دارت الدنيا لتدق طبول قلبي

البارت الرابع والثلاثون

ادهم

كم انتِ رائعة
شعرك خريفي الملمس
وعيناكِ كفراشات الريف  المضيئة
التى لا اتوقف عن جمعها كل ليلة..

ثاني يوم بلشنا علاج مكثف اني وادهم هو عند دكتور نفسي واني يم دكتورة نفسية ، وبعدها يروح كورس علاج طبيعي بسبب مخلفات الجلطة ، رجله اليسرة بيها ثكل من يمشي وما يتحرك بسهوله...

اقترحت دكتورتي نغير مكان السكن ونبتعد عن جو المدينة والاماكن المغلقة ، خصوصاً انماط الشقق ، جان اقتراحها نسكن بالريف ..

من رجعنا تناقشوا ادهم وضيغم بهذا الموضوع ..

وضيغم رفض الفكرة لان راح نبتعد عن كل مظاهر الراحة وكلشي يكون بعيد عنه الشغل والتبضع والاطباء وغيرها ، بس من افتهم هذا الشي من ضمن علاجي رحب بالفكرة وايدها بس ادهم كاله انت ابقى بمكانك اني وسيلين ومريم نغير مكانه رفض وكاله وياك وين ما تروح اروح..

بلشوا ثاني يوم بحث مكثف على الاماكن القريبة من المدينة وبنفس الوقت يكون هادئ والجو مريح للمعيشة بيها خلال اسبوع لكوا مكان اخذوا ملاك ومريم وراحوا ينظفون المكان ويرتبوه ردت اروح وياهم رفض ادهم ورفضه جان قاطع ، ماعرفت شنو السبب خلوا ادلم يمي اعتنيت بيه والتهيت وياه...

استمروا اربعة ايام يروحون من ساعة تسعة الصبح ويرجعون ساعة عشرة بالليل مهدودين هد كملوا كلشي حتى الاثاث اشتروه ، خامس يوم حزمنا الحقائب وقفلنا الشقق وطلعنا متوجهين للمكان الجديد ، وصلنا للمكان طبكوا سياراتهم ونزلنا .

وسعت خطواتي حتى اشوف المكان بصورة اوسع جان عبارة عن خضار بخضار ، صرت اتأمل واجهة المنزل الريفي عبارة عن الواح خشبية مطلية بلون بيجي فاتح ، مقدمة الكوخ اكو درج خشبي صعدته ودفعت الباب اول مادخلت لفت انتباهي ستائر قطنية مخططة بالرمادي والابيض ، اختنكت ليش ابيض بس سكتت ماحجيت شي ..

تصاعدت تنهيدة من اعماق روحي وطلعت على شكل زفرات بالنفس ، جنت متصورة راح الكه الوان تزيد المكان مرح وخيال مو رماديات وابيض ، وزاد خنكتي من فكرت بسببي غيروا مكانهم شوكت اتعالج واصير زينه طولت هواي طولت...

سحبت احدى الستائر وباوعت من النافذة المفتوحة بشكل جزئي ، لفت انتباهي عدد الاكواخ المتباعده وبنفس الوقت الوانها متناسقة وكأنه متفقين على هذا النمط ، بس الغريب ما لاحظت اي حركة ومالكيت مؤشر يشير بوجود ناس يسكنون هذه الاكواخ ، ولاشفت سيارات طلعت من الكوخ ولكيت الولد يتناقشون بينهم مشيت وحدي وصلت لوسط هذا المكان ...

يحيطني من كل جانب عشب اخضر ومرتب بشكل متناسق كأنما فلاح مهتم بيه ، مو مجرد خضار لطبيعه..

المشهد الكدامي يسحر بل ياخذ العقل ، عشب خليط من اللون الاخضر والذهبي   وتحيطه اشجار المطاط لونها داكن الخضار ، يكحل المنظر وميض النهر الفضي وتحيطه اشعة شمس الصيف الدافية نطت للمكان رونق وهالة ناعمة..

التفتت لكيت ادهم واكف وصافن عليه ابتسمت رجعلي الابتسامه وياها عكده حاجب...

مشيتله من وصلت طلع ايديه من جيوب بنطرونه واخذ ايدي كعدنا على الدرجات الخشبية ، ضميت وجهي بين راحات ايدي لان اجه ابالي كلشي سيء مر عليه ، سمعت صوته ادهم يكول ..

ادهم : كلشي بداخلج فرغيه بهذا المكان ابجي صرخي واجهي مخاوفج لحد ما تشفين نهائياً ..

نزلت دموعي مسحتها والتفتت عليه سألته.

سيلين : ليش اختاريت الاثاث والستائر هاي الألوان بالذات وليش ماكو ناس هنا بس احنا..

جر نفس وكال..

ادهم : كلشي اذاج لازم تواجهيه اذا تهربين منه ماراح تتعالجين لان كلما تشوفيه ترجعين تنتكسين ونرجع للمربع الأول اما للناس ، اختاريت اهدأ مكان حتى تاخذين راحتج وما اريدج تحسبين حساب لأي بشر..

سيلين : شلون وبيت ضيغم يمنا قريبين ..

عكد حاجبه وهز راسه كال..

ادهم : لا هذاك الكوخ مالتهم..

اشرلي عليه بأيده شحت بنظري للمكان البعيد ، يعني نمشيلهم مسافة رجعت سألت مستفسرة..

سيلين : شنو هذا المكان مابيه ناس ساكنين هنا ، وليش الاكواخ فارغه حتى سيارات ماكو..

ادهم : سيلينتي حبيبتي ملاحظج تسألين السؤال مرتين بنفس الصيغة وهذا الشي ينأخذ بأنطباع سيء عنج ، ماجنتي هيج بالجديد منتبه عليج واتمنى ما تتحسسين مني..

سيلين : شلون سألتك مرتين مافهمت.

ادهم : حبيبة كلبي سألتيني هذا المكان مابيه ناس ساكنين بيه ورجعتي بنفس الجملة كلتي ليش الاكواخ فارغة وماكو سيارات ، اني اكدر اجاوبج واعبرلج السؤال بس من ضمن علاجج النفسي انبهج على تكرارج للأسئلة اليكون جوابها واحد...

سيلين : ادهم من الأخير اوصفلي حالتي وكون صريح ويايه تره اني سمعت كلشي حجيته ويه ضيغم يعني ماكو داعي تضم عليه ، واهم سؤال اسأله الك اني ماراح اكدر اخلف نهائي صح.

فتح عينه مستغرب وماستفسر مني شلون سمعت وشوكت بس كال..

ادهم : بحالتج هذه صعب اشرحلج واوصفلج بس اكلج شغلة وحده اذا التزمتي خلال ثلاثة اشهر او اربعه بالزايد ويمكن اقل تتحسنين وتكدرين تسوين بيبي..

سيلين: دكتور اريدك تفهمني اني مريضتك جنت قبل لا اصير مريضة لدكتورة ثانية اريد اعرف من شنو اعاني بالضبط واترك العاطفة والمشاعر كونك زوجي وحبيبي اريد افهم منك كمريضه وتسأل دكتورها..

مد ايديه مسد على خدي جر نفس عميق تنهد وكال..

ادهم : صعب عليه اشرحلج الحالة والله اعفيني يا ملفتتي.

لويت ركبتي وباوعتله عيوني مغوركه بالدمع الساني التصق بأعلى فمي  همست بصوت يرجف.

سيلين : قصدك تجري الرياح بما لاتشتهي السفن صح؟

دمعت عينه وكام مشى خطوات ورجعلي ضرب الارض بقدمه ورفع راسه غمض عينه بقوه اخذ نفس عميق استمر دقايق بعدها نزل راسه ضيق عينه وحجه بصوت متشحرج..

ادهم : مانكول تجري الرياح بما لا تشتهي السفن ، بل تجري الرياح كما تجري سفينتنا احنا الرياح واحنا البحر والسفن ، بأيماني وصبرج راح نتجاوز هاي الأيام مثلما تجاوزنا الأصعب منها..

سيلين : وصلنا لأخر الدنيا صح ؟؟

اقترب مني ثنى ركبته وكعد كبالي بصوت يرجف كال.

ادهم : ليش هيج تكولين؟

سيلين : انت مو ساحر ولا انسان خارق حتى تكدر تطلعني من الأني بيه وشفت الدكتورة كالت ما الي علاج حالياً واغلب الادويه ماخذتها ومتشبع جسمي بيها يعني مايفيدني اي شي ولا يمض بجسمي علاج ..

ادهم : صح انه مو انسان خارق ولاساحر مثلما تكولين بس عندي ايمان بربي يرجعج اليه احسن من قبل واقوى وراح يصيرلنا طفل واذكرج بوقتها واشوفج شلون الأمل يصنع المعجزات ويحقق المستحيل..

سيلين : شلووون ادهم شلوون واني اعرف بنفسي يوم عن يوم اصير اسوء بس كاعد امثل واريد بس امشي يومي..

لزم كفوف ايدي طبع قبلات عليهن تناثرت دموعه من خده لأيدي كال..

ادهم : بالدعاء ياروحي الدعاء يحقق المعجزات.

سيلين : انت معجزتي وامنت بيها..

ابتسم وعيونه حمر دم..

ادهم : عفية عليج وخلي ايمانج بالله قوي ومن ثم بيه وراح نتجاوز الصعب والمستحيل..

سيلين : ما اكدر..

ادهم : لا تكدرين مو حبيبتي التتنازل ولا تضعف حبيبتي قوية وراح تحمل بطفلي ويكبر بأحشائها وينور حضنها..

سيلين : عوفني وعيش حياتك تعبتك هواي ..

ادهم : والله ازعل عليج اذا هيج حجيتي ، وخلي شغلة ابالج ادهم بدون سيلين مايعيش وسيلين بدون ادهم تكبر وتعيش ..

سيلين : لا بالعكس اني بدونك ما اعيش..

ادهم : بس مو هيج ربيتج ، ماربيتج تعتمدين عليه ولا تتعلقين بمخلوق وتخلين ثقتج بيه اريدج تتعلقين بالخالق وتزرعين شعور بداخلج اذا تركج رب العالمين راح تضيعين..

سيلين : لعد شلون تكول انت بدوني ما تعيش.

ادهم : لان هذا الصار من تركتيني متت وراج ماظل من ادهم سوى بقايا ادم ، بس سيلينتي القويه رغم مرضها وتعبها و وحدتها عاشت بدون ادهم وتأقلمت ولبست وصارت رغم تعبج ومرضج بس جنتي اقوة مني وهيج اريدج دائماً..

سيلين : تعرف ذكرتني بذيج الأيام ، العبرة الاخذتها من الصارلي الانسان مهما يحب شريكه بس اذا راح منه يكدر يعيش ويتأقلم صح صعبه وشي يشبه الموت بس للأسف مانموت..

ادهم : بس نموت واحنا على قيد الحياة..

هزيت راسي..

سيلين : بالضبط وهذا الردت اوصله الك بس تفكيري مااسعفني..

ادهم : اول شي اريدج تكونين قوية ونبلش علاج من اليوم ، اخذت كل التفاصيل من دكتورتج وراح ابلش بيها وياج..

سيلين : هم راح اتعب والتزم واتعبك ويايه..

ادهم : شويه مو هواي وبالنسبه اليه ما اتعب..

سيلين : نفسياً غير مؤهلة.

ادهم : انه اخليج مستعدة شويه شويه.

جريت نفس بنفاذ صبر وكلتله..

سيلين : تمام..

ادهم : هسه ادخلي وشوفي غرفتج..

سيلين : مريم ويانا غير..

ادهم : لا الكوخ البصف ضيغم اجرته الها وهي رحبت بالفكره حتى تكون قريبه من ادلم.

سيلين : ما جاوبتني..

ادهم : بخصوص؟

سيلين : ليش المكان مابيه ناس..

ادهم : هذا المكان سياحي بس بالصيف يجون بيه لهذا يكون فارغ بأغلب اوقات السنه يمكن شهر او شهرين يفرغ ..

سيلين : تمام فهمت..

دخلنا للكوخ ، غرفة الجلوس حلوة ومرتبة عبارة عن قنفات من الخوص ومغلفة بسفنج وعليه جراجف لونهم ابيض ، وتدفئة متوسطة المكان بعدها يجي ممر صغير ياخذها للمطبخ يكفي لدخول ثنين اشخاص بس ، وبصف التدفئة اكو درج خشبي صعدت كبالي صارت الغرفة بيها خزانه وحده وسرير يكفي نفر ونص ضحكت والتفتت على ادهم الجان واكف ولازم يده الباب.

سيلين : هاي شنو؟ وين يكفينا هذا السرير..

رفع ايده وخلاها على صدره ودكه ..

ادهم : هذا بيتج ومسكنج سريرج وامانج ومأمنج ..

ضحكت ورحتله حضنته من خصره قوي وهو ربت على راسي وباسني منه ، رفعت وجهي باوعتله مسح خدودي وباس كصتي ، كال.

ادهم : تنامين ؟

سيلين : اي شويه.

ادهم : نامي بدون تفكير اخذي كفايتج وبأي شي لاتفكرين لا بمسؤولية ولا بمرض ولا بشي ثاني.

هزيت راسي ساكته.

بدلت ملابس ودخلت للسرير جان دافي يساعد على النوم بعمق ، مجرد غمضت ونفضت الافكار عن راسي امنت ونمت ، ماحسيت غير الغرفة ظلمة واصوات ضحكات بره ركزت هذا ضيغم يجاكر ملاك ومريم تصيح بابا الله عليك صورني وهو يجاوبها يامريم ماتشبعين صور.

وخرت اللحاف وكمت علكت ضوه التيبلامب المجاور لسريري ، تنورت الغرفة بأضاءته الخافته ، كمت لبست تراك شتائي ولفيت وشاح على كتفي ، كتفت ايدي ونزلت باوعتلهم من النافذة ، ياجمال لمتكم وضحكتكم بس ادهم متأكدة يتصنع الضحكة والراحة ويتصنع حتى الهدوء ، تنهدت فتحت الباب وطلعت ، صحت ..

سيلين : ها شباب هاي خيانه تره..

التفتوا عليه مبتسمين ضيغم لازم مهفة واكف يم المنقله ويهفي للنار ، ادهم متوسط العشب جواه فراش ، وملاك متربعة على لوح خشب وكاعده تثرم زلاطة ، ومريم شايله ادلم وتصور فديوات الها واله.

ادهم : صح النوم..

كالها مبتسم..

ضيغم : لو هيج النومة لو ماتنراد مو اكللكم انه مضطهد صارلي اسبوع مانايم ..

جاوبته ملاك محتجة..

ملاك : انت بكلشي مضطهد وحاوي حظوظ الدنيا كلها..

شال الشيش خلاه كبال وجها وكال..

ضيغم : افكس عيونج لاتحسديني يول..

ضحك ادهم وكال..

ادهم : صارت بيها يول ، ولكم اذا مرتي ما نامت هاي عيونكم تره.

ملاك : عيني اني شكو عيون ابن عمك خضر وتحسد بالمكان.

ضيغم : لا يا ..

وسكت..

ملاك : يا شنو هاا كمل..

ادهم : هسه انتوا شقة لو صدك مافهمناكم..

ملاك : لا صدك عنده فيوز من فهد ..

ضيغم : لا يا زركة فيوز شنو مو اجي اموتج..

ادهم : كولوا ياالله عود صدك تحجون..

سيلين : هاي كله لان نمت بعد ما انام..

ضيغم : لا يابه شعندي غير ملاكي هي الروح والرية.

ضحك ادهم وكال..

ادهم : سيلين ساعة بيش هسه؟

سيلين : من نزلت جانت ٨ ونص..

ادهم : اي من هاي كام يتعذر ماظل شي لليل.

ضيغم : شنو قصدك تره انه احب مرتي خوش ، ادهم لا تحرضها عليه دخيل جدك عمران الكواد.

ادهم : لسانك صاير زفر.

ضيغم : كله صوجه خلاني بيد هاي البصراويه نار وشرار..

ملاك : ها مو احجي النار والشرار شلون ميت عليها.

ضيغم : اعترف عمي كلهن فاهيات يم زراك ..

من خزرته ملاك كال.

ضيغم  : عيونج ، زراك عيونج

ملاك : ياكذاب وين عيوني زرك..

ضيغم : مو لان عيوني خضر اشوف الناس عيونها زركه يا زركه..

كامتله شمر المهفة وركض وهي تركض وراه ، من وصلتله ضربته على كتفه حاوطها واخذها لحضنه ورجعوا يضحكون .

ادهم : ربي يديم السعادة..

ضيغم : امين يارب.

بعدها فرشنا السفرة ، وخلينه الاكل عليها ، جان الهدوء يعم المكان والاضاءه الخافته مريحة بشكل مو طبيعي..

كملنا العشا وشربنا الجاي خدرته ملاك على الفحم..

جانت الكعده ملوكية كلشي بيها بسيط،، بس فخم من الناحية النفسية..

ظلينا نسولف ونضحك هواي تغيرت نفسيتي صدك جنت محتاجة هيج شي.

الجو العائلي والألفة والمحبة تساعد بعلاج الأنسان اكثر من العلاج نفسه.

كملوا نظفوا المكان صارت الساعة ١١ ونص راحوا ناموا...

بعدها ادهم سألني.

ادهم : محبوبتي صليتي ؟

سيلين : لا.

ادهم : ليش عيني.

سيلين : صايرة انسى.

ادهم : ميخالف تصير عادي هسه توضي ونصلي ماشي.

سيلين : انت هم مامصلي؟

ادهم : لا راح اصلي الليل وانت هم حتى نام من وكت ممنوع تسهرين بعد.

سيلين : اني وين اسهر مو انام وياك.

ادهم : اي بس اريد تنامين قبلي يعني ساعة عشرة انتِ نايمة..

سيلين : ليش ادهم.

ادهم : نصف العلاج مالتج بالنوم حتى ترتخي اعصابج المشدودة وتاخذين كفايتج من الراحة العقلية..

سيلين : ماشي..

كام ومدلي ايده ، اخذ ايدي ودخلنا جوه ، توضينا واخذنا السجادات وطلعنا فرشناها على العشب هو يتقدمني بمسافة بسيطة ، صليت المغرب والعشاء بعدها صلينا الليل..

من كملنا كال..

ادهم : كولي ( الحمدلله رب العالمين ) اربع مرات.

سيلين : الحمدلله رب العالمين ..

كررتها اربع مرات وسألته.

سيلين : ليش اربع مرات؟

ادهم : عن ال البيت عليهم السلام من قال الحمدلله رب العالمين اربع مرات في الصباح واربع في المساء يكون قد ادى الشكر نهاراً ومساءاً..

سيلين : تمام راح اكتبها بدفتري حتى ما انسى..

ادهم : انه اكتبها الج.

سيلين : ماشي .

ادهم : للحفظ ليلاً ونهاراً كولي

(فالله خير حافظاً وهو ارحم الراحمين ان ولي الله الذي نزل الكتاب وهو يتولى الصالحين فأن تولوا فقل حسبي الله لا اله الأهو عليه توكلت وهو رب العرش العظيم )  عن الرسول (ص) من قال هذا القول سبع مرات حفظه الله في ذلك اليوم...

سيلين : ماحفظت ادهم حجيت سريع..

رجع يرددلي الكلام واني اردد وياه الى ان ختمناه سبع مرات..

ادهم : للقلق والاضطراب الملازمج طيلة الفتره المضت والحالية ، كل يوم رددي هذه الايه ١٠٠ مره بعد كل صلاة لمدة اسبوع..

(وأيّوبَ إِذْ نَادَى رَبَّهُ أَنِّي مَسَّنِي الضُّرُّ وَأَنتَ أَرْحَمُ الرَّاحِمِينَ)..

رددتها سبحة كاملة ياسبحان الله على الراحة الحسيت بيها بعدها ...

كملنا صلاة وادعيه وتسبيحات..

ودخلنا طفينا الاضوية صعدنا مددنا ردت انام ماكدرت حس عليه كاعده بدون مايحجي تخللت اصابعه شعري وصار يفرك بفروة راسي ارتخت اعصابي وبديت انعس الى ان نمت ، كعدني ساعة سبعة ونص الصبح ، نزلنا سوينا ريوك سويه وطلعنا برة فرشنا السفرة وكعدنا نتريك.

سيلين : حبيبي.

ادهم : نعم..

حجاها وهو يصب بالجاي..

سيلين : وين ضيغم وملاك ليش ما اجوي يتريكون ويانه.

ادهم : اتفقنا غدة وعشا سويه والريوك براحتنا ياهو يكعد اول يتريك وضيغم اساسا طالع من ساعة سته للدوام..

سيلين : هاا خطيه الله يوفقة زين وملاك مو عندها دوام.

ادهم : اخذت اجازة اسبوع وبعدها يرجعون للشقة واحنا نظل هنا.

سيلين: ماشي..

كملنا ريوك ورفعنا الأكل بعدها اخذني مشينا مسافة بعيدة عن البيت ، وصار يستفز عقلي بالأسئلة حسيته تعبني ولح عليه هواي الى ان وصلت مرحلة سديت اذني وصرت اصرخ بصوت عالي ، والغريب ما احتواني ولا حضني ولاحاول يهدأني.

صرخت الى ان وكعت من طولي تعبانه مو اغماء جسمي توسد العشب وصرت اتنفس سريع لاهثة ، وهو ناطيني ظهره ، ماعرفت ليش هيج سوه بيه ، اذاني كلش وفقدت سيطرتي على نفسي حسيت كل اعصابي ترجف ، صرت اخذ نفس عميق وارجع ازفرة الى ان استعاديت قوتي وكعدت متربعة رغم بروده الجو بس عركت عبالك بتموز ...

بعدها التفت عليه عاكد حاجبه وعيونه تتفادى نظراتي ، كنبص بالكاع وصار يكطع بالعشب ويشمره ..

بعدها راح وتغيب فتره عشر دقايق ورجعلي جايب وياه صندوك بسيط وبيه مرايه متحركة خلاها كبالي وكال..

ادهم : بداخل هذه المرايه اكو واقع افتراضي يعني سيلين ثانية نسميه بعلم النفس الشبح ، يمكن للمريض خداع الدماغ بوصفه لهذه الشخصيه الجديده بالصفات النريدها..

اخذت نفس وجاوبته تعبانه..

سيلين : وهذا بشنو يفيدني.

ادهم : راح تتولد عندنا نتيجة لحظية سحرية تنافس النظرة الطبيعية للحاله التمرين بيها ،مثلاً انتِ تعانين من ضعف الاعصاب بس شبح سيلين بالمرايه مايعاني مثلها ، سيلين اكو شي بجسمها يوجعها بس سيلين بداخل المرايه ماكو شي يوجعها ، من تباوعين وتركزين وتحجين ويه نفسج راح تتجاوزين نصف المشكلة الى ان نتخلص من شبح سيلين بالمراه وتبقى سيلين الطبيعية وحدها بدون شبحها..

سيلين : مافهمت ادهم اعصابي تعبت ، تعبتني اليوم.

ادهم : اسمعيني المرض النفسي مرات يكون افتراضي مو حقيقي العقل يفكر ويصير يولد خاصيه مرضيه يخليج تصدكين وتأمنين بيها الى ان توصل بيج مرحلة يتحول الهاجس الى حقيقة تنطي صورة عنج مشوهة تخليج تحسين بألم لا يطاق ، العلاج النفسي اغلبه تفكير سلبي ، ليش البارحة من طلبت منج ما تفكرين نمتي بعمق ومافزيتي ابد رغم تقصدت اتحرك يمج بالفراش بس جنتي غاطة بنومتج واليوم شكد حاولت استفز عقلج صبرتي ما انهاريتي لحد ما ذكرت حادثة من حوادث سامر الجنتي ضامتها عني.

مسحت دموعي وسألته.

سيلين : شلون عرفت ؟

عكد حاجبه ودار وجها للجهة البعيده تنهد وكال.

ادهم : قبل كم يوم دزلي فديو خاص بهذه الحادثة الصارتلج .

حجاها واختنك بعدين التفت عليه وعاط بوجهي لاول مرة يسويها..

ادهم : انتِ ليش ماسمعتي كلامي ليش ارتبطتي بسامر ليش ماقبلتي بيه او جان تجاوزتي موضوع الخطوبه وظليتي تحت جناحي راح تكولين اهلك امك اخوك واختي وارجع اكولج بوجودي محد يكدر يمسج بورده بس اخ ياعنادج شسوة بيج وبيه..

حجاها وضرب ايد بأيد..

لاول مرة يعوفني ويكوم يرجع للكوخ وحده ، ظليت كاعده انتظرته ييجي ما اجه رجعت للكوخ اول ما طبيت صرت ابجي وارجف من احجي وهو صافن عليه اخر شي كلتله حجي خلاني اعرف السواه من ضمن علاجي النفسي..

سيلين : الصار كله قدر ومكتوب على شنو تحاسبني ومادام اني صرت عبئ صعب عليك تعالجني رجعني للعراق والله العظيم ما اظل هنا واذا بقيتني اسوي شي بنفسي..

كام وحضني دفعته حيل رجع لزمني وكعدني بصفه وبلش يشرحلي ..

ادهم : من ضمن العلاج اذكرج بالشغلات السيئة المريتي بيها وبنفس الوقت تعيشين براحة ومكان هادئ ونظيف حتى تطلعين كل المريتي بيه من خلال صرخات غير مكتومة ، بس الصار اليوم ردة فعلي القوية يمكن اعصابي تعبانه مثلج لهذا صرخت عليج ولمتج ..

ظلينا نحجي الى ان تعبت وصعدت نمت وهيج مرت الايام بس ادهم بفترة علاجي هاي جان مختلف عن قبل عصبي ويتوتر بسرعة قبل جان يحتوي الموقف ويحتويني هسه لا هو هم ينهار ويايه ويتعب بسرعة لهذا عندي هاي الفترة حرجة وماجنت احب اتطرقلها او اذكرها كدام احد..

بعد شهر من العلاج النفسي حسيت بفرق بسيط بس الاذاني كلما اعصابي ترجف يصير غثيان بمعدتي واصير اتقيء بشكل غريب احس معدتي تنشلع، بس الاستغربته ردة فعل ادهم الباردة اتجاه الموضوع ،

وجنت اشوف لمعة بعيونه وفرحة جنت اتصور السبب اكو تحسن بحالتي جنت اسأله عن السبب يسكت ويجاوبني بأبتسامة بعدها طلبت منه اروح دكتور لان حالتي مو طبيعية وافق ورحنا..

بالطريق اتصلت على ملاك  لان رجعت لشقتها من اول اسبوع ولكيتها متصلة عليه ، جاوبتني جانت تبجي سألتها شبيج كالت مابيه ضايجه وبس سديته منها ورجعت راسي ليورة غمضت عيوني الى ان وصلنا كعدتني مريم باوعت وحدنا بالسيارة التفتت عليها سألتها عن ادهم.

مريم : نزل يحجزلج عند الدكتورة..

سيلين : واني شلون ماحسيت بيه من نزل..

مريم : لان نمتي وجنت لازمه راسج جان يروح منا ويجي منا..

ضحكت مستغربه ..

سيلين : صدك عود..

مريم : نمتي وبابا كال حاوطي راسها بأيديج خاف تتأذه ركبتها..

سيلين : ياعمري انتِ وابوج شكد احبكم..

مريم : سيلين اريد اكلج شي بس الله عليج مو تكولين لبابا مريم كالت..

سيلين : شكو خير ..

مريم : بابا كال سيلين تقريباً تعالجت وشاك بيج حامل لان كال مريم راح تجيج اخت مثلج.

شهكت وخليت ايدي على حلكي.

سيلين : شلون ولج هو كال.

هزت راسي مبتسمه..

سيلين : لا عفيه ماصدك كولي وروح ماما..

مريم : وروح ماما ياسه بابا كال سيلين تعالجت ويمكن حامل..

التفتت ليكدام غطيت وجهي بأيدي وكمت اشهك وابجي سكتت من كالت.

مريم : هسه بابا يلومني حبابه لا تبينين اني حجيتلج..

هزيت راسي ساكتة اخذت كلينس مسحت وجهي وعيني على باب العيادة شوكت يطلع ، ورة دقايق اجه يمشي بأتجاه السيارة وصل يمنا فتح الباب مالته وكال نزلوا مد جسمه اخذ محفظته وسد الباب نزلت اني ومريم ومشينا وراه ، وكلبي يدك سريع دكاته تشبه طبول الحرب..

كعدنا منتظرين سرانا دخلت للدكتورة شرحتلها حالتي نطتني مجموعة تحاليل سويتها وانتظرنا النتيجة ..

من طلعت عيني على ادهم وهو عينه عليه حس بيه عرفت اشرلي على رجليه بمعنى ماكدر اوكف..

كمت اني ورحت مشيت بخطوات ضعيفة وترجف اخذت النتيجة ، من ابتسامة الولد الماعرفت شنو يحجي توقعت روحي حامل...

اكدلي هذا الشي من اخذ ادهم الورقة من ايدي هوت هامته للكاع وسجد شكر لله متجاهل وجود الناس الستغربت ردة فعله بس قابلوها بأبتسامه دخلنا للدكتورة شافت التحاليل حجت ويه ادهم ظل يشرحلها هواي لفت نظري رجفة ايده وهو يحركها من يحجي بحالتي ...

طلعنا من العيادة ثنينا ساكتين حتى نسينا نبارك لنفسنا صعدنا السيارة ، شغلها ورجع طفاها رفع ايده حك عيونه بأصابعه اخذ موبايله واتصل من حجه عرفت ويه ضيغم..

ادهم : ضيغم تعال انه بالبارك مال الدكتورة______..

ونطاه المكان والوصف مضبوط ، سأله ضيغم شنو الصار وليش ماتكدر تسوق جاوبه..

ادهم : رجفة برجلي ماكدر اسيطر عليها...

يتبع..

صباح الخيرات💚🤎