Юнхо түүний биеэс анхилах зөөлөн үнэрийг үнэрлэн нэлээд хугацааг чимээгүй өнгөрөөв. Үнэр түүнийг ихээхэн тааламжтай болгон тайвшруулах боловч тэр хэзээ, хаана энэ үнэрийг мэддэг болж санагалзах болсноо мэдсэнгүй. Яагаад энэ үнэр ингэж их танил мэдрэмж төрүүлж, биеийг нь тэврэх шиг болж байгааг ойлгохгүй байв.
Хэри түүний хувирлыг харсаар хөмсөг зангидах аж.
"Чиний хоолой, чиний үнэр, чиний үйлдэл. Энэ бүгд миний зүүдэнд байсантай яг адил. Чи хэн юм бэ?"
Хэри балмагдах болон уурлахын хооронд ямар хариу үйлдэл үзүүлэхээ үл мэднэ.
"Вуах, вуа систем, дахиад өөр нэг хүн гараад ирлээ. Тэр шилжигч эсвэл үүнтэй холбоотой хүн үү?"
"Би харж чадахгүй байна, хөтчөө." гэж хүн роботын хоолой хэлэх бөгөөд тэр сүүлийн үед болж байгаа үл мэдэх зүйлсийг зохицуулж, олох гэж ихээхэн завгүй байгаа ч түүний ажиглах системд доголдол үүсэн ажиллаагүй болсон юм. Шийтгэлийн ертөнц нь хахир хатуу арга замаар бэрхшээлийг тулгаруулдаг боловч гаднын хүчин зүйл нь түүний хөтчийн талд хөнгөн ханддаг бололтой. Тэр дэлгэрэнгүй тодорхой мэдээлэл олохыг хичээн хичээнгүйлэн судалж байгаа ч өгөгдөлд нэвтрэн асуудлыг шийдвэрлэхийн ирмэгт гэнэтийн хүчнээс үүдэн удаа дараа осолдож эхэлсэн.
Хэри түүнийг шилжигч хүн эсэхийг мэдэж магадгүй гэж найдан нүд рүү нь ширтэхэд үгүй бололтой.
"Ноён Юнхо...ахэмм" Хэри бага зэрэг хий ханиалган түүний анхаарлыг татаад, "Та мэдэхгүй байж магадгүй, өөрийгөө танилцуулахад намайг Ян Хэри гэдэг. Таны сүйт бүсгүйн хэлснээр төрөөгүй хүүхдийг чинь алсан нэгэн. Ийм тэнэг худалд итгэнэ үү, байна уу чинь хамаагүй. Миний хийсэн хамгийн тэнэг алдаа бол ердөө түүнийг шатны уруу түлхсэн нь байх, гэвч би үүнийг зориуд хийгээгүй гэдгээ хэлье. Харин одоо та хийх гэж байгаа зүйлээ хурдан хий. Ингээд удаад байх чинь намайг ядрааж байна." Хэри ийн зоригтой хэлсэн ч үнэндээ тэр өөрт нь юу болохоос айж байлаа. Дахин харгис тамлал түүнийг хүлээж байх вий гэхээс айж, яс нь чичирч байсан ч тэр нүүрэн дээрээ харуулаагүй юм.
Тааралдсан гурван эрээс одоо урд нь байгаа хүн бусдаасаа илүү аймшигтай болохыг тэр мэднэ шүү дээ.
"Хмм, сонирхолтой." Юнхо гар дохиход үүдэн зогсох гурван эр ойртож ирэн Хэриг суллав.
Хүлээс нь тайлагдах мөчид Хэри зугтах боломжийг тооцон тэднийг цохихоор өндийхөд Юнхо түүний анхаарлыг татан анхааруулга хэлэх нь тэр.
"Зугтах боломжгүй, тэдний ур чадвар чинийхээс хамаагүй илүү."
Хэри төлөвлөснөө орхин Юнхо руу харлаа. Мэдээж тэр мэдэж байсан юм. Юнхогийн эрчүүд гайхалтай чадвартай. Энэ ертөнцөд хэн ч тэднийг давж чадахгүй. Тэр тэднийг их хэмжээний мөнгө сургаж, цалинжуулсан бөгөөд хамгаалагчдынх нь үнэнч байдал нь зөвхөн Жон овогтонд л үйлчлэгддэг.
Хэри гараа солбин цээжин дээрээ тавиад, "Юу хүсээд байгаа юм бэ?"
"Энэ бүх зүүд, төсөөллийг тайлах хүртэл чамайг энд үлдээсэй гэж хүсэж байна." Юнхо ч ийн хэлээд хөлөө солбин суулаа.
"Ноён Юнхо. Танд би хэрэггүй. Харин ч зайлсхийх хэрэгтэй. Түүнээс гадна зүүд гээд байгаа зүйл чинь надтай хамааралгүй гэж бодож байна. Та энийг ойлгох ухаалаг хүн шүү дээ." хэмээн егөөдөн хэллээ.
Юнхо түүний хөдөлгөөн бүрийг салгалгүй ажиглах бөгөөд царай төрхөөс нь бусад үйл хөдлөл хийгээд дуу хоолой, ярих өнгө аяс нь түүний зүүдэнд таарсан эмэгтэйтэй адил мэдрэмжийг төрүүлнэ. Түүний гэрээс олсон бичлэгийг үзээд шуудхан эргэлзэлгүй хамгийн сайн цэргүүддээ түүнийг хулгайлахыг тушаажээ. Мэдээж тэр түүнийг Чанминтай хамт байгааг мэдээд шилдэг хүмүүсээ илгээсэн хэрэг. Эхлээд түүнийг Чанмины гарт орсон гэдгийг мэдсэн тэр мөчид тухгүй мэдрэмж өвдөлттэй хамт ирсэн юм.
Ямар ч төлөвлөгөөгүй түүнийг хулгайлсан болохоор одоо ч юу хийхээ мэдэхгүй тэвдэж байв. Гэсэн ч хамгийн чухал асуудал болох зүүднийхээ учир шалтгааныг олж мэдэх хүртэл тэр түүнийг дэргэдээ байлгахыг илүүд үзжээ.
"Хээе байна уу, Систем? Хэрвээ би шилжигч гэдгээ хэлчихвэл юу болох вэ?"
"Хөтчөө, үүнийг дахин нэг ч удаа дурдах хэрэггүй. Дэлхийн сүйрэл болох аюултай. Бас танд юу тохиолдохыг хэн ч хэлж мэдэхгүй. Бүх шилжигч нарт заавал мөрдөх ёстой алтан дүрэм гэж бий. Энэ бол тэдний хамгийн чухал дүрэм."
"Тэгвэл би юу хийх ёстой юм бэ? Түүнийг надад ямар нэгэн зүйл хийх хүртэл хүлээх ёстой юм уу?" Хэри бараг л толгойдоо хашхирч байлаа.
"Өөрчлөлтийг бий болгож байгаа хүчин таны таалалд нийцүүлж эхэлснээс хойш болж буй зүйлсэд итгэнэ үү. Хөтчөө, би гаднаас хянах боломжгүй байгаа ч энэ ертөнцийн эрч хүч танд эерэг хандаж байгааг харж байна."
Хэри дуугаа хураан,
"Чиний зөв гэж найдъя." хэмээн бодно.
___
Энэ үед Чанмин харшдаа буцан ирээд эрчүүд рүүгээ уурлан хашхирч байлаа.
"Түүнийг олж чадаагүй гэнэ ээ? Тэр зүгээр л угаалгын өрөөндөө ууршсан гэж бодоо юу? Хурдан түүнийг ол!"
"Даргаа, бид хяналтын камерыг шалгахад хатагтай угаалгын өрөөнөөс буцаж гарч ирээгүй. Мөн тэнд цонх байхгүй учир бид таазыг хүртэл шалгасан."
Чанмин мэдэгдэл өгөх хүн рүү гарт таарсан үнсний саваа авч шидэн, "Түүнийг яг одоо ол!" хэмээн сүрдмээр бархирах нь тэр.
Хэрид аюултай зүйлс тохиолдох талаар тэр маш их санаа зовж байлаа.
___
Дараа өдрийн өглөө нар мандахтай зэрэгцэн Юнхогийн утас тасралтгүй хангинана.
"Надад шинэ утас авчир, тэгээд бас миний дугаарыг хэнд ч битгий мэдэгдээрэй." Тэр утасны дэлгэц дээрээ Жинагийн дуудлагыг харахыг хүсээгүй тул туслахдаа ийн тушаах аж.
Туслах эр толгой дохиод үргэлжлүүлэн, "Эрхмээ, эмээ тань тантай ярихыг хүсэж байна."
Юнхо ширээн дээрх хавтастай материалуудаа аван танхимын голд байх ширээ рүү шидээд, "Эдгээр баримтуудыг эмээ рүүгээ явуулаад намайг завгүй байгааг хэл."
Юнхо эмээдээ юу болоод байгааг тайлбарлаад байх завгүй учир дуудлагыг нь авахыг хүсээгүй аж. Эмээ нь ухаалаг, аливааг хурдан ойлгодог болохоор тэр удахгүй бүгдийг олоод мэдчихнэ. Харин хамгийн муу нь Жина цөхрөлтгүйгээр түүн рүү ирж, зогсоо зайгүй залгаж байгаа явдал. Ямартай ч Юнхо үүнийг анхаарсангүй, удахгүй тэр эмэгтэй усанд хаясан чулуу шиг алга болох учраас. Түүний эмээгийн үзэн яддаг хамгийн аймшигтай зүйл нь гэр бүлд нь худал хэлэх. Жина жирэмснийхээ талаар худал ярьж, жүжиглэснээс хойш үр дагавраа амсах нь гарцаагүй.
Жон овогт гэр бүлийнхнээс түүний эмээ хүмүүсийг тарчлаан зовоохдоо хамгийн хэрцгий нь. Хахир хатуу, хуурамч байдлыг шүүн залхаадаг эмээ нь түүнээс хавь илүү аргаар амархан дөнгөчихнө гэдгийг мэддэг учраас тэр Жинаг шийтгэх гэж яараагүй юм.
Үдийн үеэр Юнхо өдрийн хоолоо идэж байхдаа мэдэгдэл хүлээн авав.
Үнэхээр хурдан шуурхай Жина "тусгай шорон" рүү илгээгджээ.
Туслах нь тайланг уншиж дуусахад Юнхо хувиралгүй төрхөөр үргэлжлүүлэн хоолоо идэх бөгөөд Хэрид хоол хүргэж өгөхөөр явсан үйлчлэгч хоосон тавиуртай гарч ирэхийг чимээгүй ажиглав.
Хэдэн цагийн өмнө өглөөний цай авчирч өгөх үйлчлэгч хаалга тогшиход Хэри нойрноосоо сэржээ. Урьд шөнө Юнхо олигтой ам нээж, яриа эхлүүлэлгүй зүгээр л түүнийг ажиглан суухад л тэр ядарч сульдсанаас болоод түүний залхмаар харцыг ч тоолгүй бэлдэж өгсөн оронд нь шургаад аюултай эсэхийг ч харгалзалгүй нойрондоо автсан юм. Юнхо нэг өдрийн өмнө түүний өрөөг тохижуулахдаа нууц хяналтын камерыг өөрийн өрөөтэйгөө холбосон байв.
Юнхо өрөөндөө буцаж очоод түүнийг ажиглаж байсан бөгөөд Хэриг унтаж байхдаа амандаа бувтнан өвөрмөц олон үйлдэл болоод зан ааш гаргадаг болохыг мэдэв.
Бүхий л хугацаанд Юнхо чимээгүй ажигласаар эцэст нь нойрондоо дийлэгдэн сандал дээрээ унтан учир нь үл ойлгогдох зүүдээ зүүдэлж эхлэв.
Энэ нь өмнө зүүдэлж байсан зүйлийн үргэлжлэл байлаа.
Юнхо аажмаар эр хүн болж өсөж буй залуу өсвөр насны хөвгүүнийг харах аж. Тэдгээр жилүүдэд хүүгийн амьдрал хэзээ ч өөдтэй сайхан байгаагүй. Түүний ээж гэж нэрлэгдэх эмэгтэйн шийтгэл, зодуураас хэрхэн амьд үлдэхээ суралцаж байв.
Хамгийн муу нь нэгэн өдөр ээж нь нуусан жижиг хайрцгийг нь олж мэдсэн юм. Түүнээс болоод хүү нэг сар орондоо үхлүүд хэвтэх нь тэр. Бүхэл улсын дээд язгуурт ханхүү боловч өнчин дорд нэгэн шиг өдийг хүртэл амьдарчээ. Бусад ханхүү, гүнжтэй уулзах, бараалхах болгонд тэд түүн рүү хоолны үлдэгдлээ шидэх, таалагдаагүй бол шивэгчнээрээ алгадуулах, дээр нь шээх зэрэг байж болох жигшүүрт зүйлсийг түүнд хийдэг байлаа. Хүүг амьд үлдээж, амьдралыг нь жаргалтай болгодог цорын оршихуй нь охин болоод түүний өгсөн бүх бэлгийг хадгалдаг жижиг хайрцаг байсан юм.
Бараг л үхэлтэй уулзсан тэр аймшигт өдрөөс хойш залуу хөвгүүн хүчтэй нэгэн болж өсөхөөр сэтгэл чулууджээ. Улаан галд дүрэлзэн шатсаар үнс болох хайрцаг руу харж байхдаа тэр үнэ цэнэтэй нэгнээ үүн шиг алдахгүйн тулд, ширхэг үсийг нь ч хамгаалахын тулд хүчирхэг, шийдэмгий, бат бөх байх ёстойгоо ухаарав. Тэр өөрийгөө дайчлан шаргуу бэлтгэл хийдэг болов. Түүнийг сатааруулж, үл ойшоодог бүгдийг умартан амьд үлдэхийн төлөө тэмцэж эхэлсэн.
Нэгэн өдөр эзэн хаан түүний хичээл зүтгэл, цуцашгүй дайчин чанарыг нь дуулан нас залууд цэргийн жанжин болгож томилов. Түүний ухаалаг байдал эзэн хааны анхаарлыг татаж эхэлсэн мэт.
Юнхо бяцхан охиныг авьяас билэгтэй гоо үзэсгэлэн төгс бүсгүй болж өсөхийг харж байлаа. Үүний хажуугаар тэр залуу охиныг хүүг өмнөх шигээ анхаарч, санаа тавьдгаа больсныг анзаарав. Сүүлд охин ханхүүд ямар нэгэн зүйл өгсөн нь түүний ордонд төрсөн өдрөөр л байсан юм.
Жанжин болсноосоо хойш ханхүү тулаанд их явах болсон бөгөөд дайнд орох бүрдээ түүнээс захиа авна гэсэн бяцхан горьдлоготой хүлээнэ. Дайны талбарт амь нас жадны үзүүр дээр тогтож байдаг учир ханхүү зориг гарган охин руу захидал илгээдэг болсон. Гэвч түүний захидлын замд хэн нэгэн саад болж байгааг тэр огтхон ч гадарлаагүй аж. Мөн тэр хэчнээн удаа бэлэг сэлт илгээсэн ч хариу өгөөгүй.
Үл мэдэгдэх байдлаар улсын жанжны гэр лүү илгээгддэг захидлууд хатан хааны ордон руу чиглэгддэг байв. Хатан хаан түүний захиагаар түүний байр байдал, төлөвлөгөөг нь хянаж, ямар ч хариугүйгээр жанжны охин захиаг хүлээн авсан хэмээн дамжуулж байлаа. Тэр үед ханхүүд үнэнч туслах болон охиныг хамгаалуулахаар хүн илгээх хүч хараахан байдаггүй байв.
Сүйт бүсгүй нь болж өргөмжлөгдсөнийг мэдсэн цагаас хойш ханхүү түүнийг хүндэлсээр ирсэн. Түүнтэй дотно болж, ойртохыг хүсэх боловч тэр хаа газар явах болгондоо хатуу ширүүн эхийнхээ хараа хяналт дор явдаг байлаа.
Залуу охины насанд хүрснийг тэмдэглэх цэнгүүнд тэр түүнтэй нүүр тулахыг хүссээр нийслэлд буцаж ирэхээр сэтгэл гаргахад хатан хаан хүүгээ охиноос тусгаарлан цаг завгүй ажиллуулахын тулд дайн дэгдэх гэж буй талаар хуурамч цуу гарган хил рүү цэргүүд илгээж, түүнээс гадна хаанаас нууцаар хүчирхэг улс оронтой хамтран ажиллах гэрээ хийв.
Болж буй бүхнийг алгасалгүй ажиглах Юнхогийн царай дүрслэх аргагүй харагдана.
Хатан хаан удаан төлөвлөсөн нүүдлээ хийж, өмнөд улсын хаантай хуйвалдан охин болон хүүгээ гэрлүүлж, хоёр үндэстнийг эв нэгдэлтэй байлгахын төлөө хамтран ажиллах гэрээ хийлээ. Энэ бол хатан хааны нөхрийнхөө араар гүйцэтгэсэн хамгийн том хуйвалдаан байв. Гэвч өмнөдийн хааны өөр нэгэн төлөвлөгөөтэй. Чухамдаа эзэн хааны ордныг дотроос нь хагаралдуулж, сул талыг нь ашиглан улс орныг нь захирах бодлого ажээ.
Тэрээр тулааны эрдэмд гарамгай туршуулаа охиноо хэмээн зарлан залуу ханхүүгийн байрлаж буй хил рүү явуулав. Туршуул бүсгүй зугтаж байгаа мэт дүр үзүүлэн хил рүү нэвтрэх бол түүнийг барьж авсан залуу хөвгүүн тийм биш гэдгийг мэдэж байлаа. Эмэгтэйн үгэнд хууртсан мэт дүр эсгэн басхүү сүйт бүсгүйгээ атаархуулахын тулд нөхцөл байдлыг ашиглан төлөвлөгөө гаргаж, зугтсан гүнжтэй гэрлэхээ зарлав.
Ханхүү жижиг тулаанд ялсны дараа зугтсан гүнжийн хамт нийслэлд очоод найрын үеэр сүйт бүсгүйн тэднийг харж байгааг анзаараад зөрүүд зандаа дийлдэгдсэн гэмээр гүнжид хүрч, эелдэг хандаж эхлэх нь тэр. Мэдээж тэр түүнийг ямар хариу хувирал гаргахыг харахыг хүссэн. Гэвч залуу охинд тэд огт хамаагүй мэт зүгээр л тэднийг энгийн төрхөөр харж байлаа.
Залуу эр түүнийг ямар ч хариу үйлдэл үзүүлээгүйд нударгаа зангидах аж. Тэр түүн рүү очиж, нүүр тулж ярилцахыг хүсэн босох гэхэд түүний эх дуудах нь тэр.
"Гүнжтэй гэрлэхээр шийдсэн чинь сайн байна."
"Би түүнтэй гэрлэхгүй." Ханхүү эхдээ шулуухан хэлээд гарч явах гэсэнд,
"Хэрэв та түүнтэй уулзвал, түүнд юу тохиолдохыг мэдэж байгаа биз дээ?!" Хатан тайвнаар хэлээд цайгаа уув. Хараахан эрх мэдэл, хүч чадал дутмаг ханхүү яаж ч чадахгүй дээ бухимдан хөмхийгөө зуун нударгаа зангидсаар тэвчихийг хичээнэ.
Юнхо түүний гарын судас товойн гарч ирэхийг харж байлаа. Тэр хатныг хэлснээ биелүүлдэг хүн болохыг мэднэ. Нэгэн удаа хатан охиныг алахаар завдаж байсныг санав. Охины хоолонд хор хийж, бага багаар бие нь үхэж байхад ханхүү цөхрөлтгүй гуйн хорын эсрэг ерөндгийг авч байжээ. Гэхдээ нэг нөхцөлтэйгөөр. Тэр тулалдааны талбар луу явах ёстой. Тухайн үед түүнд сонголт байгаагүй агаад охинтой салах ёс хийлгүй явсан юм.
Бяцхан ярианы дараа залуу ханхүү ордондоо ихэд бухимдалтай ирлээ. Уурандаа тэрээр гүнжтэй жинхэнээсээ гэрлэхээр шийджээ.
Сарын дотор тэд албан ёсоор гэрлэсэн боловч хуримын шөнө тэр гүнжийг мансууруулж орхиод нэгэн эрэгтэйг нууцаар дуудан өөрийнх нь оронд дүр эсгэн шөнийг өнгөрүүлүүлэхээр үлдээв. Тэр өмнөд улсын хаан эх орныг нь эзлэхээр зэхэж байгааг мэдэж байсан бөгөөд гүнжийн эцэг рүүгээ явуулсан нууц захидлаас түүнд дурласан мэт дүр эсгэж байсныг тэр мэдсэн юм. Эхлээд тэр гүнжийн хайнга үйл хөдлөлөөс хэн болоход эргэлзэж байлаа. Тиймээс туршуулдаа шалгахыг хүсэхэд, хааны гүнж бус харин тагнуулч байсныг нь тогтоожээ. Шилдэг тагнуулч хэдий ч гүнжийн дүрд тоглоход эрдэм дутмаг.
Залуу ханхүү хэдэн жилийн дараа оюун билэгт, эрүүл чийрэг хүчирхэг эр болон өсөв. Тэр хуучин сүйт бүсгүйгээ харах болгондоо шинэ татвар залж эсвэл орхино. Гэвч тэр энэ бүхнийг зөвхөн түүнийг харахын тулд л хийдэг байлаа. Залуу эр түүнд уул толгодоос ч их үгсээр тайлбарлаж, чин сэтгэлээ бүгдийг хэлэхийг хүсдэг боловч тэр үед байдал үргэлж муугаар эргэнэ. Түүний эх, түүний эхнэр гэж дуудагдах хүмүүс улсынхаа болон түүний хайртай эмэгтэй рүү хуйвалдан хор найруулж байв. Нар сар ээлжлэн солигдох бүхий л хугацаанд тэр тэдний алхам бүрийг нягталж, гар нь хийх ёстой ажлаар дүүрч байлаа. Зарим үед эхнэр болон ээжийнхээ түүний эмэгтэй рүү чиглэсэн аймшигт төлөвлөгөөг бие даан зогсоохдоо ядаргаа, бэртлээс болж цусаар ханиалгана.
Ханхүүгийн амьдрал хөдөлбөл цорын ганц хайртай хүнээ алдах аюулт гарч боломгүй хавханд хавчигдан өдөр шөнөөр эргэлдэх бол түүний хайрласан нэгэн хэдийн түүнийг үзэн яддаг болжээ.