#سنيسفيورم 🌹
بقلم محمد مالك
الحلقة / 40 والاخيرة 🔥
_________________
تلفونه كان يرن صامت جنبه
اكثر من 10 مرات اتصالات وراء بعض
واسامة سارح ميندريش عليه..غمض عيونه ورقد
علي: ميردش يا راجل ليل
عبد الرحمن..بعصبية : كيف روحت لطرابلس اليوم المراة كيف بدت تتحسن يجي الامن العام يرفعوه من الحوش الولد علاش !
علي: اشبح شن مداير ولدك من عملة ومن قالك اسامة الي خلاهم يرفعوه بكل !؟
عبد الرحمن: قالي اسامة لما طلعوه
علي: به اسامة شني ؟! مفهمتش خيره اسامة ؟!
عبد الرحمن: فيه حاجة صايرة لالالا الولد كان هارب من الحوش مريم قتلي حطني ف حوش فرج وقالي مش فاضي لما سمع ب امه روحت جا للحوش وكان تصرفاته مش طبيعية
علي: خلاااص وضحت ولدك دار حاجة ل اسامة وبلغ فيه ورفعوه وكملت
عبد الرحمن..بصوت عالي: غيررر شن دار توا بعد شهور وسكرناها القصة
علي: الله اعلم مفيش احتمال غير هكي ومعاش تعيط ليل
عبد الرحمن..وقف : بنمشي ل اسامة اني لازم نفهم ضروري !
علي..شده : ساعة 1 الليل راه !! متمشيش توا غير بتتعارك انتا وياه
عبد الرحمن: كيف بيقعد ولدي فالحبس اليوم يعني !
علي: شن بيصيرله ! الصبح اني وياك نمشو علي الاقل اني يتكلم معاي انتا ميحبكش ومش حتاخد منه معلومة
عبد الرحمن..تنهد: استغفر الله العظيم من مشكلة ل مشكلة حريقة المحل الي دارها ربيع وجا يهدد فيا وحرقلي سياراتي وضرب ولدي ف رجله وخدى فلوس بعدين المراة سحروها الله لا تربحهم
علي: سحر رسمي طلع !؟
عبد الرحمن : ايه الشيخ الي مشيناله قال سحر وعالجه توا احسن ولت بهلبا
علي: الحمد الله
عبد الرحمن: وكيف روحت قلت اهو نحلو المشاكل طلعلي ربيع واسامة فالجديد هاده شني شن درت ف حياتي بس!
علي..ابتسم..وشاف : كليت رزق ايتام وبهدلتهم ولا نسيت !
عبد الرحمن: ايااااه علينا
علي: شن كذب غلطتنا كبيرة وكلنا تحاسبنا عليها
عبد الرحمن: شن تحاسبتو اني بس الي متبهدل !
علي:انتا جاتك ف مشاكل وحرق دم وتبهديل اني وفرج نشربو !
عبد الرحمن: شن تشربو ؟
علي: شن نشربو يعني !
عبد الرحمن..حط يده ع وجهه: من امتا الدوة هادي !
علي: سنتين مش قتلك كل حد تعاقب علي داره كان مش مشكلة جاه ابتلاء زي الشرب توا !
ان الله يمهل ولا يهمل !
الساعة 10 صبآحا
اسامة..تحرك وهوا راقد فتح عيونه وهوا يتالم !
بلقيس..خاشه بسفرة : صباح الخير كنت حنوضك
اسامة: صباح الخير شن هاده
بلقيس..قعمزت جنبه : درتلك فطور
اسامة..ابتسم: ساعة كم !
بلقيس: العشرة ممكن
اسامة: استغفر الله كيف منضتش الفجر مدرتش منبه شكلي
بلقيس:عادي راحة كيف حتمشي الجامع بحالتك هادي اصلا !
اسامة: تعرفي صلاة الفجر بذات عليها اجر عظيم اني تنوض من نومك تصلي ولا تمشي لجامع والدنيا قاعدة ظلام كل خطوة تمشيها تاخد عليها اجر !
بلقيس..توكل فيه
اسامة: راسي صداع بكل
بلقيس: امك تستنا فيك
اسامة: علاش ؟
بلقيس: مش مقتنعة انك طحت وقعدت تسال فيا الصبح خليتني نكذب علاش متقولش وخلاص ؟!
اسامة: لالا شن نقولهم توا غير يقعدو راعشين عليا علاش نخوف فيهم
بلقيس: دير الي يريحك
اسامة: هاتي تلفوني جنبك
بلقيس..تلفتت ..ومدت تلفون
اسامة..عقد حواجبه : خيره هادي
بلقيس: من هوا !
اسامة: علي متصل بيا هلبا فالليل امس
بلقيس: مش حنرتاحو يعني !
اسامة:ساعديني نوقف
بلقيس..حولت السفرة ووقفت اسامة سند روحه عليها
توضاء وصلى الصبح
كان بيتصل ب علي
سمع الباب يطق
تهاني..طالعة بتفتح
اسامة: استني امي توا نشوف اني!
تهاني: حد جايك ؟!
اسامة: ايه
تهاني خشت المطبخ
اسامة ..طلع فتح باب الخارجي
عبد الرحمن: ترا احكيلنا شن المشكلة
اسامة..طلع وسكر الباب وراءه مش محدش يشوف
علي: اصبر يا راجل كيف الحال يا اسامة
اسامة: الحمد الله ايه شن سبب الزيارة
عبد الرحمن: مش خديت فلوسك شن تبي مني انتاا مزال
علي: اسكت يا عبد الرحمن شوية تربح ان شاء لاباس شن العكاز هاده !
اسامة: هاده ربيع
عبد الرحمن: خيره ربيع خيره !
اسامة..رفع تيشرته وشافو بطنه
علي:شن صاار !
اسامة: طالع من جامع ضربني بالموس ف رجلي و بطني ع اساس مغطي وجهه لكن ربي فضحه
عبد الرحمن ساكت ومش مستوعب
علي: شفت توا يا عبد الرحمن طلع ولدك سبب المشاكل !
عبد الرحمن..خبط ع مرش سيارة بقوة لن كسره
علي..شده: خيرك شن صارلك !
عبد الرحمن..تلفت بعصبية: به من الي رفعوه ربيع امس !
اسامة: من الامن رفعوه
عبد الرحمن..ياشر بصبعه ع وجهه اسامة: بتمشي تسكره المحضر ولا شن هوا واطلعه فاهم !
اسامة: نزل صبعك خير ما يرفعوك حتا انتا الملف قاعد راهو !
عبد الرحمن: خلاص احبسني وطلعه
اسامة:مش مطلعه وبرا خير ما تقعدو الزوز فالحبس توا منفعتش معاكم الدوة بالك الحبس يخليه راجل
عبد الرحمن..بيتهجم ع اسامة
شده علي ..يحاول يهديه: غير خيرك حتا كان بتنحل المشكلة مش هكي !!
اسامة: تي تعرف توا دير ف روحك متعفلق ولدك كانت نهايته رصاصة برا ادعي للشيخ انه بدى الموضوع حبس بس
عبد الرحمن..يعيط لن وجهه احمر : تهدد فيا بتقتله ولا كيف
علي:خيرك بدل ما نحاولو ينحل الوضع بهدوء وتفاهم تبيه يكبر وين عقلك شن صايرلك !!
عبد الرحمن: الولد اعلم الله بحاله محبوس وتقولي شن صايرلي !
علي: مش حتنحل هكي
اسامة: قصدك جاي تبي ترضيني ونتنازل ! والله ما صارت
عبد الرحمن...بعصبية: شوف شوف كيف يستفز فيا
علي: شن حاصل بين زوز صغار اني اكبر انتا وياه يا عبد الرحمن ولدك غالط كيف يضربه بموس كيف كان قتله !
عبد الرحمن: ياريته قتله واستريحنا
اسامة..غمض عيونه وتنهد : هيا روح من اهنى
علي:اسامة
اسامة: لا اسامة لا واحد هيا حتا انتا معاه منبيش نشوف حد !!
جهاد..يسخن ف سيارة قدام الحوش ..نزل من سيارة :صباح الخير
اسامة: صباح الخير
علي..بصوت خفيف ل عبد الرحمن:انتا اسكت اني نتكلم
جهاد: شني ؟ ..يقصد ع عبد الرحمن وعلي
اسامة: لالا مية مية
عبد الرحمن: تبي فلوس !؟
اسامة:مش قتلك برا من اهنى
علي:غير ي اسامة نبو نتكلمو توا
اسامة: منبيش فلوس منبيش شئ وولدك بيقعد فالحبس
عبد الرحمن: تمام ولدي توا نزبط كيف نطلعه اني
اسامة: برا طلعه وخش بدله
عبد الرحمن ركب سيارته ومشى يجري
علي: تحبس ولد عمك يا راجل
اسامة: معنديش عمام اني تتفكر وقت جيت للحوش وخشيت داخل قتلك امتا توفو عمامي ولا ! فاليوم الي مات فيه بوي معاش عندي حد اني انسان مقطوع من شجرة غير الناس الي فالحوش داخل..اشر ع حوشهم...ما عندي واحد
علي:ما عندي ما نقول الا ربي يهديك
اسامة: امين يارب قريب متت ويبي نطلعه حق صحه وجهه عنده
علي..طلع
واسامة خش متعفلق وجوه مينفعش !
________________
عثمان..فتح الباب :اوووو فدو
فادية..حضناته: عمو
عثمان: خشى داخل الصغار نايضين يفطرو
خشت فادية
عثمان:شن الجو !
ايهاب: الحمد الله
عثمان: اسمع امس كله نفكر
ايهاب: ان شاء الله خير
عثمان: انتا الشقة رافضها ع خاطر امك الله يرحمها !
ايهاب..سكت شوية وتلفت: فوته الموضوع
عثمان: به علاش مداير لروحك هكي التبهديل هاده بتقعد فسيارة معقولة وفمحل ! تي شباب ف عمرك يتزوجو علاش متتزوجش !
ايهاب:نتزوج تي حتا عيلة مفيش يمشو يطلبو البنت
عثمان..خبط ع صدره: فيه عيلة وفيه من يمشي يخطبلك غير قول انتا بس
ايهاب: منحبش ندوي فيهم مواضيع هادي سكرهم
عثمان: مش مسكرهم وبتقعد فالشقة وتمت الدوة خلاص !
ايهاب..تنهد: تعرف كنت حاصل ف اسامة بديت حاصل حتا فيك
عثمان: هههههههه حقا وينه مغيب
ايهاب: ضاربينه بموس
عثمان: موس ! ان شاء الله ما صارله شئ
ايهاب: لالا زي الحصان ميصيرله شئ
عثمان: به الحمد الله معناها توا لازم نتصلو نسالو عليه
ايهاب: بعدين اتصل بيه شوفه
عثمان: شوية ونتصل بيه
_________________
عبد الرحمن قعد يدور يشوف ف ولده كلم معارفه ومفيش فائدة عرف انه يستنا الاسبوع الجاي محكمة ولده
روح للحوش وهوا مهموم
لقى فرج يستنا فيه فالحوش
فرج: شن صار يا عبد الرحمن
..مريم خشت الصالون هيا وفتون
عبد الرحمن: دولة من غير قانون سبحان الله ف ولدي بدى فيه قانون حتا بالرشوة مش عاجبهم !
فرج: به شن عرفت منهم !
عبد الرحمن: محكمة اسبوع جاي قالو متفهمش منه شئ وهما قريب يضربك حتا بتدوي معاه متعرفش
مريم: علاش حابسينه !
عبد الرحمن: ****** غبي لانه علاش ماشي ضارب اسامة بموس !
مريم..حطت يدها ع فمها بصدمة
فتون تبكي: متخليش وليدي فالحبس يا عبد الرحمن متخليشي !
مريم..طلعت تجري من الدار !
فرج: لا حول ولا قوة الا بالله عليا العظيم
عبد الرحمن متوتر وشاد راسه بين ايديه !
مريم..خشت ل دارها وتبكي
وجعها اسامة ! لانها تحبه !
وجعها ربيع لانه خوها !
فتحت تلفونها وتتصل ب اسامة كان همها تتطمن عليه اكثر من انها تكلمه بموضوع ربيع !
اسامة لما شاف ان مريم تتصل كان مش حيرد بس تفكر ديما طيبتها معاه والانسانة الوحيدة المختلفة ف عيلة عبد الرحمن رد ع المكالمة
مريم..واضح من صوتها انها تبكي : اسامة ! حالك كويس
اسامة..عقد حواجبه متوقعهاش بكل :الحمد الله حالي خيرك صوتك تبكي شكلك !
مريم: لالا اتصلت نطمن عليك بس !
اسامة: الحمد الله حالي انتي كيف حالك وحال علاجك معاش سمعت عليك شئ !
مريم..تنهدت براحه: كملت علاج الحمد الله عندي كشف بعد شهر بس
اسامة: به الحمد الله
مريم: اسامة عارفة الطلب ثقيل عليك ! وثقيل هلبا مش حتا شوية لانه ربيع الي داره ليك محدش يتحمله بس بابا يحبه حتا اكثر مني وممكن يتصرف بشئ طائش وماما تعبانه تعبانه بشكل غريب لو تشوفها متصدقش انها نفس الانسانة كيف ضعفت وملامحها تغيرو ف سنة وحدة كبرت عشرين سنة لو ربيع نحبس اني عارفة حنخسر ماما و بابا صح بابا خنبك وغلط معاك واني مش راضية عالشئ هاده وعاركت عالشئ هاده
اسامة..ساكت ويسمع
مريم: فالاخير بابا وماما مهما كانو سيئين وعندهم اخطاء منقدرش نبدلهم وخوي الوحيد ربيع تقدر تنهي الموضوع واطلعه لو تقول يطلع يديرلك مشاكل ثاني اني متاكدة بابا مرة هادي بعد ما حس انه بيفقده وبينحبس حيتربا ومعاش يفكر انه يخليه يغلط ثاني !
اسامة..تنهد: خوك ميستاهلش يا مريم
مريم: عارفة والله عارفة بس ماما يا اسامة والله حتزيد تمرض !
اسامة: تمام توا نفكر وبعدين ساهل !
مريم..ابتسمت: اني عارفة انك حتخليه يطلع ! لانك ديما تقابل السئية بالحسنة من زمان ..منعطلش عليك باي
اسامة: مع سلامة
سكر الخط وتنهد وحط ايديه ع وجهه
توا ربيع يستااهل يطلع !بعد الي داره ! معا انه انسان حقود حرقلي محلي بدون سبب !وهوا سبب المشاكل الي صارت كلها علاش نسامحه ! اني نبي نستريح علاش نسامحه علاش !
_______________
اية: كم نتيجتك !
سفيان:92% شن رايك
اية: غريبة الحق غشيت فالامتحانات اكيدة !
سفيان: والله ما صارت امالا انتي قلتي بتخشي طب هاده علاش !
اية: به وكان بنخش طب مفهمتش
سفيان: قريت مش نجيب مجموع ونخش طب حتا اني !
اية..ابتسمت: يعني بتخش طب ع خاطر بنخش اني طب !؟
سفيان: ايه حتا شريت حاجة وبنمشي بيها اول يوم
اية: شن شريت !
سفيان: اصبري نبعتلك صورة !
اية: نستنا فيك
سفيان..لبس بالطو ابيض وصور بيه وبعت الصورة
اية: محلااااه كم خديته
سفيان: مش مهم شن رايك بنمشي بيه اول يوم !
اية: هههههههههه لااااا رد بالك اول يوم تمشي بيه بيضحكو عليك
سفيان: علاش مش بنقرو طب وحاجات ولا
اية: لاااااا يضحكو عليك من اول يوم ماشي بيه ههههههههههههه
سفيان: عادي مش مهم توا انتي اكيد بتخشى طب !
اية: ان شاء الله ايه
سفيان: راهو خشيت ع خاطرك اني نفهم بالسيف يعني بتشرحيلي وتساعديني
اية: غير نقرا لروحي
سفيان: خشيت ع خاطرك اني
اية: محدش قالك هههههههههه
مهمآ عظم كبرياء القلب .
لابد ان ينحني لمن أحبه بصدق !🤍
_______
ايهاب اتصل ب اسامة قاله اني برا
اسامة طلع لقى عثمان معاه !
عثمان: الحمد الله ع سلامتك
اسامة: الله يسلمك
ايهاب: شن جوك توا
اسامة: الحمد الله
ايهاب: شن صار فيه قلت بتفتح محضر !
اسامة: تي موضوع بكل فتحت محضر وخدوه امس
عثمان: يستاهل التاعب هاده
ايهاب: منحباش من قبل اصلا
اسامة: بنلغيه المحضر !
ايهاب..ب استغراب: نعم ! نخبطت ع راسك امس !
اسامة: فكرت فيها يا راجل وكلموني بنطلعه وخلاص وامه مريضة
ايهاب: تي هادو بهدلوك زمان يا راجل وتبي اديرلهم خير !
اسامة: عارف اقسم بالله نكرهم منحبش حتا نتكلم عليهم لكن الحمد الله فالتبهديل الي صارلي تعرفت عليك اعتمدت ع روحي وخدمت هادي حاجة وثاني حاجة قابل السيئة بالحسنة قالك كل حد يدير ب اصله
ايهاب: لالا رسمي هاده يا عثمان شكله نخبط ع راسه امس ..فيه حد ضربك !
عثمان: لا والله عجبني الي بيديره حتا فمشاكل وكل شئ فالاخير ولد عمهم الزوز نفس القب عندهم وقبلها ابهاتهم كانو خوت صحه ليك عجبتني
درست سيارة ليث
اسامة..شافها تنهد !لانه مقالش ل ايهاب مزال
طق الباب
جهاد..فتحله : شن جاي تبي !
ليث..مسح ع وجهه بيده : بنقعد اليوم وغدوا بنسافر معا الولاد
جهاد: برا دور وين تقعد اهنى مفيش
ليث: خيرك تعاند يا راجل
جهاد: لالا انتا عارف علي شن تربينا! تاكل تراب ولا تاكل بالحرام !
ليث: شن مش حتخليني !
جهاد: بزبط
ليث..شافله وركب سيارته قعد مقعمز ف سيارة قدام الحوش !
ايهاب: جيران الجدد هادو !؟
اسامة: ايه
ايهاب: شكله متعاركين بين بعضهم
عثمان: دخلنا فيهم احنى
اسامة: هي نخش شوية ونمشو نلغو المحضر
ايهاب: غلطة اقسم بالله غلطة حديرها !
تلفون يرن
كانت مريم
اسامة..رد : ايوا
مريم: شن قلت اسامة
اسامة: اهو بنمشي نلغيه
مريم..ابتسمت: والله عرفت انك حدير هكي شكرا شكرا نمشي نفرح ماما تعبانة بالك تتحسن بالخبر
اسامة: تمام
سكر المكالمة
وهوا بيخش
درست سيارة عبد الرحمن !
ايهاب..تلفت..من السيارة الي خشت بسرعة هكي !
جهاد..فالجنان : معنديش خو ياكل فالحرام اني !
ساجدة: يعني تخليه فالسيارة قال اليوم بس هوا !
جهاد..بعصبية: معاش تدوي معاي تم الموضوع
ساجدة..شداته: خوك يا جهاد راه غلط لازم نوقفو معاه !
جهاد: ساجدة توا بنبدا ندوي بالصيني راه !
عبد الرحمن..نزل من سيارته وف يده مسدس !
عثمان..وخر طول اول ماشاف المسدس ف يد عبد الرحمن !
جهاد..سمع الدوشة طلع يحسابه ليث السبب !
اسامة..:غير نزل سلاحك عقلك يخدم ضدك شكله !
عبد الرحمن: بتحبسني ! احبس الولد بيطلع اليوم !
ايهاب..وقف قدام اسامة: تي قتلك مينفعش فيهم خير ذيل الكلب يقعد اعوج طول عمره !
عبد الرحمن..بعصاب: حول من قدامه
ايهاب: مش محول بتضرب اضرب هي !
اسامة..جبد ايهاب وراءه: حول من قدامي متوقفش مقابل السلاح !
جهاد..شاف السلاح : غير صلي ع النبي يا خوي
عبد الرحمن. بعصبية: مني انتاا ! دوة مش معاك ارجع حوشك !
اسامة: فوته يا جهاد توا نتفاهم معاه !
عبد الرحمن:هيا بتمشي معاي ! ولا تكلم بتلفون طلع ربيع !
اسامة: قبل بنطلعه توا مش مطلعه
عثمان..بصوت خفيف: طلعه يا راجل مش قلت بطلعه متشوفش سلاحه ف ايده !
عبد الرحمن: والله نقتلك كان ميطلعش
جهاد..وقف قدام عبد الرحمن..ويقرب منه بشوية: نزل سلاحك اني منزبطكش وانتا متزبطنيش نزل سلاحك !
عبد الرحمن: نضررب راه !! ..كان بيضرب لانه جهاد خدى خطوة زيادة !
ليث..شد المسدس بيديه الزوز وضرب عبد الرحمن ..وقعد يتعارك معاه !!
ايهاب و جهاد يجرو بيساعدو ليث ويفكو السلاح !
سمعو صوت الطلقة !!
مش عارفين من ضربت !ليث ولا عبد الرحمن !
جهاد..عيط بصوت : لييث !
عبد الرحمن ..ملامح الخوف علي وجهه
ليث..يده ع بطنه
جهادد..شاف الدم من ليث !
ايهاب..ضرب عبد الرحمن وخدى السلاح !
جهاد..رفع ليث : ليييث ليييث !!
عثمان..جري ساعده وركبوه سيارة
وطلع عثمان معا جهاد
اسامة..مش مستوعب شن الي صار هكي !!
ايهاب..شاد عبد الرحمن! : شن نديرله هاده
اسامة..قاعد مصدوم
ايهاب: اساامة !!
اسامة:نعم
ايهاب: شن نديرله هاده
عبد الرحمن: كله منك يا اسامة كله منك !
اسامة: دقيقة بس
خش الجنان لقى العيلة كلها واقفة سمعو الرصاصة والدوشة
تهاني: شن صاار شن صاار !!
اسامة:اعطيني مفتاح السيارة يا بلقيس
خشت بلقيس
عمته..خديجة: غير شن صار يا ولدي
اسامة: عبد الرحمن دار مصيبة غير توا بعدين نحكيلكم
بلقيس..طلعت ومدت المفتاح ل اسامة
طلع
خدو عبد الرحمن ومشو بيه !
سلموه للامن ولحقو جهاد للمستشفي كلمهم عثمان
وصل ايهاب و اسامة
وفنفس الحظة استلم جهاد وفاة خوه ليث !!
اسامة ف لحظة هادي ! حس كل شئ ذنبه وفاة ليث هوا السبب فيها ! لانه اني بدل ما نحل المشاكل كبرتها ورديت عليهم والموضوع كل شوية يزيد يتفاقم ! توا انسان مات !! تعرف معني انسان مات ! بسبب مشكلة مليشي علاقة بيها !
جهاد..وهوا يبكي يتفكر ف لحظة وقت قاله بنقعد اليوم وغدوا بنسافر ! كانه يقصد بيسافر من الدنيا..ياريت خليته يخش الحوش كان ممكن مطلعش الشارع !! ولا ادخلنا !!
مرت ايام بسيطة
عزاء ليث
مريم..وقت سمعت ان بوها قتل شخص
وامها سمعت زادت حالتها تعبت وخشت المستشفي !
كان باقي يوم ع محكمة ربيع !
اسامة بعد ما فكر بينه وبين نفسه ! عبد الرحمن كملت حياته! جريمة قتل ! شن مزال حيدير اكثر من هكي !!
وربيع حينحبس سنين اقل شئ ! به مريم ! وامها حيتبهدلو !! الرجالة فالحبس شن حيصير فالبنات والام مريضة ! البنت شن حيصيرلها!
تنهد وطلع من عزاء الرجالة ركب سيارته
ومشى للمركز
سكر المحضر ! والشكوى بخصوص ربيع !
وطلب من صاحبه غادي يطلعه اليوم
ساعتين ممكن وطلع ربيع
وهوا مستغرب !!
دخلوه لمكتب
وكان اسامة مقعمز جنب الولد الي يعرفه فالامن
طلع الولد وخلاهم بروحهم !
ربيع: قالولي طلعت مصارش من المحكمة كيف صار ؟
اسامة: قعمز
ربيع: شن جاي بذلني !؟ ولا خديت فلوس من بوي حتا مرة هادي
اسامة: بوك فالحبس
ربيع..بعصبية: كييف
اسامة: بوك قتل ولد
ربيع..حط يديه ع وجهه: تكذب انتا !
اسامة: غير اسمع معنديش نية نكثر كلام معاك !اني سكرت المحضر ع خاطر امك واختك ! بوك قتل ولد وخو الولد مستحيل حيخليه يطلع ويرضا بفدية نبيك ادير عقلك ف راسك معندهمش غيرك زوز نساوين بروحهم ! توا الولد ساعة ويكمل اجراءتك وتطلع منبيش نشوفك ثاني ! وثاني مرة نقولك دير عقلك ف راسك ع خاطر اختك و امك !
فتح الباب وطلع
ربيع..مش مستوعب ..بوي قتل !!! بوي قتل ولد !!من الولد الي قتله !!
طلع اسامة ..ركب سيارته !
فنفس اليوم
ايهاب..نباعت استراحته
وخلص باقي الفلوس !
كان يفكر ف ابرار تخطر ع باله ديما !
بس يقول لروحه اخت صاحبك !! شن ادير يا ايهاب شن ادير !!
وبعد تفكير !! قرر انه يكون نفسه من جديد! ويقبل يقعد ف شقة صبري بس مؤقت ! يبي يرجع يخدم ويلقط وبعدها حيفكر ف موضوع ابرار اكثر !
عبد الرحمن حكمو عليه 18 سنة بتهمة قتل من الدرجة الثانية ! ( ملاحظة...تقريبا درجات القتل تكون علي كيفية الجريمة لانه مش مقصود انه يضرب وضربه وهوا يتعارك معاه مش حتكون من الدرجة الاولي بحثث عالموضوع هلبا وهاده الي قدرت نوصله الي متخرج من قانون يشرحلنا صح او لا ❤)
اسامة..رجع خدمته ! وقدر يحصل الروتين الي يتمناه ! يصلي صلاته ويخدم خدمته ويرجع الحوش مستريح يلقا عيلته تستنا فيه !
اية بدت الكلية وكان سفيان معاها ! 🤍
الاء..علاقتها معا عمر تتحسن تتدريجيا ! 🤍
خديجة بفلوس الي طلعو من حوش راجلها كانت حتاخد بيهم شقة او حوش ليها بس بعد ما بدو عيلة وحدة قررت تقعد معا بنتها ! صدقت جزء كبير من المبلغ ل راجلها والباقي عطاته ل بلقيس !
اسامة !
استنا سنة ومعاها ! خبر حمل بلقيس
واخيرا سمعه بعد سنة !
كان يستنا ف لحظة الي حلم بيها ف يده بنته !
مرو شهور الحمل !
بتقلبات بلقيس المزاجيه !
اسامة رفض انه يشوفو جنس البيبي !
زي ما فالحلم بزبط لما قتله بلقيس انتا رفضت نشوفو جنس البيبي
اسامة عنده تخوف يطلع ولد مش بنت فالاخير
ووقت سمع انها بنت طار من الفرحه !
واحلي لقطة وقت شدها بين ايديه
يدها بيضة زي الثلج ! وابتسمتها تسرح معاها !
قرب منها اسامة بهدوء : الله اكبر الله اكبر
اشهد ان لا اله الا الله اشهد ان لا اله الا الله
اشهد ان محمد رسول الله اشهد ان محمد رسول الله
حي علي الصلاة حي علي الصلاة حي علي الفلاح
حي علي الفلاح الله اكبر الله اكبر
لا اله الا الله !!
كانت نور مبتسمة وهوا ياذن
بلقيس..مبتسمة
وتهاني والبنات وراءه
يستنو ياخدو البنت منه !
اسامة: اهلين بيك نور بينا !
#سنيسفيورم
طيبة القلب وحسن النية
ومعاملة السيئة بالحسنة نهايتها حتكون خير علي الانسان
افتعال المشاكل مش حيجب الا المشاكل !
والحب الصادق ! ديما يفوز !
كل ظرف يصيرلك من معاناة ليك ف حياتك حتستفيد منه ! وتتعلم منه ! لانه الحياة تجارب ومن كل تجربة تستفيد حتا لو كانت سئية عليك !
الاخ ! مهما غلط ف حقك مهما تشوفه يدير فالغلط ! رد بالك تغلط زي جهاد وتتخلى عليه ! لا خليك وراءه !لانه خوك ! ولو صارلك شئ حيكون اول من يوقف ف ظهرك ! علي رغم مشاكلكم وفيه خوت يتفرقو وميكلموش بعضهم بشهور و اكثر بس وقت الجديات وقت اتصيرلك حاجة ارفع تلفونك وقوله وحيوقف معاك طول وكانه مصارش شئ بينكم ! علي الاقل متنساش الايام الحلوة الي تربيتو فيها معا بعض !ترقدو معا بعض تضحكو معا بعض وتفرحو معا بعض متنساش الايام هاده ! فلوس واملاك يفرقوكم عيب والله !
نهاية الحرام ! نهايتها بشعة ! ما بناء علي باطل فهوا باطل حتا لو مش خائف من الناس خاف من رب العالمين ! خاف من يوم الحساب ( لاينفع مال ولا بانون ) وغير هاده عندك علم انه يولي علي صغارك وكل حد تحبه !
شكرا لكل حد كان معانا ف رحلتنا الجميلة
حنسميكم عيلة #سنيسفيورم
ثلاثة شهور من بداية العمل الي الان استمتعت بتعليقاتكم وتفاعلكم معا الشخصيات فيه ناس هلبا مش راضية تم الاستعجال بالنهاية عارف الشئ هاده اني عندي عقدة من شئ اسمه تمطيط !الفكرة الاساسية للرواية كملت شفت مفيش داعي نطول اكثر من هكي
لو زدت اكشن كانت حتفقد حلاوتها الرواية لو زدت المشاكل نفس الشئ لو ركزنا ع حوارات وكوميديا بين الشخصيات فيه ناس حتمل افضل حل نوقفو ونختمو رحلتنا بنهاية جميلة ان شاء الله تكون
شكرا ليكم مرة ثانية استمتعت بكتابة عائلية اسامة معاكم
انتظروني
يوم الجمعة
اعلان رواية #سيانيد !
و اعلان جدول التنزيل للرواية الجديدة
تحياتي ليكم
دمتم سالمين 🤍🥀