#الابواب_الخمس
البارت الثامن عشر
للكاتبة Reem
لا تنغش و اذا كلولك شلونك ؟
هاي الكلمة بس من الغربة تنكال!
ما يحجيها واحد مفتهم لونك!!
ذكرى : ماطول ماعندي مكان اروح اله غير
هذا البيت لازم انظفه من مصايب ذني
بديعه : مراح يرحمنج ذكرى
ذكرى : رايحه باجر يعني رايحه
يمعوده ليش تتحارشين بيهن مو تعرفين مصايبهن والله ياذكرى انصحج ابتعدي عنهن كدامج سوالفهن تشيب شعر الراس عدا اكو سوالف انتي مشفتيهه ولا عشتيها اني شفتهه بعيني وكل هزه جنت انهز الها تاخذ روحي من الخوف واسكت الي مثلنا مجبورات يتعاملن بطريقة لا ارى لا اسمع لا اتكلم
ذكرى : اختنكت منهن ومن اعمالهن واذا متجين ويايه اروح وحدي
بديعه : اهوو چلبت بعد اروح وياج امري لله
ذكرى : ثاني يوم بدلت وبحجه اشتري شغلات من السوك اني وبدعه طلعنا من البيت
بديعه : تندلين زين البيت
ذكرى : اكلها جيرانه حايط على حايط جانو
دخلت لمنطقتنا القديمه امشي بشوارعها واتنفس وكل نفس اخذه اتذكر حالي من جنت طالبه وماكو هم براسي غير دراستي والاكل وشراح تطبخ امي اليوم من ارجع للبيت اووف ياريت مشايلين وباقين هنا
بديعه : جان مشفتي العجب بيت عمشه
ذكرى : شوكعني بهاي التهلكه غير هذا البيت
بديعه : وصلنا لو بعد تره رجلي سافت من المشي
ذكرى : ذاك البيت
دكيت الباب طلعت بت الحجيه عرفتني بسرعه وبوستني
تعالي ادخلي زارتنا البركه
ذكرى : البركه بيكم حبيبتي الحجيه موجوده
اي موجوده ادخلي
دخلت للهول جان هادئ وصوت القران بكل ركن من اركانه وريحه البخور الهادئه تدخل الانفاس
لكيتها كاعده على السجاده تسبح
شافتني وابتسمت وهزت راسها
على راحتج خاله
بديعه : لعد شبيهه عمتي حتى صلاه متصلي
ذكرى : اشش صوتج
كملت الصلاه واجت باستني
هلا يمه
ذكرى : شونج خاله
الْحٍمَدٍ للـّہ بنيتي والله فرحت من شفتج شون كيفج
ذكرى : الْحٍمَدٍ للـّہ مااريد أخرج واني هم ما اكدر اتأخر خاله اجيت على الله وعليج
خير بنتي احجي كله على الله التساهيل من رب العالمين
ذكرى : راح احجيلج الاعرفه عن البيت العايشه بيه ومحتاجه تنطيني شى انظف هذا البيت
وبديت احجي كلشي اشوف او اسمعه وحتى عن خوله والصار بيها وعن سوالف ساهره وصالحه
الحجيه : لا اله الا الله اعوذ بالله من الشيطان الرجيم يمه هذا البيت وصخ
بديعه : لا والله يوميه انظفه خاله
الحجيه :يمه مو قصدي نظافه كاع وحياطين وغراض
بديعه : لعد شنو
الحجيه : نظافه الناس البيه هذا البيت نجس وكله اعمال وشعوذه نسوان حموينج صارلهم سنين يرشون ويسگون لحد ما البيت صار طوع امرهن انطيني القران افتحلج بيه
ذكرى : كمت من مكاني وجبت القران الجان على الميز وانطيته الها وكعدت تقرا ونوت وتالي فتحته وبدت تقرا واني وبدعه صافنات لحد ماصدقت وباست القران وباوعت علينا
اسمعن يمه هذا البيت ماتكدرن عليه حايرات شمسويات بيه اعوذ بالله منهن حتى بالاكل والشرب
بديعه : زين ليش هيج يسون
الحجيه : طمع بني ادم يبنتي عبالهن بهاي الشغلات تمشي امورهن ومتوكف نسن الله فوك الكل وبيده تمشي الامور وبيده توكف
ذكرى : والحل
الحجيه : عمتي وحماتج والولد يصلون
بديعه : ولا راكعيلها وداعتج خاله خوله : عمتي حتى القبله متدري بيها وين
الحجيه : لا اله الا الله اسمعيني يذكرى انتي بنيتي وياما ايام جنتي تنامين على ايدي وامج غاليه عندي انصحج عوفيهن
ذكرى : وابقى هيج ياخاله تحت رحمتهن
الحجيه : استغفري ربج بنيتي كلنا تحت رحمته الواحد الاحد اول شى اذا تردين اطلعين سحورتهن وتبطليهن يرادلج واحد روحاني ولازم يفهم بهاي الامور زين والاهم يكون الشخص المريض بلمس والاسحار عنده اراده قويه يطيب
بديعه : شيسوي يعني
الحجيه : يكون مؤمن بالله ايمان تام ومطلق ويؤمن بأن الله قادر على شفائه وملتزم بلصلاه وقرائه القران وميتركهم ابد ولايتردد ويتعاجز ويتهرب بحجه تعبان او مشغول او مو هسه غير وقت يتحجج بالف حجه حتى ميلتزم الشيطان لا يكل ولا يمل يبقى صامد لحد ما أيمان المريض يكسره مثل الحرب ياهو الي يفوز بالاخير هو يحصل الكاع الواكف عليها وادوات الحرب للمريض هو الصلاه والقران والاكثار بالاستغفار والتسبيح وانتي يابنتي العندج بلبيت ماساجدين لله شون بعد تعالجيهم واهم أداة للحرب ماعدهم من الاول الحرب خسرانه والغنيمه مال الحرب انتي
ذكرى : اوووف هيج ياخاله أيستيني مو كلتي بلملح ويقرا عليه يطيب الواحد
الحجيه : اكو فرق بين تمسحين مكان بلملح وهذا المكان البيه ناس تصلي ونظيفه وتعرف الله وبين تمسحي بيت كله خدمه سحر والعياذ بالله بهذا الحال راح تهيجيهم عليج ويأذوج اني من كتلج امسحي لان اعرفج تصلين ماادري البيت العايشه بيه هيج نجس
ذب الملح بهيج بيوت أذيه مو نفع راح يضربوج ويأذوج كرد فعل منهم لان أذيتيهم مثل ما حماتج طردتج من مسحتي غرفتها متحمل البيها الاذيه ولو لاحه عليها يمكن تأذيج اكثر اي مكان لازم بالاول تعرفي نظيف او لا والاهم من المكان اهله العايشين بيه اذا البشر البيه نظيفه وتعرف الله لو مجرد غطا مسلمين بدون اسلام
ذكرى : وشسوي هسه اني
الحجيه : التزمي بصلاتج وحتى انتي بنيتي اسمعي وصيري ويه ذكرى الكلام الجن اثنينجن
التزمن بلصلاه لا تركنها لو شمايصير والقران لاتهجروه والتزمن بسوره البقره والتسبيح وذكر الله بكل وكت كايمه كاعده سبحي حتى لو بيدج مو شرط بلسبحه وبعد كل صلاه العصر شغلن قرآن هو العلاج لكل داء بأذن الله وقبل اذان المغرب طفوه والتزمي التسبيح لحد ما يأذن وابقي على الملح بغرفتج ماطول ارتاحيتي عليه والصدقه يابناتي لاتنسنها ابد
حصنو نفسكم منهن وهنه ماكول غير الله يهديهن
ذكرى : دوختج خاله كلت بلكت الكه شى عندج يساعدني
الحجيه : محد يساعدج غير الله اذا تردين تساعدين حماتج المسكينه خليها تلتزم عسى ولعل الله يلتفت لحالها وبسبب قوه ايمانها اطيب
بديعه : والله ياخاله هند رستم اخليها تلتزم وخوله ماتلتزم الشغله خربانه من الاول
الحجيه : الله يعينجن يايمه لاتنسن حصنن نفسجن وجهالجن
ذكرى : شكراً خاله بستها من راسها وطلعنا
امشي والشمس بدت تنزل وصار العصر اباوع على الطيور بلجو والهوا طيب ربيع
بديعه : لتوكعين عيونج فوك وتمشين
ذكرى : اختنكت حيل تمنيت اخذ شى منها يفيدنا
بديعه : المره كلامها منطقي شون ينضف البيت والبيه ميعرفون الله هاي شبيج ذكرى
ذكرى : تمنيت يمعوده حرام واحد يتمنى
بديعه : مدي رجليج على كد غطاج وحيري بعائلتج وبصمد الي منطيته الادن الطرشه
ذكرى : هذا عقابي بلدنيا قبل الاخره
بديعه : شبيكم دوم وجوهكم مگلوبه
ذكرى : احجيلج وكولي منو الغلطان وسولفت لبدعه وكالت
بديعه : تدرين حاسه رجلج بعده ويه جليله
ذكرى : اذا انتي حاسه اني متأكده شنو الكدامه ثوله وطفله ويقشمرها رجال بالاشهر يطلع من بيته ويكول عند صديقي ماكو مره تمشي عليها هاي السوالف
اني ساكته لان الصوج مني رجعتي اله هاي ثمنها هسه هم اذا عفت البيت منو الي سوايتي الاخير بأهلي ماخلت خط رجعه الهم
بديعه : وعادي تعرفين هو ويه مره ثانيه
ذكرى : اجذب عليج اذا اكول عادي بلعكس محروك گلبي ومقهوره ومرات حتى انام ودمعتي بخدي بس كوليلي شنو البيدي اذا هسه اعيط واتعارك راح يضربني ويشمرني شمره الچلب بهاي الغرفه واضل شماته لنسوان حموينج وهم بكل الاحوال مااكدر اروح لاهلي اكلها امي من اروح يمنا تضل تلوب تخاف على ساعه يدخل ابويه ويشوفني حتى كمت مااروح الها دوم حتى لتتوتر تردين اتعارك واهوس وازعل حتى ابويه بيده يرجعني لصمد خليني هيج ابرك واحسن احير بجهالي وبعيشتهم
بديعه : الله يعينج ويعيني على هذا البيت يله امشي سريع نروح للسوك نشتري كم شغله حتى ليكولون وين رحتن وايدجن فارغه
ذكرى : ذكيه صايره
بديعه : تعلمت من صالحه تروح تغط مدري وين تولي ومن تسأليها تكولج بلسوك وبيدها غراض وره مده تگب العيطه تطلع مسويه مكسوره بهاي طلعتها كلت نسوي نفسها قابل وحد
ذكرى : ههههه اي والله طلعاتها تخوف بت غنيه حتى امها مو راحه استغفر الله من ذنبها حتى نور الله ماكو بوجهه
بديعه : من السحوره عوذه منهن
امشي سريع تأخرنا
ذكرى : كملنا كم شغله ورجعنا للبيت
صالحه : وين صرتن
بديعه : ليش منو احترك
صالحه : يعني طالعات من وكت وجايبات بس ذني
ذكرى : شرايده من عدنا
صالحه : جهالكم گلبو البيت گلب
بديعه : يمج كرباج يم خوله يلعبون
صالحه : وخوله نامت وعافتهم وضلو يهوسون
ذكرى : اجينا ماله داعي بعد الحجي
دنكت شلت ناي وسحبت يونس وصعدت لليفوك
حسيت الدنيا اظلمت بعيني جنت اتمنى الكه حل لذني واخلص من شرهن
بس رجعت للصفر وبديت ابتعد عنهن اكثر من قبل
خوله : ايامي سراب صحراء قاحله وامشي بيها هربت من الكل بلنوم كل مااحاول انسى يرجع گلبي يذكرني بكلشي
بديعه : هااا نايمه
خوله : اهوو اجت الهوسه شتردين
بديعه : اريد اطلعين من الغرفه تغييرين جو ليش هلكد حابسه روحج
خوله : اريد افهم ليش عقلج يمي انت مو عندج بنيه ورجال حيري بيهم
بديعه : الله عليج كومي اسبحي ومشطي وبدلي وروحي لامل اقلها شويه ترتاحين
خوله : بدعه جوزي مني احسنلج
ذكرى : هااي شبيكم
خوله : اخذي مرت حماج وطلعيها لا ابلط الشارع بيها
ذكرى : ليش متكومين اعلمج طبخ اقلها تتونسين
خوله : شوف الثانيه
ذكرى : ماكو وحده بعمرج متعرف تطبخ
خوله : كعدت عدل على الجربايه وشلت
شعري تدرين واني عمري ١١ سنه اطبخ
بديعه : لتجذبين
خوله : اجذب بعينج
ذكرى : والله ياخوله من اتزوجت لليوم مشايفتج واكفه بلمطبخ بس حتى تاكلين
بديعه : واني خيه گبلج متزوجه وهم مشايفتها غير حاطه راسها تاكل
خوله : جنت صغيره واخاف من النار وامي تجي تعبانه هيه واخوته ويادوب تحظر لكمه واكثر المرات خبز وتمر لو تمن بايت وروبه لو تلجع طماطه النا ناكلها وانام لان وراهم طلعه من الصبح امي مقبلت اطلع اشتغل وياهم مو لان بنيه
ذكرى : لعد شنو
خوله : لخاطر نجم وين تخلي مرادت يطلع وياها ويصير عليه شى من صغير وتخاف عليه
ولان دوم يجون متأخرين وتعبانين كامت امي وعلمتني على الجوله شون اطبخ مره احرك ومره الجع شايفه هاي الايد شافت جويات بكد عدد شعر راسجن كمت اخر شى من انجوي ماابجي لان تعلمت وبمرور الايام كمت اروح لام ستار وجانت مره جيرانه شالت الله يذكرها بلخير ام علي علمتني المرك والتمن واشكال الطبخ وصلت عمر ١٦ سنه ارقى طباخه متلحكني
بديعه : والله ولا اصدكج اله اكل من ايدج غيرها ولا تحاولين
خوله : ههههه طبج مرض لتصدكين
ذكرى : حبابه سوي الغدا باجر من ايدج وخلي نشوف شلون طعم الاكل
خوله : راح اسوي مو حتى اثبت الكم اني صادقه راح اسوي لان راح تشوفون تعابير وجهه اخوتي من ياكلون رأسن راح يعرفون اني الطابخه
ولجن اني اشتغلت شغل وصغيره ذوله خمستهم كبرو وبنو اجسامهم وصارو زلم من اكل ايدي هاي الايد جانت تطبخ وتنظف وتشيل وتحط وتغسل جنت الام الثاني وخوش جازو التعب
بديعه : وشعجب بطلتي تطبخين
خوله : انتن موجودات المن متعبه نفسي من اتزوج عبيد سحبت ايدي
بديعه : عاشت ايدج وخليتيهن يسرحن بلبيت بكيفهن
خوله : قابل قصر الريس خلي يسرحن بيه
طيرتن النومه من عيني خلي اسبح واروح لامل
بديعه : اجي وياج
خوله : شكو ليش
بديعه : امها جايبه قماش جديد اريد قطعه منها
خوله : امشي اضحك عليج بلطريق
بدلنا واباوع على خوله واكفه تعدل بروحها
بديعه : حطي شويه حمره شفايفج بيض صايرات
خوله : عرس امي هو لامل
بديعه : ميخالف يرد الدم بوجهج
خوله : صفنت هيج سحبت الكحل كحلت عيني وحطيت حمره شويه بشفايفي ومنها لخدي فركت خدودي هاا شوني
بديعه : تخبلين
طلعنا نمشي وعيون خوله راحت لبيت اكرم
بديعه : اكلج خوله شراح اطبخينا باجر
خوله : هذا البيت جان صار هسه بيتي
بديعه :خلي يولي طالعه نتونس لو نتذكر سوالف تعبانه
وصلنا لامل وكعدنا يمها سوالف وضحك واخذت القطعه مال قماش وبطريق الرجعه دخلنا راس الشارع ونحس واحد يمشي بصفنا دارت وجهه خوله لجهه اليمين وجان تلزم ايدي
شبيج اسم الله درت وجهه لجهه اليمين واشوف اكرم يمشي ويه مشيتنا
امشي بسرعه
جان نسمع اسم خوله خوله
بديعه : خلي يولي لتندارين
خوله : امشي وراجعه مرتاحه غيرت جو واني صافنه بلشارع وعيني على الطريقه حسيت واحد يمشي بصفي من انداريت شفت اكرم جمدت كوه تعيني رجلي ومن سرعنا سمعت اسمي بصوته ااااااه يااكرم حتى اسمي بحلكك يختلف
اوكفي بدعه اشوفه شيريد وكفت وهو وكف گبالي
اكرم : شونج خوله
خوله : واكفه كباله بعد ٤ اشهر من طلعت من بيته اني هسه فحمه محروكه شبعت حرك بس متكسرت ويبين للكل كلشي مابيها بس ميدرون اذا نسمه طختها تتحول رماد
بينت نفسي قويه وحجيت بهدوء ويااه
الْحٍمَدٍ للـّہ
اكرم : شخبارج
خوله : شدشوف
اكرم : ردت اسلم عليج
خوله :الله يسلمك
اكرم : وضعج شونه حالتج والله بالي يمج
خوله : ابتسمت بأستهزاء وكتله
لتخاف تره ممكابله صورك وابجي ولا ليل نهار الطم لان عفتني وتخاف صار بيه شى بسببك
اكرم : ليش هيج تحجين ويايه اني ردت بس اطمن واشوفج لان هاي الفتره كلها اطلع بلمنطقه ولا مره شفتج
خوله : كدامك مثل الورد عايشه حياتي ومتونسه وهاي الفتره مجنت هنا جنت بلبصره يم خالتي اغير جو وحيل تونست
ورجعت ناسيه كلشي والحمدلله
اكرم : يعني بهاي السهوله نسيتيني
خوله : انت بيك شى يعني عقلك صاحي هو منو نسه منو وتزوج
اكرم : غلطه وصارت جانت نفسيتي تعبانه بسبب الصار وضغط اهلي خلاني ماافكر واوافق على الزواج هواي غلطت ذيج الفترات واتسرعت
خوله : والمطلوب شنو مني اروح لمرتك اعلمها شون تعاملك وتريح مزاجك
اكرم : اريد احجي وياج وحدنه ساعه وحده والله مااخرج
خوله : تتذكر من طلعت من بيتك شگتلك
يجي يوم وتعض اصابيعك ندم بس والله متوقعت بهاي السرعه وره شهر ونص من زواجك انتظر سنه سنتين حتى تعضهم زين
اكرم : كتلج تسرعت واهلي مخلو فكر بدماغي هذا يحجي وذاك يحجي وانتي منطيتي مجال بسرعه ردتي نطلك
خوله : بصوت هادئ كتله شحسيت وانت وياها
باوع على بدعه الي دنجت وسوت نفسها متسمع
اكرم : محسيت بأي شى بلياج ميت خوله والله مااحس بطعم كلشي اي شى اسوي اتذكرج حتى الغرفه التزوجت بيها تذكرني بيج
خوله : ومرتك
اكرم : زينه وحبابه بس مااحبها ومااحسها
گلبي بعده معلك بيج خوله متعرفين شكد احبج والصار بينا أذاني مثل الواحد واكع بأختبار يايحترك يايغرك واني قررت احترك واعوفج وتالي ندمت لحد ماضل بيه شبر صاحي بسبب حرگج اريد منج ساعه اسولفلج شصار بيه وشون تأذيت بلياج
خوله : الله شكد ارتاحيت من سمعت كلامك جنت متوقعه تتأذه بعدي بس متوقعت هيج سريع سريع وعيونك متروسه ندم شوف اكرم هلمره وكفتني وسمعتك مره ثانيه اذا شفتني وكفتني هاي الوكفه بلشارع وروح ابويه اشهرك شهيره شون امك شهرتني بلمنطقه اشهرك مثلها استحي على دمك بعدك عريس وادور ساعات ويه خطيبتك القديمه وحجيت وبعدين اخاف تتوقع اسمحلك تكذب بعد عليه وتنفخ روحك واحبج ومتعذب بدونج وسوالف مال مزعطه روح لمرتك وانساني
اكرم : هيج صارت انتي مو خوله الحبيتها
خوله : ذيج مااتت الله يرحمها يوم مشافتك فرحان بعرسك وحركت كلشي يذكرها بيك امشي بابا احترم رجولتك ولتتعدى وتصيحني بلشارع لا اروح لمرتك واكولها الزمي رجلج يتحارش بيه لان ميحسج واخليها تبيتك بلشارع والله عيب عليك هيج تحجي امشي بدعه
بديعه : ذكريني من اوصل للبيت اصفكلج
خوله : عجبتج
بديعه : ياعجبتيني لوما العيبه اله اطكها بهلهوله واجيب بيضه واكسرها براسه واكوله تعيش وتاكل غيرها
خوله : هههههه والله خبله انتي
بديعه : اعرف بيج بعدج تحبي
خوله : محبيت رجال لو حابه رجال كد كلمته جان وفه ويايه او على الاقل انتظرني اعالج نفسي اشوف شنو علتي يوكف بجانبي لحد متعدي كل ظروفنا ويجمعنا بيت واحد جبان خاف على نفسه وطفر بروحه مرات انطي الحق واكول حقه ومرات اكول اذا بأصعب ظرف عافني شسوي بيه بعد
بديعه : خلي يولي تسوين راسه وتعاي شوكت رحتي للبصره ههههه اتخيل شكلج يم غنيه
خوله : تلكيها بشط العرب طايفه لان اكيد كاتلتها ردت بس احرك دمه حتى ليحس انتهيت وراه
بديعه : تخوفين يبت عمشه
خوله : يله ادخلي
دخلنا للبيت وكعدت اسولف كلشي لذكرى وخوله صافنه
ذكرى : سباعيه والله الميريدني مااريده
خوله : اكوم ارتاح
ذكرى : جنت اباوع بعيون خوله الحزن والقهر واعرف بيها تمثل القوه ومن يجي الليل تنهزم من الكل وبس صوت دموعها ترن بأذني
كعدنا ثاني يوم ونسمع طكطكه بلمطبخ مديت راسي والكه خوله تطبخ
ذكرى : اكيد بعدني بحلم مكاعده
خوله : من هسه التحجي بيجن العب بيها طوبه اليوم سويت تمن وباميه
ذكرى : شمعنه
خوله : اخوتي يحبوها وخاصه اذا سويت صينيه تشريب وياها
ذكرى : خلي نشوف يعرفون طبخج لو لا
خولة : سهاد ماكو
ذكرى : بيت اهلها صار جم يوم
خوله : وساهره هم ماكو
ذكرى : تدرين حملها صعب وبس تون من جسمها
خوله : عياره حتى لتشتغل وانتي صايره مطي البيت كل الشغل عليج
ذكرى : يمعوده قابل الشغل راح يگصر العمر خليني التهي بيه
خوله : ضلي هيج مستغلينج لحد مايوم توكعين من التعب ومحد يداريج
ذكرى : بدعه موجوده اداري وانتي هم
خوله : مااداري احد تره من هسه
ذكرى : هههههه اداريني وغصب عنج
بديعه : لا لا اليوم عيد البرنسيسه خوله بلمطبخ
خوله : اسمعن لجن حجايه ثاني اخلي واطلع وضلن انتن كملن الاكل
ذكرى : اسكتي بدعه يمعوده
ضلينا اليوم كله بلمطبخ سوالف وضحك وذنيج ولا نزلن لحد مرجعو من الشغل والكل طب يصيح جوعان فرشنا الجرايد بلكاع وصبينا الاكل اليوم حتى صمد رجع وياهم
عمشه : يايمه رجولي تجسرت وريچي تمرمر من الطريچ وينجن شوي اميه (مي)
ذكرى : هااج عمه الله يساعدج
عمشه : چا انه اضلن هيج مامش واحد منگم يشيل عني عبن تعبت وكبرت والحيل موش الاولي
عبيد: يمه بعدج صغيرج كلج ٤٥ سنه قابل طبيتي بلسبعين انتي العتاكه يسمعون كلامج وخوش غراض يجيبولج انه وجوحي مندبرها وحدنا
عمشه : عبن غمان مابيكم حظ سنين اعلم بيكم وامسح يدي بلحايط انه صوجي انطيكم ثلث نعاج كل واحد بيكم وتسرحون بيهم ابرك ولا هذا التعب والشگه وكلشي مامحصله مهتلفين مايصيرلكم جاره
ذكرى : صبينا وكلنا كاعدين ناكل وكال عبيد
عبيد: منو طبخ اليوم
جوحي : جنه اكل خوله هذا وباوع على خوله وهي مستمره تاكل ولا رفعت راسها
ذكرى : اني وبدعه وحده تباوع بوجهه الثاني ونضحك
عمشه : انه اعرفن طبخ خوله عبن معدله موش مثلجن
صالحه : ليش عمه شبيه اكلي اسنين تاكلين من ايدي
عمشه : يا متشوفين الخير طار وتبدا وبطونه نشفت من مواجيلچ
صالحه : خلي تطبخ خوله اذا هيج عجبكم طبخها
فلاح : سنين ناكل من ايدها طبخها حتى اطيب من طبخ امي
ذكرى : تلحك النفسيه اذا النفسيه طيبه الاكل طيب
عمشه : چا شبيهه نفسيتي يبت شكريه
ذكرى : هههه لا عمه العفو مو قصدي اقصد
عمشه : بسچ لا اديرن التشريبه فوك راسج
نجم : عاشت ايدج خوله الاكل طيب
خوله : ومنو كال اني طبخت
نجم : اكو واحد ينسه طعم الاكل الجان ياكله من سنين من اخته الوحيده
خوله : اذا انتم نسيتو الدم البينا متنسون الاكل يله اكلو بلعافيه وكمت وعفتهم
عمشه : اگلو يمه وعيفوها براحتها هني ومري بطنكم وموش هني بطن غيركم
ذكرى : كملنا الغدا وكلنا كاعدين نشرب جاي لكيت عمشه تحط دهن لايدها لان مشككه اجيت لزمتها وحطيت الها
عمشه : الله يرضى عليج
ذكرى : عمه انتي ليش متصلين الكل التفت عليه
عمشه : چا شنهي وانت شدخلج
ذكرى : علمودج والله انتي عمرج ٤٥ سنه وما مصليه ولا مره شوكت تصلين
عمشه : مااعرفن الصلاه
ذكرى : اني اعلمج العمر يركض وهذا كله محسوب منج
صالحه : وانتي شعليج بصلاتها خليها لتصلي
ذكرى : اني احجي ويه عمه مو وياج
ساهره : صوتج لتعلي لتنسين هي اكبر منج
صمد : واختج الي ادخلت ذكرى تحجي ويه امي انتن شكوو
ذكرى : استغربت دفاعه عني ورجعت باوعت على عمه
هاا عمه شگلتي
عمشه : چا شمالج يذكرى انه اگرب للصلاه وانه مااعرفها
جوحي : امي مره اميه متتحاسب اذا متصلي
ذكرى : ماكو هيج حجي تتحاسب ماكو واحد ميتحاسب واذا هيه اميه متعرف احنا كلنا نشيل ذنبها لان كلنا نقرا ونكتب وجان لازم واحد من عدنا يعلمها وخاصه نجم وخوله لان خريجين ماكو اسهل منها يلزمون عمتي يعلموها كم سوره وتصلي انتي محافظه شى
عمشه : انه حافظه الحمدو ابوي علمهه الي عبن اقراهه ثواب لامي وانه بت التسع سنين واكلت صوندتين لون حفظتهه
ذكرى : يعني سوره الفاتحه وبعد ياسوره
عمشه : قل هو الله احد وهاي اخربط بيهه
ذكرى : سهله عمه اني اعلمج
ساهره : شنو مره جبيره تكعدين انتي بزرتها تعلمها والله عيب
صالحه : تالي وكت عمتي ام السوك الكل يحلف براسها بشطارتها تتعلم من مرت ابنها
عمشه : بسچن عكارك المي الخايس دوشتنا ماتعلم ومااريدن اصلي وبسچ يذكرى ميلي مني
ذكرى : كامت عمتي واني وراهه دخلت للغرفه
عمشه : ياا دهر صابج لاترطنين وتوجعين راسي انه مره حيلها مهدود ومالي خلك لثوبي
ذكرى : عمه والله من تصلين ترتاحين وشكو ضيق بگلبج يروح انتي مو دوم تكولين اريد اوكف ذني من سحورتهن وسوالفهن مالج غير الصلاه وعوفج منهن متي شلون
شتكولين لله
عمشه : چا وحمس ولطم على حلكج تفاولين علي ميلي مني لا امدج واچسر عظامج
ذكرى : ماكو واحد ميموت حتى لو عشتي ١٠٠ سنه لازم يجي يوم ونموت والله عمه ترتاحين بس تصلين
عمشه : ميلي يبت شكريه مااريدن جفيني من لسانچ لا تشلعين گلبي انه افادي يوچعني اريدن ارتاح
ذكرى : والله اذا مااخليج تصلين
عفتها وطلعت
كمت كل كم يوم احجي وياها وافتر وراها مره تغلط عليه ومره تضربني ومره تسكت وتصفن احسها تريد تتعلم بس مدري شنو مانعها
مرت اياام بيت عمشه وشهر بعد شهر الكل يركض على عيشته صمد صار هو والماكو سوه تعلمت على غيابه وحتى جهالي كامو يستغربون اذا اجه
وبيوم وليله صاحت اصوات عاليه تحشيدات كعدنا الصبح جنا متوقعين يوم عادي بس طلع ابد مو يوم عادي جان دخول العراق للكويت
الكل استغرب وبدت مخاوفنا لا حرب جديده ندخل بيها مثل حرب ايران ٨ سنوات ترست الكاااع شهداء
جمعت عمشه ولدها وكالت الهم اكو غراض كعد تجي من الكويت وبيهم سكراب مااريد تشترون استغربت منها رغم هي لا تصلي ولا تصوم ولا يم الدين اصلاً بس طلبت منهم مياخذون ولا يشترون ويبيعون من هاي الغراض كالت
عمشه : يمه گلها دم وحرام واحنا عايشين بلقدره مااريدن تاكلون حرام عبن هاي نار تاكل الحلال كله
بديعه : اثناء هاي الفتره الرزق شح والاكل قل والوضع كلش تعبان مرت ايام علينا حسره علينا اللكمه نتقاسمها وجان همنا الجهال تاكل عمتي والولد يطلعون ويرجعون لان ماكو بياعه شرايه والناس كلها خايفه
كمنا نخزن طحين وتمن اخاف يصير شى
ذكرى : جان گلبي على اهلي امي وابويه قفلو البيت وراحو لديالى وره فوزي وبقيت وحدي رغم جنت قليل اروح الهم بس احسهم قريبين يمي هسه ماكو وحدي صار تجنيد الزامي بسبب الحرب وانطلبو حمويني كلهم حتى نجم بقت بس النسوان بلبيت وعمشه دايخه متعرف شسوي
ودخلنا السنه الجديده ١٩٩١ شهر الواحد نايمين بغرفنا والجو بارد كل واحد منا متغطي ودفيان واني حاضنه جهالي محسينا غير البيت انرج رج كمنا نركض من الخوف والعياط مسمع البيت كله نزلت اركض وناي ويونس يبجون
خوله : هااي شكوو
صالحه : ولجن اسمعن صوت الانذار
واجت ضربه ثانيه كعدنا كلنا بلكااع
عمشه : ولجن جيبن عيالجن وتعالن جوه الدرج
بديعه : اخاف يوكع البيت علينا عمه
عمشه : چا شنسوي وين نولي اسمعن الهبد بگل مجان يله ولجن لا الجام يطافر عليجن
ذكرى : ركضنا كلنا جوه الدرج وحاضنين الجهال
ساهره : ااااخ بطني ولكم راح اجيب
عمشه : دهر الدهرج چا وكته يمدوهنه
ساهره : هووووو بيدي اااااااخ لحكوني
صالحه : عمه عفيه لتروح يصير بيها شى
ذكرى : منو من المنطقه تجيب
عمشه : ام رضاوي تجيب
بديعه : نروح الها
عمشه :بهذا الليل وهاي الصواريخ تردم بينا تسودنتن
صالحه : غير اتجيب كدامج مي الراس طك اني اروح اصيحها واجي
عمشه : اچي وياج چا ايعفچ هيج يله امشينا طلعن يركضن
ذكرى : خوله حطي الجهال بحضنج وانتي سهاد اركضي حمي مي حاار
سهاد : اخاف اطلع
بديعه : ولج لعد احنه مخايفين هم مثلج بس لازم نتساعد
سهاد : مااشي كايمه
خوله : جيبيهم للجهال سحبتهم كلهم وحطيتهم يمي واني خايفه عليهم وعلينا جان القصف كلش قوي وخاصه معسكر الرشيد قريب علينا
ذكرى : كومي ساهره بذيج الغرفه
ساهره : مااااكدرررر
ذكرى : كولي ياالله وكومي تعالي بدعه نكومها حركناها كوه وحطيتها بغرفه عمتي
جيبي الجاكوج وبسامير والبطانيه العسكريه القديمه
بديعه : شراح تسوين بيها
ذكرى : ادك الشبك اسده من الطول للطول حتى اذا ضربه قويه الكزاز ميطاير علينا
بديعه : اي هسه وركضت واندك اني وذكرى وساهره تعيط والجهال تبجي وانضربنا ضربه لخ كمنا نتشاهد لدرجه جنت اكول مراح نصبح
عمشه : ميلن تعالي ام رضاوي
ذكرى : بقينا نركض ونتساعد جانت طلوكه ساهره صعبه حيل لان ماكله شهرها
عمشه : يمه ذكرى
ذكرى : هااا عمه
عمشه : يمه اذا صبحنا علميني الصلاه
ذكرى : هسه يله عمه
عمشه : چا شنهي الها وكت انه اريدن الحين عبن الموت يترافف فوك روسنا
ذكرى : مو كتلج اخاف نموت
عمشه : من خفت للحلك هذا اركدي مااريدن تعلميني ولي
ذكرى : لا لا لتزعلين اعلمج والله بس خلي تجيب ويصير خير
