دارت الدنيا لتدق طبول قلبي

البارت الخامس والأربعون

ايفين
كون بمكاني تصير لحظة
انت وضميرك كلي ترضى ؟؟

فهد
محتاجك بس انت زعلان
ايامي تمشي شلون ماجان
عفتك حلو شو هسه حليان
ما ادري جنت بحبي تعبان!

ايفين
كون بمكاني تصير ليلة
والله الحجي مابيه حيله

فهد
يالعايش بفركاية مرتاح
كاسرني وك ماكاسر جناح

ايفين
خلي عله بالك باجر تعيش
ومحد يسألك بايعه بيش؟
وياهو اليكلك ليش ماليش
بس البجنحك هذا ياريش !!

فهد
خلي على بالك تبقى طيري
محد يعوضك بيه غيري
_______________

(آن الأوان لنطوي صفحة كسر فتحناها من زمان )

فلاش باك  (flash back)

ايمن : وين رايح فهد؟

بعكدة حاجب جاوب..
فهد:اجيب عمال غير.

ايمن : لشنو؟

فهد: ايفين تريد تعزل..

ايمن : منين تعزل من اهلي ،لازم صايرة مشاكل بينكم؟.

مدنك يعدل كشن سيارته كال..

فهد : مني ..

ضحك ايمن..

_ تحجي صدك ..

فهد: اي والله ..

ايمن : وشلون تعيشون ببيت سويه وناس فوك ناس جوة وين صايرة هاي!!..

رفع راسه باوعله وكال..

فهد : اريد اعزلها واكسر تعاليها وابهت تمردها لأن صايرة ماتطاق ..

ايمن : شنو تريد تريحها لو تعاقبها!! شنو سالفتك..

فهد : اريحها واعاقبها بنفس الوكت حتى تعرف شلون تنتقي كلامها من تحاجيني مو توكف بوجهي بكل صلافة وتقلل من علو شأني..

ايمن : هالله هالله بالبنية فهد ترة كلنا مخلوقين من طينة ونولدنا بنفس الدنيا الفانية يعني انت ما نزلت من الجنة وهي طلعت من جوة الكاع وتالي كلنا راجعين لأعماقها...

فهد : لعلمك مدللها دلال آلاف من البنات يتمنون عيشتها،، لا اقبل احد يحاجيها ولا يتعبها ولا يتأمر عليها والف مرة كايللها هذا طبعي تحمليني شسوي يعني ما اكدر اتغير وهي تدري بهالشي وجانت موافقة شو بالجديد صارت تدور كرامات براسي..

ايمن : على كولت ادهم عينك على قارورتك تره هاي عزيزة عنده دير بالك تأذيها..

فهد : هذا يتفلسف وانه كلبي خلصان ايفين قارورة شايف لسانها اذا فلتته محد يسكتها..

ايمن : احلف عليك انت تعيل بيها تره  انت ما تنجرع يعني اسف على صراحتي بس هاي الحقيقة وجنت متراهن على ايفين تطول وياك شهر مو سنين عمي الله يعنيها على ما بلاها..

شمر عليه السويج وخزره..

فهد : تافه صاير فد مره تعين رئيس اتحاد بشؤون المرأة ..

ايمن : حجاية حق عند سلطان جائر ضروري احجيها.

حجاها وضحك..

فهد : المهم عوفك من اللغوة هاي وتعال سولفلي هجان شعنده جاي اليوم؟

ايمن : يريد يحجي ويه ادهم لو نرمان واحد منهم ..

فهد : كلت لأخوك هالحجي؟

ايمن : لا بعدني .

فهد : عليش شنو منتظر!!

ايمن : لأن اعرف ردة فعله ما يقبل عليش احجي وياه اجاوب بمكانه..

فهد : روح حاجيه وفهمه اذا مايريد يحجي انه احجي وانهي المهزلة..

ايمن: مو كال ادهم عوف هجان ولا تدوسله طرف لأن ابنك صاير بصفه لايعاديك..

فهد : بصفه كباله جوارينه مايهمني المهم اكطع رجله منا..

ايمن : وشلون تكطعها؟؟

فهد : حاجي اخوك وانطيني خبر..

ايمن : ماشي من اشوفه احجيله..

فهد : رايح اجيب العمال واذا اجوي انت اشرف عليهم لأن عندي شغل هواي ما الحك ارجع..

ايمن : الله يسهلك لاتشيل هم انه موجود..

طلع وسد الباب كلش انقهرت من سمعته هيج حجه يعني يريد يعزلني حتى يأدبني مو لأن اني ردت هيج...

دخلت جوة كعدت واعصابي فايرة اجوي العمال ورة ساعة تقريباً فات ايمن كال سووا غدة لأن الولد ما متغدين عمتي التفتت علية وكالت..

فردوس : عيني عمالج اجوي تكفلي بغداهم ، والله ياربي اول مرة اسمع وحدة تعزل عن زوجها وين صايرة هاي وين دايرة الناس راح تاكل وجهنا..

ايفين : تره اني ما طلبت منه يعزلني هو قرر من وحده..

فردوس : غير بزعتيه وراد يعزلج وين اكو رجال من وحده هيج يسوي..

ايفين : اي اني بزعته وموخوش ادمية ياريت تكولين لأبنج يطلكني ويرجعني منين ما اجيت لأن كلش استحقيت هذا العقاب عذبت ابنكم هواي ودمرته لهذا اريد انسحب لأن طلعت ما استاهله..

فردوس : اي خوش حجاية والثانية تريدين تتطلكين كومي سوي اكل لايصيحوج وبعدج ما مسوية شي..

باوعتلها ودرت وجهي رحت للمطبخ فتحت الثلاجة والغصة واكفة ببلعومي خنكتني ، فركتها وشربت مي طلعت اللحم وصفنت عليه شوكت يموع وشنو اسوي هسه...

التفتت على صوت يم الباب باوعت ايمن واكف ..

ايفين : هسه راح ابلش بالغدة..

ايمن : شنو راح تسوين؟

ايفين : ما اعرف والله حايرة..

ايمن : تمن ومركة اسرع شي ..

ايفين : اي ..

درت وجهي ورحت للسنك فتحت المي على اللحم ، بعدها طلعت بتيتة وباذنجان وفلفل حتى اسوي تبسي ، بعدني ما مبلشة بيهن دخل ايمن كال..

ايمن : لا تسوين شي فهد راح يجيب غدة جاهز..

ايفين: هو كالك ؟خاف ما يجيب ونتورط..

ايمن: لا هسه خابرني سألني عليهم كلتله اجوي بس ما متغدين و وصيت ايفين راح تسوي كال لا كللها لاتسوي انه راح اجيبلهم بطريقي .

ايفين : اذا هيج زين..

رجعت كلشي بمكانه غسلت ايدي ودخلت للغرفة يم ضي كعدت ، سألتني شبيج بدون ما اجاوبها بجيت مخنوكة كلش جنت بعدها خليت راسي على المخدة ونمت...

ثاني يوم الصبح كعدت تريكنا اني وضي ونظفنا البيت بعدها بلشنا بالغدة اجتي سيرة نرمان ردنا نعرف شبيها ليش ماتطلع يمنا وبس للحمام وترجع وحتى اكلها خاص مو مثلنا ، ظلينا نتسائل بعدين كلتلها..

ايفين : اكولج معقولة عمو ادهم كاعد يعاقبها شو ماكاعد تدخل بعقلي شنو السالفة ليش حابسيها؟

ضي : اني سألت ايمن عن رأي ادهم بالموضوع وشنو الصار بينهم وحجالي بس تفاصيل قليلة العرفته ادهم كلش متعاطف ويه اخته لدرجة خايف عليها وعلى نفسيتها واعتقد انعزالها بأرادتها وبنفس الوقت حتى لاتتعرض لكلام جارح من فهد وايمن ولايستفزوها وتوصل للضرب..

ايفين : هاا هيج زين شنو كالج عن عمو ادهم بالضبط؟

ضي :حجه ويه فهد عن هجان على اساس يريد ييجي للبيت يحجي ويه ادهم ونرمان بس ايمن راد يسدها من يمه بدون ما يسأل ادهم بس فهد اصر ياخذ رأي ادهم قبل لا يقفل على السالفة..

ايفين : زين ..

ضي : اي يكول رحت بالليل لأدهم لكاه كاعد بالحديقة كعد يمه وفتح الموضوع..

ايمن : ها سهران اليوم ؟

ادهم : الف حسبة براسي وبالي يم سيلين اريد تنطوي الأرض حتى اوصللها ..

ايمن : ماعليها شي ان شاءالله ضيغم موجود يمها وهي سباعية..

ادهم : اعرف بس خايف عليها هاي رقيقة ما تتحمل تعب وضغط واعرفها تتعب بدوني ..

ايمن : انت شنو ناوي تسوي ؟ استعجل حتى تكمل كلشي وتسافر .

ادهم : خلي اشوف شغلة نرمان شلون راح تصفى بعدها احسم الموضوع واسافر..

ايمن : تمام ، ادهم البارحة اجاني هجان..

عكد حاجبه كال..

ادهم : وشنو يريد ؟

ايمن: يحجي وياك او ويه نرمان..

ادهم : شنو جاوبته ؟

ايمن : ما جاوبته بعدني بس ناوي اقفلها بوجهه.

ادهم : هذا هو زين تسوي..

ايمن : زين وضع نرمان شنو تظل هيج معلكة لامتزوجته ولا مطلكها؟؟

ادهم : هسه كلشي ما اسوي راح اخليه بفترة اختبار مفتوح يا اما يتنازل عن ملاك ويثبتلي هالشي مو بس كلام مثل ايام الخطوبة ويتمسك من صدك بنرمان ويريدها الها لذاتها يله انطيها اله يا اما يظل يطارد شبح ملاك وبهيج راح يخسر نرمان ويخسرني للأبد ...

ايمن : عين العقل انه بهذا الشي وياك ابو الأداهم حتى يعرف اختنا شكد غالية وعزيزة عندنا بس تدري شغلة واكفة بزردومي لو بس تخليني افوت احجي وياها اسألها ليش هيج سوت ليش تقشمرت مو والله كاعد افور تفور كلما يمر ببالي هذا الموضوع..

ادهم : اذا دخلتلها اعرفك تفرط اعصابك وتضربها وانه كلشي ولا قارورتي وعزيزتي تنضرب ، صح ضربتها بوقت السمعت بيه وجان الموقف كلش صعب ما ينحمل بس حيل تندمت ..

ايمن : ادهم شعجب ما تداركت الموقف ولميته ليش هيج كبرت السالفة؟

ادهم : ايمن الموضوع طلع من ايدي ، تخيل انه جاي من سفر ورجعتي بسبب هجمان بيت صديقي وابن عمي والسبب بهجمانه صعب يعني برجوعي انه حاط عليه علامة وشايل بكلبي ، وصلت بعدني تعبان وراسي يوجعني توني كاعد اتغده بعدني بأول لكمة نزلت اختك تبجي عفت الأكل كمت وراها سديت الباب وسألتها بهدوء ..

ادهم : شبيج حبيبتي ليش تبجين منو وياج ؟

جاوبتني تشهك عبالك طفلة..

نرمان : ادهم بس تخيل خطبني علمود يكسر ملاك بية..

ادهم : هجان ؟

نرمان : اي اكو غيره..

ادهم : شلون عرفتي!!

نرمان : سمعته..

ادهم : احجيلي شنو سمعتي بالضبط؟

نرمان : يتعاتبون ، يكوللها شلونج بس كوليلي حتى انزل ورجعتيلي وتريدين اعوفج ومثلما رجعتج مناك ارجعج لكلبي، يكوللها رجعتي لمكانج الصحيح واتركيه هو ما يستاهلج و سمعتج شلون تحجين ويه نرمان وتبجين بسبب خبر خطوبتنا وايقنت وتأكدت انتِ ما يوم نسيتيني ومتجذر بداخلج لا ضيغم ولا عشرة منه راح ينسوج صعب..

هنا تخبلت عقل ماظل براسي تأكدت طلاك ضيغم وملاك بسببه مو مجرد كلام باطل انحجه عنه ، بعدني احجي وياها دخلي فهد مثل الأعصار وسد الباب وكف كبالي اعصابه ترجف كال.

فهد : لك ادهم تعال اسمع السمعته هذا الناقص تدري شنو سوه ؟

ادهم : سمعت اختك كاعد تحجيلي..

فهد : كالتلك خطب نرمان علمود يكسر ملاك ، ويكوللها كسرتيني بصديقي كسرتج بصديقتج وحدة بوحدة..

ادهم : هيج كال متأكد ؟؟

فهد : اي..

ادهم : دز عليه اريد احاجيه ..

طلع فهد صاحه دخل مجرد باوعتله ما عجبني احجي وياه واخليه كبالي ويبررلي ماردت حتى اسمعه ردت يطلك اختي ونخلص منه ، بس تفاجأت من كال اختكم حامل بأبني وما اطلكها، والمصيبة طلعوا ابوك وامك وبعض محبين الأخبار واكفين يم الباب وسمعوا كلشي ، خصوصاً من انهار فهد وحتى انه انهاريت ماحسبت حساب لوجود احد الموقف كله حرك كلبي..

ايمن : اخ لو موجود واسمعه يكول لفهد اختك مقابيل اختي وهذا دين وفيته بعد سنين والله جان خليته يطلع زحف من البيت..

ادهم : ما قصرنا وياه انه وفهد بس المفروض من اختك ما تجازف هيج مجازفة لأن الخطوبة هي فترة تعارف غير تعرفه وتختبره شو هاي كبل سلمت مشاعرها وكلبها وروحها ، خليني ساكت ايمن الموضوع متعبني حيل وحاز بنفسي..

ايمن : مو المشكلة تتوقعها من الكل بس من نرمان تستبعدها لحد كطع النفس.

ادهم: المهم عرفت غلطها وين وما اصرت تكمل بالغلط..

ايمن :المهم هسه اسد الموضوع وياه؟

ادهم : اي لا تعبره ابد خليه يحس بغلطه وبمنو اندك..

ايمن : ماشي هذا هو..

ايفين : وبعدين شنو راح يصير.

ضي : ما اعرف اعتقد رجلج راح يحجي وياه لأن ايمن كال مصر يجتمع بهجان.

ايفين : اصرار فهد وراه شي متأكدة الأ هو وين يحب هجان؟

ضي : الله اعلم بعدين تنعرف..

ايفين : تنعرف ماكو شي ينضم..

كملنا الغدة اجوي الولد تغدينا وشربنا جاي بعدها كعدوا فهد وايمن سويه حجوا بسالفة هجان والحديث الدار بينه وبين ادهم ، فهد كاله اني راح اروح لهجان واحجي وياه استغرب ايمن ..

ايمن : انت تروح برجلك لهجان شعجب ؟

فهد : هو مو راد يشوف ادهم لو نرمان حتى يحجي وياهم؟

ايمن: اي بس رفضوا.

فهد : انه راح احجي وياه..

ايمن: على شنو ناوي فهد ؟

فهد : بعدين تعرف  ..

طلع فهد من البيت صعد سيارته وجبال الهم تحاصره وتعتصر قلبه ، شمر نفسه على الكشن رجع راسه ليوره راد يتنفس اختنك من الضغط الكاعد يمر بيه..

وهذا يصورلنا جانب من شخصية فهد المبهمة غير العرفناها بالهزلية والضحوك والمخطط والذكي وباقي صفاته التعرفنا عليها ، بس ما عرفنا هو من شنو متضايق وليش يريد يلتقي بهجان ويروحله برجليه ..

ضرب على الستيرن بعصبية شغل سيارته وراح طبك بالفرع مالتهم دز مسج لهجان بلغه بمكانه ، دقايق وطلعله هجان يمشي وعاكد حاجبه مستغرب جية فهد المفاجأة ، وصل للسيارة صعد بدون سلام كال ..

هجان : صاير شي ؟ 

فهد : لا بس اريد احجي وياك .

هجان: بخصوص ؟

فهد : اتفاق بيني وبينك بدون علم احد واذا سمعت بالكلام تحرف تعرفني شنو اسوي ياهجان.

هجان : شنو تريد ؟ وليش بالختله ولازم اتكتم ؟

فهد : اخليك تحجي ويه نرمان وتتفاهم وياها وتعرف كلشي يخص علاقتكم وممكن حتى اساعدك ترجعون سويه بس بشرط ...

هجان : شنو الشرط غرد اسمعك.

فهد: تقنع ابوك تطلع رواية وعلي من البيت.

هجان : من بيتنا ليش يابه و وين اوديهم..

فهد : اشتريتلهم بيت وسجلته بأسم علي واريدهم يكعدون بيه ويستقرون ماعجبني وضعية الجناين واللخة ابني اريده يكعد ببيت خاص بيه وحده..

هجان : واذا انت هيج نيتك شريفة وتحب تسوي خير كول لأبنك ليش تريدها بالخفاء..

فهد : لان ابني ماراح يتقبل مني شي بسبب الخلاف الأخير الصار بيني وبينك.

هجان: لعد شلون اطلعهم من بيتنا اذا ما اكوللهم انت اشتريتلهم بيت وسجلته بأسم علي وتريدهم يستقرون..

فهد : اذا كلت انه اشتريته مو بس علي يمانع حتى اختك ماراح تجي وتكعد بيه  لهذا اريدك انت تقترح عليهم يطلعون ببيت وانت الراح تأجرلهم وتصرف عليهم مثل قبل..

هجان : ولحد الان انه متكفل بيهم قبل شنو..

فهد : هو لهنا واريد تشيل ايدك عنهم ، كدامهم وكدام الكل هجان المتكفل بيهم هجان اليصرف والبيت راجعلكم بس بالخفاء انه متكفل بيهم وبكلشي يخصهم..

هجان : بس هيج لويت ايدي فهد يعني تاخذ اختي وابنها مقابيل اختك.

فهد : اخذها شنو بابه ، لا راح اتزوجها ولا اوصل يمها مجرد اريدهم يستقرون بعيداً عن المشاكل واخلاق اخوتك الزفت شنو ابني راح يدخل جامعة وهو ببيت اهل امه وحتى من ييجي يمي ما مستقر هم ببيت الجد ، اريدله مكان ثابت بيه هو وامه .

هجان : وشلون تصرف عليهم وتتسوكلهم اذا تريد اشيل ايدي عنهم..

فهد : امولك بالفلوس والباقي عليك وشويه شويه اكوم اتدخل بيهم الى ان اسيطر على الوضع مجرد المس منهم تقبل لرجوع علاقتي بيهم..

هجان : وشلون راح تقنع علي الحرب بيننا انتهت وترجع علاقتكم..

فهد : هاي علية لا تشيل هم المهم هسه تروح وتحجي وياهم وتطلعم من البيت بأقرب فرصة لان البيت كامل من كلشي حتى اثاثه جاهز..

هجان : افتح وياهم الموضوع واشوف..

فهد : انتظر منك خبر.

هجان : ماشي بس المهم ماتنساني ..

فهد : لا هذا هو..

نزل من السيارة وراح لبيتهم شخطت سيارتي ورجعت للبيت فتحته وكملت كم شغله كهربائية و شديتلهم كامرات بالخارج وطلعت...

ورة كم يوم خابرني هجان وراد نلتقي والتقينا بمكان كعدنا نحجي..

فهد : شنو الصار ؟

هجان : فتحت الموضوع عارضني ابويه بقوة بعدها وافق بس بشروط طبعاً..

فهد : شنو الشروط؟

هجان: كال اذا طلعت رواية البيت يتقسم لو كل واحد يطلع يشتري ويعزل لأن هو هم تعب من الهوسة..

فهد : ما علية بيه وبشنو يفكر المهم علي وامه شنو رأيهم..

هجان : رحبوا بالفكرة بس من سمعت رواية راح يعيشون وحدهم بالبيت رفضت عبالها انه وياهم نكعد سوه...

فهد : ماعندي اعتراض اكعد وياهم بس مو بشكل دائم.

هجان : هو فهمتهم اروح واجي عليهم ومرات ابات بس كلتلهم راح اقسم البيت البصف بيت جدي وارتبه حتى نكعد بيه انه ونرمان .

فهد : وليش تروح تكعد هناك بيعه واشتري بمكان ثاني وين جامعهن سوه

هجان : مؤقت بينما يقسم ابويه البيت واروح اكعد هناك لو ابيع حصصي واشتري بمكان ثاني ..

فهد : هذا هو متفقين بس اهم شي عندي هسه استقرار علي..

هجان: هذا الاسبوع هم بالبيت.

فهد : هذا هو ..

نزل من سيارتي صعد سيارته وراح ، التهيت بين العمال ببيت اهلي وبناء المطبخ وباقي التفاصيل لأيفين ، وبين نقل غراض علي ورواية جنت اساعد بدون ما يحسون بية من بعيد لبعيد..

وراها صارت شغلة نرمان من اخذناها للدكتورة ، وتعارك هو وايمن بعدها خابرني وعاتبني ليش ما بردت كلبه كلتله ادهم ويايه موجود ماكدرت ابين انه وياك..

ادهم : ولهذا السبب انت ماضربته ويه ايمن وانه اكول شعجب فهد يشوف عركة ويوكف صافن بيها..

فهد : اي لأن جنت متفق وياه يشوف نرمان ويحجي وياها بس التهيت وماحاولت وياك بعد..

ادهم : وخوش مشيت الفلم علية وعركة ومخابيل تالي طلعت متصرف  من وره ظهري ومستغفلني يافهد..

فهد : لا تحسبها هيج لأن لوما استخدمت هذه الحيلة مستحيل ابني وامه يستقرون ببيت وحدهم وانه اتكفل بيهم لأن هجان ماراح يرضى وممكن يحرض ابني ضدي .

ادهم: لعد شلون رحت لبيتهم وشافتك ايفين ؟

فهد : خابرت علي كلتله سمعت شايلين ببيت قريب علية غير تعزم ابوك تغديه يمك كال تعال هله بيك ورحت تغديت بالحديقة وطلعت حتى ما دخلت للبيت ولا شفت رواية..

ادهم : ليش مابلغتها لأيفين وحجيتلها مثلما فهمتني هسه ماجان اختصرت علينا هواي مشاكل وتفاصيل..

فهد : ماحجيتلها لأن جنا مانحجي وشبه متقاطعين..

ادهم : زين انت سجلت البيت بأسم علي وهو مايدري..

فهد : رتبناها انه وهجان ..

ادهم : بس انت كلتلي من حجيت ويه هجان كلتله اشتريت بيت وسجلته باسم علي.

فهد : اي كلتله هيج حتى يوافق يطلعهم من البيت بعدين من كعدوا واستقروا نقلت البيت من اسمي لأسم علي..

ادهم : لك شلون هيج فكرت وشوكت خططت واحنا بداخل ازمة جبيرة وراسنا مليان بالمشاكل..

فهد : والله من زمان مخططلها بس ماجانت عندي فرصة انفذ وحاير شلون اقنع هجان واخليه يقنع رواية وعلي بس هي ترتبت من ربك..

ادهم : ونعم بالله زين سويت من استقروا بس شغلة ضوجتني من تتصرف بدون علمي وتنطي كلمة عني لهجان ، خلي ابالك نرمان ما انطيها يحلم يشوف اظفرها اذا ما اتأكد منه وكلبي يرتاحله..

فهد : ما اعرف بعد انت تصرف من صدك هالمرة راح اطلع منها .

ادهم : جددت جوازها ورحت فيزتلها  ؟

فهد : اي كملته والباقي على ايمن  راح يفيزلهم سوه..

ادهم : هذا هو حتى تسافر وترتاح فترة تغير نفسيتها وبنفس الوقت نشوف هذا شلون راح يتربى ويتأدب..

فهد : تمام رايد مني شي بعد لو اروح اشوف ايفين صحت لو بعدها..

ادهم : ما اريد روح شوفها واذا كعدت اتصل علية حتى اجي ...

فهد : ماشي...

راح سأل وكالولة كعدت طلب يدخل يمها سمحوله بس لازم ما يتعبها لأن ممنوع عليها الأجهاد..

دخل يباوع عليها ويدعي بصوت مسموع .

فهد : رحمتك يا الهي شافيها وتعدي عليها سلامات وجازي تعبها ويايه بخير .

تقرب منها مسح كف ايدها بأيديه باسه ورجع باس باطن ايدها ودفن كصته بكفها ، وهمس بدموع تجمعت بكفها..

فهد : لج والله احبج ايفين انتِ مو بس ام لأبني ولا زوجة عادية ولامجرد صديقة اكعد وافضفضلها عن البداخلي لا انتِ جنتِ ام مرضية صاحبة روح شقية تتحمل تبعات مشاكل ابنها وتحلها اله وتسايره وتهتم بيه ومن يجوع تتفقده ومن تعبان تسنده ومن مرضان تسهرله ...

بلع غصته  رفع راسه وقربه من اذنها وكمل كلام..

فهد : ففه مو اكو اولاد اشقياء ويأذون امهم وتتحملهم ومرات توصل بيهم مرحلة يجلطوها ، صدكيني انه هيج مثلهم بس محد تحملني غيرج محد فهمني وعرف يعاملني مثلج ففه والله بس تكعدين وترجع صحتج ابد ما اضوجج ولا أأذيج واي شي يغثج ابتعد عنه..

اسمعه وبداخلي ثورة غضب اكو صوت  قوي ينهرني اتأثر بيه ويريدني اكعد من سباتي واكو صوت ثاني يلوم بيه ويكولي قرارج غلط يحبج بس هذا طبعه استمري وياه وسايريه..

بين الصوتين فتحت عيني وهمست بتعب...

ايفين : فهد كلشي بيننا انتهى اطلع ما اريد اشوفك كبالي .

حجيتها كلمة كلمة بصورة متقطعة البعض منها مبهم وبعضها مفهوم...

تنهد وطلعت اه من حنجرته ، لأول مرة يباوعلي بهيج نظرة بيها حنية ممزوجة بنبضاته المتراجفة تداخلت بيها علامات الرفض النرسمت بوجهه بأبتسامة حزينة ونبرة صادقة كال..

فهد : شلون كلشي ينتهي بيننا يعني تعوفيني وتروحين وهذا هو ينتهي كلشي ولج ففه انه ضلعج فهد شلون تعوفيني وتروحين شلون تيتميني..

لملمت بقايا نفسي ضحكت وحجيت بثكل بدون ما التفت عليه..

ايفين : صح انت ضلعي بس ضلعي الأعوج وما راح ييجي يوم تنعدل سامع بضلع عدل ماكو كلهن عوج..

بين ذهوله وجزعه بأن يقنعها طغت هالة الحزن على ملامحه وهمس بتعب..

فهد : ففتي حبيبتي ارتاحي هسه وبعدين نحجي لا تتعبين نفسج..

سكتت ماجاوبته واصلاً ما اكدر احجي..

ثاني يوم طلعوني ونمت بالغرفة الجوة جانوا مهيأيها اليه قبل خروجي من المستشفى، العرفته ضاربتني جلطة خفيفة تلاحكولي وجانت مخلفاتها ثكل بالساني وايدي اليسرى بصعوبة احركها ،

كالوا بمرور الوقت وبالعلاج الطبيعي ارجع مثل قبل بس يراد وكت وصبر واضافة لهذا صارلي نزيف وطرحت لأن الحمل جان ضعيف وبسبب رجفتي والصار طرحته.

من هدأ البيت وزال التوتر دزيت على ادهم حتى احجي وياه ، طيلة فترة بقائي بهاي الغرفة فهد ما اقترب احترام لرغبتي ، كعد يمي وحجيت وياه شويه اكتب بالموبايل بأيدي اليمنى وشويه احجي حسب الأكدرله ..

ايفين : ادهم اريد اسافر اني وابني واتعالج بالخارج ما اريد اظل هنا..

قراها وكال..

ادهم : شلون ايفين اسفرج وانتِ بهاي الحالة بعدج تعبانة مو مال طريق وبهذله السفر..

ايفين : اذا ظليت هنا ما راح اتحسن الله يخليك خلصني واعتقوني لوجه الله..

ادهم : ميخالف بس اهدأي تنحل الامور كلها بس شوية يراد صبر وتأني ..

ايفين : ما اصبر بعد خلص صبري اريد اسافر ويه ايمن ونرمان اروح يمهم ابقى فترة وافكر كلش زين يله اقرر استمر ويه فهد لو انهي..

ادهم : صار راح احجي وياه وان شاءالله نوصل لحل يرضي جميع الأطراف لأن مو وكتها ابد اعانده بهيج شي ويرجع يتخبل علينا تتذكرين شنو سوه علمود علي ورواية وراح يعيدها ويانه اذا سفرتج بدون علمه.

ايفين : ما يخصني لا هو ولا الراح يأذيهم حشاك طبعاً بس اذا راد ابنه خليه ياخذه هو ابوه ويربيه احسن مني..

ادهم : لعد شكد متعذبة لدرجة تستغنين عن امومتج مقابل حريتج ..

حجاها وعيونه حزينه .

ايفين : انت اكثر واحد تعرفني شكد تعبت واني احاول اصلحه واتأقلم واعيش يومي بسلام وتالي هاي النتيجة..

ادهم : ارتاحي وان شاءالله باقي حياتج تعيشيها براحة وخير .

ايفين : امين..

كتبتله عن موضوع رواية وشنو سالفة البيت وسبب تواجد فهد عندهم بذاك اليوم فهمني كلشي بالتفاصيل...

بعدها استأذن وطلع مسحت الحجي بالمسودة مال موبايل طفيته ورجعت مددت ، شوية ودخلت ضي جايبتلي اكل ، كعدت كبالي وكامت توكلني اكلت شويه ودفعت ايديها اكتفيت ...

ضي : ما اكلتي شي؟

جاوبت بلسان ثكيل..

ايفين : شبعت..

ضي : يله براحتج تشربين مي..

هزيت راسي بلا بعدين كتبتلها بالموبايل لأن اتعب من احجي ويرادلي جهد..

ايفين : ضي احجيلي من وكعت شنو صار وراية وعرفتي طبيعة علاقة فهد برواية شنو ؟

اخذت الموبايل قرته وكالت..

ضي : من وكعتي تخبلنه لان نزفتي بنفس الوقت ، ايمن وعلي طلعوا برة وبقينه اني ورواية ، خاف احجيلج عنها وتضوجين..

كتبت..

ايفين : عادي احجي.

باوعتلي وكالت..

ضي : خليت راسج بحضني هي راحت جابت مخدة خلتها بالكاع ونيمناج عليها ، بعدين جابت كرسي ورفعت رجليج لان تخبلت من شافت الدم وسألتني حامل او لا كلتلها اي حامل ، انقهرت وكالت..

رواية : هسة فهد يتخبل من يعرف بيها طرحت..

ضي : خطية توها عرفت مالحكت تفرح بيه.

بعدها راحت جابت مي وغسلت وجهج بيه وظلت كاعدة فوك راسج مبينة صدك خايفة عليج الإ هي ما مجبورة جان تركتج ودخلت جوة ..

ايفين : وشنو صار بعدين ؟

ضي : اجه فهد فتح الباب شافج فتح عينه مصدوم تجاهل وجودنا شاف الدم ماعرف شنو يسوي انسطر بعدين سمع ايمن يكوله..

ايمن : فهد شيلها ناخذها للمستشفى تره ايفين حامل .

التفت على ايمن مصدوم باوعله ورجع باوعلج ، مد ايديه شالج وطلع طلعت وراهم وصلت للباب صاحتني رواية التفتت عليها كالت..

رواية : ضي من توصلين اتصلي علية طمنيني .

ضي : ان شاءالله..

صعدنا ايمن ساق السيارة وفهد كاعد ليورة خالج بحضنه واني صعدت يم ايمن ليكدام والطريق كله يرزل بأيمن ..

فهد : استعجل شبيك تمشي بطيء قابل زفة ابوك ...

ايمن باوعله بالمرايا وكاله.

ايمن: هيو شبيك اكثر من هيج سرعة شكد امشي بعد..

فهد كام يفشر فشار عزف مسامعنا وصلنا للمستشفى يريدون ياخذوج من ايديه حتى يخلوج بالسديه وينقلوج للغرفة مجلب ميقبل يكوللهم ..

فهد : انه اوديها اسرع بس دلوني وين اخذها..

متعرفين تضحكين لو تبجين على الموقف انخبص خبص.

ايفين : بولادتي هم هيج سوة ..

ضي : اي خطية ومن دخلوج وكف بباب غرفتج خايف ويرجف لأن عرف من الأطباء لو متأخرين اكثر احتمال راح يخسرج 

بدموع الندم وحركة اعصاب كعد بالكاع وايمن يصبر بيه طولتي جوة هواي خابرنا على ادهم اجه هو وعمو يوسف ، خطيه ادهم كلش انقهر ومن سمع السبب تخبل على فهد ، انتظره يرتاح وعرفوا بحالتج استقرت اخذه وراحوا على صفحة ظلوا يحجون بينهم بس اشوف فهد يبرر وادهم عاكد حاجبه مكتف ايديه ويستمع ، بعدها كالوا كعدت ودخل عليج فهد..

ايفين : ممممم.

سكتنا بعدين غيرت الموضوع وكامت تحجي شغلات اعتيادية ، بعدها اجه حمودي نام بحضني رغم تعبانة بس حضنته وخليته يمي متعلم علية وصارله كم يوم بعيد احسه يتيم بدوني ..

مرت يومين وصارت عاصفة بالبيت الفهمته ادهم فتح موضوع سفري ويه فهد وكب عياط وصياح عليهم بعدين كعده ادهم وفهمه بوجهة نظري ولازم اسافر حتى ارتاح واتعالج..

فهد : هاي السوالف النفسية لا تمشيهن علية هسه تصير زينة اطلعها اونسها تكوم تركض ويرجع لسانها يغرد ..

ادهم : الوضع اختلف مو على مزاجك امشي ..

فهد : ممنوع تسافر وهذا هو سدوا الموضوع..

ايمن : تعال انت ويانه.

فهد : ما اسافر مرتبط بشغل وين اعوف محلات ابوك وهذا علي عنده محاظرات مال صف سادس شلون اعوفه؟

ادهم : هي اساساً تريد تسافر مهزومة منه يروح وياها شنو؟

فهد : رجاءاً عائلتي لحد يتدنالها لا تخبلوني ادهم حير بأخوانك وبعائلتك وانه طلعني من راسك.

ادهم : برضاتك لو غصب عنك ايفين تسافر..

فهد : شلون سالفة هاي ترة طوختها هواي.

ايمن : حلاً للنزاع ادخل احجي ويه زوجتك اذا قنعتها تبقى احنا ننسحب واذا ماكدرت تقنعها ، اقنع نفسك وبطل انانية خلي البنية تتعالج وترجع صحتها ونفسيتها وانه اجيبها بيدي..

فهد : انت مو راح تبدي دراستك كورس ثاني شلون راح تجيبها..

ادهم : مو مشكلة خليها ترتاح شهر وروح سافرلها اذا ايمن ماكدر..

ايمن : اي اذا ماكدرت تعال انت رجعها..

فهد : شلون قهر هذا يامحمد ..

حجاها ودخل لغرفة ايفين شافها متمددة ومغمضه عينها اقترب وكف فوك راسها وكال .

فهد : كعدي احاجيج..

فتحت عيني باوعتله..

ايفين : نعم ؟

فهد : شنو السمعته ؟

ايفين : شنو ؟

فهد : اتفاقيات من وراية وسفر وحاله نفسيه وعلاج ومن هالكلاوات..

كتبتله..

ايفين : اي امثل عليك غير..

قراها وكال..

فهد : مو قصدي مو قصدي هيج يالكائنات بس شلون تريدين تعوفيني وين رايحة انتِ وابنج ولج انه ما متعلم يوم انام بدونكم يايوم عفتيني وبتي خارج البيت لو انه عفتج غير بالدوام واجي متلهف عليكم ..

كتبت..

ايفين : لهنا وخلصت طاقتي ما اكدر اكمل بعد..

قراها عكد حاجبه كال..

فهد : بس انتِ تعرفين من البداية زواجنا مو متكافئ وعلاقتنا مو مثالية وينضرب بيها الأمثال ، اخذتيني مريض واعترف تعبتج هواي وبجيتج وخوفتج واجتي ايام من قسوتي عليج ما جنتي تنامين من قهرج بس والله يا ايفين انه جنت مريض وتعبان وطبيعة شغلنا هيج وتعودت على هذا النمط ويه الكل مو بس وياج.

كتبت..
ايفين : اي صح مو متكافئ لهذا تعبنا اثنينا واجه الوقت نصحح الخطأ الوكعنا بيه وانت كلت زواج مصلحة وصفقة احصل ابني من خلالج وحصلته واجه الوقت اللازم ننهي بيه كلشي وتوفي بوعدك اليه .

يقره ويسوي حركات بفكه باوعلي ضيق عينه وكال.

فهد : اي صح بس هاي قبل لا احبج واتعلق بيج هسه اختلف كلشي وصار عندنا طفل اذا مو لخاطري اتحملي لخاطره وراح اغير من نفسي اوعدج..

رجعت كتبت..

ايفين : انت نطيتني وعد تعوفني بس تحصل ابنك وماوفيت بالوعد والأعرفه فهد كلمته مثل حد السيف اذا وعد يوفي مو صح وبعدين هواي واعدتني تغير من نفسك وتتحسن وكل مرة ينعاد هذا المشهد واتأمل خير وتالي ماتالي ترجع اسوء واتعس من قبل وتعاملني بتعالي ورفعة خشم كأنما تحسسني انت وين واني وين وتزوجتني متفضل علية الى ان حجيتها بلسانك وتأكدت انت هيج ماخذ  نظره عني...

قراها ويهز براسه مدري متحلف مدري من العصبية الهو بيها رفع راسه باوعلي وحجه بنترة كال..

فهد : هذا هو روحي بس شهر وترجعين ..

شمر الموبايل على الفراش وطلع...

بأسبوع واحد كمل كلشي من حجز وغيرها قبل ساعة من طلعتنا للمطار دخل يمي شال حمودي بوسه هواي من خده ومن راسه ورجع شمه من ركبته دمعت عيونه اختنكت الكلمات بحنجرته ، من كال ..

فهد : راح اشتاقلك بابه حبيبي دير بالك على امك ياسبع ..

نزله واجه بأتجاهي جنت كاعدة على الكرسي قرفص كبالي لزم ركباتي وباوعلي كال..

فهد : البارحة سمعت ادهم يحجي لسيلين كم كلمة جبتهن ويايه واجيت اشعرلج..

باوعتله شكد جنت ضايجة منه ضحكت هو هم ضحك بس مو مثل كل مرة لا ضحكته مكسورة بس حجه هيج حتى يضحكني واروح ما شايلة بكلبي عليه حفظته حفظ اكثر من نفسه اعرفه..

ايفين : شنو بكت هالمرة..

مسح طارف عينه وكال..

فهد : كاعد بالحديقة ضارب ركن جنا واحد مراهق خال رجل على رجل ومتمدد على القنفة الخوص ويشعرلها الليل كله..

ايفين : وشمدريك انت ؟

فهد : جنت فاتح شباك الأستقبال احتريت ردت يفوتلي هوى حتى اكدر انام وسمعته.

ايفين : يعني ما متقصد تتصنط..

فهد : لا توبت حرام سرقة السمع..

ايفين : زين عرفت..

كل كلامي بثكل احجيه واحسه كوه لازم نفسه ما يضحك على طريقتي بالكلام يمثل عود هو مقهور ومتأثر بس وين يمشيهن عليه باوعلته وكلتله..

ايفين : شنو حفظتلي هالمرة.

ضحك وكال..

فهد : يكوللها ذهلت من ذاتي كيف ، شلون بله اوكفي نسيت والله صعبة..

ضحكت عليه رجع كال ها تذكرت..

فهد : ذهلت من ذاتي لفراقكِ نمتُ و صورة ثغرك تتراوى في بالي ، اغمضتُ عيني ...

وسكت بعدين كام يدور بجيوبه طلع الموبايل ..

فهد : صعبة والله كتبتها اوكفي هسه اقراها..

ايفين : ادري مجبور تسمع وتحفظ وتكتب..

فهد : مو يكولون المرأة تحب هيج سوالف وانه ما اعرف غير الأحبج ففتي كلت مابيها شي نتعلم.

ايفين: يله احجيها عاد ورايه سفر..

عكد حاجبه ورجع يباوع بالموبايل وقراها واخيراً..

فهد : ذهلت من ذاتي كيف تحملتُ فراقكِ الأمس غفوت و صورة ثغرك تتراوى في بالي ، اغمضتُ عيني وتخيلت احمرار وجنتيك ودهشتي وانه اقبلك بحرارة اه يا اجمل امرأة انثوية عشقت كل ثنايها..

اخذت الموبايل منه وكتبت..

ايفين : هاي سمعت عمو وظليت تكتب وصارلك ساعة تقرالي من الموبايل وبالكوة تلفظ الكلمات بصورة صحيحة فهد وخر خليني اطلع تأخرنا..

فهد : انه بالغزل مو زين بس بال..

وباسني بقوة وحضني اكثر مرة يحضني بيها بهيج قوه حسيته خايف يخسرني ويمكن يريد يحنن كلبي عليه ، وخر باوعلي وكال..

فهد : راح اشتاقلج ..

هزيت راسي ساكتة، ساعدني ومشيت بس خطواتي ثكيلة طلعت للهول سلمنا عليهم و ودعناهم اني وعائلة ايمن ونرمان ، سندوني البنات وايمن ويانا ويانا الى ان وصلنا بخير وسلامة لتركيا اول ما وصلت راسلت سيلين طمنتها  خطية تعبت كلش من سمعت بيه وهواي خافت بس ارتاحت من وصلنا وشرحتلها اني زينة ومابيه شي واجيت اتعالج وان شاءالله عاصفة وتمر..

سيلين : ان شاءالله اهم شي انتِ مرتاحة هسه ؟

ايفين : اي الحمدلله بس قهرتني نظرة فهد من نزلنا للمطار ونزل الجنط ابد ما كدر يخلي عينه بعيني ودعني وعيونه بغير مكان واول ما نزل الجنط بالكراج شخط سيارته وراح..

سيلين : طبعاً ينقهر بس خليه يحس بقيمتكم حتى من ترجعون يقدر النعمة الهو بيها وما يتبطر عليها..

ايفين: ان شاءالله..

سيلين : افونة اروح اني لأن ضيغم يريدني..

ايفين : ماشي سلميلي عليه باي..

سيلين : يوصل الله وياج...

نهيت المحادثة ويه ايفين وكمت على ضيغم..

سيلين : ها عيني صحتني؟

ضيغم : اي فدوة سيلين اتلاحكيلي بمسكن مفصل رجلي موتني ماكاعد اكدر انام..

سيلين : ليش يوجعك خاف هواي تضغط عليه من توكف..

ضيغم : ما اعرف كلتلها كاعد اتعب تكولي عادي .

سيلين : المهم هسه انطيك العلاج وبلكت الله يهدأ الوجع وتصير زين..

ضيغم : يسمع منج الهي ياطيبة..

نطيته المسكن اخذه ومدد ، من اجتي المعالجة ثاني يوم شرحلها الوجع وين يرتكز وكالت هذا الشي كلش زين يعني كاعد تتحفز العضلات ومشيتك قريبة بس يراد تتعب على نفسك كلش فرحت وردت ابلغ ملاك بس كلت لا خلي انتظر اشوف حجيها بنتيجة يله اكوللها خاف تتحمس على الفاضي ..

مشت الأيام وكل يوم المعالجة تجي وتكثف التمارين خصوصاً تمارين المقاومة والتأهيل ، بعد مرور ٣ اسابيع خطى اول خطوة ضيغم من فرحتي نسيت روحي حامل وكمت اكمز وابجي ، فتحت الموبايل صورته من خطى خطوته الثانية منها وحددوا موعد عمليته الثالثة من خلال مراجعته للدكتور ويه اياد كال..

_ مادام صار تحسن معناها العملية الثالثة ضروري يسويها هسه حتى يمشي..

تحدد الموعد نهاية الشهر الجديد من فرحتي بهذا الخبر اتصلت على ملاك ما جاوبتني كلت احتمال بالدوام بعدها ماراجعة دزيت الفيديو مال خطوات ضيغم الها ورة ساعة طلعلي تم التسليم وماكتبت شي ثواني وطلعلي اخر ظهور بفلان وقت ..

استغربت ملاك تشوف شي مني وبخصوص ضيغم وتقره وماتجاوب ، هي بعز انشغالها وبنومتها الحلوة تجاوبني شبيها هسه اتصلت عليها يفصل وماترد ، كتبتلها ظل بالي وينج ومن هذا الكلام ، بعدين كتبتلي..

_ سيلين ضيغم دز ورقتي مال محكمة طلكني وما اكدر احجي هسه خليها بعدين..

تخبلت اقره ومامصدكة ما معقولة ضيغم يسويها لان جان عندي امل يرجعها لان عشت وياه المه وندمه على فراكهم شلون هيج صار ماتحملت رحت يمه كلتله بدون ما حسب حساب لحالته ..

سيلين : ابو ادلم شنو صدك مطلك ملاك  ؟

رفع راسه باوعلي وكال..

ضيغم : طلكتها قبل لا تسافر كدامج وعدتها سقطت ثاني يوم شنو المستجد بالموضوع ؟

سيلين : اعرف طلكتها سيد بس قصدي طلاك المحكمة..

ببرود كال..

ضيغم : وصلتها ورقتها ؟

سيلين : اي وصلت بس ليش هيج تحجي انت مو تعبت عليهم مو تأذيت مو كل يوم تسهر وتراجعت حالتك بسبب فراكهم ليش هسه هيج تتصرف شنو السبب؟

ضيغم : بوقت القررت بيه اطلكها سيد انه مكلف كرار يمشي بأجراءات المحكمة لأن اعرف تطول بسبب عدم تواجدي هناك ، ودزيت تقاريري الطبية وبين الهم سبب عدم حضوري للمحكمة طلكوها غيابي وهسه يله كملت الأجراءات و وصلتها..

بهتت بوجهه شنو احجي وياه بس طلعت مني كلمة حجيتها بقهر..

سيلين : بس خطية ياضيغم هواي قسيت عليها..

عكد حاجبه بملامح قاسية كال..

ضيغم : الرجال من ينجرحون ما يفكرون بعواطفهم ياسيلين عند الكرامات تموت الأمنيات..

سيلين : بس انت متعذب عليهم واعرفك تحبهم.

ضيغم : وان يكن

سيلين : انت هيج قاسي واني ما اعرفك ليش تمثل القساوة علية لأن مستحيل اصدك انت نفسك الكل يوم تسهر وتتفرج بصورهم الماخذتهن ملاك بموبايلها..

ضيغم : نفسي ماتغيرت بس اكو اعتبارات ما ممكن نتجاوزها ..

سيلين : اي اعتبار هذا امام هدم عائلة متكاملة متكونة من اب وام وطفل مثل الورد اصلا يموت الكبرياء امام عائلتك مو العكس ..

ضيغم : كلمن يفكر بوجهة نظره ويشوفها صح ..

سيلين : شلون منطق هذا ابو ادلم شلون منطق.

احجي وارجف..

ضيغم : الصار صار والفات مايرجع والبارحة مامن الممكن نعتبره اليوم والأمس يختلف عن الغد لهذا وفري علية الكلام لأن تعبت...

حجاها وفر العربانة ودخل للغرفة ، اعرفه يحجي من ورة كلبه بس عليمن يكابر وبس اني وياه بالبيت معقولة يكابر حتى على نفسه والله راح اتخبل..

دخلت بحالة حزن واكتئاب كلش قوية منا فراك ادهم تعب نفسيتي ومنا مرض ضيغم وقهرته على عائلته وعذابه بالعلاج ، ومصيبة ايفين الاخذت من حيلي حيل ، والختامية طلاك ملاك مال محكمة متت قهر جان عندي امل ترجع ويه ادهم وهنا يعقدون هسه كل امالي تبدت ...

كملت السالفة من خابرت ادهم وسمعت بهجان رايحلهم للبيت ومبلغيه بسفر نرمان متخبل وصاير عصبي ومهدد اذا ما يبلغوه بمكانها وين وابنه موجود لو لا يطلك عبالهم بس تهديد وصوت عالي مثل كل مرة ...

تفاجئوا بعد اسبوع وصلت ورقة طلاك نرمان ، طلكها غيابي شرعاً وقانوناً ولأن هو محامي بسرعة سواها وداز خبر بيد اخوه ..

اذا حامل او لا هو شال ايده من الموضوع وبعد ما اله دخل بيهم خصوصاً من واعده فهد يخليه يحجي وياها ويتفقون على الصلح بمقابل استقرار علي ورواية عباله جذبوا عليه واستغفلوه لهذا ردة فعله جانت قوية ومحد جان متصورها مثل الصاعقة ونزلت على راسهم..

والكمل الأزمات خبر انقطاع السفر بسبب اجتياح مرض كورونا

وهيج تعادلوا كلهم بالمصير ..

ادهم بعد ما يكدر يسافرلي.

فهد ماراح ترجعله ايفين خلال شهر..

هجان انحرم من نرمان ...

صدك من سمعت كلت درات الدنيا بينا وحققت عدالتها...

يتبع....

صباح الخير....

متابعة ممتعة..

درات الدنيا قربت تقفل ابوابها ونودع ابطالنا.. الفاصل بارتات قليلة عن النهاية..