#سنيسفيورم
بقلم محمد مالك
الحلقة السابعة و الثلاثون 37
________________
شيماء: محلاااها الغزالة
فادية..شافت ل ساجدة وابتسمت
ساجدة..شافتلها
فادية..رخت يد ملاذ: ساجدة..ومشت حضنتها
ابرار شافت ل الاء باستغراب
ساجدة..ابتسمت وتغمرت فادية: فدو شن اديري اهنى
البنات وتهاني مش فاهمين شئ
فادية: هاده حوش اسامة
ساجدة: ايه عارفة خوك اسامة ؟
ابرار..بخوف خدت فادية من يدها وبعدتها ع ساجدة: منين تعرفيها ؟!
شيماء..مش فاهمة شئ شافت ل اختها
تهاني: قريبة فادية انتي ؟! من جهة بوها ؟!
ساجدة: لا مش قريبتها
الاء..تشوف وساكتة وتقوى حتا هيا الجو توتر فجاة !
ابرار: فادية منين تعرفيها ؟
ساجدة: فادية قعدت عندي من كم يوم
اهنى وضحت
تقوى: نعمم ؟ عندك ؟
ساجدة: اي كانت عندي خوها مسافر كان صح !
تهاني: العفوو غير بالك غالطين وتشابه اسماء وخلاص
الاء..وقفت: شن غالطين
ابرار..شدت يد فادية: لما جو رجالة خدوك وين قعدتي ؟!
ساجدة..مش فاهمة علاش انقلبو فجاة
شيماء..بصوت خفيف: شن فيه منين تعرفيها البنت ؟!
فادية..ساكتة وتشوف
ابرار: فادية ركزي معاي منين تعرفيها ساجدة
ساجدة: قتلك كانت عندي قبل كم يوم وخوها مسافر
ابرار..بعصابية: اصص
شيماء: هيا نمشو
ساجدة: لا اصبري نبي نفهم
فادية: اني قلت ل اسامة
ابرار: شن قلتيله اسامة !؟
فادية: لما راجل ضرب ايهاب بعدين قعدت عند ساجدة
ابرار...اشرت ع ساجدة: هادي نفسها ؟!
فادية: اي
تهاني:حي خاطفين البنت وبيتعرفو
ساجدة: خاطفين البنت شني !
ابرار: ملاذ خودى فادية فوق
ملاذ..خدت فادية وركبت
شيماء..شدت يد اختها: هيا نمشوو بيهجمو علينا شوفي كيف يشوفولنا !!
ساجدة..بعصبيه: مش حنمشي لن نفهم شن صاير ..شافت ل ابرار... خطف شن تحكو
ابرار..بصوت عالي: توا بديري روحك مش عارفة !
عمته..خديجة: بنتي ابرار اهدئ شوية ونفهمو بالدوة
الاء: ابرار قعمزي حتا احنى زيك مستغربين
تهاني..طلعت تلفونها وبعتت مسج ل اسامة تعال الحوش بسرعة
خديجة: توا بنتي احكي قلتي خوها مسافر فادية؟!
ابرار: عمتي خوها قريب مات مسافر شن !!
تقوى: خلااص اسكتي
خديجة: ابرار شن قلت توا نبو نفهمو فيه سؤء تفاهم صاير واضح !
ابرار..قعمزت بعصبية وتشوف ل ساجدة
ساجدة..تنهدت: قبل كل شئ انتو قلت خطف ومش عارف شن اني مش فاهمة القصة بزبط
عمته..خديجة: غير احكي منين تعرفي فادية بس
ساجدة..توترت: حاضر قبل ثلاثة ايام تقريبا ايه قبل ثلاثة ايام خوي جاب فادية لعندنا تمام
شيماء..تشوف ل اختها ومش فاهمة شئ !
ساجدة: كانت تبكي وتقول ف اسم خوها تقريبا شن اسمه كان ايهاب لو صح مهم قعدت عندي نسال فيها متجاوبش فيا كانت وامس خوي خداها قال خوها روح من السفر !
ابرار: واني بنصدق القصة توا مفروض
ساجدة: معنديش سبب يخليني نكذب !
خديجة: فادية يا بنتي خدوها من حوش خوها بالسلاح وضربو خوها بطلقة ولقطنا حق فدية مش قدرنا نردوها
ساجدة: كييف متاكدين !
ابرار: هيا معا سلامة !
تهاني: ابرار !!
ابرار: يا ماما يكذبو واضح متوقعوش فادية تكون ليها علاقة بينا ونفضح
شيماء: نفضحنا شن اسكتي شوية وانتي تدوي من بكرى
ساجدة: اص متناقشيهاش شيماء ..خدت شنطتها ..معنديش اي فكرة ع موضوع الخطف
وطلعت هيا وشيماء
الاء..حطت يدها ع وجها : غير كيف صار هكي فجاة !
ابرار: وين اسامة !؟ اتصلو بيه
تقوى: عاد خيرك انتي !! اهدئ شوية ! شن بديري توا لو ليهم علاقة
تهاني: اقسم بالله رعشت هاده شن العفو !
ابرار..ركبت الدروج ومشت ل فادية : فدو
فادية: نعم
ابرار: فكري كويس تمام ساجدة قعدتي عندها ولا
فادية: اي
ابرار: به كويس شن درتي معاها ؟!
فادية: لعبنا ودرنا هلبا حاجات !
ابرار: شن درتو ؟!
فادية: امممم فتحنا اغاني ولعبنا و دارت بطاطا
ابرار: به شن ثاني ؟!
فادية: وفتحت رسوم حلوة ساجدة
ابرار..استغربت اكثر
اسامة..اتصل ب امه لما شاف رسالتها: ايوا امي شن في !
تهاني: تعال جيرانا كانت عندهم فادية ؟!
اسامة: شن ادير عندهم فادية ؟!
تهاني: لما كانت مخطوفة
اسامة..عقد حواجبه: شن تقولي يا امي
بلقيس..شدت يد اسامة: شن صاير !؟
تهاني: فادية شافت بنتهم عندنا وفهمنا
اسامة: شن اسمها بنتهم ؟!
بلقيس: بنت من ؟
اسامة: دقيقة يا بلقيس
تهاني: ساجدة
اسامة..تفكر ف سيارة نفس الاسم الي قالت عليه فادية: جاي فالطريق اني !
بلقيس: شن فيه ؟!
اسامة: اركبي سيارة نشرحلك
ناضو من الطاولة وركبو السيارة
واسامة طلع بسرعة !
...خشت ساجدة وشيماء حوشهم
شيماء..بعصبية: ممكن تشرحي شن صار توا !
جهاد..طلع من داره: خيركم شن فيه !
ساجدة..حولت وشاحها وحطت ايديها ع وجها
جهاد: خيرها هادي ؟!
خوله: خيركم شن صار تعاركتو معا الجيران ولا شن !
شيماء: نستنو ف شرح ساجدة
جهاد: تكلمي انتي وياها راه نبدا..قصت عليه ساجدة
ساجدة: خوك ليث
جهاد: خيره ليث شن دار ؟!
ساجدة: كان خاطف بنت
جهاد: نعم ؟! خاطف بنت ؟
ساجدة: لما كنت انتا ف الزردة والبنات عند خالتي جابلي بنت قالي اخت صاحبه ! خوها مسافر وبتقعد عندنا كم يوم واني صدقت طبعا لاني غبية اصلا واضحه معندهاش اقارب بكل خلاها ل صاحبه !!
جهاد: غير تتكلمي جديات انتي توا !
شيماء: وشوف الصدمة الكبيرة البنت المخطوفة طلعت بنت الجيران ! شن رايك توا فضيييحة ليث زي ما خلانا نحولو من حوشنا الاول بفضيييحه حنحولو ثاني !
جهاد: كييف البنت كم قعدت عندك !
ساجدة: ثلاثة ايام
جهاد: ثلاثة ايام ومعرفتيش شئ ! سالتي البنت عالاقل
ساجدة: واني نقول البنت علاش تعامل فيا هكي حتا كلام متتكلمش معاي نحسابها متحشمة وساكته ثلاثة ع قد ما سالت مجاوبتش عليا !
جهاد: متحشمة ثلاثة ايام !! ..حط يده ع راسه ..بصوت عالي..قتلكم ليث يتبع ف صغار **** ولاا قتلكم حيولي زيهم!!
ساجدة: والحل توا خائفة تكبر المشكلة !
جهاد..لبست شبشب: وينه ولدهم قاعد ؟! توا نكلمه ! اتصلو ب ليث
خوله..خدت تلفونها وتتصل ب ليث
جهاد..كيف بيطلع
طق الباب بقوة
فتح الباب وكان اسامة
اسامة..شد جهاد من حوايجه وخبطه عالحيط..وحط موس ع رقبته : صار انتا *******
ساجدة والبنات شبحو كيف اسامة شاد جهاد فجنانهم !!
طلعت ساجدة تجري: ارررخيه !
جهاد..بعصبية: خشى داخل !
اسامة: صبري وين ******
جهاد: غير بعد من عليا !! وحول الموس من علي رقبتي
اسامة: تكلممم قتلك!!
ساجدة..بخوف: صبريي من حول بتقتله
جهاد...بعصاب: خشى داخل توا نتفاهم معاه
ساجدة:جه ..قص عليها
جهاد: خشى قلت
ساجدة..خشت بخوف
و اسامة حاول ميشوفش ل ساجدة
جهاد: بعد الموس من عليا ونتكلمو !
اسامة: علاش بنتكلم معاك وقريب قتلت صاحبي وجاي ساكن جنبنا مفروض نقطعك اهنى !
جهاد: فاهم غلط انتا بعد ونقعمزو زي الناس ونشرحلك شن رايك !
اسامة..تنهد وبعد من عليه
جهاد..تنفس براحة: ..اشر ع كرسي..قعمز اهنى نتكلمو
اسامة: مش مقعمز تكلم
جهاد: تعرف ليا يومين كيف عرفتك ديما نقول مفيش حد متسرع وعصبي اكثر مني لكن طلعت غالط
اسامة: تي تكلم وانتا تتفلسف
جهاد: اني كنت ف زردة قبل ثلاثة ايام وامس بس روحت
اسامة: دخلي بيك وين كنت اني !!! البنت شن ادير عندكم وينها الي اسمها ساجدة!
جهاد: جايك بالدوة و معاش تجيب اسمها ع لسانك مرة ثانية المهم خوي قداش ليا وراءه يتبع ف صغار مينفعوش باليبي هوا الي جابها للحوش واحني برا
اسامة: وينه خوك ؟!
جهاد: طلع الصبح قدامك مرجعش قاعد !
اسامة..تلفونه كان يرن
جهاد: رد مش هارب اني
اسامة..رد ع عثمان: ايوا
عثمان: الوو اسامة
اسامة: نعم عندي ما ندير فيه حاجة!
عثمان: اني جنب حوشك توا بنشوف فادية وبنعطيها حاجة شريتها ليها
اسامة: تمام جاي هي
سكر المكالمة
اسامة: خوك امتا بيروح ؟!
جهاد..طلع تلفونه واتصل برقم خوه يعطي فيه مقفل : شوف
اسامة: يعني انتا ع حسب كلامك مليكش علاقة موضوعك مش خاش دماغي وقلت خوك !
جهاد: اني بروحي معنديش حتا وجهه نقابلك بيه لو خوي ليه علاقة بخطف بنتكم
اسامة..تنهد
جهاد: ليث اكيد بيروح للحوش ونحصلو عليه ونفهمو تمام عندي طلب بالله انتا راجل عندك عيلة وفاهم عليا
اسامة..يشوفله مش عارف شن حيكون طلبه!
جهاد: ياريت القصة محدش يسمع بيها ومتنتشرش عندي بنات ومنبيش نضر بسمعتنا ونقطع نصيبهم !
اسامة: تمام بس لو موضوع طلع بشكل ثاني نتفاهمو بشكل ثاني بعدين
جهاد: اهو هاده الحوش وجنبك ما عندنا وين نهربو واني متاكد حتنحل باذن الله
اسامة:تمام...طلع
كان عثمان قدام الباب : خيرك ساعة يا راجل
اسامة: كنت نهدرز عالولد
عثمان: جيب فادية نفرحوها البنت
اسامة:شن خديتلها ؟
عثمان..ابتسم: ايباد شوفه مليح !
اسامة..شافه: ماشاء الله دقيقة نجيبهالك هي !
خش اسامة
كانو البنات يستنو فيه
ابرار: شن صار معاك !
اسامة: شئ توا نهدرزو بس فيه حاجة موضوع هاده محدش يسمع بيه غيركم فاهمين ميطلعش برا بكل !
ابرار: علاش مش حنتكلمو عليه
اسامة: ديري الي قلته وخلاص..خدى فادية ف حضنه
تهاني: به احكيلنا شن صار ؟
اسامة: حاضر يا امي شوية ونحكيلكم
ابرار: وين رافعها
اسامة: عمها برا بيشوفها
ابرار: بيروح بيها ؟
اسامة: لا..وطلع للجنان: فدو
فادية: نعم
اسامة: متقوليش شئ ل عمو عثمان باهي
فادية: به
طلعها ل عثمان
_________
جهاد: شفتو ولا قلت اني ليث مش مزبوط ؟!
خوله: صحه ليك ماشاء الله عليك توا شن الحل
جهاد: خاطف بنت الناس خوك تي اما حل غير ان شاء الله متكبرش ويصير فيها دم ولا حبس!
شيماء..حطت يدها ع قلبها: دم شني !!
جهاد: نخليكم ثلاثة ايام تصير كارثة ! انتي اكبر وحدة فينا مفروض تكوني واعية وتفكري كيف كيف
ساجدة: بتحطو الذنب فيا يعني !؟
جهاد: ايه حتا انتي غالطة ليث دار مصيبة اهو ولدهم يستنا فيه اول ما يروح بيشده
خوله: وتخليه يشده ! بالك يضربه !
جهاد..خبط ع صدره: اني بنضربه اني !!بنكسره تكسير
خوله: رد بالك تخليه ليهم و يضروه !
شيماء: فالاخير خوك الصغير حتا لو غلط !
ساجدة: شن حسيته ولدهم مصدقك ولا بيدير حاجة ل ليث !
جهاد: مش عارف سالني قالي صبري وين ! فيه حاجة ثانية صايرة ان شاء الله خوك مش يد فيها بس
خوله: تعتبر جريمة الخطف ولا ؟!
شيماء: شن رايك انتي !
خوله: قصدكم معناها ينحبس ليث !
جهاد: محدش يتصل بيه فاهمين لو اتصل بحد منكم كلموني خلوه ع راحته مش يروح للحوش ونقدرو نفهمو منه لانه لو عرف مش حنشوفوه بكل !
شيماء: حاضر
خوله...شافت ل ساجدة كيف مهمومة : مش حيصير شئ تنحل ان شاء الله !
ساجدة: ايه تنحل تمام مشفتيش كيف حط الموس ع رقبة جهاد !
جهاد: اني لو حد خاطف اختي وعرفته نقتله مش نتكلم معاه الي يقوله عنده حق فيه واني نتوقعه لو انتشرت القصة وكبر الموضوع مش حنقدرو نقعدو اهنى بنحولو ثاني !
_____________
اسامة..دخل فادية
وعثمان روح
فرحانة بالايباد
اسامة..تلفونه يتصل : ايوا
ايهاب: شن جو
اسامة: الحمد الله انتا شن حالك توا ؟!
ايهاب: قالي غدوا نقدر نطلع وعندي يوميا علاج طبيعي
اسامة: اهتم بموضوع متهملاش !
ايهاب: شن جو فادية
اسامة: فرحانة فادية توا ربطولها النت وطايحة تنزل فالعاب
ايهاب: وين تنزل فيهم ؟
اسامة: عثمان شرالها ايباد
ايهاب: اااياااه اسمع
اسامة: نعم
ايهاب:نتصل بيك فيديو واعطيهالي باهي
اسامة: تمام هي سكر وعاود اتصل
سكر عليه
وركب فوق لقاها ف دار ابرار
اتصل بيه ايهاب رد عليه
اسامة:فادية
فادية..تشوف للايباد : نعم
اسامة: شوفي !
شافت وكان ايهاب
ايهاب: مش معدلة علياااا توا نوريك بهه
فادية..ابتسمت..خدت تلفون من يد اسامة: شوف ..توري فيه فالايباد
ايهاب: حلوووو هلباا
فادية: ايه حلو عمو عثمان شرالي
ايهاب: قلتي شكرا !
فادية: ايه قلت
اسامة مقعمز جنبهم ..نادت عليه امه نزل
ايهاب: شن اديري
فادية: نلعب
ايهاب: استحشتك
فادية: حتا اني وين انتا !
ايهاب: اني فالحوش غدوا نروحو باهي
فادية: به
ايهاب: كليتي !؟
فادية: ايه ابرار دارت بيتزا
ايهاب: وين اسامة بحداك
فادية: لالا تبيه
ايهاب: ايه اعطيهولي
فادية..حطت ايبادها ونزلت
ابرار..فالدروج: وين نازلة
فادية: اسامة وين
ابرار: اركبي توا اناديه اطيحي
فادية: به..رجعت ركبت والكاميرا بينت ابرار
ايهاب..شاف ابرار وحس بالذنب : سكري خلاص نكلمه بعدين
فادية: به باااي
ايهاب: بااي ي غزالة
سكر الخط
_____________
طق الباب
اسامة طلع بيفتح وكانت روان جايبها اسماعيل و ف حضنها احمد : اوووو اهلين
روان..حضنت اسامة: اهلين
اسامة..خدى احمد ف حضنه: خشى مشى اسماعيل
روان: ايه مشى
اسامة: مفاجاة حلوة
روان: متبيش نجي ولا شن
اسامة: ايااه علينا شن قلنا احني !
روان..ابتسمت: توا نتفاهم معاك معاش تخطم عليا زي قبل تجوزت نسيتني !
اسامة: لحقنا ع حاجة احنى موضوع فادية كل مرة موضوع شكل جديد !
روان..: حقا فادية وينها بنشوفها
اسامة: خشى
طق الباب ويحسابه اسماعيل رجع نسى حاجة !
رجع فتح الباب وكان مقدام
مقدام: ربي يصون ان شاء الله
اسامة: يصون عرضك تفضل شن فيه ؟!
مقدام: امس قلت بتكلمني قلت شكله نسى !
اسامة: لا منسيتش دقيقة خليك ..رد الباب وخش مد احمد ل بلقيس وطلع
مقدام: ايه شن صار ؟!
اسامة: من بعتك ؟!
مقدام: شن من بعتني قول كان متبيش تعطيني حقي نعرف كيف ناخده !
اسامة..بصوت عالي: كيف بتاخدهم !
مقدام: مش قصدي هكي قصدي بالقانون !
اسامة: تعال نمشو هي عندك حاجة تثبت انك تبي فلوس مني ؟!
مقدام..توتر: لا
اسامة: انتا عبيط والي بعتك غبي زيك بالضبظ ! شن قتلي اسم بوك
مقدام: عبد الله !
اسامة..رفع حاجبه: شن اسمه
مقدام: عبد الله خيرك متسمعش ؟!
اسامة...ابتسم: امس كان اسمه عياد
مقدام..تفركس: عنده اسمين بوي !
اسامة: ههههههه اقسم بالله اغباء من عثمان طلعت
مقدام: من عثمان !؟
اسامة..فنص فيه : مليكش علاقة هات بطاقتك الشخصية ترا !
مقدام..شاف ايمين و ايسار وكيف بيجري بيهرب
شده اسامة من حوايجه: غير وين ماشي تعال جاي !!
مقدام: تعرف تضربني اقسم بالله نسكره الشارع !
اسامة: انتا بتسكره الشارع ! مش عارف راسك من رجليك ! هات بطاقتك الشخصية !
مقدام: معنديش
اسامة..قعد يفتش فيه ولقاها شاف للاسم: مقدام سالم **** منين جي عبد الله و عياد ؟! ولا بوك عنده اسمين يعني توا عنده ثلاثة اسامي توا
مقدام: مليكش علاقة اعطيني حقي !
اسامة..ضربه كف: حق شن تبيه !؟ هيا تكلم من بعتك !!
مقدام: نبي حقي
اسامة..ضربه كف ثاني: قاعد تقولي نبي حقي!! ..بصوت عالي..من بعتك
درست سيارة ليث ونزل منها !
اسامة..شافه : شن الحياة اكشن وراء بعضه هادي!
مقدام: اكشن شن !
اسامة..ضربه كف ثاني: انتا اسكت
يتبع
بقلم محمد مالك
رايكم مهم
انتظرو غدوا الصدمة !
الي يتوقع شن حيصير حيربح جائزة بسيطة
هي بنقراء تعليقاتكم