بقايا رماد

البارت 11

#بقايا_رماد

#جميلة_جاسم

ربيعة...مقعمزة في القاعه ونمزق في لورق ونشبح للبناويت واخدين فطور مفروم من الكافتيريا وياكلو واني...
عقلي ماشي بعيد...
نتفكر في موقفي امس شن درت مع مختاار وكيف نقدر نكمل معاه ولا ضده ......شعور ندل حسيته كيف قدرت نضحك اعليه بالشكل هذا. ..

قمت التليفون لقيت رساله نصية منه

مختااار....مستاحشك ربيعة...

رديت عليه من فوق خاطري وقتله... واني اكثر مختااار

وصلتني رساله تانية منه .. قالي....وين انتي توة...

ربيعه....في الجامعة مقعمزة ...مع صحباتي ...

شوية وجتني مكالمه .. رديت اعليه والبناويت ياكلو ويشربو في البيبسي ومنسجمين...

الوو مختاار كيف حالك اليوم

مختااار...مدامه سمعت صوتك بالف خييير وين انتي

ربيعة...مش قتلك في الجامعه...

مختار.. باهي اطلعي لساحه البراء تلقي سرولة اني مقعمز تحتها نستنى فيك تعالي...

ربيعة...مختاار بلاش منهم الحركات هذو الناس شن بتقول اعلينا

مختار...خطيبها مقعمز معاها...

ربيعة....اني مش مقايلة اني مخطوبة حتي لصاحباتي ..

مختااار....ربيعة اطلعي اقل شي خودي فطورك وسلامتك...

ربيعة...سكرت التليفون وقلت للبنات تعالو اشبحو ولد عمي جي خطيبي مستقبلا...
قلتها وحاسة بشعور وقح ...تمنيت نعرف الناس علي عماد تمنيت حتي في تخرجي معاي عماد مش مختاار....

لاكن النصيب دائما ويغلب القلب ... طلعت من القاعة ومشيت اني والبناويت ندور فييه ويين لقيته وااقف ولابس كاامل ونضراته...

بالشكل مختاار معقول وبدات لما يلبس نضارات شمسية يتغير لانه ابيض البشرة ...

وصلت سلمت وقعدو صاحباتي يشبحوله... وأني واقفة ومتحشمة..

مدلي كيس فيه نص دجاجه ومشروب ومعاه طروف شكلاطه....قعمزت ..

وهو قعمز...ويشبحلي بعيون فرحانه ...واني قلبي مش متقبل الي ندير فيه لاكن عقلي ايقوولي انتقمي من جدااك...وريها بنت ذهيبة الدايحة شن ادير....

مختاار....محلااااوة ربييعه ولا اني عيوني انفتحووو...

ربيعة..هههههه لما حبيتني زمان كنت شينة يعني

مختاار...مستحيييل اني نشبح لدنيا ونشبحلك....تصدقي ربيعة الليل كله منرقدش نقعد نفكر في مستقبلنا نستنى في اليوم الي تنوريني فييه في حوشي...

ربيعة....لاكن اني خايفة من حاجه مختار ..

مختاار...معقولة تخافي والضابط مختار معاك...