နေမြင့်လာသည်နှင့်အမျှ ပူအိုက်လာသောကြောင့် အထွန်းသည် ပတ်လာသော စောင်ကို ခေါက်ကာ သိမ်းသည် ။
ထို့နောက် အင်္ကျီ သုံးထပ် ဝတ်ထားရာမှ နှစ်ထပ်ကို ချွတ်သည် ။
မနက်ဘက်ကျတော့လည်း အရမ်းအေးတယ် ၊ နေမြင့်လာတော့လည်း အရမ်းပူတယ် ။ ဘယ်လို ရာသီဥတုမျိုးပါလိမ့် ။
အေးရင်လည်း တစ်နေ့လုံးအေး ၊ ပူရင်လည်း တစ်နေ့လုံး ပူနေပါတော့လား ။
အခုတော့ အဝတ်တွေ ပြန်သယ်သွားရတော့မယ် ။
အထွန်းတစ်ယောက် ကောင်းကင်ကို မျက်စောင်းထိုးရင်းက ရန်တွေ့ပြန်သည် ။
"နောက်နေ့တွေ ပူလိုက်အေးလိုက် မလုပ်နဲ့ ၊ ကြားလား "
တကယ်ပါပဲ ၊ မနက်ဆို အေးလိုက် နေ့လည်ဆို ပူအိုက်လာလိုက် ၊ ညဆို ပြန်အေးလိုက် နဲ့ တကယ်ပါပဲ ။
တော်ပြီ ၊ အနွေးထည်လည်း မဝယ်တော့ဘူး။
***
ဈေးသိမ်းပြီး ပြန်လာသော အထွန်းသည် လမ်းတစ်လျှောက်တွင် အိမ်တိုင်းကို ငေးကြည့်ရင်း အေးအေးဆေးဆေးပင် လမ်းလျှောက်လာသည် ။
အထွန်းလည်း ဒီလို အိမ်အကြီးကြီးတွေနဲ့ နေဖူးချင်လိုက်တာ ။
အထွန်းတို့ မြို့သည် သုံးနှစ်လျှင် တစ်ခါခန့် ရေကြီး တတ်သောကြောင့် အိမ်အမြင့်များနှင့် ခြေတံရှည် အိမ်များကိုတွေ့ရသည်က များပါသည်။
အထွန်းလည်း ဒီလို အိမ်အမြင့်နဲ့ နေချင်လိုက်တာ။
ဒါဆို ရေကြီးရင် အထွန်းတို့ စိတ်မပူရတော့ဘူး ။
လမ်းလျှောက်လာရင်းက အထွန်းသည် အိမ်တစ်အိမ်ရှေ့တွင် ရပ်နေမိသည်။
သဇင် တွေ လှလိုက်တာ ။
မနက်ဖြန်ဆို လပြည့်နေ့ ။ အထွန်းတို့ ဘကြီး အိမ်မှာ အလှူရှိတာပဲ ။ အမေ့ကို ပန်စေချင်လိုက်တာ။
တွေးရင်း ငေးရင်းပင် အထွန်းတစ်ယောက် ထိုခြံရှေ့တွင် ရပ်နေမိတော့သည် ။
"ဟိုကလေး ပန်းလိုချင်လို့လား"
ပြတင်းပေါက်ဆီမှ ရုတ်တရက် အသံကြားတော့ အထွန်းလန့်ပင်သွားရသည် ။
ပြောရင်း ဆိုရင်းပင် ထိုအန်တီကြီးက ခြံထဲဆင်းလာတော့ အထွန်း ပန်းဝယ်ရန် ဆုံးဖြတ်လိုက်သည်။
"ဟုတ် ပန်း ဘယ်လောက်လဲဟင်"
"ပန်းက အမျိုးမျိုးရှိတယ် ၊ လာလေ အထဲဝင် "
အထွန်း ခဏပင် ကြောင်သွားမိသည် ။ တော်တော်များများက အထွန်းတို့ကို အိမ်ထဲ မပြောနဲ့ လမ်းမှာ တွေ့ရင်တောင် ရှောင်သွားချင်ကြတာ။
ခြံထဲရောက်တော့ သဇင်အုံများကို စိတ်ဝင်တစားပင် ကြည့်နေမိသည် ။
သဇင်ဥစိမ်းစိမ်းလေးများ နှင့် သဇင်ပန်း ဖြူဖြူလေးများမှ သဇင်ပန်းနံ့ သင်းသင်းလေးများကိုပင် ရနေသည် ။
"ဘယ်အတံ ကြိုက်လဲ ကြည့်နော်"
"ဟုတ်"
အထွန်း သဇင်ပန်း များကို စိတ်ကြိုက်ရွေးနေတော့သည် ။ အမေ့ အတွက် တော့ အလှဆုံးပန်းကို လိုချင်သည် ။
"ကြိုက်တာတွေ့လား"
ယောက်ျားလေး တစ်ယောက် အသံ ကြားလိုက်ရသော ကြောင့် အထွန်း လှည့်ကြည့်မိလိုက်တော့ ထိုသူက အထွန်းကို ပြုံးပြသည်။
"အကို့ကို မှတ်မိလား "
အထွန် ခပ်မြန်မြန်ပင် စဉ်းစားလိုက်သည်။
ဘယ်သူများပါလိမ့် ၊ အထွန်းနဲ့ သိတဲ့သူလား ။
အထွန်း စဉ်းစားမရ ဖြစ်နေစဉ်မှာပင် ထိုသူက အထွန်းကို ရယ်ပြလာသည် ။
"ဖရဲသီးဝယ်ဖူးတယ်လေကွာ ၊ ပိုက်ဆံ လိုနေတာကိုတောင် လျှော့ပေးခဲ့သေးတယ်လေ"
ထိုအခါမှ အထွန်း သတိရသွားသည် ။
မှတ်မိပြီ ၊ အထွန်းမှတ်မိပြီ ။ ပိုက်ဆံမပါတဲ့ အကိုပဲ။
"ဟုတ် မှတ်မိပြီ "
"ဒါနဲ့ သဇင်ပန်းလာဝယ်တာလား ၊ ကြိုက်တာတွေ့ရင်ပြောနော် "
"ဟုတ် ဟိုဘက်က အဖြူလေး ဘယ်လောက်လဲဟင် "
"ဒီအဖြူလေးက နှစ်ထောင်"
နှစ်ထောင် ၊ အထွန်း အိမ်က ဆန်တစ်ပြည်တောင် ဒီလောက်မကျဘူး ။ ဒါပေမယ့် အမေ့အတွက်ပဲ ။ ဈေးကြီးတာ မကြီးတာထက် အမေကြိုက်ဖို့ အရေးကြီးတယ် ။
"ဒါဆို အဲ့ အဖြူလေး ယူမယ် ၊ ပြီးတော့ ..."
အထွန်း မျက်လုံးတို့က သဇင်ဝါပေါ်သို့ရောက်သွားသည်။ သဇင်က အဖြူရောင်ပါ ၊ ဘာလို့ ဒီအတံတွေက ဝါနေရတာလဲ။ မကောင်းတော့လို့များလား ။
"ဒီသဇင်ပန်းတွေက ဘာလို့ အဝါရောင်ဖြစ်နေတာလဲဟင်"
အထွန်း က လက်ညှိုးထိုးရင်း မေးတော့
"ဒါက သဇင်ဝါလေ ၊ သဇင်မှာ အဖြူ ၊ အနီ ၊ အဝါ ၊ အနက် ဆိုပြီး လေးမျိုးတောင်ရှိတာ ၊ အကိုတို့ဆီမှာတော့ အဖြူနဲ့ အဝါပဲ ရှိတယ်"
"ဪ .. "
အထွန်းက ခေါင်းညိတ်ကာ သဇင်တံများကို စိတ်ဝင်တစား ကြည့်သည်။
"ပုံစံချင်း မတူဘူးနော် "
"အင်း ဟုတ်တယ် ၊ သဇင် အဖြူက အပွင့်ပိုကြီးတယ် ဒါပေမယ့် ရိုးတံမှာကျတော့ အပွင့်ပွင့်တာ ကျဲတယ် ၊ သဇင် အဝါကျတော့ အပွင့်သေးပေမယ့် ရိုးတံပေါ်မှာ စိပ်စိပ်လေးပွင့်တာ ၊ မွှေးတာကတော့ အဝါက ပိုမွှေးတာပေါ့ "
"ဪ ."
အထွန်း စိတ်ဝင်တစားပင် နားထောင်ရာမှ ခေါင်းညိတ်သည် ။
"ဒါဆို အထွန်းကို အဖြူတစ်တံနဲ့ အဝါလေးတစ်တံပေးပါ"
"ကောင်းပါပြီဗျာ"
ထိုအကိုက အထွန်းရွေးထားသော သဇင်နှစ်ခက်ကို ငှက်ပျောရိုး တွင် အသာအသယာ ထိုးစိုက်သည်။ ထို့နောက် ငှက်ပျောရွက် ဖြင့် လုံအောင်ပတ်သည် ။
"ရပြီ ဒါကို အိမ်မှာ နေမပူတဲ့နေရာမှာထားနော် ၊ ရေအိုးစင် အောက်မှာ ထားရင်လည်း ရတယ်""
"ဟုတ် "
အထွန်း တစ်ထောင်တန်လေးရွက်ကို ထုတ်ပေးလိုက်တော့ တစ်ထောင်တန်တစ်ရွက်ကို ပြန်ပေးလာသည်။
"လျှော့ပေးလိုက်မယ် ၊ သုံးထောင်ပဲ ပေးခဲ့"
"ဟုတ် ကျေးဇူးတင်ပါတယ်"
အထွန်း အမှန်တကယ်ပင် ကျေးဇူးတင်မိပါသည်။ အမေ့ကို ပန်စေချင်လွန်းလို့သာဝယ်ရတာ သဇင်ပန်းက အထွန်းတို့ရဲ့ တစ်ပတ်စာဆန်ဖိုး ထက် ပိုများတယ် ။
အထွန်း အိမ်ပြန်လမ်းတစ်လျှောက်တွင် ကရင်းခုန်ရင်း ပြန်လာသည်။ နောက်ဆုံးတော့ အမေ့အတွက် သဇင်ပန်း ဝယ်ပေးဖြစ်သွားပြီ။
အထွန်းသည် သဇင် အနီနှင့် အနက်ရောင်ကို အတော်ပင် စိတ်ဝင်စားနေသည်။
လက်ထဲမှ သဇင်ပန်းကို ကြည့်ရင်း နောက်ကြုံရင် မေးဦးမှပါ ဟုလည်း တွေးပြန်သည် ။
**
အထွန်း အိမ်ရောက်တော့ ကြီးမြ ကိုပါ တွေ့လိုက်ရသာ် ။ မနက်ဖြန် အတွက် ရောက်လာတာပဲ နေမှာ ။
အထွန်းက ရေအိုးစင်ဆီသို့ အပြေးလေးသွားကာ သဇင်ပန်း ထုပ်ကို အကျအန တင်သည် ။
ကြီးမြက အထွန်းကို မြင်တော့ ခေါင်းခါပြီး သက်ပြင်းချသည် ။
အထွန်းသိပါတယ် ။ ကြီးမြက အထွန်းကို သဘောမကျမှန်း အထွန်းသိပါတယ် ။
ဒါပေမယ့်လေ ဒါ အထွန်းရဲ့ ပုံစံပဲဟာ ။
အထွန်း ပြောင်းကြည့်ဖူးတယ် ၊ အခြားယောက်ျားလေးတွေနဲ့ တူအောင် အထွန်း နေကြည့်သေးတယ်
ဒါပေမယ့် ရမှ မရတာ ။အထွန်း စိတ်ပျက်လက်ပျက်ဖြင့်ပင် ခြေဆင်းထိုင်ရင်း တွေးလိုက်မိသည် ။
ကြီး မြ မြန်မြန် ပြန်ရင် ကောင်းမှာပဲ ။
****
AN/
သွေး နောက်ကျသွားတယ်ရယ် တကယ်
တောင်းပန်ပါတယ် 😩😩