كال عمي والله الواحد الا يشوف بعينه يلا يصدك
- شيصدك ؟
- عوفج
- لا احجي
- ليش هلكد مرعوبة من ابوج
- وليش حته انرعب
- بيان
- هااه
- وصل ابوج
كمزت كمزة
بسرعة رحت للسيارة حته ما التفت عليه حتة مكتلة باي
بس سمعتة يضحك بصوت ناصي
صعدت بالسيارة اللهث فحطانة
- اسفة بابا والله مدري شون ضاع بين مادورت عليه لكيت الخط رايح
- مرت الخ انتبهي
كالها بعصبية
مشينا
وجع بطني صار موطبيعي ومعدتي كامت تكلب ضليت كوة مصبرة روحي
وصلنا دخل ابوية
واني دخلت للحمام اركض ستفرغت ذبيت شكو بطني معدتي تشنجت
صوت البوري والمي يخربطني بالزايد
ادنك راسي ع المغسلة من ارفعة ع المراية اشوفة كدامي مثل الكابوس ضحكته الحقيرة وسنونه الصفر
شعرة المشيب
جتني نضال كالت ها ها شبيج شكو
عطت بيها حيل من كل كلبي
وخري الله ينتقم منج الله ياخذج يا كلبة
.. ما حسيت الا على عيطة ابوية
كمزنا ثنينا صاااح بيان تعاي
بعدة ديبدل
رحت ورجلي وحدة تضرب ب الخ
حجة ع كيف شهل الاسلوب هيج تحجين وية امج
طالبه انتي لو دلالة
ثواني والراشدي كومني بالكاع ماكدرت اكوم بعد
عافنا ب الصالة وطلع
جتي نضال وهلمرة الخوفة مبينه بوجها مو مثل كل مرة تشمت.
كومتني
دفعت ايدها وصعدت للغرفتي
قفلت الباب وصلت مرحلة من التعب والاراهاق حته مابيه حيل ابجي
حضنت لعابتي ونمت
اللعابة تعويد فقط
ماذكرني بطفولتي لان طفولتي هم ابشع من الداعيشة بس تعويد سنين وهيه تنام يمي واحضنها
نمت مادري شكد
فزيت المغرب ع دكة التلفون
رقم غريب دك دك مااجاوبت
شوية و وصلن الصور
مكتوب تجاوبين لو ادزهن الابوج
دك
فتحت خط
وجسمي يوجعني من الصخونه متغطية بطانين والدنيا صيف
اجة صوتة
- الو
احجي
ليش الحلو خانس
خايف لازم
- باوع طبك مرض من الاخير الدزيت والمدزيت اخر همي بلكي ويلكفك انت وياها ويخلصني من شكولكم القذرة ثنينكم
- احجي عدل لج وكولي منو هذا الجنتي واكفة
- وشعليك انت شعليك بالقران الكريم تطبك عندي واروح اسولف لبابا كولشي وانطيهم عنوانك واسمك
- ايبااااه الفاهيه تنطي عنواني
بلا تمسلت واحجي منو هذا الواكفة ويا اليوم
- خطيبي
- ههههههه صايرة تحلمين وانتي كاعدة
شنو يحتاج اذكرج
- شذكرني
- لازم نسيتي
مو كتلج باليوم الي تفكرين تنخطبين بيه ولو طيف هيج يمر خيالج
صور امج والفديوهات كلهن يصيرن عندة ونشوف عود شيكول ياخذج لا وتعرفين اذا اريد شي اوصلة
- سليم انت شتريد
- اااااخ فدوة يروح سليم وعشيرته لصوت الخدران مدري نعسان
- احجي شتريد
يعني متعرفين شريد اسنين واني اعيد هلكليشة تعاي وياي ساعة وحدة ساعة فقط .. بوكتها اخليج تنخطبين تعرسين مالي شغل بيج بعد
وحتة نضال اعوفها
- هه يعوف نضال حته يكتلك الفكر همزين عايش بخير ابوية
- مادري شلون اقنعج واكلج هيه لازكة ماعندها احساس يعني اكثر من ما كتلها بنتج بنفسي جيبيلياها شكلها بعد ..
-هاا وشكالت !
- ههه مكالت شي شنو شو سرسحتي جنج الله هداج
- سديتة الخط بوجه بتعب وشمرت التلفون
نزلت الامل تعبانه
اريد اسولفلها والله تعبت صدري ماعد يتحمل ثكل اكثر
سنين واني متحملة هالسر
سنين واني عايشة بقرف بعيني اشوفها
بعيوني اشوفها تطلع من البيت ولابسه ثياب النوم جوة ملابسها وترجع للبيت تسولف وتضحك ولا عبالك شي صاير
تعبت من التهديدات
تعبت من الكلام الوصخ الي يزرف كلبي تعبت من الارقام الغريبة
والمراقبة والخوف خاف واحد من الطلاب يشوفة
سنين واني خايفة ينشر فديوهاتها وابوي يشوفها
تعبت
ولكم ياعالم والله هواي هيج
نزلت ومجلبة ب المحجر مابيه حيل لكولشي
- هلو يوم
- هلا حبيبي هلا يعيني صح النوم
رحت كعدت يمها تعدل بشعري وادري دور تريد تشوف خدي
- هههه يمة عوفج شدورين تعودت جديدة الكلة هسه على احمد راضي
- ميخالف يروحيتي السويتي غلط اكو وحدة تغلط على امها
- وطبها ومرض انشاء الله اشوف بيها يوم مشرحة وكل قطعة منها بمكان
- بطة !!!!!
- هاا يمة هاا
- لج يوم شجاج ما تكوليلي شجاج اول تالي انتي الماتجي على لسانج العيبة هيج تحجين
- يمة سكتي بداعة عزيز كلبج
- ماكو على كلبي اعز منج
جريت حسرة
- يمة تدرين شتمنى والله
- شتتمنين يعيني
- بس ماضحكين
- لا ماضحك والله احجي
- اتمنى هيج اصير مثل نيلز اصغر اصغر واصعد على ضهر الوزة واطير واخذج بس انتي وياي وبعد منرجع لهنا الله ...
- والله يحبيبة وافقي وكولي يالله وطيرين انتي ونيلز بدون وزة وترحين يم اخوانج وترتاحين
- هههههههه تعاي تعاي ذكرتيني انتي شلون سولفين للولد عني
- ههههههه ولج يمكموعة شمسولفة
- يمة احجي الصدك
- انتي شعرفج
- يعني حاجية
- اي والله يعن ذاك اليوم جان يمنا
- هاا شوكت شو مشفتة
جنتي بالدوام يكلبي واجة على اكرم واحمد وضلو كاعدين نوب طلعو وضليتا واكفين اني ويا بالباب وسولفنا
- شسولفتو
- يمة ماحجينا هواي بس سامع من وسام انتي زعلانه وماراضيه بهل السالفه مال هو يختار وحدة منجن
وكلي اعتذريلي منها هية السالفة صارت هيج وحدها اني لو شايفها من زمان اجي واكول لعمي اريد بطة
- يا فلك وشكتيلة ..
- كتلة لا وليدي السالفة مو هيج هيه مو بس انت الكل ياهو اليجي ماترضة
كال ع السبب
- وكتيله مو صخام صخم وجهي
- اي والله يعيني كتلة هيه شوية متعقدة بسبب المشاكل البين امها وابوها
- يوم صدوك تحجين جان كتيله بعد شافتهم من جوة الباب سوة شون يسون
-ههههههه لسانج ولج
- يمة ضجت والله يعيني فوك قهرني انتي سوين هيج فضحتيني يم الولد
- بطوط يمة
- هلا
- يمة ماكو احسن من البندام الصادك وماكو بيت مابيه مشاكل
- اي بس مو هيج سولفين
- مابيه شي
- اليوم هو اجة للدوام وحجة وياي بس شنو يمة حجية شكد حلو اسلوبة يخبل
- يااا اجاج
- اي والله يمة اجة وخربطلي اوضاعي كولشي بيه حلو شكلة طولة كولشي نوب لو شايفة طريقة كلامة تجنن
- اي وج عيني اعرفة من زمان هو هيج اخلاقة همة السادة كلهم هيج
- هههههههههه لعد ما تعلم منه ابو لسان الزفر يمة ذاك اليوم مصور وية بنية ومكعدها ع رجلة بس شنو تخبل تخبل
- ووووف الله يهدي والله نهار كلة ادعيلة
- عليمن يهدي خلي متونس
- يااا ستغفري ربج ولج
- يمة باعي هيج شعرها كصير يخبل خلي اسوي مثلها
-ولج سكتي يكص راسج ابوج اذا كصيتي شعرج صدك بطاري ابوج بعد شوي يجي وترحين تعتذرين منه
.
.
هاا شو سكتي
- يمة كلبي يوجعني وتعبانة حيل ...
شبكتني وحجت بخوفة
- اسم الله عليج من التعب يعمري شو تعاي
- احجي شصاير
- ماكو شي
- احد مضوجج بالدوام
- چچ
- ميخالف كلبي لعد هاي ضغط من الدراسة هسه تتخرجين وترتاحين ويجي ابن الحلال اليسعدج انشاء الله
- يمة ..
- هااه حبيبة احجي
- يمة ليث حباب مبدائياً ومبين متفهم شوية بس ..
- بس شنو
- اني ماريد هيج ازوج اريد ازوج على حب
- سكتي يمكموعة احنا ماعدنا هاي السالفة شوفة عينج كلهم طكة ونص ماعدهم تفاهم بهاي ماعدنا بنية تحب حته التحب ويجيها بالحلال ماينطونها ويزوجونها على مزاجهم
- ادري وادري كلشي مشوفويني بعيدة كل هلبعد عن هلسوالف هو اني صديقات ماعندي
بس مدتخش بعقلي والله يعني هيج يجي واحد يتقدملي وثاني يوم اكوله حبيبي و ونوب ياخذني نسوي ومدري ايش يمة قرف والله حته بطني تكوم تكوم توجعني من افكر بهاي السالفة
- حبيبة اكو فترة خطوبة وتتعرفين عليه
- وبلا ماعجبني
- تفصخين عادي حالج حال البنات بس انشاء الله يعجبج والله هو وردة مال الله
- باعي يمة هو صريح من البداية حجالي كلي جنت بعلاقة وطلعت منها تعبان
ولمحلي انو نأجل كولشي
لان هو هم مرايد الزواج وسام الي مجلبلة
- ههههههههه خبال خبل وسام انشاء الله صدك تحجين
- اي والله هو كلي
- هاي هيه بعد شكو
- وبلا غير رائيه ورة الزواج وكلي تعاي نسوي .. سكتت
- يمة ترة انتي الدتكولي والله مو طبيعي لعد الولد المن مزوج
اخذج للدكتورة ؟
- ليش شبيه وتاخذيني للدكتورة
- زين نروح لشيخ شي يقرة عليج يسويلج رقية خاف مس اسم الله عمل
- يااا اعوذ بالله شنو هلسوالف
- هسة شكلتي
- شكول اندري شكول
- يمة ارضي والله ما تخسرين شي
- زين بلا طلع يضرب وعصبي والدنشوفة كڤر وبس
- لا مبين مو هيج
بجيت بخنكة
- واذا طلع جذاب وخاين مثل هاي .... ستغفرالله ربي
- مثل منو احجي ؟
- محد يمة محد المهم ماريدة
يمة بطوط احنا قابل عدنا سونار ونفحصة غير انتي تنخطبين وتتعرفين عليه وشوفي
اوك
نرجعلهم جواب
بكيفكم
الله يكتبلج الخير بكل خطوة تخطيها باستني وشبكتني
لا تبجين يروحي ...
.................
يتبع ..