قاع الشياطين

البارت الثالث والعشرون

...............☆البارت الثالث والعشرون  ☆...............

#قاع_الشياطين(البصر والبصيره)

#بقلم_أسماء_ديمير

سكت وماحجيت بعد ، دخلنه لغرفه من الغرف ، ريحه البيت كله معقم ، ذب تيشيرته و جرني وياه كوه ، هومدد ونام مانطق شي احسه يغلس ،

اني خليت راسي على المخده طاير النوم من عيوني ، ضليت انافخ ،  خله جف ايده على راسي بهدوء ،  و همس بتعب ، بطلي تفكييير نامي اهجعي يابياض كلبي ..

مارديت عليه ،  اصواتهم همه بره خفت …

كانو نامو كلها تعبانه ، هو ثكل من صوت نفسه حسيت عليه ، كمت لحيلي ونداريت عليه ،تقدمت عليه خليت راسي على صدره ، وجهي لامس شعر صدره ، مديت جف ايدي حظنته حيل ،  خايفه عليه موت والله ..

احبه بشكل ، واعرف هو داخل بشي مو زين  ، اني مو غبيه بس عيبي ماادخل ولا اسال بشغله اخاف ..

مادام ما قبل يشتكي و يدخل الشرطه بالموضوع معناها سالفه راح تجر ، و السالفه بيها سلاح ورمي معناها وخطره لو ماستر الله احنه اليوم جان واحد بينه مات ..

شتسوه الي لو اجت طلقه بتالا لو بنانه لو بواحد احبه ، لزمت كلبي استودعك اهلي ياارب  ..

امدد على ظهره وحاظن خصري و نايم ، بعدت ايده عني ، بسته من حنجه .. و تسحبت من يمه ..

ماعرف بيش الساعه بس الدنيا ليل ، اعتقد وره ال١٢ لا صوت ماكوو سنطه كلش ..

كمت لحيلي ، حافيه نوب ماعندي حتى نعال شلون وضع ، فتحت الباب وطلعت ..

حتى عصاتي ما وياي ، مشيت عليك يالله ..

بس بحذر لا اوكع ، الغرفه بالطابق الارضي همزين ماكو درج ، اتذكر خطوات اني بس مامتاكده ..

حسيت بخطوات وراي .  التفتت بسرعه ..

اجاني صوت :- متيهه شنو ؟؟!

سكتت درت وجهي اكمل دربي لوين مادري ..

-خبله انتي تفترين بال١ باليل امشي نامي بحظن رجلج ..حجاها مستهزء .. 

-ماتروح لمرتك وابنك انته ، شعندك اهنا …

-تطرديني ؟!  صوت خطواته تقربت .. درت وجهي عليه ، حجيت :- ورطت بيبر وياك ليش ، 

-هو مو صغير واورطه …

سكتت ثواني ، حجه ليش مانكول رجلج ورطني ..

-انته الي حرضته على ثروت ترى اسمعه من يحجي وياك ، عواد وياه الحق من كال عليك منافق ..

-ضحك ، عواد كتيلي ، عواد ابو كبسله لو ابو الملاهي لو الي القتل عنده مثل شرب الماي ابو الحق ياهو منهم …

بلعت ريك  ، سندت نفسي على الحايط .. صوت اقدامه تقربت لزكت نفسي بالحايط خايفه ، وكف مقابيلي ،

-تشوفيني شيطان موو ، مقارنتا برجلج ، اني ملاك ، انتي طامسه بقاع للشياطين ..

سكتت دمعت ، ضحك :- رجلج هو الورطني وجرني لهل درب تدرين بي خريج سجون لو لاا ترى انحكم عشر سنوات بس الفضل الي ، تخفف الحكم و صار خمس سنوات بس ..

لزمت كصتي افرك بيها ، وترني ..

-شجابج شوداج متكليلي مو كتلج اطلعي مناا هااا ، 

ماحجيت خرسيت ، حسيت على خصله من شعري انجرت ، جمدت بمكاني ، ماتحركت ، لا حتى هو تحرك ولاصدر منه حرف ..

ثواني وانحلت الخصله ، رفعت ايدي لزمتها رجعت شعري ليوره ،  عافني ومشه صوت حذاءه اختفه ، كعدت بالارض دايخه حيل ..

ضليت بمكاني لحد ماسمعت صوت امير يبجي كمت لحيلي ارجع للغرفه ، دخلت ورجعت تمددت بفراشي ، احس الصدمات الي اكلتها زايده عليه بعد ماتحملها …

جافاني النوم للفجر ، على كد البجي حتى نفسي ضاك كعدت اكح ، عيوني نار شلون الجمر بيها ..

صار يومين الالم مستمر مديتوقف ، اسمع اصواتهم كعدو ، شوي و كعد بيبر يحوص ، غمضت عيوني بسرعه ، 

دار وجه عليه لزم خدودي ، حجه كاعده مو ..

ماحجيت ..

-وجهج احمر من البجي ليش هيج ..

-رفعت اديه على وجهي بجيت مقهوره ..

-اندار عليه وحظني شبيج ، 

-جنت مسجون مو ..

-سكت ، عواد كال لو عدي لو منو .

-مو مهم المهم جنت لو لا ليش اجذب علي ..

-ماجذبت بس الماضي مالج شغل بي ، خما تحاسبيني على شغله صارت قبل لا اتعرف عليج هالشي مو منطقي ولا منصف مو من حقج ..

-ليش انسجنت ..

جر نفس ساكت ، 

-احجي ..

-قضيه قتل ..

-شنوو ..

كعدت لحيلي ، شنو يعني .. سكت مديت ادي جريته بيبر شنوو ، 

كام لحيله ، جرني عليه ، دفعته احجي لاسوي هيج ماسكت والله ، جرني حيل وحظني هو كاعد ..

- صار على سالفه اكثر من عشر سنوات و اندفنت القصه ، انتي مالج حق تعرفيها ميرال ..

نكتت بيده : وخر عني وحق الله مداعرفك ، صح مالي شغل ومالي حق احاسبك بس الي حق اعرف شو داحس نفسي اطرش بين.. قاطعني كتلنه عمي اخو ابوي لا اعتده على اختي ..

سكتت اني ، فكيت عيوني هااا ..

جر نفس كوه ، كح ..سكت ثواني ، كتلناه ، اختي من انتحرت يله عرفنه هو معتدي عليها جنه نطلع الصبح ونرجع باليل من الشغل ، ماندري بالدنيا وره ما ماتت حوراء ، بنت عمي يله حجت وكالت شنو علتها  ..

اخذ ثواني سكت بيهم كانو يسترجع الماضي ، مديت ايدي تلمسته حبيبي ..

دفعني عنه ، دار ظهره عليه ، كعدت ماتحركت ، همس مكمل كلامه ، بوكتها قراها عواد ، اخذ سجين وركض عليه يكتله ، بس كتله مايشفي الغليل ، ضيع اعمارنه و ضيع حياتنه و دمر اختي وبعلم امي وسكتت ..

حجاها بحه وجع :- حتى عمامي يعرفون بس محد حجه ، بحجه نخاف منه عنده سلاح ويشرب كبسله لايكتل واحد بينه تجفو شره ، 

مديت ايدي عليه لزمت جف ايده جرها مني اديه ترجف ، نبره صوته تغيرت للقساوه :-  بس احنه ماتجفيه شره احنه صرنه اشر منه ..

كتلناه ماخجل اكولها ، كتلناه وحركناه هو والبيت سوه ، نفس ماحرك روح اختي حركناه هو هم ، دموعي نزلت ، 

كمل كلامه ، اني انحكمت عشر سنوات و عواد خمسه ، بس عدي سوالي طعن وكدرت انحكم بس خمس سنوات ، جر نفس كوه  كام لحيله من الفراش و ابتعد عني  ..

هذا الحجي تطمري هنا ميرال ، عواد ممنوع تعيدي عليه ، والماضي مالتي مالج حق تحاسبيني عليه ، 

ضليت ساكته ابجي ، فاكه حلكي مصدومه ، عافني وطلع من الغرفه ..

ماطلعت ضليت حابسه نفسي ، كمت شوي غسلت بماي بارد عيوني جمر عبالك ..

اجت نانه شافتني كالت شبيهم عيونج داعيات جبده مال دم شبيهم مضروبه عليهم ..

-رديت لا بس راسي موتني اخذيني لدكتوري القديم عفيه ..

-حجت داكول لبيبر وشوفي يرضه لا بهل وضع ..

-هو وينه ..

-طلع اخذ عدي ومشو ضل بس ستار هنا ..

-خابري نانه كليله ميرال عيونها توجعها داخذها لطبيب ..

راحت دكت عليه ، كاللها مو هسه العصر خلي الولد ينقلون جزء من غراضنه لهنا ويله …

تذكرت اني حتى ماعندي ملابس ، من البارحه بهذني ، اجه ابو زياد و ستار نقلو غراضنه ، راحت و سن ونانه هم لملمن بجنط ملابسنه واجن …

نقلوهن بالقارب ، فله الي جنه ساكنين بيها طلعت مقابيل هاي فله ، بس هاي اجار مو مثل ذيج ملك ..

وهاي اصغر لا اسطبل لا ملحق لا بستان مجرد بيت جبير وحديقه مطله على النهر …

التهو هم يرتبون بالغراض ، و بيبر للعصر مابين ، مشيت غسلت ولبست كتلها نانه خلي نروح ترى اذا اجه اليل ماكدر انام البارحه ما غمضت عيوني من الالم . .

دكيت على بيبر كتله بزعل حولي للدكتور ، ضحك بهدوء  ، اسم الله ، انتظريني اني اخذج لا ترحين ..

رديت حاخذ نانه واروح ..

-ميرال كبري عقلج ..

-راسي ديوجعني ماكدر انتظر ، 

-على راحتج بس اخذو ستار و ام زياد ويله تطلعون ..

سديته منه وصحت لنانه كتلها ، اخذنه ستار و دلته نانه على عياده دكتوري الاول جنت اراجع عليه بوقت امي وابويا ..

نانه حجت ويه سكرتيره كالت الها يجي دكتور عود حاجي ماكدر اضرب سره اعذريني ، كعدنه ننتظر بس اجه دكتور ركضت عليه نانه حاجته وتعرفه علينه وتذكره بيه ..

استقبلنه خطيه ، حجيت اله عن عمليه سويتها باربيل ، اخذني على جهاز يفحص حجه ممتاز تدرين لو لاا ، 

سويلي هاي الفحوصات بالله ميرال داتاكد من حالتج زين ، 

مريت اسويهن ، كملتهن بساعه ونص ورجعت عليه ضلت نانه تنتظر نتيجه يم ابو فحوصات، مشيت كعدت يمه اني ، بين مايكملن ..

طلعت المراجعه حجيت اني دكتور …

-حجه كولي بنتي ..

-بلعت ريك متوتره ابتسمت خاف تضحك عليه اذا حجيت ..

-ضحك لا عفوا كولي ..

-تصدك اذا كتلك شفت صح مو واضح بس والله شفت ، 

-سكت ثواني حجه شنو شفتي …

-ماعرف ، بس شفت الوان شفت خيال ، حتى هيئه بشر شفت يعني شلون اكلك سكتت ثواني احاول اعبر زين ، كلت هسه يكول تخبلت ..

-حجه هو من يمه:  تشوفين على مدى متر موو او متر ونص بس ، ابعد من هيج مجرد لون بلا ملامح ..

-هزت راسي اي والله بالضبط شفت ايدي دكتور ، بس ماجانت واضحه ومره شفت شخص كاعد مقابيلي قريب شفت واضح ..

-سكت ، رد صار شكد ..

-تقريبا سبوع ..

-قبلها ماحسيتي بشي .

-جنت اتحسس من الضوه و جنت احس بالشمس اكو لون غامق هيج شي ..

-اذا كلامج هذا صح تعرفين شنو ..

-شنو يعني ..

-معناها انتي عندي شي اسمه العمى المؤقت او الرؤيه الموقته ، يعني لا تعمين ولا تشوفين ، على حسب برمجيه عقلج ودماغج هو يحدد شوكت توضح عندج رؤيه او لا ..

-يعني ماكو تدخل حراجي يصلح الموضوع كتلك شفت والله ..

-بنتي ميرال اني من الاول كاطع الامل منج ، بس بعد عمليه الي اجريتيها باربيل ، ونتائج جانت ممتازه ومبين ممتازه و مسويها جراح شاطر هذا من حسن حظج ، نزف وتلف كله راح وخلص ..

اما رؤيه فعندج اشياء ميته بعيونج منكدر نحيها ، مثلا انتي تكولين الوان ، الي عنده عمى الوان جراحيا منكدر نسويله شي الا اذا زرع عدسه احيانا متنجح ..

-سكتت ، دمعت عيوني بس عندي الم براسي فضيع دكتور مجاي اتحمله…

-الالم سببه الرؤيه الوقتيه بنتي ، مثل الي عنده قصرنظر ايضا عيونه توجعه لحد مايلبس نظاره ويله يرتاح ، سكت شوي و حجه ، كانو يحتاجلج نظاره كمل كلامه بضحك ..

-شسوي بالنظاره اذا ماشوف ..

-عيونج تحتاجها مو انتي تخفف ضغط الضوء عليها ..

-والي شفته وكلتلك عليه يعني شنو ..

-شوفيي ميرال اني راح اوصي صانع عدسات يسويلج عدسات على حسب فحوصاتج ، وعلى حسب كلامج فادتج خير على خير مافادتج ذبيها ..

الها فايده هم تخفف ضغط على عيونج و تخفف الالم ، حجيت ونظر ؟؟!

ضحك واسويها هم للستكماتزم و للقصر شتردين بعد ..

دنجت راسي احسه ياخذني على كد عقلي ، كلامه مو مقنع ، اجت نانه ونطته الفحوصات كال العدسات توصلكم انشالله لو انتو تجون تاخذوها براحتكم ..

طلعت من يمه يأست من كلشي خاف جان عندي بصيص امل ، هاي اغلب دكاتره هيج الي بالعراق للاسف ، يحبطك بشكل مو طبيعي حتى لو انته بيك عافيه شوي يحكم عافيتك ويدمرها تطلع من يمه مريض بالزايد..

اخذت قطرات للعيون ومرطبات وطلعت ، بالله بعد ماوصل لدكتور ، بنص درب بجيت ..

لو بالخارج جان دخلوني لميت الف فحص و الدكاتره تشجعك ، و يلتم عليك فريق طبي متكامل ، وهنا حطمني يكلي شي ميت شنسويلج ..

من حياه بابا هو جان هيج ، احمد ربي بالي عندي حتى لو لمحه هم راضيه ، مسحت دموعي دكتور الجسد هي الروح نفسها ليش اقهر روحي ، 

وصلنه  ودخلت لكيت وسن تنظف هيه و ابو حمد ، وبناتها هم ، اسمع اصواتهم يغسلون و وسن تصيح جلفن بصف الباب الطين وصخ محجر عليها صار شكد..

ساري يصيح وين ارش الج غدير ارفعي ثوبج لا ينترس ماي ..

ابتسمت اني ، كعدت يمهم ورفعت رجليه من الارض و اسمعهم يصيحون و يشتغلون و تالا تصيح ساااري حيوان تعال هنا ..

-رد اجي العب صونده عليك طايحه الحظ ..

وهيه ترد بدل ما كاعد تببص على الزرور تعال شيل وياي تخم جره يالخفيف ..

-صاح لااا انتي جلدج يحج هااج غدير صونده دربي هالجلبه هاي ..

اني ضحكت راح تكب العيطه وبلش صدك عياطها وتصيح نانه موتني ساااري ناانه حمووت خنكني ..

اسامه يكللها اجيب الج نعاال تالاا اجيه الج وهيه ترد اي ولك ..

خطيه ثواني واسمع ربده مال اسامه وعيطته فزيت من مكاني يمه الله اساامه شبيك ..

تالا عاطت ولك وكع خرب وخرر ...

ساري يصيح هاا هاا ، وذاك يبجي ..

حجه عليش تركض والكاع بيها ماي هي اثول جره وهو يبجي ، التمو عليه حجيت اني شبي ..

رد ساري مابي شي كرشه شكفله والا جان تفلش حلكه بس ابو كرش طلع سلامات ..

نانه طردتهم ماخلتهم يشتغلون ، حجت جان كسترتو الي الولد غضب الله انتو ، 

سمعت صوت سياره صفت ، درت وجهي وكعدت ، دخلو بيبر و عواد يحجون ..

حجه وسن جهزي النه العشه بلا زحمه بالحديقه ..

تقرب عليه حجه حبيبي شلونها عيونج ، مد ايده على راسي يحجي ، بعدها توجعج جر راسي يشوفني انداريت عليه ..

سكتت ، كعد بصفي ، بس اخلص شغل اخذج و نسافر لاي دوله ترديها ، نجدد شهل العسل شكلتي هاا ..

درت وجهي مقهوره همست خايفه عليك ..

-كلشي مقدر ومكتوب مايصير شي غير المكتوب ..

-مخيرين ممسيرين احنه ..

-تردين يجي واحد يكشولني تعبي ميرال معناها تريدن واحد جبان يتنازل عن حقه ..

-دمعت عيوني دنجت راسي لزمت راسي ، بيبر خسرت والدي بسبب الفلوس والماده ماعندي اي استعداد اخسرك .. 

-ماراح يصير شي والله ، محسب لكلشي اني ..

ياست منه و ماكدرت عليه ، تالي سكتت ، صبو العشه بره و مشينه نتعشه ..

جانت جمعه حلوه ، بيبر بي هواي شغلات حلوه ، منها ماعنده انفه او تكبر ابد…

يعامل الكل نفس شي حتى لو يشتغلون عنده يعتبرهم منه وبي ، ابو حمد واهله كعدو ياكلون ويانه ، نانه و ساري و تالا صبينه كلنه وكعدنه ناكل ..

حجت نانه عن الدكتور ، كلت لبيبر ياريت ادز باجر ستار يجيب الي العدسات ..

-عدسات شنو ..

-ضغط على عيوني و بسبب الضغط راسي ياذيني و تحومر عليه لذلك كال الافضل تلبسين عدسات حمايه الها ..

-سهله بس دلي منين ياخذها هو يجيبها ..

-بشار شلون صار ..

-بيته حاليا زين احسن من البارحه بس يرادله سبوع ويله يوكف على طوله ..

خلصنه اكل و شالو النعمه ، ساعه ب٩ تقريبا اسمع صوت والوقت من موبايلي ، اجه عدي و جايب ذياب ، صاحله عواد يكله هذا النغ* جايب اذياب وجاي ..

-حجه كف عنه عواد بطل عاد بيها حال احنه وانته حاد اسنونك عليهم ..

رد بضجر :- راح اضيعنه ورب العزه انته  .

طلع الهم بيبر بره بالحديقه كعدو ..

اجت ديما يمي ، سالتها على عواد ..

-حجت مو راضي على الي يصير بس رجلج وعدي الهم راي ثاني ..

-اخوج شنو شغله وياهم…

-شريك ..

-شريك بشنو ..

-شريك بالشغل ..

- هو يشتغل بالداخليه شجابه على العقارات ..

ردت تلوك : تامين الامن ..

-والله ياديما شلون ماشوف انتي هم مطي مثلي مو فاهمات شي ، رجلي طلع مسجون ومادري تدرين رجلج مسجون انتي ..

اسمعها تعلج ، حجت بعدم مبالاه :-شنو يعني ..

-شنو ؟ شنو يعني صدك  تحجين ..

-ميرال منو بينه عنده ماضي نظيف كلنه اخطاء  ترى ، واذا ماعدنا تصير عندنه بالمستقبل ..

سكتت صفنت بحجايتها منو ماعنده اخطاء حتى لو ماعندك ، هم ايصير عندك ، حجيت تعرفين ليش انسجنو ..

-اي سمعت من ام زياد عمهم العار مغتصب اختهم وكاتلي وحاركين بيته هم عليه هاي شغله الوحيده سواها عواد بيها حظ مدري شعجب ..

-ليش بيبر انحكم عشره سنوات و رجلج خمسه ..

-عواد سكران و بحجه مايدري بروحه ،بس رجلج جان صاحي يعني ، سبق الاصرار وترصد ، 

-وعدي شجابه عليهم هم شارك وياهم ..

-ذياب يعرف عدي ، بس عدي تعرف عليهم بالتوقيف مو بالسجن ، من جانو على ذمه تحقيق تعرف عليهم ، 

-شدراج انتي ، 

-ذياب سوالف الي هو هم تعرف عليهم بذيج الفتره المصخمه ساعه سوده ، الي عرفناهم وصرت نصيب عواد ، 

-ضحكت عواد طلع منا تزوجج منا ..

-لا وره ماطلع بكم سنه يله تزوجني ، اتفق ويه ابويا يسعى بسالفه طعن بالمحكمه بقضيه بيبرس ، و ياخذني ويستر عليه ، 

-وعدي شجابه بالنص وكلو بالقضيه ..

-لا هم جان مسجون وياهم عليه دين ماعرف شنو مدري ضارب واحد ، وحاجي لببيرس على سالفه الطعن و ثغرات الموجوده بقضيه رجلج ومن ماشين بيها و تخفف الحكم على بيبر ، لزمو ودفعو الدين عنه وطلعو يشتغل وياهم …

-خوش انشالله كلهم راعين سجون يعني ..

-اي كلهم كواوي* يعني ..

-ضحكت ، درت وجهي ساكته ، بعدين حجيت شلونها علاقتج بعواد هسه ..

-خر* مثل قبل ماكو شي جديد ، 

-حاولي وياه لخاطر ابنج ..

-قرفت منه والله ياميرال ريحت نسوان الي بي كرهتني حتى بشكله ..

-يخونج ؟

-ضحكت يبووو من زمان هسه بلش يسويها علن ، اني هم حعيش حياتي وطز بي صدك تعرفت على واحد احجيلج عنه ..

-شلون يعني تعرفتي على واحد .. سكتت شوي اطك بعلجها ..

حجيت قرفتيني ترى بطلي لوك بهل لاستيكه ..

حجت ، مو مشتهيه الجكاير فالجئ للعلج اهود على كلبي شسوي .. سكتت .. بعدين سالتها تعرفتي على ولد شلون يعني ؟

-صاحبته يعني …

جمدت بمكاني صحت مدهوشه ، دتخوونييين عووواد ..

صمت حلكي :- عززا العزززاج داشاركج باسراري شبيج عطتي ..

-يااا دتخونين رجلج ولج عزاا ..

-وجع يارجال هذا هو وينه شو حتى حقي شرعي ماناطي الي اني هم حقي ..

-جفلت ولج ديما دتشاقين موو ..

-لا والله..

سكتت مخترعه، تقربت عليها ديما اذا تحجين صدك و الله يفرمج فرم عواد ، يموتج مو تعرفينه خبل ..

مايدري ماخذه احتياطي ، بس مراسلات ماطالعه وياه ..

عقدت حواجبي خايفه ، ديما عندج طفل يروح ضحيه بينكم ترى ..

-والله بس مراسلات وبس ، تعرفت عليه بالمول صاحب كوزمتك مال ملابس اطفال و عن طريق بيج تعرفت عليه لا طالعه ولا مقابلته بس مره شفته من شتريت منه ..

سكتت خايفه عليها ، درت وجهي اتصفن ، رجعت نداريت عليها همست ديربالج ديماا وفكري بابنج ..

-مايصير شي ولج ، ضحكت بس حلو يجنن والله لو تشوفي جنه البخت ، تحسين نور الكمر بوجهه، قابل مثل عواد تحسي قندره جبلس ..

فكيت عيوني ، رجلج ترى ..

-رجلي موكلني وحل قابل العيشه والحياه بس اله ..

جريت نفس حايره ماعرف اقنعها ، سكتت شعليه اني ، كملت كلامها توصف علاقته باين معجبه بي، مشكله هو يدري مزوجه وعادي عنده ، بس حقه مايعرف عواد لو يدري يطفر بس ماضن عنده فكره هالبغل عن عواد وخباله …

بجه ابنها و مشت تنومه ، اني مشيت للغرفه انام …

غيرت ملابسي و تمددت انام ، شوي و اجه بيبر ، حجه ها نعستي ..

رديت اي تعبانه ، حسيت عليه ذب ملابسه ، صوت الجرباينه والفراش انجر ، دفن نفسه يمي حظني حيل ..

-نعسان ..

-رد اي ومشتاقلج هم ..

ابتسمت ، مديت ايدي على وجهه اتلمسه ، دير بالك على نفسك واي شي تتخذه او تفكر بي خله بالك مرتك محتاجتك ، خليني بين عيونك بكل خطوه بيبر ..

-بدون ماتكولين ، انتي بين عيوني وبنص كلبي والله ، قدم وجهه باسني ، حظنته حيل ابادله ، جرني عليه ، غمضت عيوني احلق وياه بعالمه الخاص ..

مد ايده على فخذي يرفع ملابسي ، رفعهن دفعني و صعد فوكي ابتسمت ، دنج كرر قبلاته متناثره ..

ماعرف شكد الوقت ، وشكد مر بس تعبت حيل دفعته كافي بيبر تاذيت ..

-بس شوي .

لاا والله لاا كافي ، كاافي كلت ، دفعته من جتفه لزمت بطني كاافي تعبت والله حتى تاذيت .

نزل راسه يم راسي حسيت على كصته عركانه .. همست : شبيك ضحكت شارب شي ..

-ضحك بهدوء لاا بس مشتاقلج ..

-حظنته حيل وجريته عليه نام فوكي احس بدكات كلبه قويه و سريعه ،مد ايده جوه ظهري و حظني عليه  ..

غفيت بمكاني على وضعي من التعب ، 

غفت العيون تعبانه ، و سهرت العيون الزعلانه …

تأكد انو نامت و ثكل نومها بعد التعب و الجوله الي اخذها بيها ، سحب روحه و كام بسرعه لبس ، التفت عليها للمره الثانيه شافها غفيانه ..

مد ايده تلمس خدها برقه ابتسم ، باسها بهدوء جر الغطا غطاها زين ، توجه للكنتور ، سحب وحده من اضلاع الكنتور و انكشفت الخانه السريه ، سحب منها سلاحه ، اندار يتاكد بعدها نايمه لا ..

جر الكراب لبسه ، فوكاه سترته ، سلاح تاكد بانو مخزنه مليان ، خلاها بحزامه  وطلع بحذر ..

سد الباب وتوجه للحديقه ..

لكه عواد منتظره واكف يشرب جكاير و يتفتر متوتر ، ستار الي لابس ومحظر نفسه ..

حجه عواد متوتر تاخرت عبالي راحت عليك نومه جيت ارفس الباب وادخل اجرك شبيكزهيج هادى و اعصابك باارده انته ..

-هز راسه بيبرس ، كلشي محسوب و مخطط اله عواد لا شيل هم خويه بس توكل بالله لا تفقد اعصابك باخر لحظات ..

-بيبرس راح تفتح علينه جبه خوويه احنه مو كدهم ..

-انسحب عواد اذا مو كدها ، اي واحد ماعنده ثقه بيه ينسحب من هسه ، بس ليش تكولون ربح يتقسم على بس الي الشارك ، الي ماخله ايده ماله اي شي ..

سكت عواد ودار وجه عصبي ، دانيال كاعد بالسياره  وفاتح الباب ماد رجله ، شايل قوطيه بيره بيده يباوع عليهم .

صفت سياره نزل منها عدي ، نزل وتقرب عليهم ، حجه هاا نتوكل ..

-جبت الغراض ..

-بالصندوك ، هنه و صناديك و جنط …

حجه بيبرس ، توكلنه ،  توجهت ثلاث سيارات منهم ، للمكان المقصود ، اذياب جان منتظرهم و يتفرج من بعيد ماشارك دوره جان يجي اخر شي ، مجرد اجراء روتيني حتى يكتب التقرير ويمشي و تنسي السالفه ..

وصلو للمكان ، نزل بيبرس و عدي اول الناس ، وكفو قريب السياره ، ستار مشه قبلهم يشوف الشارع نظيف لو ماخذين احتياطهم الجماعه ..

-اشر الهم تمام ..

اتجهو للسياره من جه الخلف ، فتحو الصندوك السياره و طلعو منه علب البانزين و السلاح ، 

التفت بيبرس على عواد الواكف وجه احمر ، ويبالع بريكه ، توتر واضح على اخو ..

مو خوف بس ذكريات رجعت اله ، عرف الاضطراب راح يلش باخو ، دار وجه ينتفس متوتر ..  

تقرب علي اخو ولزمه من جتفه هزه حيل ، حجه بيبر بهدوء لاخو ، ندخل نخلص ، انته هنا نتنظرنا ، مجرد مانطلع وناشر الك بس تشغل جداحه و تشمرها بس ماريد منك شي ..

باوع بعيون اخو ، مركز عوواد ويااي سمعت من نطلع تشغل الجداحه كبل وتشمرها حتى يلتهون بالحريق و نكدر نطفر افتهمت ..

هز راسه بخوف هو عركان ، اي ااااي …

عدي عوج حلكه مو راضي ، مشه قبل بيبرس و شال علبه بانزين و فتحه بلش يشمر بيها من بدايه شارع لحد المكان المقصود ، اشر نجفت ...و بيبرس لحكه بسرعه ، 

سحب قسام واشر لستار يله ، 

ثواني هيه بس ، جان مكان يعم عليه صوت الطرب والغنى والموسيقى القويه ، والاضويه المشعه ، والناس تركص ..

وبطاله الشرب مسفطه ، والويتر يخدم بازبائن ، وعايشين باجواء احتفاليه صاخبه ، وبيهم سكران وبيهم المكيف ودايخ  ، وبيهم الي واكفات يستعرضن اجسادهن ويتمايلين ..

فجاءه غزتهم اصوات ، خلقت الرعب وفزع لبعض ماكانو متوقعين هالزياره مفاجئه ، الجام تطشر اثر الرصاص ، الي لاحته اصابه والي انبطح يتلافه ضرب و الرمي ، و صوت بنات ديركصن و صراخهن عله على صوت الموسيقى ..

البطاله الي جانت متسفطه بشكل هوت وانهارت مثل انهيار الثلوج ، و ترست الارض ، الفلوس الي جانو يكتوها على الي يركصن صارت مداس ..

وكانو تكول الي ينصرف بالحرام نهايته ينداس بالاحذيه ، 

دقايق محسوبه بالثواني ، خلص الوقت المخصص ، و طلعو بسرعه ، اشر بيبرس من بعيد لاخو اشمر الجداحه يله ..

عواد مابدر منه فعل غير بس وكف يفرك بكصته و يحك مايكدر ، اشر اله مره ثانيه و صاح ولك يله ..

وجه عرك و جسمه اختض خايف ، دنج يتقيئ مايكدر ، لزم صدره مايكدر يتنفس ، نزل دانيال من صدر بسرعه ،تقدم جر الجداحه من ايد عواد و شعلها و شمرها ، ثواني بس وفارت النار التهمت الوجه للمحلات و مطاعم وخلفها الملهى ..

جر عواد و دخله السياره بسرعه ، حرك سياره و شخطها ، اشر الهم طالع اني ..

لحكو بالسياره تاركين وراهم تعب واملاك غيرهم تلتهمها النار ، ثروثه قدرها مليارات راحت صارت رماد…

#يتبع ...

صفحه الفيس بوك ( كتابات اسماء ديمير )

الانستا  asmaa_demer

افطار شهي ان شاء الله يعمرررري ..