سنيـسفيــورم ❤️
بقلــم " محـمد مالــك "
الحلقــة "الــواحد و العــشرون الــ21 "
_________________________
سفــيان:تلــقى باقة ورد قدام بابكم انزلي خوديـها
اية: تبصررر ؟
سفيــان: لا والله حطــيتها قدام الــباب !
اية: غير شــن درت مـن عملة مش قتلك متجــيش من مرة الي فاتــت
حطت تلفونها وفتحت الروشـن بتشـوف من فــوق لو اسامة مهناش بتــنزل بتاخدها بســرعة قبل ما يشوفها !
اســامة..درس ســيارته
اية خافــت صـكرت الروشــن بســرعة
اسامــه نـزل من سيارتـه شـبح لباقـه محطوطـه ورودهـا كلهـا أحمــر " من التوليــب 🤗"
استغــرب و قامهـا و يشـوف لو فيهـا مكتـوب كـرت او حاجـه ملقـاش شي عقـد حواجبـه و خـش لـ الحوش
" فـــي نفــس الوقــت ❤️"
تهانــي: خودى راحتك وفــكرى براحــة علــيك يا بنتي..توا نجيكم.." و ناضــت من جنبهــم "!..طــلعت من الصــالون
عمته..ابتــسمت: شن قلتي يا بلقيـس اني مـش حنلـقو حد خـير من اسامــة
بلقيـتس...مصدومــه متوقعتــهاش مبتـسمة : موافــقة موافــقة موافقــة
عمته: مـــتاكدة.
بلقيس..وقفــت معاش قدرت تقــعمز من الصــدمة. و اعيونهـا كلهم دموع و جسمهـا يرجف و قلبهـا في حالـهه 😅
عمته:وين ماشـــية ؟
بلقيس..بنغســـل وجهي " و مشــت"
عمتــه..تشوفلها ومســتغربة : شن صــارلها وخيــرها قالــت موافقة اكثر مــن مــرة؟ زعما صاير شئ منــعرفاش !؟
بلقيــس..ركبـــت الدروج
و اية نازلة وجها اصــفر و خايفــة يكــون سفــيان حط ورقة ولا حاجة فالــباقة و انفضــحت
اسامة..فـــتح الباب
اية شبحتــلا و لقــت الباقة فــ ايده زاد الخـوف فـ قلبــها
تهاني: اهلــين
اسامــة:اهلين..هاك شــدي
تهانـي: لــ من هالــورد
اسامة: لــ بلقيس مش بتكلمــوها قلتـو
الاء..شــدت الورد من امــها: الله مــن قال تطــلع منـك الرومانسية جايب حتــئ ورد
اسامــة؛ بلا خفــة دمك
تلفـــت لقى اية واقفــة
و حاطــة يـدها ع راسـها بعد ما سمـعت كلام اسامــة اســتريحت
اسامــة: خيرهــا هادي ؟
تهانــي؛ وين نــعلم اني !
اسامة: كلمـــتوهم
تهاني:ايه
اسامــة ينحـي ف سبيـدرو : و شــن صــار
تهانــي: طلعــت من صالون خليــتهم يتكلمو عمــتك قالت قرار فــ ايــد بلقيــس نحكمـش بدالها
الاء..ضــحكت: هههههههههههه اني عرفت شــن الجواب مــعناها
اسامة..ابتــسم: بنركب نبــدل حوايجــي
الاء: اي تــخيل جاي حــوش خطيــبتك
اسامــة..شبحلهــا بتفنيصــه و ركــب
___________________________
بلقيــس...فالحمام اكرمكم الله
تشوف لــ نفــسها فــ المراية
ومبتسمة مش مـــصدقة كيف صــار فجاة هكــي ؟!
" قلــبي كان قريب يطيح لــما قالت اسامــة بيخطــب و بعدهــا اسامــة اختارها لكـن ويــن قالو بلقـيس شـعور الخـوف تغـير فجاة ويــسالو فيا موافــقة ولا لا "
طلـــعت من الحــمام. و نزلت
الاء..مدت الباقة : شـــدي
بلقيــس: من جــابه الــورد ؟
الاء: اســامة هههههههه رومانســية يا كبــدي
بلقيس..شدت الورد و شمــاته
واية تشــبح للباقة و ساكته!" علاش اسامـه تصـرف بالطريقـه هـادي ؟"
الاء: ماما قالــت قرار عنــد بلقيس ع اســاس منعــرفوش الجواب توا ههههههههه
بلقيــس: اقرصــيني لو ممكــن
الاء: عــلاش العفــو
بلقيس: كيف صار هكــي فجاءة ! ومعاهــا جابلــي ورد اقــسم بالله بيغــما عليا عارفة
الاء: العفو عارفينك فالحــزن يغما علــيك لــكن حتا فالفــرح فكينا منـه جو رقـيقات انتي ليبيــة يا ماما
بلقيس:كنتى تعــرفي ؟
الاء: ايه بيوم بس الغريب انه اسامة جاء لماما وقلها اخطبيلي بلقيس قتلك يحبك ولا من يوم نـحرق المحل وتكلـمتي معاه ويوم عطانا لابتوب قال ع خاطــر بلقيس نعرف اني احساسي عمره ما يكذبني
بلقيـس: اقسـم بالله عندي احسـاس شوية وتنوضيــني من نوم تقوليلي نوضى ..حطت يديها ع راسها
الاء:ههههههه تعالي ناكلو بــكلاوة الخـطوبة مامـا دارت قـهوة وحاجــات تعالي
بلقيـس: اسامة اهـنى ولا طلع
الاء: خـطيبك ف داره ..تعــالي هي
روان: نعم تفــضل
اسماعيل:كيف حالك وحال البيـبي ؟
روان: لو يهمك حالى راه مش هــذا حالـنا
اسماعــيل: متصل نطمن وبنــسكر بديرلي نكد توا نســكر راه
روان:سكر مش خأيــفة من فراقك راه ولــدي نربـيه بروحـي نقوله بوك معــنداش شخصية الله غالب يغــار من خالك !
اسماعيـل..بـاعصاب: شن تــقولي انتي نغــار شن بتاعــك !
روان: كذب ؟ علاش هكي تكره اسامــة شن دارلــك علي خاطر ضربك !! علاش ضربك لانـك ضربت اخته لو انت اخـتك المسافرة نقولو رجعـتت ليبيا وجاتك قتلـك راجلـي ضربني ولـزني تمشي تبوســله ايديه قوله ســامح اختي
اسماعيل: انتي بديتي تغلطي معاي فالــدوة هلبا وتقـللي ف ادابك معاي اني راجــلك ندير ما نبـي محـدش يدخـل بينا
روان: لا مش لعبة اني ! متقدرش لا انت لا غيرك يتحـكم فيا
اسماعيل: مشكلتي مـش اهنى اني غلـطت لما ضربتـك وقتلـك غلطت لكن خوك قلل من قيـمتي علي الاقل تاخدي منه موقف تنقصي خلطتك مـعاه مش تفرحي مــعاه وجاي لحوشنا وجايـب حوايج لولدي !!
روان: اقسم بالله راسي بينفــجر شن كميــة التخلف الـي فيك
اسماعــيل..بعــياط: تخلف صار ماشــي ماشي
روان: لما عقـلك يرجع لدماغك كلمنــي
صــكرت ع وجهه
حطت تلفــون وقعــدت تبكي
اسامــة..فتح الباب
روان..رفعـت راسها وعيـونها دمـوع..وقعـدت تمسـح فــ دموعهـا
اسامـة: سمـعت كلامـك كله كنــت جاي وسمـعتك تتــكلمي
روان: اســامة بالله متقــرباش ولا تكلــمه خليه اني حنتصـرف معاه
اسامة..قرب من روان..وطبــس مسح دموعـها بيــده : زمــان تمسحي ف دموعي بيــدك واليوم اني نمســحلك
روان..ابتســمت: كنت بكاي يا لطــيف زمان
اسامة:ههههههههه كلها بنات وامك خائفة عليا حتــئ شارع مدايرتلي علــيه مشكلة
روان..ابتســمت
اسامة: مش هنكلمه راجلك متخـافـيش بس معــاش تبكي ! مفيش حد يســتاهل تبكي علـيه دموعك غاليــات راه ..وقف.. تبي حاجــة مـني ولا نتصـرف معاه اني قوليلـي بس تـمام
روان: تــمام
اسامــة: نازلة انتـــي
روان: اي
اسامــة:نادى الاء نبــيها
روان: تـمام
اسامـة..خــش داره
اتــصل بــ ايهاب
إيهـاب: ايـوا
اسامـة: اليوم بنقعدو لصبـح قدام المحـل متنساش
ايهـاب: ان شاء الله تنجـح خطتـك الفاشـلة قال شـن بتغار الاميـرة وبتبعت الـفارس يحـرق المحل واحــنى نـشدوه هـلبا انت تصــدق
اسامة: وكان تنـجح ؟
ايهاب: كان تنجح نعــشيك برا. و كـان منجحــتش انت تعشــيني شن رايك
اسامة: تمام خــلاص لانه لو منجحـتتش مش حنعــرفه طول عمري الي حرق المـحل
ايهــاب:غير متقولش هكـي توا ينفــضح باذن الله
اسامــة: ان شاء الله
خشت الاء الدار
اسامة: بنسكر هي ماشي
ايهاب: ماشي
صــكر الخط وشــاف ل الاء
الاء: ناديت علــيا
اسامــة: ايه نبيـك توصلي لـ غفـران انه خطـبت اليوم
الاء: نعـم ؟ غــفران علاش ؟
اسامة:شاك فيــها ممكن ليها علاقة بحرقـت المحل !
الاء: لااا مش معقولة وعلاش تحـرقه هالفعـة !
اسامة: فوتــي الدوة محدش يسمع بالمـتوضوع اني مــداير حاجة فــ بالي فلازم توصل الدوة لــ غفران تصرفي
الاء: اني صورت الورد والبــكلاوة توا انـزلهم فيس نــقول خوي خطب واكيد حتشـوفها لانه ديمــا فاتحة نت !
اسامة: تمام اتصــرفي لازم تشوف راه
الاء: به لما تشوف شن حدير !
اسامة: كان نقولك اضــميه فمك !؟
الاء: وعد كلمــة ما تطلع مني
اسامة: بنمشي اليوم بنبات قدام الــمحل الثـاني لو هيا مرات تحرقلي المحـل الثاني
الاء:وعلاش تحـرق محلك من الاول
اسامــة:واااك بنشــرح قصدك توا
الاء: بالله عليك نبي نفهــم 🥺
اسامة: تصرفاتها غريبــة كل ما نجيب سيــرة المحل تتفـركس عندي احـساس هيا ممكن ع خـاطر نعامـل فيها ببرود هكي دارت
الاء: به شن الســبب انها تحرقلك محـلك
اسامــة...ناض ويدف ف الاء برا الدار: اطــلعي وراس امك غبيــة
طلعهــا و صكر الباب
بدل حــوايجه وطلع
دار بلقيس كــانت مقابلــة داره
كانت فاتـحة تلفونها وبروحهــا
اسامة..طــق الباب
بلقيس..تلفتت اول ما شــبحت اسامة تحــشمت طول
اسامة: اي مبارك مبارك
بلقيس: الله يــبارك فيك
اسامة: سالتك قتــلك يا بلقيس اني شــن حلمي انتــي شن قلتى
بلقيس..وهيا متحـشمة: جــراح
اسامة: به انتــي شن حلمــك ؟
بلقيس..ابتسمت: قاعد يتحــقق توا
اسامة..ابتــسم..وفهم المقصــد: بنمشي اني توا يقــولو وراء خطيبته من اليــوم الاول
نزل الدروج
وبلقيــس..وجها احـمر وتقول لــ روحها قــال خطيــبته ولا !!! صح هــكي ســـمعت ولااا !
________________________
اية..تتكــلم شات: اقــسم بالله قلبي قريــب وقف
سفــيان: يا ساتر خــوف هـذا كله
ايــه: قتلك معاش اتجي ولا حتــئ تفـكر تخــطم شفت قـريب نفضــحت
سفيتـان: به حلــو الورد ؟
اية:ايه حلوو هلبا خـوي خداه و عطاه لــ خطــيبته
سفيان: نعم نعم كيف خــداه! لــيك الورد
اية: ايه صح كنت مفروض نقــوله ليا هــذا و نفضــح روحي ولا به الي شــغلت دماغك ومكتبتش اسمـي ولا حــاجة تحسـاب روحك فــ مسلسل
سفيان:والله تصدقي قبل بنــكتب شعر بعدين قلــت اخى
اية: مهم معــاش تتعاود مش ناقصـة اقسـم بالله لتــوا خائفة قاعدة
ســفيان: به كيـف الرائ فالورد توا جايــبه لـيك انا
ايــة..تنهدت و مــردتش عليه
___________________________
ساعة 12 الليل
ايهاب ف سيارة وجنبه اسـامة
ايهاب: متاكد وصـلت الــمعلومة ؟!
اسامـة: ايه دارت لايك ع بوســت الي نزلوه العيـلة انه خطـبت
ايهاب: تمام معنــاها نستنو وخلاص
اسامــة: هــذا لــ بيصير
ايـهاب: تتفكر فالــعناد بينـنا !؟
اسامة: اكيــدة اهو بــدت تسكر كلها وتفـضا
مرت ساعــة
واثنــين و ثلاثة و اربعــة
و الفجر قـــريب
ايهاب..حاط راسه ع روشن وبــياخــده النــوم
اسامة..يشوف للمــحل
خطم واحد من الشـارع وقف قدام المحـل
اسامــة..ركز: ايهــاب ايهاب شــوف
ايهاب..رفــع راســه ويشــوف
الراجل طلع ولاعة وقعمز ع عتبــة المحـل
ايهاب: شكله هوا انزل انزل !
اسامة..تســرع ونزل
فـ لمحـة الـبصر كانو فــوق راسه وشـدوه
الراجل: غير خيركم شباب شــن فيه !
اسامة: شن بدير بيــها الولاعة كنــت !؟؟
الراجل: بنولع دخان خيركم شن صايــر
ايهاب..شــده بقوة : تكلم لا نكــسرلك سنونك ساعــة 4 الفجر وتقولي ادخـن شن ادير فالــشارع
الراجــل: غير خيركم شــباب فاهمــين غلـط راهــو والله مروح من حوش صاحــبي قلت اندخن قبل ما نمشي الحــوش لان الوالد مش عاجبه تدخــيني
ايهاب: بنفـــتشه
الراجــل: لا حول الله شن طحــت ف مرضى عالــصبح
اسامة..وخــر من علي الراجل عرفه مليــشي علاقة بشئ
حط ايديه ع راســـه وتنهد
ايهـاب: عـنده فلوس وتلفون وباكــو دخان
الراجل: وشن تبي يكون عندي يعني قتلـكم انتو مــش عارف منين طلعتو زي الــجن
ايـهاب..شاف لــ اسامة: شن توا ؟
اسامة..وقف..خبط ع كتف الراجل: سامحنـا يا طــيب فيه حد حرقلي مــحلي من فترة وندورو فيــه
الراجــل: مسامحكم مية مـية غير خــلونـي نمــشي ع حــالي توا
ايــهاب: برا خــلاص..وقعد يضحك لانه الراجل خاف
مــشى الراجل
ايهاب:ايه كيـف الرائ !؟
اسامة: نزيدو نقــعدو ل اذان الفجر لو مفيــش شئ
غدوا بنزيد قــفل وندير حســاسات
ايهاب: غالـيات الحســاسات
اسامة: شن بندير هـذاا مصدر رزقي توا كان ينـحرق تشـاو وممكن حتئ نــشوف عامل افريقـي يرقد فـيه نديرله مـعاش
ايهاب: تمام تعال السيارة صــقع
اسامة: تمام
قعدو ومفيـــش فائدة
مصــارش ولا شئ !
اسامة كان تعبان بيروح يرقد
صلو الفـجر هوا وايهاب
وصله الاســتراحة
ورجع الــحوش
كانت الــساعة 8 الصبح
امه بس الي تــفيق بكرى كانــت
تهاني: وين كنت طول الليــل
اسامـة: معا ايهاب
تهانــي: غريبــة مش عادتك تخــلينا بروحــنا طول الليل
اسامـه: معاش تتعاود
تهاني: امشي ارقــد وجهك اصفر رايح
اسامــة: تمام فيـه شن ناكل
تهاني: تعال نديــرلك حاجة
خش اســامة
وحط ايديه ع وجها ويــفكر مني زعما !؟
غفـــران توا الشك نقص اتجاها به علاش تتوتر لمــا نجيب سيرة المــحل
من لــيه يد فــ الموضوع ! استغفر الله العظيم
تهاني: عمــتك فرحانة بيك
اسامة..نسى: عــلاش
تهاني: شن عــلاش ع خاطر بتاخــد بنتها
اسامــة: اااه
تهانـي: مرات نكلــمها الاسبوع هذا نقولها عـادي نفرحو بيـكم قبل الــسنة ونشوف
اسامة: نبي نعرف علاش مســتعجلة بس مش حــيهربو راه
تهانـي: مش حنـستريح لين نشــوفك فرحان
اسامة..ابتـسم ومردش
ركب لـ داره
و رمى روحه ع ســرير كان تــعبان وبســرعة ما رقد !
_______________________________
الساعة 4 العصـــر
بلقيس..تشم فالورد
الاء..خشــت دارهــا: لا حول ولا قوة الا بالله
بلقيــس..تلفتت: خيــرك
الاء: ياسر الورد من امس وانتِ ف يــدك
بلقيــس: مــش مصدقة كيــف فجاة هكي صار !!
الاء: متعرفــيش اسامة شكلك كل شئ يصـير فجاة مــعاه متفهميش حتا كيف صــار وامتا !
بلقيس: طالع من الصبح هوا ؟
الاء:راقد الاخ حتــئ الــغداء مباش ينوض !
بلقيس: غريبة لــتوا ولا
الاء:ايه كلنا مســتغربين اقل واحد يرقد هوا ميــبيش ينوض وقال محدش ينوضــني!
بلقيس: زعما صاير شئ
الاء: لالا اكيده تعبــان بس هيا ننزلو وحـطى الورد الي ف يــدك من بكرى هــذا !
بلقيس..حطت الورد ع سريرهــا ونزلت مع الاء !
شوية وخــشت اية رفعت الورد وشــماته ورداته مــكانه وطلعت ❤️❤️
الاء: كلـها تبارك ماشاء الله و غفران دارت لايك ومعـلقتش
تهاني..تلفتت: لايك شــن قصـدك نزلتيهـا فالنــت انتي
الاء:ايه
تهاني: علاش نزلتيها كنت اني بنقــولها اختـي علاش تتـصرفي من دمـاغك
الاء: كانت حتــعرف زي توا زي بعديــن
روان: صح زي تــوا زي بعدين
تهاني: اختي وشهور نقنع فيـها وبعدين ضحــكتو عليا بكلمتين وطلعتوني معنديــش كلمـة مع اختي
تقوى:انتي شن الهدف من هــذا كله ان اسامة يــتزوج صح ؟ وهوا حــط شرط واضح وصريح يا بلقيـس يا لا
تهاني: اني كان متحكمة فيكم راه مـش هـذا حالي ممكن توا حتا متزوج خوكم مش نستـنا لن تسكر سنة
روان:اني بننسحب دايخـة راسي صـداع بكل !
______________________
الـمغرب
ايهاب فالاستراحة
طق الــباب
فتح وكان راجـل امه صـبري ومعاه فادية !
ايهاب..طبس: اوووو غـزالة
صبري: من لما شـفاتك هيا تتكلم عليك
ايهاب..رفعها ف حــضنه : تعـال
صــكر الباب وخش بــيها
فاديـه شافت الحوض سباحـة
فادية: بابا بــحر
ايــهاب: ههههههه بحر صار اهو تتــكلمي شن اســمي اني
فاديــة تشــوفله وساكتة
صبري: تحب البحر والرمــلة
فادية: بابا عــوم
صبري: صقــع شن تعومــي
ايهاب: تبي تعــومي تعــالي هي
صبــري: صقع علـيها
ايهاب: لا بنحـطلها رجليها فــ امية بس
حول سبيدروها وقــعمز ع حافة الحوض
وحطلها رجــليها ف المياه وتحرك فيهـم
فادية..رفعت راسها تشوف لــ ايهاب وتحرك ف رجليها : اهاب
ايهـاب: هههههه اهاب صار شـن تبي
فادية: عوم
صبري: مش عاجبتها رجليها بس تبي تعوم
ايهاب: صقع بعــدين تـمرضي
فادية: بابا نبــي عوم !
صبري: توا بتصـكر راسها
ايهاب..رفعها: توا نغيرلها رايهــا
خش بيها وحطها ع صالون وفـتح البلاستـيشن وعــطاها اليد تشوف لليد وتشوف لــ ايهاب مستـغربة
وايهاب يضــحك
طلع تلفــونه وقعد يصور فــيها ❤️
____________________
اسامة..كيف فاق من النــوم
نزل المطبخ شرب اميــه
تقوى: العــفو لتوا نوم غريبــة
اسامة: راسـي صداع ضـمي فمك
تقوى؛ امتا راسـك مش صداع انت
اسامة..شافــلها
تقوى سكتــت طول وطلعت
فتح دولاب الدواء خـــدى بنادول
خشت الاء و بلقيس المطبخ
بــلقيس..شافت اسامة تفركــست
الاء..شافت بــلقيس كيف تفركست قعـدت تضحك :ههههههههههه خيرك الــعفو
اسامة: خيرك تضــحكي
الاء..دارت يــدها ع فمها ومبتسـمة: لا شئ
اسامة: هكي يا بلقــيس
بلقيس..رفــعت راسها: كيف هـكي
اسامــة: متحشــمة مني قاعدة
بلقيس..توترت: لالا
اسامـة..ابتســم: وين عـمتي
بلقيـس: فــ صالون
*****
فرج: كيف تقــوله بعقلــك انت
علي: من شن خائف راجل كبيــر انتا ومـحدش عـنده حكـم عليك
فرج: اسامة يكرهني افــهم يفـــضح بيا ويقــلل من سمـعتي يبدا الي يسوا وميسواش يقول اهوا الي يشرب ويصلي ف جامع
علي: اسامة راجــل ميديــرهاش
فرج: ايه راجل وشدني من حوايجــي قـدام حـوشي شن تقـول انت هــذا توقــع منه كل شئ
علي: كان فضــحك اسامة تاخـد ما تبي مني
فـرج: خلاص سـكره موضوع الضغـظ ركب عنـدي شن صــار ف عبد الرحمـن !؟
علــي: راجع ليبيا غــدوا وبعدهــا بيمشـي تونس
فـرج: علاش مقـعدش فـ المانيا !؟
علي: غالــية تكالـيف عـلاج هلـبا حق العمـلية وكـم جرعة بس وبعدين بيكمل الجـرعات ف تونـس ارخـص السعـر قال حتا الماكلة غالــية غادي مقدرش عليهـا
فــرج: ربي يشفـيها الحق واعـرة راه
علـي: اكيــدة تعرف شن ندعـي انـي ربي يهدينـي ويسـامحني عالذنـوب الي درتها من وراء راســك انتا وعبـد الرحمن وما يصير شـئ لعيلتـي
فرج: ع اسـاس كنت ملائكة انتا فكنـي من الوهم بالله
علــي: خليني ساكـت توا خير !
____________
عمته: شن صــار فالصيانة
اسامة:ماشية اهو يا عمـتي بشوية بشـوية وخـلاص
عمته: احنى زدنــاك ثقل وتوا الحريقة والصـيانة
اسامة: غير شن تقولي
الاء:بلعكــس يا عمتي غيرتولنـا جو الحوش
تهاني: واني لقيــت مع من نهدرز الباقي كل واحد لاهتي ف حاله وديمــا هــما شادين هالقصــير ( تلـفون )
اسامة..يشـرب فـ شاهي
سمعو روان تعــيط : مامــا يا اسامــة
تهانــي:اخــتك تعـيط ربي يستر
اسامــة..ناض يجــري
ركب يجــري
خش لـــ دارها
اسامة: خيــرك شن فيه !!
روان: بطــني مش قادرة......اااه
تهاني:ارفــعها مستـشفي بســرعة يا اسامة
اسامــة: لبسيـها وشــاح ع راسها
مشى لــ داره خــدا مفتاح وركبها السيارة
تهانــي: استنا بنمــشي معاك
اسامة: تي تعيــط اما استنا تــعالو بسيارة تقوى !!
طلع بيها يـــجري !
مريــم..تشــوف لــ بوها وساكتة
عــبد الرحمــن حــاط ايديــه زوز ع وجه
يتـــبع
بقلــم محمــد مــالك
تعليقاتكـــم ولايكاتكــم ❤🌹