#الابواب_الخمس
للكاتبه Reem
البارت الثاني والعشرون
ما ميت كبل بس حافظ التابوت
لان كل ما انام اتحلم بنعشي
انا امبلل رموشي بدمعة المعتاز
انة دموع الفرح ما وصلت الرمشي
وكت الخير عشتة وما شفت بي خير
صاحولي ملك بس ما شفت عرشي...
عندي عيون بس محسوب عل عميان
انا امفتح ولكن ما شفت كلشي
احلم بالفرج واترس الضلمة حجار
ضل هواي ليش انكول ما ضل شي
شيمشي العمر من اوصل الخمسين
انا بعشريني واكف عمري ما يمشي
هدأ العصار والكل واحد صافن بوجهه الثاني موعينا غير على عياط نجم وهو يركض عليها
نزلت اركض والطم على راسي وكلها ركضت عليها
نگلبها يسره يمنه مالها اي نفس
نجم : يحركها ويعيط ذكرى تسمعيني افتحي عينج
خوله : ولكم شيلوها للمستشفى البنيه راح تموت
ركض نجم للشارع يشوف تكسي او احد ياخذها الكل نزل ويباوعون عليها شون غركانه بدمها
خوله : الله ياخذكم جلاب ولكم ماعدها شى اشرف منكم كلكم وتعيط وتبجي
صمد : ماسويت شى ماادري شون دفعتها والله ماادري ويريد يلزمها جان تعيط خوله
خوله : لتلزمها اياك هاي ايدك القذره حرام تلزم وحده مثلها وخر منها
عمشه : ارتاحيتن يلكحاب كتلتنها عبن اشرف منجن وماتعرف بس الله عسى حوبتها ماتتخطاجن وترد لبيتها وجهالها واطردجن طردت الجلب
صالحه : احنا شعليه سهاد وتحجي عن رجلها وهاي بدعه سوت الهوسه وانفضحت جنتج يعني بعدجن ادافعن الها بعد كل السمعتنه
بديعه : شووفيها بعينج واحفظي شكلها انتن تلاثتجن هذا دمها يجي يوم ويحرگجن حرك عسى الصار بيها يصير بيجن اضعاف واشهك من البجي واكول مابيها شى وكعه وهسه تكوم بگلبي اكول هاي اختي وتعرف مالي احد بلدنيا غيرها وماينطيها گلبها تعوفني وحدي
دخل نجم يركض ودموعه مابطلت تنزل دنك شالها نجم واني ادك والطم وابجي
صمد : انطينياها چلب لتلزمها
نجم : ادعي الله تعيش واله ياصمد موتك على ايدي
عمشه : يمه اركض بيها يبوووو على الطركاعه الطاحت بينه
اسكت صمد موش وكتك البت تصفى دمها انگسرت ايدك چاهيج كالوها اخذوها يمه
بديعه : طلعنا نركض ويه نجم اني وخوله وصمد ضل بس فاك عيونه ممستوعب الصار وهو اصلاً جبان بهيج مواقف صعدناها بلسياره ضلت بحضني وحضن خوله ونجم ليكدام طول الطريق واحنا بس نبجي والسايق من شاف حالتها ساق سريع
وصلنا للطوارئ نركض مثل المخابيل
استلموها من عدنا جان حالتنا اشبهه بلكابوس واحدنا يريد يصحى منه بس مديعرف شون
كعد نجم بلكاع يبجي ويضرب راسه بلحايط واني وخوله گباله والرايح والجاي يباوع على حالنا فاقدين وكل همنا تصحى
وره دقايق اجه فلاح وعبيد وبقو واكفين ينتظرون مثلنا محد اتجرأ يحجي ويه نجم وخاصه جان اعصاب وبس يبجي حتى اخوته صافنين عليه
خوله : وين اخوكم النذل الساقط ليش مااجه فوك ماوكعها من فوك مكلف نفسه يجي
عبيد : تقرب من خوله وكال الها اسمعي خوله وانتي هم بديعه الي يسألكم واكعه من الدرج ومنعرف شون
خوله : خوش والله ونخلي صمد يفلت منها مو
عبيد : هي شنو يفلت منها عركه بين مره ورجال وتصير يابو يضربون نسوانهم ويكطعوهن وحتى يجوهن وما ماتن هاي شويه الوكعه قويه وهسه تطلع منها مااريد وحده منجن يفلت لسانها وتحجي حجي ماصخ البنيه تنزل من الدرج وكعت قابل هيه اول وحده توكع من الدرج
بديعه : هي ما وكعت شفته شون دفعها شبه شالها وشمرها وهي سوده عليه من التعب والقهر صايره عظمه وهو مثل الثور الهايج شالها بسهوله الله يكسر ايده بجاه النبي وبليه گلب وكعها من فوك
عبيد : انتن ليش متحجن الحق تره صمد هم معذور واحد يكولوله مرته تحب اخوه واخوه الغبي يأكد كلامهم شتردون ياخذها بلحضن غيره واحد يلزم ركبتها ويذبحها
خوله : كلكم مشتركين بأذيتها حتى نجم هذا اليبجي عليها هو السبب لو ساكت مجان كبرت وانت لو راكع مرتك على حلكها وساحلها من شعرها ومدخلها هيه واختها للغرفه وممكبرات الموضوع مجان هسه احنا هنا ولكم شنو انتم من مله واحدكم عايش ويتنفس على اذيه غيره ولا واحد منكم طلع عنده غيره ورجوله
فلاح : صوتج ولتتجاوزين لتنسين نفسج احنا بلمستشفى والكدامج اخوتج الكبار
خوله : يااخوه من انعل ابو هيج خوه زفره ولو مني ولحد يحجي ويايه وخرت منهم واني ارجف حتى عيوني مااكدر اغمضهم
شكلها مديروح من بالي
عبيد : عقلي خوله وبليه مشاكل
بديعه : خلي تطلع منها سلامات هاي المكروده وبعدين النا حجي
ضلينا ننتظر كل دقيقه بعمر كامل كل دقيقه تتراوالي ضحكتها سوالفها حركاتها حتى دموعها وزعلها
سمعت اذان المغرب وشهكت
ولكم صايمه ياناس مكان ماهسه تفطر ويانه وبحضنها جهالها جاي تصارع الموت لكم عيني خلي يحطون شويه مي بحلكهه نمشي بلسوك وتكول عطشانه يبدعه شوكت يأذن من صخام الصخمني وكمت الطم على وجهي حييل فقدت لزمني فلاح
فلاح : كاافي ليطردونه ممنوع الصوت العالي
بديعه : صايمه وعطشانه وتلوب روحها على جهالها كولي شون اسكت واني قبل اقل الساعه جنت وياها واضحك ونسولف
فلاح : ادعيلها اطيب راح اجيبلج مي وافطري أذن
بديعه : اشرب سم شون افطر وهيه جوه مافاطره
فلاح : ميصير لازم غير أذن ياعيني
جابلي مي بس حطيت شويه بحلكي واشهك عيوني اجت على نجم المبطل بجي ابد قربت المي منه وكتله اشرب
نجم : من ورايه هيه جوه كله مني عبالك ركبني شيطان واني اتعارك ويه صمد شون طلعت من لساني هاي الحجايه شخبلني لهسه اكول يمكن مكايلها ومتوهم نومتها هسه من ورايه والله
خوله : اي من وراك وابقى الطم لان انت وصمد واحد انكس من الثاني
بديعه : كافي خوله فدوة
طلع الطبيب وطفرنا عليه
الدكتور : اريد افهم هاي وكعتيش هيج تسوي مريضتكم وكعتها مال موت
نجم : شون يعني رحمه لاهلك فهمنا
الدكتور : واكعه على راسها وصاير كسر بلجمجمه ونزيف حاد واصابه حاده بلدماغ
تقنعوني هاي وكعة درج
عبيد : اي والله دكتور وكعت درج وهاي كدامك الكل واسألهم
الدكتور : هي بنيتها حيل ضعيفه ومبين سوء تغذيه وتعب وارهاق وهاي سببت مشاكل عدها وهي متجاهلتها واجت الوكعه وهي ماعدها مقاومه ولا حيل وتحمل والمكان الواكعه عليه حساس وبقوه سببت هاي المشاكل كلها وضعيتها صعبه كلش وحالياً سوينا النكدر عليه والباقي يم الله راح تبقى بالانعاش ونراقب تطور حالتها
نجم : يعني مطيب متصحى
الدكتور : وضعها الصراحه ميبشر بخير وكلشي بيد الله ادعولها
بديعه : عافنه الطبيب بعد مدخل اليأس بگلبنا خوله كامت تضرب على راسها ونجم يروح ويجي ويبجي
نجم : ياكواد ياصمد وروح ابويه اذا صار بيها شى لا اذبحه لك عاااااار
عبيد : تخبلت انت التحجي عنها مرته غيرك واحد يطم روحه ويختل مو كاعد هنا يم بابها تبجي مثل النسوان
نجم : عوفني انت الثاني خليت الرجوله الك روح حاسب مرتك القذره
عبيد : وليش احاسب مرتي محجت شى غلط ولا اتبلت انت بنفسك اكدت الحجي وكفت كبال الكل وحجيت وشى طبيعي صمد يتخبل لك هاي زوجته ام جهاله مو صاحبته لو وحده من الشارع يشوف اخوه يحبها وحاط عينه عليها ويسكت شون ترهم مكوده لو بيت واذا تريد اطلع قهرك بواحد زوجتك هي الفضحتك وخلتك بحلك اخوك
نجم : هاي اول وحده لازم تتحاسب
وطلع نجم يركض
خوله : ولك وين رايح
روحي بدعه وياه عفيه وهم شوفي الجهال هسه اكيد متخبلين على امهم
بديعه : مااشي وركضت وراه لكيته على الشارع يأجر تكسي وكفت بصفه ومحجيت اي شى اجر وصعدت ليوره وهو ليكدام فتحت الجامه والهوا بارد يضرب بوجهي ينشف الدموع الكعد تنزل على خدي متلحك الدمعه تنشف تنزل البعدها جنت اكول منو الغلط بهذا كله ومنو يتحمل كل الصار اني الي بحسن نيه ردت افضحهن واخلص منهن ومن شرهن واخلص ذكرى ويايه ومن خوفي عليها ومن السمعته كبرت السالفه بعياطي وهنه استغلن هذا الشى
لو نجم الفقد اعصابه واكد كلامهن وخله صمد يتخبل ويشمرها بلا وعي
لو صمد الجان معيشها بمرار وضيم وقهر ومنطاها حتى مجال تحبه بلعكس كرهت عيشته ولوما الجاهل جان هجت وحدها
لو اهلها العافوها وحدها وهمه يعرفون كلش زين كعد تعاني وممرتاحه وكل يوم محسوب عليها بجهنم ومحد حرك ساكن وحاول يتقرب منها ويفتهم ليش رجعت لصمد قبل كم سنه وحكمهم الزعل ونكروها وعافوها تواجهه حياتها وكأنهم يكولون الها موتي موت بطئ تستاهلين
لو ذني امهات السحوره وانضافت الهن سهاد الجنت اعتبرها خنوسيه بس ماعدها أذيه بكد صالحه وساهره طلعت اخبث منهن ويوم محجت ورادت تخبث ضربتها لذكرى بأهم مكان بشرفها والله اعلم شنو نتيجه السوته
يجوز تفقد حياتها وتموت
شهكت واني اكول انجبي متموت ذكرى راح تبقى وترجع احسن من قبل واكعد اخيط بجايم الجهال وبعد جم يوم تعيد ويانه وتخلي شرهب بحضنها وتلعب وياها وتفرح لان اول عيد هيه عدها
رفعت عيونه على السما وجانت النجوم مختفيه الجو مغيم وبيها مطره واني اكول ربي هاي فقيره ومؤمنه والعيبه متطلع منها وشريفه وانت اعلم بحالها خلتني حتى اني التزم بصلاتي ماتعبت من عمتي وهيه تعلمها حتى تلتزم وتذكرك يارب بجاه عرشك وعظمتك رجعها لجهالها مو لخاطر احد لخاطر ذوله المشافو شى منها
وصلنا للمنطقه انطه الكروه ونزل يركض شايط ودفر الباب وطب واني اركض وراه
نجم : ولج سهاااااااااد
طلعت عمتي تركض وسهاد من غرفتها وصالحه وساهره نزلن يركضن جان يسحبها من شعرها
سهاد : ااااااااخ عوفني حقير
نجم : اليوم اشوفج منو الحقير
نزع الحزام ودك على جسمها واني بس اتفرج ولا وخرته وعمتي وذني البرابيك جيتن عليه حتى يمنعنه وهي تبجي وتعيط وتحجي
سهاد : لك تضربني علمودها اي اكيد تضربني غير كحبتك هيه
نجم : لج هاي اشرف منج ومن عشيرتج ومن كل البلبيت ماكو غيرج الساقطه والادبسسز واني صوجي بقيت وحده منحطه مثلج بحياتي تعاالي جرها من شعرها حيييل ترجعين لاهلج وانت طالك وباجر اطلع ابن ستين جلب اذا مطلكتج
سهاد : طبك مرض احسن خلصت منك ومن هذا البيت الجايف
عمشه : لك يمه عيفها خلي تولي عساها لاتهنت
ضربها على عيونها حيل وضلت تكمز وتعيط
صالحه : كاافي لك راح تموت بيدك
جان يضرب صالحه بلحزام حييل وساهره وهنه تخبلن عمتي وكعت يم رجله
عمشه : يمه اغديلك فدوة لاتشيش اركد الوادم كلها راح تسمع ونصير علچ بحلوكهم
نجم : اني اريد نصير وخلي ذكرى يصير بيها شى اله احرك البيت عليكم
عمشه : يمه والوادم راح تاكل وجهه ذكرى چا هيه هينه ماينحط الها دوا يايمه واطيب
چا شيكولون تحب حماها
نجم : لاتذبين النار عليه يمه انه محترك وابو ابويه شايفه بعيني
عمشه : اعرفن يايمه بسگ وفكر زين چا الوادم تريدلها سالفه وتلوج بيها البت شونها
بديعه : وضعها خطر عمه ذكرى دتموت
عمشه : سوده بوجهي يمه الركده موالج يلحنينه
راحت سهاد للغرفه اخذت جنطه طلعت تعرج وتبجي وتون من جسمها وايد لازمه جنطه بيها وايد الثانيه حاطتها على عينها مبين ضربته قويه ولزمت الباب ودتطلع
بديعه : حوبتها متروح واتذكري كلامي طبتج لهذا البيت هجمته وعساج ماشفتي يوم راحه مثل ما أذيتينا
سهاد : يطبكم طوب وركعت الباب وطلعت
بديعه : وانتن الساكتات مااكول غير الله موجود هو المنتقم الجبار
صالحه : واحنا شكو يمه حاسبو نفسكم تعرفون ذكرى عينها على حماها وساكتات
نجم : قسماً بالله اذا ماصعدتن هسه انومجن بصفها واريد اشوف ياكواد من اخوتي يوكف بعيني
عمشه : حسبي الله عليجن من حيايه ارتاحيتن يبنات غنيه حركتنهه ولزمتن رمادهه
جان تفتر الدنيا بعمشه ورادت توكع ركضت عليها ولزمتها هااي عمه شبيج
عمشه : يمه الدنيا تفتر هييج بيه وافادي يوجعني والنفس كوه اجرنه
بديعه : تعالي اكعدي وجبت مي وغسلت وجهه ونجم دخل لغرفته مدري شيسوي
وذني وحده غمزت للثانيه وصعدن
بديعه : عمه الجهال وينهم فدوة شو هدوء
عمشه : يمه فوك مااعرفن بيهم مالهم حس
بديعه : عفت عمتي وصعدت اركض وخايفه شون مالهم حس فتحت باب غرفتي ماكو احد رجعت لغرفة ذكرى فتحتها لكيت بان حاطه شرهب بحضنها وبلال مدد بصفها وناي تلعب وياهم
يمه سوده عليه وطكيت بجي وركضت عليهم
بان : اجتي ماما
عمر بان هنا ٨ سنوات تفتهم وذكيه ودوم تحب تساعدني بس اني اخاف عليها لان صغيره وبس هيه عندي
حضنتها شجابج هنا بنتي
بان : جانو يبجون وجبت بلال واجيت يمهم
بديعه : عفيه بلسباعيه ادور شو يونس وينه
بان : صحت عليه مجاوبني فوك بلبيتونه خاتل
بديعه : طلعت ادور عليه صعدت لكيته خاتل بلزاويه وحاط ايده على وجهه وضام رجله اويلي عليك يمه تعاال عمه يونس ليش هنا كاعد بارده راح تتمرض
يونس : ماما ماتت
بديعه : ياستار حبيب تعال ماما هسه تجي
يونس : بابا شمرها وطلعت دم وكعت بلكاع تأذت
بديعه : شفتها انت تقربت منه لكيت عيونه دم من البجي
يونس : ما احب بابا خلي يولي ضرب ماما وكعها
بديعه : حضنته وخليته بحضني الله يشيلك ياصمد عساك بنار جهنم
بست راسه تعال حبيبي يم خواتك خطيه يخافون
يونس : عمه اروح لماما هسه ابوسها واطيب هي من يوجعها راسها تكول بوسني واطيب وهسه راسها يوجعها اخذيني الها ابوسه
بديعه : ااااااه يلمصيبه الوكعت علينه كمت ابجي متحملت وكتله نروح الها بس مو هسه تعال انت بطل ورجال لتبجي هسه نايه تخاف وتبجي
يونس : اريد ماما
بديعه : تجي حبيبي تعال خلي ننزل بارده بطنك هسه توجعك
نزلته وكعد على الجربايه صافن على خواته شراح يوخر هاي الصوره من باله ياربي منريد شى بس رحمتك جريت نفس وصافنه عليهم وحايره اريد اروح للمستشفى ذوله منو الهم سديت الباب ونزلت سويت اكل الهم اشتغل وابجي كل قطعه هنا ايدها بيها صعدت الاكل اكلو اله يونس شلع گلبي كون اكل لكمه اخذت شرهب غسلت الها وبدلت لكيت بان مسويه ممه الها وشبعانه وغسلت لبلال وبدلت اله
حبيبتي بنتي عينج على اخوتج انزلو جوه يم بيبي وضلو يمها
بان : وانتي ماما تعوفينا وترحين
بديعه : ارجع ياامي بس عينج على اخوتج نزلت على عمتي اوصيها على الجهال مااكدر ابقى هنا يمهم روحي يمها
دخلت عليها لكيتها حاطه الفوطه وتبجي
كابلتها وابجي
عمشه : يمه مواته گليلي
بديعه : ان شاء الله تعيش لتحجين هيج فدوة عمه
دخل جوحي وكعد يمها هاا يمه دزيتي عليه
عمشه : اخذت اخيك
جوحي : اي مثل ماكلتي وهسه هو يم ولد صاحبي
بديعه : صافنه عليهم اريد افهم
عمشه : اسمعني زين اريدن منك عينك على اخيك نجم انت وعبيد وتكابلوه وتركدون يمه اعرفنه هج ليها وكابلهه وكعد اخافن البت يصيبها شى الله لايكولها تاخذوه لو تعرفون تربطوه مااريدن مايحضر لادفنه ولا عزه
بديعه : ياستار عمه شلج بهذا الحجي ليش تفاولين عليها ان شاء الله تصحى ومابيها شى
عمشه : يايمه شريدن انه كون ترد لويلادها ونذر عليه اذبح لوجهه الله لون كامت على رجولهه چا هيه حسبت بتي وگلبي موجر عليهه انه احذر من الزمن لو دار وغدرنا والبت صار عليهه الكدر مااريدن العزه يصير اثنين نجم مشلوش وماضل بعگله ومااريدن يلطم كدام الوادم عليها راح يعرفون شجرالها والبت تنبش وماحد يرحم بيها مااريدنهه سالوفه الدرب ونسوان وزلم يسولفون بشرفهه الوادم عليهه الظاهر يبتي
تاخذ نجم وتذبه بمخزن حجي هلال تاخذ المفتاح منه گله امي عدها شغيله گلها جم يوم وترده وهو رجال ابن حموله مايردني وان صار الگدر تربطوه وهناك تركدوه وشوكت مافضت انه اكولن شوكت تردوه
جوحي : صار يمه
عمشه : مااريدن صمد ونجم يتشاوفون واحدهم يذبح الثاني وليداتي الشيطان دخل بينهم وربكم اليسترهم
بديعه : مكدرت احجي كلشي واكول بگلبي هسه تصير زينه وهذا الشى كله ميصير كمت لبست عباتي
عمشه : وين يلمدهربه
بديعه : اروح لاهلها اكول الهم على وكعتها بلكت من تحس بيهم تصحى بلكت اهلها من يجون يقوها
عمشه : لا تذكرين الصار طاحت البت وهذا هو
بديعه : اي مااحجي
طلعت من البيت توجهت لبيت اهلها دكيت الباب كم مره يله طلع ابوها
شونك حجي
ابو فوزي : هله يابه خير
بديعه : نزلت دمعتي وكتله ذكرى بلمستشفى وحالتها خطره
ابو فوزي : بتي شبيهه احجي
توتر وركض على زوجته واجت تركض
بديعه : خاله ذكرى موزينه تعالو الها فدوة بلكت تصحى من تشوفكم تحس بيكم
يمه بتي من عمري على عمرها شبيهه مثل الورد جانت قبل كم يوم يمي
بديعه : وكعت من الدرج والوكعه موزينه
ركضو ليجوه وخطيه يبجون وميعرفون شيسون لعد ليش عفتوها اذا هيج تحبوها اوووف تعالي شوف حال ابوج وامج شون مهبوطين عليج
رجعت اشوف نجم ماكو مبين رجعت للمستشفى لكيت جوحي يريد يطلع
اجي وياك بس اوصي عمتي على الجهال نزلتهم بغرفة عمتي وصيتها واكدت على بان وذني الحقيرات الفوك حبسن روحهن بغرفهن طلعت من البيت لكيت اهل ذكرى وجوحي منتظريني طلعنا اربعتنا واني لازمه ايد امها على ساعه توكع بلشارع من الهبطه
اخذنا تكسي ورحنا للمستشفى واول مدخلنا لكيت خوله حاطه راسها على الحايط وكاعده وصافنه ونجم مثلها بس دموعه تنزل
هااا شصار
خوله : كولشي ماكو نفس حطتها هاي اهل ذكرى
بديعه : اي بلغتهم
خوله : زين تسووين الجهال شفتيهم
بديعه : زينين بس يونس وضعه موزين شايف امه من دافعها صمد
خوله : انكسرت رگبته عساه مات ونخلص منه ااااخ لو بيدي الزمه واحركه وينه الحقير ولا اجه ولا شافها
بديعه : عمتي بعدت صمد عن نجم تعرف هسه نجم بلمستشفى وخلت جوحي ياخذه ليم صديق ويمكن خايف ليصير بيها شى يعني مثل الخاتل
خوله : دومه جبان ونذل هادئ بس كله البله من جواه مثل الحيه يلدغ ويضم راسه
بديعه : ميفيد الحجي ماكو غير ندعيلها الله يعديها على خير
عدى اليوم الاول وماكو اي تحسن فاقده والدكاتره طابين طالعين
وثاني يوم نفس الحاله وكلنا كاعدين ومرابطين بلمستشفى واحدنا يروح ساعه ويرجع وخاصه جوحي وعبيد ابد متركو نجم حسب وصيه عمتي اما اني اروح ساعه للبيت اتأكد من وضع الجهال وارجع وهمزين عمتي بيها حيل وقايمه بواجبهم اله ذني النذلات ولا يمهن يطبخن وعادي ولا عبالك الصار من جوه راسهن
ثالث يوم كاعدين وكلنا ايدنا على خدنا دخل فوزي يركض تفاجأنه من جيته ثاري الاب منطي خبر لولد ورايحله لديالى شفت فوزي وعيونه تلالي كوه حاصر دمعته خوفه ورجفته عليها جانت ذكرى مستعده تنطي عمرها كله وتشوفها ومع الاسف انطت ومشافتها
فوزي : وينها يابه
ابو فوزي : لاحس ولا حركه اختك راح تضيع من ايدنا حبيبة گلبك جوه بليه حركه
فوزي : اريد اشوفهه
ابو فوزي : ميقبلون شكد حاولت وياهم بس الايد مابستها محد يرضى اشوفهه
فوزي : بس فهموني الصار منو سوه هيج بيها وعيونه تتنقل على كل واحد بينا
جان يكول عبيد
عبيد : رجعت من السوك صايمه وتعبانه افترت الدنيا بيها وكعت من الدرج والوكعه على راسها تأذت وهي منا تعبانه متحمل جسمها
فوزي : ليش ممصدكم
جوحي : نجذب عليك ابو مهدي كدامك جهال الصار كلنا الك اختك وكعت والله يشافيها
فوزي : لعد وين رجلها
عبيد : بلبصره بشغل وميدري بلصار وماعدنا احد ندزه يبلغه كلنا كدام عينك مرابطين هنا
فوزي : يعني مرته تعبانه وبالانعاش ومكدر واحد منكم وكلف نفسه يبلغه
جوحي : متوقعنا هيج تتأخر حالتها واذا طولت بعد اني بنفسي اروح لتعيط ماله داعي تذب حركتك بينا
باوع فوزي على نجم الجان فاصل من الدنيا كلها واكثر واحد مدمر بينا
ضل يروح ويجي ساعه يكعد ساعه يتحرك احس بيه مثل الواحد كاعد على بركان وميعرف شوكت يطك علينا
طلع من المستشفى فوزي وره ساعتين جاب صديق وياه طبيب يعرفه وابن عم الطبيب يشتغل بلمستشفى ومن ناس لناس وعرف قبلو يدخل فوزي يشوفها
شخص واحد بس بلحظتها كلنا عيونا تتوسل نشوفها بس بلشافعات يله قبلو على فوزي
مثل كل مره فوزي يسوي المستحيل علمودها صارنا كم يوم معرفنا ندخل الها وهو بكم ساعه دبر عرف وراح يدخل
دخل بخطوات وعيونه على اخته الي مدده وراسها ملفوف وجهه مورم
فوزي : اجيتج يابنتي وقطعة من روحي اجيتج واني طالب تسامحيني كومي يابعد روح اخوج وخلي اخذج بحضني مشتاقيتي لفوزي مشتاقيتي ادلعج واشاقيج والله گلبي قسى عليج لان مااكدر اتحمل بشر يقلل منج
انتي اغلى من جهالي واعز من روحي لتأذيني ذكرى وتعاقبيني وتردين السويته بيج وتعوفين اخوج وحده
كومي اترجاج ونزل باس ايدها ويبجي بقهر رفع عيونه عليها قطرات بسيطه تنزل من عيونها وهي مغمضه كمز من مكانه وصاح الطبيب كلنا صحت وعت بس الدكتور كاال
الدكتور : حاله طبيعيه مرات الدماغ ينطي ايعازات
وتصير ردات فعل طبيعيه
ام فوزي : شحجيت وياها يمه
فوزي : توسلت بيها ترد اليه والله اصالحها ومااخلي بگلبها مني حتى لو ابوس ايدها وترجع لحضني وشتريد اني حاظر حتى مستعد لعيونها ارجع لبغداد
خوله : بعد وكت
اندار عليها فوزي مستغرب منها
خوله : شكو صفنت بوجهي وين جنت من احتاجتك وين جنت من تتوسل على شوفتك وشوفت اهلها وحرمتها حتى اطب بيت ابوك وتروح بلبوكه حتى تشوف امها وايدها على گلبها اذا دخلتها يمنا أذتها مره فأنت وابوك اذيتوها الف مره من تبريتو منها لتسوي نفسك هسه حنين سنين وانت مارف گلبك عليها
عبيد : اسكتي يمعوده
بديعه : تعاالي شوو وسحبتها من بينهم وطلعنا اني وياها بره
شجاج
خوله : خنكني من جاي هسه يصير حنين الحنين يابدعه مينتظر سنين يصالح الي يحبه ماينطي گلبه اسبوع مو سنين وهو كل ميشوفها يبجيها ويسم دمها ومن شافها هيج حالتها يله تندم وجاي يدك صدره بطران هذا
بديعه : اخته ومكسور عليها على كيفج عيب هم من اهلها
خوله : غير تصحى اووف اخذها من ايدها واشمرها على هذا الجاي تالي وكت وصاير حنين واكوله اذا صدك تريد اختك طلعها من هاي الزريبه العايشه بيها
بديعه : ان شاء الله اطيب ياارب
ضلينا كاعدين باجر مصباح العيد وهيه مابين اي استجابه منها رجعنا وره ساعه
ساعه ٢ بليل وبعد ساعات الناس تودع رمضان وتستقبل العيد وصلاه العيد والناس فرحانه باجر تعيد والجهال حاطين يم روسهم ملابسهم حتى يعيدون بيها
واحنا نتراكض ويه الاطباء منعرف شجاهم لحد مطلع دكتور الخفر وكال
البقيه بحياتكم
ذكرى جانت احلى ذكرى انزرعت بگلوبنا جانت الباب الهادئ الي يدخل الضحكه لبيت كله احقاد وسحوره وشعوذه واذيه الباب الوحيد الي من جان مفتوح يعبر نسمات معطره بلورد ضحكتها وهي تصعد وتنزل شقاها وصبرها من تحفظ عمتي الصلاه وتكول تحفظين غصب عنج يله عموشه عيدي ورايه
دموعها وهي تتذكر وتحن لاهلها المها وقهرها وهي تشوف خيانه رجلها صبرها وقله حيلتها من جانت تحط اللكمه بحلك الكل وخاصه جهالها الكل ياكل ويشبع يله تاكل حتى الطفله الجانت من ضرتها صارت احن من امها عليها وقصرت على نفسها بلكمتها وبلبستها وحطتها بروحها وماقصرت على شرهب
ذكرى اختي الما ولدتها امي اليوم ماتت روحي وياها اتيتمت مو بس جهالها اني هم يتيمه لفراكها اليوم ماتت اطهر انسانه عرفتها
قلب صافي وطاهر همها بلدنيا جهالها وشون تخلي هذا البيت نظيف وطاهر مرادت شى غير بيت نظيف ينذكر اسم الله بيه مرادت غير عائله طيبه تحبها وتعوضها عن خسارت اهلها مرادت شى غير رجال يحس بيها ويحبها واطفال يتربون احسن تربيه بعيد عن جو العتيك والغدر والسحر والانانيه
غطو وجها وطلعوها من الانعاش واحنا شفناها لو گلبناها للمستشفى اول واحد نجم ضرب راسه حيل بلحايط ويعيط مباشره جوحي وعبيد سحبوه واخذوه سحل اهلها منتبهو لان جانو مثل نجم منهارين
واني وخوله بس نلطم
مدنلطم عليها لا نلطم على روحنا بلياها جانت هيه مهونه علينا عيشتنا بهذا البيت
ركضنا وراها وفوزي حاضنها ويبجي ويعيط مثل المره مو اقل منه بس بعد ميفيد البجي ولا العياط ولا اللطم
ساعات وانرفع اذان الفجر دخل فلاح يركض ويبجي عليها ماكو واحد ميحبها من ولد عمشه اله رجلها
ويه صلاه العيد طلعناها من المستشفى للمغيسل مكدرنا ناخذها للبيت لان كالو راسها بعده ينزف گبل للمغيسل واجت مناك عمتي صرخت صريخ وكفت المغيسل على حيله
عمشه : ولج يمه يلحنينه اليوم التراب يتوسد عليج اليوم وحدج بلكبر مالج ونس
يمه النومه مو الج يم طول الحلو يم ضحكه ترد الروح ردي يذكرى وليداتجن المن يضلون
أجاني العيد وانتي بعيدة عني
مهضومة بغيابچ زاد وني
حبايبنة اعلة فگدچ هل أجني
بحزن وادموع أجني وعايدني
يمه يبعد بيتي عبن بعدج منهو ليه منهو ينشدني على صلاتي منهي يكعد جاري ويطيب خاطري يمه انه ماجابتج بطني واحسنج اعز من رويحتي عليه يذكرى
يم يونس يم وجهه الگله يضحك ماترضى يضيكون خاطري چا انه ردتج ونس للشيبه وتغسليني بيدج مو انه الاغسلج يايمه
ييمة شلون عفتيني ورحلتي
اخذتي الروح يمة بيوم شلتي
لا جيـتي عليــة ولا سألتي
بديعه : الناس تجي اول اليوم تشوف موتاها واحنا ندفن الغاليه غسلناها اني وعمتي وامها خوله باب المغيسل مقبلت تدخل كملنا الغسل سريع لان ينزف خشمها وراسها امها وكعت وفقدت شلتها وطلعتها بره واخذتها مني خوله حالنا يبجي الكافر طلعناها بعد ماجفنا وكملنا كلشي ولطريق النجف طلعنا شكد جنت اكول فقد العزيز يأذي واخوتي واني صغيره استشهدو بس مو مثل ذكرى حسيت رايحه ادفن نفسي مو ادفنها
وصلنا للمقبره
اجه صمد يبجي بلحظتها شاشت خوله هي شافته ملخت شعرها وتعيط بنص الناس
كله من وراك كوووواد المن جاااي يناقص ارتاحيت تعاال ادفنها بيدك تعاااااال لك انت واحد بليه شرف لكم هذا هذا سبب موتتها لزمتها عمتي وحطيت ايدها على حلكها وفلاح جرها حيل وصعدها بلسياره عرفت راح يرزلها
فوزي نايم فوك تابوت اخته ويحاجيها بصوت ناصي منعرف شيكول وامها وابوها بلكاع يمها
وحفرو ودفنوها ونزلو التراب عليها جنا كلنا نودعها واحدنا ميعرف شيسوي يعيط يلطم فاقدين ماتت وهي صايمه وعطشانه ومظلومه اااااخ ياذكرى موتج لجمه بلروح
رجعنا من الدفنه وخوله عيونها على الشباك وهاديه مدري شحجو وياها وخلوها ساكته هيج بس دموعها مابطلت
دخلنا للبيت والمنطقه كلها تنتظر
دخلنا ومليان نسوان المنطقه وكلها تلطم وتلاچي عمتي كطعت روحها وخوله عافت الكل ودخلت للغرفه حضنت الجهال الجانت عيونهم تتنقل وميعرفون شديصير
والخوف من اللطم مسيطر عليهم
ايام الفاتحه ساهره وصالحه شايلات الفاتحه وينظفن ويسون جاي ويطبخن للنسوان الي يشوفهن يكول ياعيني شكد يحبن مرت حماهن
اني وخوله ساكتات حتى مكدرنا نساعد بلفاتحه ايدنا بايده وعقلنا مو براسنا
اباوع لوجهه يونس بس يبجي ويكول بابا موتها لماما ومن ينام يغفى وراها يعيط ويبجي من اشوف جهالها اكولها تعالي شوفي حالهم بعدج
حادثت ذكرى تقيدت حادثه عاديه وكعت من الدرج وانتهى حتى شكوه ماكو حتى يحققون وتقرير المستشفى يأكد حادث لان اي كدمات للضرب والتعنيف بجسمها ماكو
لان صمد ملحك يضربها شالها وشمرها وكتلها خلاص
اباوع ساهره وصالحه يطبخن لفاتحتها وصمد واكف بلجادر مالتها مهزله يكتلوها ويشلون عزاها
ايام العيد ال ٣ صارت ايام فاتحتها
ثالث يوم الفاتحه سألت عن نجم
عمه وين نجم
عمشه : تسودن الوليد چا اخوته مرابطيه وكوه كاضي يصارخ مثل المخبل انه شون بيه گليلي هذا لون رد هنا يگتل اخيه حالف يگتله
بديعه : يستاهل صمد وفوكاها بكل عين صلفه واكف بفاتحتها
عمشه : يمه چا شنكول للوادم زلمتهه وينه واخيها لون حس بشى مايهدا اله يدفن صمد جارها چا هو تزوج عليها فتحله راسه وطفاله عينه چا لو يعرف صمد گاتلهه وسبب موتتها وربج مايضل صمد ليله يتنفس الهوا وهذا وليدي وانه مابيدي يبتي عبن الضنى غالي موش بيدي اسلم وليدي گلبي مايسويها يبدعه
و
بديعه : وذكرى يعمه مو غاليه
عمشه : وحك روحهه الطيبه الطاهره اعز من بنيتي لجن وكفاتها ماتنسي
وصمد بزر بطني چا شون اگصم رويحتي نصين انه حايره بنجم المسودن يماااااي الوليد يحمس برويحته لا يرضى يشرب ماي لا ياجل وماعلى لسانه غير انه جتالك يصمد
چا تالي عمري وليداتي يتذابحون مابطل بچي ونحيب عليهه اعرفنه يهواها وانه چا خوفي لا تموت ونجم مايضل بعقله وهااي جدامج
بديعه : وشراح تسوين
عمشه : تفض الوادم ويكفون الجادر وادزن صمد للبصره مايضل هنا انه اريدن وليداتي ولجن مايصير دم بينهم واحدهم يندفن والثاني ينعدم اجفي الشر وابعدهم لون مابربج يفرجها ويبرد الگلوب
بديعه : عساها لا بردت وكمت وعفتها فاتت من يمي صالحه وساهره لابسات اسود وعصب على راسهن ياعيني السواد والحزن ينكط منهن
محجيت اي شى شحجي شكول اني لهسه مت مستوعبه هي ماتت اكول طالعه وراح ترجع
طبيت للغرفه لكيت خوله تكمط شرهب متعرف حيل بس احسن من ماكو
بديعه : اساعدج
خوله : لا
بديعه : ليش هيج ساكته طول الوكت
خوله : شتردين اسوي
بديعه : باعي عليه انتي من تسكتين اخاف منج شكالو الج بلمقبره وسكتوج
خوله : عبالهم خوله القديمه الي تخاف على اخوتها والي تكرب وتوكل وتنوم وادري حتى يصيرون حزام ظهرها ميدرون اني من يوم كسرتي واني معتبرتهم لا شئ بحياتي
بديعه : وشعجب سكتي
خوله : العياط والهوسه متفيد اريد شى منج
بديعه : خير كولي
خوله : جهال ذكرى مااريدهم يحتاجون شى اعرف الحمل زاد عليج بس ماعندي غيرج مأمنه بيها ذني لا عبالج تابن وعقلن بلعكس البيت ضلن الهن وحده ماتت والثاني اطلكت وانتي يعرفوج راح تسكتين وتلتهين بلجهال
بديعه : وانتي
خوله : اني بعد مده ادور شغل لازم اشتغل واعين امي واعين ذوله الجهال يرادلهم مصرف
بديعه : وابوهم الناقص
خوله : هذا ماتعبر الاربعين اله وهو مدفون يمها
بديعه : شراح تسوين يمعزايه عمتي حابسه نجم وتعرف اذا تعوفه راح يگتل صمد
خوله : خليها لامي تحامي لهذا وذاك هو هم نجم مو خير لو ساكت او ناكر مجان صار كل هذا بس عقاب نجم اقوى من عقاب صمد لان نجم راح يضل طول عمره يحس هو سبب موتتها هو حامل ذنبها انتهت حياته حتى اذا رجع يعيش مستحيل يعيش طبيعي اقلها يكره الدنيا ويتمنى الموت كله ليله وهذا اقوى عقاب بلدنيا من تموت بعينج الرغبه ان تعيشين وتحسبين لليوم وللشهر وللسنه وتكولين شوكت اموت حتى ارتاح يضل ياكل بروحه اكل
بديعه : وصمد
خوله : عوفي يمي اريد منج باجر ماطول هوسه محد يحس تراقبين الجو
بديعه : شراح تسوين
خوله : راح اروح لفوزي واذا هو صدك حنين ويحب اخته خلي ياخذ بثارها
بديعه : شتكولين الع عزه العزاج
خوله : باجر رايحه لفوزي واكوله صمد الكتل اختك وخلي نشوف وره جم يوم يجي خبر صمد
بديعه : لج ميرحمه راح يموته يعني بيدج تقدمين اخوج للموت
خوله :وبشر القاتل بالقتل و لو بعد حين
بديعه : خايفه عفيه
خوله : راقبي الطريق ومالج دخل
بديعه : الليل منمته حسيت اكتل بشر بس من اذكر ذكرى وموتتها اكول حيل بيه لان طلع منها بدون عقاب لو مسجون على الاقل اكول اخذ عقابه شنو ذنبها بعز شبابها تندفن وتعوف ٣ جهال حتى مشبعو من ريحتها
ثاني يوم بقيت الوب والناس رغم رابع يوم الفاتحه والجادر انشال بس تروح وتجي وخبصه وطبخ
خوله طلعت من باب المطبخ بعد ما تأكدت ساهره وصالحه ملتهيات
لكت فوزي باب بيتنا واكف لان جيران واكفين واخوتي بعد مسافه عنها بس صمد ماكو
جان تصيحه وكف متفاجئ منها تقرب عليها خير تفضلي
مساء الـ🥀ـورد باجر ان شاء الله استراحه لان حيل نفسيتي تعبت بسبب هذا البارت
دمتم بخير
يتبع ....
