#الابواب_الخمس
البارت الثاني عشر
للكاتبه Reem
لسان حال ذكرى اهداء من احدى المتابعات
....
الدهر سيفة لو ركبتي وكرهة
الذيابة عداي وانة بنص وكرهة
ابو الوجهين يكرهني وكرهة
حمامة يصير مرة ومرة حية
بديعه : طلعت ذكرى من البيت وصالحه وساهره كامن يعيطن على جليله الجانت واكفه بكل صلافه ولا دايره بال ونجم طلع وره ذكرى خفت يصير شى لان حجايتها قويه محد ركز بيها بس اني ركزت من كالت كله من وراك وعرفت شنو قصدها ورغم نجم تعبان سحل روحه وراهه طلعت وراه اريد ادخله خفت لحد يحس ويصير شى
فتحت الباب صار صمد بوجهه وهو يصيح ذكرى ذكرى متحمل نجم وجره من هدومه
ودخله للبيت
نجم : تعاال ياحقير هاي تاليهه
صمد : شبيك لك احترم نفسك لا اطيح حضك وخر ايدك ودفع نجم
نجم : عندك مره تسوه راسك وتالي تتزوج عليها
بهت شكل صمد وكاال منو گلك
بديعه : تعال طب مرتك الثانيه جوه
طب يركض وشاف جليله كدامه
جليله : هله بيك عيني واخيراً اجيت
لزم ايدها حيل
صمد : شجابج لج هنا اني شكتلج ذيج المره
ام جليله : وخر ايدك من بنتي فوك سوايتك الناقصه تريد تضربها
جليله : لك اني تقشمر عليه وتكولي فتره واشهر زواجنا واخلي الكل يدري بس تجيبين
اثاري انت ناوي على نيه كشره
صمد : لج يانيه
جليله : تريد اجيب وتاخذ ابني وتنطي لمرتك وتلزمني الباب
صمد : لج وروح ابويه ماكو هيج حجي منين جبتي اني مو كتلج تنجبين وتبقين بيتج وكت متولدين اشهر زواجنا شلج بعد بهاي السالفه منين سمعتي هذا الشى
جليله : شلك دخل منين سمعت اني اجيت اليوم حتى اطلع كذبتك
صمد : غير اعرف هذا الحجي منين لو هذا فلم تردين تمشي عليه لج اني صمد متلوي ايدي
جليله : واني جليله وتعرف شكدر اسوي مو كل طير ينوكل لحمه اني وحده بايعه ومخلصه وماعندي شى اخسره وعندي استعداد اوكف بنص الشارع واخزيكم واعزيكم واخذ حقي منك ومن اهلك
صالحه : والنعم والله مبين ميحتاج تكوليلنا انتي شنو مبينه وحده من الشارع
جليله : باع منو التجي المخلصتها بلسحوره والدفن ولج اني جليله تطعنين بيه
صالحه : اني من شفتج مبلعتج شو تعاالي
جاان تجرها من شعرها حيل ونزعت ساهره النعال ودك على راسها تضرب ويه صالحه
بديعه : ركضنا اني وسهاد وصمد وام جليله وكوه سحبنه جليله منهن كطعنها حتى العبايه شكنها
ام جليله :اليوم اشتكي عليكم اله انومكم بلحبس
ساهره : امشي لج انتي الثانيه اثنين نسوان عايقات وتبيعن شرف براسنا
صمد : كافي صالحه ساهره العب بيها الطوبه التحجي منجن انجلبتن
صالحه : ليش يمه مو تايهين هم الك عين وتحجي غيرك واحد يضم راسه بهذا السكراب
ام جليله : وعلى شنو رجال ومن حقه يتزوج شبيجن مفلفلات منه لو الغيره اكلتجن
ساهره : مو انتي مره جبيره ضربه ضربتين تصبحين بلنجف اخذي بتج واطلعن من البيت تره لهنا وصلت منجن وهاي ام كفشه الصفره السابحه بلكركم تسمعين لج بس نشوف طولج وداعت امي وابني اسحل بيج الدربونه كلها
عاط صمد حيل كاااااافي الاسمعها تحجي اكطعها والقران وانتي لج وجر جليله حيل امشي ويايه
وانت نجم صيح امك خلي تضب نسوان اخوتك
نجم : احسن ماحاير بيهن روح لمرتك الهجت من البيت
جليله : واني هم مرته عيني لتنسه وانتن اله اهجم هذا البيت على راسجن
بديعه : بعدها جليله تريد تهجم عليهن وصمد لازمها سمعنا الباب اندفر حيل وصوت فوزي
صمد : التطلع بيجن اكطعها
خوله : هذا الحجي مشمول انت هم بيه لتطلع لتكطع عيني صمودي
بديعه : طلع صمد وكلنا طلعنا وراه وبس فتح الباب بعده محاجي شى سحبه فوزي لصمد ودك بالبوري على راسه
ويعيط فوزي ميشوف كدامه اعرف بيه من زمان جان امنيته يضرب صمد دوم جانت تكول ذكرى فوزي ميحب صمد ابد
نجم كوه يحاول يفاكك بس هو بنص قوه ومجبسه ايده بلمنطقه من عياطنا وخاصه صوت جليله يصحي حتى الميت خلصتها يبووو الحكونا راح رجلي تريد تسمع الناس مبين تصرفها
ذكرى : طلعت اركض على اخويه خايفه عليه صحيت على نفسي راح يضيع فوزي من ورايه طبكت النجده
فوزي : عوفيني اليوم اموته
ذكرى : حضنته لاخويه وابجي والناس كلها تتفرج دفعني وكاال
فوزي : امشي روحي للبيت
ذكرى : فدوة عوفه بغلاتي عندك عوفه
فوزي : لج امشيييي
الضابط : هاي شصاير مبين انت المعتدي اشر للشرطه الي ويااه
اخذوه
سحبوه من ايده واني اركض وراه واجت امي وابويه يعيطون
ابو فوزي : سيدي وين ماخذه
الضابط : للمركز متشوف شمسوي انت ابوه
ابو فوزي : اي ابوه
الضابط : تعال ورانه حتى نفهم الصار
صعدوه يله
ذكرى : كعدت بلكااع الطم يمه راح اخويه راح كله مني
فوزي : كاااااافي اخذيها يمه ورجعو للبيت
ذكرى : دفعت ايد امي وجلبت بيه
فوزي : لتقللين من قيمتي ارجعي للبيت معززه مكرمه وكافي لطم وبجي
نجم : اسمعي كلام اخوج وارجعي واني راح اخذ صمد للمستشفى فاقد
ذكرى : درت وجهي على نجم لكيته واكف ورايه وعطت عليه عسااه بلموووت واخلص منه ومنكم
اشر نجم على امي وسحبتني واباوع اخويه اخذوه وصمد مدد بلشارع وهاي الاجت فوك راسه وتبجي وتلطم
ام ذكرى : امشي ماما ابوج كام يعيط
رجعت للبيت مكسور گلبي على اخويه ومكسوره روحي على نفسي
دخلت للبيت واجت تركض وداد
وداد : هااا ارتاحيتي هسه ضيعتي اخوج
ام ذكرى : شلج بهذا الحجي هو هذا وكته
وداد : شون هيج بارده اعصابج على ابنج هذا الوحيد عنج غير ام هسه تشك ملابسها على الطلابه الوكع بيها
ام ذكرى : ومنو كلج مرتاحه وفرحانه بس الله يعلم البيه اذا انتي عصبيه وخايفه على رجلك اني محتركه حرك على ابني ولو الدنيا كلها تخاف على فوزي متجون ربع خوفكم مثلي بس هاي هم وحيدتي واتإذت ولهسه اني ماادري ابجي وانقهر على بتي والصار بيها وبختها الاسود وضياع شبابها لو على ابني
لتحجين شى محاسته هي مو بلعياط
وداد : كله منها اجت تلطم وتعيط وخلته مثل المخبل يطلع ارتاحي هسه ضاع اخوج
ذكرى : حرام عليج والله حسي بيه لهاي الدرجه ماكو بگلبج رحمه اني ملعوب بحالي وانتي تزيديها عليه
ام ذكرى : كومي بتي لغرفتج واني اشيل بتج ضاله بلكاع هسه تستبرد وتتمرض وتعال حبيبي يونس اصعد ويه امك
يإشر براسه ميقبل
مهدي بيبي مهدي
مهدي : هاا بيبي
تعال حبيبي اخذ ابن عمتك ولعبه بغرفتك
وانتي صوتج مااسمعه ابو فوزي راح وراه وان شاء الله تنحل
وداد : انيال گلبج اي والله
ام ذكرى : يله بنتي
ذكرى : اخذتني امي وصعدت لغرفتي لهسه بعدها على حطتها تمددت وحطيت بصفي ناي وتبجي من الجوع حتى مااكدر اشيلها وارضعها
بديعه : شالو صمد وحطوه بسياره مال واحد جيرانه ونقلوه للطوارئ واجت عمشه تركض متدري بس تشوف الهوسه بلباب
عمشه : يمه وليدي ولجن شصار
خوله : تعالو طبو جوه مو صرنا فرجه للناس
عمشه : ميلي منه اروحن ويااه يمه وليدي حبيب گلبي يبووووو وليدي مدمه منهي طكااه گلولي
نجم : ضلي هنا وين رايحه وانتن كلجن طبن للبيت
خوله : يله بيت بيت بيت
صالحه : شنو دجاج كدامج
خوله : لا غربان دتطبي هسه وكتها
بديعه : عاط نجم بأمه وبينا حتى انطب وشالو صمد وراحو
سحبت عمتي ودخلتها وجان تشوف جليله
عمشه : ياااا يابه يابويه احترك ابو اصلج شجابج
خوله : جليله اجت وفضحت كلشي وذكرى عافت البيت والضرب ابنج فوزي اخوها
عمشه : خاب وحمس الحمسچ انه موش گتلج لا تجين صمد ماحذرج
جليله : اجيت اخذ حقي منه ابنج كذب عليه ومو كد كلمته
صالحه : اذا تعرفي كذاب ومو كد كلمته المن اتزوجتي لو وكت الراحه تنسن نفسجن
جليله : هم حجت انتي شدخلج منو حارك حمامج
عمشه : بسگم دهر الصابكم وانتي تاخذين امج هاي المدهربه وتولين منا ومااريدن اشوف رگعت وجهج
جليله : اكلها اني زوجته والبطني ابنه
عمشه : اسگتي ولا تلغين لاافوخ گلبي بيج وبأمج انه حيلي راح ويه وليدي عبن مااعرفن مات عااش
خوله : لتخافين عايش ميموت بس كولي اخوها شراح يسوي من يطلع من المركز والله لا يلعب صول چعااب
عمشه : حگه يتهدد ويتوعد عبن اخيته واخيچ سالفته سالفه اااااخ الله وين اشرد بروحي العزيزه
وانتي لبيتج ردي وبسكم من الملاسن
وحك العباس ياجليله لون شفتج هنانه انومج بصف زلمتج مدمايه بدعه افتحيلهن الباب اخافن مايعرفن وينه
جليله : عمه
عمشه : وغمه امشي ولي ولت روحج ماردت
جليله : يله يوم يطلع صمد بلسلامه ونرجع مااعرفها الجن تره لتفرحن
ساهره : باع هاي ام الگمل روحي اسبحي بالاول وبعدين هددي
عمشه : حطت ايدها على راسهه وتروح وتجي
ولجن باصرني البت شردت من حلات روحهه واخيهه طباب شر وهذا صمد مايجوز منهه عبن انضرب وين زلمجن وينهم
صالحه : شمدرينا ياعمه هسه ليش تعيطين علينا قابل احنا الزوجناه لابنج
عمشه : انه اعرفن وليداتي غمان عبن الطلايب يشتروهه بدمهم گللي تلاوه ويااه
خوله : قصدج صمد تلاوه ويه فوزي
عمشه : لا ويه ابيج ولج يمسودنه چا غير فوزي وبيش طگه
خوله : وداعتج يمه هو فتح الباب اجه البوري ترس براسه ملحك يشيل ايده
عمشه :سوده بوجهي وليدي سبح بدمه منيل اجتك هاااي اركد هيه مره ومامكدور عليهه تسويهن اثنين ااااااااخ كون اگضه فوك مصابه اهفه ااااخ يابويه تعاال ليه طلايب وليداتي ماتخلص يابويه المن خلفتني للطلايب والمهاوش لا بخت زين ولا خلفه زينه وغمت كصتهه اهمده حظي
ياجليله عساج بلعمه ولو كامت تردملها طوفه عامود واطيح بلنكره وتنام هاي نومتهه هجمت بيته وهججت مريته
جيبلي اميه (مي) ريگي نشف
بديعه : اباوع على خوله متكتفه ومبتسمه
وكفت بصفها وشاورتها
تعالي اريدج
خوله : هسه
بديعه : اي دخلنا لغرفه عمتي وسديت الباب
خوله : هااا خيرج
بديعه : شوفي اياج تكذبين هاي الهوسه كلها انتي سويتيها اكص ايدي واكمع بنتي اذا مو انتي
خوله : وليش تكمعيها خطيه وهيه طفله اي اني سويتها
بديعه : من عزه العزاج تخبلتي
خوله : على شنو تخبلت كذبت بشى غلطت بشى هذا حقك ولازم بيوم الكل يعرف
بديعه : شستفاديتي هسه هوسه شكبرها اخوج بين الحيه والموت وذكرى انهجم بيتها والله اعلم فوزي شراح يسون اله لهاي الدرجه صايره تحبين المشاكل وخبيثه متخافين الله مجنتي هيج شغيرج
خوله : انتي تحبين ذكرى
بديعه : هاي شجابها على الحجي مالتي
خوله : تحبيها لو لا
بديعه : طبعاً احبها هي اختي الماجابتها امي
خوله : وخنتي اختج
بديعه : اني
خوله : اي انتي من ضميتي هيج شى عليها وانتي تعرفين رجلها متزوج عليها انتي اضرب من صمد كدرتي ترحين تكولين الها تعالي يذكرى تره رجلج متزوج عليج
بديعه : مستحيل اسويهه
خوله : لان جبانه وثوله مثلهه ترديهه تبقى على عماها وصمد يدمغ بيهه
بديعه : غير اخاف عليهه انتي مشفتي شصار بيها
خوله : يصير بيها هيج وتعرف رجلها الي ينام يمها شكد نذل احسن ماتخلص عمرها وشبابها ويه واحد ميسوه اضفرها
اني مااكرهه ذكرى بلعكس يمكن اكثر جنه بيجن احسها حرامات بهذا البيت تعيش اصلاً من زمان اكول ذكرى زايده على صمد لوما الاغم الثاني الضيعها من ايده
بديعه : جفلت من كلامها يعني عادي تحجي كدامي
خوله : لتباوعين هيج اي ادري بنجم واعرف بيج تدرين بيه وبتهديدي الها قبل وذكرى سارتج بهذا السر ميحتاج نلعب ختيلان ونسوي نفسنا كلشي منعرف اني ردت ذكرى تعرف صمد وسوالفه ونجم يشوف بعينه بشنو ضحى والمن
رحت لجليله للبيت وكتلها راح تجيبين وينطي ابنج لذكرى ويشمرج شمره الجلب وعود سويت نفسي احبهه اكثر من ذكرى واريدها تعيش هنا متدري بيه اشمأز منهه وحلفتهه متكول اني اجيتهه وهي معودت طلعت منها واجت هداده منا ادري بيها متسكت وحده تربايه سوك متبلعها لو تنگلب الدنيا
بديعه : وشحصلتي وره هاي الهوسه كلها يخوله شحصلتي
خوله : ارتاحيت ونقذت ذكرى من جحيم هذا البيت وعلى صمد تره واحد فارغ بس هوا وشايف روحه وكتلته اليوم اكبر دليل
وراح تشوفين حقاره حماج ونذالته راح يطلع وجهه الثاني تشوفي ساكت دوم وميدخل بكلشي بس هذا سوس البله والمصايب ويستاهل كلشي صار بيه منو كال يتزوج على مرته خلي ياكلها
بديعه : شحجي بعد وانتي فرحانه بهجمان بيت اخوج
خوله : بله مطيرين كل واحد وجاي وصاح هجمان هو مهجوم يمه مهجوم من كاعه بسحوره ذني الفوك وكلكم راضين بيهن ومبقيهن هنا الكل يعرف سوالفهن وساكت وشفتي حتى جليله تعرف معناها صمد يدري بسحورتهن وساكت خلي كل واحد من اخوتي راح ينجوي بيوم من وره جبنهم وامي تضل طول عمرها تركض وره هذا وذاك
بديعه : اووووف اروح اشوف بتي وين واصعد لغرفه ذكرى اقفلها اخاف ذني يسون شى
خوله : لتخافين هلمره هنه ويه ذكرى مو ضدهه
بديعه : اني هم تعجبت شعجب
خوله : يعرفن اذا اجت جليله تركصهن وهنه ميحبن الاقوى منهن جليله لسان وتعرف دماراتهن وتأذيهن وجيتها بهذا البيت تضيع تعب سنين هنه مطمنات انتي وذكرى فاهيات وطرنات لا تحلن ولا تربطن بلزايد تكعدن تسولفن وتندبن حظجن بس ذيج
تهججهن بليله ظلمه اذا مطلعت مثل صنفهن ماكو مركب بيه قبطانين لازم واحد كثر الملاليح بلسفن تغرك يبدعه
بديعه : اكوم واكعد وادعي على ام اسماعيل لان جابتكم عليه
خوله : هههههه حقج والله وهااا ديري بالج على فلاح
بديعه : الله اليستر وطلعت لكيت عمتي كاعده ودخل عبيد وفلاح وجوحي يركضون مدري منو مبلغهم
عمشه : تعالو ليه اخيكم بلمستشفى كضه فوزي وفتح راسه فتيتو گلبي بطلايبكم لا جبيركم ولا صغيركم مطيب خاطري
جوحي : ضربه على راسه
عمشه : چا شنهي يتعشى ويااه أكله چتله چتله
عبيد : وين نلكاهم بيا مستشفى اخذوه
بديعه : راحو بسياره ابوجبار روحوله بلكت رجع وصلهم ورجع
طلعو كلهم وراحو للمستشفى
ذكرى : ضليت صافنه على ناي وابجي لحد متعب من صوتها بس تبجي سحبتهه وانطيهه صدري ضلت ترضع اباوع على عيونها تلالي الدموع بيها وتباوع عليه عبالك تعرف بأمها وضيمها
غفيت واني ارضعها وكمزت خلت لا اخنكها لكيتها نايمه
عدلت نومتها وحطيتها بصفي وكمت غسلت ورجعت للغرفه
عيوني صافنه على الساعه شلون الميل مالتها يمشي كل دقيقه وكل ثانيه ذوله من عمري شراح يصير بيه وفوزي اخاف يتأذه بسببي وره ساعتين سمعت صوت ابويه نزلت اركض
هااا بابا بشر
ابو فوزي : شبشر وضع اخوج صعب حبسوه وينتظرون صمد اذا عاش ياخذون افاته واذا مات اقري على اخوج السلام
ذكرى : دخيلك ربي لتحجي هيج فدوة
ابو فوزي : هسه اخوج وحياته بيد ابن ام العتيك شفتي هاي تاليهه
ذكرى : اعرف بيك ضايج مني والله مو قصدي احرك فوزي على صمد والله اجيت مو بوعي متعرف شحس وحالي شنو مثل الغركان ويدور على كشايه واجيتكم اركض ومن شفت فوزي جني شفت الكشايه
وداد : وتاليهه ضيعتي نفسج وراح تضيع الكشايه من وراج
ذكرى : ليش احسكم ذابين اللوم عليه قابل اني كلت لفوزي روح على صمد وخلي دمه بطوله هاي انتم عود اهلي وهيج تذبون الصوج بيه المفروض تراعون ضرفي وضعي
ابو فوزي : لا بنتي الصوج من الاول مني اني شون انطيج لهيج ناس مدري شجاني وكلت موافق اني كل مااصفن بروحي اكول وين عقلي من اطيت ذكرى رادوج الاحسن منهم منطيتج تالي اشيلج وبگل گلب بارد وانطيج
ام فوزي : ميفيد اللوم هسه لازم نطلع فوزي ونجيب حقها ذوله ناس مشرشبه غير المصايح والمشاكل منحصل منهم واني خايفه يلزمونا من ايدنا التوجعنا وميطلع فوزي اله ترجع ذكرى
وداد : خلي ترجع قابل رايحه لجهنم يبقى بيت رجلها وابو ولدها انتو خلي بالكم فوزي اذا اشتكو عليه يخلصها بلسجون الله يقبلها بيها احنا عليها
ابو فوزي : غير اخويه ولازم ياخذ حقها لو فوزي مسوي هاي السوايه وياج ومتزوج عليج ومرته تجيج للبيت جان سكتي لو جان مكلتي لاخوتج الدوم تتفاخرين بيهم تكومين وتكعدين اخوتي واخوتي لو صاير بيج مثل ذكرى جان سكتو احجي
وداد : ياعمو غير اخاف على فوزي زوجي ومن حقي اخاف
ابو فوزي : مكلت مو من حقج على الاقل راعي ظرفنا احنا ناس مرضه وهاي مثل اختج اجت مكسوره طيبي خاطرها صبريها
وداد : انتم حايرين بيها وناسين ابنكم
ابو فوزي : روحي بتي لجهالج الحجي وياج مضيعه للوقت
وداد : اذا صار شى على فوزي خطيته برگبتكم وخاصه انتي ذكرى كله من وراج
ذكرى : عافتنا وصعدت للجهال شويه واجه يونس يكول خاله طردتني
اخذته بحضني وابجي عليه وعليه منين اتلكاها ربي
صار الليل سمعنا صوت الجرس طلع ابويه
وطب وياه نجم
اباوع عليه كارهته اكثر ما كارهه روحي كمت اصعد ليفوك جان يصيحني
نجم : اكعدي اريد احجي وياج كدام ابوج
ابو فوزي : اكعد ابني انت هم مريض ومطبت
نجم : الْحٍمَدٍ للـّہ على كل حال عمي اني اجيت علمود الصار صمد صار بيه ارتاج بلدماغ وضعه محرج منطي ٢٤ ساعه يايكوم بلسلامه ياالله اعلم يموت يسكط ضربت فوزي قويه وعلى راسه
ذكرى : يستاهل ويطبه طوب
نجم : هذا مو حل لتنسين اذا صار شى بيه اخوج ياكلها
ابو فوزي : والمطلوب شنو من عدنا
نجم : المطلوب عمي لتسوون شى لحد ميصحى وانتي ذكرى اي احد يجيج من ذاك البيت لتستقبلي منريد قال وقلت يكعد صمد وتعدي على خير وهو يقرر بوضعكم لتنسون طلعت فوزي من الحبس بكلمه من صمد
ابو فوزي : انت هم ابني ادخل وعقل اخوك احنا اهل والصار ردت فعل طبيعيه اخ واحترك گلبه على اخته
نجم : الله كريم خلي يكوم سلامات وراها يصير خير
هااج
ذكرى : شنو هاي
نجم : اخاف تحتاجين للجهال
ذكرى : الشى الوحيد المحتاجته اخلص من اخوك ومنكم ويطلع اخويه ويرجع البيته
نجم : جر نفس بضوجه وحط الفلوس على الميز وكاام صاحه بابا حتى يرجعهن مقبل وطلع
ابو فوزي : بنتي على كيفج وياه هذا الوحيد من حموينج ادمي وينحجي ويااه
ذكرى : ولا واحد ادمي متعرفهم بابا يمكن فلاح شويه زين والله اعلم يجوز يطلع مثل صمد ويصدمنا بعدين
ابو فوزي : العليج بنتي تلمين جهالج وتكعدين وتسكتين منا لحد منشوف لوين نوصل وياهم
ذكرى : يوم بعد يوم وحالي منتهي وابويه وامي بدا على وجوهم القهر وعيونهم كل الوكت بيها دموع ومن يشوفوني يمسحوها وتبقى اثارها واضحه بعيونهم لحظات الوم روحي يمكن لو لازمه نفسي جان على الاقل مااخلي فوزي يضرب صمد واخذ حقي منه غصب عنه وارجع اكول قابل حجاره اني اعرف رجلي متزوج عليه واتعامل طبيعي واحجي بهدوء حتى الماعدها عقل هم متسويها وابويه يارايح ياجاي من المركز عدا الرشاوي الينطيها حتى ميأذون اخويه
وره ٦ ايام اجت بدعه الوحيده الذكرتني
بديعه : اعذريني مجيتج اعرف حالج متكدرين تحجين ويه احد ويمكن شوفتي تأذيج بس والله گلبي نار عليج مكدرت اصبر بعد يوميه اكول اجي وارجع اكول اخاف متتقبل شوفتي صوابها بعده حار
ذكرى : بلعكس همزين اجيتي حيل تعبانه ومقهوره واريد اسولف
بديعه : الله يعينج البيت هناك كايم مكاعد من وره صمد همزين كدر يحجي ورجع لوعيه الكامل
ذكرى : واخيراً كلت راح يموت والله لوما اخويه جان كلت طبه مرض موتت الجلاب
بديعه : تعرفين بيه شكد احبج وجايتج اليوم اكلج الزمي نفسج متعرفين الايام الجايه شمضموم بيها
ذكرى : سمعتي شى
بديعه : لا والله تعرفين كلش زين صمد ميتركج بحالج ولا راح يعبر الفات بسهوله
ذكرى : يركع راسه بأقرب حايط
بديعه : هم ميخالف اني گلبي عليج شيسوي ابقي مسيطره ولتخافين
ذكرى : سامعه شى الله عليج بداعه بان وبداعت غلاتي عندج
بديعه : اوف حلفتيني بلغوالي شوفي ذكرى صمد من صحى ورجع لوعيه كال لاخوته مااطلع فوزي اله ترجع ذكرى للبيت
ذكرى : وكفت على حيلي وعطت لو يموت
بديعه : جريت ايدها وكعدتها يمعوده خلي اكمل
ذكرى : شتكملين اني ارجع لصمد احرك روحي وماارجع
بديعه : اي تحرگيها عادي تهون عليج بس اني متإكده ميهون عليج اخوج مقابل رجوعج طلعت اخوج من السجن
ذكرى : شوكت يطلع صمد من المستشفى
بديعه : باجر كالو يطلع بلبيت احسن واكو شى يمكن وحده من عيوونه طفت من الضربه متأذايه من وره ضربه الراس
ذكرى : حيل بيه
بديعه : ديري بالج ذكرى اي اعناد راح تزيدين الطين بله اتذكري اخوج تحت رحمتهم
ذكرى : تحت رحمه الله ذوله شنو
بديعه : اني اجيت احذرج والله لو اكدر جان بقيت بعد اكثر وهاي جبتها اعرف بيج تحبين الدولمه مالتي الله عليج اگلي شوفي وجهج مگلوب وصايره صفره وجوه عيونج سود
ذكرى : ليش هو اني انام حتى يتفح وجوهي الليله نسيت شون ينامون بيه
بديعه : تفرج وربج ماتضل هيج اروح اني انتبهي على نفسج وبوسيلي الجهال
مشفتهم ومااكدر اتأخر
ذكرى : الله وياج
اجت وداد ليمي
وداد : ارجعي عفيه طلعي فوزي روح شوفي بنته مدتنام من البجي متعلمه تنام بحضن ابوها ومهدي يطب ويطلع يصيح وين ابويه بيتج خرب لتخربين بيت اخوج
ذكرى : شون تردين ارجع بعد كل الصار
وداد : اقلها ارجعي فتره خلي يطلعون فوزي وتنسد الشغله وراها تعالي واطلكي
ذكرى : مااكدر ادخل لذاك البيت شون ارجعله
وداد : لتنسين حتى تشترين حريتج من رجلج راح تنهين حريه اخوج وفوزي مقصر وياج بيوم شنو ذنبه يخلص شبابه بلسجن ويه الحراميه والنشاله وجهالي بلمدرسه يعيروهم بأبوهم يعني هيج انتي انانيه واهم شى نفسج وفوزي مو بعينج
ذكرى : متحسين بيه لان معايشه الي عشته حياتج هنا مدلله وكلشي كدامج ومايوم اذاج فوزي حتى من زعلتي من وحدج لان ردتي بيت وحدج وراها رجعج وعزلج فوك يعني مضايكه الضكته بذاك البيت حتى تقدرين وضعي ولا اتزوج عليج رجلج وحده متسوه حتى النعال التذبيه
وداد : ولا راح اقدر اني اريد رجلي ابو جهالي وانتي هاي مشكلتج محد گلج ارضي بهيج قسمه من البدايه تردين تحطين ايدج بلدهن الحار ومتنجوين
صيري مره كد قرارج واتحملي النتائج ولتذبين فشلج علينا اني ممجبوره اتحمل فشلج ومصايبج وادفعها من صحه رجلي وحياته ومستقبل جهالي كلمن يتحمل سوء اختياره
ذكرى : مشكوره وداد راح احط هذا الشى بالي عفتها ومشيت طول هاي الايام وداد من تفوت من يمي لازم تسم گلبي وتزيد إذيتي ناي بيد امي دوم ويونس ويه مهدي حتى جهالي مالي خلكهم
بنفس اليوم اجه نجم واني مطلعت ولا شفته سمعته يكول لبابا ميتنازل اله ترجع
وفاجأني بابا برده
ابو فوزي : بتي مترجع وبلنسبه لفوزي رجال ويتحمل كلشي والسواه لا عيب ولا عار بلعكس اخو خيته ودافع عنها وينحط على الراس كول لاخوك من بتي التنزل عليها ضره وتنهان رضينا بكلشي بلمستوى القليل وكلنا ماكو فرق الله خالقنا من طينه وحده رضينا بقلة الحال وكلت العيشه صعبه ولازم المره توكف ويه رجلها حتى من حرمنا من شوفتها وكوه تجينا هم گلت رجلها وهو المسؤول عنها ومنكدر نعصيها عليه بس توصل بيه يتزوج عليها ومن سنين لو اختك ترضاها ينجم
نجم : لا والله ماارضاها
ابو فوزي : كول لاخوك مالك مره عدنا وبينا المحاكم
ذكرى : طلع نجم ونزلت ركض وشمرت نفسي بحضن بابا ابجي وهو يبوس براسي
ابو فوزي : كافي بتي لتبجين صار ايام الليل كله اسمع البواجي مالتج لتتوقعين فوزي اغلى منج اثنينكم نفس المعزه بگلبي واخوج هناك وبلشده البيها ويصيح لترجع اله وتكسر هيبتي
ذكرى : وفوزي شون يضل هيج
ابو فوزي : اله الله بنتي ادعيله يفك كربه
وره كم ساعه اجه المحامي وسمعت شون موقف فوزي صعب اذا ميتنازل صمد هنا كمت الوب متحملت واني اتخيل اخويه ينام سنين بلسجن لبست عباتي وطلعت
ام فوزي : بنتي وين رايحه
ذكرى : عينج على الجهال هسه اجي
طلعت امشي سريع ودخلت لذاك البيت فتحت الباب وطبيت من المطبخ كمزن بدعه وساهره من شافني
ساهره : يمه اسم الله فزينا هله خيه اجيتي
بديعه : الجهال بيهم شى شبيج ذكرى
ذكرى : وين صمد
ساهره : يااا هيج مشتاقتله
ذكرى : اسكتي رحمه لابوج
وينه
بديعه : بغرفه عمتي نايم
ذكرى : طبيت وجان بلهول الولد كلهم وصالحه وسهاد كامو من شافوني
دفعت الباب وطبيت
عمشه : دهر صابج خايبه هيج گالوهه وتدخلين هداده
صمد : هااا اجيتي تتوسلين
ذكرى : ولك انت هم رجال والله عيب محسوب على الزلم تريد تلوه ايدي بأخويه مستحيت فوك سوايتك الخايسه بشنو اذيتك
عبيد : على كيفج ام يونس مو هيج الحجي
صمد : عوفوها خلي تحجي بله اريد اشوف شلون مترجع لهذا البيت
ذكرى : لو تموت ماارجع والله لو يعدمون اخويه ماارجع لا عبالك تلوي ايدي وترجعني صير مره وحده رجال وطلكني مره وحده خلصت عمري وياك هنا قهر بقهر غيري وحده من زمان تعوفك وتروح واني متحمله ضيمك وبرودك وخشمك اليابس المادري على شنو شايف نفسك انت تره كلك على بعضك عتاك مو مدير عام
عمشه : وشبيهم العتاكين يبت شكريه
ذكرى : هاااج ذوله العتاكين واشر على صمد شوفي كدامج رجال لا غيره لا اخلاق لا يعرف الله لا ويه مرته زين ولا ويه جهاله يعترف بيهم خلصت سنين واني ضايكه اللوعه منك واكول تهون ومرات اكول الخلل بيه يجوز اني مااعرف اتعامل ويااه تعلمي يذكرى عليه وعلى بروده وسوالفه وخشمه اليابس ثاري مخلصها بحضن وحده تشبهك صدك وان كالو الطيور على اشكالها تقع اني شجابني عليك وشوداني شون خلصت هاي السنين وياك وخلفت منك اثنين فوك المصيبه
صمد : انجبي كاعده وتعيطين لتشوفيني نايم مااكدر اكوملج والقران هسه اكول اربيج واكص لسانج
ذكرى : متربايه اني غصب عنك وعن اكبر شارب واذا تريد تربي عيد تربيه نفسك ومرتك بت ام السمج جان يريد يكوم جرني من ايدي حيييل وسحبني نجم
صمد : عوفها والك شوف لسانها شون طولان
ذكرى : كمت اضرب على صدري ولكم ياناس من ضيمي من قلة حيلتي انت مو متحبني مو اتزوجت عليه روح ولي لمرتك الثانيه وعوفني
صمد : لو تموتين مااعوفج وترجعين ورجلج فوك راسج
لتخليني اجيب ضرتج واكعدها بلغرفه البصفج
ذكرى : يطبك طوب انت ويااها وهااي كدامكم كلكم وانتم اخوته واكبر منه رجعه ماارجع واخويه اله الله لو ينعدم ماارجع
وانتي عمه اذا تخافين الله عقلي ابنج وخلي يجوز مني ويطلكني مره وحده سوه زين بدنياكم انتي عندج بنيه وشفتي شصار بيها ومحد راعه الله بيها بس هلمره راعي الله بيه حتى لتنعاد بنتج
عمشه : يمه ذكرى انعلي الشيطان وتهدي صمد يحبج وشاريج ردي اله وروح ابوي اكضه من ياخته واخذه يطلك بت ام السمج عبن ردي والتردي يجرالج واكعدله رگبه ونص لون لمس شعره منج احركنه بيدي وحك العباس وليداتج يضلون بليه ابوهم ترضيهه
ذكرى : اي ارضاها هو هذا اب كفيلج العباس الحلفتي بيه ياعمه ابنج لو يموتون جهاله متنهز بيه شعره هو بس هيج خباثه يريد يأذيني ويرجعني
صمد : ارجعي واطلك بس ارجعي وبعد مالي علاقه بذيج ولا اوصل يمها واخوج باجر اتنازل واطلعه بعدني شاريج
ذكرى : عمرك ماشريتني دومك بايعني ارحمني الله يرحمك دنيا واخره وطلكني مااريدك اكرهك تعرف شنو اكرهك
صمد : طلعوها اذا حجت بعد اكوم اكسر عظامها ماابقي عظمه صاحيه بيها كلت مقهوره وانطيتج الحق وتجاوزتي وساكتلج
واذا زدتيها ياذكرى متلومين اله نفسج
وهاي عيني الطفت من وره اخوج اطفي عمرج بيها
صالحه : تعالي ذكرى اطلعي
ذكرى : اني اجيت اكلك وكدامهم كلهم لو ينعدم اخويه ماارجع وابويه كال هذا الحجي لنجم انداريت عليه كالك لو لا حتى ابويه طابك ويايه واطلك منك وابقى ساعه على ذمتك
نجم : كافي ذكرى عيطتي وتجاوزتي وكلشي سويتي ومن حقج وماالومج وباجر صمد يطلع اخوج من الحبس ونشوف بعدين سالفه الطلاك
صمد : بااع هذا من كل عقلك اطلعه
نجم : يطلع واخذك بيدي للمركز تتنازل
صمد : لو يحضر ابوك من الگبر مااتنازل واله اخلي اخوها يخيس بلسجون جايه تهدد وتعيط اول تالي ولج طلع عندج لسان واني ماادري
ذكرى : الي يعيش وياك يطلعله گلب جديد بصف گلبه من عيشتك التعبانه
صمد : اسمعي لج مالج دخل بكلام هذا واخوج روحي زوري بلسجون
عبيد : طلع فوزي وبعدين اكعد ويه مرتك وشوف شنو الي يراضيها وطيب خاطرها
جوحي : السويته مو قليل صمد وهو اخوها ولحظه شيطان وصارت طلعه للولد وعود ذكرى تاخذلها جم يوم بيت اهلها ترتاح وبعدين ترجع
صمد : يمه تسمعين ولدج شيكولون
انتم تخبلتو اني اطلعه
عمشه : بسگ يمه صوابك بعده حاار
صمد : يمه لا تخبلوني شون تتفقون عليه
فلاح : محد متفق عليك احنا نشوف الحق وين وعذرنا فوزي وتعرف بيه دمه حار وشاف اخته هيج وانقهر عليها طلعه لخاطر شيبات ابوه ذاك اليوم يمشي بلشارع مدنك على ساعه يندعم من كثر التفكير
خطيه انكسر گلبي عليه
صمد : وروح ابويه مااطلعه لو اعرف اطلع حتى من هذا البيت انتم لتدخلون الشغله تخصني ومالكم دخل بيها
عمشه : يمه اسمع اخوتك ولا تحرمص رويحتك وكف السالفه چا انت سالفتج عوچه يايمه لمها ولا توسعهه ولون تريد مريتك ترد لا تكسر اخيهه
صمد : شنو يمه
عمشه : اكلك شنو انته طاكيك على صرصور اذنك اگلك كفها وباجر اخيك نجم وياك تنازل وابوك الله يرحمه وذكرى عليه فتره وترد
ذكرى : ماارجع عمه والله ماارجع
عمشه : خايبه اسگتي من دهر الصابج جفي الشر ولي لبيتج هوستي وفوختي گلبج ردي لبيت اهلج
بديعه : تعاالي ذكرى اخذتها وطلعتها
ذكرى : اكلج صدرك راح يطلع اخويه
بديعه : الولد كلهم اتفقو يقنعون صمد حتى يطلعه وكدامج الحجي صار ارجعي لبيت ابوج ولتعاندين اخاف تكبر ويلكه حجه عليج وتلوصيها
ذكرى : اي اي راجعه مثل الواحد وضربني على راسي طلعت وامشي بهدوء عكس ما من جيت سمعت صوت نجم اجه يمشي بصفي وكاال
اخوج باجر يمج وبعد لتجين لهنا حتى لا صمد يأذيج هو كوه لازم نفسه عنج خلي فتره ونشوف حالج وسالفه طلاكج
ذكرى : انداريت عليه يعني راح يطلع ونزلت دمعتي
نجم : لتبجين بداعت فوزي عندج اي راح يطلع كلنا جنا نسولف وانتي طبيتي هداده وهمزين مخربت السالفه صار ايام اقنع بخوتي حتى بنسوانهم اقنع اعرف تأثيرهن لحد ما الكل اتفق ضده لتسوين شى بعد زين واكعدي بيت اهلج وان شاء الله خير
ذكرى : الله كريم شكراً
نجم : لتشكريني والسبب كله مني
دار وجهه ورجع واني بقيت اباوع عليه رجعت درت وجهي وكملت طريقي واحجي بداخلي اي نجم انت السبب بكلشي صار كله سببك
رجعت للبيت ومحجيت شى خفت ميطلعه صمد واطلع كذابه كدام اهلي
ثاني يوم اروح واجي مثل المصرع اريد اخويه اريد احضنه واشمه واختل بسده
اندكت الباب وجان بابا ديبدل حتى يروح اله
فتح الباب وعاط
فوووووووزي
نزلنا كلنا نركض لحضنه ممصدكه شفته ٩ ايام غايب تكول عبالك ٩ سنوات
فوزي : شونج هاي شصاير بيج
ذكرى : حضنته حييل وابجي بحضنه كله من ورايه جان رحت بيها
فوزي : لتخافين اخوج سبع جنت خايف بس لا ترجعين اله
ذكرى : شون ارجع لو يموت
فوزي : عفيه بأختي السباعيه
ابويه وامي يبجون ممصدكين طلع وداد حاضنته وحتى جهاله عرفت اني ردت اخسر اخويه عمره وبيته بس والله مو بيدي
وحمدت الله فضت هيج
بقى شى واحد لازم اطلك لازم ماابقى كم يوم وافاتح اهلي يشوفولي محامي ماابقى على ذمته بعد
بعد ايام :
ذكرى : عطت وابجي ومخنوكه والوب واصيح
اريد صمد اريد ارجعله رجعوني اله
يتبع ....
