قدري

قراءه ممتعه❤😜

بعد فرحي باسبوع اكتشفت ان مراتى على اتصال بالعالم ال تحت الأرض وكانت مخبيه عني والا ماكنتش اتجوزتها انا سبتها في الاوضه وخرجت اجيب كوبايه مايه ،جبتها ورجعت ولسه مادخلتش من باب الاوضه سمعتها بتقول

برايمر...كونسيلر...كونتور...هايلايتر

وياريتها على قد الاربعه دول دا طبع فيه "برونزر"
كوبايه المايه وقعت من ايدي
ياحزنك الاسود ياوليد ودي الواحد يتعامل معاها ازاي هوا انا ناقص المهم خبطت ع الباب علشان لو هما موجودين تصرفهم ولا اشوفهم ولا يشوفونى وبالفعل دخلت مالقتش حاجه الحمدلله

قعدت على طرف السرير زي اللي خايف من امه لتقول لابوه انه شرب سجاير وقريت كل القرآن اللي انا حافظه وخلصته ودخلت على التواشيح والاناشيد الاسلاميه ماهو العمر مش بعزقه ياجدعان
وبعد ماقربت من ربنا ونسيتها خالص قالتلى:ياوليد انا ليه لما قولتلك نروح اسكندريه اسبوع قولتلى مابتحبش البحر؟؟
قولتلها:ايه دا لا استني بقي عندك وبكل غضب وعصبيه كأنها شتمتنى بامى
مين قالك مش هانروح البحر
بصتلى باستغراب
ايوا بحبه انا مولود فى العوامه لا طبعا نروح انا ماسمحلكيش تجيبي سيره البحر قدامى انا بحبه اكتر من عم زكريا البواب
طبعا دا اي كلام انا بخاف اغرق وانا فى البانيو بس ازاي ارفضلها طلب اقسم بالله ياجماعه قالت التعويذه كامله من اول البرايمر مرورا بالكونسيلر وصولا للهايلايتر
المهم امى لاحظت انو انا بسمع كلامها عمال على بطال من ماتتكلمه ولما ضيقت عليا في السؤال حكيتلها
قالت:لا يابنى ماتظلمش يمكن دي حاجات بنات من بتاعة اليومين دول قولى تانى كده هى قالت ايه
قالت برايمر وكونسيلر وهايلايتر وبرونزر
بصتلى بخوف كده وقالت:هى قالت برونزر؟؟
ايوه ياما قالت
لا البت دي ملبوسه
طيب ياما اقولها انك قولتى كده
وشها قلب الوان
يخربيتك وبيت شكلك وانا مالى اوعى تجبلها سيرتى انا ناقصه تقلب عليا
استغليت الفرصه
قولتلها هاتى عشر تلاف علشان هي دماغها والسفر
خد يااخويا بس قولها ان انا اللي مدياك الفلوس وانى بحبها واي حبشتكنات كدا علشان ماتزعلش منى وأول ماترجعوا من السفر هاجبلها شيخ
ولما رجعنا من السفر قعدت انا وامى مع شيخ من بلدنا كده واحنا بناكل لقمه مع بعض حكينا الموضوع
الشيخ قلع الطاقيه وهرش فى راسه وقال لا الاسماء دي تقيله ماليش صرفه معاهم
ياعم يهديك يرضيك قال طب هقعد معاها اقولها ال انتوا قلتوه واشوف يمكن انتوا ظلمه اصل الاسماء دي عشيره بحالها
وانت عرفت منين ياشيخ انهم عشيره
قال اصل اسمائهم غريبه اول مره اسمعهم
ندهت عليها بكل أدب ازواج مش خوف منها لا دا حب
ياحبيبتى ياللى ليا...بعد كل الكون ما باعني
دخلت وسلمت وقعدت
الشيخ بعد ما قرأ ايه الكرسي بصوت واطى يدوب انا سمعته قالها
يابنتى انتى تعرفي الكونتور
اه ياعمو
يانهار اسود ومنيل
طيب يابنتى بالله عليكي تركزي انتى تعرفي الكونسيلر
ايوه ياعمو الكونسيلر اعرفه دول عندي جوا
انا سمعت دول عندي جوا وقمت ادور على شبشبي عشان اروح الجامع اشوف لو فى اي صلاه فاتتني
الشيخ راح ماسك ايدي وقايلى تلاته بالله العظيم مانت قايم قعدت وامري لله
الشيخ قال يابنتى دول ببستخدموكي من امتى
قالت دا انا اللي بستخدهم مش هما اللي بيستخدمونى
الشيخ سمع انها اللى بتستخدمهم من هنا وقام يدور علي شبشبه تقريبا هايدور لو كان فى اى صلاه فاتته برضو ولا حاجه
مسكته وقولتله تلاته بالله العظيم مانت قايم
و اول ماقالت عندي قدهم تلات اربع مرات هروح اجيبهم
قمنا انا وهوا نخبط فى بعض ويدوب لحقنا ناخد حاجه نلبسها فى رجلنا لما طلعنا بره لاقيت الشيخ
معاه هاف بوط جيت اضحك ماعرفتش لانى كان معايا جزمه امى
المهم فضلنا برا بتاع ربع ساعه وامى جوا لوحدها ومستنين اول صرخه لامى ومتفقين نكسر الباب عليهم ونقول فى صوت واحد "آيه الكرسي"
ونحرقهم زي ما عزت العلايلى حرق عادل امام فى الانس والجن
المهم عدي بتاع نص ساعه ومافيش اي نفس ليهم
الشيخ اتنهد كده وقال الحمدلله تلاقي الاتنين ماتوا وخلصنا من شرهم
قولتله انت بتقول ايه ياعم انت استنى ندخل نشوف في ايه بالهاف بوط اللي انت لابسه ده
المهم دخلت من غير ما اعمل صوت والشيخ ورايا
لاقيت امي بسم اللة ماشاء لله وشها صغر عشر سنين وبقيت زي القمر انا فكرت ان دا جن من بتوع مراتى لبسها خلاها شباب بس اكتشفت الحقيقه لما امى قربت مني بكل حنيه الامهات وراحت رزعانى بالقلم وقالتلى
هات العشر تلاف إللى انت خدتهم تسافر بيهم انا عاوزه اجيب كل أنواع البرايمر والكونسيلر والكونتور وكله كله
ياما انتى تلبستى ياما
قالت دول أدوات مكياج ياجاهل مانت طالع لابوك كان بيمسك قلم الكحل يصحح بيه للعيال في المدرسه.

ايه رايكوا مش انا ال كتباها
استنوا الروايه هاينزل البارت الاول والتانى بعد ساعه ونص وان شاء لله تعجبكوا والتنزيل هايكون يوم ويوم

دمتم سالمين❤❤