دارت الدنيا لتدق طبول قلبي

البارت الثالث والثلاثون

جنت ناوي افرشلك قصيدة بنص ورد
هلبت ترد يالطعمك بطعم الورد

هيهات ارجع احب اي كلت
بس بالجذب ارجف من اشوفك وارتعد.

عبير ادريس...
_____________

سيلين : لحظة اهدأي و احجيلي وحدة وحدة وعلى كيفج والتريديه اخوتج يسووه الج..

نرمان : ماريدة بعد قررت افسخ..

سيلين : ادهم ليش عارض لان يعرف ورأيي من رأيه بس انتِ ماسمعتي الكلام..

نرمان : سيلين انتِ ما شفتي شلون صورلي الدنيا وشلون حياتي راح تكون سعيدة وياه.

سيلين : زين سؤال هو زين وياج لو مقصر من ناحية الاهتمام وغيرها.

نرمان : لا ابد ما مقصر واصلا هو اليتصل وهو اليبادر اكثر مني بس كلتلج سمعته شلون يسأل على ملاك بلهفة حتى ما احترم وجودي يمهم وممكن بأي لحظة ادخل واسمع وفعلا صار وسمعت..

سيلين : يعني اذا سأل عنها هذا شي متوقع من صعب لان تعرفين طبعه كلش زين ما ينسى بسهوله وهو كالج وانتِ وافقتي مو صح..

نرمان : يعني من سنه ٢٠١٥ هو فتح ويايه الموضوع وظل بين فتره وفتره يدخلي ويحجي لو ييجي للجامعة وهسه احنا بسنه ٢٠١٩ يعني اربع سنوات ونص اني افكر وهو يحاول معقوله مانساها..

سيلين : انتِ نسيتي زوجج الله يرحمه..
جرت حسره وكالت..

نرمان : لا لأن ماينسي وهذا اكبر سبب خلاني ما اجازف واتزوج مره ثانية..

سيلين : خلص يانرمان الحب الأول ماينسي صدكيني وهسه ادهم من يقره قران ويختمه اهداء لروح ياسة الله يرحمها لو ييجي يكولي سيلين خلي نسوي ثواب ونوزعه لروحها ومرات اشوفهم يكعدون هو ومريم يطلعون صورها ويتذكروها ويحجون بيها هم اجي اغار واكول ليش يتذكرها ، هذا شي خاص بيه ما الي حق اتدخل مادام صايني ويحبني ومقدر مشاعري هذا هو انتِ هم نفس الشي اذا صعب ما حاجي بملاك كدامج ولا محسسج بعد ليش تنقهرين وتبجين.

نرمان : ماعرف اني ما اتحمل هيج شي راح افكر واشوف مادام بعدنا على البر..

سيلين : فكري زين واحنا كلنا بظهرج..

نرمان : ماتقصرون يمكن انتِ اصغر مني بس احب احجيلج وارتاح احس تفهميني..

سيلين : انتِ اختي الماجابتها امي ابد ما انسى وكفاتج ويايه خصوصاً بمرضي وشلون جنتي تسهرين فوك راسي للصبح.

ضحكت بقهر وكالت..

نرمان : تشتتنا عبالك رغم صعوبه ذيج الأيام بس صرت اتمناها ترجع واشوفكم كبالي..

سيلين : البارحة بهذا الطاري اني وادهم وكال اريد اسحب نرمان بس صعب شلون خاف يرفض..

نرمان : اذا فسخت الخطوبه انطيه خبر يمشي باالاجراءات..

سيلين : وصعب وين يفك منج المشكلة وكعتي بيده..

جرت نفس وكالت..

نرمان : اعرف ماراح يتخلى بسهولة بس احاول..

سيلين : ماشي حبيبتي الله يقدم البيه خير الج..

نرمان : امين ، يله اروح ما اعطلج.

سيلين : الله وياج لاتخلين بالي ..

نرمان : تمام ، باي..

سيلين : باي..

راحت واني اشتغلت بالبيت وكملت الغدة بعدها اجه ادهم تغدينا ومشى اليوم عادي وطبيعي ثاني يوم اتصلت على ملاك حتى نروح نسجل اني ومريم ، ماكالت شي بدلت ورحنا سجلنا وهي ظلت كاعدة برة ...

سيلين : اذا نتأخر ارجعي..

ملاك : راح اتصل على ضيغم اذا يرجع من وقت اروح اسوي غدة واذا لا انتظركم..

سيلين : يله حتى نتغدة برة اليوم ادهم يتأخر بالشغل..

ملاك : لعد ضيغم هم وياه اكيد بس للأحتياط اتصل..

سيلين : ماشي..

راحت سيلين واني طلعت موبايلي اتصلت على ضيغم من اول رنه جاوبني

ضيغم : هلو بأم ادالم..

ضحكت وكلتله..

ملاك : هله بيك شلونك اليوم؟

ضيغم : تعباااااان اريد انام بحضنج ..

جرها بتعب..

ملاك : الله يساعدك ، راح تجي للبيت مو؟

ضيغم : ليش حبيبي عندج شي ؟

ملاك : لا بس حتى احظر غدة من وقت..

ضيغم : اذا مابيج حيل عوفيه اتغده هنا ويه ادهم..

ملاك : لا الله عليك تعال اصلا ماعندي شي ضايجه حتى نتغده سوه..

ضيغم : اويلي اول تالي ملاكي تشتاقلي وتريدني يمها وتتلهف على جيتي..

ملاك : انت ليش ماخذ عني هيج فكرة ، لعلمك صايرة اضوج بدونك ومن تروح احس بفراغ جبير..

ضيغم : بربج هذا الكلام مو احلى من كلمة احبك؟.

حسيتها بسمار ضحكت وكلتله..

ملاك : مو بله ؟.

ضيغم : اي والله يابه..

ملاك : تسلملي هالكلمة الحلوة يله راح ارجع للبيت احظر الغدة.

ضيغم : البنات دخلوا محاضرات ؟

ملاك : اي قبل شويه..

ضيغم : خاف متفقين تتغدون سوه وراح ترجعين علمودي..

ملاك : لا يا عيني جان كلتلك..

ضيغم : يله لعد ساعة بالزايد اني يمج ادلم شلونه خوما بعده مصخن؟

ملاك : لا احسن الحمدلله ..

ضيغم : مدفيته زين؟

ملاك : بس وجها طالع وعيونه الخضر تزرزر عليه..

ضحك وكال..

ضيغم : حبيب ابوه ديري بالج عليه تره هذا روحي.

ملاك : اكيد ادير بالي عليه ربي يحفظكم اليه.

ضيغم : ويحفظج غاليتنا..

ملاك : ممممم يله اروح اني باي..

ضيغم : الله وياج..

سديته منه وكمت عدلت غطى ادلم ودفعت العربانه ، امشي واتفرج على الخضار والاشجار الحلوة عيوني شكد ما تشوف هذه المناظر احسها بعدها جوعانه تريد تصور وتخزن اكثر..

وصلت للبيت طبكت العربانه وعفتها يم الدرج مال عمارة ، وصعدت فتحت الباب ودخلت وديت ادلم لفراشه وغيرت ملابسي وبلشت بالغدة ، نصيت النار ودخلت للحمام غسلت وجهي من المكياج توضيت وصليت بعدها دخلت لغرفتي خليت مكياج وتراكي بدلته لان تبلل بالحليب ، سمعت المفتاح يداعب الباب مديت راسي فات مبتسم..

ضحكتله وكلت..

ملاك : الله يساعدك..

ضيغم : ويساعدج عيني..

تقدم وصل يمي طبع قبله بخدي وكال.

ضيغم : اسبح على السريع واطلع صبيلي ميت جوع ونعاس..

ملاك : اي هسه اصب تدلل..

كرصني من خدي ودخل للحمام رحت للمطبخ حضرت زلاطة وخضورات ولبن وطرشي وتمر وصبيت الغدة اسمعه يصيح..

ضيغم : ابو الأدلام  حبيب ابوه اكعد لك تنبل على امك اطب اطلع نايمين ..

ويدردم واني اضحك على سوالفه...

طلع جايب ابنه يفرك بعيونه نعسان شافني كام يبجي شمر روحه عليه باوعله ابوه عكد حاجبه وكال..

ضيغم : يله بله ولك انه ابووك كو____ ماتكول هذا يتعبلنا وحاير شلون يعيشنا بنعيم وتالي تريد امك النايمة للظهر..

مديت ايدي اخذته منه وكلتله.

ملاك : عيني حليبي يغزر جيبه شيسوي بفلوسك اصلا مامستفاد منك الحليب مجاني شنو جايبله انت.

خصر ايده باوعلي وكال..

ضيغم : والحليب منين يجيج غير من خيري..

ضحكت وضربته على زنده ..

ملاك : يمه من لسانك سكتت عمي وين اكدرلك اني.

جر الكرسي كعد وكال .

ضيغم : بالنبي انه مضطهد هنا ..

يحجي ويهز براسه ..

ملاك : بله ليش كعدته ماصار ساعة من نيمته وتالي راح تتغده واني احير بيه..

ضيغم : غير يتغده ويانا..

ملاك : صدك تحجي ليش هو وين ياكل..

ضيغم : تغدي ياعيني صايره هواي تحجين.

يحجي ومايباوع بعيني يعرف بروحه غلطان وبس اطلع لساني ماسكت..

ملاك : ضيغم تتغده وتاخذه تنيمه واني اتغده براحتي ..

ضيغم : تدللي بس خليني اتغده..

كعد ياكل واني اتفرج عليه واكول سبحان الزرع حبك بكلبي وجنت اكرهك كره العمى شلون كدرت تدخل لكلبي وتتربع بيه شلون كدرت تترك زاويه صغيرة لهجان وخليته مجرد ذكرى حلوة ومؤلمة مرت بحياتي..

كمل غده اخذ مني ضيغم وراح للغرفة رجعلي مد راسه من باب المطبخ هو وابنه يخربون ضحك عيونهم بالكوة فاتحيها مجرد شفتهم سرت ابتسامة طيبه على شفتي..

ملاك : ها تريد جاي؟

ضيغم : من اكعد بس حبينا نكولج عاشت ايدج ماما على الاكل يجنن وشبعنا...

يحجي بصوت طفل ويحرك ايده على بطنه..

ضحكت..

ملاك : الف عافية حبايبي .

ضيغم : راح انام ساعة سته كعديني تره عندي موعد مهم.

ملاك : ها ضيغم من ورايه مواعيد؟

ضيغم : يمعودة ويايه ادهم هذا يخليني اتنفس ..

ملاك : زين يسوي بيك يمشيكم على الصراط..

ضيغم : اي كيفتي انتِ..

ملاك : طبعاً..

هز راسه ماعاجبه وراح، كعدت اتغده بعدها نظفت المطبخ ملابسي تبللت من غسلت مواعين ، طلعت للبالكون نظفتها تأخرت بيها لان بيها زرع وجبيرة ، بردت كلش ، دخلت كعدت كبال المدفئة ، ماكو ربع ساعة وصرت اعطس رحت للمطبخ شربت شي دافي ورحت غيرت ملابسي باوعتلهم شلون نايمين ماخذين السرير كله هزيت ايدي واخذت لحاف ومخده وطلعت نمت بره على القنفة هي نومه وكأنما غيبوبه ماحسيت غير ضيغم يصيح ويضرب على وجهي..

ضيغم : ملاك يمعودة شنو ميته ملاك .

فتحت عيني القيت عليه نظره وحدة شفت بعيونه الخوف والقلق والحنان منجمعين سوه ورجعت غمضت ، رجع يضرب على وجهي ويكرر اسمي بشكل مستمر الى ان فتحت عيني تقرب بسرعه حاوط خصري بايديه وشالني لغرفتي ، استغربت ليش هيج سوه كأنما فاقده سألته بضعف..

ملاك : ليش شلتني مكسرة جسمي يوجعني..

ضيغم : اجوي بيت ادهم خابرتهم من شفتج ما كعدتي افتح الباب وارجعلج..

راح ثواني ودخل هو وسيلين اخذ ادلم طلعه بره ورجع اسمعه يكول لسيلين..

ضيغم : يا الله شلتها راخيه وضعيفة راحت بيدي تخبلت..

سيلين : لا تخاف مصخنه وهسه ناخذها.

حجتها وخلت ايديها على كصتي تحسستها..

سيلين : زينه تره مو مثل ما وصفتها..

تقرب تحسس كصتي بشفايفه وكال..

ضيغم : يمعوده تجوي..

اسمع ضحكه سيلين وهي تكوله..

سيلين : ادري شفه لو محرار يابه مابيها شي هي فلاونزة عدينا الاكبر منها الله يساعد كلبك ادهم بيوم الشمروني بالباب لا ايد ولا رجل ، قوي كلبك ابو ادلم هاي تتدلع عليك..

ضيغم : لا بربج بس شوفيها تايخه.

سيلين : تعلمت من جيسيكا واقاربها صارت مثلهن نست صيف البصرة وحرارته..

عاد صدك ماتحملت حجيت بس بضعف.

ملاك : لج شكد صايرة خبيثة انتِ..

التفتت على ضيغم حاجته وتأشر عليه.

سيلين : شوف صارت زينه طلع لسانها ، يله كومي نسوي عشا..

ضيغم : لا عوفيها يمعوده تروح تنتكس، شوفي بله هذا لبس لابسته ..

طلعت سيلين وتقرب كعد على حافة السرير ويكلب بملابسي ويحجي.

ضيغم : ليش هيج ملابسج خفيفة اكو وحدة بهالبرد تلبس شورت وكيمونه تخبلتي..

ملاك : تبلل تراكي وكلت راح اتغطى وانام..

ضيغم : اي بس بره بارده مو مثل غرفتنا عالكين تدفئة.

ملاك : صوجي طفيتها من حسيت الاستقبال احتر.

ضيغم : ملابسج سخيفة وسوالفج اسخف يعني ليش هيج تسوين مو عندج ولد محتاجج خطيه.

ملاك : ماكو شي شبيك هسه اصير زينه واكوم بس تروح الخنكة مني..

ضيغم : شنو شبيج ؟

ملاك : مادري صدري يوجعني بصعوبه اتنفس .

ضيغم : كومي لخاطر الله بدلي واوديج مادام بعد وكت لا توازيني بنص الليل اركض بيج..

بدون ما يسمع جوابي اتجه للكنتور طلع ملابس واجه غيرلي ملابسي وهو بسرعه بدل ، رجع يلف الشال على راسي وكل شويه يطلع شعري ويستغفر  اخر شي بزع وكال.

ضيغم : هذا شلون يثبت خبلني..

بدون ما اجاوبه دخلت شعري بأصابعي ولفيته حتى بدون دنبوس باوعلي  وهز ايده..

ضيغم : كلشي عدجن صعب .

لزمني من ايدي وكومني طلعنا واني مستمرة اكح ، البنات ظلوا بالبيت وطلعنا  بسيارة ادهم ، صعدت ليورة رجعت راسي على الكشن وغمضت عيني ، كل شويه يلتفت عليه يحاجيني وأأشر بيدي لان ماكدر احجي اسمعه يستغفر وادهم يهدأ بيه وهو يحجي عليه يكوله..

ضيغم : ما تسمع كلامي الف مرة كايل لا تطلعين بره لكيتها غاسله الزرع ورقة ورقة مخبله عبالها بحديقة جدها بالبصرة..

ادهم : اعصابك سهله وتعدي ان شاءالله.

ضيغم : ان شاءالله..

وصلنا للمستشفى فحصوني وطلع عندي تحسس قوي وبدايه ربو ، اخذنا علاج وبخاخ من الصيدلية ورجعنا ، الطريق كله ضيغم يفور بس مايكدر يحجي  اعرفه كاعد على اعصابه...

خابر سيلين بالرجعة وطلب منها تسويلي شوربة دافية وحجالها مختصر حالتي لان الظاهر هي استفسرت منه..

رجعنا للبيت ، اول ما وصلت غيرت ملابسي وطلعت كعدت بالاستقبال ، قربوا يمي التدفئة وجابتلي سيلين الأكل اكلت واخذت علاجي واقترحوا علينا ياخذون ادلم حتى ارتاح ويفسحون الفرصة لضيغم يهتم بيه ، دخلت مريم للغرفة اخذت غراضه تندلهم بحكم هي يمنا اغلب الاحيان علمود ادلم تجي ، اخذوا جنطته وراحوا، بس كل شويه يتصلون على ضيغم يتطمنون عليه .

ملاك : ياجمالية روحهم وكلبهم..

ضيغم : فضيعين شايلين كلوب مستحيل  اكو منها...

ملاك : الله يحفظهم..

حجيتها وكحيت..

ضيغم : لا تحجين بعد ارتاحي..

ثاني يوم اخذ اجازة مدة ٣ ايام اهتم بالبيت وبيه ومن تجي سيلين هو يروح يم ادلم وهيج مشت الأيام لحد ماصرت زينه ورجعت ازاول حياتي بصورة طبيعية.

سيلين

التهيت ويه ملاك ونسيت سالفة نرمان لاخابرتها ولا فتحت الموضوع ويه ادهم راح من بالي ، رن موبايلي باوعت ايفين جاوبتها اجتني نبرتها العصبية..

سيلين : ياستار خير ان شاءالله شكو؟

ايفين : بشرفج هاي حماتج عاقلة؟

سيلين : منو قصدج نرمان؟

ايفين : اي نرمان..

سيلين : شبيها ؟

ايفين : خابرت فهد وتريد تفسخ الخطوبه وهذا تخبل اعصاب ويصيح كلب الدنيا بله احنا النا صوج ذنب.

سيلين : بعد فهد ماتعلمتي عليه وهو شدعواه خلي يسمعها..

ايفين: يكول اني حجيت وياها وهددتها وقبلها ضربتها وتالي سوت البراسها ومن تنخطب والكل تعرف تريد تفسخ ماكو مو بكيفها..

سيلين : معليج ادهم يتفاهم وياه.

ايفين : هو وينه عمو صار يومين يتصل عليه فهد وهو ماكو..

سيلين : ملتهين ويه ملاك وتعرفيه هو مو كلش ويه الموبايل مرات حتى ينسى يشحنه اني اشحنه اله.

ايفين : اي طبعاً بعد سيلين واجتي يمه شيسوي بالموبايل.

ضحكت وكلتلها.

سيلين : مو بله..

ايفين : ضحكي ضحكي واني ماكلني الضيم ..

سيلين : همزين مسافرين جان تخبل على نرمان.

ايفين: حجز راح يرجعنه.

سيلين : صدك ؟

ايفين : والله وشلون صار زين على العلاج حتى اعصابه هدأت من خابرته نرمان رجع تخبل علينا..

سيلين : الله يحلها انتِ شنو يسوي لا تجاوبيه.

ايفين : منو يتجرأ يجاوبه هو ايمن حجه حجايه وياه كسر الغراض وطلع بره مارجع غير بالليل.

سيلين : تعلمي عليه هذا طبعه لا تتأملين يتغير.

ايفين :لا ما اتأمل، يله عيني خلي اروح ومن يرجع ادهم ضروري يتصل..

سيلين : صار سلميلي.

ايفين : يوصل..

راحت واني سويت الغده اجه ادهم غديته بعدها صبيتله جاي وحجيتله السالفة على كيفي استمعلي بهدوء بعدين كال..

ادهم : ليش رفضت من البداية وكلتلها راح تخسرين ملاك اول شي وبعدها تكتشفين بنفسج كميه الحب البداخل كلب هجان اتجاه ملاك وانتِ ترفه ما تتحملين هيج حرب صعبة كالت لا هجان تغير و وعدني ، الصراحة انه ما اتدخل لان هجان صديقي وماضربنا على ايدنا هي قبلت وتدري بكلشي لو ماتدري انه اول واحد اوكف وياها واخليها تفسخ ، كل الصار هسه انه حاجيه الها بتفاصليه وكلت الها ملاك حجتلي شلون تحبه ومتعلقة بيه ماسمعت.

سيلين : شلون ادهم خطيه اختكم منو الها؟

عكد حاجبه وكال..

ادهم : اذا اجيبه للرجال واحاجيه مايكلي شنو الغلط السويته ؟ اكعد اكوله والله اختي سمعتك تسأل على ملاك بربج هذا سبب كافي تنهي كلشي.

سيلين : والله ماعرف انتوا اعرف ، بس خابر فهد صارله يومين يتصل عليك..

هز راسه واخذ الموبايل اتصل سلم بعدها فهد فتح الموضوع ، وعلت نبره صوته ، وخر الموبايل من اذنه فتح السبيكر وخلاه على الميز ، اعرفه راسه يكوم يأذيه من الصوت العالي ، ضرب ايد بأيد وكال..

ادهم : فهد اعرف حجتلي سيلين .

فهد : وشنو رأيك انت؟

ادهم : مثل رأيك ما اقبل تفسخ.

فهد : عبالي توكف وياها لان البارحة عاندتني وكالت بس اخذ الكلمة من ادهم كلكم ماتهموني وخلتني احجز بساعتها يابه اذا الزمها الأ انعنع ضلوعها..

ادهم :هي مو صغيرة حتى هيج تتعامل وياها صح غلطت بس مو معناها هيج تكون حاد فهمها.

فهد : والله انه روحي بازعه اكعد افهم بيها اذا هي ما تفهم اجيتها بالطيب وقبلها بسطتها وهددتها مافاد وياها وهسه تريد تفشلنا وياه والله لو تموت.

ادهم : هذا هو هي تتحمل نتيجة اختيارها لان ماكو سبب جبير او غلط بدر منه حتى نواجهه..

فهد : وهذا ناقص تعرفه انت  هسه يلوفها علينا وعلى انه شعندي وشنو سويت وبعد مانخلص.

ادهم : حقه وانت وانه وكل رجال اذا ماكو سبب مقنع ما يقبل ينلعب عليه..

فهد : لو وحده خاطبها وتسوي بيه هيج الأ اسويها وصل ..

ادهم : اعصابك ومن تخابرني لاتصيح تره راسي يوجعني.

فهد : دروح من يوم يومك راسك يوجعك تره بزعتني..

ادهم: رحم الله والديك ليش هي بيدي.

فهد : الله يشافيك بس شسوي هاي بنت الكلب حركت دمي.

ادهم : لسانك فهد ، انت اطلع منها وانه احلها..

فهد : حلها لان اذا رجعت ادفنها ومحمد.

ادهم : لا تدفن ولا تهوبز انه احلها كتلك.

فهد : بس هم راجع حتى اخليها كدام عيني.

ادهم : ارجع براحتك...

فهد : يله رايح باجر من الصبح لازم اكعد.

ادهم : الله وياك.

سده وراح بعدها خابر على نرمان حجه وياها بهدوء هي تبجي وهو نفس رأيه  يكللها اني حذرتج وانتِ وافقتي وكلتلج خليها بس عقد سيد انتِ حتى محكمة عقدتي لهذا تحملي مسؤولية قرارج..

شبه اقتنعت وراحت.

من نام ادهم اتصلت على نرمان حجينا شويه بعدها كلتلها احجيلي كلشي صار بينكم واريد اشوف شنو الوصلج لهذه المرحله وبدت تحجيلي..

فلاش باك (flash back)

نرمان

من خطوبة ادهم وهو يحاول ويايه واني رافضة الفكرة من اصلها بس اصر عليه لحد شهر السادس من سنة ٢٠١٩ ، اجه هو وعمي هاشم طلبوني من بابا وبابا حجه ويايه هواي اخذتلي اسبوع افكر ويه اصراره وافقت ، رجعنالهم الخبر ، ثاني يوم خابرني وكالي تجهزي راح امر عليج العصر نطلع نشتري لوازم المهر وكذا ، بدلت وطلعت وياه الصراحة جنت حابه ارتبط بيه لان هو من النوع اذا حب وحدة يخلص بحبه اله وتمنيت يحبني اني هم بمثل حبه لملاك اول ماصعدت سحب ايدي طبع قبله على كف ايدي تحسس كفي بخشونه شاربه..

هجان : مبروك مقدماً..

ابتسمت وكلتله..

نرمان : الله يبارك بيك..

هجان : طالعة حلوة بنت عمي..

نرمان : شكراً انت هم..

التفت عليه مبتسم كال..

هجان : انه شنو؟

نرمان : يعني حلو ..

هجان : احجي شبيج شو خجلانه دكتورة...

نرمان : لا بس ..

قاطعني وكال ..

هجان : اعتبريني نفسج ولا تخجلين مني اكو واحد يخجل من نفسه؟

نرمان : لا طبعاً موهيج بس كل السالفة يراد تعويد..

هجان : نرمان انتِ كلش ترفة ورقيقة.

هزيت راسي والتفتت على الجامة ، رجع سألني التفتت عليه استمع..

هجان : شنو نوع الفستان العاجبج حتى اخذج للمكان الترديه..

نرمان : هجان اني كبرت مو مال فساتين البس قاط وهذا هو.

هجان : ابد اريد اشوفج عروسه مثل ما تخيلتج..

نرمان : استحي والله..

هجان : مامسوين شي غلط حتى تستحين منه..

وصلنا صف السيارة مقابيل المحل نزلنا ودخلنا سويه اختارينا ثوب اوف وايت وقصير ومقسم على الجسم وعلى صفحة بيه غصن ورد ناعم من التطريز المرصع بدقه بالخرز وعقد يحيط بالرقبه ، ظهره عاري للوسط وتك ردن الثانيه فقط اسقي..

اخذناه جان غالي سعره ، بعدها رحت اخذت حذاء وطلب احجز صالون رفضت ، حددنا موعد المهر ، وجان يوم كلش حلو ساعدتني بيه ايفين هواي تعبت ويايه وفهد جان اله دور جبير بموافقة والدتي لان جانت رافضة هجان بسبب علاقته السابقة بملاك..

تم العقد على خير واختلينا بعدما طلعوا المعازيم ، التفت عليه مد كف ايديه وربت على خدي برقة ، تقرب وباس راسي بعدها باس خدي وهمس..

هجان : مبروك ..

رفعت عيني خليتها بعينه لقطة سريعة ودنكت..

نرمان : الله يبارك بيك ..

صوتي اختفى وكأنما اول تجربه اليه ، عكسه هو جان جريء ومسيطر على الموقف بعدها بسبوع عقدنا محكمة ..

درات الدنيا بيه ياسيلين وحبيته بكل جوارحي وحسيت اني وياه وحدنا بهذا العالم نسيت كلشي خصوصاً بجياته المتكررة واهتمامه الزايد ...

حبيت احتوائه اليه ، حسسني طفلته ، حبيت سؤاله المتكرر وغضبه من افتح خط واني ناسيه اتصل بيه واطمنه عليه ، مرات ييجيني للجامعة يكعد يمي ساعة ويرجع لداومه ، هواي مواقف حلوة ولحظات عشناها بفرح رغم ماصارلنا شهرين مخطوبين بس كل يوم يعيشني شعور مختلف لهذا صدمتي جانت جبيرة من عرفت بيه يدور وره ملاك ويسأل عليها وجان متلهف لجواب نغم والقهرني اكثر من نغم كالتله زينه وانسى ياهجان ، يكوللها ..

هجان : جذب انسى هذا جرح ونهره جاري ليوم الممات..

نغم : ظل سوي هيج بنفسك الى ان تعرف البنيه وتتركك.

هجان : يابه مو بيدي هي دكمة وادوسها وانسى.

نغم : ليش ورطت البنيه وياك اذا بعدك تحن وتون..

هجان : نرمان اخليها بنص عيني وعمري ما افكر مجرد تفكير أأذيها وهي ام اطفالي بس ذيج اخ ياذيج دمرتني لج بكل حلم هي تبدي بيه وتنهيه بزفتها كل يوم اكعد على نفس الكابوس يانغم فهميني انه هم اريد اطيب من هذا المرض واتعالج..

نغم : والله ياصعب انت تعبتني اي حل ماعندي الك..

هجان : جنت ناذر اذا صارتلي اخذها مشي لكربلاء بأربعين الحسين عليه السلام ، وهسه نذرت اذا نسيتها وكلبي برد اروح مشي ..

نغم : الله يبرد كلبك ويشفيك..

وتركتهم.

سيلين : ماحس عليج ضايجة ما سألج..

نرمان : لا ما حسسته لان وره الغدة رجعنا للبيت ودزيتله مسج كلتله راح انام لاتخابر ، وراها غلقت الجهاز اجه مرتين واني ما انزل لو اقفل الباب وابلغ ماما نايمه لو اكللها تكوله بالحمام ينتظر يمل ويطلع.

سيلين : خالة عرفت..

نرمان : اول وحدة حجيتلها وهواي لامتني وهي ايدتني افسخ.

سيلين : بس اخوتج رافضين يا نرمان..

نرمان : ماعرف حرت والله.

سيلين : الله كريم حبيبتي تنحل صدكي..

نرمان : الله يسمع منج ..

يتبع..

صباح الخير حبايبي

تكملة البارت من اكملة ينزل اذا ما نعست اكتبه هسه..

نزلته لهنا حتى تقروه بين ما اكتبلكم 😍

متابعة ممتعة غوالي..