ثلاث دمعات

البارت 41

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 41 -

هلي انا البالوجع متروس
واضحك بالچذب لازم
هلي انا لون مريت
بيدي منادس الوادم 🖤

دارين.. أني قريت هيج لو أحس الدنيا أفترت بية
أريد استوعب القريتة ما أگدر باوعتلة وهو نايم
فركت رگبتي وأحس نفسي ضاق شنو أحبك وشنو
مشتاقتلك هذا الكلام شفسرة؟!

من حرگة گلبي رگعت الموبايل كل حيلي ع الميز
واحس رجفة سرت بكل جسمي أريد اطگ
اريد اسيطر ع اعصابي وما اگدر من رگعت الموبايل
هو فز من مكانة بسرعة
ناصر :- دارين

دارين :- ماتتتتتتتتت دارين وخلصت منك گلتها بصياح
ناصر :- اباوعلة گام فتح الضوة واجة لزم وجهي
شبيج حبيبتي شكو صاير شي بيج شي..؟!

نترت ايدة واتنفس من حلگي أحس انهارت أعصابي
دارين :- أياك تلزمني روح روح لحبيبتك التحبك
ومشتاقتلك
ناصر :- إنخطف لونة وگال هاي شبيج حبيبتي
تعالي أرتاحي ونامي
طيرت عيوني بغضب وحجيت بأنهيار نااااااااااااااصر

تحچي وتكول منو هاي الكحـ×××
لو هسه أهدم الدنيا ع راسك وأبنيهاااااا أحجي منو
هاي الساقطة التدزلك هيج رسايل بنص الليل
وانت رجال متزوج كلي شعندك ويااااها..

ناصر :- عليمن دتحچين بس أهدي ليش دترجفين
دارين :- ماعليك ما عسا اموت ما تعرف منو ناصر مو
تغشم نفسك شلت الموبايل من الميز وخليته بوجهة
هاك فتحة واقرة رسايل عشيقتك ليش محاجي وياها اليوم عيني مدري مرايحلها خاف انجرح خاطرها..

فتح الموبايل ركز بيه شوية فرك وجهة وهز راسه
وگال :- بس أهدي وخليني أفهمج
دارين :- باوعتلة بشراسة واقاوم دموعي ومااخليهن
ينزلن رفعت راسي بشموخ وحجيت بقوة إخفي وراها هشاشة كل الضعفاء
بطگاگ اليطگك أنت وياها ناصر أطلع برااا مداتحمل
آشوفك

ناصر :- دارين لتتخبلين وخليني أفهمج
دارين :- گتلك اطلع برا مااطيقك مااطيق اشوف وجهك
گدامي الله ياااخذني الله ياخذني واني ههههههه
ضحكت بأستهزاء ضحكة أخفي وراها هم وقهر وحسرة

اني الغشيمة عبالي أنت تختلف مو گلت مراح أكسرلج خاطر بيوم
ناصر :- ما كاسر خاطرج دارين ينكسر ضلع من ضلوعي ولا ينكسرلج خاطر

دارين :- منو هااااي گلتها واحس نقطعت انفاسي
ناصر :- صديقة وداعت عيونج
دارين :- لا تحلف بيه ما اصدگ
ناصر :- وحگ الكفل زينب صديقة
دارين :- لا والله انداريت أباوعله بتعجب ودموعي مغرغرات وأحس ألم قوي يمزق گلبي

صكيت ع اسناني وگتلة والصديقة تگول لصديقها احبك ومشتاقتلك ومااكدر بدونك ويومي مايسوى بدونك مو ناااصررررررررر ولك احجيلي شي مقنع ماريد صورتك تتشوه بنظري بررلي بشي يتصدگ

ناصر :- يابة وداعتج يمين بالله العظيم مجرد
أعتبرها صديقتي بالفترة الجنتي يم أهلج
تعرفت عليها ع النت وجنت محتاج افضفض
همومي وأشكي لأحد تعبت من الحمل التارس
صدري..

ولگيتها گدامي وما حسيت غير صرت احجيلها
عنج وجانت تواسيني وتصبرني ومعتبرها صديقة
لا أكثر ومااعرف عنها غير أسمها حتى صورتها
ما شايفها..

أستمرت صداقتنا عمق وصرنا كل يوم نسولف
البعض ونفضفض هي تحجيلي واني احجيلها
بس يمين بالله ما أعتبرها غير اخت وصديقة
هونت عليه مصاعب الأيام المضت...

يوم بعد يوم ما حسيت غير بيوم تعترفلي
بحبها الي وتگول تعودت عليك ولگيت بيك
الاتمناه وأكيد رفضتها ولان اشوفها شخص
حلو وجودة بحياتي حاولت افهمه بالهدوء..

وگتلها أنة رجال أحب مرتي وما اشوف غيرها
وخلي نبقى أصدقاء وفعلاً بقينا أصدقاء
بس كل فترة ترجع تفتح هالموضوع وياي
وأصدها بس ما ردت أخسرها ك صديقة..

ومن شفتها هيج واصلة مرحلة حتى ع مسجاتها
صرت ما اجاوب الا مرات وخففت علاقتي بيها
ماردت اجرحها واقابل المعروف بالنكران وهي
الجانت تخفف عليه ثقل الأيام ما ردت ابتعد بسرعة
شوية شوية حتى ما تتأذة

وصار كم يوم ملتهين بالبيت حتى مسجاتها
ما اشوفهن وصار الصار وعرفتي بيها انة
جنت ناوي ابتعد واطوي هالصفحة بس صار
الصار وعرفتي بالموضوع

لكن قسماً عضماً ما فديوم فكرت بيها غير
كأخت وصديقة هي او غيرها ما طول عندي
أنتي أمدة عيني اذا نظرت الغيرج وأمدة
گلبي لو نبض لغيرج..

يعني اذا هيه عدها مشاعر أتجاهي انة
شسويلها أعترف جان المفروض ما أتعمق
بصداقتي وياها بس گتلج جنت محتاج
لأي شخص بوكتها وهي صارت بوجهي ماحسيت
غير احجيلها كلشي..

دارين :- يحجي يحجي واني نار شبت بصدري
نار تمشي بأوردتي مو دم هيج أحس روحي تريد
تنفجر بداخلي قنبلة موقوتة اذا أفجرها أدمر حياتي
بدون شعور كمت اهلس بشعري واملخ بخدودي وصاكة ع سنوني وتطلع شهگاتي بدون ماابجي
اجة يريد يلزمني دفعتة وگمت وحجيت بهستيريا

دارين :- لا والله شلون تكسرلها خاطر مو خطية
خاف العينتين تنجرررح مووو واني مو مهم ما فكرت
اذا دريت شراح يصير بيه يطبني مرض اني ومشاعري اهم شي هية ومتريد تأذيها ببعدك

ناصر :- بابا لتتخبلين مو فهمتج كلشي وما جذيت بحرف واحد وهذا الموبايل عندج وتأكدي بنفسج
دارين :- فوگ شينك كواة عينك والله ربي لك
شدتحجي انت ع الاقل أحترمني احترم مشاعري
تقبل تگعد بنص الليل وتلگة واحد كاتبلي احبج
ومااكدر بدونج هاااا ترضاها ع نفسك

ناصر :- اجة قيدني من ايديني واني اكمز
ماريدة يلمسني وخر عني لا تلزمني والقرآن
احرگ روحي هسه وأخلص منك بيا عين جاي
تبررلي ع يا صخام وجه جاي تحچيلي
حضني حيل وعصرني هنا متحملت شهگت
من كل گلبي ونزلت دموعي بحرارة..

نار وتسعر بيه جمرة ومشتعلة بنص صدري
ما تنطفي لا فراگة ولا الفترة التندمت بيها
ولا كل شعور مثل شعوري هسه أحس اريد
أملخ نفسي أكسر اصيح ماريد ابقى هادئة
وضجيج العالم كله بدماغي...

وخرت منة وامسح بدموعي بباطن ايدي
والرجفة بية أحس رجليني مو گادرة اوگف عليهن
توجع الغيرة شگد ما أگول توجع قليل بحقها
انفاسي علت وصدري يرتفع وينزل وشهگاتي متتالية

ناصر :- أميرة ناصر تعالي گعدي حبيبتي أهدي
گعدني ع الجرباية وراح جاب مي واجة راد يشربني
خزرتة واخذ الكلاص شربتة كلة بلكي يطفي شوية
من ناري

دارين :- گوم اطلع برا ماريد أشوف وجهك گدامي
ناصر :- دارين أهدي مو فهمتج كلشي لا تتخبلين
دارين :- باوعتلة يحجي بهدوء وبرود واني أعصابي
فايرة شطت برودة حرگني گتلة ومنو گالك اني صاحية ترا اني مخبلة هنا ماكو عقل وأشرت ع راسي تگوم لو والله هسه أحرگ روحي

ناصر :- راد يبوس راسي دفعتة وانفاسي تسارعت
ماريد اضعف ابد عقلي وگلبي ثنينهم مااكدر احكمهن
دارين :- عوفني براحتي
ناصر :- راحتج يمي
دارين :- ترا خلگ مالي
ناصر :- أروح فدوة لليغار

اني بيا حال وناصر گاعد يتغازل وفدوة اروح واجي
گمت ركض للمطبخ اخذت سجينة من الكاونتر
اريد اهبطة حتى مايرجفني هيج بعد
دخل ورايا بخطوات سريعة شاف السجينة بيدي
بلع ريگ ويباوعلي بخوف
ناصر :- دارين حبيبي عمري ذبيها من ايدج وتعالي
رايح انام بالاستقبال ومااخليج تشوفيني ذبيها حبيبي

دارين :- رفعت السجينة مسحت بابهامي ع طرفها
الحاد وخليتها ع رگبتي اجة يركض عليه
عطت ارجع بسرعة لا اموت نفسي والله
ناصر :- دارين لا تتخبلين وذبيها من ايدج لتتاذين

دارين :- گتلك ارجع
ناصر :- راجع والله بس ذبيها گالها ورجع بخطواتة
دارين :- أطلع برا روح الهالحقيرة خل تفيدك
روح روح خاف انكسر خاطرها هالساقطة هاي
ام الزلم عااافت الدنيا كلها البشرية كلها ولحگتني عليك مو رجال متزوج شتريد منك هااا گول انت متونس عليها ومنطيها ريگ حلووو

ناصر :- وداعتج ماجذبت بحرف واحد وگتلج كلشي
بعدين بس انتي حبيبتي وأميرتي عساني متت
قبل ما افكر بغيرج تعالي حبيبتي والتريدينة يجرالج
ذبيي السجينة
دارين :- بچيت وگتلة انتي مالتي وحدي بس اني
ناصر :- اي حبيبتي بس ألج

دارين :- الية وبس محد يشاركني بيج
ناصر :- اي وداعتج
دارين :- بللت شفايفي وشهگت وكتلة تحبني اني اكثر لو هية
ناصر :- مااحبها ولا احب غيرها احبج بس الج
كل حبي بس الج محد يتقاسمة وياج
كالها وتقرب مني جريت نفس بنشلة وعطت
ارجع ارجع لتتقرب مني

ناصر :- راجع والله بس ذبيها حبيبي ختولي
دارين :- گلبي يوجعني
ناصر :- سلامة گلبج يگلبي دتعالي افهمج بهدوء
لا تأذين نفسج وتأذيني ووعد التريدينة يصيرلج
وداعت هاي عيونج الحلوة
دارين :- ذبيت السجينة ومشيت گدامة

وهو ورايا ويحجي بهدوء لتأذين نفسج حبيبتي
دخلت للغرفة گعدت ع الجرباية ولازمة ركبي
بوجع مدري شصارلي أول مرة اتأذة من ناصر من صدگ الاحساس الحسيتة بيومها صعب حيل
دخل وگعد يمي باوعت للساعة بـ٣ الفجر ..
ناصر :- حبيبتي
دارين :- لا تگول حبيبتي اني مو حبيبتك هيه حبيبتك

ناصر :- بس انتي حبيبتي وداعتج بعد مااحجي
وياها مااحتاج أحد مدام عندي انتي انتي مرتي
وحبيبتي واميرتي وصديقتي وأهلي وسندي
وعندي وجودج يغنيني عن الدنيا كلها يا غناتي

دارين :- باوعتلة بطرف عيني وكتله حجي وبس
لعد ليش تحجي وياها
ناصر :- مو گتلج مقرر مااحجي وياها بعد وابتعد
دارين :- انطيني الموبايل
ناصر :- حياتي لتغثين نفسج وباجر احجي وياها
بوجودج واكلها حتى صداقتنا انتهت
دارين :- هاي كل قوتك لا والله جيب الموبايل

ناصر :- جاب الموبايل وانطاني الموبايل
وهو يمي
دارين :- اطلع ناصر
ناصر :- ليش
دارين :- خل ارتاح واصيحلك
ناصر :- التريدينة يجرالج

طلع واني دخلت ع المحادثة هواي حاجين
قريت شويه منها واحس نفسي ضاق شلون
تتغزل بيه ومن ينشر صورة تدخلة خاص واروح
فدوة لجمالك بس ميرد ع هيج نوع من كلامها

ومرة كايلتله ليش ما ترضا بيه والله العظيم ادللك شلاگي بمرتك شو شايفة روحها ومتريدك هو
مرزلها ومهددها اذا حجت هيج بعد حتى علاقتهم
تنتهي اقرة واحس فرفحت شطت اريد اسيطر
عن نفسي ماكو شمرت الموبايل ولازمة ايدي واعض
بيها احس بداخلي صرخة لو اطلعها توصل لسابع سما ..

أنهاريت فعلياً .. خليت راسي بين رجليني
وطگيت من البجي حتى ناصر نسيتة وابجي
كل قوتي مااحس الا دخل عليه رفع راسي
وجرني لصدرة كمت اضرب بصدرة واحجي
بأنهيار ودموعي عشرة عشرة
وخر وخر عني اكرهك ماريدك

ما احس الا رفعني عن الارض ومشة بية
واني حتى صوتي شحط واحس حنجرتي مجرحة
بس اگلب بعيوني ودموعي تجري وداني للمغسلة
وگفني ولازمني بايد وايد يغسل بوجهي ويرجع
بخصلات شعري ليورة المي بارد لزمتني رجفة..

شالني وخلاني ع السرير وغطاني واجة گعد يم
راسي ويحجي ويقنع ويهدي بيه شوية من اتدفيت
حسيت روحي هدئت من ثورتها..
ناصر :- عساني متت ولا اشوفج هيج ترجفين بسببي
دارين :- ديلا اسكت ولا تحجي هيج عيوني كوة.
فتحتهن وخزرتة ضحك بخفة
ناصر :- ام لسان ما توقعتج هيج غيورة

گمت شوية هو عدل المخاد صرت نص گاعدة
ونص متمددة صافنة گدامي وايدي ع خدي
ناصر :- شبيج يرويحتي
دارين :- انت
ناصر :- باس ايدي وگال أسف يرويحة ناصر
أعترف بغلطي وحقج عليه وعساني ميت
قبل ما دمعاتج ينزلن بسببي

دارين :- اذا اريد شي هسه تسوي
ناصر :- عيوني الج
دارين :- امسح محادثاتك وياها واحضرها وامسح
الحساب وسوي غيرة واذا راسلتك من حسابك الجديد تحضرها بدون ولا كلمة
ناصر :- تم
اجة گعد يمي ومسح المحادثات ومسح الحساب وسوة غيرة وفعل البرامج كله گدامي

هدئت والرجفة راحت مني وهو كل شوية
يبوسني ويهدئني بكلامة بس لسه گلبي يوجعني
من الغيرة بعدها طفا الأضوية واجة نام يمي
انطيتة ظهري ايدة طوقت خصري والايد الثانية
يداعب بخصلات شعري واحس بانفاسة السريعة
ع بشرتي ما انطيت اي ردة فعل قويت گلبي
ومااحسيت غير داخلة بنومة عميقة ..!!

ثاني يوم حسيت ع بوسات هادئة تنطبع ع وجهي أحساسي حلو بس قاومت وماانطيت اي ردة فعل
فتحت عيوني بتلكأ والنعس بعدة بعيوني
ناصر :- صباح الخير يا الخير كلة
دارين :- هلا تعمدت اگولها ببرود ودرت وجهي

ناصر :- گومي أميرتي جهزتلج احلى ريوگ
دارين :- ماريد
ناصر :- والله صارلي ساعتين احضر يلا دبرتة
دگومي يا عيني ولا تجرحيني مشاعري رقيقة ترا
دارين :- تصنف حضرتك
ناصر :- هههههه لا حشا
دارين :- باوعتلة صفح وكتلة أكرهك
ناصر :- احبج
دارين :- غثيث
ناصر :- أموت بيج

دارين :- بداخلي شعور حلو كلماتة تغذيني وتسعدني وتخلق شعور حلو بروحي بس ماردت اعديها
بسهولة بعد اني دارين..

ناصر :- يلا اميرتي انتضرج غسلي وتعالي
دارين :- ما ردت افشلة ورة مطلع گمت
باوعت لروحي بمرايا الزاوية خدودي مشخطة
وشعري مكفش وعيوني منفوخة كل عين شكبرها
ولابسة ثوب قصير ردن صاعد ردن نازل وشفايفي
متيبسة لان اعتقد صخنت اني ونايمة منظري
ليگول جنت سجينة عد أسرائيل..

مدري اضحك مدري ابجي اخذت ملابس من الجنط
بعدني ممعزلتهن ورحت للحمام سبحت عود اليوم اول صباحية بهذا البيت وهذا منظري سبحت وطلعت مشطت وخليت مرطب بلون لشفايفي
ولبست تراكسود ورفعت شعري ذيل حصان بس
اعوج مااعرف اضبطة قبل لو امنية لو طفوف يسونة
الية تعطرت ورحت للمطبخ وايدين بجيوب التراك
ومعبسه حلگي عود زعلانة واخاف تفلت مني بسمة
وتطير الهيبة مال زعلة..

لگيتة محضر الميز واشكال الأكل عليه
بيض وكاهي وگيمر وحليب وجاي وزيتون وجبن
أبتسمت ومجان موجود بالمطبخ باوعت شفتة
شفتة يسقي بالزرعات لساتهم صغار مصار شهر
من زرعناهم عدنا حديقة صغيرة ضليت أنتضرة

شوية ودخل أبتسملي وگال :- تعالي گعدي حبيبتي
ردت اجر كرسي واگعد سبقني جان لابس تراكسود
نيلي طلع من جيب البجامة وردة حمرة صغيرة وقدمها ألية اخذتها وباس راسي.. وگال أسف يروحي من الدنيا

شگد فرحني باهتمامة بيه وبزعلي أول مرة هيج
احس نفسي غالية بالنسبة لشخص بس لسة مااگدر
ارجع طبيعية وكلما اتذكر واتذكر كلامها اموت بدمي

واحس اريد اطگ صح مخاني بس شعور الغيرة
مثل الفطرة او الغريزة ماااگدر اتجاوز هالشي ابد گعدنا ناكل وهو يحجي ويقنع و يسألني وارد ع گد الجواب أريد اسويلة جرة اذن بقيت مغندبة وأكل بهدوء وهو كل شوية يوكلني ورة مكملنا انصدمت بناصر يعزل وياية ويشيل بالأكل ويسأل هذا وين أودي وهذا وين اخلي واني كوة لامة حلگي ومااضحك..

بعدها كملنا المطبخ احنا فارشين لان شتاء
شغلت المكنسة اريد أكنس اخذها مني وبلش
يكنس واني ما ااحجي شي بس اراقبة وكاتمة
ضحكتي رحت للغرفة بقيت اعزل بالملابس
وهالاغراض، هو كمل واجة يعلگ ببدلاتة العسكرية
وملابسة واني فرحانة عليه

أحنا كأثاث وكلشي مكملين البيت وماعدنا شي بس ملابسنا نرتبهن واغراضنا الجانت ابيت عمي..صار
الظهر گال :- رايح اجيب غدة
دارين :- محاجة اني اسوي هسه
ناصر :- لا اليوم حبيبي زعلان لازم ادللـة
دارين :- سكتت ما رديت هو اخذ سويجة

وراح شوية واجة بيدة الاكل اخذتة منة ورتبتة
بصينية وگعدنا ناكل وهو كل شوية لو بايسني
لو يوكلني ويتغزل بيه أخير شي طگ گلبي مااگدر
ازعل عليه أبتسمت بوجهة بسرعة حضني

دارين :- بعد لتسويها بيه عفية والله مااتحمل
وكلما داتذكر احس گلبي يريد يوگف
ناصر :- مااعيدها وداعت عيونج هي مرة وصارت
ومتنعاد اهم شي اشوف هالضحكة الحلوة بعد
شلي بالدنيا والبيها..!!

وهيج مرت الايام بدينا نتأقلم بالبيت الجديد
ويوم الناصر خفر نبقى نحجي طول الليل
هو عبالة اخاف ابات وحدي بس مااخاف اني
اقفل البيبان والجيران داير مدايري ارتاحيت
وصفت حياتنا اني وناصر وفاتتني وحللت
وطلعت حامل الحمدلله نعم ربي تنهال عليه
وأحس احلى حياة عايشة..

أمنية...
ثاني يوم گاعدين بالجامعة ع المسطبات
اني وسما فات مهيمن من يمنا حتى بدون
ما يسلم باوعتلي سما فاتحة عيونها ع أوسعهن
من الصدمة
سما :- معقولة هذا مهيمن؟ ولج جان من يشوفج
يحير شيسوي وهسه حتى ما سلم
أمنية :- هزيت أكتافي بعدم معرفة وگتلها والله
ما أدري يلا شسويلة وتنفست بأرتياح

سما :- اي عيني عندج ابو غمرة وتباوعين لغيرة
أمنية :- ما گتيلي البارحة شصار وياچ
سما :- وديت الكيك والعصير سلم عليه سلام
عادي وبالة مو يمي يم موبايلة يراسل مدري منو
اني تعبت منة والله مستحيل يحس گالتها
وزفرت بقهر

أمنية :- يحس ان شاء الله بعدين لتشغلين بالج
بهالامور عوفيها للزمن
سما :- عليج الله غمار هم يحجي حجي حلو وياج
أمنية :- يعني من گلي احبج گالها بهدوء وبعدها
اشتغلت الرزايل
سما :- هههههه خطية أنتي
أمنية :- ههههه عادي ابقا أحبة ادري بيه ما يتحمل روحة

سما :- گومي نرجع للبيت
أمنية :- يلاااا
رجعنا للبيت وجان سجاد واگف اباب بيت اهل سما
يم سيارتة بسرعة سما گلتلي :- خرررب باعي الجمال
گلبي الفطير ما يتحمل
أمنية :- اص فضحتينا
سما :- شكلي حلو
أمنية :- توگعين الطير من السماء
سما :- لتحمين زايد

أمنية :- مو صوجج
باوعت للولد يباوع بأتجاهنا وسبحان الله
نفس نظرات غمار
سما :- يلا بيباي
أمنية :- باي.. راحت سما وقبل متدخل سلمت
عليه رد بهدوء واضح خليت ودخلت لبيتي
وسديت الباب.

دخلت صليت واكلت فتحت الموبايل تصفحت بيه
شوية وگمت بدلت حتى أروح للصيدلية... طلعت
صعدت فورتات ونزلت اتمشا للصيدلية گلبي يدگ
سريع غير عن كل مرة خجلانة مرتبكة بلعت ريگ
فتحت الباب بسرعة صارت عينة عليه نصيت
وگلت بهدوء :- السلام عليكم
غمار :- هلا

انصقعت من ردة البارد ولو المفروض مااستغرب هو هذا غمار من يوم العرفتة دخلت وبلشنا شغل تصرفاته طبيعية مثل كل يوم محجة شي هالشي فرحني ما ضوجني وخلاني اخذ راحتي صارت الساعة ٧ هيج وقت نقفل الصيدلية..

اخذت جنطتي ولبست عبايتي طبعاً البس صاية
جواها مااكدر اشتغل بالعباية واتحرك براحتي
خليت وطلعت طلع ورايا
غمار :- أنتضري
أمنية :- ليش
غمار :- متگدرين اذا متسألين
درت وجهي منة بانزعاج وضليت انتضرة قفل الصيدلية واجة بأتجاهي..

أشرلي ع سيارتة وگال :- تفضلي مدام
أمنية :- مو جنت أنسة شو هسه مدام
غمار :- غير صرتي مدامي
أمنية :- رجف گلبي من كلمتة وقشعر جسمي
ما رديت بس رفرفت برموشي بهدوء

غمار :- يلاا أصعدي
أمنية :- رديت بجدية لا غمار ماا أگدر أصعد وياك
غمار :- شنو الأختلف أول مرة تصعدين وياي.؟
أمنية :- لا بس قبل للضرورة هسه ماكو داعي
جان يسمعلي وخال ايد بجيب بنطلونة وايد
خال الجگارة بين أصابعة ويدخن..

أمنية :- يلا رايحة اني باي
غمار :- امشي صعدي
أمنية :- غمارررر
غمار :- شمر الجگارة وأشرلي ع السيارة وگال
أصعدي ولتضلين تعاندين يلا فضيني خل أوصلج
أمنية :- ماادري شنو اليخليني اثق بهالشخص
وامشي ويا عمياء يمكن حبي اله ماأدري

صعدت صعد وورث جكارة بعدها حرك السيارة
وگال :- أمنية
أمنية :- هاا گلتها ودگات گلبي مليار من قربة
غمار :- أريد أتقدملج وادري انتي راضية
فلازم اخطبج مانضل هيج
أمنية :- بس ما أگدر هسه
غمار :- شنو المتگدرين عليه؟

أمنية :- مادري احس ممستعده بس خل يخلص النصف الأول من السنة الدراسية حتىٰ أرتب أموري وأعتقد هالشي من حقي
غمار :- يصير خير
وصلني وگال :- لتضلين تسختين أقري ونامي
أمنية :- ليشششش
غمار :- نزلي لا أبتلي بيج

أمنية :- هههه ليش متحب أسئلك
غمار :- أمشي نزلي لا يشوفج احد وتطلع عليج
كلمة
أمنية :- أوك أنتبهت ع نفسي وخجلت بنفس الوكت
شبيه كاعده وأسولف بنفس الوقت حبيت نظرتة
يخاف تجيني كلمة محلوة من الناس بالرغم ماكو شي بس الناس تحب القيل والقال..

نزلت أول ما نزلت دگ موبايلي باوعت "غمار"
أمنية :- هاا
غمار :- ووجعا
أمنية :- ليش شگتلك اني
غمار :- بابا العالم ترد تگول الو هلا مو هااااا
حتىٰ ردج بيه سؤال

أمنية :- هااا گلتها وخليت ايدي ع حلگي
ورجعت گلت ااقصدي، اي
غمار :- اليوم مهيمن هم حاول يتعرضلج
أمنية :- لا
غمار :- جيد
صفنت بتعجب معقولة هو ورة تغير مهيمن المفاجئ

أمنية :- عليك الله انت السبب؟
غمار :- وعليش معصبة وتسألين لازم يهمج؟
أمنية :- لا والله ميهمني بس مستغربة
غمار :- ما دام ميهمج لتبقين تسألين
أمنية :- أوك گلتها والابتسامة شاگة حلگي
صدگ لو گالو البزون يحب خناگة

غمار :- يلا امشي كملي شغلج ولزمي كتابج واقري
أمنية :- ان شاء الله بيباي
غمار :- هله
سديتة منة وحضنت الفون بهيام ومغمضة عيوني
ماحس الا بسما ترگعني بطاوة ع راسي

أمنية :- اخخخ يابة
سما :- لج صارلي ساعة من جاية وانتي ما متتبهة
وسارحة بعالم ثاني
أمنية :- ابتسمت بوجهة بأتساع
سما :- ياا ربي صديقتي راح تتخبل تبتسم ويه
روحها سلاماً قولاً من رب رحيم

أمنية :- هههههه عابتلج شبيج
سما :- دتعالي مسوين مرگة بامية وامي ذكرتج
وگالت اخذي الج ولامنية وتعشن سوة
أمنية :- تسلم الله لا يحرمنا منها
سما :- اللهم يا رب أمين يلا تعالي صبيلنا
أمنية :- مصبين انتي
سما :- عيب خطار احترميني شوية
أمنية :- ما أعرف اطگ زيج جان طگيتلج خاااب
طيري خطار هيه امشي صبي لج خوة هيه لو نعل خل ابدل واجي الگاج مكملة كولشي يلاااااااا

سما :- ترا ذلة والله ذلة
أمنية :- ههههههه
سما :- وسم حتى سم دمشي بدلي
وأمري لله اگوم اصب احس ما يكتلني الجوع
وابقى اتوسل بيج يگولون تعب اجدامك ولا اتعب
لسانك اصب اني اشرفلي اخخخ الله ع الظالم
ربي انت دتشوف عبدتك المضلومة الللهي.. ارحمني
برحمتك التي وسعت كل شي

أمنية :- شنو هاي راح ادمع
سما :- انجبي ولا تستهزأين بمشاعري الجياشة
ربي عليك الله خلي سجاد يحبني والله ذبحني
ببرودة شوية حمي
أمنية :- شنو ربي عليك الله ههههههههه
لج سما اسكتي حبيبتي اني ادعيلج احسن
دعوتج للسگف ما وصلت

سما :- ديلا ادعيلي لعد
أمنية :- تدللين ابدل وادعيلج
سما :- انهجم بيتج ع الاساس انتي دعائج
راح يوصل لباب السماء دتحسسيني انتي
من أولياء الصالحين
أمنية :- هههههه ابدل واجي حتى الاكل برد

راحت سما تصب واني بدلت وگعدنا ناكل
اكلنا لحدما شبعنا والله فد بامية طيبة
تموت بعمري مماكلتها هيج طيبة سهمكم
العافية ان شاء الله .

طفوف...
مرت ايام واجتي ايام تشافة مهران وكفو
عنة الخطار والله كل يوم احمد ربي واشكرة
بصلاتي لان ردلي مهران سالم غانم..

حجيتله كولشي ومن حجة ويه أهله الكل گال جنا ملتهين بيك وما ندري برواحنا واني ما لحيت بالموضوع لان هو وگع من ركضت ع الدرج وجانت اعصابي منهارة وشفت حالتهم بوقتها شلون متهسترين حالهم حالي ع مهران فسكتت.

لسه من اتذكر طفلي الوگع انقهر وتصير غصة
بروحي بس وجود مهران وياي يصبرني ويقويني

جنت أدور شي حلو البسه حتى ثياب نوم ما عندي
بس دشاديش قصيرة واني كلة عمتي تجيبلي.. عاد
طلعت وحدة بلون احمر قاتم وخليت حمرة بيجية
ومشطت شعري وگعدت انتضر مهران لان خطار يمة
قررت اگولة واخذ دارين واشتري كل شي بخاطري.
كل ملابسي ع ذوق عمتي هي تجيبلي كل شي احتاجة بس عاجبني اشتري ع ذوقي هالمرة...!!

شوية ودخل مهران
مهران :- الله يساعدج بوية
طفوف :- يساعد بختك شيخنا
والله زين راحو خطارك
مهران :- لا تگولين هيج الضيوف بركة
لا تتضايقين منهم
طفوف :- ادري بركة بس مو هيج يعني
تطلع الصبح تجي بليل يستلمونك الخطار
وكل جمعة فصل لعد اني مالي حق بيك كل وكتك
الهم

مهران :- حقج عليه
طفوف :- رحت وبستة من خدة وگلت
تعال ارتاح اجة گعد گعدت يمة وبقينا
نسولف خطيه هو تعبان بس شسوي والله
اضوج محد يحجي وياي غيرة حسيته نعس
فدنوب عاد گمت طفيت الأضوية.

فتحلي ايدينة رحت بحضنة ودافنة راسي
بصدرة حسيت بحرارة شفايفة وهي تطبع
قبلة جوة شحمة أذني قشعر بدني ورخت
أعصابي.. باسني بأماكن متفرقة بوجهي ورگبتي

لمساتة الحنونة همساتة المرهفة كلماتة الرائعة
ضعت بين ايدينة اخذني لعالمة عالم بي بس اني
وهو عيشني ليلة بنكهة خاصة ولهفة مستهامة
وحب عظيم..

ثاني يوم حجيت وياه حتى اروح للسوگ مگال
شي بس گال احد جبير يروح وياجن وافقت
انطاني مبلغ زين خابرت دارين مگالت اصلا كيفت
وگالت اگول العمتي ونجي ناخذج ونروح للسوگ
طبعاً اول منزلو دارين وناصر ابيتهم مهران من غير ما اگولة جاب هدية الهم ثمينة وحلوة ورحنالهم اني ومهران وبشير

صدگ خلصت شغلي ومهران بشغلة صار الظهر
حضرت نفسي وشوية وخابرتني دارين گالت
احنا بالباب طلعينا لبست عبايتي وطلعت الكل
جانو بغرفهم طلعت صعدت وياهم بتكسي تسالمنا
ومن وصلنا للسوگ مااخليت مااشتريته هوايا
اشتريت اشياء حتى عجبتني سبحة تخبل اخذتها
لمهران وغلفتها كولشي احتاجة وبخاطري اشتريتة.

قبل منطلع من السوگ تهامست ويه دارين وگتلها
اشك بروحي حامل
دارين :- خل ناخذلج تحليل منزلي
وشوفي
طفوف :- شنو هذا منزلي
دارين :- شگد ثوله دخل ناخذ ومن ترجعين افهمج
عليه
طفوف :- ماشي

مرينا ع الصيدلية وخطية مرت عمي ابد محجت
ولا شكت بالعكس كولش اريحية بالطلعة بعدها
رجعوني للبيت وراحو لبيتهم باوعت للعلاليگ
كومة شيشيلهن دخلناهم اني ودارين للطارمة وهسه
شون عاد همزين طلع مجتبى گتلة يساعدني خطية
مگال، شي ساعدني واخذناهم فوگ

باوعت للأغراض وفرحانة بيهم ومتحمسة اسوي
التحليل انتضرت دارين گالت من اوصل للبيت اخابرج عاد فترة وخابرتني فهمتني وگمت سويتة
اباوعلة بسرعة طلع خط احمر واضح ورة شوية
طلع خط احمر بس خفيف.

صورتة لدارين ودزيتة
دارين :- حامل مبروك
طفوف :- صدگ دارين خاف ممضبوط
دارين :- وداعتج مضبوط اني سويته طلع خطين ومن رحت حللت بالدم هم طلع نفس النتيجة
طفوف :- انترست فرح سديته من دارين
وافتر بالغرفة وايدي ع بطني اتلمسها مثل
الممصدگة بقيت ادعي كون يطلع صدگ حمل وما تنكسر لهفتي.

صار المغرب واني بفرحتي نزلت جوة بعدني
توني دخلت للمطبخ ومااحس الا بخنساء
وسهاد أكلني بگشوري
سهاد :- تفرفر ونايمة المسعده وتريد احنا
نخدمها همزين نزلتي من عشج الملكي والله
طفوف :- ترا خلصت شغلي ورحت للسوگ
وهاي اول مرة شوكت طالعة اني

خنساء :- تنجبين ومتراددين مو خدم عندج احنا
مفتهمة السالفة بالمگلوب حضرتج ترا انتي الخدامة
هنا مو احنا
طفوف :- اني مرت الشيخ مهران واعتقد انتي حالج
من حالي چنة فميحقلج تفكين حلگج وياي
خنساء :- انلصمي بنت الفلاليح لو بيج خير ما جنتي
تخدمين ببيت الشيخ
طفوف :- مشتغلة بشرفي وأفتخر وكافي كلمرة
تعيدين هالكلام ما تملين انتي

سهاد :- كافي انلصمي وتعالي شيلي هاي القنينة
خليها بالترك حتى أخبز
طفوف :- خفت تجبرني اشيلها فحجيت بسرعة
اني حامل ما أگدر
خنساء :- يمة يمة بزون كليوم حبلانة ذاك اليوم
طرحتي بيج دودة
طفوف :- احترمي نفسج يا حقيرة يا عديمة الأخلاق

خنساء :- لج هااي عليمن هيج تحجين گالتها ووجهة
احتقن بلون احمر
طفوف :- عليج ووخري عن طريقي خل اشوف شغلي
خنساء :- جرتني من شعري وگالت اعرفي تحجين
من تحجين وية اسيادج ماماتي

زهگت فدنوب ودفعتها وسهاد تتفرج بمتعة مااحس
الا خنساء تدفعني شگد ماعدها قوة مگدرت اتوازن
ووگعت ع ظهري ليورة صرخت بوجع ولزمت بطني
واتأوة من الوجع وماحسيت غير بحرارة الدم النزل عليه..!!

يتبع...