#سنيسفيورم 🌹
بقلم محمد مالك
الحلقة الثامنة و الثلاثون / 38
__________________
درست سيارة ليث ونزل منها !
اسامة..شافه : شن الحياة اكشن وراء بعضه هادي!
مقدام: اكشن شن !
اسامة..ضربه كف ثاني: انتا اسكت
ليث..تلفت شاف اسامة كيف شاد مقدام ويشوفله: تفضل ؟!
اسامة..رخي مقدام: لا بنتفضل اني ..ومشي باتجاها
مقدام..هرب لما اسامة رخاه
ليث: غير لا يا واعر
جهاد..سمع صوت سيارة ليث درست طلع وفتح الباب لقى اسامة ماشي باتجاه خوه !
اسامة..من غير ما يتكلم طول ضربه كف بقوة !
ليث بيضرب اسامة
جهاد ضرب ليث علي راسه من وراءه!
ليث..حط يده ع راسه..وتلفت ولقى خوه الي ضربه
جهاد..شد اسامة: زي ما قتلك حنفهمو كل شئ وليث خليه عليا !
ليث..بعصاب..واستغراب: خيرك ضربتني !!
جهاد: صوتك منسمعاش خاطف بنت الناس !
ليث..توتر اهنى وقعد يشوف وساكت
جهاد..ضربه برجله: شن سكتت توا ! هادي مصيبة اديرها !! وين عقلك وين !!!
ليث:وانتا شن دخلك !
اسامة: شوف حتا الكذب مكذبش وقال مش اني !
ليث: علاش بنكذب !؟
جهاد..شد ليث من حوايجه: يا راجل عابى عليك تمشي ادير مصيبة زي هادي !! شن ندير فيك اني شن ندير فيك !!
ليث..دف جهاد: بوي انتا !
جهاد..شد ليث ثاني: اني خوك يا *****
ليث..دفه بقوة: اطلع من راسي يا راجل
ساجدة و خواتها سمعو دوشة وكلام بصوت عالي طلعو للجنان مش يسمعو بوضوح اكثر !
اسامة..شده : اسمع هما كم سؤال جاوب عليهم وبرا ع حالك شن رايك ؟!
جهاد..فرح متوقعش ممكن اسامة يرخي الموضوع بكم سؤال بس : سمعته ولا تعرف كان متجاوبش اليوم نقتلك !
ليث..شاف ل اسامة: شن تبي ؟!
اسامة: صبري وين ؟!
ليث: من صبري !
اسامة..فنص فيه: فكنا من الغباء صبري وين !
ليث: منعرفش حد اسمه صبري
اسامة..بعصاب: الي قتلتوه وينه !؟
جهاد..شاف بخوف : قتلوه !؟..شاف ل ليث وحط يديه ع راسه: قتلته !!!
ليث: ااااه تفكرته
اسامة:تكلم شن تفكرت
ليث: انتا تحكي علي صبري وبنته فادية
اسامة: ايه
ليث: نحسابك تحكي ع حد ثاني يا راجل
جهاد: علاش خاطف حد ثاني انتا !!!
ليث: صبري عظم الله لكم الاجر !
جهاد..بصوت عالي: انتااا قتلته !
ليث: شن قتلته تحسابني غبي هوا غبي صبري هاده من قاله يلعب معا الرؤوس السوداء
اسامة: الرؤوس السوداء ؟!
ليث..ابتسم: ناس كبيرة عليك متحكمين ف كل شئ شفت الفلوس الي يمشو للمصارف يخشو من الباب القدامي ويطلعو من الخلفي ياخدو فيهم الرؤوس والشعب يعاني من قلة سيولة شفت مليشيات كلها ! تحتهم ناس تسمع بيها ومتشوفهاش !
اسامة: شن دخلي بيهم اني !! من قتل صبري وعلاش خطفتو فادية !
ليث: ع حسب الي نعرفه صبري تعرف ع واحد من الرؤوس الي متحكمين بالدولار فالبلاد وبدى صاحبه ولعب معاهم قمار ! هما يلعبو بمليون ولا اثنين عندهم عادي لكن صاحبك طمع وفكر انه يربح خسر ولازم يدفع لما مدفعش سافر برا الدنيا !
جهاد: وانتا شن علاقتك بيهم منين تعرف هاده كله !
ليث: اني نخدم عندهم والبنت الي جبتها اني عرضت عليهم تقعد عندي نبي نتقرب منهم !
جهاد: كيف تعرض عليهم تاخد بنت مخطوفة ل عندك كييف ! حتقطع علاقتك بيهم
ليث: فلوووس نقولك فلوووس مليارات يصبو عندهم !! الي يقرب منهم ويبدا تحتهم يدير فلوس !! انتا مليكش علاقة بيا بنتقرب منهم واحد يدير لروحه حاجة فالدنيا هادي!
جهاد: وكان تنحبس !!
ليث: ننحبس ؟ هما القانون فالبلاد وكله الي تشوف فيه فالاعلام تحتهم يخدمو
اسامة: متاكد من كلامك ومش طايح تحكي ف مسلسل متفرج عليه!
ليث: هههههههه هما تقول مسلسل اصلا نعطيك فكرة قنينة ! رد بالك تقربهم ! تلقا روحك مفقود ومحدش عارفك وين ويسمعو بيك بعد كم سنة مدفون ف مكان هاده كان لقوك !
اسامة..توتر لانه واضح انهم حاجة قوية من لما فيه ناس اتبع فيهم كانت وراءهم خطوة بخطوة ونظام يعني مش ناس ساهلة !
جهاد: انتا عارفهم يقتلو ف ناس وقاعد تخدم فيهم !
ليث: انتا مش فاهم لو قدرت ناخد مكان جنبهم نولي فلوس يا جهاد نولي باور ( قوة) فالبلاد حاجات هادي مش حتفهمها انتا
جهاد..تنهد: يعني مش حتسيبهم ؟
ليث: ايه
جهاد: معاش تجي للحوش ثاني !
ليث..عقد حواجبه: غير وين بنقعد ! شن تقول !
جهاد: برا الي تخدم فيهم يخلوك عندهم اني عندي بنات مش حنخليك معاهم وادير مصيبة ثانية !
..خش الحوش وسكر الباب
ليث: كله منك انتا
اسامة..شافله ومردش عليه !..ومشى لحوشه
ليث..يتكلم معا روحه: كيف عرفو !؟ اني خاطف البنت كنت ؟ زعما ساجدة فهمت ؟
فنفس الوقت الي كان اسامة يتكلم معا ليث فيه !
مقدام هرب يجري
كان ربيع يستنا فيه مدرس سيارته بمسافة ع حوش اسامة
مقدام ركب السيارة ! ..داهش
ربيع..استغرب: خيرك تجري تقول هارب !
مقدام: اصلا اني هربت من اسامة
ربيع..بعصبية: يا غبي !! قصدك فهم !!
مقدام: ايه خدى بطاقتي الشخصية وقرى اسم بوي واني قتله اسم ثاني عرف انه نكذب !!
ربيع..يخبط ف سيارة: غبي غبي اقسم بالله غبي انتا !!
مقدام: وبعدين شدني اسامة
ربيع..فنص عيونه: ايه ؟!
مقدام: قالي من بعتك !
ربيع..بخوف وتوتر : وانتاا شن قلت !
مقدام: عيب يا راجل مستحيل نفضحك ضربته علي وجهه بمرفقي وهربت ( يكذب)
ربيع: صحه ليك راجل !
مقدام: خلاص تمينا معناها ! توا اسامة عرفني نكذب ومستحيل يصدق
ربيع..تنهد: مفيكش فائدة بكل توا بنتصرف بروحي شكلي !
مقدام: هيا اعطيني
ربيع..شاف ل مقدام: شن بنعطيك ؟!
مقدام: فلوس !
ربيع: برا خير ما نضربك برا علاش بنعطيك وانتا مدرتش حاجة مفيدة بكل !
مقدام: خلاص توا نمشي ل اسامة نقوله انتا قتلى ندير هكي وناخد منه فلوس !
ربيع..شده : استنا استنا وين ماشي توا نعطيك
مقدام..ابتسم
ربيع..طلع فلوس ويعد فيهم وعطاه : اخر مرة هادي معاش نبي نشوف وجهك ثاني فاهم !؟
مقدام: حاضر هيا معسلامة..نزل من سيارة !
ربيع..تنهد: شن الغبي الي طحت فيه هاده
طلع تلفونه ..اتصل ب اخته
مريم: ايوا ربيع
ربيع: اسمعي
مريم: نعم
ربيع: مش مروح اليوم باهي ! بايت معا الولاد غدوا نجي !
مريم:واني بنقعد بروحي فالحوش !!؟
ربيع: شن بيصيرلك سكرى الباب كويس بس
مريم: نخااف !؟
ربيع: به نجي نحطك عند فرج ؟ اقعدي معا بناته الليلة والصبح ناخدك !
مريم: به مهم منقعدش بروحي!
ربيع:هيا اهو جاي
سكر الخط
______
خوله: كييف تخليه هكي ! وتلزه !
شيماء: صح انتا عرفت انه يتبع فناس حيضيع نفسه معاهم كيف تخليه هكي !
جهاد..بعصبية: نقدره اني ؟! عمره 20 سنة راه عقله ف راسه
خوله:والحل تلز خوك ؟
جهاد: نلزه خير ما تصيرلكم انتو مصيبة بسببه !..صح كلامي ولا يا ساجدة
ساجدة..سارحة
جهاد: الووو نكلم فيك
ساجدة..انتبهت ع روحها: نعم
جهاد: وين كنتي سارحه
ساجدة..ناضت: تعبانة بس
شيماء: خونا فالاخير متخليشي يا جهاد !
جهاد: شن نديرله يعني ! نضارب اني وياه ؟! نقتله ؟
خوله: شن رايك عندي فكرة
جهاد: شني ؟!
خوله: نشدو ليث ونربطوه شن رايك هكي لا تضاربو ولا هوا يضيع روحه !
جهاد: قارية لن طايحه عليك السبورة شكلك
خوله: فكرة كويسة لكن
جهاد: خيرهاا اختك هادي نوضي خير ما نضربك توا بنقعد رابطه ل امتا ! كيف بياكل ويتحرك و *** ولما نفكوه بيعقل ؟!
شيماء: فوت فكرتها غبية مهم توا تكلم معا ليث وتفاهم معاه بدوة واسلوب حول عصبيتك ع جنب شوية وتفاهمو انتا وياه وقنعه الي يدير فيه غلط ! يعني مش معقولة تخليه
جهاد..تنهد: خلاص سكريه الموضوع توا نجرب نحكي معاه مرة ثانية لكن لو مباش يسمع الكلام يقلب وجهه يضيع بروحه خير ما يضيع عيلة كاملة !
خوله..بصوت خفيف: خيرها ساجدة؟
شيماء: مش عارفة الحق اكيد من الوضع الي صار وموقفنا اخى اعليه بكرى ف حوش الناس كيف يشوفولنا وبنتهم داره كبد كيف قريب تتهجم علينا مشيت بنهدرز روحت بقضية خطف
خوله: تعالي نشوفوها
شيماء: هيااا
__________________
اسامة مقعمز ف داره وحاط ايديه ع راسه ويفكر !
نقول ل ايهاب عالقصة وانه جيرانا ليهم علاقة بفادية ؟! لالا ايهاب غبي ممكن يهجم عليهم هما مليهمش علاقة خوهم بس السبب به من هما هادو ؟! الرؤوس السوداء؟ شن الاسم الغبي هاده !؟ ع حسب كلام ليث ناس منقدرش ندير معاهم شئ ! احسن حل الي عرفته يقعد معاي مرات حد ينضر ! توا عطونا مدة نجمعو باقي المبلغ ونخلصوهم ونسكرو صفحتهم ونتبعدو عن المشاكل مش ناقصة هم وغم ونكد زيادة !..تنهد
خشت بلقيس الدار: اسامة
اسامة: نعم !
بلقيس: هيا انزل بنتعشو !!
اسامة: هيا جاي
بلقيس..نزلت
اسامة حط تلفونه فالشحن ونزل للمطبخ
كانت عيلته كلها متواجدة ومقعمزين علي الطاولة
ابتسم تلقائيا اول ما شافهم
تهاني: تعال هيا نستنو فيك !
اسامة..ابتسم: اهو جيت
قعمز جنب امه و ع يساره روان وف حضنها احمد
اسامة: تعرفي يا روان شريت لبسة ل احمد ليها اسبوعين فالدولاب ممكن
روان..ابتسمت: الله شن خديتله
اسامة: لبسة سبايدر مان شفتها عجبتني
روان: لما كلمتني ع مقاسه ؟
اسامة: ايوا قبل العرس
تقوى: شفتو الانتخابات ومن فاز ؟
عمته خديجة: ان شاء الله يديرو حاجة باهية للبلاد
تهاني:هاده المهم هوا يديرو حاجة للبلاد كويسة وخلاص
اسامة: معاش نندري ع شئ اني
تقوى: تجري من اهنى ل اهنى ربي يعاونك
الاء: حقاا شن صار فالجيران
ابرار..كانت توكل ف فادية رفعت راسها : ايه شن صار
اسامة: مليهمش علاقة بشئ !
ابرار..ب استغراب: كيف ماليهمش علاقة و فادية عندهم !؟
اسامة: خوهم الصغير جاب فادية عندهم وقالها خوها مسافر متندريش ع شئ البنت كانت
اية: حييي ظلمناها ! بذات ابرار نقلبت بشكل غريب
ابرار: وين نعرف اني ! يعني خاطفة فادية وعندنا ف حوشنا هكي فكرت وقتها هاده علاش تصرفت بشكل هاده !
بلقيس: ومن حكالك القصة ؟
اسامة..ياكل: خوهم الكبير
ابرار: به يعني خوهم الصغير هوا الي خطف فادية ؟! وينه شديته !
اسامة..سكت شوية ؛ خلينا ناكلو توا متسكريش النية
تهاني..فنصت ف ابرار: خلي خوك ياكل خلاص
ملاذ: اسامة
اسامة: نعم يا غزالة
ملاذ: طلعت النتيجة اليوم !
كلهم شافو لملاذ كانت شهادة اعدادية !
اية: خيرك مقلتيش لتوا !؟
ملاذ: وانتو فضيتو اليوم جيرانا وبعدين خطف ودوشة
تهاني..بتوتر: به نجحتي !
ملاذ..ابتسمت: ايه نجحت ممتاز !
اسامة: اييييي مبروووك مبرووك ..توا نعطيك مكافاة عليها هادي !
ملاذ..فرحانة وكلهم يباركولها ! ويضحكو
اسامة يشوفلهم كيف فرحانين والابتسامة ع وجهم شاف ايمينه وكانت بلقيس تشوفله ومركزة عليه غمزلها طبست راسها !
روان..شافت اسامة مبتسم بروحه : خيرك مبتسم بروحك
اسامة: شوفتكم كلكم تفرح هكي هدوء وضحك
روان: شن صار ف صاحبك حقا مش نضرب برصاصة !؟
اسامة: ايه فالمستشفي غدوا بيطلع
روان: ربي يشفيه ان شاء الله
اسامة: روان احكى شن فيه
روان: شن فيه؟!
اسامة: نعرفك اني من عيونك مضايقة شن فيه !؟ متعاركة معا اسماعيل؟
روان: لالا
اسامة: ناقصينك فلوس حاجة؟! تكلمي
روان: توا كول نهدرزو بعدين
اسامة: بتهربي من الموضوع ماشي نهدرزو بعدين حاضر !
كملو عشاءهم وقعدو يهدرزو ويضحكو !
اسامة..ناض غسل ايديه وخدى احمد من روان وطلع من المطبخ لحقاته بلقيس !
بلقيس: بترقد ولا شن ؟
اسامة: لا بنشوف لبسة الي خديتها ل احمد تعالي
ركبت معاه وطلع البسة ولبسها ل احمد !
اسامة:ههههههه شوفي منظره كيف
بلقيس: حرام عليك يهبل صغيرة عليه شوية ولا
اسامة: اصبري عندي تيشرت قريب منه تقريبا ..فتح الدولاب وقعد يفتش لن لقاه..اهو..ولبسه..وخدى احمد حضنه !
بلقيس: حييي زي بعضكم !
اسامة: تلفوني غادي صوريني معاه ترا
بلقيس..خدت تلفونه من الشحن وصوراته هوا و احمد
اسامة...خدى منها التلفون: هههههههه..شاف ل احمد..اضحك يا راجل
نزل ب احمد وكيف لابسين زي بعض عجبتهم وقعدو يضحكو ويصورو ف احمد !
اسامة صلى العشاء وخش لداره وقعد يهدرز هوا و بلقيس لوقت امخر وبعدين رقد 🌹
ساعة 6 الفجر
رن المنبه
اسامة..فاق بصعوبة لانه مش راقد باهي سكره ناض
بلقيس..فاقت: وين ماشي
اسامة: بنصلي الفجر
بلقيس..تنهدت: فالجامع ؟!
اسامة: اي
طلع توضاء ولبس وبلقيس فاقت توضت وبتصلي
اسامة..نزل يلبس ف سبيدوره
بلقيس: مش مساوية الرقبة !..قربت منه وقعدت تعدله فيها !
اسامة..ابتسم: تبي حاجة واني مروح نجيبلك !؟
بلقيس: غير روح بسلامة بس
اسامة: هي مشيت
بلقيس: باي
اسامة طلع سخن السيارة ومشى لجامعهم القديم !
ناس كانت تخش لانه قيام صلاة
درس سيارته ونزل مش يلحق
بدى يصلي معاهم وكملو صلاة
بدت الناس تطلع بشوية
اسامة..قرب جنب الشيخ: شيخي
الشيخ..ابتسم: اوو اسامة كيف الحال
اسامة: الحمد الله يا شيخي
الشيخ: قلت توا تجوز معاش بنشوفه لمدة طويلة شكلي
اسامة: عيب عاد لازم نخطم ونهدرز عليك ديما
الشيخ:شن اخبارك اخبار العيلة
اسامة: الحمد الله يا شيخي مشاكل مرة مرة وخلاص
الشيخ: اهم حاجة الصحه المشاكل ينحلو بعون الله
اسامة: ايه اكيد مفيش مشكلة مليهاش حل
الشيخ:سمعت ؟
اسامة..عقد حواجبه: شن سمعت!
الشيخ؛ حوشكم القديم الي بعتلهم باعوه لواحد ثاني
اسامة: ان شاء الله يكون عتبة خير عليه
الشيخ: بيهدمه غدوا بيبدا الهدم
اسامة: بيديره محلات ولا شن ؟!
الشيخ: فالزنقة داخل محلات ؟ لالا تقريبا يبنئ حوش
اسامة: بيكلفه تطيح وبنئ كان شري حوش واتي خيرله ومكان احسن
الشيخ: الله اعلم كل حد حر ف تصرفاته يا ولدي
اسامة: مهم انتا يا شيخي حالك كويس
الشيخ: الحمد الله
اسامة: توصى حاجة
الشيخ: قعدت شوية
اسامة: بنخطم ع صاحبي فالمستشفي مزال
الشيخ:تمام ان شاء الله بالشفاء
اسامة..سلم ع شيخ وطلع !
وقف شاف لشارع وجاء ف خاطره يشوف حوشه الي تربى فيه اخر مرة لانه بينهدم بيتغير
خش للزنقة وقف قدام الحوش وقعد يشوفله!
تفكر هلبا مشاهد منها الي فرحت قلبه منها الي تعفلق منها !
حد ملتم وراءه : اسامة
اسامة..يعرف الصوت تلفت: نعم
هجم ع اسامة ضربه بموس ف رجله
اسامة.. برد فعله جبد القناع من وجهه قبل ما يطيح
ربيع..بخوف اني اسامة جبد منه لقناع!
اسامة..يتالم من الضربة: صار انتااا ! تي لما نقتلك عليها !..وقف بسيف ع رجليه
ربيع..ضرب اسامة ثاني ف بطنه بالموس
وهرب يجري
اسامة..حس بحاجة اخترقت جسمه !
حط يده ع مكان الشعور بالضغظ وشافلها كانت دم !
طاح عالارض وهوا يتالم !
لحظة غدر
ضاع العمر
وسكين تطعن بالظهر
تحمل صبر
اصحى ما تبقى مطرحك
غدر العدو بيجرحك
بس القريب بيدبحك
يتبع
بقلم محمد مالك
حلقة لو وصلت 1000 لايك غدوا حنزلكم ❤🌹
توقعاتكم شن حيصير 💔
ناس الي تقراء من واتباد الي عندهم فيس
يبحثو ع قروبي اسمه libyan novel's وتفاعلو ع حلقة غادي لو وصلت 1000 لايك حنزلكم غدوا حلقة ❤🔥