- ياقوت -

3

سلام ..❤️

ليث :

كبرنا وكبرت همومنا والحياة صارت متعبة وية اهلي كولشي عدهم حرام تلفزيون ابوي ما يبقل نخلي بالبيت بوكت العالم صارت عندها حاسبات وتلفونات لمس
نسوان اخوي لازم ما اطلع من الغرفة اذا مالكاهن بغرفهن
لازم اروح وارجع بالوكت اليريدة يكعدون اكعد ينامون انام مشاكل نهار كولة ومحاسبه عبالك طفل كدامهم

طلعت معدل ٨٠ ماقبل ادخل التخصص الاريدة خيرني بين لو علوم سياسية لو اعلام
كتلة اعلام دخلت التخصص الاكره وماكدر اكمل بيه تعقدت حيل ما اكدر اكون صدقات ولا اخالط ولا اكدر اخذ راحتي لازم كلة بحدود والعالم اصلا محد يتقربلي ع ابوسيد ومعقد وخاف نغلط ويا بحجايه وابوه سيد فلان اي الينطي محاضرات
حجيهم وياي كلة رسميات ماعندي اصدقاء اطلع واطب وياهم كل الاشخاص بحياتي معرفة وبسبس

صديقي الوحيد وهم عافني وراح لبغداد كمت اروحلة كل عطلة هم  ابوي مايقبل يكلي عندهم بنات شعندك رايح 

بعدة ابوي نفس طبعة اتأخر شوية ع الصلاة يرزلني بنص العالم

اخوتي نفس الطبع واضرب منه يتحكمون هواي

بعدني احب فاتن هية الشي الوحيد المصبرني على  هل العيشة من صارت
المشاكل بسوريا طلعو الالمانيا تهريب واستقرو بس بعدهم ما نطوهم اقامة هيه خواتها واهلها ماكدرو يرجعون للعراق بعد

فاتحت اهلي بموضعها وكتلهم اريد اخطبها ماقبلو وكالو مو من ثوبنا
بينة سافرة وتطلع وطب واحنا ماعدنا هيج تريد ناخذلك وحدة بنات عمك لو كرابتنا

بقيت مصر ع قراري اريدها لو هيه لو ماكو كالو ضل لا تزوج شنسويلك

وضليت ماردت ازوج بعد صرت مرحلة ثانية
ورجعت امي تنك عليه هيه وابوي ازوج ازوج نخطبلك بنت عمك

عادتنا وطبعنا احنا الولد والبنيه عدنا يزوجوهم من همة صغار اخواني كلهم ١٧و ١٨ يزوجون اخوي الوسطاني عمرة ١٩ جان وعندة ثنين جهال

هيج طبعهم اهلي اني الوحيد الي عاندت ومامشيت بشورهم وابوي دومة يسمني العاق

ومشت الايام والوضع نفسة  تعبت من حجيهم والبنية احبها واريدها وهيه هم تحبني بحيث كلتلي موافقة اجي يمك حته بوشية البس اذا اهلك قبلو بية

بس شسوي الاهلي مايرضون مايردوها وهية اهلها هم مايقبلون اخطب وحدي االا اهلي يحجون بالموضوع رسمي ابوها واحد قنقينة

ضليت هاي السنين كلها عايش بعذاب وياهم تعبت حيل كمت انتضر الجمعة يوم يوم حته اخلص من نگهم

ونستي الوحيدة صارت وسام وولد خالتة نضحك نشاقة نطلع بس ولد ماعدهم بنات مدري عدهم
مادري

كلما اروح بيتهم فارغ بس مرت ابوهم الجبيرة تجي سلم علينا مرات تكعد يمنا

بنت خالته الزغيرونة  اخت محمد ماذكر اسمها ام عيون الملونه احبها دايماً اذكرها من جانت طفلة واخذتها اشتريتلها واخوفها ههههههه دايماً عندي فضول اريد اشوفها كبرت شون صارت ويمكن هم ازوجت لان كلما اروح مالكاها هاي السنين كولها
جان وسام يوصيني اجيبلها جبس وحلويات وياي من اجي وكبرنا واني بعدني اجيبلها 

مرة من المرات جنه واكفين اني وسام بالباب سيارتي طفت ونصلح بيها اجة محمد
كناله هاا وين كال اريد اخذ اختي  للدكتور اسنان رح اشوفلي تكسي وارجع
وسام كلة حارة شياخذكم اصبر هسه نشغل السيارة واحنا نوصلكم
فرحت بكلبي اريد بس اشوفها مو نضرة دونية  لا والله بس فضول اشوفها تغيرت لولا احب عيونها وكصايبها من جانت صغيرة لون عيونها غريب مدري اصفر مدري اخضر يخبل وسنها المكسور وخدودها هههههه

ضليت كاعد بالسيارة وسام يمي بالصدر
صعدت هيه بسرعة وكالت بصوت ناصي السلام عليكم
جاوبتها كوة واني مرتبك ستحيت من اخوانها

كصيرة حيل تقريباً طولها ١٤٠ هيج وبيضة بس معانيها ابد ابد مو حلوة ابد رفعت راسي عليها جانت عيونها سود ضليت احجي بكلبي عيع هاي شصايرة وين عيونها الملونه شغيرها هيج

وفوك هذا كلة خفيفة حيلللللللللللل اخوانها ثنينهم كاعدين وهيه ما نزلت عينها مني وتتبسم وشعرها نصة طالع

ضجت هواي ونضرتها نرفزتني بالزايد اني ولد واستحي اباوع على بنية لو احط عيني بعينها هيه الصلافة العندها مو معقولة
مدري اني لان ممتعود الجو العشت بيه كبت وما اكو التقاء بالجنس الاخر مدري متملي عيني بنية غير فاتن ماشوف وحدة حلوة
مدري هية صلفة
ضجت  حيل بس وصلتهم طلعت كبل حته ما بتت راد حجة وسام كتله غير مرة اجيك

ومرت الايام
...

نجحنا صارنا مرحلة ثالثة اني وسام بس هو يداوم بغداد واني بكربلاء
صار  ونفتخ اللجوء والناس بدت تسافر وتطلع

ضليت اللح ع وسام  نطلع اني ويا ونسافر
وسام فترة وترك الكلية بس ميقبل يسافر يشتغل وية خالة بالعلوة تجار خير من الله
مقبل كلي شيل هلفكرة من راسك تخرج وعود الله كريم

بيان :
صرت سادس وضغط وامتحانات بدون كولشي اني طبعي انطوائية ماحب اخالط ولا اصادق ماعندي صديقة ابددد كلهن هيج كد السلام دايماً

صديقتي الوحيدة هية امل
بس  حته امل كبرت وتعبت مو مثل قبل عندها سكري وع طول يرتفع لان وزنها زايد وتتخربط  وتوكع

هيه صديقتي وامي واختي وكلشي شيصير بيومي اسولفلها

اخواني خمسة  ماشاء الله اكرم امير محمد احمد وسام
حنينين  حيل احب لمتهم وشقاهم وضحكهم وسوالفهم خاصة يوم الجمعة من يلتمون امل سويلهم سمج

صح يتعبوني بالامر والشغل بس احبهم
يضلون سهرانهين لتلاثة هيج كلهم بالصالة محد يصعد لغرفتة مرات
يجيهم صديقهم ليث حباب حيل ماسمع صوته هواي اصلا كلما يجي اني اصعد فوك بعد ما انزل وهو بعدة لهسة كلما يجي يجب الجبس الاصفر ههههههه

استحي منه حيل حته ما اكول اسمة يم وسام استحي من اريد احجي بيه لو اسألة عليه اكولة صديقك هذا
وهذا طبعي بالعادة
حته اخواني الباقين استحي منهم من يشاقوني لو شي ما ارداددهم بس اضحك
الا وسام علاقتي قوية بيه حيل احسبه صديقة مو صديق واخو اسولفلة كولشي هوًمن نوع اليشاقة هواي ويضحك كشكولي  ويدخل بكولشي واجتماعي بس عندة سوالف مكسرة يحب البنات وطلعات وهلسوالف ودايماً ابوية يلكفة
واني اضملة واطمطملة من زمان جان صغير اني اضملة باكيت الجكاير
حتة لا يشوفة ابوي
هوا هم ميضم شي عليه كلشي يسولفلي
عيبة الوحيد عصبي طكة ونص

كبرت
و صار عندي تلفون ونت واطلع مرات ويه امل ويه ابوية نروح لبيت عمي ولكرايبنا خاصة بالعيد ابوية ع طول ياخذني ويا

هواي اشوف ولد يتحرشون ويسمعون كلام وحته ولد عمي اكثر من مرة سيف ابن عمي لمحلي وراد يحجي وياي بس ما نطيته مجال بعد طالبه سادس نفسية مو شلون ما جان
بعيدة كل البعد العلاقات والحب

وهم بسبب ابوية اخاف اغلط غلطة صغيرة وانضرب نفس الراشدي الي نضربتة دايماً يحذرني هو واخواني بطريقة غير مباشرة انو ماعندهم بنيه سوي علاقات وكذا هلشي غلط وعيب
والله يعلم عقاب هلغلط شنو

علاقتي بأبوية مبنية ع الاحترام الناتج عن الخوف مو الحب
صح هوا هواي زين وياية يعني ك نسبة مثلا مصرفي كامل ممخليني محتاجة شي الدراسه الطلعة يقبل اطلع وين ماريد ميصيح علية هواي يحترمني
بس اني اخاف منه وهواي مو شوية من ينذكر اسمة تنمغص بطني

وهلشي ندمج بشخصيتي اي اعترف اني شخصية ضعيفة ومهزوزه دايماً اقبل بالقليل اليكولي كلمة اسكت مارد حته لو ممسوية شي اخاف توصل السالفة الابوية ويتعصب

فهد واخواتي من سناء يجونه مرة بالسبوع وبهاي المرة اضل احسب الدقايق والثواني حته يرحون فهد يطلع روحي ب الامر كلساع مكومني ع شي وبناتها  يجن يسمني سم بالحجي ويرحن  بعدني اكرهم ويكرهوني

اكثر من مرة اجوي عالم تقدمو الي وابوي كلهم بيان تدرس مانزوجها هسه بس عندي البنات الكبار متخرجات وكالو لا نريد بيان

طلعن سالفة علية ماردونا احنا ورداوها هية لان عندها علاقات مثل امها
و  الي اجة خطبها صاحبها كال الا هية

وطشت السالفة بين نسوان الكرايب وكالعادة ماحجيت اكتفيت بحسبي الله ونعم الوكيل

امل الجانت تصبرني عليهن وتكلي درسي طلعي معدل عالي حته تاخذين شهادة زينة
حته العالم التجي تتقدملج كامله مكمله شهادة وجمال ومن الحجي تقشمرني
اني جان  اخر همي الزواج والشهادة وهم لو ما ابوية جان من زمان عفت المدرسة وما ازوج لو اموت
ماادري شريد اكره المدرسة والدراسة
و كارهه شي اسمة زواج وارتباط

وهلشي هم بسبب امي وابوية لهساهم  منضرهم ميروح من راسي مشاكلهم عركهم الضرب حته علاقة الفراش من اذكرهم تلعب نفسي من الزواج كولة

اما بالنسبة الامي امي طبعها غريب وياية حيييييييل حييييييييييل دايماً تكسرني وتحطمني مراهقة جنت والمراهق اغلب الاحيان يتحسس من كلام اهله وخاصة الام والاب يصدك كلامها انجان مدح او ذم

ع طول تصيحلي الفاهية الثولة تعاي تفلي بوجهي اذا صار براسج خير لا دراسة ولا زواج محد رح ياخذج تنامين ع كلبي بنات سناء
احسن منج   الله بلاني بيكم انتي واخوج الله يخلصني منكم

اكثر من مرة امل تعاركها من تسمعها تكولي هيج وتجي تطبطب علية وتكولي ميخالف تغار منج لان كبرتي

اني اصدك كل كلام امل التكولة الا هاي الكلمة مستحيل ام تغار من بتها الجابتها من لحمها ودمها مستحيل
ف جنت اسكت ما احجي

صارت امتحانات نهايه السنة حبست روحي بالغرفة ونطونه عطلة قبل الامتحانات
متوترة حيل دخلت للحمام شفت محمد ستوة مزين لحيته وعايف المكينه الجوليت ع المغسلة
صفنت هيج
لزمتها وزينت حواجبي صفر

طبعاً بيومها شكلي صار مضحكة ومن يجي يمي يغص من الضحك بس جنت ماهتم

ماخايفة ارسب  لو اعيد بكد ماخايفة من ابوي يعصب اذا عرف بية ما ااقرة
وفعلا جنت ماقرة نهار كلة دايحة بس يطلع ابويه واخواني اروح على امل واخليها تاخذني للسوك
وجانت خطيه ما ترفضلي طلب
نصعد واز ماعرف هسه شيسموها بس سيارة صغيرة توصلنا 
صبح وعصر اني بالسوك اسخت

زينت حواجبي حته ماطلع
كعدت بالغرفة وبديت اقرة اقرة يصعدلي امير مرات يقريني

ابوي صرت ما انزلة من يجي من الشغل هو اصلا صعدلي مرة ومرتين ويشجعني عفية بالدكتورة عفية رح ترفع راسي شهادتج
شهادتج سلاحج متحتاجين لشي بعد غير رب العالمين هاي تسندج اذا يوم متت لو صار علية شي

ابتسم بوجه وادنك استحي اجاوبة وكلامة جان يوترني بالزايد لو ميصعدلي احسن

قرب موعد الامتحانات واني منعزلة بغير عالم حته بالبيت كمت ما انزل واشتغل

بديت امتحن وعصابي دوم مشدودة وستريس موطبيعي

قبل اليوم الاخير جنت راجعة للبيت شخطت علية سيارة اجت تدعمني ملتهيه اراجع ب الاوراق واقرة وشارع عام عبرته وصار الحادث الحمدالله ما تأذيت بس طشرت غراضي وكعت فوك هذا كوله الولد نزل يصيح علية شبيج عمية غير تباوعين

مجاوبتة شي بقيت مدنكة والم ب اورقي
رجع يحجي وياي بهدوء خوما تأذيتي اخذج للمستشفى
كتلة لا مابيه شي
اوصلج صعدي
ماحاجيته مرتبكة والم بالغراض اجانة جيرانه يصير وصديق ابوية من بعيد يركض نوب اريد اتحرك مااكدر من الخوفة كلت هسه يكولون عليه واكفة واحجي ويه ولد بنص الشارع ويكولون الابوية

بس خطية اجة الرجال يدور بوجهي عمو بطة خوما تأذيتي شو اشوفج كتله لا مابيه شي واريد بس اوصل البيت
طبك السيارة من بعيد وسام ويا اكرم واجوني يركضون شكو شصار منو هذا
ماحجيت انخلست
عفتهم ورحت للبيت سريع وهمة راحولة

دخلت اركض الامل فدوة روحي شوفي شصار
كالت ولج اهدي شصار
بعدني احجي وطب وسام صاح الثولة لحد وين ضلين هيج فاهيه ادري انتي الدعمتي لو هو شكو شاردة وليش تخلي يصيح عليج انزع الحذاء ودك ع راسة واتفل بنص وجه

امل ونضال لازماتة يهدن بيه وما يسكت لحد ما ابوية عاط بيه كلة شهل للخبال العندك
فلشت الولد تفلش انت واخوك

شكل للعالم هسه بية حيل مشاكل وفصول مو هاي اختك كلشي مابيه
ختلت بغرفة امل واسمع صياحهم واحس راسي رح ينفجر من التعب والتفكير بالنتيجة نوب صارت هاي المشكله
للعصر ابوية اخذ عالم وراح ع اهل الولد واعتذر منهم طلعو هنا جدد نازلين بشارعنة وفضت السالفة الحمدالله

اخر يوم ابوية مراح للشغل هو وصلني وانتضرني امتحن واطلع
طبعا ابوية مخلص سادس ابتدائي انجبر من هو صغير علمود العيشة والمدرسة ضالة بنفسة
الحمدالله اشتغل وفتح محل والمحل صار محلات صار تاجر معروف بالعلوة بس لهسة يدور بكتبنا ويقرة ويانه وخطة يخبل وتوقيعة ويقرة كتب دينيه وثقافية هواي عندة مكتبة شكبرها
...
رجعنا والطريق كلة هو لازم ورقة الاسئلة ويراجعلي هنا شكتبتي هنا شسويتي واجاوبة وهو اصلا ميعرف بالمنهج ولا بدراستي حدة سادس ابتدائي واني هسه سادس اعدادي
وصلنا للبيت وتغدينا
وكلمن صعد لغرفتة ..

صارت العطلة وممرتاحة القلق ‏والتفكيربالنتيجة  موتني لا انام اعدل لا اكل عدل حواجبي طلعن وجهي صار خبصة
ومالي خلك روحي امي وابوية كثرت مشاكلهم وبسبب التلفون ابد ما نسئل وندخل لا اني ولا الولد تعبنا حيل منهم

اجة يوم النتائج بيومها صخنت وفلاونزة موتتني وكالو يذيعوهن بفلان ساعة  وائجلوهن  انهاريت حيل ب الف يالله عديت اليوم هذا
وهم كالو يذيعوهن بفلان ساعة 
والقلقني اكثر اخواني وابوية
وسام لازم الحاسبة وكاعد وداير ميدورة الولد وابويه كاعد من ذيج الصفحة ومنتضر يسبح بسبحته

كالو نزلت بس كاعدة كبالهم مثل الصنم  وساكته ايديه ترجف توتر مو طبيعي
كعدو يدورن بالاسماء
اكرم يكلة هذا اسمها هذا هذا
وسام هههههه عاط بيه حيل لحضة مو هية اصبر ورجعو يدورون
اخر شي صاح بعلو صوتة ‏كمزنا كلنا
وبالعادة هيج عيطة  ما أسمعها بس من يفوز المنتخب
كفوووووووووو كفوووووووو دكتورة والقران دكتورة دكتورة

كامو يهوسون وهذا اليضربني وهذا اليكرصني وهذا اليشبكني ويبوسني
اني بس مصكوكة واباوع عليهم  ما استوعب الديصير 
صاحني ابوية اول مرة اشوف الفرحة والدمعة بعيونه متعلمة بس شكلة القاسي وملامحة الجدية
شبكني كلي عفية بنيتي الله مضيعلج تعب بست ايدة
امل تهلهل وتضحك اجت نضال شبكتني وهم تضحك كالت الفاهيه رح صير دكتورة

كعدو يتناقشون كلهم ع معدلي ٩٤ يدخلها طب اسنان والخ يكلة صيدلة
‏وأنا مثل لعبد المسموط  بس انفذ
ابوي وياهم لحد ما قرر ابوية كال صيدلة احسن حته لو جامعة اهليه اخليها داوم
سكتت  واباوع عليهم وفعلاً مقتنعة شيقررون اني وياهم هذا طبعي بعد

ثاني يوم بابا عزم عمامي وكريبنا سوة عشة ثواب لوجه لله طبعاً سمعتلي شكم حجاية مسمومة بس ما هتميت غلست

عطلنا شكم شهر نوب اجة موعد التقديم وقدملي اكرم

جامعة بغداد

رحت ثاني يوم وية امل للسوك شتريت ملابس للدوام وثالث يوم والبعدة والبعدة سوتلي صارت بالملابس والمشترة 

اخذتني  للصالون رتبت حواجبي وحفيت كصيت اطراف شعري وساويتة
شعري من الثاني ابتدائي كصيته ومن بعدها المكص مطخة ابد وهو يطول بسرعة وامل نهار كلة سويلي خلطات واعشاب وحنه وهيه تمشطنني وهيه تغسلة
لهسة مو محجبة بس مستحيل ابقي شعري مفتوح ميقبلون لو اضفرة لو ارفعة كعكة

طولي ١٦٥ وزني ٦٣ بشرتي حنطية ع كولة امل خمرية هههههه ما اشوف نفسي حلوة لحد الغرور
لا يعني شكلي مقبول الحمدالله بس امل مكبرة راسي وما ادري كل الامهات  هيج لو بس هية كلما اكعد الصبح تكولي يمة فدوة لهل الصباح وعد علية ما انطيج وازوجج اذا مو سيد وشيخ وتاجر وجبير اخوتة ودكتور ذني كلهن بيه يلا اوافق ويجيبيلي سلة ذهب وسلة فضة يلاا عود افكر
اكولها ها يمة شكو منو اني زوها حديد
تكوم تضحك
دايماً تخليني احب نفسي دايما 
ماتقبل اغسل اماعين خاف اضافري تتكسر ولا انضف السطح خاف اسومر من الشمس بحيث  تغافلني وتصعد هيه شر الملابس ب ثنتين الضهر حته ما اسومر المكان البيه تراب ما تخليني انضفة خاف شعري ينتلف

مادري شوصفها وشكول ‏ما ادري الله مخلي حنية الكون كلة  بيها مو بس وياي وية الولد هم ماترفض طلب اذا واحد مشتهي دولمة بنص ليل تكعد تسويلة ماعندها مانع

بعدهي ع حجايتها المشهورة عنج يعيني اني اسوي كعدي يعيني نامي روحي تفرجي ع التلفزيون
احبها حيل واحب أديها نهار كلة ابوس بيهن
أديها سمينات وبيهن تجاعيد ومحنيتهن تحب الحنه
اتبارك بوجودها  هواي اذا احد غانثتي بكلمة لو مقهورة من شي اروح انام بفراشها لو ع مصلايتها جانت نهار كلة ممدودة أسكن وأطمن

مادري بس من خلصت السادس احس تغيرت نوعاً ما

احب عائلتي هواي خاصة خواني ما اتخيل حياتي بدون لمتهم وشقاهم وعركهم ونكرتهم من شفت الفرحة بعيون ابوي واخواني بشهادتي وشون جانو متحمسين حسيت بقيمة الشهادة 
‏أحب الوقت وياهم احسة غالي

حتة مشاعري تجاه ابوية  بدت تتغير شوية شوية  حسيت صرت احبة واخاف افقد وجودة بحياتي صار عقلي يطلع مبررات واعذار  لكل التصرفات الجان يسوها والعصبية عرفت شنو يعني علاقة زوجية وشون لازم صير بحب من الطرفين والاسف امي ماعندها هذا الحب بس ابوية عندة ويحبها حيل حسيت بيه يحبها من شافها تبجي ع اختها وعلى وسام لان رح يبقة وحدة جابة وخلاه يمه وغير اسمة حته يصيرلة ورث حاله حال اخوانه وميبقة وحيد بس علمود يرضيها
بعد سناء عنة وميروحلها غير بالاسبوع مرة لان تغار وتضوج منها

ع طول امي تلفونها احدث تلفون ملابسها احسن ملابس جيزدانها مينسد نهار كلة متروس فلوس عندها صندوق مرة شفتة بكنتورها بيه ذهب اذا اكول ب ١٠٠ مليون قليل متروس ترس جان كلما يعاركها ما يرضيها هيج اذا مو بقطعة ذهب
بس الاسف جانت دوم تندب عيشتها وحضها وقسمتها دايماً تشكي منه للنسوان ولصديقتها دايماً سمي امل الخانسة وتعبي براس ولدي تكول

وهو صحيح  محمد كام يكرها وابد ماعندة تعامل وياها هيج من بعيد لبعيد حته ميسلم عليها ولا يحجي وياها وهذا الشي بسبها هيه دايماً تدعي علينا وكلما يروح محمد تكله انشاء الله تطلع مترجع
الا اني لو شسوي بيه ارجعلها الف مرة تطردني من الغرفة وارجعلها اشكال واللوان الحجي السام واسكت واعبر اكول مو من كل كلبها احس مشاعري وحبي الها فطري من الله خلق بيه هذا الحب الها مستحيل اكرها يجوز ازعل اضوج اي بس ما اكرها

عكس امل الي تصرفتها وحنيتها وعفويتها هيه خلتنا نحبها واذا نجي للواقع اني احب امل اكثر من امي
امل ابد ماعلمتني ع الحقد والكره  بالعكس تعلمت من الهدوء المسالمة اعدي وما اسوي مشاكل بالتي هيه احسن

.....

ليث : خايب تعبت وكلام الله هاي مو وضعية
وسام : يمعود طول بالك انت خبل شبيك وين مولي وين تندل وشمدريك السالفة امان
وسام اني كتلك تجي وياي هلابيك متجي لا تعرقلني
يول انت مو صاحي والله ع الاقل تخرج ما بقتلك بس سنة
ماريد اني يادوب دبرت هلمبغ اذا ما طلعت سلام اخوي يرجع ياخذة
زين تطلع بدون ما تكول لاهلك
اي بدون ما كلهم
وهاي كلة علمودها امداك مرة هيج تسحلك سحل وتخليك حته اهلك ما تفكر بيهم
خاب نجب لخاطر ربك همة ذول هم حاسبهم ع الاهل دمرت حياتي بسببهم شراح اثر عليهم اذا درست التخصص الاريدة  اذا خذت الاحبها وتحبني شراح يأثر

يأثر هواي همة افهم منك بمصلحتك

انطم بلا واكرمنا بسكوتك روحي جزعانه ذول لا خايفين علية ولا مصلحتي اهم شي حجي الكرايب وصورتهم والله شنو السادة ماتاخذ غربة الا منهم وبيهم

فكر مرة ثانية

لك انت الفكر والله هاي فرصة من العمر هو شبي العراق يمعود هسه انت مرتاح ع اساس

اي مرتاح خير من الله

اي طبعاً ابوك تجار وعندك ورثين ههههههههههه

هههههههه حطيت عينك الفكر

لك بروح امك فكر بالسالفة هسه انت شخسران ماعجبك الوضع نرجع شهر شهرين ونرجع

مادري مستحيل ماسويها

ليث :
بعدنة نحجي واكفين بالباب واجت مرية وياها بنية من بعيد هاي الكال عليها محمد اختي تمشي ورة امها وشايله علاكات وهم تباوع  بكل عين صلفة اجت عيني بعينها دنكت بسرعة
من عاب هلشوفة اي والله شهل الخفة نوب حته فشلت من وسام خزرها وسام حيل يلا دنكت

طبن جوة
هم ردت اروح وجلب بيه وسام الا تبقة تبات بس  ماقبلت كتله غير مرة حس هو بس محجة شي

شغلت السيارة وطلعت

بيان :
جان يوم جمعة وبابا مرايح للشغل ساعة ١١ هيج كلنا نايمين بس امل وبابا وسام يكعدون من الصبح

توني كعدت سبحت ونزلت داسوي ريوك حطيت الطاوة ع النار
طبت سنا وبتها نور
كالت صباح الخير بطوط
كتلها صباح الخير ماما
حجت نور ها الفاهية توج كعدتي
صاحت عليها امي من فوك صبحنا لا هلا
ردت عليها سنا
عاط  بابا وتاااااااااااااااالي حتة بيوم الجمعة منرررررتاح
شوية وطب وسام مثل الرعيدة اليوووووووم هاي الكلبة اشرب من دمها الساقطة اذا مربيتج فلا اسمى
واجة ع نور يركض كلنا صرنا  كدامه
صاح علية بابا شبيك دبسززز شهل الحجي
كلة يابة مرتين تفشلني كدام صاحبي الف مرة حذرتها كتلها من شوفين ولد واكف يمي لا شيلين راسج وتتمضحكين طبي بسرعة
هجم عليها بابا كلها اي ملاحضها اكثر من مرة حذرتها حته واني امشي وياها خفيفة تتنمضحك وتتغمز

فهد دخل بجنطتة وملابسة العسكرية

جان صاح بعلو
هييييي هيييييي شكو انت شبيك حاط كورك وكور خواتي ترة اخفيك والله
وسام ضخم وطويل تقريبا طولة ١٨٠ هيج كلة شو تعال تخفي منو
ذاك كام يسب بيه وبخالتي الميتة وهذا فقد
لزمة سكطة سكط كوة فكوه منه
كام فهد ويسحل بروحة وبعدة يغلط
صاح عليه ابوية يريد يفارغهم جان يتقدم بتجاه ابوي ودفعه دفعه وكعة بالكاع
كلة والله يا ابو اكرم اذا ماشلتك انت وابن الكحبة هذا التتفاخر بيه وحطيته بسمك فلا اسمة فهد
ابوي وكع وكلنا عطنا من الوكعة
وذول الباقين طفرو من فراشتهم جانو نايمن بالهول والتمو على فهد كسرو تكسر اجوي الجيران كوة فاككوهم

صارت المشكلة جبيرة والعالم كلها التمت للعصر جوي عمامي كلهم
عمي الوسطاني لواء ولد عمامي الباقين هم كلهم ضباط واعلى رتبة من فهد اصلا فهد مصارة سنه من تخرج وصار ضابط
كلهم التمو وحجو وكالو فهد اذا ما ائدبنا فلا نسمة
نوب للعصر جابو واعتذر من ابوية بس ابوي ما حجة ويا ابد كلهم ماريدة وبقة يتوسل ويبجي وكلة اني غلطت طبعاً ما ميت ع ابويه خاف من عمامي وخاف تنشال رتبتة

بس من طلعو العالم عمامي حقراء من يوم يومهم
كام يحجون ع بابا يكلولة هذا بزرك منك وبيك تفضل الغريب عليه وطمعتة بفلوسك و ورثك
وسام جان يوصل جيرانة طب فجأة وسمعهم وصارن عيونه بكصتة تخبل كال من باجر اروح اوكل محامي وتنازل عن كلشي ابوي حطة بسمي
واني ماضال رح اسافر
كلنا نصدمنا بالخبر رجعو عمامي بدلو يقنعوويسكتو ومو قصدنا ومدري ايش
ابد خبل بعد قفل طلعو العالم صعد لغرفتة
صعدلة ابوي وراه توسل بيه راد ما قبل
ثاني يوم  كعد الصبح وروح اخذ اوراقك وراح تنازل عن كلشي
وراح جدد جوازة 
ماضل واحد بالكون ماحجة ويا وقنعة

فزيت مرة بالخمسة الصبح لكيته كاعد بالحديقة هو ابوي وثنينهم يبجون

ابوي يعاتبة
وهو يكلة
والله يابة اني احبك واحسبك حسبة وابوي واكثر ومن رحت تنازلت حته بس اسد حلكهم ادري هاي السالفة من زمان يحجون بيها وكل مرة انهضم واسكت لخاطرك

ولك وسام وتعوفني ولك انت ايدي اليمنة واليسرة ولك معتمد عليك ماكدر اسوي شي بدونك

يا ابوي والله شهر شهرين ما عجبتني العيشة ارجع

لا ما اخليك مستحيل

فدوة اروحلك اقبل اني هم تعبت من كلشي ومن فهد اريد ارتاح من المشاكل
ولك مو بكيفة ياكل خرا فهد ولك مو حته اكرم وامير ما رضو وكفو وياك

يابه همة واكفين وياي من يوم يومهم اخوتي وسندي وحزام ضهري بس اني تعبت اريد اغير حياتي شوية

اباوع عليهم ضل يحجي ويا لحد ما قنعة وابوي وافق

احس نار وشتعلت بكلبي مسسسسستحيل اتخيل هلشي وسام يسافر يعوفنا شلون اكعد الصبح بدون ما اشوف وجه واسمع شقاه وضحكة ونكرته
اسولف وية منو احجي وية منو هو الوحيد الي اجي احجي ويا بدون قيود
هو من جنه صغار احسب يوم يوم للعطلة حته يجي يمنا مو نوب من عاش ويانة وكبرنا سوة
صارلي اخ وصديق وسند وجنت اتحامة بيه حته لو انضرب من فهد ما انوجع الان ادري رح يجي من المدرسة  وياخذ حقي منه اضعاف

مشت الايام وسام طلع جواز وكمل اورقة بيتنا صار كئيب امل تبجي بصفحة نضال بصفحة ابوي اول مرة اشوفة هيج مكسور بيتنا ضلم كلنا متعلمين عليه
بس رضو وقبلو يسافر الا اني الوحيدة الي متقبلت فكرة السفر كلما يجي يريد يحجي وياي اشرد منه

يتبع ..