*** **** ******
عمار مستني يسمع شرط صفية
قالت .. ماليش صالح بامك واختك رجعتي لحالي في شقتي مش لخدمة حد
عمار .. سهله
زود فضل .. مش بس أكده هتمضي وصل امانه ب 100الف اجنيه قايمة اختي لحد ما يرجع جعفر ويمضي هو ونقطعوا الوصل بتاعك قولت ايه ؟
فكر لحظات وقال اللي فيه الخير مبارك وربنا بيسهله مادامت النية صلح ولم شمل
فضل .. علي خير مبروك رجعتك ي صفية
امها .. زغرطت وفرحت دخلت تطبطب عليها وتبوس أحمد قبل مايمشي ويروح بيت اهل أبوه
كيدة .. بعد تلت سنين هتمشي ياحمد والله اتعودنا عليك
صفية سكتت قدام عمار ومارضيتش تقول لها .. تلت سنين من البهدلة والكلام السم والفقر والجوع والحوجة
مشيت صفية مع عمار في نفس ليلة طلاق سمر التالتة ورجعت شقتها ..
____________________
سناء مرات منصور صاحب جعفر اللي في الكويت اول ماعرفت أن صفية رجعت اتغاظت جدا وراحت كلمته ماسنجر :
سناء .. جعفر ،صح رجعت مرتك
جعفر .. لا وبعدين لحقتي عرفتي ؟
سناء .. طب لا كي ولحقت عرفت كي جاوب صدق
جعفر .. اخويا ي ستي اللي رجعهه عشان احمد يتربي وسط أهله إنما لو عليا انا ماعيزهاش واصل
سناء .. هههههه طمنت قلبي
جعفر .. ماتفتحي فيديو اشوفك اتوحشتك اووي
سناء … ماحنا كنا مع بعض امبارح العيال لسه صاحيه وقاعده جانبي
جعفر … يوووه انتي مابتحبنيش زي مانا بحبك
سناء … انت اللي مش فاهم حبي ليك
جعفر .. هو الحب ايه غير قرب وعين تشوف العين وايد تلمس الايد و
سناء .. انتوا يارجالة كل اللي بيشغلكوا الجسم واللبس وبس
جعفر .. وانتوا ياستات ايه بيهمكوا؟
سكتت سناء عشان جوزها رن عليها فيديو فراحت تكلمه ،ست خاينه ربنا يجازيها علي أعمالها هي وكل ست سهله بترخص نفسها وتخرب علي ست غيرها حياتها ..
****** ****** *******
تليفون صفية بيرن تاني يوم رجوعها بيتها :
صفية .. الو
فوزية … مبروك ي فوئه فرحتلك والله
صفية .. حبيبتي ربنا يخليكي ويفرحك بعيالك مين قالك ؟
فوزية .. كلمت امك وحكت لي والله شاطره انك اتشرطي عليهم ايه عملت حماتك لما شافتك ؟
صفية .. هههههه اسكتي مش حماتي اوبس
فوزية .. ها ومين كمان احكي متشوقه اعرف
صفية .. وسمر كمان ونوح ومرته
فوزية .. هي مش سمر اتجوزت ؟
صفية .. لا اطلقت
فوزية .. تاني
صفية .. قولي تالت ،المهم حماتي خدت احمد بالحضن وسلمت عليا قعدت شويه تحت سلمت علي سمر بس شكلها متغير كنها مهدوده شويه ومش متكبرة زي الاول
فوزية .. عله اتصلحت
صفية .. بقول أكده دي اعتذرت لي وحقت نفسها كمان قالتلي اللي بيحصلي ده بذنبك
فوزية .. زين أكده الرجعه حلوه ومافيهاش خلافات ان شاء الله
صفية .. يارب نفسي اربي ولدي وارتاح بقي بعد تعبي الطويل اللي انتي عارفاه
فوزية. . ايوا خابره طبعا وجوزك جه علي اكده ؟
صفية .. لا هياجي كمان سبوعين
فوزية .. علي خير اتوحشتيه عاد ؟
سكتت صفية لحظات وبعدين ابتسمت بس ردت بالنفي .. لا علي ايه يعني لما اوحشه انا بالاول ماعيزاش اترمي عليه ويكون ناسي
فوزية .. لساكي مافتحتيش صفحة جديدة صح ؟!
صفية .. ومين يتعمل فيه اللي اتعمل فيا وينسي بسرعة أكده دا يبقي جبلة ويستاهل يتبهدل الف مره
فوزية .. علي قولك ،ربنا يسعدك ويهديهولك
صفية ..يارب ايه عامله انتي وعيالك
فوزية .. زينين والحمد لله سعد بقي بيشتغل في الإجازة والدنيا ماشيه
صفية .. الحمد لله سلميلي عليهم اكتير
فوزية .. ماشي ،هقفل عشان احضر لهم الغدا
صفية .. ماشي وانا هقوم اسبح احمد وانزل تحت اشوف حماتي ومرت نوح وبتها
فوزية .. سلام
سلام …
**** ****** ******
قعدت صفية شوية علي كرسي في الصالة وشافت اثر العروسة اللي اتجوزها جعفر عليها
دخلت اوضة بابها بايظ وموارب لقت فيه عباية وكام بيجاما علي الارض .. فكرت شويه معقول هدومي كانت مرميه هنا وقبل ماجي حماتي رجعتهم الدولاب تاني !!
للاسف هي دي الحقيقة ماعرفتش تاخد حاجتها ولما جت امينه اتجوزت علي عزال صفية يدوب شالوا هدومها من الدولاب وحطوا هدوم الجديدة صفية شايفه كل حاجة وكأنها بتحصل قدامها لما بتبص في اوضة نومها بتتوجع اووي وتحس أن حد بيعصر قلبها بأيده هنا جعفر شال امينه
وهنا ضحك معاها
وهناك اكلها بايده ماهو كان عريس وبيتدلع
بصت علي السرير وغمضت عينيها جامد وهزت رأسها : لا لا لو فضلتي تفكري كدا مش هتعمري ي صفية انسي كانت وقت وعدي وانتي الأولي والأخيرة أن شاء الله
دخلت الحمام وملت البانيو ميه ومستنيه احمد يصحي من النوم عشان تحميه وتنزل تحت لحماتها افتكرت كلام المحامي لما اتصلت بيه قبل ماتغير رأيها وتطلع لعمار ودار بينهم حوار :
صفية .. استاذ رائف اسفه لو كنت قلقتك
رائف .. ولا يهمك ي صفية ايه في حاجة ؟
صفية .. جعفر عايز يرجعني ؟
رائف .. جوزك رجع من السفر ؟
صفية .. لا دا اخوه اللي هنا اعمل ايه انا مستحيل اسامحه بالسرعة دي …!
رائف راجل حكيم رد .. بصي ي بنتي رجعتك في الوقت الحالي أصلح لك مادام ظروفك صعبة ومافيش حد بيساعدك علي تربية ابنك ومعني انك مش عايزا تصالحي جوزك بسرعة يبقي في نية للصلح جواكي فرايي ترجعي وتتوكلي علي الله اهم حاجة تبعدي عن المشاكل وتقعدي مع ابنك لوحدكم من غير لا اخوه ولا أمه
صفية .. تمام ، تشكر ي أستاذ ،ربنا يكرمك ومايحوجلك ولايا أبداً
رائف … عفوا ،انا تحت امرك في اي وقت
صفية ،، ياصفية
انتبهت لصوت حماتها اللي بتنادي من تحت ففتحت الباب وردت :
نعم .. ايوا في حاجة
حماتها .. انزلي حالا عايزاكي
صفية باستغراب .. هحمي احمد طيب وانزل
حماتها .. لا لاول
صفية .. وه في ايه ياتري ..
يتبع
#أماني_عنان
STAI LEGGENDO
صعيدية في محنة
Mistero / Thrillerقصة من قلب الصعيد لفتاة حائرة تتابع بينكم في التعليقات وتنتظر النهاية لسماع اقوالكم ، فهي في محنة كبير مع زوج متطرف فكريا وأخلاقيا ،غريب تعاني الفقر والحاجة بعد وفاة والدها وضرب زوجها لها ،تطرد من شقتها وهي عروسة لأسباب ملفقه بعد ذلك تدخل في دوامة...
الحلقة الثالثة عشر
Comincia dall'inizio
