قاع الشياطين

البارت العشرون

.....................☆البارت العشرون ☆..................

#قاع_الشياطين(البصر والبصيره)

#بقلم_أسماء_ديمير

لزمت الماشه و رفعته وضربت بقوه ، وين اجت مادري بس اسمعه صاح ، و نطاني دفره برجله ، رجعت ليوره عثرت و كعت من الدرج من اول بايه لاخرها عطت حيل من اجت ظهره على حوضي ..

الضربت مال النزله الدرج اجته ترس على جتفي و الحوض و راسي ، لمن وصلت لارضيه الحولي احس الدنيا طلعت من عيوني ..

اريد اتنفس ماكوو ، اختنكت من شده الالم  ، حتى راسي ماكدر احركه بس اسمع عياط ام زياد و وسن اجن يركضت عليه يشيلني ، بس رفعني ، طلع صوتي متوجعه ،  عطت اااه يمااا لاا ..

نوب من يشيلني احس يملخن باديه غمضت عيوني اريد افقد الوعي ديخف الالم ماكوو..

من راسي لحد.طرف اصبع رجلي الم و ماكدر احرك شي ، صياحن ترس اذني ..

تكللها خابري الولد منو موجود صيحيهم ..

لحد ماختفه صوتهم بس احس يشيلون بيه ، راسي يفتر ، و الم بنص عيوني ، عرفت نزف تجدد..

نفس الحركه نفس النغزه ، نوب مو يشيلوني و يخلوني ، احس راسي راح ينخلع ويوكع بالارض ، ضليت مغمضه واشهك من الالم ..

اوعه وارجع افقد ، ووين يله حسيت ، كعدت على صوت نانه تحجي و عصبيه ..

تكله اسال خالتك شوكعها شو صغيره هيه وتوكع من الدرج لو اول مره تصعد درج بحياتها ، هذا مو حجي  والله عثرت وكعت ..

ماتوكع من هيه صغيره ما وكعت هيج وكعه ، كول واحد دافعها واكعه من اول درجه لاخرها ، عبالك مشموره ..

-بيبر  يرد ام زياد شافتها من وكعت ، تصحه و و نسالها اني هم ماقبل احد يطخها مو عاد ياذيها ..

 ماتحركت ضليت ساكته ، الالم الي براسي فضيع ، احس لون احمر بعيوني…

كانو نفس الون الي جنت اشوفه قبل ،  دمعت عيوني عرفت نزف رجع ، راح ارجع نفس المعاناه ونفس الالم الي البراس ..

ضليت بالدقايق مدده ماتحركت ، طلعو من يمي كل شوي يجي بيبر يتلمس كصتي لو يبوس وجهي ، حجه ويه الدكتور مو كلتي ساعتين وتصحه وهاي صار ثلاثه ساعات ، ليش ماتكعد ..

ردت بس يخلص تاثير البنج تصحه ، لا تنسى ضربه على راسها مؤذيه حيل والحمدلله عدت على خير ..

دك جهازه و طلع ، فتحت عيوني ونيت بالم ، دخلت الدكتوره بسرعه حجت هاا الحمدلله على سلامتج شلونج هسه شتحسين ..

-هزيت راسي عندي الم براسي ..

-ردت اي ضربه صارت اقوى على راسج تحسين بعيونج ..

-رديت لاا ..

-جرت نفس لاتخافين بس نزف بسيط صار و ايام ويخف ..

-دمعت عيوني رجع نزف موو ..

'حجت عيونج حساسه حيل ، طبيعي تااثر باقل ضربه ، بس احنه راح نتابع حالتج ..

بلعومي يوجعني كوه بلعت ريك مقهوره ، حجت ارتاحي شوي واحنه منقصر انشالله ..

سكتت ، طلعت هي ، واني ضليت اكل بروحي ، اعرف الي الجاي شنو من عذاب ، النزف ماصدكت خلصت منه ، حسبي الله عليك عواد ..

قطع تفكيري وفززني صوت الباب ، ركزت بالصوت ،

دخلت ام زياده من صوتها عرفتها حجت حمدلله على السلامه ..

رديت الله يسلمج تقربت باستني ، حجت بسرعه عثرتي موو غير ديرين بالج ياعيني ..

رديت عليها ماعثرت ابن اختج الم…. قبل لا اكمل قاطعتني ، دختي وعثرتي وكعتي ، هذا صار حبيبتي ..

انتي تعرفين رجلج عصبي ، ممكن يسبب لاخو عاهه ، اذا سمع ، تردين زوجج يضرب اخو الجبير بسبب سوء تفاهم ، لا ماترهم ..

نترت بضوجه ، حجيت سوء التفاهم سببلي نزف ، ردت وهيه ضاغطه على ايدي حيل :  النزف عندج ولا عند واحد من ولد اختي ، انتي مو اعز من ولد اختي ، افتهمتي ، ضغطت على ايدي حيل ، اذا زعلت اني منج اخلي الكل يزعل ..

حجت واذا على عواد اني راح ابعده عن البيت ، وانتي هم ابتعد من وجهه ، ماشي ، حتى البيت يعم بي الهدوء ، ماتصير بي بعد حوادث عرضيه لاسامح الله ..

رمشت بعيوني متفاجئه ، انفتحت الباب سكتت باستني من راسي ، حجت ترجف : وكف كلبي من شفتج واكعه بالارض كانو ايلاف والله ، مابيج غير العافيه ماما ..

صوت بيبر يكللها شو هنا خاله ..

ردت اطمن كلبي يرجف عليها من شفتها فاقده ، مسدت على راسي ، اسم الله عليج يعمري ، منا وجاي اني عمي اركض وراج خاف يصيبج شي شيخلصني من تانيب الظمير ..

حجت دخذ راحتك وياها ..وطلعت ، دخل بيبر لزم كصتي حجه شلونج ..

اخذت ثواني ساكته مصدومه بيها ، رمشت بعيوني بخوف ورديت .. زينه ، دنج باس عيوني بهدوء .. شواربه بززت حواجبي وخدي ..

همس ،  مابيج شي لاتخافين راح اخذج لاربيل اجيك وضعج دنطمن ..

هزيت راسي ساكته ..

-حجه منو دفعج ..

-بلعت ريك  ساكته ... همست .. منو كلك اندفعت ..

-مو صغيره حتى توكعين من الدرج قابل اول مره تصعدين ، وكعتج مفاجئه صايره لو انتي الواكعه جان على الاقل لزمتي المحجر بس جن مدفوعه غفل ماملحكه على روحج ..

خنست شوي اديه رجفت بخوف ، رديت .. جنت دايخه …

مد ايده على راسي تلمسه بهدوء ، تقرب من وجهي وجه قريب مني :- جنتي واكعه بعيد عن اخر بايه بنص متر ،  معناها مدفوعه من فوك ، 

-كررت كتلك دخت ورجعت ليوره ماكدرت اسيطر فلتت رجلي ، 

سكت ، لزم ايدي متاكده ..

دخلت نانه حجت كعدت ، هاا يمه سلامتج ..

حظنتني تبوس بيه شبيج ياايمه شجاج …

-دخت وكعت وخلص يمعودين ليش اسوها قصه ، سكتو اثنينهم ، من شافوني نترت ..

حجه خلص على راحتج ، سكتت ، درت وجهي ، مد اصابعه تلمس وجهي وخدي ..

حجت نانه الوكعه قويه يماا تخوف والله ، وجهج نصه مزرك ،

- همست منا وجاي اكون حذره اكثر ..

حجه بيبر نطلع اذا تحبين ، رديت اي ..

طلعت بيومها ، الكانونه بيدي ماذبيتها لان عندي بعد ابر ، حاجيت بيبر اروح ويه نانه  هيه اداريني ..

رد ليش اني موجود ، وبالغرفه اجيب ممرضه هيه تابع علاجج ..

سكتت ضايجه ، صعدوني للغرفه ، بس خليت رجلي على اول بايه رجف جسمي ،

اديه خدرت ، نانه وراي ساندتني حجت شبيج يماا ، رديت عليها ماكو تعبانه بس ..

هو مشه كبالي فتح الباب ودخلت مددت على الفراش ، غمضت عيوني ، اسمع و سن دخلت تكول الحمدلله على سلامتها كلبنا وكع من سمعناها وكعت ..

ردت نانه شلون وكعت ..

سكتت ثواني وردت تمتمت : مو ام زياد سولفت الكم ، هي شافتها من وكعت  وصاحت الي شلتها وياها ماشفتها اني مااشفت شي ..

عرفت حتى لو احجي هم راح يجذبوني ، واذا صدك بيبر يسوي باخو شي وهم مافلت منهم ..

هالمره دفعه من الدرج ، مره الثانيه جوز يدخلون للغرفه ياذوني ، ..

باليل تمددت انام ماكدر ، الالم بالحوض هاج عليه ونيت اريد ابجي ، حجه هااا اجيب مسكن ..

اشرت براسي اي ..

اسمع صوت العلاكه و صوت علب الادويه انفتحت ، تقرب مني ، رفع راسي وخلاهم بحلكي ..

قدملي الكلاص الماي ، لزمته اخذت منه شربه ، ابتعد يرجع الادويه ..

رجعت خليت راسي على المخده ، تقرب مني خلع ذراعه جوه راسي وجرني بحظنه ..

خله كصته قريب من وجهي ، غمضت عيوني استرخي تعبانه فالته اعصابي ..

همس خفت عليج ..

- ابتسمت ، حجه كلبي اجه يوكف والله من سمعت واكعه ، رفع راسه عليه وحجه ديربالج على نفسج ميرال وان حسيتي اكو اي شي حواليج مو طبيعي تجين تكولين الي كبل بدون تردد ولاتخافين اني بظهرج ..

هزيت راسي بهدوء اي ..

نومني بحظنه و حاظني حيل ، نام واني لاا ، بالي خالته شبيها وياي ليش هيج تصرفت وظلمتني وماحجت الحق ..

هو كل شوي يفزز يكعد يفر راسه و يرجع يخلي راسه فوك راسي وينام ، مثل طفل ..

رغم كبر حجمه بس نومته نومه جهال ، يخلي راسه فوكي مباشرتا كون اذنه اطخ بوجهي لو اذنه على صدري خاتل بحظني ..

وفزاته تخوفني ، عبالك احلامه مو نظاميه ، كلنه نفز بنومنه بس هو فزاته هواي ..

مديت اديه وحظنت راسه اهدي فزاته المتكرره ،

مرت فتره ،  بيبر صدك جاب الممرضه اضل يمي من هو يروح للشغل ، نانه وتالا يجون يمي ، شوي ويرجعون ..

نانه متحب ام زياد ولا وسن ، طلعت من يمي ودخلت ديما حجت فاضيه عندج شي ..

ابتسمت تعاي هلا بيج ..

صوت ابنها يناغي حجيت خلي هنا يمي على الجربايه ، خلته بصفي وكعدت حجت شلون صرتي ..

-الحمدلله بس شوي دوخه ، 

-حجت مو زينه هاي دوخه شفتي شسوت بيج ..

-رديت رجلج سوه بيه هيج مو دوخه ، سكتت هيه ، شوي وحجت جنت شاكه والله بس خفت احجي منو يصدك اذا كلت ..

،-رجلج مريض ديما ..

-ضحكت اصحه مني ومنج عواد ، بس كولي هو اعوج والبطل مخبله بزياده علينه ..

- سمعت تزوجتي عواد زواج مصلحه ..

-ردت منو كلج بيبرس مو ..

-كلها تعرف …

-اي مصلحه و ستر هم ، ضحكت ، ستروني بواحد الله فاضحه من ساسه شلون رهموها مادري ، عدهم بنت اذا غلطت معناها خلص انتهت بس رجال لو شما عمل و ارتكب يبقه هو طاهر ونظيف مايعيبه شي ..

-شسويتي ، ابتسمت ، شنو الي سويتي ..

-وداعتج كلشي ماسويت بس حبيت صديق ذياب ، و طلعت وياه كم مره ، و لكفني ذياب ضربني لان مصادقه صاحبه ، كعدت فتره و سكتت ، خطبني واحد كرايبنه واهلي وافقو ،

  بس رجع هو اتصل بيه يكلي تعاي ننهزم للاردن .

اني توه حابه من صدك ، و كلبي متعلق بي ، وعلى كولت ابو مثل كل شي ممنوه مرغوب ، شفت ذياب حب وعلاقات رغم ماهو مزوج ومخلف ، و اخواني بقيه هم ، كلت حلال عليهم وحرام عليه ، دسويها يابنت وعيشي حياتج ويه التحبي ..

-ابتسمت و شصار بعدين يالفهيمه ..

-و داعتج طلعت الصبح منا من بغداد ، وصلت لحبيبي الظهر و كعدنه بفندق كم ساعه  واتفقنه ويه ابو تهريب الفجر نطلع بتريله حمل تهريب للاردن ،  

بعدنه يالله توه كلنه بسم الله ودخل علينه الخبل عواد هو وجماعته سحلوني بنص اليل  ، 

-فكيت عيوني هاا ولج ..

-اي والله حتى مالحكت اخذ حلك من رجال …

-ضحكت هامج الحلك ،  الرجال وين صفه بي الدهر هالمكرود…

-والله من ذاك اليوم بعد ماشفته ولا سمعت عنه ، 

-صدك تحجين و ازوجتي عواد عادي ..

-مازوجته خيه هو تزوجي و حبلني فوكاها يعيرني ويكلي ابنج نغل بالله هذا شلون اعالجه …

-رديت ماله حل غير شماعيه ..

-الله يسمع منج ، بس على بالي احبل بعد…

-ابنج صغير مديت ايدي اتلمس رجلي ، ساكت و هادى خطيه .. 

-حجت اي هو هادئ بس كلت على امل عواد ينعدل من يصيرون عنده خلفه ..

-ابتسمت الاعود اعووج مايعدله لاخلفه ولا شي ..

-شنو الحل وياه لعد ..

-العصا لمن عصاا ..

-شلون قصدج اضربه ..

-ضحكت لاا بس نفس ماابوج جبره يزوجج خلي ابوج يجبره ينعدل وياج ..

جرت نفس لا اهلي مابيهم فايده كلش ، عواد شما يكوللهم يصدكو ، ويجذبوني ، اني هم تعبت صار وياه سنين ماشفت منه بس ذل ومهانه والله ..

هزيت راسي متحسفه عليها ، حجت عندج جكاره ضاك خلكي مايفكه غير جكاره ، رديت ماشرب اني هالسوالف ..

- حتى لو مال رجلج ،

-مادري شوفي بالجرار هنا بصف راسي ،  بالكت تلكين وحده ، بيبر مايدخن بالغرفه بس بالبلكونه ..

كامت ادور على وحده ، حجت اي عيوني يخاف على صحتج وعلى عطر الغرفه ، ابتسمت اني ..

حجيت الحلو الانسان ينصلح لخاطر الي يحبه ..

ضحكت لا حبيبه مو هيج بس رجلج بي ميزه ماينطي لزمه على روحه مو مثل البقيه مفضوحين ، لدرجه جكاره مايدخنها بحظرتج ..

حجت هااا هاي وحده ، وكفت اطك بالجداحه حجت تردين نفس ..

رديت افتحي شباك و دخني بالبلكونه طفل هنا لايختنك ..

كعدت يمي شوي وراحت ،

تالا .. 

بين الدراسه و بين ساري ابو النسوان ، مراسلاته وياي مستمره ، بس علاقته بنت ابو حمد مانقطعت ..

اكل بروحي وساكته ، مشيت اروح لميرال تلكاني باب المطبخ دانيال الولد المسيحي ..

وكف بالباب مبتسم شلونج ..

هزيت راسي زينه ..

ملت حتى افوت عرض دربي ، حجه بيا صف ..

رغعت نظري عليه :-شنوو ..

-داسالج نفتح موضوه شبيج ، نتعرف ، صاح واحد من وراه دنيااال بكدك هيه وتتعرف وخر عنها يله ..

درت وجهي لان بيبرس ، ابتسمت سمعت وخر مو بكدك اني ..

-ضحك انا اصير بكدج اذا ردتي ..

-اجه بيبرس جره من ياخته وبعده حجه ادخلي يابه ، وانته فض السالفه وصيتك عليها ياله بالعجل ..

فتت وعفتهم وراي ، تلكتني و سن كالبه وجها ياا شبيها هاي ، دخلت كبل بلا ماسلم صعدت كبل لميرال دكت الباب ودخلت ..

مدد و خاله بحظنها لابتوت و تسمع كتاب ، 

-حجيت اني اجيت شو مختفيه ..

-تعبانه شوي ..

-شبيج بعده راسج يوجعج ..

-اي كلش حتى نوبات توصل بيه مرحله اشوف غواش ، باين عندي نزف .. جرت نفس ..

-معناها لازم ترجعين تسافرين تسوينه مو ..

اي .. دنجت راسها اني ركزت عليها عدها ضربه بكصتها اثر الوكعه و عينها اليسره بيها حمار نزف باين ..

حجيت ميخالف الحمدلله اجت على هاي بس ..

-اي شلونها دراستج ..

-ماشيه ..

-ادرسي وانجحي تالا عفيه خلي وحده بينه على الاقل تخلص دراسه وتلزم شهاده ..

-شسوي بالشهاده و تعين ماكو ميرال متكليلي ..

-على الاقل سويتي انجاز بحياتج هيه الدراسه ، وهاي الورقه مو عاجبتج شهاده تخليها بعين اكبر واحد وتكليله اني سويت شي لنفسي و جاهدت و تعبت …

استمرت تحجي عن الدراسه ، واني درت راسي بملل متجاهله هالاسطوانه ، بس لاعبالها اطلع طب ..

درت وجهي على غرفتها تخبل ، تصميم تركي ، بس صناعه عراقي توصى ، الحلو بالموضوع الحمام بنص الغرفه صاير زاويه ،  شفاف مطل على الغرفه ..

ابتسمت عود هيه اذا سبحت يكعد بيبر يتفرج عليها وهيه حسبالها مسدوده الباب وامان ..

-حجيت ميرال ..

-ردت هاا ..

-اكولج ترى الحمام شفاف ، يعني مامستور …

-هههه ادري …

-خرط وجهي هاا يعني تسبحين عادي بي رجل موجود  ..

-ابتسمت ، لا يغمض هو ..

-صدك ..

-اكول انجبي غير مزوجين احنه ، 

-عييع

هههههه ، لاتخلين بالج هيج سوالف تالا ، اني تزوجت حتى اسند نفسي طول العمر والكه نظر عيوني ، انتي مستقبلج احسن مني انشالله ..

مامعتازه بشر تكدرين تحققين احلامج وطموحاتج وتكملين دراسه ، و تكونين نفسج ، بس اني مو مثلج ..

اكبر احلامي جانت الكه انسان يقبل بيه وبهذا وضعي ، واكدر اكمل حياتي وياه ومعتمده عليه ..

زواج مو انجاز ترى ولا مصدر انقاذ ، وكلمن وضعه بعد ..

هزيت راسي عود اي افتهمت ،

حرام اذا افتهمت ، احيانا الاهل والاحبه يحجون هووواي و ينصحون هواي وين مادير وجهك تلكه نصائح والارشادات ..

ماكو شخص يسمع نصائح وارشادات بكد المراهق كلها تزن براسه ، بس اذا نجي للواقع هو يسمع منا ويطلع منا ..

اهله اذا نصحو سنه ، يجي رفقيه او صديقه بكعده وحده وياه يمحي كل الي حجو اهله اله بسنين كامله ..

المراهق مايحتاج نصيحه او ارشاد ، المراهق يحتاج صديق يسمع اله ويشاركه ويفهمه وبس ..

اني ماجان احد يفهمني ، كلها تنصحني بس محد فهم علتي لو شنو احتاج   ..

احتاجيت شي بسيط كل البنات تحتاجه ، نحتاجه من اول يوم ولادتنه لحد مانموت نضل معتازي هو .  الحب ..

الحب ياا ساده .. بس الحب ..

رجعت من المدرسه ونزلت على الشارع تعمدت ماكمل دربي للبيت بالسياره ، سمعت خطواته وراي التفتت لكيته وراي مدنج ويمشي ..

اخرت بخطواتي حتى نمشي سوه ..

رفع راسه من سمع صوت خطواتي ، حجه بنتر شنزلج من السياره ولج ..

ضايجه كلت اتمشي ..

دمشي امشي بطرانه انتي ..

حاولت افتح وياه موضوع ما حجه ضل ينتر بيه ، لحد ماتعاركنه و مشه كبالي بسرعه ودخل للبيت وضليت اني وراه اشحط بروحي مقهوره منه ..

تلكاني بالدرب قريب البستان ابو عيون ملونه ..

وكف كبالي شلونج ..

زينه ..

ابتسم وجهج احمر من الشمس ..

اي .. كملت دربي .. ركض وراي حجه ليش جايه مشي اوصلج اني يوميه اذا تردين ..

شكرا ..

لزمني من ايدي وجرني فجأءه نترت بيده حيل .  انداريت عليه مخنزره .. ابتسم شبيج داحجي وياج ماتوكفين ..

-مو شوف راجعه للبيت تعبانه شبيك انته ..

- دنحجي انطي مجال ، رديت هاي ياهو تشوفها هيج تعرضلها ..

هز راسه و خله اديه بجيوبه لا بس انتي ،

مشيت دارجع ، حجه وركض وراي انطيني وكت نحجي مو الا هسه ، ظهر العصر باليل بكيفج ..

-ماعندي مجال ...

- وكف وحجه وراي انشووف ..

انداريت عليه عاقده حواجبي ..

ابتسم ، رد شكد تردين تفترين يعني اشر باصبعه تفترررين تفترررين وبعدين ووييين اشر على روحه ترجعين هناا ..

رفعت تك حاجب اله ، اشرلي بشفايفه بوسه يله روحي خلص الوكت ..

فتحت عيوني مدهوشه ، من عمه شكد سزز ..

مشيت بسرعه مالتفتت عليه بعد   ... حجه بصوت عالي ادرسي زين احب البنت الذكيه وشاطره ..

لفيت اديه على جسمي وطكيتها ركضه للبيت يماا يماااا ...

ميرال .. 

ضليت فتره الم الي براسي مايهدء ، خفت اراجع عليه و يكلولي عمليه والله تعبت حيل مابيه حيل الم بعد ..

خفت لا ارجع نوب هم يحجي الدكتور كلام يسمم بدني بي ، استمريت على مسكنات برغم الالم يزيد بس سكتت ، نوبات توصل بيه مرحله ادوخ واكعد بالارض ، بيبر يشوفني اتنحس من حروره او من الشمس لو كل شوي اغسل بماي بارد…

يكلي شبيج اكوله عيوني تحركني شوي ، رد اخذج لدكتور اكو بالحارثيه خوش دكتور ..

-لا دخيلك مابيه متت صار سنين ارجع مابيهم فايده خليني على مسكنات ..

-وجهج مصفر ميرال وعيونج حمر …

-يختفي نزف مايضل بس عوفوني ..

فتره و خطب بشار ، سمعت خطب وحده طالبه كليه صيدله ، ضحكت ياحسن حظك بس يستاهل خوش ولد حباب ..

سووله حفله بالحديقه ، وجابو مطرب ، كعدت بالطابق الثاني اني وديما نسمع هيه فاتحه برده شوي و تحجي عنهم ..

فزيت من صار صوت طلقات ..

خليت اديه على اذني حجت هذا ذياب ضرب لاتخافين ..

كعد المطرب يعني وصوت صفيرهم و ضحكهم ، حجيت شكو ..

-حجت شرب و الطربكه خيه مثل العاده ..

-منو بيهم يشرب ، ردت عواد راح يسبح بي مو بس ديشرب خال بطل بحظنه عبالك راح يطير ..

-بيبر يشرب ..

-سكتت ، 

-همست ديما ديشرب بيبر ..

-ردت لا رجلج ومن يجي يمج  شمي بي ريحه شرب …

-قبل يشرب ..

-اي عادي بس هسه لاحظت تاركه صار فتره ..

هممم سكتت ، رديت بعد شكو

-حجت دانيال وعواد شرابه كابلو الميز وكعدو ، ستار ديهز ويه الرقاصه ..

-فتحت عيوني رقااصه شنو هاي ..

-ياا غير جايبين رقاصه ..

-يالكعبه رقاصه شنو كمت لحيلي ..

-لزمتني ردي خيه شبيج هيه تهز شوي و ينطوها جم فلس وتولي  …

-هاا ..

-اي والله يسلون يمعوده تقاليد وعادات هاي ، 

-بهت وجهي وكعدت ساكته ، حجيت وشلابسه هاي دشداشه لو تنور ...

-ضحكت ضحكه دشداشه شنو شبيج بابا ..

-غير كاوليه هذول الغجر ..

هيه فطست ضحك تريد تحجي ماتكدر ، خلت اديها على فخذي و فحطانه ضحك ، خيه هاي لابسه بدله رقص …

غمضت عيوني يابدله هاي بس لا هاي بالمسلسلات المصريه ابيض واسود…

-هههه اسفه عبالي راح تفتهمين هههه طلعتي انتي من جماعه تحديث القديم اسفه ههههه

كضتها ضحك واني اديه ترجف ضايجه ، سكتت حجت اسفه ماقصد والله بس صدك ضحكتيني اعتذر ..

اكولج شلابسه كعدت توصف الي .. شايفه القطعه الخارجيه لزمت صدري ترفعه بيدها ، دفعتها هييي شبيج وخري ادب سزز .. 

هههههه بالقران مداكدر اسكت على سالفه الدشداشه والتنوره  هههههااي ..

عوجت حلكي ، حقيره .  

-اي خيه الحاصل لابسه بس الفوك كوه مجلب كل هزه صدر اني الزم كلبي لا يطلعن على عواد ، ويجلب بيهن ، ويصير الطفل المفطوم الذي وجد  صدر امه فجاءه ..

و جوه لابسه لباس و يا تور..

-اي بعد

-ردت وبس شتلبس يعني بطانيه قابل لو روب ابو الفرو ..

-همست وبس ..

-اي بس ..

-عزا و رجلي ديباوع عليها كمت اروح اجيبه شنو هاي ..

-دكعدي..  جرتني .. رجلج ديسولف ويه عدي تلكيهم ديحجون بالشغل ، بس خوفي من عواد العينه عليها ، كل شوي اكول راح يهجم عليها و يخليها بينهم و ينكحها ..

-بلعت ريك كلبي يدك عليج الله بيبر ديباوع عليها ..

-والله لا كتلج مكابل وجه عدي ويسولفون الي يشوفهم صار سنين ماشايفين بعض راسه براس عدي  ..

ضليت كاصه يم ديما وكل شوي اكللها خما تقربت من بيبر لو شرب بيبر لحد مابزعت و نترت هووو اني اراقب رجلج  لو رجلي ..

سكتت ضايجه ، لحد ماتعبت و مشيت انام ، مشيت اطلع ملابس ، صفنت هيه مو مال بجامه ستن هو شايف ذيج الادب سزز مصلخه ..

وكفت اي نعم ، خلي استهتر شوي ، بهت وجهي شتستهتر ليش هو اني شعندي غير البجايم الستن و كم قطعه ملابس نوم ، سوالف قله الادب ماعدي ..

رجعت رجوع على ديما ، غرفتي صايره مقابل الدرج و بصفها غرفه متروكه و مقابيلها غرفه عواد و البصف غرفه عواد غرفه ديما  كل غرفه بيها خدماتها …

 مشيت افرك باديه متوتره شلون اكوللها اريد هيج شي ..

وجهي نار احسه صخن ، شلون انطق الجمله ، واول شي شنو احجي عزااا شكد عيب ، وكفت ماروح لااا ، البس بجامه واسكت ..

رديت لااا هي خوش بنت حبابه ماتحجي بس عيب موو ، مشيت بسرعه باتجاه غرفتها متجاهله خجلي ..

دكيت باب غرفتها ، شوي وفتحت حجت هاا بس لا تكليلي تعاي شوفيلي بيبرس حتى اشيلج واشمرج من شباك عليهم .. حجيت بسرعه عندج ملابس مال كحا*

شهكت يااا احد كلج اني كحب* 

سكتت عضيت شفتي ، ترى اكولج سكتت ماعرغت شلون اصيغ الجمله ، دفعت الباب ودخلت .. حجيت

شوو وخري ماكو تفضلي ..

-ضحكت دخلي خيه دخلي …

-وكفت اكلج يعني هذا شيسمونه ، درت وجهي ، باعي من الاخر ملابسي مال نومي كلها مال راهبات ، اريد هاي كون قله ادب افتهمتي عليه ..

هي ماردت ، بس اسمعها غصب بالضحك ،  حجت من بين ضحكاتها :- و الله انتي مو هينه ميرال ، هههههه تريد سوالف ههههه يماا بطني ..

ضحكت لا اراديا ، بربج انتي فكري بيها ، شايف وحده بره عريانه و تركص و يجي يمي يلكاني لابسه بجامه ستن و كاعده على جربايه جني وحده توه جايبه وطالعه من النفاس شيكول بالله …

كضتها بس تضحك هيه حجت عندي عيوني عندي ، اني اصلا عندي خانه كامله ملابس مال ليالي حمراء بس ماملبوسه ..

حجيت ليش ماتبلسيها ..

المن البسها لحظي الفكر، كله بسبب الكوا* عواد هاجرني …

توجهت للكنتور اسمع تفتح بي ، تكلي شنو بالج ..

رديت ست ..

عاطت بوجهي قاطعتني : ياهل ستن الاسود غيري بابا غيري ..

-شغير ليش هو اني شعرفني بملابس النوم غير ستن ..

-لا حبي اكو شفافي واكو ابو الاضويه واكو الي يكول تعال حبيبي تعال ..

-هاي شنو ملابس نوم هاي لو سيرك مال مهرجين ..

-هههههه ماتحمل بعد والله ، شنو انتي سينما والله .. 

دتعاي جرتني خلت بيدي قطعه ماعرف شنو ، حجت شوفي هذا ..

عوجت حلكي ششوف هي رعنه ، 

-هههههه ها صدك انتي طافيه عندج الاضويه ، خرب ..

-ديما بربج شاربه شي عليج الله ، 

-لا والله بس انتي تحجين الي مايحجي ..

-شلون ماشوف دجذبين وماخذتلج جرعه من بطل قبل كم يوم كتيلي مشتهيه اشرب خاف سويتها من صدك وشربتي ..

-لا والله لاا ؛  هاج هذا يجنن ، لزمت بي ريش عزاا ، حجيت هذا شنوو ..

-ردت ريش ناعم ، حجيت عود صدك تحجين اريد اطلع مثيره نوب اطلعيني دجاجه منتفه …

-ميرال اطلعي بره اكول ..

-لا بربج ديما صدك احجي ، نترت هاج  اخذي هذا شفاف لونه اسود ، 

وكفت شو وصفي الي ، ردت شفاف من فوك ليجوه ، 

صفنت خفت احجي وتكب بوجهي مثل الططوه ، حجت هاا ماعجبج ..

-رديت وشلبس جوه ..

-بجامتج الستن ، عاطت بوجهي .. شتلبسين جواه ولا شي طبعا ..

-هااا  ..

-جرت نفس و تنافخ ، شوي و اجت كالت هذا شوفي بي تور و ستن من يم الصدر ، وياه ملابس داخليه ، 

-تلمسته حلو ، يا لون ..

-ردت ماروني ..

-ابتسمت خوش ، ماملبوس مو ..

-لا والله ولا مره ليش تتنكسين مني ولج نعال ..

-ضحكت لا والله بس استحرم و هم ميصير ، بس مضطره واجيت الج ..

-لا ابشرج لا ملبوس ولا احد شايفه جديدات والله اشتريهم واذبهم بالجرار .. 

-همست تمام ..  شكرا ..

اخذته وطلعت ، بس دخلت الغرفه لبسته ، كوه دبرتها ، بي شرايط ، خليت عطر و كريم مرطب ، وكعدت على جربايه انتظر مثل الهبله ،

اكعد هيج مثل طالب الشاطر لو اكعد كعده مثيره ..

لا مثيره احسن مددت على جربايه ، على وضعيه حوريه البحر و شمرت شعري ليوره و رفعت الثوب شوي لفخذي وخليت جف ايدي على المخده جني ممثله اباحيه بوحده من مجلات مال قله الادب بالتسعينات  ..

بعدين كلت لااا كعدت عدل كبر شبيه هي هاي هم كعده اذا دخل وشافني هيج مدده يكول بيها بواسير هاي ..

مكعدت عدل وخليت رجل على رجل و نزلت دلعه ثوب و رجعت شعري وره حتى يبين صدري ، وابتسمت ..

بعدين بهت وجهي ، هاي شنو ميرال تخبلتي ، انحى ظهري و انعقجت ملامحي انقهرت ، شهل تصرفات  ولج ..

خليج على طبيعتج ، بعدين تذكرت  شوو تاخر هذا ..

جتفت اديه ضايجه انتظر عينتين ، ماجه كمت ودكيت عليه ، بس رد كتله اصعد كافي طربكه ..

ضحك .. صار ست تدللي …

اني بالغرفه واسمعهم يضحكون ويصيحون وراه،  يكلوله هاا الداخليه كالت الك اصعد موو ..

والله وكت المهندس بيبرس يخااف …

شوي وصعد ، كمت لحيلي ، دخل وكفت مبتسمه ، ما صدر منه اي رده فعل حجيت بستغراب  بيبر ؟؟!

رد عيونه ، ابتسمت افرك باصابعي ، ضاع الحجي نسيت شلون احجي ، كتله ،  شلونك؟؟

-انتي شلونج ..

-ضايجه ..

-لااا ليش ..

-شنو هاي رقاصه جوه جايبيها ..

-جابوها الولد شعليه اني ..

-سكتت ، اني احلى منها مو ..

-لاتقارنين نفسج بيها تروح فدوه لتراب رجليج ..

سكتت ، درت وجهي افرك باديه تقدم عليه ، دنجت راسي متوتره ..

-حجه حلو هذا مد ايده يتلمس الثوب ؛ ابتسمت حلو ..

-اي كلش جديد اول مره اشوفه مشايفه عندج بالكنتور ..

-شنو ادور بملابسي انته ..

-كل ملابسج حافظهم كلشي يخصج اعرفه وحافظه هذا مو اسلوبج بالبس ..

-حلو لو لا ،  مو استعاريته صراحه يعني اكولها .. جديد مملبوس ..

-ضحك ، اخذتي من ديما مو …

-اي ..

-زين .. مد ايده على شريط و سحبه حجه ماعلمتج شلون ينلبس لعد ..

-بهت وجهي شبي ..

-هههه لابسته بالمكلوب لان ..

-لااا كول غيرها .. 

-هههه والله شريط هذا يلف على الركبه مو على خصر …
-خرط وجهي ، حجه و هذا الظهر مو الوجه ، شو نزعي …

-ذبيته ، حجه هيج احسن شلج بهل سوالف اولها وتاليها تنزعيهن ، ضحكت عود حاولت ابين مثيره ..

-هو انتي من الله مثيره بس جنتي تلبسين مستور ..

-حظنته من ركبته صدك ..

-اي ، شايفه شعرج المنثور لو كذلته على وجهج كل شوي تسرسح ، جر نفس ، لو ركبتج ..

بعده يحجي وقاطعته ... لاتجيب رقاصه هنا بعد ..

-ماجايب كتلج الولد جابوها ..

-وماتشرب ..

-تارك شرب من سنه تقريبا …

-جريت نفس ، خوش يالمهندس ماتجي نسوي شكل هندسي ..

-عندي تصميم هندسي جديد تجربي بس يرادله حيل ….

هااا ضحكت ، رد اي والله اني ابو الاختراعات وتصاميم ، ضربته على جتفه دصمم دنشوف ..

صبح حسيت عليه من كام ، مديت ايدي حجيت بيبر رايح ..

اي يروحي ، كملي نومتج عندي شغل و احتمال اتاخر لليل ، لايضل بالج باسني و كام للحمام ..

جريت الغطى وتغطيت وكملت نوم ، حلمت بحديقه بيتنه ، بغرفتي القديمه ، بايسكلي الي تركته من سنين ..

حلم مخربط بي اكثر من وجه اكثر من مشهد ، نور صديقتي مدت ايدها تحجي وياي ، تكلي ديربالج اكو حفره بشارع لا توكعين ..

رغم ماجنت حذره حيل عثرت وكعت على وجهي ، اديه تجردحت ، واحد جرني من جتفي يساعدني اكوم ..

كمت لحيلي اتألم من الوكعه ، انداريت ليوره ادور نور ماكو اختفت ، بس هيئه بشر وراي ماعرفت شكله شنو …

درت وجهي الشارع فارغ حيل ، درت وجهي على هالشخص اختفه ..

لكيت نفسي بالشارع لوحدي ، صوت موبايل يدك ، دنجت راسي موبايل بالارض ..

غمضت عيوني حيل ، موبايل يدك ويدك .

فزيت من نومتي على دكه موبايل ، فتحت عيوني ، الم براسي ، كمت لحيلي مديت ايدي على جهاز ..

عيوني ترمش و اكو ضباب بعيوني فجأه شفت لاح لون احمر  .

لزمت جهاز يدك ، لون ضباب وبي بقعه حمره ..

رمشت حيل ، شكل غريب ، رفعت نظري ليفوك داشوف شي غريب اسم الله داتخيل مووو..

داتخيل هذا وهم لو حلم لو حقيقه ؟؟! … 

#يتبع ...