صعيدية في محنة

الحلقة الثالثة عشر

#صعيدية_في_محنة
ح الثالثة عشر

لما رجع جوز سمر ملقاش اي عزال في بيته اتفاجئ ،،، مش معقول انسرقنا ؟؟
بص جوا علي مراته ماشافش حد خرج علي بيت اخوه واول ما رن الجرس فتحت له مرات اخوه بص لقي بنته عندها :
الحج .. السلام عليكم ورحمة الله
مرات اخوه .. وعليكم السلام اهلا ي حج اتفضل
الحج .. امال سمر فين الشقة …
وقبل مايكمل كلام جريت بنته عليه وقالت له يظهر أن مراتك خدت العفش وكل حاجة ومشيت
الحج اتعصب وعيونه وسعت من الغضب .. ازاي الكلام دا ؟ صحيح ضربتها كف امبارح بس دا مش معناه أنها تاخد عفشنا وتمشي انا رايح لناسها اشوف ايه الحكاية دي

وصل عندهم طلعت له امها : اهلا ي حج اتفضل
الحج .. فين سمر ؟
خضرة .. جوا
طلعت سمر حاطة أيدها في وسطها وبتقول له في حاجة
الحج .. انتي اخدتي عزالك والعفش من شقتي ؟
سمر .. ليه
الحج .. جاوبي
سمر بعند … ايوا
الحج .. انتي طالق ،طالق ،طالق

سمر لطمت ، يامري ماكنتش اقصد كدا ولا عايزا الأمور توصل لاكده
خضرة مش فاهمه حاجة .. صلي علي النبي ياخويا وادخل بس جوا بلاش فضايح
الحج .. خلاص مابقاش في بينا خير اسألي بتك ايه عملت ولما ياجي جعفر نتكلم في التفاصيل هي كدا وصلها حقها وزيادة ،قايمة ومؤخر وكله

سمر جريت عليه ومسكت أيده بتترجاه وبتحاول تفهمه .. ماكنتش عايزا اطلق انا كنت برد علي قسوتك وضربك ليا امبارح فاكره انك هترجعني وتصالحني وتفكر الف مره قبل ماتزعلني ..

الحج .. شد أيده وقال انتي خربتي علي نفسك بيدك ولا فهمتيني ولا تعرفي يعني ايه عشرة راجل من الأساس .. 😐

امها ساكته وكأنها متعودة علي حوارات سمر ومشاكلها كدا أطلقت للمره التالتة ورجعت بيت ابوها من غير ماحد يضربها قلم علي وشها أو يقول لها اللي عملتيه دا غلط ..
تأليف أماني عنان
سمر .. كفاية كدا انا تعبت تعبت
امها سابتها ودخلت اوضتها .. حسبي الله ونعم الوكيل لله الامر من قبل ومن بعد

نوح كان مع مراته بيكشف علي بنته عندها سخونية جري بيها يكشف ويطمن عند ضناه
واقف اسد ومع ابن اخوه اللي بيبعت له فلوس كل فترة ويصرف عليه مش سائل ولا مهتم
لما رجع وعرف اللي حصل ماقالش حاجة كل واحد حر في حياته عيلة مش معروف لها كبير ولا مسؤول اهم حاجة عندهم يغلطوا بس في السر ماحدش يسمع بيهم ولا يتقال عليهم كلمة
___________________

زكية بتتصل بامها وصفية قاعدة مع عمار وأخوها فضل :
كيدة ..  ايه عامله ؟
زكية .. الحمد لله بخير ،كيفها صفية
كيدة … شكلها هترجع بيتها اسكتي اخو جعفر هنا وبيصالحها
زكية .. معقول يامانت كريم ي رب
امها .. هي غلبانه وحظها قليل
زكية .. لسه زعلانه مني يامه؟
امها … الصراحه ايوا انتي زودتيها وجيتي عليها مع الزمن ي زكية
زكية … مانا صالحتها
امها .. مش كفاية علي قد الزعل بتكون المحبة والعشم
زكية .. خلاص انا هاجي بكره اراضيها وابوس راسها
امها … ماشي خير ماهتعملي