#الابواب_الخمس
البارت التاسع / الجزء الثاني
للكاتبة Reem
واكابر يا عذاب الروح ..
وين الفرح .. دليني
تعده.. ولا يكللي ارتاح ..
راحك ما يسليني
تعداني العمر .. والضيم ..
باجلى اسنيني راميني
مثل كصبه اصبحت والريح ..
تاخذني وتوديني
كفايه مرادف الصدعات ....
بيه اجروح تكفيني
ولو شمس الفرح هينوب ..
ما مرت روازيني
عمران : ساعه وحده الشيخ يمي افتهمت وانت صلاح تروح لشيخنا وتمر على ولد عمي تلمهم يجون يشهدون الليله ماتنام ناي اله على ذمة مهدي
عندك اعتراض احجيييييييييييي
ناي : حسيت خالو اذا كال مهدي لا يمكن يضربه طلقه وجان يصفن مهدي بوجهه خاله ثواني وكااال
مهدي : التريده يجرالك خالي
وداد : على بختك عمران هيج تكسر بأختك هاي حكم الدم البينه تكسر بخت ابني وتزوجه بت اهل العتيك
عمران : اخذ امك وياك مهدي ولتخليني اشوفها كدامي لا اسوي شى بيها يزعلك
مهدي : يوم امشي للبيت
وداد : عوفني اليوم مااتحرك منا اله انهي هاي المهزله عمران بروح ابويه لتأذيني بأبني اخذ كلشي شسوي ماافتح حلكي بس لتضيع تعب عمري وتخلي هاي تصير جنتي اموت والقران اموت مااتحمل
عمران : شبيج انتي تخبلتي قابل ذاب ابنج للجبهه لو راح يموت هو ديزوج فوك متفرحين وتهلهلين
وداد :يافرح واني اشوف بت گتال رجلي تصير جنتي
عمران : لتغالطين نفسج رجلج هو الگتل ابوها مو بلعكس
وداد : لوما صخام البين ذكرى مجان رجلي ذب روحه بلنار كله من وره ابوها وامها دمروني وكسرو حياتي وكدامك شصار بيه بعد مامات لوما على ايدك كلشي
عمران : هي مالها ذنب
ناي : قاطعتهم واني ميته قهر من الحاله الكدامي لتكولين على امي صخام البين لتنسين هيه ميته وحرام الغلط على الميت
وداد : هاااك هاي اخليها جنتي العرمه المامتربايه
عمران : اسكتي ناي مااسمع صوتج وانتي الثانيه احترمي امها حقها ماكو واحد ينغلط على امه ويسكت لو حور واكفه وغلطو عليج راح تسكت
وداد : بس لو افهم ليش هيج ادافع الها اني اختك وهذا ابني ممحترك گلبك علينا بكد ماتتراجف عليها
عمران : انتم ليش واكفين اني شگلت يله بسرعه
وداد : اروحلك فدوة عمران لتهدم حيلي مااشي انت مو تريد تأمن عليها ومتريدها ترجع مستعده اخليها بيتي حالها حال حوراء تعيش ويانه بس متصير مرت ابني
ناي : باوع خالو على الولد وخزرهم طلعو بدون ميحجون شى وراحو ينفذون كلامه عمران : روحي لبيتج وداد
وداد : اذا طلعت لساني ميخاطب لسانك ليوم الدين
عمران : نرجس (زوجة عمران ) سويلي جاي ودار وجهه على ناي
وانتي طبي للغرفه بين متجي الوادم وتصيحج ام عبد
ناي : خالو عفيه
عمران : اسمعي الكلام وادخلي
ناي : طبيت للغرفه واني الوب كارهه الوضع كله اني مااريد اتزوج اريد ارجع لبيتنا اااااخ شجاني وطلعت صوجي ماسمعت كلامج بيبي صوجي
وداد : انت سويت الردته وراح تشوف وداد شتسوي
ناي : بقيت كاعده اباوع على الحياطين والسكف الف فكرة بالي ارفض كدام الشيخ واكول جابريني وبعدين اكول شون افشل خالو عمران فوك ميريد يساعدني هسه لويسمعني ويشيل فكرة الزواج اني انهزمت علمود شرهب تالي شرهب ترجع واني اتزوج ومن منو من مهدي الي يشوف دم سنونه وميشوفني حتى اني اكرهه واحد متعجرف وخشم يابس مكره بكد سليمه
كمت من مكاني اروح واجي رديت تعبت كعدت وراها وكفت حتى مدااعرف شريد الساعه مرت تكول دهر سمعت صوت عزه اجوي
دخلت عليه ام عبد
ام عبدالرحمن: يله بنتي لبسي شالج وتعاي
ناي : عفيه خاله والله مااريد
ام عبدالرحمن: لابكيفج ولا بكيف احد عمران أمر بلسالفه ولازم الكل يسكت يله ولتعاندين مكافي صار كم يوم البيت واكف على حيله من الطلايب
ناي : متوقعت هيج راح يصير لو ادري ولا احط رجلي عتبت بابكم
ام عبدالرحمن: ميفيد الحجي يله امشي حطي الشال
ناي : دنكت شلت الشال وحطيته على راسي وطلعت وياها جنت بلهول وهمه بغرفه الخطار اسمع اصوات اهوايه وناس تحجي كلامهم مامفهوم حيل كلمة افهمها وعشره لا
لحد ماطلع خالو عمران وكال
عمران : وين هويتج
ناي : بلغرفه
عمران : روحي جيبيها
ناي : رجعت للغرفه وجبتها وانطيتها اله رجع للصاله ونسمع اشكال اصوات ومنفرزن الحجي وره ربع ساعه طلع خالو واجانه
ام عبدالرحمن: هااا بشر شو اصواتكم علت وراها سمعت الزلم طلعت شصار
عمران : ناي انتي عمرج ١٧
ناي : اي خالو
عمران : واني عبالي عابره السن القانوني الشيخ ماقبل يعقد اله ولي امرج وكوه قنعته تالي شاف الجنسيه وطلع عمرج اصغر من ١٨ كال مترهم لازم ولي امرها شكد حاولت امشي الشغله مامشت لازم عمامج ولا ردت اشوفهم بس مجبور راح ادك على ابن عمج حتى باجر يجون ونخلص من هاي الهوسه كلها
ام عبدالرحمن: وهسه شراح يصير
عمران : الشغله تأجلت لباجر وماطول انجبرنا تتأجل ويجون عمامج اريدج ام عبد تاخذين ناي تشترين ملابس الها اريد من يجون يشوفوها مرتبه مو تعبانه هيج
ناي : عفيه خالو كلشي مااريد بس عوفني ارجع لبيتنا واذا متكدر ترجعني انتظرهم باجر وارجع وياهم
عمران : ام عبد روحي بدون ناي اخذي قطعه من ملابسها وقيسي عليه اريد شى مرتب ومستور اخذي ام صلاح ولا تتأخرين السوك مبقى شى ويعزل
ام عبدالرحمن: ماشي رايحه هسه
ناي : عفيه خالو اتوسل بيك من ايام وانت ولا تسمعني
عمران : بليل نسولف عندي شغل هسه
ناي : عافني وكعد بلهول يكتب بحسابات ومدري شنو مكدرت احجي ورجعت للغرفه بقيت هادئه واني افكر بحالي وضعي وره ساعه ونص اجت ام عبد جايبه كلابيه حلوة بيضه كلها شغل ذهبي جانت كلش راقية ومبينه غاليه كالت البسيها حتى اذا بيها گبر نصغرها عفتها على صفحه مااريد البس شى
وهي هم مالحت ويايه اثنينا اني وياها لعبانه روحنا من الوضع ومنكدر نحجي شى
لليل اختنكت بعد مااتحمل طلعت لكيت خالو كاعد وياه مهدي هو شافني مهدي كال لخاله اني رايحه وطلع وجع روحه بلا رده شكد اكرهك همزين مبقى كاعد اشرلي خالو وكال اكعدي
عمران : شبيج تلوبين من الصبح لهسه وحتى اكل ما اكلتي
ناي : رجعني فدوة لعينك والله مااريد اتزوج
عمران : المن ترجعين
ناي : اختي وحدها هناك والله اعلم شصار بيها هسه
عمران : اختج اليوم انزفت
ناي : كمت من مكاني وردت اوكع لا عفيه لا وكمت اضرب على خدي
عمران : كافي بنتي هاي قسمتها وهذا العياط والتصرفات متفيدج
ناي : كله من وراكم لو خاليني اروح مجان اتزوجت
عمران : تتزوج غصب عنج هاي اذا مازوجوج وياها بنفس اليوم تغالطين نفسج لو تغالطين الواقع عمامج طبابين شر ولحاياهم بيد نسوانهم وسوايتج ميسكتون عليها ومابيدج تغيرين مصير اختج لهذا يابنتي سلمي امرج لله اختج واليوم بيت رجلها واذا رجعتي هسه لبيتكم راح تنداسين ومراح تغيرين شى من مستقبلها بس راح ادمرين مستقبلج
ناي : كعدت ابجي عليها واني اتخيل حالها وحدها يمه سوده بوجهي شون حالج ياشرهب وشصار بيج هجيت للحديقه اريد هوا صدري ماراضي يتنفس واني اتخيل حال شرهب باوعت للسما ومنهاره واحاجي رب العالمين ليش هيج يصير بينا طفله وينها وين الزواج فتحنا عينه بليه اب وام تالي ضاع اخونا وردت بس احافظ على اختي مردت شى حتى اختي ضاعت كمت ادك على راسي لو بيدي اشلع حتى شعري من قهري واني احجي وابجي جان واحد يكول
صلاح : ميفيد الي تسوي حتى لو حرگتج نفسج الصار صار ادعي الله يطلع زوجها واهله خوش اوادم وتنسعد وياهم
ناي : باوعت عليه واني اناشغ صغيره والله تبجي على اللكمه اذا تأخرت وتتعارك ويه ابن عمي على النستله شون تتزوج وتشيل مسؤوليه رجال
صلاح : كلمن وقدره وهذا قدرها والعليج سويتي
ناي : لا ماسويت شى اني ضيعتها لو باقين جان يمكن لكيت حل غلطت من انهزمت واخذتها عبالي الكه هنا السند تالي هنا اني وياها انكسرنا
صلاح : عمي عمران ماقصر بس احنا مع الاسف تحكمنا التقاليد والاعراف والشيوخ وهذا الضيع حق اختج مشكله الناس الكعدت بشغلتها اكثرهم يزوجون بناتهم بعمر اختج واكو بيهم متزوج الاثنين والتلث نسوان هم بعمر اختج لهذا ميطلعون عمامج غلطانين لان معناه همه هم غلط وماكو واحد يركب نفسه الغلط
امسحي دموعج وادعي الله يوفقها ويصبرها اذا طلعو مو خوش اوادم وانتي كافي رجعوني ورجعوني هنا احسنلج اذا رجعتي محد راح يرحمج
ناي : عساهم لا رحموني المن عايشه بعد
صلاح : لنفسج ولاختج هم على الاقل اذا بيوم احتاجتج تلكه السند اليحميها
ناي : هو اني هسه ماحميتها احميها واني هنا
صلاح : اي تحميها وانتي هنا عندج الرجال والعزوه والبيت اليكدر يحتضن اختج اذا اجت بيوم تحتاجج رجوعج مراح يفيدج ولا يفيدها لان همه راح يطيحون حظج ويسگطوج ابني لنفسج گيان هنا حتى بيوم متوكع اختج تلكه من يشيلها كومي ارتاحي وراج يوم طويل
ناي : مشيت شويه وكتله انت خوش انسان وشكراً لان حجيت بهدوء ويايه
صلاح : ومهدي هم خوش رجال بعدج متعرفي
ناي : اكرهه
صلاح : ههههههه وهو هم شعور متبادل مامحبه اله مابعد عداوه يبقى ابن خالج ويجي بيوم الدم يحن
ناي : عساه لا حن وعفته وطبيت للبيت
بقيت الليل كله ابجي واتخيل اختي وحالها وشكلها بدله العرس وشون راح تنام بحضن رجال غريب عنها مجفت دموعي انام من التعب واكعد على صوتها وهي تصيح نايه
صبح الصبح وجان صباحيه اختي وصباح عقدي على واحد كل الجمعني بيه موقف ازبل من الثاني بقيت افكر بكلام صلاح واني بالي شى واحد شون اتزوج مهدي شووون
صارت ساعه ١٠ الصبح وطلبت مني ام عبد اسبح وابدل واني امشي كوه سبحت ومشطت شعري وشلته كله ولبست الكلابيه طلعت على كدي بس شويه طويله مهتميت طبت ام عبد
ام عبدالرحمن: هاج بتي لبسي هاي مالحك اشتريلج اعذريني شحاطه حوراء جديده تره مالابستها هوايه
ناي : عادي خاله مو شرط شحاطه
ام عبدالرحمن: لا ميصير وهااج هذا قلم الكحل كحلي عينج
ناي : ميحتاج
ام عبدالرحمن: خلي شوفي وجهج شرح جنج وحده ميته
ناي : اخذت القلم وحطيت لعيني واجت حطت حمره على خدي وفركتها وحمره خفيفه على شفتي وبقت بس الاثر بيها
ام عبدالرحمن: اي هيج ردت الروح لوجهج هذا شال الكلابيه البسي
يمكن اجوي تعالي نطلع
ناي : باوعت على شكلي تنلام المره من تكول وحده ميته طلعت وياها وصلنا لباب الهول جان اطب صالحه وساهره اني جفلت وذني عيونهن تاكل البيت اكل مشايفات وشافن
رغم البيت مو حيل فخم بيت عادي مرتب واثاثه راقي بس الي مثل حالنا وضعنا وعيشتنا تعتبر هيج بيوت قصور بلنسبه النا مشايفين ولا راح نشوف
خير شجابكم
صالحه : يااا ولج هاي شطالعه ولا عرفتج نظفتي وصار بيج خير هاي يومين هنا وهيج حالج انگلب لو تعيشين دوم شون
ام عبدالرحمن: انتم منو
ساهره : عيني احنا نسوان عمامها وبمثابت امها وجايين نوكف وياها بيوم ملجتها وهم نسلم عليكم
ناي : لا امي ولا اعترف بيكم شتردون جايين
ام عبدالرحمن: عيب هيج تحجين وياهن
صالحه : شفتي خيه هاي كدامج لا حيه ولا خجل دوم لسانها شطوله مااكول غير يعينكم الله عليها
ام عبدالرحمن: تفضلن عيني زارتنا البركه
ناي : قصدج زارتنا المصايب
اندارت عليه وخزرتني گلت بگلبي حقج عبالج خوش نسوان متدري شكو شغله طايح حظها ذني يملكنها كعدن وبعدهن يباوعن يمنه ويسره كامت ام عبد تجيب الهن زقوم يشربنه هي كامت وذني جرني وكعدني يمهن
ساهره : والله وكعتي خوش وكعه يمصخمه بخيته من يومج
ناي : هو اني لو بخيته جان عشت وياكم اختي شسويتو بيها
صالحه : ماسوينه شى نايمه بحضن رجلها فوك ماسترناها وخلصناج منها لوما احنا مجان هسه انتي هنا
ناي : حسبي الله عليكم دمرتوني ودمرتوها
صالحه : باع العياره كل هذا الخير الانتي بيه ودمرناج بله انجبي واسكتي لو ادري سهاد هيج حال اهلها وهذا العز الراح تعيشين بيه جان ولا اخلي عبيد يقبل على هاي الزواجه انتي واختج لازم تعيشن بلخيس بلحظيظ مو وجهه نعمه
ناي : كمت من عدهن وكالت ساهره
ساهره : ولو اعرف وداد مراح تعوفج بحالج اكيد مقابله تصيرين جنتها هذا الشى مريحني متأكده راح تنغص عليج عيشتج
ناي : اني لو افهم ليش تكرهونا شمسوين الكم
صالحه : انتن بديتن ولعبتن بكيفجن اني جايزه منجن وانتن اندكيتن بيه والي يدك الباب يلاكي الجواب لا عبالج سالفه بتي انساها من وراجن اطلكت وطرحت وانكتلت وتاليها خسرت كلياتها وتردين اكعد واصفك الجن امداني اذا اسكت اني اليندك بيه احركه مو عاد اليندك بزرتي اختج وكرصتها وبعد كرصه ثاني واخذ حقي منها مربع بقيتي انتي ولو وداد راح تربيلج گلب بصف گلبج سمعي خاتون جيه لذاك البيت ماكو اذا شفتج وصلتي رچلج اكسرها
ناي : مو بكيفج اجي اشوف بيبي وعمه وبان وبلال
صالحه :لتوصلين واستري على نفسج
ناي : ردت اجاوب جان اطب ام عبد واجت مره ثانيه طلعت ام صلاح وحده ثالثه اول مره اشوفها كرايبهم ايدي على گلبي لتطب وداد وذني يصيرن حزب عليه صاحوني وكفت وره الباب وكلت عبيد واني بگلبي اكول الله ياخذج ياعار عم مابيه خير ذب بنات اخوه اليتامه ولا اهتم ومشه هو واخوه وره نسوانهم بدا العقد واني اكول ليش مااجت بيبي لو عمه شون يعوفوني نزلت دمعتي كل الناس الاكرهم والماعرفهم كاعدين بلعقد والناس الاحبهم ولا واحد موجود
وعلت صوت الهلاهل مال صالحه وساهره جنت اشوف بعيونهن الحقد والكرهه والحسد على شنو حاسداتني مااعرف
كمت وعفتهم حتى مبقيت اشوف شيصير
هسه اني مرت مهدي شرعاً
شوي وصاحوني مردت اطلع بس كالو ابن عمج يريدج عرفت مرتضى طلعت جان تكولي ام عبد يمه حطي الشال على راسج ليجي مهدي ويسويلج سالفه
ناي : اهوو حطيته وطلعت لكيت مرتضى واكف اجه وكف گبالي
مرتضى : الليل كله افكر اجي وياهم لو لا وتالي اجيت خجلان منج حيل
ناي : ليش
مرتضى : مجنت رجال وكفت بظهرج
ناي : ردتك تسند اختي
مرتضى : مكدرت والله شكد حاولت ومارهمت لو بس مامهزومه جان هواي شغلات تغيرت غلطتي من طلعتي من البيت
ناي :غلطت الشاطر بالف ودفعت ثمنها
مرتضى : مهدي خوش رجال وخاله ذهب صافي لتفكرين بلراح وعيشي حياتج
ناي : ياحياة واختي ضاعت مني
مرتضى : متضيع كولي ياالله بلكت ترتاح قابل جانت عايشه بقلعه وعز وتالي كعدت بكوخ هاي شبيج ناي هو الي يعاشر امي وخالتي اي مكان بعيد عنهن يصير جنه
ناي : ابتسمت وكتله زين تدري
مرتضى : ودريت شنو الفايده اجيت اكلج شتحتاجين اني موجود ابقى ابن عمج ولو مابيه خير بس احسن من ماكو
ناي : انت الخير والبركه الله يحفظك عينك على شرهب فدوة
مرتضى : ان شاء الله بلخير عليج والبركه
ناي : الله يبارك بيك
عافني وراح جان حيل مقهور
درت وجهي ودخلت لكيت ذني المسمومات كاعدات ياكلن مثل المشوهات صبو الاكل وهنه منطلقات كون اكل بفاتحتجن شكد مقرفات
طبيت وركعت باب الغرفه وافكر بشرهب شصار بيها وشونه حالها
شرهب :بعد ماام عزيز لعبت بحالي وخيطتني وخلت عياطي يوصل لسابع جار ضربتني ابره مسكن تعبت من العياط والبجي ويه المسكن نمت للصبح كعدت على بوسات بخدي تمنيت افتح عيوني والكه كل هذا كابوس وانتهى وراح اكعد على صوت اختي وهوسه بلال ركزت بلصوت وفتحت عيني وشفتها عمه بديعه كمت على كيفي وحضنتها جني بحضنتي هاي اشكيلها حالي
بان : واني مالي حضن
شرهب : تعالي حضنتها
بديعه : شونج بنتي صباحيه مباركة يمه بلخير عليج
شرهب : وين عفتوني البارحه
بديعه : الله لايوفقهن الحقيرات ماخلني اجي وكله من وره زوج المخانيث على كولت عمتي جوحي وعبيد عاطو بيه وماقبلو اجي للصبح مانايمه وگلبي نار عليج
شرهب : وشعجب خلوج تجين
بديعه : راحن لديالى
شرهب : عفيه ناي بيها شى
بان : شبيج فزيتي مابيها اليوم العقد مالتها
شرهب : منو راح يعقد عليها لتكولون مهدي
بديعه : اي ابن فوزي
شرهب : يعني عبد ماقبل
بديعه : اني مثل الاطرش بلزفه البارحه اجه مرتضى وكال ابو عبد مخابر وكال باجر تعالو نعقد واني ماركزت لان جنت حايره بيج الصبح من كعدت يله تذكرت كلت بلكت اروح وياهم تالي طلعو من الصبح رايحين كيفت لبست اني وبان وجبت بيبيتج بلعربانه واجيت
شرهب : بيبي هنا
بان : اي جوه
شرهب : كمت بسرعه من فراشي رغم تأذيت بس مااهتميت اريد اشوف بيبي نزلت بسرعه اركض وشفتها بلعربانه ويمها ام عدي هي شافتني وطكتها بهلهوله اني شمرت نفسي بحضن بيبي وهي كامت للمطبخ ومستمره تهلهل
عمشه : يايمه يابعد هلي وعشيرتي يبعد رويحتي البيت اظلم مايراد بليه حسچ
شرهب : شونج عموشه وابوس بيها مكيفه لان شفتها
عمشه : چاتروحلج فدوة عمشه ولدها الغمان
شرهب : اسم الله عليج بيبي بس ولدج عادي
عمشه : شون گيفج يمه
شرهب : ابتسمت بوجهه خفت اكول الها على الصار البارحه وتتأذه زينه بيبي مابيه شى
عمشه : شنهي زينه بهاي مشيتج مبينه كاصبج كصابه عساه بحضه وبخته شجاه حيوان بغل ويزاكط
بديعه : على كيفج عمه عيب امه لتسمعج
عمشه : چا وتسمعني البت طايح بيها العافيه مايشوفها لحمتها رجيچه جنهه عصفور
شرهب : بيبي مابيه شى لتخافين
عمشه : اسگتي انتي هو البخت مايل وجسرني وطحت هاي طيحتي اله اني انطيج لهيج واحد عبن اعرفن الزلمه الحوك اليصون المره من الزلمه الردي الضال جنه جعب ثور لايلعب ويه الجعاب ولا تاكله الچلاب
شرهب : ههههههه والله اشتاقيتلج واشتاقيت لسوالفج وبوستها طلعت من صدرها سوار ناعم بيه خرزه زركه هاي شنو بيبي
عمشه : هذا هديه مصباح عرسج عبن ضامه وحيد ليج وحيد لاختج
بان : واني بيبي ماكو الي واحد
عمشه : امج تجيبلج
بان : لا اريد منج
عمشه : عرسي واصوغلج
شرهب : لبسته جان خفيف بس كلش حلوو صايره زنكيه عموشه منيلج فلوس
عمشه : صايغته صار دهر وامس ذكرته
شرهب : جم مره احتاجينا فلوس وماطلعتيهن
عمشه : هذا من چد اخيج وچدي بلعتيچ لميتهن دينار دينار وصغتهن وبلعوز ماطلعتهن عبن اعرفن يجي يوم واحطهن بيدجن انه مافرحت بخوله ردت افرح بيجن وهاي الزمن فرهه عليه ومافرحت انتي خذوج سحل مني وذيج المكروده انشمرت بيد وديد بسچ يمه گلبي مورم لا اطيح واموت من القهر وبنات غنيه يفرحن
بديعه : اسم الله عليج عمه يله امشي نرجع تأخرنا
شرهب : ابقو بعد وين بلال ليش مجبتو وياكم
بديعه : خفت يسوي هوسه عفته يم الجيران
شرهب : لتكطعون عليه عفيه تعالولي
عمشه : يمه انتي لاتكطعين جبنالج صباحيتج ريوك طيب يلوك لهلوجهه الحلوو اگلي وحيدج زلمتج لاتوگلي ياگل حوو عبن أذاج
شرهب : هههههههه مااشي
بديعه : عذريني يمه ايدي فارغه طبيتلج تعرفين بحالي
شرهب : جيتج كافيه عمه اريد بس تطمنين على ناي وتجيبيلي اخبارها گلبي نار عليها
بديعه : اني شعرف اجي ابلغج
باسوني وطلعو شكد جنت متأذيه بس شوفتهم نستني كلشي
مشيت للمطبخ لكيت ماكو احد لعد ام عدي وينها سمعت صوت خبز مبين تخبز دورت على الصوت لكيتها تخبز
ام عدي : هله بجنتي
شرهب : هله عمه
ام عدي : شون صحتج صارت
شرهب : الْحٍمَدٍ للـّہ اساعدج
ام عدي : انتي عروس وميصير هسه اكمل خبز ونتريك سوه عذرينه يمه عدي طلع لشغله المفروض ميطلع بس ام عزيز كالت اله مايطخج ١٠ ايام لحد ماطيبين وهو شاش واني كتله اطلع لشغلك حتى ليسمعج حجي ويأذيج
شرهب : اني شعليه غير من وراه
ام عدي : ادري يمه بس الزلمه هيج ايام يريد مريته وصعبه عليه ايام مايجيسهه اني اعلمج كلشي مبين محد معلمج
شرهب : الله كريم كملت الخبز وكعدت وياهت نزلت ابتسام وجهالها ورجلها وكعدو تريكو ويانه زوجها ولا ارتاحيت عليه عيونه مدري شون يباوع من جوه ليجوه وسخيف بس يضحك
ام عدي : كومي يمه ارتاحي ومن يصير الغدا نصيحج
ابتسام : شعدها صاعده خلي تتعلم على البيت
ام عدي : تلحك اصعدي بتي
شرهب : صعدت فوك وباوعت على نفسي عدلت شعري وشلته بعد ماكو فتح شعر والتكمز البارحه اخذ كلشي جنت احبه وبيوم وليله تغير كلشي بيه
عدلت الغرفه وبدلت دشداشتي همزين اكو جم قطعه جديده حتى ماادري منو مشتريهم
اجوي نسوان المنطقه وخلصتها بوس وسلام جان اي فضل يجيني انطي لعمتي هي متقبل بس اني انطيهم الها شسوي بيه لحد ما صار الليل وطب عدي جنت كاعده صافنه وافكر بناي والصار بيها
عدي : شو كاعده
شرهب : هااا ويايه
عدي : لا ويه البرده طبعاً وياج هو اكو غيرج
شرهب : شتريد
عدي : من اجي تكومين تاخذين الجنطه مني وتنزعيني حذائي
شرهب : ليش ايدك بيها شى
جان يشمر الجنه واجه كعد بصفي
عدي : سوالف العناد والجهال مااحبها لا يقشمروج ويكولون الج بعدج صغيره وصغيره انتي هسه تزوجتي وصرتي مره شيريد رجلج تكوليله صار وتدلل عناد مااريد كل شغله احجيها مره من تنعاد انعنع ضلوعج مااحب المره المتسمع الكلام
شرهب : يحجي واني صافنه عليه هذا شبي داخل حامي ويهدد
عدي : مو احجي وين بالج
شرهب : وياك وياك
عدي : من احجي خلي بالج ويايه كتلج مااحب اعيد الحجايه مرتين كلشي يخصني انتي تسوي بيدج اذا لكيت ملابسي وصخه لو الغرفه احسبي يومج صار اسود اني رجال تعبان اطلع من الصبح للمدرسه وراها اروح للدروس الخصوصيه ينكسر ظهري وينبح صوتي علمود الم جم فلس للعيشه مامستعد ارجع للبيت والكه تقصير واهمال
شرهب : بس اني مااعرف كلشي
عدي : مشكلتج مو مشكلتي تعلمي من امي من ابتسام وهااااا مااريد كالت امك كالت اختك اياج حلي مشاكلج بنفسج صيري سباعيه ولتشلعين گلبي
شرهب : هزيت راسي ومحجيت شى قدم رجله
عدي : يله نزعي الحذاء
شرهب : دنكت ونزعت حذائه وطلعت الريحه الجايفه عيييع تكول فاره ميته برجلي
اخذت الجواريب وغسلتهم جوه واني ساده خشمي على ساعه اذب من راسي هذني صار شكد ممغسولات شافتني عمتي وانطتني صينيه العشا بيها كباب عروك وبتيته وبيتنجان
صعدت وحطيتها بلكاع وهو كعد ياكل تكول عنده سباق اريد الحك اكل هذا شبيهه كاام واني بقيت اكل المتبقي يمه هذا ابقى اكل وياه يگتلني الجوع اخر شى سويت ربع خبزه بيها طماطه وخيار واكلت
نزلت الصينيه وصعدت لكيته نايم يشخر همزين تمددت وافكر بناي
ناي : صار الليل وراحو عم الهدوء بلبيت صاحني خالو عمران طلعت لكيت مهدي كاعد ويهز برجله
عمران : تعالي بتي اكعدي بلخير عليج
ناي : الله يسلمك
عمران : كوم لبسها
ناي : شيلبس
عمران : الحلقات تبقين بليه حلقه
ناي : ميحتاج مااريد
مهدي : هاج البسي
ناي : انطاني العلبه وفتحتها ولبست الحلقه طلعت جبيره همزين نزعتها ورجعتها
عمران : عادي باجر يصغرها الج
هاي المده راح تبقين يمي بين منكمل شغلات العرس ونزفكم
ناي : خليني هنا خالو مااريد اروح هناك
عمران : ميصير غير يم رجلج
مهدي : الردته كله صار خالي اريد يرجع عبدو
عمران : لا ميرجع ماطول عصى كلامه وطلع من البيت ماله رجعه اله
مهدي : واني مااتزوج طول ماهو ماكو تعرف معزته عندي خلي يرجع فضت السالفه مثل متحب لخاطري خلي يرجع
ناي : بقو يسولفون عن عبدو ورجعته وخالو قافل مهتميت وردت اكوم جان يصيحني
مهدي : اوكفي عندي حجي وياج
من رخصتك خالي
ناي : طلع للحديقه وطلعت وياه وكعدنا جان اكو ميز وكراسي جنت مااكدر اباوع عليه مخنوكه موت منه
مهدي : شفتي الصار كله وشون انجبرت على الزواج واعرف انتي هم مجبوره ومنكدر بعد نغير شى خلال هاي المده راح اعوفج يم خالي مااريد اي صدامات ويه امي مشاكل حجي زايد مااريد
ناي : هي امك تكرهني اني مجايه يمها
مهدي : ميخالف من تشوفيها ابد لتحجين وياها وشتحجي اسكتي اريد باجر ترحين لبيتي جديتي تريد تشوفج
ناي : ليش عرفت بلصار
مهدي : كلشي تعرف من يوم دخلتج انتي وشرهب لحد ماعقدنا هي وضعها تعبان مكدرت تتحرك وتجيج انتي مري عليها باجر لان اني راح اخذ امي واروح لبغداد وهاي خوش فرصه حتى تشوفيها
ناي : مااريد اشوفها
مهدي : ليش
ناي : لا مابگلبها رحمه هسه تذكرتنا من اجتها بيبي تتوسل ماكسرنا خاطرها
مهدي : شوكت اجت بيبيتج
ناي : حجيتله كلشي وهو ساكت تالي كال
مهدي : انسي الفات كله انتي راح تعيشين وياها بنفس البيت
ناي : شمعنه اني اتنازل وانسى تكدر تنسى الفات
مهدي : انتي عنيده وهذا الاسلوب مااحبه راح تعيشين ويايه ويه امي والحجيه لازم تتأقلمين على الوضع لازم تنسين كلشي تعلمتي بذاك البيت
ناي :سكتت محجيت شى لان اذا احجي ابجي
مهدي : وهاااا منا وهيج الربطه متنزع انتي من اليوم محجبه
ناي :اني مااريد اتحجب عاط بيه وكال
مهدي : من اليوم انتي محجبه والتزمي بلستر والحشمه حتى كدام خالي وكدام اي رجال من اهلي مااريد بيوم اشوف خصلة شعر طالعه
ناي : الصبر يارب
مهدي : شنو عيدي ماسمعت
ناي : ماكو شى عفته وكمت
مهدي : وين ماكملت
ناي : اكو اوامر ثانيه باوع عليه مال واحد يريد يضرب واحد وكوه لازم نفسه
مهدي : ماكو شى طبي يله
ناي : طبيت وثاني يوم مارحت ولا وصلت لبيتهم عناد بيه تفاجأت بجيه حوراء وجانت فرحانه وتبوس بيه هاي البنيه شكد طيبه وحبابه ياربي
حوراء : صرتي مرت اخويه يابه من وراج البيت مشعول شعل امي مابقت شى ماكسرته
ناي : وانتي فرحانه
حوراء : اي شسوي قابل گلبي خلص احجي وياها وميفيد اني وبيبي حيل مكيفين لان صرتي مرت مهدي ورادت تشوفج
ناي : واني مااريد اشوفها وكولي الها ناي عرفت بجيه بيبي عليج مشكوره ياام امي
حوراء : لوتعرفين بيبي شكد متندمه ايام بقت تبجي وتطحن بروحها وحتى جلطه قلبيه صارت بيها بوكتها ورادت تموت
ناي : وشنو الفايده هي مرادتنا ميفيد الندم بعد
حوراء : عوفج من هاي المواضيع شوكت تعرسون
ناي : عسانا لا عرسنا
حوراء : ههههههه نفس حجايه مهدي من سألته يابه توم وجيري راح يصير بيتنا
ناي : شكد فطيره انتي
حوراء : يمعوده الدنيا متسوه واحد يطلم عليها اكلج تعالي نصعد للسطح
ناي : ليش
حوراء : طيور عبدو فوك كال اذا محطيت مي الهن لو دخن يحرگني حرك وصاني وراح وصار جم يوم اريد اجي وامي متقبل كون ماميتات اذا ماتت وحده يملص رگبتي
مثل الطيره
ناي : يله امشي صعدنا للسطح واشوف قفاص اشكال كلها طيور حييل ذني كلهن اله
حوراء : ذني ثروه عبد تردين تحرگين گلبه موتي وحده يبووو الامه تنگلب عدا عركاته ويه خالو نصهن من وره الطيور
ناي : كعدنا نحط مي الهن واكل ورتبنا كلشي ونزلنا وحوراء باستني ورجعت للبيت
بقيت ايام البيت هادئ كمت استحي ابقى بلغرفه كمت اساعد بلتنظيف وشغل البيت
رغم الراحه الاني بيها عقلي مجاي يرتاح اريد اشوف شرهب
بديعه : البيت فرغ والگلب يبجي دم على البنيات الربيتهن وتالي ضاعن مني كاعده اغسل مواعين وبان يمي هاي المسكينه دوم ساكته ومقهوره تعلمت عليهن سمعت دكت باب طلعت لكيت ولد شاب
هذا بيت ام عبيد عمشه
بديعه : اي هو
هذا الظرف الكم من الاردن
بديعه : گلبي صار هلكبره واخيراً يخوله تذكرتينا اخذت الرساله وطبيت ركض لبان
بان : شبيج ماما تركضين
بديعه : رساله من عمتج
بان : ااااااي افتحي بسرعه
بديعه : هاااج اقري لشتي كلها ترجف
بان : بديت اقرا بصوت عاالي واني ماما كل مااتعمق بلرساله نتأذه اكثر الخبلنه عمه تكول ليش متخابرون ولا تسألون جم رساله ادز وماكو جواب
بديعه : هاي عمتج شتكول
بان : كدامج تكول هاي رابع رساله منها وبكل مره تحط رقمها وماكو لا اتصال ولا رد
بديعه : يارابع هاي ثاني
بان : اي ادري ليش مستغربه وتكول وصلت للموت من المرض والتعب وهسه يله كامت على حيلها وبالها كله يمنا وبالاخص ناي وشرهب ويونس
بديعه : ماكو غير الرسايل واكعه بيد صالحه ومابلغتنا
بان : هاي فلوس بلظرف وتكول ذيج المره الدزيتهن قلال هلمره زيدتهن
بديعه : ذني البرابيك الهن ضلع بيها طلعت من المطبخ وعطت صالحه صالحه
صالحه : شكووو وجع تجوعرين
بديعه : خوله دازه گبل رسايل
صالحه : احد گلج اني ساعي البريد
بديعه : دازه وماخذتهن انتي متأكده لج ليش البنات جانن ينوحن على عمتهن بس يردن گلمة تبرد گلبهن وانتي تباوعين ومتحجين اخذي الفلوس البيهن بس على الاقل انطينا الرساله نعرف رقمها الجديد نخابرها متكوليلي ليش هيج تسوين حتى من سافرت مخلصت منج ومن شرج
صالحه : لج بدعدع تسكتين لاانزلج بلنعال اكطعه على راسج واكفه وتعدين وتصفين والله شنو ست خوله دازه رساله واني ماخذتها ليش قابل خايفه منج ومااكول
بديعه : هي دزت وكالت هاي رابع رساله وماكو رد ولا اتصال وكالت غيرت الرقم لان تغير مكانها ويه كل رساله ادز رقمها واكيد من عرفتي هيج معلومه متريدين نخابرها
صالحه : طبج مرض انتي وياها وبعد لدوخيني بخيرهم ماخيروني وبشرهم عمو عليه
بديعه : هو انتي الشر نفسه
بان : عوفيها يوم هسه شنسوي
بديعه : اطيني عباتي
بان : وين رايحه
بديعه : اشوف مرتضى وينه اخذ التلفون منه واخابر عمتج
بان : شراح تكولين الها
بديعه : كلشي
لبست وطلعت وصلت لبيت جوحي مالكيت مرتضى طلعتلي ساهره تحجي من وره خشمها ولا درت بال الها رحت للمحل مال ابوه لمحته وصحته
مرتضى : هااا عمه خيرج صاير شى
بديعه : اريد تلفونك بيه رصيد
مرتضى : البارحه عبيت المن تخابرين
بديعه : لعمتك هااك دك هذا الرقم
مرتضى : قابل بلشارع امشي بلبيت نخابرها
بديعه : رجعنا للبيت وبلحوش دك اسمع صوت الرنه واني ارجف اووف يخوله
خوله : الووو
بديعه : فدوة لهذا الصوت شونج خوخه
خوله : بدعدع كمت ابجي واخيراً سمعت صوت واحد منهم
بديعه : بقيت اسلم عليها واطمن جان صوتها تعبان
خوله : البنات شلونهن يونس حبيب عمته شلوونه
بديعه : شحجي شغله شغلتين يخوله ضاعو جهال ذكرى كل واحد بدرب وانكسرو وراج
خوله : شبيهم ولج احجي واعيط
بديعه : يونس بلسجن وشرهب تزوجت رجال اكبر منها ب١٨ سنه وناي عقدولها على ابن فوزي لج صالحه وساهره ضيعو تعبنا بليله ظلمه
صوت خوله اختفى اصيح اصيح ماكو
خوله : من سمعت هيج واني صحتي تعبانه وجنت عايشه هاي الفتره كلها على المغذيات متحملت وكعت جنت متألمه اسمع اخبار طيبه عنهم متوقعت ضاعو هيج
ما وعيت اله على مي ينضرب بوجهي ونجم يحاول يصحيني
نجم : شبيج شجاج كومي خلي اوديج للمستشفى كتلج مااطلع اليوم خليني يمج
خوله : كله منك ارتاحيت هسه
نجم : شكو شصار
خوله : جهال احبيبتك ضاعو كتلك ذني مراح يجوزن حقيرات السحر والخباثه واللئم بدمهن كتلي لا بس ترحين عنهن راح يجوزن من جهال ذكرى ارتاح ضاعو امانتها
يونس بلسجن وشرهب وناي اتزوجن وحدتهن وكعت بحفره الله اعلم شون تطلع منها
نجم : اني غير ردت مصلحتج وردت نبني نفسنا حتى نكدر نأمن مستقبل زين الهم
خوله : ولك يامستقبل ويه جوحي وعبيد ونسوانهم اكو واحد يعوف قطعة لحم ويه ذيابه جوعانه وتكول الهم لا تاكلوها خلوها امانه عدكم هيج سوينه سلمت جهال ذكرى للذيابه وهاي نتيجتها ترجعني باجر للعراق لا احرك روحي هسه
نجم : ماكو رجعه لتنسين معاملتنا مال الهجره وعدنا مقابله من كل عقلج اخليج ترجعين
خوله : انعل ابو الهجره يابو اليهاجر رجعني للعراق كتلك
نجم : مترجعين نكمل كلشي وناخذ الاقامه يله اخليج ترحين مااضيع التعب مال ذيج الاشهر كلها
خوله : ابقى انت اني من باجر رايحه
نجم : شوفي حالج وضعج كوه واكفه انتي وتردين ترحين كتلج ماكو لو اعرف اجبرج بلكوه تبقين اذا رحتي شتغيرين كملي امورج وطيبي واوكفي على حيلج وراها روحي مالي
دخل وين ترحين
خوله : كمت اعيط واتعارك وبالاخير اخذ الجواز مني وعافني الطم وحدي بلشقه ورجعت انتكست وحالتي صارت اصعب ونجم يوميه اتعارك وياه وهو معاند ميقبل ارجع
شرهب : فاتت ١٠ ايام وبديت اطيب جنت هاي الايام اسمع كلام عدي حتى متصير مشاكل ويوم سألني هاا طبتي مكدرت اكذب وكتله اي وياريت ماكلت اي رجع بليل ومثل كل يوم نزعت ملابسه وتعشه توقعت نام لكيته كاعد
عدي : تعاي يمي
شرهب : هاااا ليش
عدي : شكوو ليش مو طبتي
شرهب : اي طبت شتريد مني كااام وجرني حييل من ايدي
اريد حقي صار ايام صابر عليج عريس وحرمتيني
شرهب : عفيه عوفني مااريدك تلعب نفسي عفيه اني كتله هيج لو تخبل جرني من ايدي وشك ملابسي وسد حلكي
عدي : شكد ماتعانديني أذيج اكثر احب أذيج
عيطي وتأذي
شرهب : كاام يعضني ويضربني حييل وهو ساد حلكي جان احقر من ليله الدخله حسيته شيطان وياكل بيه ادفر بيه حييل بس اريده يوخر ماكو كمت ابجي واعيط دمرني وره ما كمل راحته دفعني حيل وشمرني بلكاع
عدي : سمعي لج كل ماتعاندين تاكلين كتل مني
وهذا لعبان النفس مني اله اتوبج منه
شرهب : بقيت بلكاع اعدل بشعري وابجي ردت اغلط عليه واكله انت حيوان خفت ليضربني لبست دشداشه ثانيه ونزلت اسحل بروحي حتى اسبح واوخر وصاخته مني نزلت على كيفي جان يصير زوج ابتسام گبالي
ايهاب : أذاج مووو
شرهب : وخرت منه وبديت انزل
ايهاب : لتوكعين
شرهب : راد يلزم ايدي وخرته شتريد
ايهاب : خايف عليج ياعيني اخاف توكعين بعدج عروس مااريدج تتأذين
شرهب : حسيت بكلامه شى موزين صحت ابتسام وينج هو ركض ونزل مدت راسها ابتسام
ابتسام : هااا شرايده
شرهب : اكو مي بلتانكي
ابتسام : اي اكو
شرهب : عفتها ونزلت شكد جبان گبر اي والله مبقى عليه بس هذا الكعيدي
ناي : كاعده العب ويه الطيور صارن سلوتي ونستي واحط الهن مي واكل واكعد اتفرج عليهن جان يعيط
عبدالرحمن: شدسووين
ناي : اووي فزيت
عبدالرحمن: اذا طيره ماكو منا اطيرج بعرضي
ناي : الْحٍمَدٍ للـّہ على سلامتك
عبدالرحمن: عوفج من سلامتي طيوري شونهن
ناي : زينات لتعيط لوما اني جان كتلهن العطش والجوع
عبدالرحمن: مو كلت لحور عليهن يابه اذا ما ادميها
ناي : هههههه لا خطيه اني كتلها ادير بالي عليهن
عبدالرحمن: كالو ادبستي
ناي : شون يعني
عبدالرحمن: صرتي مرت مهدي الحقنه
ناي : اي والله حقنه
عبدالرحمن: لك مهدي وينك مرتك تحجي عليك
ناي : يمعود اسكت العفووو وكمت اضحك وعبدو جان يبتسم ويگلب بطيوره اخاف وحده منهن بيها شى منشوف غير مهدي فوك راسي
مهدي : شعندج هنا
ناي : جنت وسكتت غير احجي اخرسيت
مهدي : انزلي جوه وهاي اخر مره الكاج فوك
عبدالرحمن: غير يمي واكفه
مهدي : شكلت اني انزلي
ناي : نزلت واني معاجبني الوضع ليش يعيط عليه قابل شمسويه
نزلت وسمعت وداد تكول لاام عبد
بس حطي هاي جوه الجربايه ومالج دخل لا اخليها تصيح الغوث ولا تتزوج مهدي اتذكرت عمه خوله والصار بيها لزمت گلبي اني مااريد اتزوج واعوف مهدي ياريت اخلص منه بس لا اصير مريضة مثل عمه واتأذه
طبيت للمطبخ وعطت بيها حرام عليج شسويت وتردين تسويلي سحر جفلن مني وعلى عيطتي نزل مهدي وعبد
منتبهت همه ورايه
ناي : انتي متخافين الله دربجن كله سحوره شوكت الله ياخذجن واخلص منجن متشوفين الله شسوه بيج واخذ رجلج منج لان انتي وحده متستاهلين واحد نظيف مثل خالي انتي وحده قذره حيوانه كلج شعوذه جان انجر وانركع بلباب وضربني مهدي حيييل على وجهي
يتبع .....