قاع الشياطين

البارت الثامن

.....................☆البارت الثامن ☆..................

#قاع_الشياطين(البصر والبصيره)

#بقلم_أسماء_ديمير

حجه يله عندي وقت نص ساعه بس ، استعجلي ، 

وكفت اكل بشفتي حايره ، ماعرف بنفس الوقت حابه اروح ، حجيت اكول لنانه بالاول ..

-رد نانه منو هاي ..

-ام ساري ..

-ها ست حليمه ام ساري ؟؟!

-اي ..

-خوش دروحي كوليلها ..

بلعت ريك ماندل باب المطبخ وين اصلا ، درت وجهي باتجاه المطبخ ، اخاف اتحرك ولان عاثره ومتفشله كباله ، هو حجه هاا العفو ، دقيقه انتظري ..

مشه شوي وصاح ست حليمه و ينج ..

طلعت نانه حجت هاا يمه ..

هاخذ بنتج تشوف الاسطبل كلت انطيج خبر .. 

سكتت ثواني و حجت اني اخذها ، ليش اتعب نفسك ..

رد رايح بدربي اني ، كال يله امشي ، 

ضليت واكفه و ين امشي باي اتجاه ..

حجت نانه عيوني استاذ اني اخذها تعب شوي لازم تستند على احد ..

-رد اني اوجها امشي ليجدام ماكو شي جدامج ..

-مشيت بهدوء ، حسيته بصفي ..

حجه هو يكمل مشي على كيف كملي ليجدام ، درب فارغ و نظيف ..

-حجه ليش ماعندج عصا ..

-انكسرت ..

-ليش ماشتريتي غيرها ، 

-محتاجه عندي ساري و تالا ، واسامه هم، يمشوني ..

-ساري مو اخوج صح ..

-اي ..

جرني من جاكيتي و جهني لليمنه كملي بهذا الاتجاه ، مشيت بحذر ، شسوين و يه ام ساري  اهلج وين ..

ماحجيت ، اسامه اسمعه وراي يمشي ،  سمعت صوت الخيل  ، ابتسمت ، همست الخيل .

اي حجه ديربالج درب هذا ترابي ، لا تعثرين ، مجلب من جاكيتي و يوجهني ، رد سأل ، عندج اخوه ..

-اخت وحده تالا ..

-اكبر اصغر منج ..

-اصغر مني ب ٦ سنوات ..

-جيد ، شكد عمرج انتي ، 

-همست ١٩ سنه ..

-وكف وخطواته توقفت حجه صدك تحجين ..

-التفتت علي وينك اي يله امشي وصلنه موو ..

سكت ، 

-همست وينك ..

- عبالي عمرج ١٥ والله…

-ضحكت لا ، 

كل درب ساكت وصوت الربد الخيول و صهيل مالتها علت ..

وريحه العلف مالتها ، لو ريحه التبن المبلل ، الارض صارت طريه جوه رجلي دليل انو توه ذابين ماي بالارض ، وصوت ابو حمد ،

حجه ادخلي بس اكو علو ديررالج ..

رفعت رجلي شوي و صعدت .

دخلت  واسمع صوت ابو حمد صااح هاا بابا شسوين هنااا شجابج ..

جمدت بمكاني رد هو من وراي ، ويااي ويااي ابو حمد ..

-هاا استاذ اعتذر عبالي لوحدها ..

-جيب  الي البريه بالله ، 

-حاجاني البريه قبل شهرين اشتريتها ، بعدها عنوديه ، 

-شنو لونها ؟؟

-اسود ..

-كلها اسود ؟؟!

-اي بس كرعانها شعر ابيض ..

-ابتسمت وشعرها ثخيل طويل ؟؟..

سكت ، 

-وياي انته ..

-اي ، رجع لسكوته ، همس البصر نعمه موو ..

سكتت ، ماعرفت سبب سؤاله ، رديت البصر نعمه و البيصره هم ..

شلون يعني ..

اكو ناس الله نطاهم بصر بس مانطاهم بصيره ،

واكو ناس الله اخذ منهم البصر بس نطاهم البصيره ،

البصر يشوفك ظاهر البشر ، والبصيره داخل البشر ، فياهو الاهم بنظرك بصر لو البصيره ..

سكت .. ثواني همس مو بس جميله ماشالله ذكيه هم ..

صهلت الخيل بصوت عالي قطعت سكوته ، حجه ابو حمد حظري السرج وياها ..

درت وجهي على مصدر صوتها و شلون تضرب بالارض معصبه …

حجيت ما متروضه بعد ..

-اي بالضبط مالحكت جان عندي شغل و هملتها ..

-شنو اسمك ..

-معرفه اسمي مهمه  ؟؟!

-حتى اصيحك بي ، سالفه استاذ صعبه شوي ..

-ليش ؟؟!

-ابتسمت لان ماشتغل عندك بساطه ..

-  ههههه صفه جديد انضافت للقائمه قوويه انتي ، 

- الاصح منطقيه ، 

-بيبرس ..

-هاا ..

-اسمي بيبيرس ، بسرعه حجه .. ديربالج تضحكين ..

-ليش قصدك على اسمك لااا بس غريب ..

-اي ..

بيبر احسن مو ..

-بكيفج ..

-تشتغل هنا لو اهلك يملكون الفله ..

-اني  مالك الفله  ..

سكتت ، حجه تصعدين ، 

-الخيل ؟؟!

-اي ..

-مو تكول ممروضه تريدني انكسر يابن الناس .. 

-ضحك برود ، ههه تمام ، اجت الخيل و قربت منه و صوت نفخ مالتها دليل على زعلها ..

قربها مني فزعت ورجعت ليوره خايفه لا ترفسني ، حجه لاتخافين لزم جاكيتي يجرني يكلي مدي ايدج وجها مقابيلج ..

همست احس بيها تنفسها حار يضرب عليه ، بس غضبانه حيل ليش تنافخ ..

مديت اصابعي بحذر وطخيت بوجهاا ، شعرها نازل على عيونها ، مسحت عليها و هيه ماترضه تحرك براسها يمنه ويسره ..

ابتعدت خفت لا تضرب ، حجه راح اصعد اروضها ، ترحين لو تبقين ..

جانت ابنيتي ابقه حيل حبيت هالسالفه ، بس شفت لازم ارجع ، اعرف كلب نانه هسه عليه و تالا هسه تفقدني ، هزيت راسي ارجع ، تاخرت ..

صاح لابو حمد طلع البنت من الاسطبل ..

مشيت ويه ابو حمد وطلعت بره ، لزمت رجال من زنده ، ميعرف يوجهني بس خطيه ساندني حيل ، 

جنت مبتسمه فرحانه و صوت الفرس قوي ، عرفت مزعوجه ، حاجيت ابو حمد راح اتعبكم هاي الفرس  ..

رد صارلها فتره هناا شعلت غاليي ، كل رفسه ترفس ، تكول وحش مو خيل ..

ضحكت ليش هيج مجنونه ..

استاذ بيبرس هوايته خيل صاحبه نص عقل و العنوديه ، هويته ترويض مالتها ..

شلون يعني يحب تحدي مثلا ..

-لا يحب كلشي غريب ، وما مالوف ، هو هم نفس الطبع ظاهره شي وداخله شي سبحان الله ..

وصلني للبيت وراح هو ، دخلت الضحكه شاكه حلكي ..

بس دخلت نترت بيه تالا خرعتني طلعت واكفه بالباب و ين جنتي دايحه ..

-رجعنه لقله الادب ..

-ضل بالي عليج حيووانه ، اجه اسامه يكلي ميرال راحت لهناك ، اساله وين يكول مادري ،  لج عبالي تهتي طلعت مثل خبله ادور عليج انتي ماتحسبين ابد ..

سكتت ، دفعتها عن دربي و مشيت للغرفه ، وهيه وراي تصيح موو وياج ، وين جنتي ، هاا ..

-بالاسطبل  ..

-شوداج مو ممنوع لو دايسه بحفره و مكسوره لو متلكيج الجلب لو هذا حيوان مدري شنو ..

-مارحت لوحدي و كلت لنانه ، شبيج ..

سكتت ، صوتها يرجف ،، انداريت عليها شبيج تالا ..

-مزعوجه مليت كعده لوحدي حموت والله من خنكه ..

-لو بعد تد … قاطعتني مااحب دراسه ماحبها ..

-شتردين لعد ..

-ماعرف اريد اطلع ..

-وين ..

-اشتغل ..

-هذا موال جديد تالا منين جبتي ..

-شعليج انتي ..

-تالا معتازه انتي و اشتغلين ..

- ما محتاجه بس صديقتي تشتغل بمول ، واريد اشتغل وياها اعتمد على نفسي ..

-حلوو منو هاي صديقتج بس لا من الجماعه الفيس و منشورات مندوبات موو بطلي هالتفكير تالا ..

-مليت من كعده اريد اطلع ..

-لهي نفسج بشي ، غير شغل ..

-اكو محل مال مكياج شفته على نت يردون عاملات ، قريب منا ، اريد اشتغل …

-هالحجي ممقبول ، 

-ماجاي اخذ رايج ترى داكلج بس ..

ماراح اقبل خليها بالج طلعه منا بدون موافقتي ماكو والله ، قسم بالله اشمرج يم ابو يقين ، لا طلعين خبالي عليج ، شغل شنو انتي يله توه دخلتي ال١٤ سنه ..

همزين مذكره عيد ميلادي ..

-مناسيه بالي اعرف هالسنه عيد ميلادج مو نفس كل سنه بس انتي اعرف بالضروف اعوضج ..

-ماريد شي منج اريد املي الفراغ عندي ..

-ارجعي ادرسي تالا والله دراسه شي حلو ومفيد اسلاح بيدج ..

- هو وين التعين ..

-وينج وين تعين تالا المهم عندج شهاده حتى لو سادس اعدادي هم نعمه احسن من ماكوو ..

-مالي واهس ..

-وعد مني بس تدرسين و تنجحين  افتحلج مشروع ..

-مشروع شنو ..

اعمال يدويه ، مو تحبين الشمع ، افتحلج مشروع انتي و ساري و تشتغلون بي تبعون اعمالج و اعمالي من نحت شكلتي ..

-سكتت ثواني ، والله عند وعدج ..

-عند وعدي ..

-خوش سوي اوراقي مال دراسه وانقليني لمدرسه هنا قريبه ..

-الله كريم بعد للفصل دراسي الجديد تقريبا ٤ اشهر ، خلي اجيب اورقنه من ابو يقين بالاول ..

تالا ..

بيوم طويل ، مابي شي مميز غير تسليه وحيده نت وتصفح الفيس بوك و مراقبته هو ، اكله شربه لبسه و حتى نومته بالصاله ..

مشه للدوام هو متعطر و لابس قميص الابيض و البنطرون رصاصي ، و مشط شعره بطريقه شبابيه عصريه ..

وكفت بالمطبخ اسوي نفسي جاي اسوي ريوك ، بس بالحقيقه جنت واكفه قريب طباخ و لازمه خاشوكه واراقب بي شلون يمشط و يثبت بخصلات شعره حتى لا تتبعثر و تطلع بطريقه انيقه و راقيه …

طوله الفارغ الي يوحي بانو شاب داخل العشرينات من عمره بشعر اسود فاحم و ملامح خشنه ، حواجب ثخان و عيون سود برموش كثيفه ،

هو مجرد ماسمع باب الغرفه انفتحت التفت مبتسم ، 

درت وجهي باتجاه الغرفه ، لان ميرال كاعده من النوم و شعرها مبعثر بطريقه فوضاويه ، 

حجه صباح الخير ياورد ..

رد هيه ، صباحك سعاده شلونك ..

- ماشي للدوام تردين شي ..

سلامتك ..

عيونه راقبتها لحد ما دخلت للحمام بحذر ، هو خايف لا تعثر ، دار وجه يكمل تسريحته الصباحيه ، توه يندار بجهتي دنجت اشغل نار على طباخ ..

حجه كولي لامي ساري مشه للمدرسه ..

-مارديت علي ..

-مو وياج ..

-نترت بي ، ولي عاد عود اكللها …

-همس حيوانه مو ببدج ، طلع وسد الباب وراها كلبي مردني مرد…

فتحت برده الي اطل على حديقه شفته يعدل بنفسه بعده ..

شكد نظيف و انيق لاخر حبه برغم فقر حاله و ملابسه بسيطه الي مو ماركه ، كلها صناعه صيني ..

وكف كبال هذول الاخوان توم يسوالف مدري شنو كلوله و التفت باتجاه الملحق ، سديت برده بسرعه اشوفه من وره برده تور هز راسه ، واحد منهم طبطب على جتفه  هو كمل دربه لابو حمد ..

حسيت على  صوت باب الحمام طلعت ميرال من الحمام حجت ماكو ماي حار عبالي اغسل ..

نترت بيها شعندج عروس يوميه غسل ..

ردت نظافه من الايام وابتسمت ، حجيت هسه اشوفلج السخان عود ..

دنجت اكلب بالبيضه ، حجت اروح يم نانه اتريك .. 

-كانو تعودتي على خواره ميرال ..

ضايجه يم نانه اكو صوت على الاقل وهم نانه مضوج لوحدها نسولف سوه  .. 

-واني مثل جلب ابقه هنا لوحدي ..

-مو عندج نت تلهي بي ..

-الى متى ..

لحد ما يبلش دوامج و تطلعين للمدرسه تغيرين تشوفين صديقاتج ، او تكونين صداقه جديده بمدرسه جديده باجواء جديده ، اصنعي شي حلو ممتع من لاشي تالا ترى متنزهات و المولات وسفر ورحلات صارت شبه مستحيله بهاي حالتنه ، شوفيلج شي و اكعدي كظي وكت بيي ..

سكتت ،

حجت اني قاطعت اغلب صديقاتي تدرين ، بسبب ضياع جهازي ..

نوب اغلب شغلاتنه و اجهزتنه زينه ضلت يم ابو يقين ، نور هسه تفكر بيه لو لاا ..

نور صديقتج ؟؟

اي ..

عوجت حلكي شدراني ..

جرت نفس ، مشت تغير بجامتها بملابس البيت ، حجيت اني ، ملابسج على الجربايه حظرتهم ..

وكفت لزمت عتبت الباب واندارت باتجاهي ، حجت شنو حظرتي ..

فساتنج زيتوني و الستريج الاسود و ياهم جاكيت خفيف ابو ورد ناعم ..

سويلي شعري ..

اكمل ريوك ويله …

مشت تغير واني حظرت الريوكي لوحدي خليته بصينه ، طلع اسامه من تلصاله يفرك بوجه توه كاعد ، كبل كعد على صينيه يريد ياكل ، نترت كوم لك غسل وجهج بالاول ابو وصخ ..

-انجبي ..

- انته واخوك نفس الطينه والله ، رفعت ايدي داكفخه ..

كام بسرعه يحجي نذله يجي ساري ، واكله ،

ميرال اجت تمشي بحذر ببدها قراصه كتر و المشط ، حجت وينج ..

كاعده على قنفه الي بصف الشباك ..

تمشت بهدوء ، طبله جدامها ، ماكمت الها ، بس حجيت طبله لاتوكعين ..

مشت حجت وين و طخت بيها وكفت هاا هياتها هههه ، وينج ..

امشي يمنه مدت اديها جدامها تتحس حجت يرادلي عصااا ، بلا عصا اني لاشي ..

وخرت من طبله مدت ايدها تريدني الزمها ، جريتها يمي و دارت ظهرها الي و خلت قراصه بحظنها اخذت مشط اسويلها شعرها ..

حجيت ظفيره ؟؟

اي بس الشعر على وجهي لاتشيلي خلي ..

شلون ماتنزعجين منه متكليلي لو عندي الا ابتره ..

-اتحسس النفس بي و الهوى ، 

سويت الها ظفيره راهيه كلش و خصل قريب وجها وغره ضلن ، كامت لحيلها تروح مشيت وراها اوصلها للباب ، هيه كملت دربها لنانه ،

طلعت مره من باب صاله مال فله ، يطلع عمرها بالاربعينات ، صاحت بشار وينك .

ردت كررت بشار ،

اجه بشار واحد من هذول توم ، حجه كولي ام زياد ..

ردت جهز سياره ابو زياد و ايلاف طالعين ..

رد اخذها للكليه اني ..

ردت لا ابوها ياخذها عنده شغله يكضيها هم ، انته ظل هنا اريدك اني ..

درت وجهي عنهم ، التفتت على ميرال شفتها راحت ودخلت يماا منج شبساع اندليتي ..

تعرف درب مشت على الحصو بعدها كم خطوه تتجه لليمنه ، باتجاه الباب المطبخ ، حافظتهم حفظ هيه ..

والله متأكده لو اعوفها اسبوع تنطلق بالمزرعه الا تحفظها بالاشبار ، اني لو ابقه هنا سنه ، ماحفظ هيج ..

عدها سرعه حفظ خارقه هيه عكسي تمام حتى باسورد مال حساب فيس نسيته وضليت مثل الجلب ..

تذكرت حسابي فيس الي راح لان نسيت باسورد يله عود اسوي غيره بس لا ذاك بي بلاوي و صداقاتي و كروبات داخله كلهن بي ، 

يله اسوي غيره و عود احفظ كلمه السر على صفحه ..

كملت ريوك  وشغلت السخان ديحمى الماي لميرال ، و مشيت اسوي غيره ، كعدت اسوي واحد والتهيت بالساعات ، بين منشورات الفيس لفسكانه الي عباره عن ..

اريد مبين للمناطق حساسه عرسي بعد اسبوع ، عمرها كله هامله نفسها ومن يجي عرسها تذكر شسماتها مو ابيض ..

لو الي جويس خاينها ويعرف وحده وتريد خطه دتنعل والديه ، ماتعرف اغلب البنات الي دتستشيرهن هنه اصلا منعول اهل اهلهن ويردن حل بعيشتهن ..

لو وحده بايخه تنشر منشور مستفز وتريد نغلط عليها على ابو احب مزوج وشسوي اني ممسويه شي حرام ، هاي شنو نكوللها يعني ..

لو الي تنشر منشورات بس تتغزل بالحلوين ، بحيث تخليك تتخيل هاي اذا شافت واحد حلو بالحقيقه تلحس اثر رجله غددي ،

بس شسوي وين اولي نوبات اعلق نوبات ادخل اعارك ، و ماشيه هيج على كولت ميرال ماعدجن شغله وعمله اروح افتح كتاب اسمع كتب صوتيه اقره كتب تنميه بشريه او فديوات من يوتيوب مفيده ..

اجت ميرال تريد تغسل ، حطيت الها ملابسها بالحمام ، و شامبو مكيف و الشاور ، و دليتهم عليها ..

دخلت تسبح واني كعدت اقبل بالصداقات الي تجيني ، عود سميته ، الكحيله ، ياا منيلي كحيله بس يله فدوه لعويناتي ..

طلعت وحده من صوري اريد ادورلي صوره عيوني طالعه حلوه لو كبار ماكو حتى تتناسق ويه اسمي ماكو ..

صاحبه عيون لونهم فاتح صفر على اخضر فاتح بس مو كبار ، تالي طلعت الي صوره مطيه ظهري للكامره و شعري مغطي ضهري ، 

واصل لنص ظهري ولابسه فستان صيفي ، خليته ، رجعت الكروبات قديمه ، بعدني اكلب و اجه بالي ساري ..

دورت على صفحه اعرفها ، ساري هلال ، طلعته ودزيت طلب ..

عزاا هسه مو يسال انتي منو ..

يله و اذا سال طزز بي ، اكله شفتك بواحد.من كروبات و عجبتني ..

فزيت على صوته من اجه كمت لحيلي اعدل بنفسي ، طلعت من صفحه الفيس ..

دخل هو رفع راسه شافني رجع دنج ينزع بحذائه ، باين علي تعب الدوام ،

اصلا قربت امتحاناته وديتعب حيل بالقرايه ، انفتحت باب الحمام و طلعت ميرال لافه منشفه على راسها …

وجها احمر والبخار الحار وراها ، بشرتها تلمع لمعه بشره الاطفال ، حجت تالا ملابسي وصخه هاي تعاي اخذيها مالكيت سله الملابس وصخه ..

بيدها ملابسها داخليه لونهم بيجي نوب ، عضيت شفتي اكل بيها ، هو وكف صافن حتى حذائه عافه ، بلع ريك ، مشيت و نطيته ظهري اغطي عليها ، كتلها ادخل للغرفه لاتتمرضين نشفي شعرج ..

حجه  هو ، ميرال ، تعاي نكعد بره بالشمس دينشف شعرج ..

- رديت عنها كبل ، لااا ديضربها الهوى وتتمرض شهل عقل شايله انته ..

لاول مره يسكت ومايرد علي ، انداريت علي لكيته على نفس صفنته ، عيونه عليها ماشالها ، دخلت هيه بسرعه بردانه ، هيه وتراكها لونه وردي فاتح ، اني اخذت الملابس و التفتت علي خازرته ،  دار وجه ومشه يبدل ..

شلت هدومها وشمرتهم بسله الملابس الوصخه ، شوي وصاحت تالا تعاي ظفري شعري ..

غلست عليها جنت غضباانه حيل وبداخلي زعل ،، صاحت مره ثانيه مارديت ..

حجه هو بالصاله هااا ميرال تردين شي ..

لا بس تالا وين اريد تمشطلي ..

اني مدنجه اسوي نفسه ملتهيه بالموبايل صاح بيه مو اختج تصيحج ..

مارديت ..

-هييببي مو وياج طرشه ..

-روح انته مشط الها اذا عاجبك ..

-شكد غبيه انتي كومي الها ..

شمرت الجهاز وكمت بعصبيه امشط الها ، دخلت للغرفه هيه محظره البلسم و المشط كعدت اسوي بشعرها و امشط حيل ..

اخرطه بكل قويه و هيه تعيط اااي و لج ااخ اذيتيني مو هاي ..

لاضلين تتنعويصن مالي خلكج اسكتي ..

وخري تالا وخري كطعتي شعري وخري اني امشطه ..

دفعت ايدها حيل لا وخري دمشطه جريتها حيل و ينهلس منه كفشه وعاطت حيل و خرت عني ماريد ، شبيج هااا تمشط بمنيه ماريده دخل هو حجه شبيج ..

ماحجت بس تتلمس بشعرها بزعل وعيونها مدمعه تفرك براسها انهلس منه والله كوم نوب مبلل بصيله الشعر  رطبه تنملص بسرعه من جذر ..

هو دنج راسه وشاف المشط كله شعر ، حجه شكد رعنه مكطعه شعرها شنو انتي من بشر جر المشط حيل مني وخرني حجه انداري ..

-حجت هيه لا لا وخر ديوجعني ، رافعه ايدها تفرك براسها متالمه  ..

-تقرب عليها وين يوجعج ..

وهيه تاشر على صفحه من شعرها ..

رد طبعا يوجعج اذا هاي غبيه مكطعه الشعر من جذوره ، اندار عليه يباوعلي بغضب ، شنو اول مره تمشطين الها وهيج وين بالج ..

مارديت بس كازه على سنوني ، اريد اكوم املخه هو  ، دارها و لم شعرها بلا تمشط يخاف لا تتوجع من المشط و اخذها وطلع وياها للحديقه بالشمس ..

بس طلعو بجيت كبل ، خليت اديه على عيوني و طلعت الي بكلبي من قهر ، احس بالوحده ، وحده قاتله ..

محد يسال عني ولا يكلي شبيج ، محد مهتم بيه يااريت اني عميه اي والله ياريت اني سكط لو معوقه حتى يهتمون بيه ويددلوني مثلها ..
 
احس هيه كامله واني الناقصه ، كمت اغسل وجهي ، اسمع صوت ضحكهم هيه وياه بره ..

فتحت برده الصاله ارقبهم ..

كاعد مقابيلها وشايل كتاب بيده يقره و شوي يحجي وياها ..

يضحك على ضحكها ، لا اراديا مشيت فتحت موبايل و دخلت على غوغل اطلع صور بنات ، صور معينه ، صور بنات متحررات ..

بملامح عربيه ، ..

اسحبهم من غوغل و ادخلهم على برنامج فتو شوب حتى اذا شافهم بغوغل او اي مكان مايعرفهم مزيفات او مسحوبات من النت ..

اعدل عليهم بالجسم و المكياج ، ودزيت اله رساله و هلاوو احب اتعرف …

وغيرت صورتي بصوره بنت ثانيه بشعر قصير ولابسه فالينه دلعه …

وانتظرت الرد ،، حتى اذا ماعشت وياك بالواقع نفس مااني اريد ،  راح اعيش وياك بالواقع الافتراضي نفس مااني اخطط واريد ..  

ميرال …

كملت ايامنه بهدوء ، كمل ساري امتحانات اخر سنه وانتقل للخامس اعدادي ، بينما تالا جانت مستحقه ثالث ، بس بسبب تركها هسه يله ثاني متوسط ..

حاجيت نانه على الاوراق كالت نرفع عليه قضيه لهل عار ، وبالكت نحصلهم منه ..

حاجت العم ابو عبد و كالها تدللون سهله اشوفلكم محامي كون ثقه و مضبوط واردلكم خبر ..

نانه طلعت للشغل و مشيت وياها ، دخلت للمطبخ و جرت كرسي وكعدتني على صفحه وكالت لاتكومين ابد ، 

جنت اسمع واحس بيها هيه و سن يشتغلن ..

اسمع اصوات اشخاص بصاله او قريب المطبخ صوت ضحك ..

اصوات ضحك رجاليه ، اكو شخصين اخوان ، يجون ياخذون الاكل ، اسمهم بشار و ستار ..

دخلو وحجو لام ساري منو هالكنافه بنتج..

ردت ام ساري  اني ربيتها ، وخرو عنها ولاتباوعولها مناقصه عين وحسد هيه ..

ابتسمت اني ، واحد وكف يكله هاي هم تاكل مثلنه وتشرب ..

-يرد ذاك شوف اصابعها والله يخوفن هاي شلون هيج من تلزم شي ماينكسرن  ..

رفعت جف ايدي مفزوعه ، وتلمسته اسم الله شبي ..

حجيت العفوا شبيها ايدي ..

-رد ذاك بصوت واهن ، يالله صوتهااا سمعت صوتهااا ، كنارري وعلي ..

-ضحكت ..

-رد اسمع موسيقى الي بالضحكه اسمع ..

-وجهي نارر احسه صحت نانه ..

ردت عوفيهم ينبحون هالجلاب توم هذول ، يمه هذول حتى اني صجموني بقت عليج ، امشو منا لا اصيح استاذ عواد يشخطكم ..

طلعو يضحكون ، اني جمدت بمكاني ، حجيت عود صدك حجيهم نانه اديه بيها شي ..

لا يمه لان باينه الشرايين وهيج يحجون ..

لميت اديه بحظني وسكتت ، معقوله جسمي وبشرتي مو طبيعيه وهيج حجو ، حتى ذاك اليوم بيببر يكولي عبالي عمرج ١٥ سنه ..

صار شكد مموزنه ، معقوله اني نحيله ، نوب قلقت بسالفه شكلي، دخيلك ياربي خاف شكلي يخرع  

اخذو الاكل كل شوي واحد واكف بصفي يحجي بداعت امج شتاكلين الصبح ..

ارد بهدوء  وين نانه ..

ماراح ناكلج والله بس نشاقه لاضوجين …

سكتت ، وكف كال شتخلين لوجهج مد ايده يلزم وجهي ..

ابتعدت خايفه همست وخرر عفيه ..
ضحك اشاقه خما تزعلين ..

-لاا بس اطلع منا شكو داخل للمطبخ ..

-انتظر ايلاف تريد اخذها للمول .

-تشتغل هنا انته ..

-اي اشتغل عد الخلفهم شفتي ..

-ابتسمت شنو اسمك .

-خدامج بشار ..

-خادم ربك بشار ..

-وانتي ..

-ميرال ..

-كناري احلى يلوكلج ..

ابتسمت ..

. طلعو هم ينقلون بالاكل واصوات اقدامهم ابتعدت ،  واسمع جمله طلعت من واحد بيهم يكله خطيه عميه ماشوف ، شفتها احنه واكفين بصف كاونتر  وهيه عينها على باب ..

رد ذاك اي لاحظت عليها من مارفعت راسها علينه من حاجينها ، 

-سبحان الله مسكينه …

-كلمه مسكينه مستني حيل ، مسكينه ؟؟!

ليش ؟؟! عود يشوفوني ناقصه او بيه شي مفقود يخليهم يشفقون عليه ، كملو الغده ونانه خلت الي صحن بي كم قطعه دولمه و كالت اكلي ..

توه امد ايدي وسمعت صوت كعب عالي ، بطبات خفيفه ، وصوت نسائي رفيع ، ناعم ، يدل على نزاكه صاحبته ..

حجت ام ساري بلا زحمه ضيفي ليمون و يه السفره ، قبل لاتصعدوها الي ، و جيبي لميرو صحن فاضي و خاشوكه داسويله سيريلاك بيهم ..

ردت نانه ، حاظر عيوني ..

دنجت على الاكل ، حجت بتسال منو هاي ..

-ردت نانه متلعثمه ، بنتي هاي ست بنتي ..

-اهااا ، وكفت ساكته شوي وتحركت من طبه الكعب ميزتها ، راحت هيه وطلعت .. 

-اكلت اني بدون مااحجي ، سالت نانه منو هاي .

-مرت الاستاذ عواد ، كملي دارجعج للملحق ..

مرت ايام والتهه ساري ويه ابو حمد بالبستان و الاسطبل ، وتالا مكابله نت والموبايل ، 

نوبات اروح ويه نانه واكعد بالمطبخ و نوبات ابقى بالحديقه..

البيت عرفت بي اخوان اثنين واحد مزوج اسمه عواد ، ومرته وابنه ..

و خالتهم هيه ورجلها عايشين وياهم وعدها بنيه طالبه كليه ،

مرت فتره و طلعت للحديقه ، بس ابتعدت عن ملحق ، لان شمس انحجبت بالاشجار حبيت اكعد بالشمس …

مدنجه العب بالعشب ، سمعت صوت شلونج ..

فزيت ، انداريت وراي ..

حجيت فززتني ، 

جنتي صافنه ماانتبهتي  علي ..

روضتها للفرس لو بعد ..

شتكولين ..

ماجاي اسمع صوتها صار فتره اكيد تروضت ..

ماتصعب علي روضت الاقوى منها وكدرت اصعدها ..

حسيت على طكه ركبه مقابيلي ، رمشت بهدوء ، نطق وكان صوته قريب مني ،  شمكمله دراسه ميرال ..

صفنت شوي مستغربه معرفته باسمي ، شمدريك اسمي ميرال ؟!

-كاعده بيتي و ماتردين اعرف اسمج ..

-عضيت على شفتي بوتر ، همست معهد فنون ..

-مكمله معهد فنون ..

-سنه اخيره و ماكدرت اكمل صارت ضروف ..

-وفاه اهلج تقصدين ..

همست اي …

-ليش ماترجعين ..

-ناويه الله كريم بس مو هسه ..

-شنو المانع ..

-اوراقي حاليا مو بيدي ماكدر اتصرف باي شي ..

-سمعت شي ماعرف صح او خطا بس سمعت ..

-شنو  سمعت ..

-ابوج زنكيل و جان صايغ ذهب صح ..

-سكت لثواني حايره باسألته ، سألت عنه ..

-رد اكيد ، صح لو لا سمعته ..

-همس اي ..

-يعني صدك ، شجابج ويه ام ساري لهنا ..

-الي كلك ابوها صايغ ماكلك ليش جابني الحال لام ساري ..

-سمعت طراطيش حجي ، بس احب اسمع منج ، الحقيقه من السان صاحبها افضل من السان العصفور ..

-اي صايغ وحالتنه ماديه خير من الله ، بس تغير الحال و الحمدلله ، ام ساري مربيتنه و المره بنت اصول ماعافتنه لوحدنا لان تعرف مانكدر ندبر نفسه وحده بينه ضريره و ثانيه طفله ..

سكت ، شنو جابره تعيشين بملحق مال خدم وانتي بنت قصور ..

دمعت عيوني ، منو كلك ملحق الخدم اهانه لو يقلل القيمه  ..

-الرفاهيه الي جنتي عايشتها ماتشتاقين الها ..

- مامشتاقه لشي غير بس لامي وابويا ، اما الرفاهيه الي تكول عليها بدون الناس الي احبهم تكون جحيم ، سعادتنه تكون بقرب الناس الي يحبونه ونحبهم ، السعاده مو بالرفاهيه وبالقصور ، كانو حظرتك مافاهم حياه زين ..

- فاهمها اكثر مماتتوقعين ، واعرف البشر طماع من تخيري بين الغنى وفقر راح يختار الغنى بدون مايكول ليش ..

- معناها الناس الي تعرفهم غير عني ، اني غير ..

- فعلا غير كلشي بيج غير ..

سمعه يجر بالنفس ..

محتاجه شي ..

مثل شنوو ..

اي شي يابنت الخير اي شي . .

جريت نفس متردده ، بعدين تجرأت و حجيتها ، صار فتره ادور على محامي اريد اوكله يمشيلي بالمعامله مال حق وصايه و تصرف بالورث ، بس الاغلب يكولي انتي غير مؤهله ، زين يعني ابقى هيج فلوسنه كلها بالبنك واحنه عايشات عاله على غيرنه ..

اريد يكون الي حق بسحب اي مبلغ من البنك ..

يجرالج سهله ..

- بس اوراقي مو عندي اخذها واحد كرايبنه ورفض يسلمها الي ..

-شجابه عليجن وعلى واراقكم ..

جنت ساكنه عنده بالاول بعد وفاه اهلي ، لان يصيرون كرايب الوالد ، بس هو جانت نيته هو يكون الوصي علينه ،  لمن رفضت جلب باوراقنه و نكر انو هنه عنده اصلا حتى من جبت اله الشرطه هم نكر ..

- خوش حجي انطيني اسمه ثلاثي وين ساكن ..

صفنت ثواني حجيت ماعرف اسمه الثلاثي ، بس اعرف المنطقه ساكنين بيها ، ام ساري تعرف وين ساكن اسالها ..

-تمام ..

كام وكف ، اني هم توه اكوم و مد ايده يلزم ذراعي يساعدني وكفت وابتعدت عنه انفض باملابسي من وره ، 

- حجه انطيني كم يوم لان عندي سفر هالفتره  وراها ، افضلج السالفه ..

-اكون ممنونه منك ..

-يسعدني …

عفته و مشيت ، ماسمعت خطواته جن بعده واكف ، انداريت عليه ثواني بعدين مشيت كملت دربي للملحق عفته على وكفته ..

بعدها بفتره جنت كاعده بالمطبخ يم نانه ، اجو التوم ستار وبشار ياخذون الاكل يطلعو بره ؛ لان اكو عزيمه ، 

وجاي شخص عرفت فيما بعد يصير اخوها لمرت عواد ، و حظرو اله ذاك الاكل و فواكه طلع شريكهم بالشغل ، ..

العرفت ديحتفلون بنجاح مشروع ، بحيث ضلو للمغرب بره سوالف وضحك و نراكيل ..

خطيه ساري حار بالفحم مال نراكيل و النانه كل شوي طبخه شكل ، 

اسمعه ادردم بسبب وسن مترضه تساعدها بحجه ابني مريض ماكدر اضل بالمطبخ و راحت ..

-وهيه تركض هنا و هنا ، حجيت نانه دزي على تالا تساعدج ..

-لا يمه ماردها تدخل هنا خليها بالملحق  احسن ..

-ساري شال فحمات وحجه وياها بس اوديهم اذا مارادو شي بعد اجي اساعدج ..

عافنه وطلع ، اني وكفت اغسل المواعين ، و اخلي على صفحه ، احاول اخفف عنها ضغط ..

المطبخ معزول عن الفله تقريبا ، موقعه يصير اخر الفله بصف الصاله الخارجيه الي اطل على الحديقه باب ماخذ نص ركن ،

المطبخ مخصص للاكل و تركيب ومناسبات يعني ماله دخل بالبيت تربطه بالفله باب وحده تدخل منها مرت عواد ام امير ..

على كولتها ميروو ، و سن تدخل منها تنظف فله ، لذلك ماخذه راحتي ، 

كافه ردني و اغسل ، نانه حجت اودي صينيه فواكه خلصي بيدج و انتظريني ارجعه للملحق ..

تمام ، طلعت هيه و اني كملت وكفت اريد اخذ منشفه انشف ..

تمشيت باتجاه اليمنه ادور منشفه على كاونتر ..

ماكو اجت ايدي على عتبه الباب  ..

وكفت بمقابيلها ريحه جكاير و معطرات ..

عرفت هاي باب المطبخ الي تدخل على الفله ، ضليت واكفه ثواني ، اتحسس صوت والعطر ..

من صده الضحكه من بره عرفت الصاله جبيره ..

مديت رجلي اضرب بالارض صوت قوي ، جن مرمر لو كرانيت ، ضربت باصابعي باب ، باب خشب ناعم ، وطبه عميقه ..

ابتسمت ، فجأءه اختفت ابتسامتي من سمعت طبه كعب ..

رجعت رجلي ليوره و كفت بمكاني متصنمه ..

كعب رجل مو انؤثي طبه قويه بكعب غليض مو رفيع ، عرفت حذاء جلد كلاسيكي ..

ريحه عطر قويه حيل ، رجعت ليوره بسرعه ، الصوت تكرر و كانو قريب ، رجعت للمطبخ اتعثر و كفت قريب الميز درت وجهي اسوي نفسي مشغوله ..

الصوت وكف ، اي والله وكف ، بس اكو نفس و عطر هم ..

درت وجهي باتجاه الباب ، اباوع بعثره يمنه ويسره ..

نطق صاحب صوت خشن ، وكانو شارب طن جكاير او حسه مطبك ..

هيه جمله بس قشعرت بدني :- شسوين هنا انتي ، ماكلي بيبيرس جايب كحا* الليله .. 

فكيت عيوني حيل …

# يتبع ...

البارت طويل ترى 💜

كثرو تفاعل و مشاركه للقصه حتى نرجع نظام نشر القديم ..

تفاعلكم البارحه على الانستا بخصوص القصه اسعدني ..

اعذروني مارديت على كل التعليقات لان هواي والله وقت ماكو ..

صفحه على فيس ( كتابات اسماء ديمير )

الانستا .. asmaa_demer