#بقايا_رماد
#جميلة_جاسم
ﻳﻌﻠﻢ ﺍﻟﻠﻪ ﺍﻟﻮﻗﺖ ﻓﻴﻪ ﺍﻏﻠﺒﻨﺎ
ﻭﻣﺎﻋﺎﺩ ﻓﻴﻨﺎ ﺣﻴﻞ ﻣﻠﻲ ﺟﺎﻧﺎ
ﺻﻐﺎﺭ ﺳﻦ ﻟﻜﻦ ﻣﺎﻟﻤﻮﺍﺟﻊ ﺷﺒﻨﺎ
ﻭﻟﻨﺎ ﺯﻣﺎﻥ ﻭﻓﺎﻗﺪﻳﻦ ﺯﻫﺎﻧﺎ
ﻭﺷﻠﻨﺎ ﺍﺣﻤﻮﻝ ﺍﺛﻘﺎﻝ ﻣﻨﻬﺎ ﻃﺒﻨﺎ
ﻭﻫﻤﻮﻡ ﻃﺎﻟﻦ ﻋﺎﻟﻘﺎﺕ ﻣﻌﺎﻧﺎ
ﻭﺩﻳﻤﺎ ﺯﻋﺎﻟﻪ ﻭﻣﺎﻟﻌﺬﺍﺏ ﺍﺗﻌﺒﻨﺎ
ﻭﻛﻞ ﻟﻴﻞ ﻣﺎﺗﺴﻤﻊ ﻣﻐﻴﺮ ﺑﻜﺎﻧﺎ
ﺿﺎﻳﻌﻴﻦ ﺧﻂ ﺍﻟﻤﻮﺕ ﺷﻮﺭﻩ ﺍﻗﺮﺑﻨﺎ
ﻭﻧﺎﺻﺒﻴﻦ ﻣﻦ ﺑﺪﺭﻱ ﺍﺧﻴﺎﻡ ﻋﺰﺍﻧﺎ
جليلة....خشيت للحوش بعد اروحت منعرفش كيف وصلت ولا شن طلعني وقضت في الطريق بس انه مروحه قبل الموعد ...
اول ما شبحت جارنا فتحي خفت منه منضري نبكي وطالعه قبل المرواح...
والشاربة فاسدة .. مشيت من جنبه قعد ايلوحلي في كلاام ويكلم فيا من قبل انخاف منه لما كنت صغيرة
..قبل لما يكلمني انرد اعلييه انهزبة ونهرب توة مش فااضية بييه
قلبي يضرب خايفه من ربيعه وزيادة قدام حوشنا سيارة القيادة بوي وقته ايروح توة وطول الليل يقعد مناوب في التوكة يحرسو
خشيت ....وندعي لنلقى خوي ساالم في الحوش ....
طقيت الباب فتحتلي ربيعه وهيا شبحه وهيا عييييطه علي طووول حسها
ربيعه....نهااااااري هواااا انيييي خييييييبرك ياامنجووها خيييرك ...
علي صوتها جي بوي وسالم ...اول ما شبحت ساالم حسيت برااحه اكيدة مش حيخليهم يضربووني ...
بوي....جليله تكلمي خيييرك شن فييك
جليله ...تعاركت اني والابله وروحت من المدرسة
ربيعه....هربتي من المدرسة قصدك ولا شن روحتي يااااهمي هم اني كيف ندير فييك
بوي....وكييف اديييري هكي....هذا اني ربيتك اعليييه قلة الادب والاحتراام اااه قووليلي وين جليلة ويين مشت خيرك تكبري وتفسدي هذا تعب الي تعبته معاك تجازيه هكي كل يوم عركه في مدرسة خووتك لين تخرجو ولا واحد جابلي ورقة استدعاء انتي لين تحشمنا من الناس والعالم من ورااك......
جليلة.....قال هكي وقعمز اني فشلت وقعد نبيكي
..نشوف لساالم ..نبيه يتكلم....طبع ساالم يحترم بوي قدامه مايتكلمش ولا عمره سمعنا منه كلمه قدام بوي.... كيف بنتكلم ...وقف بووي وقام بوي يده يبي يضربني ...
اهني ساالم ...مقدرش ....حسيت بايده جبدتني ...من الشنطه وجيت ورااه هو بنيته طويله وضخم هلبااا واني نااعمه قصيرة ...حسيت ايدي بتنقلع من مكانها...
والعبرة في خاطري ....وبوي ...يتكلم ويسب فيا منك ولييك وعلييك ويااريتني ربيتك وانتي وصفتك ونعتك واني دلعتك كيف ندير معاك في 2009 ومش قادر نرفع راسي ....
وربيعه.... تعد وتووصف حتي حوايجي كيف انحي فيهم ونخلي فيهم في مكانهم قالتها ....
اخر شي ..قلهم سالم
سالم...تعودو من الشيطان البنت غلطت وسبحان الي مايغلط...يعني لو هيا غلطت احني نعالجو الغلط بالغلط...مايجيش قول فيه وقول اعليه....
خشي بنتي قعمزي نفسي وقبل لا ايتم الدوام نرجع اني وياك الابله نشبحوها ونشوفو علاش ضرباتك ...
وريني ايدك....
جليله....مديتله ايدي ..شدها وقعد ينفخلي فيها ويضحك علي عيوني ويعيب علي خشمي احمر ونرشف ايقوولي ....طلعتي عندك دموع ومشااعر واني نقوول هذي ذييييبة تاكل الطيير الطااير ...
بكيت علي حنيته نشبح لربيعه تعجب وراه ..انته فسدتها هذي صغيرة ..اشبح جيلها كيف وهيا كل عام تحس في روحها صغيرة وماتكبرش وانته وانته ..
لين التفتت وقلها
سالم...صلينا علي نبي ربيعه وشوفي كان فيه طاسة شااهي ولا حاجه ولا ديير الي بديررريه خلوها عليا ...
جليله...بوي طلع واني مقعمزة علي المندار بحوايجي ...طبع بوي متعودين اعلييه لانه يشتغل في القيادة....ولاازم يكون حاد هكي... كبرت علي بوي مناقشش في اي حد كنت نفهم من عمر السبعه سنين رغم اني حاسة انه ربيعة انضلمت لاكن كنت نقول اني مش حنخلي شخصيتي زيها لاكن اني همي من الدنيا ساالم وبس..
سالم....تحكيلي اعلاش تعاركتي انتي والابله هذي الي بتجيب اخرتنا ...
جليلة.... اسمعني سااالم تو انته احكم ....اني واقفه نكتب والفصل يعجبو عليا وعلي اسمي وهيا تضحك معاهم...قتلها ...عيب اعلييك انتي مفروض تسكتيهم مش تضحكي معاهم هيا جتني ...ضربتني بالعصا علي جسمي ....اهو تبي نوريك..
كيف جيت نبي نقييم تشيرتي ..اشرلي... بعيوونه
سالم...عيييييب جليلة عييييييب ...انتي كبيرة اعلاش العقل هذا قعد صغييير تو مفرووض انتي تتحشمي من اي شخص حتي ولو اني خووك تقيمي تشيرت هكي
..انتي كبيرة ...الطفولية الزايدة قيماها...انتي اختي ونفتخر انك اختي ونقوولها بالفم المليان بنتي قبل اختي ربيبتك علي هالكتف ....
وكنت كل مرة نقولك خودي حقك بدراعك ..خليك قوية لانه الوقت ما يتأمنش ....لاكن مش بالوقااحه ولا بقلة الادب ...خليك عاقله رزينه تفهمي الصح من الغلط....
وتحترمي الكبير اهم شي.
جليلة....باهي شن درت اني توة
ساالم....هز راسه وضحكلي....وقال....هههههههه انتي من كل عقلك تتكلمي....جليلة خلييك هكي احسن شي ...عبيطة
جليله....من بين دموعي تحولت لضحكات اني وسالم وهو يعيب اعليا واني نعيب اعلييه وربيعه تطلع من المطبخ بالمغرافه في ايدها وتقول ...
زيييد زيد خليها تصغر بدل لا تكبر ..
فات اليوم وسالم طلع جابلنا حوت من الحواته الي في الطريق....
مرات نقعمز فم الباب ..ويخطموو ويبدو يضبحو...
حووووت حووووت ...واني نعاود ورااهم... منبوووش منبوووش وهما مايردوش عليا
قعدت ربيعه تنضف فييه واني ...نقشر في البطاطا بديرلنا طاجين ...
وساالم يكلم في عمي خالد علي تليفونه..مع انه 2009 كلها عندها تليفونات حديتة وراقية لاكن احني الا ربيعه جايبلها وسام تليفون انيق
وقتها كان سالم عنده تليفون ايقولولهم N8 واني نقعد نتمحصر اني وياه نبي ناخدة واخر شي يعطيني نلعب لعبة ولا نسمع موسيقي تركية حزينه كانت عنده وقتها ونقعد نبكي اعليها ...وهو يقولي في حد يبكي من غير سبب
انقوله وقتها انحب الحزن اني هكي ونسمع موسيقي ونبكي ... وقعدت حياتي بالامنية هذي معلقة
بعد ما كمل جي قال عمي حسين بيتعشي عندنا ...جاي علي خاطر الورت ...هو وعمتي انتصار ...
شبحت لربيعه وجها تغير ...لما كنت صغير كنت نسمع انه عمتي انتصار متعاركه معانا ....وجداي بارقة خطبت ربيعه لولد عمي حسين مختاار الاعور وربيعه رفضت وصارت مشكله كبيرة وقتها من سنة 2005
واني نسمع كلام علي ربيعه وهيا متندريش مرات نسمع خالتي فجر وسميرة يتكلمو عليها ويقولو حطمت خونا وخلاته هكي ومرات نسمع جداي تقوول ليين نكسر خشمها هذي ونزوجها لمختار منرتاحش...
اني من الي نسمع فييه كبرت علي الغل والحقد كبرت علي انه اي شخص يتكلم معاي يهزأ عليا لازم نوااجه نزرعت فيا من الوقت ولاني صغيرة اكتسبتها من الي دايرين بيا
مشيت خديت المكنسة وبديت انضف في الدار البحرية ...دار بوي ....والمربوعه والسقيفه وخديت طبق دحي وقتها الناس متعلمه التبخير اعليه ...ولعته وحطيته في كانون ....وخليت اعليه بخور...
وبخرت الحوش. حسيت روحي دايرة حاجه مليحه بكل ..
مشيت للكوجينه نبي نكلم ربيعه ..لقيتها مهناش ..
طلعت لدارنا اني وياها لقيتها تبدل في حوايجها ....لبست بلوزة وقونه بيضا ...وهيا شكلها حلو علي بابا طالعه اني وسالم نفس الشكل ....بشرتي صفرا بااهته وقصيرة...لاكن ربيعه طويله وبيضا ومليانه وشعرها اصفر....مع عمرها ماشي....
جليلة....شن تلبسي....
ربيعه....خلسي شعرك وغيري حوايجك نبوش يتشمتو فينا الوحيدين عايشين في حوش عربي قعدين وبدات عمتك انتصااار هذي الحقيرة لااااازم تشبحنا متأنقين وتوصل لجداي خلي تندهك .
جليلة.....اني بنقعد اهني ... مش طالعتلها
ربيعه ..عدلت شعرها وحطت ملمع وطلعت...
جليله قعمزت اني نحل في اسئله الواجب ونكتب شعري متبهدل وقعدة في توتي وردية خفيفه من كثر الغسل لين طاايبة ونسيت روحي والمروحه فرارة مقابلتني ....
لين سمعت صوت دوشة ... سلام وكلام ....عرفت انهم جو
..قعمزو في وسط الحوش ...لانه باارد الجو والمروحه والعه فوق منهم....
قعدت اني نحل في الوااجبى...ونفكر كيف غدوة بنمشي وساالم شن بيقوول ...علي الابله مرات يقولوله تضرب في زملائها ...
اخر مرة ياربي معش نعاودها ...نفكر ونعضعض في البيرو... وكان يقولولا ضربت مؤيد
اخر شي حطيته ..وفتحت الباب نبي الحمام ونسيت الناس لمقعمزة في الصاله...
طلعت وانصدمت مشيت سلمت علي عمي بإيدي وعمتي ...وقفت وربيعه تخبش في وجها وتعضلي في شواربها وتفنص...
تفكرت شعري. ..عدلته بايدي توتي عدلتها ومشيت قعمزت جنب سالم...
عمتي انتصار تشبحلي وتضحك....وقالت.....
انتصار....مسيكينه هالبنية ديما ناسيتها ..كل مرة نقول للبنتي كان عندكم دبش زايد ولا اي حاجه انتي ولا بناويت فريحة ديروهالي في كيسة ..نقيمها معاي لبنت المرحومه ذهيبة الدا......... ههههه قصدي تستفاد بيها وننسي كل مرة
جليلة....سالم سكت وربيعه تاكل في روحهاوهيا مسبة فيا ولا هزوة علي خوها لا اني بنت المرحومه بسم بنت خوها. .
شبحتلها قتلها ...
انتي ليك من 2006 ماجيتيش امتي بتلحقي تجيبي الحوايج الي كل مرة تنسي فيهم من هذاك العام ههههه ..معناته صغرو عليا خليهم لبناويت خواتك التانيات كل عام تكبر وحدة تلبس من اختها. مشالله ستة هما كان مزاد حد تاني بعد 2006 ..
اني نتكلم ونضحك وساالم يشبحلي وماسكتنيش ..اما ربيعه تتحلف فيا..من بعيد.. وتفنص
معرفتش شن تبي مني ... كان تكلمت مش كويسة وكان سكتت احرف بالمعني الوااضح تدهب الشيرة علي قولة حناي فاطمه
سالم.....جليلة بنتي شوفي طاسة امية لعمتك قبل لا ايجي بوي ونبدو في موضوعنا المهم
جليله...ابتسملي وضحك ...واني نضت خشيت للكوجينه...
قعدت فيها ونسمع في صوت بوي جي...طلعت من الكوجينة خشت ربيعه بعد.ما كليت هزيبة علي لبسي وقيافتي وكلامي واسلوبي طلعت من الكوجينة وقعمزت في الدار ...ونكتب ونخربش لين نعست في مكاني...
سمعت اصواتهم تعالت ...وناس تاخد في حق نااس وكلام قوي ..ولاول مرة نسمع سالم يتكلم هكي...اول مرة نشبح جانب سالم لما يتعصب ...
مع انه كلامه هادي وراكز ...
اخر شي طلعو من غير لا عشي لا شي حتى طاسة المية ماشربوها .. وبوي زعل من عمي وسالم يهدي فييه...
الفترة هذي بوي يرعش هلبااا ومش قادر يسيطر علي رعشته وجداي بارقة كل يوم تبعت وفد من حوشها وتبي الورت نتنازلو عليه...واني نقولةفي خاطري هذي لو ربيعه ما قتلتهاش اني بنقتلها ...
خشيت لدار لقيت ربيعه تتكلم...
ربيعه...وساام خلاص كل يوم عرسنا وميصيرش منبي شي اني نقرى توة وبناخد الماجستير وبنحضر دكتوراء لو ربي سخر نبي نتزوجو ونريحو بالنا خلااص .. معش متحملة مشاكل العيلة ولا متخملة روحي.
تخييل وسام جداي بتاخد الحوش من بوي وبوي سااكت ....وتبي الورث كله ليها ولبناويتها ....شي يقهر .
اني ضحيت بروحي نبي نستقر خلاص عمري قريب 30سنة خلااص واني في العذاب ...
وتتكلم مش عارفه شن تقول مرة تضحك مرة تسكت واني نسمع في كلامها مع وساام ...
اخر شي جت وجها يضحك بترقد...سالتها قتلها خير قالت ...
عرسي الشهر الجاي بنفتك من العيشة ملييت من بارقة ومخططاتها ...
وقتها اني صغيرة ومنفهمش حسيت ربيعه انانية وعندها انانية ما شبحتهاش عند حد....مقدرتش تصبر علي العيشة اهني وبدلتنا بزوااجها من وسااام واني ناكل في روحي ......
فهم صغير علي داب عقلي. ..وعلي نضر عيوني بس
طلعت خديت حوتين في صونية وقعمزت ناكل..علي اساس العيله متكهربة مع بعضها ومايبوشي عشي واني نموت من الجووع هذا ما مزاال ...
كملت وغسلت ايديا ...
وخشيت رقدت...
تاتي يوم الصبح طلعت اني وساالم من صبح ربي منوضاته مشينا علي رجلينا اخر شي تعب هو قالي اركبي ناخدو بقرة نمشو فيها لانه سيارته باعها وكمل بيها شقته واني فرحانه بالحوش ...
...
ركبنا وصلت للمدرسة ..اني وقفت في الطابور ....وقعدنا تقوس الطابور المعتادة ونشيد الله اكبر وقتها ...نقروو فيه متململين وخشينا ...
نمشي ونلتفت ونقول بااي لخوي سالم وهو يقيم في راسه ويضحك ويردلي في الباي...اخر شي ..
شبحته خش للادارة...
واني نبيت مع فم الفصل قبل لا تجي ابله العربي وبعدها عندنا رياضيات...هندسة وجبر ...كانو متقسمين ...
...... قعدت مدة نستنى ايضبحو عليا الادرة ومافي حد قال اسمي..رن جرس الحصة الاولي وتمت واني مافهمت شي...
الحصة التانية...فتحت الباب. ابله ....سعاد السعلوة ...
قتلي تعالي ..
نضت ومفتخرة بسالم خوي اكيد مش حيقولي شي اكيد حيعاركها وياخد بتاري سالم ونعرفه... التفتت لقيتها مشت الادارة متاع الابلات تبي تزيد تملعق روحها بفيرا وجها لين متبرص زي الكلب الابيض
خشيت ...للادارة وقفت جنب ساالم وهو مقعمز ...شبحلي عيوونه معبياات حنية وكاني بنته بالفعل ..
المدير....سالم خوي صاير سوء فهم بين الطالبة جليله علي والابلة سعاد راشد ..لذلك طلبنا استدعاء الوالد او اي شخص قريب عليها ...نبو نفهمو منهم الاتنين رااهو تبي الصحيحة وله حتي اني معنديش علم سبب العداوة القايمه بيينهم لذلك الابله سعاد حتوصل بعد شوي...
قعدت واقفه وسااكته وسالم يهدرز مع المدير بحيت خلى المدير يحترمه بشكل غير عادي وكانه مصدوم انه اني اخت المتقف هذا...
يشبحلي ويشبحله واني نهز في رجلي متوترة
منسجمة في شكل سالم خوي لابس سورية صفرا وسروال زيتوني كتان ..وقتها هذا وقتهم وطالعه موضتهم.... ومتأنق
وقضني من سهوتي المدير ايقولي
ضبحي علي الابله سعاد بنتي بسرعه...
طلعت من الادارة مشيت ممر ونهايته ادارة الابلات ...كيف بنخش لقيتها ابله سعاد ومعها ابله يقين وفوزية ايساوو فيها وحدة تقلها
تكلمي بدلع شكله ايهبل هذا طيحيه
والتانية تقلها ...
لااا خليك رزينه وحتي كان قلك انتي غالطه قولي ايه
وهيا لاهية تملعق في الوجه طقيت الباب انتبهو عليا
شفتلها من فوق الي لوطى وقتلها يبيك المدير يا ابللله
وطلعت الحيوانه في بالها سالم بياخد زباله زيها تموت وسالم ما تتزوجه
اني وصلت الادارة وجت هيا بعدي تتمايل بالقدم ...مسمار اسكربينا عالية وعباية ساتان وفيها رفرف مع ايديها ...
قعدت تتكلم مع المدير وخوي سااالم مرة يشبحلها كيف هادية وسااكته ومرة يركز علي جسمها وخصرها ومرة علي فمها وكانه مش مركز علي شي واني عقلي مش معاهم خاايفه سالم تعجبه. ...
لاأول مرة نشبح ساالم بعين تانية
اخر شي سمعت المدير يقولي قولي اسفه لابله سعاد
وسالم ايهزلي في راسه يقوولي قولي اسفه ...وعيونه فيا ...
لا سمعت حوارهم ولا بشن اتهموني ولاهيا شن قالت ...
خلاص انختقت واضايقت .. ساالم خوي اني مستحييل تاخده هذي لما جيت بنقول اسفه قتلي
سعاد....جليلة زي بنتي ومستحيل نزعل عليها مع انها مشااغبة شوية لاكن هذي فترة مراهقة وتو تكبر وتعقل تشرفت بيك استاد سااالم وان شالله معرفه طيبة توة نستاذن منكم لانه عندي حصة والطلاب يستنو ..موفقين ان شالله
اشرتلي براسها هياااا جليله علي فصلك بنتي
جليلة...طلعت ونسمع في سالم خوي يضحك ويسلم اعليها ..واني قلبي يغلي الكذااااابة الحقييييرة قسم بالله الا كلللللبة توة نمشي نتفاها عقاب حاجبها ولا كيف ندير فيها ....
خشيت للفصل ...وعيوني في قصتي من فوق بنمووت منها ....
خشت بعدي وكانها مش نفس الابله ...فايت من الدرس نص سااعه .. لأول مرة مطلعنيش علي السبورة ولاول مرة ماتضربنيش. ..
تمنيت وقتها عندي تليفون ونسجل فيديو لما تضربني....وكان هذا الحل ايدور في بالي ايام واساابيع
نمشي للمدرسة ونبي كل يوم تضربني ونصورها فيديو ...تفاهمت اني وصاحبتي رندة امها عندها تليفون سي تو سحاب...
كل اسبوع نبيها تضربني ميصيرش ..تغيرت المعامله معااي مرات تجي تسألني اسئلة غريبة
بوك حي او لا امك حيه او لا كم اخت وكم خو..
واني نجاااوب ...
ايام واسابيع رحزت علي حب الانانية بس ركزت علي ساالم ليا بوي وخوي وكل شي.
نسيت قرايتي هملتها.
وربيعه وقتها تمشي بين المستشفي وبين القراية..وتجهز لعرسها ...
واني مركزة علي سالم. وكانه الدنيا فيها سالم بس ..
و بدي كل ما يطلع يجيب حاجه مغلفه ويدسها في شقته ونقعد نستنى متاكدة انها ليا ولا نبكب نشوفها ..
ونقول معليشي مرات يبي ايفاجئني ..ونمشي نجيبله درجه كامله نقوله عطيني جائزة وقتها كانت الميسترو احلي جائزة عندنا...
اني من اهني بديت نعرف كانه موااقفه وقضتني بديت ندرك شن صاااير...
عرفتها وقتها انه ساالم علي علاقة مع ابله سعاد...لاكن الشي الوحيد كنت متأكدة منه انه ساالم مستحيل يتزوجها...كيف اني صغيرة وانفتحت عيني هكي
فاتو الايام الاسبوع الجاي عرس ربيعه اختي....بتتزوج وبنقعد برووحي اني.. .وهذا وقتها كان اكثر حواار ونقااش صااير في حوشنا...
منو بيقعد معاكم ويطيبلكم.... بوي يقول سالم تزوج اخطب من بناوبت عمك ولا خالتك وتزوج ...واني خايفه انه سالم يتزوج ومعش ايحبني لذلك نقمت علي الدنيا بدت تصرفااتي احرف من قبل...
نتغضب ونبكي ..ونخااف نقعد برووحي ...حسيت روحي مبالغه لاكن كان اشبه بالمرض النفسي وقتها...
مرات سالم يزعل مني ويعاركني ..لاكن الي يومي هذا عمره في حياته ما ضربني ولا حط يده عليا....حتي لما يزعل مني يقوولي زعلت ولا اني حرجان متكلمينيش ..
املي في الحياااة ساالم....بوي قال لو سالم مش متزوج اني بنتزوج ....وتقعد مرت بوك معاك تعاونك ...
وجي عرس ربيعه... واحني نجرووو ...
جداي بارقة حضرت العرسووعماتي وخالاتي وحناااي فاطمه
بيومها عرفت معني الانتصار في عيون ربيعه حسيت انها انتقمت لحبها انتقمت من سنين عمرها الي فاتوو ...وطلعت من الحوش امي طلعت وخلتني بروحي ...حسيت الدنيا انطبقت عليا وين ربيعه وين حبها واهتمامها مشي في لمح البصر. لما كنت مستحقتها مشت اني كبرت ونبي من معااي ..
كانت قااااسية جدا معاي صح لاكن لمصلحتي ربتني ومننساش فضلها عليا
....كلماتها متفكرتهم الي اليوم.... نقول وقتها هيا
لا متحبنيش لانه فهم طفله ادرااك متدني ..لاكن تبينلي العكس ....امي قبل اختي
كانت الصدر الحنون القاااسي المتسلط ربيعه طلعت وخلتني في وحدة .......
نمشي ونجي بين الديار ونبكي اني كبرت توة نبي من معاي ...اني نبي الوقت هذا من يقولي ديري وماديريش.... ممكن ربيعة كانت الركيزة في الحوش وخسرناها
وقتها كنت نقول انها انانية تزوجت وخلتني ...وطلعت من الحوش وقعدت اني وبوي وساالم...
لما نمتحن ونقري مرات سالم ايطيب مرات يجيب من براا انفاص مفروم ...ومرات ناكلو خفيف جبنه وشامية وتن وهكي فاااتت
الي وين امتحنه نهاية السنه ....وعطلنا وقتها بديت اني نبي نتعلم نطيب ..
تعلمت ندير مكرونه ..ومرات الرز يتعجن مني ونلوحه ندير حوت طاجين ولا حرايمي ....ومرات فاصوليا...
وحناي فاطمة ديما تجيني.... وكل ما انقولها علاش سيبتوني زمان تجو لربيعه . .
تقولي اني خلاص يابنتي انحس في روحي تعبانه ..
نسكت ونقنع روحي انهم بعاااد علي سكنا نبو نص سااعه ولا اكثر باش نوصلو فيهم عادي جليلة انتي بوك وسالم معاك ......
ونبكي كل ليلة علي ربيعه مع انها كل يوم تكلمني
الي وين جي اليوم المشؤووم ....
مقعمزة نقلم في دلاعه ..ندير فاها في صواني وبوي داير راديو fm وحاط علي قناة ليبيا علي الاداعه....
ومرات ينعس ومرات يوقض ويقولي شن قالو .... نقعد نضحك اعلييه
خش ساالم ومعاه ربيعه اختي ....يضحكو....
وقعمز بوي واني مقعمزة سلمت عليهم وعلي ربيعه حضنتها وقعدت في رقبتها وهيا فرحانه مع سالم ..وكنت وقتها نبي نحكيلها قداش تعلمت وبديت انرتب في حوايجي وفي الكوجينه ...
لاكن هيا سلمت عليا وكاني بايته معاها امس ....حزت في خااطري وضاايقت هلبااا وممكن اني في فترة مراهقة ولا صغيرة علي المسؤولية وحسيتهم كلهم بعدو عليا
ربيعه....شنووو كبرنا وتعلمنا ولا قعدين نريدحو ونديرو في المشاكل
جليلة....هذا مني اني ريدحت ودرت مشااكل ...
ربيعه ...سلمها بنتي الفالحه عارفة تهني قالي سالم علي كل شي...
فرحت بيهم الكلمات مشيت قعمزت جنبها وهيا تخلسلي في شعري وقالت
ربيعه ...المهم بوي...ان شالله الموضوع مااشي واموره كويسة ...وحتي امالي البنت قالو عادي حتي تسكن في داار هو من فيه الحوش ... لين تكمل الشقة
والله والله قريب الا قامونا من علي الوطاء ...هذاك الحوووش النضييف مافيشي صنة زفرة ولا حتي صنة حمام ولا صنة كنااسة...
نشهد بالله لمرااء نضيفه وعااقله وتتكلم برزن ومربية الله ايبارك ...ونعم ما اخترت ياسالم
جليله....اني بين الي فرحت وبين الي حسيت حاجه غمت علي قلبي وطبقااته قريب متت ...سالتهم واني نضحك وندير في روحي مش معدله..
وسالم يضحك ويشبحلي ويستنى في ردة فعلي ...
ربيعه منسجمه مع بوي وبوي قال خلاص توة نهاية الشهر الجاي نزوجو خووك وتهني اعلينا مرته...
جليلة...منو هيا
ربيعه...تعرفيها مش بعيدة اعليك
سالم....ان شالله تتفاهمو مع بعض ونبيش مشااكل بنتي من توة بااهي ..
ربيعه...سيبها كلمة بنتي توة جليلة كبرت عام اتنين ونفرحو بيها لااااازم توة تتعلم المسؤولية تكون قدها الدلع تنسااه ....وانته تو تجيك سعاد تنسيك فيها
جليله....منووو. سعاد
ربيعه...ابلتك متاع الرياضيات. .شن رايك فيها تسلم اعليك اليوم هلباااا قالت سلمولي علي المشااغبة ... التفتت لسالم وقالت شبحت سالم نبرة صوتها محلاها...
جليلة....منعرفش وقتها الكره الي انحط في قلبي قتله سالم علاش حبيتها رااهي مش كويسة عاافنه قسما بالله الا كذابه مافي حد يعرفها ...
واسائلو رندة جيرانهم في العمارات ...والله تحكي اعليها تقوول ديما يتعاركو وديما اصواتهم طالعه ومافي حد خطبها وقعدت ...تقسم بالله سااالم سييبها مش وكيسة راه
نتكلم والرعشة باينه في صوتي....وكملت ونزل فيا بووي هزاايب كأني واحد يشتغل معاه في القياادة...
وربيعه تعد وتوصف ورااي وانتي وانتي وكل عام نقولو تكبر تزيدي تهبلي ...خوووك هذا بيستني لين حضرتك تتزوجي باش يتزوج
نضت من جنبهم ولوحت الموس والدلاع مشي علي البسااط خشيت لداار ...وسكرتها...
ونسمع في ربيعه تلوم في سالم
ربيعه....هذا ربايتك وتدليعك فيها مش حااله هذي مش حاله تقول بتتزوج اعليهاحتي احني ما درناه...
اني نقولك وانته تقول بنت صغيرة انحرمت من امها احتي نحرمنا من الدنيا كلها وخلتنا الايام نطلعو شخصيات غير شخصياتنا
سالم....خلااااص ربيعه البنت صغيرة ومتعلقه بيا ..وابلتها ومتحبهاش كنت نقوولك نبي نقول لجليله قبل كل شي انتي قلتي اديرلك شي وتلغي ...
ربيعه......خليها تجيها سعاد تربيها كانه اني مربيتهاش كويس. .
وانته يابوى...شدو اعليها متخلوش روحكم متساهلين شنوووو هذا العفووو ياربي الراجل مش في التلاتين عام قريب الاربعين ومش متزوج
سالم...خلاااص ربيعه خلااص طلعتوها من عيونا اني نقولك فيها لو جليلة مش راضية يلعن بو الزواج وسااعته ..اهم شي الرضي بين الطرفين ...
ربيعه.....ساااالم ياااهمي هم اني...متكبرش براس البنت حيي اعلينا وين نعطو وجوهنا قدام خلق ربي قلنالهم اخلاص وتمينا تبي نجو ونعقبو ...
سالم....الكلام الي عندي قلته...نوضي نوصلك ....لحوشك...
جليله....طلعو وسمعتهم مشو وسكرو الباب....بوي صوت كحته في الحماام....واني....فيا عادة نرقد لو صارت مشكله وكاني نبي نهرب من الواقع....انانية....سالم خوي الحنين يتزوج سعاد...
نموووت اني حتنقم عليا ..حتخليني نعيش يتم الام من جديد....
نعست علي عالشكل ...ومعش ندري علي شي. .
للحكاية بقية
جميله جاسم