#الابواب_الخمس
البارت الثامن والاربعون /الجزء الثاني
للكاتبة Reem
على سگف السجن راح ارسم نجوم
واوصي اهلي علي لمن يمرون
يجيبولي هوى من الشارع العام
خاطر مااحس بروحي مسجون
شرهب : كله من وراكم معفتوني اموتها
عبدالرحمن: شون اعوفج رادت تموت بيدج
شرهب : انهاريت واعيط متعرف هاي شسوت بينا ويريد عبد يهديني وهو يسوق منتبهه ابو ماطور صار گباله وجان يصير جوه السياره وعطت دير بالك
ضرب بريك قووي وعااط
عبدالرحمن: لتنزل اي وحده بيكم
شرهب : نزل والتمت الناس واني وناي نرجف بلحظه وحده السياره داير مدايرها انترست زلم وهذا الي يعيط وذاك يريد يلزم عبد اخاف يهرب
كلشي مكعد نفهم من العياط اجت سياره شالت الولد وكله دم اني شفته لو لشتي كلها ترجف مدري وين راح دقايق واجه
فتح باب السياره
عبدالرحمن: ناي اخذي اختج واصعدو لذاك التكسي الواكف
شرهب : وين رايح عفيه
عبدالرحمن: وياهم للمستشفى يله بسرعه
ناي : انزلي يله
شرهب : شون نعوفه
عبدالرحمن: مو وكتها انزلي
ناي : امشي بسرعه
نزلنا بسرعه نمشي عبد سوالنا طريق وصلنا للتكسي هو خطوتين مو بعيد صعدنا بلتكسي وهاي شرهب وجهه اصفر
ان شاء الله سهله
شرهب : ياسهله والرجال غركان بدمه
ناي : خلي اخابر مهدي دكيت عليه ميجاوب هسه وكتها غير يجاوب
شرهب : اكيد عبد خابره
ناي : سترك يارب جنهه بوحده صرنا بأثنين
شرهب : حظي واعرفه ماادوملي كوه هيه
ناي : كولي ياالله ان شاء الله تنحل والولد يطلع مابيه شى
وصلنا للبيت ولكينه عمه تنتظرنا
بديعه : وين وليتن
ناي : انطينا صبر عفيه خلي ناخذ نفس
بديعه : شبيهه شرهب وضعها مخربط
ناي : اكعدي احجيلج وكعدت سولفت كلشي لعمه الكامت تهوس وتعيط
بديعه : انتي متوبين مو كتلج لتوصلين لهناك لو مرايحه مجان هسه عبد واكع بهاي الشده
شرهب : ابوس ايدج عمه مابيه حيل الملامه
بديعه : شتردين اسكت على وكاحتج گبل اكول صغيره ومتفهم هسه شجاج مو صرتي جبيره وطالبه جامعيه
شرهب : وهاي شعليها بهاي اني احترك گلبي على اخويه ومتحملت اكعد ساكته
بديعه : ومنو يكول همه وراها ليش تتصرفين بكيفج
شرهب : نقشمر روحنا اخويه يمشي ويه الحايط ومايوم اندك بواحد ولا اتعارك بلشارع يروح بدربه ويجي بدربه منو بعد يشتكي عليه غير عبيد وجوحي علمود البيت الاكشر الماحصلنه من وراه غير المصايب لو عمارات وبساتين شجان صار بينا يمكن يحركونا واحنا نايمين
بديعه : وهسه عبد وين
شرهب : كال اروح ويه الولد للمستشفى
بديعه : دخيلك يارافع السماوات ارفع هاي الغمه عنا منا يونس ومنا عبد العين المصلت على النبي امشي ادخلي غسلي وجهج شوفي حالج
شرهب : ياحال واني عايفه عبد ماادري شراح يصير بيه
بديعه : من وراج لو كاعده وساكته
شرهب : ادري راح تبقين تاكلين بيه وتلوميني خلي اطب جوه احسنلي
ناي : على كيفج عمه وياها خطيه هبطت حيل
بديعه : انتي الثانيه ليش مامنعتيها
ناي : ليش هيه تنكدر عفيه مو تدرين بيها
بديعه : شوكت تگبر هاي البنيه وتبطل مشاكل
ناي : تدرين من ضربت صالحه كيفت والله جانت الكتله من زمان تصير حتى واحد يبرد گلبه بيها
بديعه : هااك استلم عود هاي الفقيره
ناي : بربج عمه ماردتي بيوم تلزمين صالحه واختها واطيحين حظهن
بديعه : يووو كومه مرات اتمنى حتى احركهن وهنه واكفات دكاتهن بينا ماتتسولف الله لا يوفقهن سرطان ياكل بينا اكل شوكت نخلص منهن
ناي : شفتي ياعمه وهاي شرهب راحت ذبت حركتها وحرگتنا بيها
بديعه : واذا عمج اجه هد علينا وسوانه طلابه شكبرها شون نحلها
ناي : مااعرف
بديعه : شفتي لتضلين تمشين وره اختج بدون فهم هاي مشلوشه من تتعصب متشوف كبالها لازم الواحد يفكر يله يقرر واختج تهجم ومتفكر ابد والي مخبلني ماتتندم ولا تخاف
ناي : عوفج من شرهب بيبي شون صارت
بديعه : نايمه المكروده كوه اكلت لكمه وحده علمود العلاج وكل متفتح عينها صاحت جيبولي يونس
ناي : هو وينه اااااخ نار بگلبي خوف عليه وهلمره محد ينطينا نجده خابرتي مرتضى
بديعه : كال رايح ويه مهدي
ناي : مهدي هم شيب راسي ولايجاوب المن شايل تلفون بله احتركنا صار شى
بديعه : ياستار هاي الناقصنا
ناي : خلي اشوف بيبي وشرهب كمت حسيت بألم بظهري وكعدت
بديعه : شبيج فدوة اروحلج لتوكعين منا عمتي وهلمره انتي
ناي : لتخافين مابيه شى لان بدايه حمل هيج يصير
بديعه : هااااااا فتحت عيووني حاامل
ناي : اييي
بديعه : وماحجيتي
ناي : والله ردت اكول الكم وصارت سالفه يونس خربطت كلشي
بديعه : انتي من كل عقلج ضامه هيج شى وفوكاها تصعدين وتنزلين ورايحه ويه اختج هداده بله صار شى بيج
ناي : شيصير ياعمه قابل ملزوك بعلج الْحٍمَدٍ للـّہ صحتي زينه ومابيه شى
بديعه : وظهرج وجعج اوكفي خلي استوعب حامل يمه نايه
ناي : شبيج عمه شنو الغريب
بديعه : يمه ابنج صار عمره ٨ سنوات اني كلت بعد ماوراج حمل
ناي : الله قسملي الف الحمدلله ادعيلي بلخلقه التامه واكوم بلسلامه
بديعه : مهدي يدري
ناي : لا
بديعه : خرب لشتج اذا صدك شون سكتي
ناي : عود ردت اسوي اجواء رومانسيه وابلغه ونحتفل اني وياه صار فتره ملتهي عني وسالفه حوري منا لحد مافضت كلت اسوي اجواء عشتوو عود مثل النسوان الفايخات تالي قبل مااكول بسم الله خابرت شرهب علمود يونس خلتني حتى اسمي انساه مو عاد ابلغ مهدي
بديعه : شوكت عرفتي حامل
ناي : بيوم سالفه يونس العصر تمشيت لابو الصيدليه وجبت اختبار حللت مرتين اني جنت شاكه
بديعه : غير ترحين للمختبر
ناي : ميحتاج عمه حامل مبين قابل اول بطن ومااعرف
بديعه : الله يكومج بلسلامه وتقر عينج بطفلج
ناي : امين والاهم يونس يرجع حتى الفرحه طفت والدنيا طالعه من عيني
بديعه : ربج رحيم وكريم قادر يرجعه النا ادعي يرده مثل مارد يوسف ليعقوب
ناي : امين وين بلال شو البيت صنطه
بديعه : وديته يم بان مابيه حيل اركض وراه منا بيبيتج تعبانه وهم مرتضى كايل خلي كم يوم يمي وتعرفي متعود على بان ويحبها
ناي : زين تسوين
كمت من يمه عمه ورحت للغرفه فتحت الباب شفت بيبي نايمه عفتها وطبيت للغرفه الثاني لكيت شرهب نايمه بفراش يونس
كعدت بصفها شوشه شرهب جاوبيني شبيج
شرهب : ليش حظي بلدنيا قليل
ناي : ومنو حظه هوايه كل واحد مقسوم اله شى من السعاده وشى من الحزن
شرهب : بينما اني الحزن كله قسمتي
ناي : دومج متشائمة
شرهب : كلت واخيراً راح تتعدل اموري واعيش ويه انسان يحبني ويقدرني واكمل شهادتي ويصير عندي بيت واطفال وعيشه مثل البنات وكلشي انگلب بليله
ناي : كل تأخيره وبيها خيره
شرهب : اني بمنو افكر بيونس الهاد حيلي لو بعبد الما اعرف شراح يصير وياه كل واحد منهم ماخذ جزء منه وكعد يكطع بيه
ناي : كومي توضي وصلي وخلي اصلي وياج وندعيلهم
شرهب : مابيه حيل اصلي
ناي : تعوذي من شيطانج وكومي اني هم ظهري يوجعني وراح اصلي وياج
شرهب : خايفه لا انفجع بواحد بيهم
ناي : عوذه منج ومن افكارج كومي وبله حجي ماصخ
شرهب : خابري مهدي شوفي شصار
ناي : ميجاوب خلي نصلي وراها ارجع اتصل
صلينا وبقينا ندعي دعاء رد الغائب
وضعنا وحالنا كله ميسر لا عدو ولا حبيب الكل ساكت ومنتظرين الفرج
يونس : رجعت مثل ماجنت محبوس ومظلوم اباوع على الحياطين بغرفه لاهو سجن نظامي لا اكو مساجين يمي زين اخاف مخطوف على شنو يخطفوني من املاكي وفلوسي شو على باب الله يوم اشتغل ويوم لا حتى من اخذوني قفلو عيوني حتى ماشفت وين اخذوني مافتحو عيوني اله بهاي الغرفه عافوني يوم كامل محد سأل عليه بس واحد طب دخلي مي وراح حتى ماكو اكل بقيت كاعد وساكت وانتظر مصيري بالي كله يم البنات وعمه وبيبي اعرفهن يتأذن
تعبت من الانتظار وماكو اي احد يفهمني شديصير نمت على كعدتي لحد منفتحت الباب ومبين طلع الصبح الوكت هنا معدوم
اجوني ولد شباب يطلعون بكصتي
تعال يله
يونس : وين اني محد جاوبني اخذوني من ايدي اندار على كل جهه ناس لابسين مدني وناس زي معين وسلاح دخلوني لغرفه جان بيها واحد جبير بلعمر كعدني مقابيله عرفت من ياجهه من ملابسه (بدون ذكر الجهه)
انت يونس صمد فرج
يونس : اي اني
اجتنا شكوة عليك
يونس : من منو
يكولون ماخذ بيت عمامك وطاردهم من عنده وموقع بيبيتك بالاكراه لان مره جبيره وعدها زهايمر مقشمرها وماخذ البيت بإسمك
يونس : مبين الشكوة من عمامي
اذا تعرف ليش تسأل
يونس : زين اريد افهم ليش مااشتكو بلمحكمه ليش عدكم
احنا جهه نرجع الحق المسلوب لاصحابه هواي اكو ناس ضاعت حقوقهم وماعدهم اثبات بلمحكمه حتى يرجعو واحنا فاتحين مكاتبنا لهيج شكاوي
يونس : خلف الله عليكم ومشكورين بس غير اذا واحد مظلوم مو ظالم
بله حجي زايد تتنازل عن البيت وانطلعك
يونس : اي تنازل وبيا حق انطي البيت عمامي ماالهم شى يمي ليش اتنازل وهمه باطلين
همه كالو البيت مشتري بفلوسهم ولا ميردون يكسرون خاطر امهم سجلوو بأسمها وانت استغليت مرضها وقعتها
يونس : ماكو هيج حجي والله
عمامك انطو الاثباتات واني مصدكم لهذا مثل الحباب تتنازل حتى ترجع لبيتك
يونس : على اي اساس اتنازل
راح تتنازل وحجايه ثانيه افرغ السلاح براسك
يونس : فرغه واگتلني ومااتنازل على الاقل من اموت يصير ورث لاهلي وماياخذون اي شى عمامي
كاام هذا الرجال وضربني على وجهي وحصرني بلحاايط كل السويته احمي وجهي منه يضرب ويعيط تتنازل لا انعل والديك فوك مابايكهم وضل يفشر ويسب اكلت كتل معدل منه لحد متعب وعافني مشمور بلكاع
بقيت على هذا الحال يمكن ساعه ورجعو اخذوني ورجعوني للغرفه الثانيه اريد واحد يفتهم مني يسألني خفت ليضيع حقي لان مبين عمامي خوش طابخيها وعلاقات وفلوس وفاريها عليه
ناي : بقينا على نار لحد الليل اجه مهدي ومرتضى ركضنا عليهم هااا بشروو
كعد مهدي ومبين حيل تعبان
مهدي : على منو بيهم ماشاء الله صارو اثنين
ناي : اثنينهم احجي فدوة
مهدي : لهسه منعرف منو اخذ يونس كل واحد يحجي شكل بس عندي ولد صاحبي اخوه قيادي بلعصائ.ب وكال اسألك واشوف
شرهب : واحنا نبقى ننتظر
مهدي : ماعدنا غير حل
شرهب : وعبد الرحمن
مهدي : اهل الولد رفعو شكوة عليه وذبوه بلتوقيف
شرهب : صخام الصخمني
مهدي : على كيفج باجر يتنازلون ويطلع
ناي : لعد المن دخلوه
مهدي : همه رادو عطوه حتى يصير فصل خابرت عم خالي الجبير وباجر راح يجيهم وياخذ عطوه منهم وتالي يتنازلون ويطلعون وتضل سالفه عشاير
ناي : والولد مات
مهدي : عايش بس متأذي كسور على رضوض الدعمه قويه مبين عبد جان سايق بسرعه
شرهب : كله من ورايه
مهدي : ليش جنتي ويااه
ناي : اني بعدين احجيلك
مهدي : رايح للبيت اسبح وشويه ارتاح من الصبح افتر ابقي باتي هنا لان من الصبح لازم اطلع لديالى اجيب عم خالي ونطلع لاهل الولد
ناي : وخالو عمران
مهدي : ولا تجرأت اخابره لان اعرف مراح يوكف لعبد وهو هم طلب محد يبلغ ابوه
ناي : مستحيل خالو يعوفه بهيج موقف
مهدي : لتنسين دكت عبد وياه جبيره هاي اذا متشمت بيه
ناي : شون حظ اسود منين طلعتنا
مهدي : محتاجه شى
ناي : سلامتك دير بالك على نفسك
مهدي : اذا احتاجيتي شى خابريني
ناي : طلعت وراه ونزلنا قبل ليفتح الباب ويطلع كتله
مهدي عندي شغله اريدها اكولها الك
مهدي : ياستار منو سوه مصيبه بعد
ناي : هااي شبيك روح الله وياك
مهدي : احجي نايه تعبان وابويه شفته بعيني اليوم من الفر والتعب
ناي : اني حامل صفن بوجهي
مهدي : صدك تحجين
ناي : اني بحال اتشاقه حضني حييل وباس راسي
مهدي : اكو وحده تكول هيج خبر بهذا التوقيت
ناي : شفتك تعبان ردت اريحك
مهدي : دومج مريحتني يااغلى الناس امشي ويايه للبيت ارتاحي مااعوفج هنا
ناي : لا عفيه مااريد اعوفهم وگلبي نار على يونس اذا تريد ارتاح جيبلي خبر عنه يونس ريحة امي وطيبتها اذا صار شى بيه مااكدر اعيش
مهدي : ان شاء الله البيدي اسوي والله اركض من مكان لمكان
ناي : الله يقويك
مهدي : طبي جوه ولتتحركين هوايه
ناي : باسني من شفايفي وراسي وطلع نفسيتنا تعبانه واحدنا ميعرف شيسوي
صعدت فوك اباوع الوجوه مگلوبه وبيبي مكعد تصحى وخايفين لتضيع منا
يونس :
صار ٤ ايام هنا كتلني الجوع مرتين بس جابولي اكل وراها خلصوها ويايه مي روحي بهتت وراسي يوجعني من الضرب سحلوني مره ثاني وهلمره مو وحده هذا الرجال ويااه ولد شاب ورجال ثاني جبير كعدوني نفس الكعده
هاااا شقررت
يونس : كوه ارفع راسي واحجي اسمعوني وراها التردوه يصير
مانسمع اي شى تتنازل بالاول
حجه الرجال الثاني
احجي خلي نسمع
جان يكول الضربني ومبين عصبي حييل كاله سيد المن نطي وناخذ وياه بلحجي عمامه جابولنا سند الكاع شون باعوها واشترو هذا البيت خلي يرجع البيت لاصحابه وانطلعه المن بعد كاعدين ومضيعين وكتنه ويااه
اباوع على نقاشهم مبين هذا الرجال يريد يفرها بدون ميسمع من عندي ردت احجي عاط بيه سكتني اباوع بلوجهه ادور على واحد بيهم استنجد بيه وجهت كلامي للرجال الثاني وكتله سيدي اني رجال على باب الله وهذا حالي كدامك شكلي مال واحد يبوك ويوقع بيبيته
كام يلعب بلحيته الطويله المتروسه شيب ويحجي
مالنا دخل بلشكل اذا نحكم بالاشكال نص السجون تفرغ
يونس : مو سمعتو من عمامي اسمعو مني
طفر ذاك وكاال ماله داعي نسمع راح توقع على اوراق التنازل وترجع الحق لاصحابه واذا عاندت اعتبر روحك متت
يونس : اني اوقع ماعندي مانع ولا اعاندكم بس اسمعوني وراها راضي بحكمكم
رجع حجه هذا الرجال الجبير
خلي نسمع منه ابو عباس ونفتهم السالفه كلها لتخبصنا
ابو عباس : عااط وكااال مو كتلكم اني السالفه يمي ليش تعاندون
حسيت هذا الرجال مدفوع مبين من حركت گلبه يريد يسد السالفه سريع سريع انرحم بحالي وكت ما كال الرجال الثاني اني حاب اسمع منه
البيت بأسم بيبيتي وتنازلت نص اليه ونص لاختي بعد ما أذوها ولدها وهي عايشه ويايه وقبل سنين تنازلت اليه وبدون ماادري وره وين يله عرفت والبيت اصلاً مو مالتهم اول مشترت البيت بيبي جان بفلوسها وذهبها وجان هيكل وهيه كملته وره سنين طلع الهم ورث كاع ابوهم وباعوها واشترو الخرابه البصف البيت ١٥٠ متر وكبرو البيت وصار بيت جبير هاي الكاع اليحجون عنها بيها حصة ابويه وحصة بيبي وحصة عمتي تنازلت اليه وحصة عمي فلاح وزوجته عايشه هم يمي يعني عمامي جوحي وعبيد الهم شى كلش بسيط واني مانكرت حصتهم كلت الهم شوكت ماابيع انطيكم بس همه يردون البيت كله بلباطل وبيبي لا بيها زهايمر ولا شى وتكدرون تتأكدون هي عايشه يمي روحو سألوها انتم تكولون نرجع الحق لاصحابه واني راضي ارجع كلشي اذا الهم حق بس قبلها روحو اسألو صاحبة الشأن واذا كذبت بحرف راضي بلي تسوه
ابو عباس : وعلى شنو نسأل الشغله يمي واني سألت واستفسرت
يونس : باوعت على الرجال الجبير وابد ماحجيت ويه هذا الي اسمه ابو عباس وكلت
احلفك بأهل البيت لتظلمني وروحو تأكدو عمامي كل خير ماشفنا منهم ولان يدرون قضيتهم خسرانه التجأو الكم والله اعلم لمنو دفعو حتى يركبوني الغلط وياخذون البيت بلقوه كاام هذا ابو عباس وضربني حيل على وجهي وكعني بلكااع ويعيط شنو قصدك ماخذ رشوه
سيد : شجاك تضرب بيه عوفه
ابو عباس : شفته شون يتهمني لك تتنازل هسه لاازوعك دم واطلع حليب امك من خشمك
تعالو يولد شيلوه
ابو عباس : وين ماخذه
انت مو تريد يتنازل اني اخلي يتنازل بس انطي مجال على شنو مستعجل
ابو عباس : ورانه كومه شغل فارغيله واني كتلك الشغله يمي انت ليش تريد ادوخ راسك بلشغله وشوفتك سند الكاع وكعدت ويه عمامه وانطيتهم كلمة يرجع حقهم شو حاسك رجيج صرت
مو رجيج خلي الولد ياخذ نفس شوف شمسوي بوجهه علي كال ضاربه مأذي هذا مو اتفاقنا
ابو عباس : غير عاند وتجاوز وكدامك تهمني بلرشوه
مكال انت ولا حدد حجايه طلعت منه هيج بليه قصد
ابو عباس : خلي اجيب الاوراق ويوقع لا اطشر راسه
يونس : كوه افتح عيني واسمع نقاشهم ضلو واحد يحاول يقنع الثاني لحد ما هذا الرجال كال باجر عمامه خلي يجون كدامه يصير التنازل اخذوني ورجعوني واني بلا حول ولا قوه وحاير اوقع واتنازل لو اموت بيدهم لان مبين جوحي وعبيد منطين خوش فلوس او واعديهم بمبلغ لان هذا ابو عباس ذبح روحه على التنازل
رافع راسي على السكف اباوع الجو بارد حيل ومحاس بلبروده لان وجهي يحرگني اجه كلشي گبالي طفولتي شبابي كلشي عانيت بيه
وكل ضربه اخذتها أذت گلبي ضليت وكت طويل لحد ماغفيت
نمت حلمت جني ابن ٦ سنوات وامي تمشط شعري وتبوس بيه واكف اباوع عليها وعلى حالي من جنت طفل وشون توصيني مااروح بعيد وماالعب بلطين واوصخ نفسي شفت حالي شون فرحان بوجودها وطلعت اكمز ومكيف وبلحظتها صعدت بلدرج واخر بايه شفت صالحه وساهره دفعوها وكعت كبال عيني ركضت عليها ودمها مله الكاع شلت راسها دمها ترس هدومي كمت اعيط عفتها وصعدت ضربتهن اثنينهن كمت اضرب بيهن لحد ماكطعن النفس انداريت شفت امي ماكو والدم اختفى نزلت ادور عليها وافتح باب باب وابجي اخر باب فتحته لكيتها كاعده تصلي لابسه جادر مال صلاه كله ابيض حتى سجادتها بيضه كعدت بلكاع بصفها واشهك من البجي لان منظرها مراح من بالي لحد ماكملت صلاتها اندارت عليه وابتسمت وباستني من راسي ومسحت دموعي بجادر الصلاه مالتها فزيت من النوم مخروع مديت ايدي على خدي لكيت دموع رجعت راسي للحايط وبجيت يمكن باقي الدموع الضلت بلحلم نزلتها گلبي تعب من كلشي مر
رحمتك يارب ماضلت طاقه بيه
بديعه : خابرت على خوله مدري ليش تاكل بگلبي سالفه ضربت شرهب لصالحه هاي ادور هيج مشاكل وتستغلها
خوله : مصار شى على يونس
بديعه : بعد منتظرين
خوله : ردت حجز منطوني اجازه
بديعه : وين جايه قابل شسوين
خوله : كاعده هنا واكل بروحي خايفه لا الولد يصير عليه شى
بديعه : ربج الحارس ان شاء الله يرجع النا
خوله : اكو حجايه بحلكج ذبيها شصاير
بديعه : هاي بت اخوج الرعنه رايحه وضاربه صالحه مطيحه حظها مكطعه شعرها عايفتها بلكاع تنازع
خوله : بعد ايدي وينها خلي ابوسها
بديعه : شوف البخت هاي فوك مااطيحين حظها وترزليها
خوله : تدرين بيه اني اخر وحده ارزل شرهب لان اعرفها متتعارك اله بلحق
بديعه : البنيه كبرت وعلى ابواب زواج ميصير تبقى هيج هبشه تتعارك ويه الرايح والجاي
خوله : لعد ترديها فاهيه مثلج
بديعه : مو مثلي بس شويه ثكل رايحه وهاده على مرت عمها بله اشتكت عليها حتى تكمل نفتح سجن بأسمنا وانلم العائله كلها بيها
خوله : اني هسه اخابر عبيد واحاجي
بديعه : وشرهب
خوله : شبيهه بنيه محروك گلبها وتريد اطفي قابل نمنعها
بديعه : تدرين من وره سوايتها خطيبها هسه بلسجن مو اكلج راح نفتح سجن بأسمنا
خوله : شصار احجي
بديعه : حجيت كلشي لخوله
خوله : تفض جم فلس وتخلص
بديعه : يابرود اعصابج واني خابرت حتى تحجين وياها وتعقليها
خوله : جان عقلت اني ابو طبع ميغير طبعه عوفي كل واحد ونفسه اكو ناس هيه طبعها من نار واكو ناس من مي ثلج امثالج واكو نص ونص وشرهب بركان خامل اي حركه بسيطه تثور عوفيها هيج بابا الفقير ميعيش بهاي الدنيا الكشره ناس تاكل بناس والفقير مديوس بين الرجلين وضال يتفرج شون ياكلون حقه
بديعه : واحنا مو بغابه ياهو اليجي يهجم ويتعارك اكو اصول واكو تربيه
خوله : والي عايش ويه امثال صالحه وساهره وسما وداد واخوتي يفيد بيهم اصول بله متسكتين كلمن نطي على كد حجمه والاصول والتربيه لاهلها وللي يستاهلها مو للشعوذه ذوله روحي خلي اخابر عبيد ليستغل الموقف ويأذي شرهب
بديعه : بعد ولا اخابرج واطلب منج تعقليها
خوله : رجلها هو يقوم بلواجب اطلعي منها
بديعه : هذا الفلحت بيه منج الله وياج صوجي خابرتج هو محد خبلها وانطاها عين لهاي البنيه غيرج
خوله : عفيه هيج صيري فطنه والكفيها يلفاهيه باي
خابرت على عبيد دك هوايه لحد مشاله
عبيد : توقعت انتي رقم دولي
خوله : مالي حيل انطي واخذ وياك بلحجي
اخاف الك نيه تأذي شرهب
عبيد : الج عين ومخابره على بت الگلب هاي نومت صالحه بلفراش
خوله : والله وعاشت ايدها
عبيد : خلي تكوم على حيلها اله اخذها بيدي واخليها تشتكي عليها
خوله : رجال وطالع من ظهر فرج وسويها شايف شسوي بيك
عبيد : تهديدج مياكل ويشرب ويايه مابيدج شى
خوله : لا عبالك بلسويد مااكدر اجي يومين والثالث اني يمك واول مااوصل اوكف بنص السوك ويم محلك ومحل اخوك اشهركم شهيره نسيت مرت اخوك طفرت واخذت ملايين وياها اخاف يم بيتكم الناس سكتت بلسوك محد يسكت يبوو يموتون على هيج فضايح يشتروها شرايه وهااا اكلهم طفرت ويه صاحبها اذب تهمه عليها مو هيه خربانه خلي تخرب على وجهه
عبيد : حتى ادفنج بمكانج
خوله : هاي اذا لحكت لم الهوسه حتى لتنفضح هي كتله على جم كفشه ومرتك مثل الصل كلشي مابيها قابل ماتت ولو اعرف حتى اذا ماتت تكيف تخلص منها
عبيد : اذا وصلت وحده من بنات اخوج اذبحها
خوله : ميوصلن بعد كافي فضايح مناقصك وحافظ على مي وجهك هاي هم مرت اخوك وهم اخت مرتك وهم بت خالتك يعني من كل صوب تجيك الفضيحه والسوك ماينسى ولو بعد سنين يكولون فلان مرت اخوه شردت ويه صاحبها وباكته سكت مرتك وكول الها تكول خوله تعيش وتاكل غيرها
سديته بوجهه شكد صايره اكرهكم
شرهب : كلشي راح طعمه وحتى دوام مداومت باقيه اداري بيبي وطول الوكت ساكته كلشي بعيني اختفت الوانه وگلبي مقسوم بين يونس المنعرف شى عنه وبين عبدالرحمن الي طولت شغلته ولهاي اللحظه متنازلو عنه صار يومين وبين بيبي ومرضها
كمت انام بغرفه يونس حتى بليل اشكيله براحتي واحس بيه يمي التزمت حيل بلصلاه والدعاء وكمت اقرا قران وحلفت بس يرجع بخير اتحجب عن قناعه والتزم بلحجاب كمت اتوسل ليل نهار واني كاعده واني اشتغل بكل وقت ولساني مابطل توسل برب العالمين حتى يرجع يونس لان كلنا بدونه ضعنا
عرفت ناي حامل كيفت الها لان من زمان رادت طفل ومصار والحمدلله رب العالمين جبر خاطرها بس الفرحه ناقصه لان عامود بيتنا وسندنا ماكو
اليوم بيبي وضعها شويه احسن كدرت تحجي واكلت شويه دك تلفوني باوعت عبد ممصدكه مباشره جاوبت
عبدالرحمن: هااا ام البلاوي
شرهب : انت وين حبيبي
عبدالرحمن: هسه صرت حبيبج من دعمت الولد
شرهب : فدوة احجي
عبدالرحمن: طلعت من المركز صرت رد سجون من وره حضرت جنابج بله اني شمسوي بدنياي الله يرزقني بوحده انكتل من وراها وانطرد وادخل سجن
شرهب : قابل اني كتلك سوق سريع انت متعرف تسوق بعد لتركب سياره اشتري بايسكل احسنلك
عبدالرحمن: هذا الي الله قدرج عليه مكان متبجين وتكطعين خدودج والكاج بلكاظم شاده علك وتدعين ارجعلج سالم
شرهب : شكوو قابل رايح تقاتل داع.ش هو انت دعمت واحد المفروض ادعي للولد يعيش انت شكوو عليك
عبدالرحمن: لو ممجاوبه هيج جانت كلت مغيريج
شرهب : تعال اريد اشوفك
عبدالرحمن: شسوين بيه
شرهب : عبدوو
عبدالرحمن: احتركو هااااا
شرهب : اشتاقيتلك
عبدالرحمن: احممم انتي منوو
شرهب : الله عليك تعال ضل بالي والله
عبدالرحمن: رايح لعش الزوجيه مالتنا اسبح واجي
شرهب :انتظرك لتتأخر
عبدالرحمن: يارب بقيها على هدوئها بين مااسبح واروح الها
شرهب : احد كلك مخبله وافتر واضرب الناس حجار
عبدالرحمن: المخبل ماعليه عتب اويلي على العاقل ويهجم على الناس بيتها من وره سوايتج جان ولد مات واني انحكمت
شرهب : روح عبد مااريد اشوفك
عبدالرحمن: احسن
شرهب : سده وراح شكد غثيث ولا احجي ويااه بعد
وره ساعتين اندكت الباب سمعت صوت ناي تصيحني
هااا عيني باوعت عبد واكف ابتسمت لا ارادياً صدك اشتاقيتله وخفت عليه بس اني بيه خلل بأظهار المشاعر هيج تركيبتي
ناي : الْحٍمَدٍ للـّہ على سلامتك
عبدالرحمن: الله يسلمج ام سيف
ناي : مهدي وين
عبدالرحمن: عنده شغل ويه عمامنا بليل يرجع
ناي : اخابر عليه ميجاوب
عبدالرحمن: مخبوص حييل طلعت من المركز وهو راح ويه الزلم
ناي : اخذو راحتكم
شرهب : عمه جانت بلسوك وناي طبت للغرفه وبيبي نايمه يعني وحدنا اشرلي تعااي وفتح ايده اشرت براسي مااااا
عبدالرحمن: يعني متجين
شرهب : لا
عبدالرحمن: لعد رايح
شرهب : راد يطلع جريته من قميصه ويييين
عبدالرحمن: مو مترديني
شرهب : لا اريدك بس انت ضوجتني
عبدالرحمن: تعااي بحضني هسه وبعدين ضوجي
سحبني من ايدي وحضني حيل
عبدالرحمن: اشتاقيتلك جامبو الجبار
شرهب : ضربته على صدره هااي عليمن
عبدالرحمن: عليج بعد ماكو شرهب كله جامبو
شرهب : وخر بعد مااحبك جان حييل يحضني مخلاني اوخر منه
عبدالرحمن: تدرين جان هسه انتي بيتي وحاضنج براحتي كلشي انگلب تكول عجاجه وخربت الوضع
شرهب : ابتسمت بقهر هذا اني دوم كلشي عكس يمشي ويايه طمني شصار بسالفه الولد
عبدالرحمن: تعااي اكعدي يمي
كعدت بصفه وكعد يسولف الصار وشون انطو عطوه
وابوك
عبدالرحمن: شبيهه
شرهب : مااجه
عبدالرحمن: اني بلغتهم لتنطوه خبر مااريد يتشمت بيه
شرهب : كله مني والله مجان قصدي أذيتك انت شجابك ورايه
عبدالرحمن: مرتي ورايحه تتعارك تردين اتفرج
شرهب : مقهوره حيل الله اعلم شراح يصير من وره هذا الولد
عبدالرحمن: فصل وفلوس اكو غيرها عدا كل علاجه تكفلت بيه
شرهب : يايمه شكديعني
عبدالرحمن: الناس الضربت ابنهم حادين سنونهم علينا ومبين راح ندفع كذا مليون
شرهب : هو ما مات وانت تكفلت بعلاجه المن هاي الملايين
عبدالرحمن: صار رزقها للعشاير هاي السالفه اذا تضربين طفل راشدي تطلع ناس معگله وراه ويطلع هو معيشهم خلي تفض بفلوس الْحٍمَدٍ للـّہ ما مات جان خوش خلصت شهر العسل بلسجن
شرهب : قصدك شهر البصل ضل عسل
تقرب مني وحضني
عبدالرحمن: انتي صيري بحضني وشوفي العسل شلوونه
شرهب : ليجي احد وخر عبد عيب
عبدالرحمن: اي مو اني صاحبج
شرهب : من نتزوج عود
عبدالرحمن: أيس يعبيس غسلت ايدي بمي زمزم على هاي الاوضاع
شرهب : عوفني لعد اذا هيج ضايج جان يجرني من اذني
عبدالرحمن: لا كل شويه وعوفني وطلكني هو اني شفت منج حتى اعوف ضوك بعدني ماضكت
شرهب : عوف اذني لتجرها جان يدنك ويعضها اااااخ شبيك
عبدالرحمن: عجبني مرتي حر بيها اعضها اكطعها
شرهب : اني بوضع مابيه حيل جان عرفت شون اردك
عبدالرحمن: ليش وجهج طافي حتى لهفه بعيونج ماكو شبيج ياگلب عبد وروحه
شرهب : حطيت راسي على صدره وبجيت يمكن هذا اكثر سؤال ردت احد يسأله اليه حتى اطلع الگبت الباقي بصدري
عبدالرحمن: هااااي شنوو اول تالي تبجين عبالي القنوات الدمعيه ملغيه عندج
شرهب : عفيه مالي حيل للشقه اني منتهيه على يونس وعليك وتعبت حيل نفسيتي معودت طلعت انت وعرفت وراك فصل وخساره شكبرها رجعت لخط البدايه منين ماافر راسي الكه شئ يأذيني
عبدالرحمن: بلنسبه ليونس مهدي مكاعد واني هم راح اساعده واعتقد بده يوصل لشى اما اني بلفلوس ولا بيج كلها تتعوض وعيونج
لتنقهرين تنحل بأذن الله ولتمسحين دموعج بلقميص ورايه طلعه
شرهب : لعد هاااك مسحت عيووني حييل بقميصه وكاام يضحك
عبدالرحمن: ههههه ماخذ طفله والله
شرهب : خلي طلعتك تفيدك
عبدالرحمن: محد يفيدني غيرج خلي اروح لان مهدي ينتظرني ادعيلي نخلص حتى اخذج واطلع اليومين الي انسجنتهم بيج كووول وبوكتها اتوبج تتعاركين ويه احد
شرهب : مااتوب لزم خشمي بيده وكرصه
عبدالرحمن: اتوبين صيري يمي ويصير خير
شرهب : انتبهه لنفسك
عبدالرحمن: ماكو منا منا بوسه ام المطكه ام الشمه لج مهدي من طلعت حضني وباسني وانتي مرتي متبوسيني
شرهب : تقربت بست خده
عبدالرحمن: ياسبحان الله نفس بوست مهدي اروح لمهدي اشرفلي خويي وضلعي انتي مخلصتها عليه خبز يابس
شرهب : روح هذا العندي
عبدالرحمن: واني هذا العندي جاان يجرني حييل وباسني من شفايفي
عبدالرحمن: افييييش شكد طيبه هسه اروح انطي فصول واني مرتاح
شرهب : خله وطلع يكولون عليه شاخطه والله عاقله بلنسبه لعبد
ناي : باقيه بيت يونس ومكعد اشوف مهدي لان مخلصها يفتر على شغله عبد ويسأل بدربه على شغلة يونس
عمه بديعه خابرت مرتضى يجيب بان يمنا لان عايفها اكثر الوكت وحدها لازم محل يونس ومرات يفتر يسأل ويرجع تالي الليل
اجوي يمنا العصر وجايب مسواك وياه وانطاني الدخل مال الشغل هلكم يوم اندكت الباب حيييل
مرتضى : اني اشوف منو
نزل وشويه وصعد
مرتضى : ادخلو بلغرفه
بديعه : خير ابني
مرتضى : ذوله جماعة (بدون ذكر الجهه) يردون بيبي
بديعه : يمه شجابهم علينا
مرتضى : دخلي البنات بغرفه يونس ومااريد نفس يطلع
ناي : دخلنا كلنا للغرفه ونتراجف ذوله شيردون من عدنا
بديعه : لبست عباتي وكعدت عمتي وبقيت يمها دخلو للبيت اثنين رياجيل
السلام عليكم
مرتضى : وعليكم السلام تفضلو ادخلو منكدر نطلعها للهول لان تعبانه
عادي ندخل الها اهم شى واعيه
مرتضى : اي واعيه
بديعه : دخلو سلمووو واحد كعد يم عمتي
شونج يمه
عمشه : هله يمه
اني جايج علمود ابن ابنج يونس
عمشه : يابعد بيتي يمه اريدنه تعرف مجانه
اي اعرف وجاي اسألج جم سؤال ونروح
مرتضى : انتم الي اخذتوه
هذا الشى ميخصك
بديعه : سحبت مرتضى للمطبخ فدوة اسكت
مرتضى : بأي حق ياخذوه لا همه حكومه ولا قانون شنو تايهه
بديعه : اي تايهه والحكومه الهم احبيب نغالط نفسنا هو وينه القانون كلمن يصيح الزود الي واليحجي يموت اسكت مالنا حيل ياخذوك ويه ابن عمك
مرتضى : غير نفهم ليش اخذوه
بديعه : نفهم بعدين عليك الله تسكت ومتفتح حلكك مالنا حيل نركض وراك انت هم
بديعه : رجعنا للغرفه نسمع الصار
حجيه البيت ليش سجلتي بأسم يونس
عمشه : عبنه يستاهل شيال همي وماعافني اطورد وحيدي بلشوارع حطاني على راسه
يعني مو هو طلب منج تسجلي
عمشه : ياخايب مايعرف كضاه الوليد تصفن انه بيدي رحت وتنازلت والزلمه عمران شاهد
منو هذا عمران
مرتضى : كرابتنا
زين حجيه ولدج مو همه اشترو البيت كالو بفلوسنا اشتريناه
عمشه : يااا من دهر فرهم گل المصايب من جوه راسهم منين يشتروه من شيب الخلفهم البيت بيتي وانه بچدي كبريته ريگي تمرمر لون صار هلكبره
زين حجيه والكاااع
عمشه : كااع ابيهم وانه اشتغل واحرث بيها وبعناها وكملنا البيت ونسوانهم تحود بيهم ومارضو يلفوني وبطيحتي شمروني على الغريب يداويني ترضاها يبعد امك
ويونس الله ينطيك وينطي حار بيه ولهذا يومك عيشتي عليه الوليد يمه فقير ويتيم وبرگبته خياته ردوه اليه احبن على يدكم انه بلياه وجعانه
يرجعلج حجيه بعون الله
عمشه : اگلك يمه اريدن منك شغيله گرب
امريني
عمشه : اريدن تكض ولدي كضه من هاي المعدله اريدن يصيحون الغوث كون يشوفون ملچ الموت جدامهم تمسدهم تمسد اريدن مايندكون بهذا اليتيم عبن طاك جبده من وراهم مالنا غيركم تردون حك هذا اليتيم عبن ماضل سالفه وماحطوها براسه مايتوبون منه مايخافون الله انه اريدن منكم حكي وحك اليتيم ثواب لاهلك ذوله عاقين ومابيهم گل خير
صار حجيه يجرالج
عمشه : اخذها من شاربك الحلوو يمه
ههههه تدللين من شاربي بعد مااخليهم يندكون بيونس
عمشه : يبعد طوايفي
ناي : طلعو واحنا ركضنا نريد نفتهم الصار كلشي معرفنه غير سألو بيبي وراحو
شرهب : الليل مانمناه كوه كل واحد بينا نام ساعه وفزينا من الصبح
بيبي اباوع بوجههه مرتاحه تكول عبالك يونس رجع عفناها على راحتها المهم متتخربط نظفت البيت وناي متمدده على ظهرها كعد يوجعها اندكت الباب
بديعه : وحده من عدجن تنزل
شرهب : شوو الباب انفتح قبل لا ننزل واندار
واشوف يونس گبالي
بعد اسبوعين :
شرهب : كاعده وفاتحه عيوني واسمع بتركيز لعبد
عبدالرحمن: واكفين باب اهل الولد المضروب انتظر عمامي اليوم الفصل طبكت السيارات ونزلو واحد وره الثاني واني اسلم عليهم واجت اخر سيارتين واتفاجأ وحده لمهدي والثانيه سياره ابويه
ركزت زين كلت معقوله
طبكت السيارات ونزل ابويه لابس العكال والعبايه بكل هيبه
يتبع ....
باجر بأذن الله بارت انتظروني
تحياتي لًلًـّــ💎ــجٌٓمٍَُٓيِّعَْٓ