#بقايا_رماد
#جميلة_جاسم
مهما شكرتك ما اتسد شكيرة..
ومهما عطيتك ما انخلص ديني
يا شايلة امواجع معاي كثيرة
وعند الشدايد دعوتك تحميني
فيك حن ماعمري ألقيت نطيرة
وفيك ود عايش في جذور كنيني
انتي السعادة وفرحتي الكبيرة
وانتي غلاء منقوش فوق جبيني
يالي بلاك العمر هم وحيرة
ويالي بلاك الوقت مايعنيني
جليلة....راقدة علي المندار انحس في ايد علي وجهي وعلي شعري ....
وتنزل الي كتفي واني متقرطسة علي بعضي....
شميت عطره وحركته سالم خوي ....فتحت عيوني لقيته مقعمز جنبي ويشبحلي...
نضت قعمزت وقعدت نشبحله ...بعيون دابلات منعرفش نعبر ولا نقول شي هو يشبحلي ويضحك
سالم....معقوله لدرجه هذي تكرهيها ابله سعاد ولا تحبيني اني اكثر
جليلة .. اني نحبك انته .....ولا مش نكرها اعلاش انتو مش فاهميني اني نعرفها تلات سنين معاها ونشبح فيها صااعبة وتصرفاتها وااعرة وخبيثة...واني انحبك انته وهيا منحبهاش
كيف بتتزوجها وتجي تقعد عندنا في حوش واحد
اني في المدرسة نبي نروح ونفتك منها تروح.معاااي هلباااا هكي ونلقاها في وجهي
سالم....ههههههه بيصيرلك زي الغوله الي حولت مع امالي الحوش قتلهم سعدودنا بنحولو وركبت معاهم ومشت وهما هاربين منها وله
جليلة...ابتسمت وتخيلت روحي زيهم ...اي نفس الشي
سالم ..اي اضحكي خلييك هكي....بنقولك شي بنتي انتي قبل لا تكون سعاد مرتي خلييك واتقة انه لو نتزوج اربع نفس غلاوتك في قلبي مش حنحط نهائي ...وهيا بس تجي تقعد اهنايا
طيبلكم انتي وبوي واني.
تغسلك حوايجك لانك فوضوية ...وتجيبلك عيل ولا اتنين تلعبي معاهم بما انك مش مفكرة تكبري...
بااهي ونصيحة من خوك سالم الي مربيك خليها للموت وللحيي ...
اني مش داايملك ولا قااعدلك خليك قوية بروحك بداتك معتمدة علي نفسك وقوتك الداخلية لانه مش ديما ساالم بيقعدلك ولا ديما سالم بيدافع عليك ...
اني توة في الطريق ربيعه نازلة فيا تقولي فسدتها
ودلعتها واني مش راضي فيك حتي دقة الشوكة....لذلك نبيش نفسدك
اكيد بتكبري وتتزوجي وتمشي وتسيبيني ....صح وله اهو ربيعه كبرت تحت ايدي وعلي عيوني وشافت شي انتي ماشفتيشي وتزوجت ونست الي فات ...صح كلامي وله
جليلة...صح
سالم ... فهمتي كلامي كله مش لازم نعاود ولا هكي توزعي في خوك..
جليلة ..فهمت لاكن بتتزوج سعاد...
سالم....ايسخر الله الحال ..ان شالله ادعيلي نرتاح خوك متعوب ونبي من ايهني اعليا خلاص اني مش صغير كبيير ونبي نعيشلي يومين اقنينات زيك ...
جليلة....ربي يطمن بالك...
طلع سالم واني قعدت في دوامه تأنيب ضمير فسدت عليه فرحته اكيد اني مزودة القصة نتخيل لو كان تزوج وحدة تانية كان ممكن وقتها فرحت ماخربتش اعليهم فرحتهم ...
اني من لما صغيرة كان عندي احساس قوي لما بيصير شي نحس او نحلم. ولا نشبح شي ايدل علي حاجه نفسها...
من اول ما سمعت بسعاد بتولي مرت خوي خفت وانطبقت عليا الدنيا.. وقلبي ضااق
ومن هاليوم انطفى جزء من حيويتي حسيت روحي كبرت وتمنيت ما كبرتش....
تمنيت نقعد هذيك البنت الصغيرة الي تحب اختها وخوها وتشبح في العركة قدامها ومتتأتر..لا توة بديت اي حاجه تأتر فيا.
لازمني التفكيير نقول نقدر نتحمل بروحي ولا منقدرش.
ومشت حياتي هكي نضم ونضف وخلاص ونتعلم كل يوم حاجه ..مرات نمشي لحوش حناي فاطمه ومرات نقعمز في الحوش.
جارنا فتحي كل ما نطلع نلوح لكناسة ولا حاجه ايلوحلي كلمه مرات نمشي نجيب خبزة من الكوشة جنبنا يوقفلي في الطريق ..ونقعد خاايفه اتصير معاي حاجه....كل يوم ومنقدرش نحكي لسالم....تمنيت ربيعه قعدت معاي كبرت مش متحملة المسؤولية وحصلت في روحي.
نهاية 2009 شهر عشرة بالتحديد ...مشيت اول يوم للمدرسة وصلني ساالم وخش معاي لقيت ابلة سعاد واقفه في الفم.
سلمت عليه وقف ساالم بما انه خطيبته قعدو يهدرزو ويضحكو واني قلبي يغلي....
كبرت علي حب سالم ليا اني بس
وحتاخده مني هذي ياريته تزوج وحدة تانية ياريتني ما قلت لسالم امشي معاي.
شعور ندم مسيطر عليا .وتأنيب ضمير منقدرش نقول سالم عادي يتزوجها ننحرق نموت الف مرة مع اني صف تامن لاكن قعدة حياتي وكأني بنت 7 سنوات
حاطها سالم علي كتفه وماشي بيها...البنت الي تستنى في سالم يطلع باش تلعب علي التليفون الارضي. .
البنت الي كانت تاكل وتمصخ وربيعه وراها وتعارك فيها...
توة ربيعه لقت حياتها وتزوجت وسااام....وحامل وتستنى في ولدها ولا بنتها ...وحتنساني اني..
يوم كاامل واني نفكر لا عرفت اي فصل اني ولا عرفت ناخد كتبي ولا شي من غير يوم فات زي اي يوم يفوت. .
روحت علي رجليا لحوش حناي....زمان لما صغيرة تقول ربيعه ...اني لما نضايق نمشي لحناي فاطمه تهون عليا...
خطرت عليا ومشيت. .طريق طويلة وقعدت ماشية والجو سخوون هلبا ...مع انه خريف وبداية السنة.
وصلت بعد.جهد وقعدت انطق عليها وسمعت مشيتها ...
فتحتلي ومشيت حضنتها...وقعدت نبكي من شنو منعرفش ...من الوحدة من الفترة الي نمر بيها...
حناي فاطمه.....خيييرك بنيتي جليلة شنو صاايرلك ياروحي اعليك يانويرتي شنو فيك بنيتي
جليلة...مافي شي حناي استاحشتك ..ونبي نقعد عندك اليوم
حناي فاطمه...كنتي في المدرسة بنيتي.
جليلة...كيف روحت منها
حناي فاطمه....تعالي بنتي تعاالي. ..
جليلة...خشيت معاها وكأني نبي نهرب منوالحوش..قعدت تمشي بطيئة صحتها تعبانه وانا كبرت وماحسيتش حنها نبيها تعيش معااي اكثر من ربيعه ...شعور الفقدان صعب جدا....
قعمزت وهيا قعمزت جابتلي صفرة فيها شاهي وحليب وطرفة بريوش...
خديتها وشربت الطاسة وقعدت مقعمزة. ..اني شن نبي من حناي علاش جاية ..ماقلتش لسالم ولا بوي...
قالت حناي
بنيتي جليلة بوك وسالم عندهم علم انتي اهني...
جليلة...لاله اني جيت لاني استاحشتك
حناي فاطمه....مرحبتين بييك بنيتي هذا حوشك وحوش حناك امتى تبي تعاالي واني بنيتي ان شالله متستحقي شي ...
جليلة...حناي نحس في روحي معنديش حظ
حناي...علاش تقولي هكي
جليلة....اني كبرت متأخر وربيعه تزوجت وخلتني وسالم بيتزوج وبوي من قبل باعد علينا...
وانتي تعبتي وكبرتي...خايفة حنااي من السنين تمشي واني بروحي...
حناي فاطمه لما قلت هكي انخلعت وحضنتني واني قعدت نبكي من غير سبب ...
منعرفش كيف طلع مني وقتها حسيت روحي كبرت حسيت انه جليلة مش نفسها الصغيرة الي تلعب وتضحك....
نحيت الشنطه وسلبت البدلة ورقدت في حجرها ...وهيا تبكي...
قتلها
حناي علاش تبكي ردت عليا
يااريتني بصحتي زي قبل ونخلييك معااي طول العمر وماتستحقي شي بنيتي...زي ما ربيت ربيعه انربييك ونكبرك...
جليلة...توة منبي شي نبي خرافة زي ربيعه زماان وسالم...احكيلي علي اي شي
حناي فاطمه....حاضر بنيتي نحكيلك لاكن قبل كل شي ردي بالك تقولي معنديش حظ ولا سعد فيه الي عندها السعد ومش عايشة صيورها الدنيا تسااوى وتكبري وتعيشي وفيه اليىسعدها وحضها دايراته بيدها يابنيتي
اهو وتو نحكيلك وتفهمي
ياحجاتكم ويا مجاايكم من خير واخبار وربيع ونوار ...
ياحنه فييه مراء صااحبة السعد القوي ....وعايشة في حوش مدينه وزمان يابنيتي حياش المدينه كانوا كبار وواسعات ويسكنوا في الحوش الواحد عيلات من كل ليبيا مافيه لا ايقولك هذا حوشي وهذا حوش عدوي ! ...
وكانت النساويت تجمع بعدما يطلعو الرجاله والتريس في وسط حوش واحد من الجيران. واكبر حوش في المدينه
ويجيبو هذوك النسيوينات العاله ويتجمعو عليها ...ويبدو يهدرزو ويشكو من رجالاتهم ومن الي عايشين فيه ...وحدة تقول شكل وحدة تقول لون...ويبكو علي هم بعضهم الا جاره واحده كانوا مسمينها "مولاة السعد القوي ؟
وما ينادوا عليها الا بهذا الاسم لانه راجلها واولادها جااين في شورها وطوعها وماعمرهمش سمعوا راجلها يكشخ عليها والا مداير مشكله لكن كانت كل ما ينادوا عليها ياصاحبة السعد القوي ترد وتقول نصه من عندي
وجي يوم من الايام سألوها قالولها: يافلانه كل مانقولولك يامولاة السعد القوي تقولي نصه من عندي شن معناها؟.
ردت وقالت لهم توا تعرفوا شن معناها. راقبوني وشوفوا الفرق لما يخش اليوم وتاليه غدوه....
خش الولد️ رحبت به علي سلامتك حطت اعشيه واللي يبيه داراته وأكثر.
واخدي مكانه ورقد غطاته ...علي خشة الراجل .. لما خش علي سلامتك ياااحاج مرحبتين خدت الزبون والمعرقه والطاقيه والكاط ونحت الكندره وجابت الميه السخونه والملح.وفركت الرجلين وبعدها حطت اعشيه أتعشي. واتمنت الصحتين والعافيه علي قليبه. وبعدها ركب السده ورقد ...
وجاراتها اللي في الحوش يشبحوا فيها لين غسلت ايديها وبدلت احويجتها ورقدت.
قول ...اهو جي الصبح ناض الولد والراجل لصلاة الفجر. دارت روحها راقده مافي حد يَصْب عليهم اميه لامدت الفوطه لا سقدت لفم باب الحوش بمربوحه والا وين ماتشور تنور. المهم اللي متعودة ادير فيه ما دارتاش....
صب الولد علي بوه الميه باش يتوضا في الاول ...وبعتالي البو صب علي ولده وهم يهمهموا مش عاجبهم الحال.
روحوا من الخدمه قيس الواحد الظهر.... لقوا لغدي مش واتي زي العاده... شن فيه خيرك؟ قالتلهم نضت متأخراليوم مالحقتش.... راجوا الغدي لين يطيب!..بدي هاداكا الراجل ينقرز ...والولد يتململ مايبيش ينكد علي امه لكن مش عاجبه الحال... واليوم عاد مافيش اميه سخونه لتدليك الرجلين متاع القايله زي كل يوم!.
اهو قيلوا او ناضوا لقوا شياطينها راكبين .. مقعمزه ادق في الحنك مع جاراتها وسط الحوش...
تحشموا يكلموها... ناداها الراجل مره واحده مردتش.... تحشم قدام الناس يعيط عليها...مافيهاش! خدي روحه وطلع.
اهو جي الليل امروحين والوضع زي ماهو لا لقوا ميه سخونه وملح. ...لا منادير واتيات.... العشي شرموله حذفتها المرا وخشت رقدت قبلهم....
ويسمعوا الجيران في هداكا الليل أعياطات الولد وبوه. وكانوا يحسابوا الولد يتعارك مع بوه. جوهم الجيران باش يعاركوا الولد ويهدوا الأب لقوا اتنين يعيطوا علي الام ....
النساوين فتحوا افامهم مستغربين عياطتهم. رجاله خدوا الأب والولد وطلعوهم معاهم. وقالتلهم ريتوا لما انقول : نصه من عندي؟...
أهو تأخرت يوم ما لهيتش بيهم.... ومانفدتش طلباتهم شفتوا شن صار.. شوفوا اعياطتهم. وبالذمه درت اللي تديروا فيه.
يا غدي مش واتي يا دار مش مضمومه. هذا علاش يتعايطوا يروحوا تعبانين من الخدمه وما يلقوش راحتهم.
وكانوا رجالة الزمان يابنيتي الباهي فيهم عنده دكان واقف من الصبح الي اليل. وأكثرهم خدمهم يدويه وتبي الجهد يا نجار ياحداد يابناي.
كله تعب. شوفوا يوم وخرت عليهم وماخدمتهمش. كيف يتصيحوا ويتعايطوا.
نصه من عندي والا مش من عندي. السعد والهناء اللي انا فيه كله من عندي.
لما سمع رجلها القصه تحشم وعرف قيمة مرته. والفرق بينها وبين النساوين التانين وعرف علاش ديمه العراك اللي في أديارهم. وولدها باس فوق رأسها. والجارات فهموا علاش. راجلها وولدها ديمه يشكروا فيها ويبوسوا علي راسها في الطلعه والخشه. لانها مهنيتهم ومريحتهم فوق الراحه.
الناس الاولي يابنيتي ياجليلة قالت ، شوية من الحنة وشوية من رطابة الايدين ...
وانتي تعرفي كيف تتصرفي وتعرفي تجيبي الحظ لروحك عمرك ماتقولي اني ماعنديش حظ يا حنينة عمرك ماتقولي اني السعد ماعنديش ...انتي بيدك يابنتي تركبي سعدك وتنزليه ..
زمان امك قلتهولها لكلام وقلته ربيعه وتوة ليييك انتي ...النصيحه بتاخديها من الكبير وتسمعي الشور منه ..
توة انتي صغيرة سالم وخييك يبي يتزوج ماتوقفيش في طريقة....
راهو حنيين سالم ويعزك ومربيك خلييه ايحس بفرحته وانتي سيورك تكبري وتلقي من ايقيمك من علي الوطاء....باااهي
جليلة....حسيت كلامها ريحني شعوري غرريب وقتها كنت متحطمة وحناي فاطمه زرعت فيا الامل من جديد...
قعدت عندها الي الساعه خمسة وطلعت مع خالي محمد وصلني.....
خشيت للحوش وبدى سالم يعارك ...
سالم...كيف تروحي جليلة بروحك ااه لو مش خالي محمد كلم قلت منعرفش وين مشت
جليلة...اسفة معش نعاودها كنت نبي نرتااح وجيت
سالم....ربيعه بعد شوية بتجي ارتاحي ...
جليلة...خشيت غيرت حوايجي...وشديت دور ربيعه ...نضفت الحوش ....وبخرته....وخشيت للكوجينة...ونقنع في روحي اني كبيرة خلاص ونفهم ولازم نكبر....
ونطيب ونضم هذي حياتنا لانه معندناش ام ندلعو عليها...ربينا بعضنا وخلاص ...
بعد ماجت ربيعه ..قعمزنا وردينا ايام زمان...ربيعه حاامل وانا فرحانه امتي تجييب نحب الصغاار نحب انربيهم...نفس ما ربوني وكانت امنيتي نكبر ونولي ام....
كل يوم نكبر كل يوم نعلم في روحي...ربيعه نكلم فيها بتليفون سالم ونهدرز عليها ...
وهيا مرة تنصحني ومرة تقوولي هذيكه غلط ومفروض قلتي ومفروض لااا...
في يوم نتفكر مقعمزة نقرى وجو شتى صقع بداية شهر 12 طق الباب ....
بوي وسالم عندهم فلوس ويحسبو ...وسالم حاجز في دار نوم بيحطها في دار ربيعه واني قعمزت في دار بوي وبوي في الدار الضيوف....
طلعت...علي صوت الباب...وناس تسلم ويتكلمو....لما ميزت الصوت لقيتها
جداي بارقة...
عدلت شعري ومر عليا شااريط دكريااات كامله مع جداي ..مرات اني صغيرة منفهمش لاكن ارتسخت في داكرتي.....
طلعت لقيتها مقعمزة وعمي حسين وعبد الباري ولد عمتي انتصار....
خشيت لبست الشاربة وطلعت سلمت عليهم وقعمزت شوية...
وجداي تشبحلي طول التقعميزة مقلعتش عينها من عليا..
عارفة انها تحبني لاني بنضرها جيت لدنيا وقتلت ذهبية الدايحة....
نضت درتلهم طاسة عصير وجبتها عطيتهم وقربت الدفاية لجداي ...وخشيت... لدار كملت قرايتي....
منعرفش نكاافح منعرفش زي ربيعه كنت نتمنى انه نقدر نتأقلم مع المشاكل ونكمل ...لاكن فشلت ...
وعلي هالشكل كثرت جياات جداي بارقة...كل اسبوع مرتيين...
هيا وعبد الباري ولد عمتي انتصار....رغم انه كبيير تالته تانوي لاكن عادي يخش للحوش ويقعد يهدرز ...وبوي وسالم مش مركزين....
الا ربيعه
نتفكر في يوم جتني قبل عرس ساالم الي تحدد بداية السنة. ..
وقعدت تنبه فيها متطلعيش لجداي...متكلميش عبد الباري ..لما اضبح اعلييك امشي
خليك في قرايتك...
وبديت نحس بخوف ربيعه عليا من جديد....حسيتها تشبحلي وتقول ...
لو وسام يقبل كنت رفعتك معاي لاكن اني قريب نجييب وانتي قراية...
مرات تقعد تهدرز بروحها وتحكيلي في حاجات علي جداي بارقة...واني عارفتهم ..لاكن مش بنفس الضرر الي حكاته ...
ومشت حياتي هكي
لين جي اليوم الي مقدرتش ندس فيه مشااعري ولا قدرت نتخلى علي حب سالم بكل بسااطة....
بتحديد بداية 2010 شهر 1 ....عرس سالم خوي علي الابله سعاد......
منعرفش وقتها بيكون الفرح مضااعف ولا حنكون شخص تاني كليا ..خوف ورهبة غريبة
كنت فرحانه لفرحه خوي سالم ومنبيش نبين اي شي .
انطبق في كلام حنااي فاطمه افرحي لخوك....
نفس الوقت الغصة في داخلي بشكل غير عادي ....نتخيل الابله سعاد تجي عندنا وتقعد تتامر عليا وتكرهني مرات افكار عبيطة ناتجة علي طيشي وقتها نشبح لدنيا انها خوي سالم وبس
كان تفكيري محدود وسطحي .
لو طحت سالم ايقيمني
عادي لو بكيت سالم ايرضيني
لو تعاركت مع اي شخص سالم ايدافعلي ...
مكنتش مقتنعه انه اني لازم يكون عندي ذاات لنفسي لازم نعرف الصح من الغلط....لاني تربيت من غير ام وحنان الام هكي صاار فيا...
عدلت شعري علي المرايا..وطلعنا لشاارع مصكرين خيمة ودايرينه عرس تقليدي ....
عماتي وعمامي وصغارهم وخالاتي وخالي محمد ... كلهم بايتين عندنا من راس الاسبووع ...
فرحه ماتنوصفش ... لمه حلوة كل الناس كانت فرحانه لساالم.... رغم المناوشات بين الجميع لاكن فرحة عرس سالم غير
اكثر شخصية طيبة ومحبوبة وخدومه في الناس ساالم... والناس كلها تحبه وتدعيله
انفتح الباب وخشت ربيعه اختي قايمه حوايجي في حضنها....لابسة قفطان وردي يلمع ...واني لابسة قفطان عادي جدا....
ربيعه....قعدة قدام لمرايا ...اخلاص اطلعي قريب ايجو سالم وجماعته نتعشو ونمشو عند سعاد دايرة السهرية في الصاله
جليلة ...لازم نحضرو الحنه يعني
ربيعه... اي اكيدة دايرة نجمة ونبو نمشو معاها ....حتي بناويت سميرة واسماء بيمشو ...
جليله....تهاني بنت عمتي انتصار شبحتيها كيف تعييب اعليا معرفتش خيرها ...
ربيعه ....فوتاها هذي ياناري بوها طلق امها وهيا صغيرة وطلعت الشحنه فيها ....
جليلة....وتوة عمتي انتصار عند جداي بارقة سمعت زمان قالت واخدة حوش هيا ولدها المكروه هذا ...
ربيعه....اسمعي علي سيرة جداي بارقه....كان قتلك اطلعي ولا تعالي ولا امشي وصلي شي برا تمشيلها نهااااارك ازرق منييل فااهمه ..
جليلة....اعلاش شن السبب
ربيعه....منغير سبب هكي انتي تشبحيها ايمين امشي ايسار تشبحاها ايساار امشي ايمين لفعى ومنبيش توصل لشي تبييه ....
جليلة...تتكلم وتأشر بإيدها مرة ايمين مرة ايسااار...
حاااضر حاااااااااضر
وطلعت...من الدااار ...وهيا تعض في اصبعها ...وتتحلف سكرتةالباب ..وتلاقيت اني وبناويت عمامي وعماتي. ..في منهم انحبهم ويحبوني وفي منهم بيحطهم القدر قداامي وخننقم اعليهم نقمة في حياتي ما نقمتها علي شخص ....
وقعدت فكرة انه منطلعش برااا ملازمه رااسي ...من الغلط انه الواحد يقولك علي شي مديراش وميقول السبب...
وقتها عقلك حيطلعلك الف سبب وحدييره الشي وتعرف النتيجه بروحك...
وهذا الي صار...
لبست حجابي وطلعت قعمزت ...في الخيمه ونضحك اني والبناويت ...ونهدرزو.....ومرات يبدو يديرو في حاجات اني مش فاهمتها ولا عاارفه شن وقتها كنت جااهلة في طيش البنات.
كلمتني تهاني....قتلي
اسم حبيبك شنو بنلعبو
جليلة...نعم تكلمي فيا اني
نرجس.... لااافي الكلللبة هههههههههه
جليله....ضحكو معاها كلهم ....قالت ايي نحكي اكيد في واحد معاك في المدرسة حبيتيه...
جليله....تتكلم وتشبح لباب الخيمه حسيت انه في شخص تبي تسمعه كلامي ....قتلها بكل عفوية
ساالم خوي اكثر شخص نوتق فيه ونحببه واكثر شخص نقدرش نبدله بشخص تااني...وبعدين اني صغيرة عيب عليه الكلام .ردت عليهم بنت خالتي نعيمة
ابرار....عادي في عمرك اختك ربيعه تهدرز علي عماد
جليلة....حسيت علي شي ورااي في الخيمة يمشي علي المرشابيدي لانه الخيمه تفتح علي الزنقة التانية....
التفتت وقتلهم اني منحب حتي واااحد ولا نبي نحب ....ومعش تتكلمو... وربيعه ماليكمش علاقة بيها فااهمين
بدو كل وحدة تقول في حاجه وتباها بيها ....اني نبعتله في ورق ....
وحدة تقول نكتبله في القسيمة متاع الكراسة...
وحدات يقولو عطيناه رقم امي ولااختي .... وحدات يقولو احني نكلمو فيهم بالتليفون الارضي ...
اني خفت من كلامهم....حسيت علي صووت رجولي ....عيط اعلينااا من فم باب الخيمه ....
رفعت راسي لقيته وااقف ...
صكررري فممممك انتي ويااها ويلاااا دااخل من غير جو زاايد كلاام هذا الي تحكو فيه اكبر من رووسكم يابهايم داااخل بسرعه ....
هو قال هكي وهما خشو يجرو وخايفاااات ...تهاني تشبحله وتتكلم
اني خطمت من قدامه ....وقفني صوته ....
جليله كيف حالك...
جليله ..الحمد الله عبد الباري كيف حالك انته ...
عبد الباري ...الحمد الله كويس متغيرة معرفتكش ....
جليلة ..وتوة الاسبوع الي فات عندنا مسرع لحقت نتغير
عبدالباري..... ماتفوتيش فرصة بكل
جليله....الحمد الله كويسة .. تمام ... انته حالك تمام بنخش داخل
عبدالباري....اححم شن بنقوولك
جليلة ...تفضل....
عبدالباري....راك تسمعي كلااام لبناويت توا خليك نضيفه نبييك هكي اني ....متعرفي شي
جبيلة....خفت من كلامه ونبرة صووته وعيونه كيف يشبحلي....
مع انه نعرف شبحة المش كويسة هيا شبحة فتحي جارنا...لاكن عبدالباري كان ازفت من هكي...
التفتت وخشييت نجري لقيت لبناويت كلهم في السقيفه....
يضحكو.....
قالو مع بعضهم مبروك اعليييك الحبيب الجديد حب في زمن 2010 وبدو يضحكووو..
خشيت تلاقيت مع جداي بارقه كانو مقعمزين في الجنان علي عالة الشاهي ويخدمو.....
شدتني مع ايدي ورفعتني لدار بوي ... وهيا تمشي بشوية واني وراها
بارقه....تعالي....قعمزي نبيك في كلمتين... وردي الباب
جليلة...نعم جداي مش فاضية ولا نبي وجع راس بالله عليك
بارقه..... اسككتي بتطلعي زي ام اللسانات العقربة ربيعه . انتي خيير منها .. .
توة بعد ما يتزوج خوك واهني في الحوش ويبي داره وحمامه بروحه ويبي يرتاح حتي سبوع بوك كلموه القياادة يبوه ايركبلهم ناس من طرابلس لبنغازي بسيارة وبيمشي...
انتي تعاالي معااي. وكان قتلك ربيعه تعالي معااااي قوليلها لااا نبي جداي بارقة
ياااويلك نعطيييك هذيك الطريحه السمحه باللقاحي اهوو تشبحي فييه....حوش جداااك فاااهمه تمشي معااي ....وان شالله بتسكني معااي ...
جليلة...هزيت راسي وقتلها نجوم السمي اقربلك مني جداي بارقة اني قاعدة اهني ولو بنمشي بنمشي لحناي معقولة نسيب الحن ونمشي برجليا للهم
وطلعت وخليتها وهيا تعد وتوصف بروحها ..وصفتك وانتي ونعتك وفيك وليك واعليك واني نضحك اعليها مزااال عندها جهد وتبي توصل لحاجه ...حايرة فيها لا تموت ولا تخلي من يرتاح
عليت في المنضومه وبدينا نرقصو علي طارق الناجح فنان ليبي وقتها طاالع موضه عنده شاريط من سنين في كل عرس ايديروه ....
ونرقصو ونضحكو ....فاتت الحنه مشو لكبار بس واحني قعدنا في الحوش درنا البشع ....
ناكلوو نضحكو ونرقصو ...ومرات نمشو نديرو في كسوة لعروسة مقالب حسيت بناويت عمي قربو مني بدات بناويت عمي بركه
قالت تهاني....تعالو نقتلو حاجه ونحطوها في سابات الملابس الداخلية شن رايكم .
جليلة .... انتو ديرو وشووفو شن يصير اني نحب ساالم ولا وحدة فيكم تقرب حااجه نقتلها ويلااااا للخيمه ولا وحدة نلقاها اهني ...
قلتها من فوق خاطري مع اني متمنية مقالب في السعدانه سعاد
لما نتفكر انه ساالم بيتزوج سعاد حتي لو كنت ناكل ولا نضحك نسكت لا ارادي ويبدى قلبي يضرب في الالف....من الخوف. ..
فات اليوم وغدوة الحفله....نطلعو في الشاارع ومرات نلقو الاولاد في الخيمة تجي وراي ربيعه اتشدني مع ايدي تهزبني ...
ولمانقعد دااخل تجيني جداي بارقه ...اطلعني وتقعد اضبح علي عبدالباري وهو يوقف ايهدرز اعليها وهيا تضرب بعصاتها علي الوطاء واني واقفه زي مهبوله بينهم ...
جي عبد الباري وقف جنبنا وقتها كان شااب ابيض وضعييف هلبا وطويل وشكله حلو تهاني اخته واني مسمينا زنيلو .....
انقولو الزنيلو جي الزنيلو مشي ...من لما صغير عندي معاه مقالب
ومنعرفوش معناها الكلمة الا انها هيا لقب انعزرو فيه بيها...
وقف جنبنا وجداي تتكلم وهو يضحك ويشبحلي ....
الجداي وقتلها
جليلة....جداااي بارقة الي امتي بنقعد واقفه وانتو تهدرزو علي ايامكم وبطولاتكم واني شن موقعي وانتو الحوش في الحوش مع بعض...
الحاجه بارقة....تعرفي تسكتي انتي وتوقفي ولا تخلي العقربة تغييرك.
وبدت تعدل في شاربتها ونضاراتها وتأشر لعبد الباري وهو يضحك ويعدل في سوريته ....بشرتها بيضاااا هلبا..وعيونها غايرات ودايرة دقة خضرا علي لحيتها ...
كل مرة نسالها تقولي زمان الي يبوه ايعيش ايديرولا دقة علي جبهته ولا علي لحيته ...بالكحل ...يعيش ...
قعدت وااقفه وركزت علي عبد الباري ..عارفه انه جداي تبي تخطبني لييه ...تبيه يشبحني ونعجبة ولا لا ... تبي تعاود قصة مختار وربيعه فيا نجوم السماء اقربلها ....
تو انوريها جليلة منو
قعدت مدققة فيه هلبا ...مافيشي حاجه تجدب مع انه كلام البناويت كل وحدة عندها صاحب ويبعتو في ورق بينهم وهدايا لاكن وقتها اني بالي كله مش في الحب نهائي اخر همي الشي هذا ..
التفتت وخشيت وخليتهم يهدرزو
وقفني صوتها تعااالي اهنييي وين ماشية
جليلة... اطلعي منها جداي والي في بالك انسيه لا اني نعجبك ولا انتي تعجبيني خلينا هكي احسن ...
...وقررت في الليل مش حنمشي معاهم ..بنمشي مع ربيعه اختي...
قعمزنا في الخيمه وعزايز ايطيبو ...واحني مقعمزين نهدرزو....الي الليل وماشبحتش ساالم....
مشيت لربيعه قتلها كلمي علي تليفونه يجي نبي نشبحه حاسة انه اخر ود وحنان منه اليوم ..عارفه سعاد مش حترحمني....
ربيعه ..ارزني بالله علييك ارزنييي شن هذا
جليلة...تعرفي جداي بارقة تبيني نمشي معاها سبوع
ربيعه...نهااار حررش شن قلتيلها
جليلة....قتلها نجوم السمي اقربلك وطلعت
ربيعه...هكي قلتيلها ولا تتسهوكي
جليلة...والله جدياات...نعجبك ربيعه اني جليلة بنت ذهيبة الدايحه ...تربيت من صغري علي هالكلمه ...ولو كانت امي توفت واني جيت ...
معناها بنت سليمان جت من جديد ..وبتاخد حقها ...
للحكاية بقية
جميلة جاسم
التعليقات المميزة الي شدتني اكثر في بارت غدوة باذن الله وحيستمر النشر اول ايام رمضان الي حين وصول البارتات من الجزء الاول الي 20 بارت ..
بنتضاركم انتقالة من زمن الي زمن بنفس الشخصيات